တၢ်မၤလိ ၃
ယဟိဝၤယွၤ မၤစၢၤနၤလၢ နလဲၤခီဖျိတၢ်ကီတၢ်ခဲကန့ၢ်
“ယဟိဝၤယွၤအိၣ်ဒီး စီၤယိၤသး . . . ယဟိဝၤယွၤ ဒုးကဲထီၣ်လိၣ်ထီၣ် တၢ်လၢအမၤဝဲ ကိးမံၤဒဲး.”—၁ မိၤၡ့ ၃၉:၂, ၃.
တၢ်သးဝံၣ် ၃၀ ယသကိး, ယပၢ်, ယယွၤ
တၢ်မၤလိအံၤ အတၢ်တိာ်ပာ် a
၁-၂. (က) ဘၣ်မနုၤအဃိ ပထံၣ်ဘၣ် တၢ်ကီတၢ်ခဲလဲၣ်. (ခ) လၢတၢ်မၤလိအံၤန့ၣ် ပကတဲသကီး တၢ်ဂ့ၢ်မနုၤလဲၣ်.
ပကဲယဟိဝၤယွၤအပှၤဂီၢ်မုၢ် နာ်က့ ပသ့ၣ်ညါလၢ ပကထံၣ်ဘၣ် တၢ်ကီတၢ်ခဲ. လံာ်စီဆှံတဲဝဲလၢ “ဒ်သိး ပကလဲၤနုာ်လၢ ကစၢ်ယွၤ အဘီမုၢ်အပူၤအဂီၢ် ပဘၣ်လဲၤခီဖျိ တၢ်နးတၢ်ဖှီၣ် အါမံၤ.” (မၤတၢ် ၁၄:၂၂) ပသ့ၣ်ညါစ့ၢ်ကီးလၢ ပမ့ၢ်အိၣ်ဘၣ်လၢ ဟီၣ်ခိၣ်သီမၣ် ပတၢ်ကီတၢ်ခဲ ကလီၤမၢ်ကွံာ်ခဲလၢာ်. ဒီးလၢဟီၣ်ခိၣ်သီန့ၣ် “တၢ်သံတအိၣ်လၢၤဘၣ်. ဒီးတၢ်သူၣ်အုးသးအုးမ့ၢ်ဂ့ၤ, တၢ်ဟီၣ်တၢ်ယၢၤမ့ၢ်ဂ့ၤ, တၢ်လၢအဆါမ့ၢ်ဂ့ၤ တအိၣ်လၢၤဘၣ်.”—လီၣ်ဖျါ ၂၁:၄.
၂ ခဲအံၤန့ၣ် ယဟိဝၤယွၤ တမၤလီၤမၢ်န့ၢ် ပတၢ်ကီတၢ်ခဲဒံးဘၣ်. နာ်က့ ဒ်သိးပလဲၤခီဖျိ ပတၢ်ကီတၢ်ခဲ ကန့ၢ်အဂီၢ် အကမၤစၢၤပှၤ. ဖဲတၢ်မၢဖိပီလူး ကွဲးလံာ်လၢ ဒီပုၢ်ဝဲၢ်မုၣ်ခွါလၢ ဝ့ၢ်ရိမ့ၤအခါ အကွဲးဖျါထီၣ်ဆိ တၢ်ကီတၢ်ခဲလၢ ဒီပုၢ်ဝဲၢ်ဖဲန့ၣ်တဖၣ် ထံၣ်ဘၣ်ဝဲ ဝံၤဒီးအကွဲးဝဲလၢ “ပမၤနၢၤတၢ် လၢလၢပှဲၤပှဲၤ ခီဖျိပှၤတဂၤလၢ အအဲၣ်ပှၤ အဃိ.” (ရိမ့ၤ ၈:၃၅-၃၇) တၢ်လၢစီၤပီလူး ကွဲးဝဲအံၤန့ၣ် ပသ့ၣ်ညါဘၣ်လၢ ဖဲပလဲၤခီဖျိ တၢ်ကီတၢ်ခဲအခါ ယဟိဝၤယွၤ ကမၤစၢၤပှၤ. ခဲအံၤ ပကတဲသကီး ဘၣ်ဃးဒီး ယဟိဝၤယွၤ မၤစၢၤ စီၤယိၤသးဒ်လဲၣ် ဒီးယဟိဝၤယွၤ ကမၤစၢၤနၤဒ်လဲၣ်.
ဖဲတၢ်ဆီတလဲသး ချ့မးအခါ
၃. စီၤယိၤသး အတၢ်အိၣ်မူ ဆီတလဲသး ဒ်လဲၣ်.
၃ စီၤယၤကိာ်န့ၣ် အအဲၣ်အဖိခွါ စီၤယိၤသး ဒိၣ်မး. (၁ မိၤၡ့ ၃၇:၃, ၄) အဃိ စီၤယိၤသး အကၠီတဖၣ်န့ၣ် ကွၢ်အီၤတမုာ်ဘၣ်, သးက့ၣ်အီၤ ဒီးဆါလီၤကွံာ်အီၤလၢ ပှၤမံးဒယၣ်ဖိ အအိၣ်. ပှၤမံးဒယၣ်ဖိတဖၣ်န့ၣ် လဲၤကိးဝဲ စီၤယိၤသးလၢ ကီၢ်အဲၤကူပတူး ယံၤဝဲအမံးလာ် လၢအကယၤညါ. ဒီးဖဲန့ၣ် အဝဲသ့ၣ်ဆါကွံာ် စီၤယိၤသးလၢ စီၤပိၤတံၤဖၢ် လၢအကဲဝဲ ဖၤရိၤအပဒိၣ်ဒီး အပှၤခိးတၢ်ဖိအခိၣ်န့ၣ်အအိၣ်. စီၤယိၤသးန့ၣ် အကဲပှၤလၢ အပါအဲၣ်အီၤဒိၣ်မး နာ်က့ခဲအံၤန့ၣ် အကဲထီၣ်က့ၤလၢ ပှၤအဲၤကူပတူးဖိ အကုၢ်ဟီ. အဃိ အတၢ်အိၣ်မူ ဆီတလဲအသးချ့မး.—၁ မိၤၡ့ ၃၉:၁.
၄. တဘျီတခီၣ် ပကထံၣ်ဘၣ် တၢ်ကီတၢ်ခဲဒ်လဲၣ်.
၄ လံာ်စီဆှံတဲဝဲလၢ “တၢ်အၢတၢ်သီ ဘၣ်ပှၤကိးဂၤဒဲး.” (စံၣ်တဲၤတဲလီၤတၢ် ၉:၁၁, Holy Bible—Easy-to-Read Version) တဘျီတခီၣ်န့ၣ် ပထံၣ်ဘၣ် တၢ်ကီတၢ်ခဲ ဒ်သိးဒီး “ပှၤကိးဂၤဒဲး” ထံၣ်ဘၣ်ဝဲ. (၁ ကရံၣ်သူး ၁၀:၁၃) ဒီးခီဖျိလၢ ပကဲယ့ၣ်ၡူးအပျဲၢ်အဘီၣ်အဃိ ပှၤမၤကီမၤခဲပှၤ. အဒိ ခီဖျိလၢ ပတၢ်စူၢ်တၢ်နာ် အဃိ ပှၤတဲအၢတဲသီပှၤ, ပှၤထီဒါပှၤ ဒီးမၤအၢမၤနးပှၤ. (၂ တံၤမသ့း ၃:၁၂) ဘၣ်ဆၣ် ပမ့ၢ်ထံၣ်ဘၣ် တၢ်ကီတၢ်ခဲ တမံၤဂ့ၤတမံၤဂ့ၤ နာ်က့ ယဟိဝၤယွၤ မၤစၢၤပှၤသ့. ဖဲစီၤယိၤသးထံၣ်ဘၣ် တၢ်ကီတၢ်ခဲအခါ ယဟိဝၤယွၤမၤစၢၤအီၤဒ်လဲၣ်.
စီၤယိၤသးန့ၣ် ပှၤဆါကွံာ်အီၤ လၢစီၤပိၤတံၤဖၢ်အအိၣ် ဒီးအဘၣ်ကဲကုၢ်နာ်က့ ယဟိဝၤယွၤ မၤစၢၤအီၤ (ကွၢ်လံာ်အဆၢ ၅)
၅. စီၤပိၤတံၤဖၢ် သ့ၣ်ညါဝဲလၢ စီၤယိၤသး မၤတၢ်ကဲထီၣ်လိၣ်ထီၣ် လၢမတဂၤ အဃိလဲၣ်. (၁ မိၤၡ့ ၃၉:၂-၆)
၅ ဖး ၁ မိၤၡ့ ၃၉:၂-၆. စီၤပိၤတံၤဖၢ် ထံၣ်ဘၣ်ဝဲလၢ စီၤယိၤသးန့ၣ်ဖၠဲးဒိၣ်မး ဒီးအမၤတၢ်ဆူၣ်မး. ဘၣ်မနုၤအဃိ စီၤယိၤသးဖၠဲးဒိၣ်မးလဲၣ်န့ၣ် စီၤပိၤတံၤဖၢ် သ့ၣ်ညါဝဲ. စီၤပိၤတံၤဖၢ် ထံၣ်ဘၣ်ဝဲလၢ “ယဟိဝၤယွၤ ဒုးကဲထီၣ်လိၣ်ထီၣ် တၢ်လၢ[စီၤယိၤသး] မၤဝဲ ကိးမံၤဒဲး.” b လၢခံစီၤပိၤတံၤဖၢ် ဒုးကဲထီၣ်စီၤယိၤသးလၢ အခ့အပှၤ လၢအနာ်အီၣ်ဝဲဒိၣ်ကတၢၢ် ဒီးအပာ်ထီၣ်အီၤလၢ အကတီခိၣ်ရိၤမဲတၢ်လၢ အဟံၣ်ပူၤ. စီၤယိၤသးမၤတၢ်ဂ့ၤမးအဃိ စီၤပိၤတံၤဖၢ် တလိၣ်ကိၢ်တၢ်နီတမံၤဘၣ်.
၆. စီၤယိၤသး န့ၢ်ဘၣ်မူဒါလီၤဆီနာ်က့ တၢ်လၢအဘၣ်သးဝဲ အဒိၣ်ကတၢၢ်န့ၣ် ကမ့ၢ်မနုၤလဲၣ်.
၆ ဆိမိၣ်ကွၢ်မီၤ နမ့ၢ်အိၣ်လၢ စီၤယိၤသးအလီၢ်န့ၣ် တၢ်လၢနဘၣ်သး အဒိၣ်ကတၢၢ်န့ၣ် ကမ့ၢ်မနုၤလဲၣ်. နဘၣ်သးလၢ စီၤပိၤတံၤဖၢ် နာ်အီၣ်နၤ ဒီးဟ့ၣ်နၤမူဒါ လီၤလီၤဆီဆီဧါ. မ့မ့ၢ် စီၤယိၤသးဒု အဘၣ်သးက့ၤလၢအဟံၣ် ဒီးက့ၤကဒါလၢ အပါအအိၣ်. စီၤယိၤသး န့ၢ်ဘၣ်မူဒါလီၤဆီ နာ်က့ အဘၣ်ကဲ စီၤပိၤတံၤဖၢ် အကုၢ်ဒံး. စီၤပိၤတံၤဖၢ်န့ၣ် အတဘူၣ်ထီၣ်ဘါထီၣ် ယဟိဝၤယွၤဘၣ်. ဒီးယဟိဝၤယွၤ တရဲၣ်ကျဲၤဝဲလၢ စီၤပိၤတံၤဖၢ် ကပျဲက့ၤ စီၤယိၤသးလၢ အဟံၣ်ဘၣ်. တဘျီအံၤဒု စီၤယိၤသးအတၢ်အိၣ်သး ကနးဒိၣ်န့ၢ်ဒံးလၢညါ.
ဖဲတၢ်အိၣ်သး နးဒိၣ်ထီၣ်အခါ
၇. စီၤယိၤသး အတၢ်အိၣ်သး နးထီၣ်ဒ်လဲၣ်. (၁ မိၤၡ့ ၃၉:၁၄, ၁၅)
၇ ၁ မိၤၡ့ အဆၢဒိၣ် ၃၉ န့ၣ် ပာ်ဖျါထီၣ်ဝဲလၢ စီၤပိၤတံၤဖၢ်အမါ ကွၢ်ဂ့ၤ စီၤယိၤသး ဒီးကွဲန့ၢ်လွဲန့ၢ်ဝဲ စီၤယိၤသး မၢ်မၢ်လီၤ. နာ်က့ စီၤယိၤသး တကနၣ်ဃုာ်အီၤ နီတဘျီဘၣ်. လၢခံဘျီ စီၤပိၤတံၤဖၢ်အမါ သးပှံၢ်ထီၣ်စီၤယိၤသး ဒီးတဲဝဲလၢ စီၤယိၤသးကဖီၣ်ဆူၣ်အီၤ. (၁ မိၤၡ့ ၃၉:၁၄, ၁၅.) စီၤပိၤတံၤဖၢ် နၢ်ဟူတၢ်ဂ့ၢ်အံၤဘျီဒု အပှံၢ်ထီၣ်တၢ် ဒီးအပၢနုာ်စီၤယိၤသး လၢဃိာ်ပူၤ. စီၤယိၤသးဘၣ်အိၣ်လၢ ဃိာ်ပူၤတဘျုးနံၣ်ညါ. (၁ မိၤၡ့ ၃၉:၁၉, ၂၀) လၢဃိာ်ပူၤန့ၣ် တၢ်အိၣ်သး မၤသးဒ်လဲၣ်. ဧ့ၤဘြံၤ အတၢ်ကတိၤ လၢအမ့ၢ် “ဃိာ်” န့ၣ်စီၤယိၤသး တဲစ့ၢ်ကီးဝဲ အခီပညီလၢ “တၢ်ပူၤယိာ်” လၢအလီၤဂာ် ဒ်သိးဒီး တၢ်ခံးအိၣ်ဝးတရံးအီၤ ဒီးအဆိမိၣ်လီၤသးလၢ အကျဲကတၢၢ်လံ. (၁ မိၤၡ့ ၄၀:၁၅) တကးဒံးဘၣ် လံာ်စီဆှံ ပာ်ဖျါထီၣ်ဝဲလၢ စီၤယိၤသးအခီၣ်န့ၣ် ပှၤစၢဃာ်ဝဲလၢ ထးသွဲ ဒီးပှၤကွီၤဃာ် အကိာ်ဘိဒီးထးကွီၤ အိၣ်ဝဲတတီၤဖိညါ. (စံးထီၣ်ပတြၢၤ ၁၀၅:၁၇, ၁၈) ခီၣ်ထံးခါန့ၣ် စီၤယိၤသးကဲဝဲကုၢ်တဂၤလၢ အကစၢ်နာ်န့ၢ်အီၤ ဘၣ်ဆၣ်လၢခံန့ၣ် အကဲထီၣ်က့ၤလၢ ပှၤဃိာ်ဖိဟီ. အဃိ စီၤယိၤသး အတၢ်အိၣ်သးန့ၣ် နးထီၣ်မၣ်နးထီၣ်.
၈. ပတၢ်ကီတၢ်ခဲ မ့ၢ်နးထီၣ်နာ်က့ ဘၣ်မနုၤအဃိ ပသ့ၣ်ညါလၢ ပလဲၤခီဖျိအီၤသ့လဲၣ်.
၈ နမ့ၢ်ထံၣ်ဘၣ် တၢ်ကီတၢ်ခဲဖးဒိၣ် ဒီးနဃ့ထုကဖၣ် ဆူၣ်ဆူၣ်လံနာ်က့ တဘျီတခီၣ်န့ၣ် နတၢ်အိၣ်သး ကနးန့ၢ်ဒံးလၢညါ. ဆၢကတီၢ်ခဲအံၤ ခီဖျိလၢ မုၣ်ကီၤလံၢ်ပၢဟီၣ်ခိၣ် အဃိ ယဟိဝၤယွၤ တမၤလီၤမၢ်န့ၢ် ပတၢ်ကီတၢ်ခဲ ခဲလၢာ်ဘၣ်. (၁ ယိၤဟၣ် ၅:၁၉) သနာ်က့ တၢ်ကီတၢ်ခဲလၢ နထံၣ်ဘၣ်တဖၣ်န့ၣ် ယဟိဝၤယွၤသ့ၣ်ညါဝဲ ဒီးအဘၣ်သးမၤစၢၤနၤ နီၢ်ကီၢ်. (မးသဲ ၁၀:၂၉-၃၁; ၁ ပ့းတရူး ၅:၆, ၇) တကးဒံးဘၣ် ယဟိဝၤယွၤ အၢၣ်လီၤဝဲလၢ “ယတလဲၤသဒၣ်နၤ နီတဘျီဘၣ် ဒီးယတပာ်တ့ၢ်နၤ နီတဘျီဘၣ်.” (ဧ့ၤဘြံၤ ၁၃:၅) နမ့ၢ်ဆိမိၣ်လၢ နကျဲကတၢၢ်လံနာ်က့ ဒ်သိးနလဲၤခီဖျိ နတၢ်ကီတၢ်ခဲကန့ၢ်အဂီၢ် ယဟိဝၤယွၤ ကမၤစၢၤနၤ. အဃိ ခဲအံၤပကတဲသကီး ဘၣ်ဃးဒီး ယဟိဝၤယွၤ မၤစၢၤစီၤယိၤသးဒ်လဲၣ်.
ဖဲစီၤယိၤသးအိၣ်လၢ ဃိာ်ပူၤအခါ ယဟိဝၤယွၤ မၤစၢၤအီၤအဃိ ဃိာ်ခိၣ် ပာ်ထီၣ်အီၤလၢ ကကွၢ်ထွဲ ပှၤဃိာ်ဖိကိးဂၤဒဲး (ကွၢ်လံာ်အဆၢ ၉)
၉. ဖဲစီၤယိၤသး အိၣ်လၢဃိာ်ပူၤအခါ ယဟိဝၤယွၤ မၤစၢၤအီၤန့ၣ် ပသ့ၣ်ညါဘၣ်ဒ်လဲၣ်. (၁ မိၤၡ့ ၃၉:၂၁-၂၃)
၉ ဖး ၁ မိၤၡ့ ၃၉:၂၁-၂၃. ဖဲစီၤယိၤသးအိၣ်လၢဃိာ်ပူၤအခါ အတၢ်အိၣ်သး မ့ၢ်ကီခဲဒိၣ်မးနာ်က့ ယဟိဝၤယွၤ မၤစၢၤအီၤဒ်လဲၣ်. ဃိာ်ခိၣ်တဂၤနာ်န့ၢ် စီၤယိၤသးဒ်သိးဒီး စီၤပိၤတံၤဖၢ်နာ်န့ၢ် စီၤယိၤသးလၢညါ. ဒီးတယံာ်ဘၣ်ဘျီ ဃိာ်ခိၣ်န့ၣ် ပာ်ထီၣ် စီၤယိၤသးလၢ ပှၤဃိာ်ဖိခဲလၢာ်အခိၣ်. လံာ်စီဆှံတဲဝဲလၢ “တၢ်လၢအအိၣ်လၢ စီၤယိၤသး အတၢ်ကွၢ်ထွဲ အဖီလာ်န့ၣ် ဃိာ်ခိၣ် တလိၣ် ဘၣ်ယိၣ်တၢ် နီတမံၤဘၣ်.” စီၤယိၤသးန့ၢ်ဘၣ် မူဒါတခါအံၤအဃိ အတဆိမိၣ်က့ၤထဲ အတၢ်ကီတၢ်ခဲဘၣ်. စီၤယိၤသး လီၤဘၣ်လၢဃိာ်ပူၤ ခီဖျိ ပှၤဆိမိၣ်ကမၣ်အီၤလၢ အဖီၣ်ဆူၣ် စီၤပိၤတံၤဖၢ်အမါ. နာ်က့ လၢခံန့ၣ် စီၤယိၤသး န့ၢ်ဘၣ်မူဒါလၢ အကဲဘၣ် ပှၤဃိာ်ဖိခဲလၢာ်အခိၣ်န့ၣ် တလီၤနာ်နီတစဲးဘၣ်. ဘၣ်ဆၣ် ၁ မိၤၡ့ ၃၉:၂၃ တဲဝဲလၢ “ယဟိဝၤယွၤ အိၣ်ဒီးစီၤယိၤသး ဒီးယဟိဝၤယွၤ ဒုးကဲထီၣ်လိၣ်ထီၣ် တၢ်လၢ စီၤယိၤသး မၤဝဲကိးမံၤဒဲး.” အဃိ ပသ့ၣ်ညါဘၣ်လၢ ပှၤလၢအမၤစၢၤ စီၤယိၤသးန့ၣ် အကဲဝဲ ယဟိဝၤယွၤ.
၁၀. ဘၣ်မနုၤအဃိ စီၤယိၤသး ကဆိမိၣ်ဘၣ်ဝဲလၢ အမၤတၢ်တကဲထီၣ် ခဲလၢာ်ဘၣ်လဲၣ်.
၁၀ ခဲအံၤ ဆိကမိၣ်ကွၢ် စီၤယိၤသးတၢ်အိၣ်သး တဘျီဒီး. စီၤယိၤသး အိၣ်လၢဃိာ်ပူၤ ဒီးအကဲထီၣ် ပှၤဃိာ်ဖိခဲလၢာ်အခိၣ် နာ်က့ နဆိမိၣ် အတူၢ်ဘၣ်ဝဲလၢ အမ့ၢ်မၤတၢ်တမံၤမံၤန့ၣ် အကဲထီၣ် ခဲလၢာ်ဧါ. စီၤယိၤသးတလီကီဝဲလၢ ဃိာ်ခိၣ်ကဟ့ၣ်အီၤမူဒါ လီၤလီၤဆီဆီဘၣ်. တၢ်လၢအလီကီဝဲ ဒိၣ်ကတၢၢ်န့ၣ် အဘၣ်သးဟးထီၣ် လၢဃိာ်ပူၤ. ဒီးဒ်သိး အကဟးထီၣ်ဘၣ် လၢဃိာ်ပူၤအဂီၢ် အမၢစ့ၢ်ကီး ပှၤဃိာ်ဖိလၢ ကဟးထီၣ်ဘၣ် လၢဃိာ်ပူၤတဂၤန့ၣ် တဲဘၣ်အဂ့ၢ်လၢ ဖၤရိၤအအိၣ်. (၁ မိၤၡ့ ၄၀:၁၄) ပှၤဃိာ်ဖိတဂၤအံၤ တတဲဘၣ် ဖၤရိၤလၢ စီၤယိၤသးအဂ့ၢ်ဘၣ်. အဃိ စီၤယိၤသးဘၣ်ဆဲးအိၣ်ဒံးလၢ ဃိာ်ပူၤခံနံၣ်ညါ. (၁ မိၤၡ့ ၄၀:၂၃; ၄၁:၁, ၁၄) သနာ်က့ ယဟိဝၤယွၤ ဆဲးမၤစၢၤ စီၤယိၤသးဒံး. ယဟိဝၤယွၤ ဆဲးမၤစၢၤအီၤဒ်လဲၣ်.
၁၁. ဒ်သိးဒီး ယဟိဝၤယွၤအတၢ်တိာ်ပာ် ကလၢပှဲၤထီၣ်အဂီၢ် ယဟိဝၤယွၤဟ့ၣ် စီၤယိၤသးလၢ တၢ်သ့တၢ်ဘၣ် ဒီးတၢ်ခွဲးတၢ်ယာ်လီၤဆီမနုၤလဲၣ်.
၁၁ ဖဲစီၤယိၤသးအိၣ်လၢ ဃိာ်ပူၤအခါ ယဟိဝၤယွၤ ဒုးမံမီၢ်ဝဲ စီၤပၤဖၤရိၤ တၢ်မံမီၢ်ခံခါ. အဃိ စီၤပၤဖၤရိၤ ဘၣ်သးသ့ၣ်ညါဝဲ တၢ်မံမီၢ်ခံခါအံၤ အခီပညီတဘျီဃီ. စီၤပၤဖၤရိၤ သ့ၣ်ညါဘၣ်ဝဲလၢ စီၤယိၤသးန့ၣ် အိၣ်ဒီးတၢ်သ့တၢ်ဘၣ်လၢ အကတဲဖျါထီၣ် တၢ်မံမီၢ်အခီပညီ အဃိ အမၢပှၤလဲၤကိးန့ၢ် စီၤယိၤသးလၢ ဃိာ်ပူၤ. ယဟိဝၤယွၤ မၤစၢၤစီၤယိၤသးလၢ အကတဲဖျါထီၣ် တၢ်မံမီၢ်အခီပညီ ဒီးမၤစၢၤအီၤလၢ အကဟ့ၣ်ကူၣ် စီၤပၤဖၤရိၤ. စီၤပၤဖၤရိၤ သ့ၣ်ညါဝဲလၢ ယဟိဝၤယွၤ မၤစၢၤစီၤယိၤသးအဃိ အပာ်ထီၣ်စီၤယိၤသးလၢ ပှၤကွၢ်ထွဲတၢ်အီၣ်အခိၣ် လၢကီၢ်အဲၤကူပတူးဒီဘ့ၣ်ညါ. (၁ မိၤၡ့ ၄၁:၃၈, ၄၁-၄၄) လၢခံ လၢကီၢ်အဲၤကူပတူးအပူၤ ဒီးတၢ်လီၢ်လၢ စီၤယိၤသးအဟံၣ်ဖိဃီဖိအိၣ်ဝဲ လၢကီၢ်ကနၤဧၣ်န့ၣ် တၢ်သၣ်ဝံၤလီၤဒိ အိၣ်ထီၣ်ဝဲနးမး. ခဲအံၤ စီၤယိၤသး အိၣ်ဒီးမူဒါလၢ အကမၤစၢၤ အဟံၣ်ဖိဃီဖိအဃိ အန့ၢ်ဘၣ် တၢ်ခွဲးတၢ်ယာ်လၢ အကဒီသဒၢ မ့းၡံအၤ လၢအက ဟဲလီၤစၢၤ လၢအဟံၣ်ဖိဃီဖိအကျါ.
၁၂. ဒ်သိး စီၤယိၤသး ကမၤလၢပှဲၤထီၣ် ယဟိဝၤယွၤ အတၢ်ဘၣ်သးအဂီၢ် ယဟိဝၤယွၤ မၤစၢၤအီၤဒ်လဲၣ်.
၁၂ ဆိမိၣ်ကွၢ် တၢ်ကဲထီၣ်သးလၢ စီၤယိၤသး တၢ်အိၣ်မူပူၤအံၤ. စီၤယိၤသးန့ၣ် အကဲဝဲ ကုၢ်ယိယိဖိတဂၤလီၤဒၢး, ဘၣ်မနုၤအဃိ စီၤပိၤတံၤဖၢ် ဘၣ်သးအီၤလဲၣ်. ဖဲစီၤယိၤသးကဲ ပှၤဃိာ်ဖိအခါ ဘၣ်မနုၤအဃိ ဃိာ်ခိၣ်တဂၤဘၣ်သးအီၤလဲၣ်. ဘၣ်မနုၤအဃိ စီၤပၤဖၤရိၤ မံမီၢ်တၢ် ဒီးစီၤယိၤသးဘၣ်ဟဲတဲဖျါထီၣ်န့ၢ်အီၤ တၢ်မံမီၢ်အခီပညီလဲၣ်. ဘၣ်မနုၤအဃိ စီၤပၤဖၤရိၤ ဃုထၢထီၣ် စီၤယိၤသးလၢ အကကဲဝဲ ပှၤကွၢ်ထွဲတၢ်အီၣ်အခိၣ် လၢကီၢ်အဲၤကူပတူး ဒီတဘ့ၣ်ညါလဲၣ်. (၁ မိၤၡ့ ၄၅:၅) တၢ်ကဲထီၣ်သးဒီး စီၤယိၤသးတဖၣ်အံၤန့ၣ် မ့ၢ်မတဂၤရဲၣ်ကျဲၤဝဲလဲၣ်. ပသ့ၣ်ညါလၢ ယဟိဝၤယွၤ ရဲၣ်ကျဲၤဝဲသပှၢ်တၢၢ်. ခီၣ်ထံးခါန့ၣ် စီၤယိၤသးအကၠီတဖၣ် ဘၣ်သးမၤသံအီၤ နာ်က့ ယဟိဝၤယွၤ မၤစၢၤအီၤအဃိ စီၤယိၤသးန့ၢ်ဘၣ် တၢ်ခွဲးတၢ်ယာ်လၢ အကမၤလၢပှဲၤထီၣ်ဝဲ ယဟိဝၤယွၤ အတၢ်ဘၣ်သး.
ယဟိဝၤယွၤ မၤစၢၤပှၤဒ်သိး ပလဲၤခီဖျိ ပတၢ်ကီတၢ်ခဲကန့ၢ်
၁၃. တၢ်လၢအကဲထီၣ်သးဒီးပှၤ ကိးမံၤဒဲးန့ၣ် အကဲဝဲ ယဟိဝၤယွၤ အတၢ်ရဲၣ်တၢ်ကျဲၤဧါ.
၁၃ စီၤယိၤသးအတၢ်လဲၤခီဖျိန့ၣ် ပမၤလိန့ၢ်ဘၣ် တၢ်မနုၤလဲၣ်. တၢ်ကီတၢ်ခဲ လၢပထံၣ်ဘၣ်တဖၣ်န့ၣ် မ့ၢ်ယဟိဝၤယွၤ ကမၤစၢၤပှၤ ကိးဘျီဒဲးဧါ. ဒီးပတၢ်အိၣ်သး မ့ၢ်ဂ့ၤထီၣ်က့ၤန့ၣ် မ့ၢ်အကဲဝဲ ယဟိဝၤယွၤ အတၢ်ရဲၣ်တၢ်ကျဲၤ ကိးဘျီဒဲးဧါ. တမ့ၢ်ဘၣ်, လံာ်စီဆှံ တသိၣ်လိဝဲ ကၠဲန့ၣ်ဘၣ်. (စံၣ်တဲၤတဲလီၤတၢ် ၈:၉; ၉:၁၁) သနာ်က့ ပသ့ၣ်ညါလၢ ပမ့ၢ်ထံၣ်ဘၣ်တၢ်ကီတၢ်ခဲန့ၣ် ယဟိဝၤယွၤ သ့ၣ်ညါဝဲ ဒီးဖဲပဃ့တၢ်မၤစၢၤလၢ အအိၣ်အခါ အနၢ်ဟူပှၤ ဒီးအသးအိၣ်မၤစၢၤပှၤ. (စံးထီၣ်ပတြၢၤ ၃၄:၁၅; ၅၅:၂၂; ယၡါယၤ ၅၉:၁) တကးဒံးဘၣ် ဒ်သိးပလဲၤခီဖျိ ပတၢ်ကီတၢ်ခဲကန့ၢ်အဂီၢ် ယဟိဝၤယွၤ မၤစၢၤပှၤသ့. အကမၤစၢၤပှၤဒ်လဲၣ်.
၁၄. ဖဲပထံၣ်ဘၣ် တၢ်ကီတၢ်ခဲအခါ ယဟိဝၤယွၤ မၤစၢၤပှၤဒ်လဲၣ်.
၁၄ ဖဲပထံၣ်ဘၣ် တၢ်ကီတၢ်ခဲအခါ ယဟိဝၤယွၤ မၤမုာ်ထီၣ်ပသး ဒီးအဟ့ၣ်ပှၤတၢ်ဂံၢ်တၢ်ဘါ ဖဲပလိၣ်ဘၣ် အဆၢကတီၢ်. (၂ ကရံၣ်သူး ၁:၃, ၄) အဒိ ဒီပုၢ်ဝဲၢ်ခွါအံစံၤ လၢအအိၣ်လၢ ကီၢ်ထၢၤမဲၣ်နၢၤစတါန့ၣ် ယဟိဝၤယွၤ မၤစၢၤအီၤဒ်န့ၣ်. ခီဖျိလၢ အတၢ်စူၢ်တၢ်နာ်အဃိ အဘၣ်အိၣ်လၢဃိာ်ပူၤ. နာ်က့ အတဲဝဲလၢ “ဖဲပှၤကသမံသမိးယၤလၢရူ တဂီၤန့ၣ် ဒီပုၢ်ဝဲၢ်ခွါတဂၤ ပၠးယၤ ယၡါယၤ ၃၀:၁၅ လၢအတဲဝဲလၢ ‘သုမ့ၢ်ပာ်သုသး ဂၢၢ်ဂၢၢ် ဒီးနာ်န့ၢ်ယၤန့ၣ် သုကအိၣ်ဒီး တၢ်ဂံၢ်တၢ်ဘါ.’ လံာ်စီဆှံတဆၢအံၤ မၤစၢၤယၤဒ်သိး ယကပာ်သးမုာ်မုာ် ဒီးယကနာ်န့ၢ် ယဟိဝၤယွၤ လၢသးဒီဖျၢၣ်. ဖဲယအိၣ်လၢ ဃိာ်ပူၤအဆၢကတီၢ်န့ၣ် ယဆိမိၣ်ထံ လံာ်စီဆှံတဆၢအံၤ အဃိ အမၤစၢၤယၤ ဖးဒိၣ်ညါ.” နၤမီၤ ယဟိဝၤယွၤ မၤစၢၤနၤ, အမၤမုာ်ထီၣ်နသး ဒီးအဟ့ၣ်နၤတၢ်ဂံၢ်တၢ်ဘါ ဖဲနလိၣ်ဘၣ်အဒိၣ်ကတၢၢ် အဆၢကတီၢ်န့ၣ် နနီၣ်ဘၣ်ဒံးဧါ.
၁၅-၁၆. လၢဒီပုၢ်ဝဲၢ်မုၣ်ထိရံၤ အတၢ်လဲၤခီဖျိန့ၣ် နန့ၢ်ဘၣ် တၢ်မၤလိဒ်လဲၣ်.
၁၅ ဖဲပဆိမိၣ်ထံက့ၤ တၢ်ကီတၢ်ခဲ လၢပလဲၤခီဖျိအီၤန့ၢ်တဖၣ်အခါ ပသ့ၣ်ညါဘၣ်လၢ ယဟိဝၤယွၤမၤစၢၤပှၤ. ဒီပုၢ်ဝဲၢ်မုၣ်ထိရံၤ လဲၤခီဖျိဘၣ်ဝဲဒ်န့ၣ်. ဒီပုၢ်ဝဲၢ်မုၣ်အံၤ အဖိခွါမ့စၢၤန့ၣ် အသံလၢ ခဲစၢၤတၢ်ဆါ. တချုးလၢအသံဒံးဘၣ်န့ၣ် အဘၣ်တူၢ်ဝဲခဲစၢၤတၢ်ဆါအိၣ် ဃုနံၣ်ညါ. အဃိ ဒီပုၢ်ဝဲၢ်မုၣ်အံၤ အသးဘၣ်ဒိထဲလဲၣ်န့ၣ် ပနၢ်ပၢၢ်သ့. ဒီပုၢ်ဝဲၢ်မုၣ်ထိရံၤ တဲဝဲလၢ “ဒ်ယကဲမိတဂၤအသိး တၢ်အိၣ်သးတခါအံၤန့ၣ် ယတူၢ်ဘၣ်အီၤ ကီကတၢၢ်. ဖဲယထံၣ်လၢ ယဖိဘၣ်တူၢ်တၢ်အခါန့ၣ် အနးဒိၣ်န့ၢ်ဒံး ယဘၣ်တူၢ်တၢ်. အဃိ ယဆိမိၣ်လၢ မိပါအဂၤတဖၣ်စ့ၢ်ကီး ကတူၢ်ဘၣ်တၢ်ဒ်သိးဒီးယၤ.”
၁၆ ဒီပုၢ်ဝဲၢ်မုၣ်ထိရံၤန့ၣ် ဖဲအထံၣ်ဘၣ်အဖိခွါ ဘၣ်တူၢ်တၢ်နးမးအခါ အသးဘၣ်ဒိ ဖးဒိၣ်ညါ. ဘၣ်ဆၣ်လၢခံန့ၣ် အဆိမိၣ်ထံက့ၤဝဲ ယဟိဝၤယွၤ မၤစၢၤအီၤဒ်လဲၣ်အဂ့ၢ်. အတဲဝဲလၢ “ဖဲယဖိခွါဆိက့ ဒီတကတီၢ်န့ၣ် ယထံၣ်ဘၣ်လၢ ယဟိဝၤယွၤ မၤစၢၤယၤ. ယဖိခွါဆိက့ နးမးအဃိ အထံၣ်လိာ်သးဒီး ဒီပုၢ်ဝဲၢ်မုၣ်ခွါတသ့ဘၣ်. နာ်က့ ဒီပုၢ်ဝဲၢ်မုၣ်ခွါတဖၣ် ဟဲဟးလၢအအိၣ် ဒီးဘၣ်ဟဲနီကါ ခံနၣ်ရံၣ်ညါ. လၢတၢ်ဆါဟံၣ်န့ၣ် ဒီပုၢ်ဝဲၢ်တဂၤဂၤ ဆ့ၣ်နီၤအိၣ်ခီးပှၤလၢ ကမၤစၢၤပှၤထီဘိ. တကးဒံးဘၣ် ပတၢ်လိၣ်ဘၣ်လၢ နီၢ်ခိတခီစ့ၢ်ကီး ဒီပုၢ်ဝဲၢ်မုၣ်ခွါတဖၣ်န့ၣ် ရဲၣ်ကျဲၤန့ၢ်ပှၤခဲလၢာ်. ပတၢ်အိၣ်သးမ့ၢ်ကီခဲနာ်က့ ပန့ၢ်ဘၣ် တၢ်လၢပလိၣ်ဘၣ် ထီဘိ.” ပထံၣ်ဘၣ်လၢ ဒ်သိးဒီး ဒီပုၢ်ဝဲၢ်မုၣ်ထိရံၤ ဒီးအဖိခွါ လဲၤခီဖျိတၢ်ကီတၢ်ခဲကန့ၢ်အဂီၢ် ယဟိဝၤယွၤ မၤစၢၤအဝဲသ့ၣ်.—ကွၢ်တၢ်လွံၢ်နၢၣ် လၢအခိၣ်တီမ့ၢ်ဝဲ “ ယဟိဝၤယွၤ ဟ့ၣ်ပှၤတၢ်လၢပလိၣ်ဘၣ် သပှၢ်တၢၢ်.”
တဘၣ်သးပ့ၤနီၣ် တၢ်လၢ ယဟိဝၤယွၤ မၤန့ၢ်နၤတဂ့ၤ
၁၇-၁၈. ဖဲပထံၣ်ဘၣ် တၢ်ကီတၢ်ခဲအခါ ဒ်သိးပတသးပ့ၤနီၣ် ယဟိဝၤယွၤ အတၢ်မၤစၢၤတဂ့ၤအဂီၢ် ပကဘၣ်မၤဒ်လဲၣ်. (စံးထီၣ်ပတြၢၤ ၄၀:၅)
၁၇ ဖး စံးထီၣ်ပတြၢၤ ၄၀:၅. ပှၤထီၣ်ကစၢၢ်တဂၤန့ၣ် အပာ်လီၤသးလၢ အကလဲၤတုၤလၢ ကစၢၢ်ဒီခိၣ်. ဖဲအထီၣ်ကစၢၢ်အခါ လၢကျဲန့ၣ် အထံၣ်ဝဲ တၢ်လီၢ်လၢအဃံလၤ အါတီၤအဃိ အကပတုာ် ဒီးကွၢ်ဝဲတၢ်လီၢ်တဖၣ်န့ၣ်. ဒ်ပှၤထီၣ်ကစၢၢ်တဂၤန့ၣ် မၤဝဲအသိး နၤစ့ၢ်ကီး ဖဲနလဲၤခီဖျိ တၢ်ကီတၢ်ခဲအခါ နကဘၣ်ပတုာ် ဒီးဆိမိၣ်ထံက့ၤလၢ ယဟိဝၤယွၤ မၤစၢၤနၤဒ်လဲၣ်. ကိးနံၤဒဲးန့ၣ် သံကွၢ်လီၤနသးလၢ ‘တနံၤညါအံၤ ယဟိဝၤယွၤ ဆိၣ်ဂ့ၤယၤဒ်လဲၣ်. ယတၢ်ကီတၢ်ခဲ အိၣ်ဒံးနာ်က့ ဒ်သိးယလဲၤခီဖျိအီၤ ကန့ၢ်အဂီၢ် ယဟိဝၤယွၤ မၤစၢၤယၤဒ်လဲၣ်.’ နမ့ၢ်သံကွၢ်လီၤနသး ဒ်အံၤန့ၣ် နကထံၣ်ဘၣ်လၢ ယဟိဝၤယွၤ မၤစၢၤနၤအါမး.
၁၈ ဘၣ်သ့ၣ်သ့ၣ် ပကဃ့ယဟိဝၤယွၤလၢ အကမၤလီၤမၢ်န့ၢ် ပတၢ်ကီတၢ်ခဲ ဒီးပမ့ၢ်ဃ့ဒ်န့ၣ်န့ၣ် အတကမၣ်ဘၣ်. (ဖံလံးပံၤ ၄:၆) ဘၣ်ဆၣ် ပကဘၣ်ဆိကမိၣ်ထံစ့ၢ်ကီး တၢ်မၤစၢၤလၢ ပန့ၢ်ဘၣ်လၢ ဆၢကတီၢ်ခဲအံၤ. ယဟိဝၤယွၤ အၢၣ်လီၤပှၤလၢ အကမၤဆူၣ်ထီၣ် ပဂံၢ်ဘါ ဒီးအကမၤစၢၤပှၤလၢ ပတူၢ်တၢ်ကန့ၢ်. အဃိ ပတဘၣ် သးပ့ၤနီၣ် တၢ်လၢယဟိဝၤယွၤ မၤန့ၢ်လၢပဂီၢ် နီတဘျီဘၣ်. ဒ်ယဟိဝၤယွၤ မၤစၢၤ စီၤယိၤသးအသိး ယဟိဝၤယွၤ ကမၤစၢၤပှၤဒ်သိး ပလဲၤခီဖျိ တၢ်ကီတၢ်ခဲကန့ၢ်.—၁ မိၤၡ့ ၄၁:၅၁, ၅၂.
တၢ်သးဝံၣ် ၃၂ အိၣ်လၢ ယဟိဝၤယွၤ အအိၣ်တခီ
a ပမ့ၢ်ထံၣ်ဘၣ် တၢ်ကီတၢ်ခဲန့ၣ် ပကဆိမိၣ်ဘၣ်လၢ ပမၤတၢ်တ “ကဲထီၣ်လိၣ်ထီၣ်” နီတမံၤဘၣ်. ဒီးဘၣ်သ့ၣ်သ့ၣ် ပကဆိမိၣ်လၢ ယဟိဝၤယွၤ မ့ၢ်မၤစၢၤပှၤမၣ် ပတၢ်ကီတၢ်ခဲ ကလီၤမၢ်. နာ်က့ စီၤယိၤသးအတၢ်လဲၤခီဖျိန့ၣ် သိၣ်လိပှၤ တၢ်လၢအရ့ဒိၣ်တမံၤ. ပမ့ၢ်ထံၣ်ဘၣ် တၢ်ကီတၢ်ခဲဘၣ်ဆၣ် ယဟိဝၤယွၤ ကမၤစၢၤပှၤလၢ ပလဲၤခီဖျိတၢ်ကန့ၢ်. ယဟိဝၤယွၤ ကမၤစၢၤပှၤဒ်လဲၣ်န့ၣ် ပကတဲသကီးလၢ တၢ်မၤလိတခါအံၤ.
b စးထီၣ်လၢ စီၤယိၤသးလဲၤကဲကုၢ် တုၤလၢအကဲထီၣ် ပှၤတီခိၣ်ရိၤမဲတၢ် လၢစီၤပိၤတံၤဖၢ်အဟံၣ်ပူၤန့ၣ် လံာ်စီဆှံ ပာ်ဖျါထီၣ်ဝဲ အဂ့ၢ်တစဲးလီၤ. ဘၣ်ဆၣ် နီၢ်ကီၢ်န့ၣ် တၢ်ဆၢကတီၢ်ယံာ်ဝဲ တဘျုးနံၣ်ညါ.