တၢ်မၤလိ ၂၉
ဆီၣ်ထွဲယ့ၣ်ၡူးလၢ အတီခိၣ်ရိၤမဲပှၤ
“ကယဲၢ်တၢ်စိတၢ်ကမီၤ လၢမူခိၣ်ဒီးဟီၣ်ခိၣ်န့ၣ် တၢ်ဟ့ၣ်လီၤယၤလံ.”—မးသဲ ၂၈:၁၈.
တၢ်သးဝံၣ် ၁၃ ခရံာ်, မ့ၢ်ပှၤဒိဂ့ၤတဲာ်ဘၣ်လၢပဂီၢ်
တၢ်မၤလိအံၤ အတၢ်တိာ်ပာ် *
၁. ဆၢကတီၢ်ခဲအံၤ ယဟိဝၤယွၤ အတၢ်ဘၣ်သးအိၣ်ဝဲဒ်လဲၣ်.
ဆၢကတီၢ်ခဲအံၤ ကစၢ်ယွၤဘၣ်သးဝဲလၢ ဘီမုၢ်တၢ်သးခုကစီၣ်န့ၣ် ကရၤလီၤအသးလၢ ဟီၣ်ခိၣ်ဒီဘ့ၣ်. (မၢ်ကူး ၁၃:၁၀; ၁ တံၤမသ့း ၂:၃, ၄) ပမ့ၢ်ကွၢ် တၢ်စံၣ်တဲၤတဲလီၤတၢ်မၤန့ၣ် မ့ၢ်ဝဲယဟိဝၤယွၤ အတၢ်မၤ ဒီးတၢ်မၤအံၤ မ့ၢ်တၢ်မၤလၢ အရ့ဒိၣ်ဒိၣ်မးအဃိ အဝဲဟ့ၣ်လီၤဝဲ တၢ်မၤအံၤလၢ အဖိခွါလၢအအဲၣ်ဝဲ ဒိၣ်ကတၢၢ်တဂၤ အစုပူၤ. ဒီးယ့ၣ်ၡူးန့ၣ်မ့ၢ်ဝဲ ပှၤတီခိၣ်ရိၤမဲတၢ်တဂၤလၢ အအိၣ်ဒီးတၢ်သ့တၢ်ဘၣ်အဃိ ပနာ်သ့သပှၢ်ကတၢၢ်လၢ ဒ်ယဟိဝၤယွၤ အဲၣ်ဒိးဝဲအသိး တၢ်စံၣ်တဲၤတဲလီၤတၢ်မၤန့ၣ် ကဝံၤဝဲတချုးလၢ တၢ်အကတၢၢ်ဟဲတုၤဒံးဘၣ်.—မးသဲ ၂၄:၁၄.
၂. လၢတၢ်မၤလိအံၤအပူၤန့ၣ် ပကတဲသကိး တၢ်ဂ့ၢ်မနုၤတဖၣ်လဲၣ်.
၂ လၢတၢ်မၤလိအံၤအပူၤန့ၣ် ပကထံၣ်ဘၣ်လၢ ယ့ၣ်ၡူးန့ၣ်သူဝဲ “ကုၢ်လၢအတီ ဒီးအကူၣ်တၢ်သ့” ဒ်သိးကလုၢ်အီၣ်လုၢ်အီ ကစၢ်ယွၤအပှၤဂီၢ်မုၢ် ဒီးကရဲၣ်ကျဲၤဝဲ တၢ်စံၣ်တဲၤတဲလီၤတၢ်မၤ လၢဟီၣ်ခိၣ်ချၢ ဂ့ၤဂ့ၤဘၣ်ဘၣ်အဂီၢ်. (မးသဲ ၂၄:၄၅) ပကထံၣ်ဘၣ်စ့ၢ်ကီးလၢ ပဝဲတဂၤဒီးတဂၤ ဆီၣ်ထွဲမၤစၢၤဝဲ ယ့ၣ်ၡူးဒီး ကုၢ်လၢအတီ ဒီးအကူၣ်တၢ်သ့ ကသ့လၢကျဲဒ်လဲၣ်.
ယ့ၣ်ၡူး တီခိၣ်ရိၤမဲဝဲ တၢ်စံၣ်တဲၤတဲလီၤတၢ်မၤ
၃. ယ့ၣ်ၡူး ဒိးန့ၢ်ဘၣ်တၢ်စိတၢ်ကမီၤ မနုၤလဲၣ်.
၃ ယ့ၣ်ၡူး တီခိၣ်ရိၤမဲဝဲ တၢ်စံၣ်တဲၤတဲလီၤတၢ်မၤန့ၣ် ပသ့ၣ်ညါ ကသ့ဒ်လဲၣ်. တချုးလၢ ယ့ၣ်ၡူးက့ၤထီၣ်လၢ မူခိၣ်ဒံးဘၣ်န့ၣ် အထံၣ်လိာ်သးဒီး အပျဲၢ်အဘီၣ်တဖၣ်လၢ ကစၢၢ်ဒီခိၣ်လၢ အအိၣ်လၢကၤလံၤလါ အပူၤ. ဒီးယ့ၣ်ၡူး တဲဘၣ်အဝဲသ့ၣ်လၢ “ကယဲၢ်တၢ်စိတၢ်ကမီၤ လၢမူခိၣ်ဒီးဟီၣ်ခိၣ်န့ၣ် တၢ်ဟ့ၣ်လီၤယၤလံ.” ဒီးအဆဲးတဲဝဲ “လဲၤဒီးဒုးကဲထီၣ် ကယဲၢ်ပှၤကလုာ်တဖၣ် လၢယပျဲၢ်ယဘီၣ်.” (မးသဲ ၂၈:၁၈, ၁၉) ယ့ၣ်ၡူးဒိးန့ၢ်ဘၣ် မူဒါအါမး တကးဒံးဘၣ် လၢအကျါန့ၣ် ယ့ၣ်ၡူးဒိးန့ၢ်ဘၣ် တၢ်စိတၢ်ကမီၤလၢ ကဟံးစုနဲၣ်ကျဲဝဲ တၢ်စံၣ်တဲၤတဲလီၤတၢ်မၤ.
၄. ယ့ၣ်ၡူး ဆဲးဟံးစုနဲၣ်ကျဲဝဲ တၢ်စံၣ်တဲၤတဲလီၤတၢ်မၤန့ၣ် ပသ့ၣ်ညါအီၤကသ့ဒ်လဲၣ်.
၄ ယ့ၣ်ၡူးမၤလိာ်ဝဲလၢ ပှၤကဘၣ်လဲၤစံၣ်တဲၤတဲလီၤတၢ် ဒီးလဲၤဒုးကဲထီၣ် “ကယဲၢ်ပှၤကလုာ်တဖၣ်” လၢအပျဲၢ်အဘီၣ်. တကးဒံးဘၣ် ယ့ၣ်ၡူးအၢၣ်လီၤဝဲလၢ အကအိၣ်ဒီး ပဝဲဒၣ်သ့ၣ်တဖၣ် “ကိးမုၢ်နံၤဒဲး တုၤလီၤလၢ တၢ်အကတၢၢ်.” (မးသဲ ၂၈:၂၀) ပမ့ၢ်ကွၢ် လံာ်စီဆှံတဆၢအံၤ ပာ်ဖျါထီၣ်ဝဲလၢ တၢ်စံၣ်တဲၤတဲလီၤတၢ်မၤန့ၣ် ကအိၣ်လၢ ယ့ၣ်ၡူးအတၢ်ဟံးစုနဲၣ်ကျဲအဖီလာ် ဒီးကဆဲးအိၣ်ဝဲတုၤလီၤလၢ ပစိၤခဲအံၤ.
၅. ဒ်သိးဝံအတၢ်စံးပာ်လၢ စံးထီၣ်ပတြၢၤ ၁၁၀:၃ ကလၢထီၣ်ပှဲၤထီၣ်အဂီၢ် ပမၤစၢၤကသ့ဒ်လဲၣ်.
၅ လၢလံာ်စံးထီၣ်ပတြၢၤအပူၤန့ၣ် ဝံအတၢ်စံးပာ်အိၣ်ဝဲလၢ “မုၢ်နံၤဖဲ နလဲၤဆှၢ နသုးမုၢ်လၢ တၢ်ဒုးန့ၣ် နပှၤဂီၢ်မုၢ် ကဟ့ၣ်လီၤအသးလၢ တၢ်သးအိၣ်အပူၤ.” (စံးထီၣ်ပတြၢၤ ၁၁၀:၃) မ့ၢ်လၢယ့ၣ်ၡူးသ့ၣ်ညါဝဲ ဝံအတၢ်စံးပာ်အံၤဂ့ၤဂ့ၤအဃိ ဖဲတၢ်အစိၤလၢ အလီၢ်ခံကတၢၢ်န့ၣ် ယ့ၣ်ၡူးသ့ၣ်ညါဝဲလၢ ပှၤမၤတၢ်ဖိတဖၣ် ကအိၣ်ဝဲ လၢလၢလီၢ်လီၢ်. နမ့ၢ်ပၣ်ဃုာ်လၢ တၢ်စံၣ်တဲၤတဲလီၤတၢ်မၤန့ၣ် မ့ၢ်ဒၣ်နဆီၣ်ထွဲ ယ့ၣ်ၡူးဒီး ကုၢ်လၢအတီဒီးအကူၣ်တၢ်သ့ ဒ်သိးကမၤလၢပှဲၤဝဲ ဝံအတၢ်စံးပာ်အံၤ. ပကဆဲးမၤ တၢ်မၤအံၤအဂီၢ်န့ၣ် ပကထံၣ်ဘၣ်ဒီး တၢ်ကီတၢ်ခဲ သနာ်က့ တၢ်မၤအံၤတပတုာ်ဘၣ်.
၆. ဆၢကတီၢ်ခဲအံၤ ပှၤစံၣ်တဲၤတဲလီၤ ဘီမုၢ်တၢ်သးခုကစီၣ်တဖၣ် ထံၣ်ဘၣ်ဒီးတၢ်ကီတၢ်ခဲ မနုၤတမံၤလဲၣ်.
၆ တၢ်ကီတၢ်ခဲတခါလၢ ပှၤစံၣ်တဲၤတဲလီၤ ဘီမုၢ်တၢ်သးခုကစီၣ်တဖၣ် ထံၣ်ဘၣ်ဝဲန့ၣ် မ့ၢ်ဝဲတၢ်ထီဒုၣ်ထီဒါ. ပှၤလၢအစူးကွံာ်ညိကွံာ် တၢ်စူၢ်တၢ်နာ်တဖၣ်, တၢ်ဘူၣ်တၢ်ဘါခိၣ်နၢ်တဖၣ် ဒီးပဒိၣ်ပပှၢ်တဖၣ်န့ၣ် ထံၣ်ကမၣ်ဝဲ ပတၢ်စံၣ်တဲၤတဲလီၤတၢ်ဖံးတၢ်မၤ. ဖဲပဘူးပတံၢ်, ပတံၤသကိး ဒီးပှၤလၢ ပမၤသကိးတၢ်ဒီးအီၤ လၢတၢ်မၤလီၢ်တဖၣ် မ့ၢ်နာ်ဝဲ တၢ်လံၣ်တၢ်လီတဖၣ်န့ၣ် အဝဲသ့ၣ် ကဆီၣ်သနံးပှၤဒ်သိး ပသုတဆဲးမၤ ယဟိဝၤယွၤ အတၢ်မၤဒီး စံၣ်တဲၤတဲလီၤတၢ်တဂ့ၤ. ပမ့ၢ်ကွၢ် ထံကီၢ်တနီၤနီၤန့ၣ် ပဒိၣ်ပပှၢ်တဖၣ် ထီဒါဝဲ ပဒီပုၢ်ဝဲၢ်မုၣ်ခွါတဖၣ် ခီဖျိ မၤပျံၤမၤဖုးအဝဲသ့ၣ်, ဖီၣ်အဝဲသ့ၣ် ဒီးဖၢနုာ်အဝဲသ့ၣ်လၢ ဃိာ်ပူၤ. တၢ်ကဲထီၣ်အသး ဒ်အံၤသနာ်က့ ပတကမၢကမၣ်ဘၣ်. မ့ၢ်လၢယ့ၣ်ၡူး တဲဆိပာ်ဝဲလၢ “ပှၤကလုာ်ခဲလၢာ် ကသးဟ့သုလၢ ယမံၤအဃိ.” (မးသဲ ၂၄:၉) ပှၤမ့ၢ်သးဟ့ပှၤဒ်န့ၣ်န့ၣ် မ့ၢ်ဝဲတၢ်အုၣ်အသးတခါလၢ ပမၤတၢ်ဘၣ် ယဟိဝၤယွၤအသး. (မးသဲ ၅:၁၁, ၁၂) မုၣ်ကီၤလံၢ်န့ၣ် ဆီၣ်ထွဲဝဲဒၣ် ပှၤလၢအထီဒါပှၤတဖၣ်. ဘၣ်ဆၣ် မုၣ်ကီၤလံၢ်န့ၣ် မၤယ့ၣ်ၡူး တနၢၤဘၣ်. ခီဖျိလၢ ယ့ၣ်ၡူးမၤစၢၤပှၤအဃိ ဘီမုၢ်တၢ်သးခုကစီၣ်န့ၣ် ကရၤလီၤအသးလၢ ပှၤကိးကလုာ်ဒဲးအအိၣ်. ခဲအံၤ ပကကွၢ်သကိး တၢ်အုၣ်သးတဖၣ်.
၇. လီၣ်ဖျါ ၁၄:၆, ၇ ဟဲလၢထီၣ်ပှဲၤထီၣ်န့ၣ် ပထံၣ်ဘၣ် တၢ်အုၣ်သးဒ်လဲၣ်.
၇ ပှၤလၢအစံၣ်တဲၤတဲလီၤ ဘီမုၢ်တၢ်သးခုကစီၣ်တဖၣ်န့ၣ် ထံၣ်ဘၣ်ဒီး တၢ်ကီတၢ်ခဲအဂၤတမံၤ. တၢ်ကီတၢ်ခဲအံၤမ့ၢ်ဝဲ ပဝဲပှၤဟီၣ်ခိၣ်ဖိတဖၣ်န့ၣ် ပတဲကျိာ် တဒ်သိးလိာ်သးဘၣ်အဃိ. လၢလံာ်လီၣ်ဖျါအပူၤန့ၣ် ယ့ၣ်ၡူးဒုးသ့ၣ်ညါဝဲ တၢ်မၢဖိယိၤဟၣ်လၢ မုၢ်နံၤခံကတၢၢ် အဆၢကတီၢ်န့ၣ် ဘီမုၢ်တၢ်သးခုကစီၣ်အံၤ ကရၤလီၤအသးလၢ ကျိာ်အကလုာ်ကလုာ်. အဃိ ပကတိၤတၢ် ကျိာ်မ့ၢ်လီၤဆီ သနာ်က့ တၢ်ကီတၢ်ခဲတအိၣ်ဘၣ်. (ဖး လီၣ်ဖျါ ၁၄:၆, ၇.) တၢ်သ့ၣ်တဖၣ်အံၤ ကဲထီၣ်အသး ကသ့ဒ်လဲၣ်. ပစံၣ်တဲၤတဲလီၤ ဘီမုၢ်တၢ်သးခုကစီၣ် ဒ်သိးပှၤဂၤတဖၣ် ကန့ၢ်ဘၣ်တၢ်ခွဲးတၢ်ယာ်လၢ ကနၢ်ဟူဘၣ်ဝဲအဂီၢ်. ဆၢကတီၢ်ခဲအံၤ လၢဟီၣ်ခိၣ်ဒီဘ့ၣ်န့ၣ် ပရၤလီၤ လံာ်လဲၢ်တဖၣ်လၢ jw.org အပူၤ မ့ၢ်လၢအအိၣ်ဒီး တၢ်ဂ့ၢ်တၢ်ကျိၤတဖၣ်လၢ ကျိာ် ၁,၀၀၀ ဘျဲၣ်ညါ. ဒ်သိး ပကသိၣ်လိပှၤဂၤ လံာ်စီဆှံဒီး ဒုးကဲထီၣ်ပှၤဂၤလၢ ယ့ၣ်ၡူးအပျဲၢ်အဘီၣ် ကသ့အဂီၢ် ခဲအံၤပအိၣ်ဒီး လံာ်တဘ့ၣ်လၢ အမ့ၢ်ဝဲ အိၣ်မူလီၤထူလီၤယိာ် ပှဲၤဒီးတၢ်သးခု. လံာ်တဘ့ၣ်အံၤ ပှၤထုးထီၣ်အီၤလၢ ကျိာ် ၇၀၀ ဘျဲၣ်ညါ. တကးဒံးဘၣ် ဒ်သိး ပှၤလၢအတနၢ်ဟူတၢ်တဖၣ် ကန့ၢ်ဘၣ် နီၢ်သးတၢ်အီၣ်အဂီၢ် ပထုးထီၣ်တၢ်ဂီၤမူတဖၣ် ဒီးလၢပှၤလၢ အတထံၣ်တၢ်ဘၣ်တဖၣ်အဂီၢ်န့ၣ် ပထုးထီၣ်လံာ်လၢ ပှၤမဲာ်တထံၣ်တၢ်တဖၣ်အဂီၢ်. လံာ်စီဆှံ ပာ်ဖျါထီၣ်ဝဲလၢ “ပှၤကလုာ်တဖၣ် လၢအတဲကျိာ် အကလုာ်ကလုာ်” ကမၤလိဝဲ “ကျိာ်စီဆှံ” လၢအမ့ၢ်ဝဲ လံာ်စီဆှံ တၢ်မ့ၢ်တၢ်တီ. (စကၤရယၤ ၈:၂၃; စဖါနယၤ ၃:၉) ပထံၣ်ဘၣ် ဝံအတၢ်စံးပာ်အံၤ ဟဲလၢထီၣ်ပှဲၤထီၣ်ဝဲ လၢပစိၤခဲအံၤ. ဒီးတၢ်သ့ၣ်တဖၣ်အံၤ လၢပှဲၤထီၣ်ဝဲခီဖျိလၢ ယ့ၣ်ၡူးမ့ၢ်ပှၤလၢ အတီခိၣ်ရိၤမဲတၢ် လၢအအိၣ်ဒီးတၢ်သ့တၢ်ဘၣ်အဃိ.
၈. ခီဖျိလၢ တၢ်စံၣ်တဲၤတဲလီၤတၢ်မၤအဃိ တၢ်ဒိၣ်ထီၣ်ထီထီၣ် အိၣ်ဝဲဒ်လဲၣ်.
၈ ဆၢကတီၢ်ခဲအံၤန့ၣ် ပှၤအဂၤ ဃိးကကွဲၢ်ဘျဲၣ် လၢအအိၣ်လၢ ထံကီၢ်အဘ့ၣ် ၂၄၀ န့ၣ်အိၣ်လၢ ယဟိဝၤယွၤ အတၢ်ကရၢကရိအပူၤ. တနံၣ်ဘၣ်တနံၣ်န့ၣ် ပှၤဒိးဘျၢထံအိၣ်ဝဲလၢအကလီၢ်ဘျဲၣ်ညါ. ဘၣ်ဆၣ် ပှၤဒိးဘျၢထံ အနီၣ်ဂံၢ်ဟဲအါထီၣ်န့ၣ် တမ့ၢ်တၢ်လၢ အရ့ဒိၣ်ဘၣ်. တၢ်လၢအရ့ဒိၣ်န့ၣ်မ့ၢ်ဝဲ ယ့ၣ်ၡူးအပျဲၢ်အဘီၣ်လၢအသီတဖၣ်န့ၣ် ကူထီၣ်သိးထီၣ် “လုၢ်လၢ်သကဲာ်ပဝးအသီ.” (ကလီးစဲ ၃:၈-၁၀) အဝဲသ့ၣ်တဖၣ်န့ၣ် တမၤကမၣ်မုၣ်ကမၣ်ခွါလၢၤဘၣ်, တမ့ၢ်ပှၤလၢ အမၤဆူၣ်မၤစိးတၢ်လၢၤဘၣ်, တဆိကမိၣ်ဆံး ပှၤဂၤလၢၤဘၣ် ဒီးတၢ်အဲၣ်ပှၤကလုာ်စ့ၢ်ကီး တအိၣ်လၢၤဘၣ်. အဃိ ဝံအတၢ်စံးပာ်လၢ ယၡါယၤ ၂:၄ လၢအမ့ၢ်ဝဲ အဝဲသ့ၣ် “တမၤလိအသး လၢတၢ်ဒုးလၢၤဘၣ်” န့ၣ် ဟဲလၢပှဲၤထီၣ်ဝဲ. မ့ၢ်လၢ ပကူထီၣ်သိးထီၣ် လုၢ်လၢ်သကဲာ်ပဝးအသီ ဒီးပဒိကနၣ် ယ့ၣ်ၡူးလၢ အတီခိၣ်ရိၤမဲပှၤ အကလုၢ်အဃိ ထုးန့ၢ်ဝဲပှၤဂၤအသး လၢကဟဲနုာ်လီၤလၢ ကစၢ်ယွၤ အတၢ်ကရၢကရိအပူၤ. (ယိၤဟၣ် ၁၃:၃၅; ၁ ပ့းတရူး ၂:၁၂) တၢ်ဒိၣ်ထီၣ်ထီထီၣ်တဖၣ်အံၤ ကဲထီၣ်အသးသ့ ခီဖျိလၢ ယ့ၣ်ၡူးမၤစၢၤပှၤအဃိ.
ယ့ၣ်ၡူးဃုထၢထီၣ် ကုၢ်လၢအတီ ဒီးအကူၣ်တၢ်သ့
၉. မးသဲ ၂၄:၄၅-၄၇ န့ၣ်တဲဆိပာ်ဝဲ ဘၣ်ဃးဒီး တၢ်အကတၢၢ်အဂ့ၢ် ဒ်လဲၣ်.
၉ ဖး မးသဲ ၂၄:၄၅-၄၇. ယ့ၣ်ၡူးတဲဆိပာ်စၢၤဝဲလၢ မုၢ်နံၤခံကတၢၢ်အဆၢကတီၢ်န့ၣ် အဝဲကဃုထၢထီၣ် “ကုၢ်လၢအတီ ဒီးအကူၣ်တၢ်သ့” ဒ်သိးကလုၢ်အီၣ်လုၢ်အီပှၤလၢ နီၢ်သးတၢ်အီၣ်အဂီၢ်. အဃိပထံၣ်ဘၣ်လၢ အဝဲသ့ၣ်တဖၣ်န့ၣ် ဂုာ်ကျဲးစၢးမၤတၢ်ဆူၣ်မး. ယ့ၣ်ၡူးသူဝဲ ပှၤပိာ်ခွါစှၤဂၤ လၢအဘၣ် တၢ်ဒိးဖှူအီၤတဖၣ်လၢ ကလုၢ်အီၣ်လုၢ်အီဝဲ ကစၢ်ယွၤအပှၤဂီၢ်မုၢ် ဒီးပှၤလၢအသးအိၣ် တၢ်မ့ၢ်တၢ်တီတဖၣ် လၢနီၢ်သးတၢ်အီၣ် “ဖဲအဆၢကတီၢ်လၢ အကြၢးဝဲဘၣ်ဝဲ.” ဒီးပှၤလၢအဘၣ် တၢ်ဒိးဖှူအီၤတဖၣ်အံၤန့ၣ် တထံၣ်လီၤအသး ဒ်အမ့ၢ်ကစၢ်လၢ ပတၢ်နာ်အဖီခိၣ်ဘၣ်. (၂ ကရံၣ်သူး ၁:၂၄) ဘၣ်ဆၣ် အဝဲသ့ၣ် ထံၣ်ဝဲလၢ ယ့ၣ်ၡူးန့ၣ်မ့ၢ်ဝဲ “ပှၤအခိၣ် ဒီးခိၣ်နၢ်တဂၤလၢ” ကစၢ်ယွၤ အပှၤဂီၢ်မုၢ်တဖၣ် အဖီခိၣ်.—ယၡါယၤ ၅၅:၄.
၁၀. လံာ်ဖဲလဲၣ်တဘ့ၣ် မၤစၢၤနၤဒ်သိး နကနုာ်လီၤလၢ တၢ်မ့ၢ်တၢ်တီအပူၤလဲၣ်.
၁၀ စးထီၣ်လၢ ၁၉၁၉ န့ၣ် ကုၢ်လၢအတီဒီးအကူၣ်တၢ်သ့န့ၣ် ရဲၣ်ကျဲၤဝဲ လံာ်လဲၢ်တဖၣ် ဒ်သိးကမၤစၢၤဝဲ ပှၤလၢအသ့ၣ်ညါ တၢ်မ့ၢ်တၢ်တီအသီတဖၣ် ကအီၣ်ဘၣ်ဝဲ နီၢ်သးတၢ်အီၣ်အဂီၢ်. ဖဲ ၁၉၂၁ န့ၣ်ကုၢ်လၢအတီ ဒီးအကူၣ်တၢ်သ့န့ၣ် ထုးထီၣ်ဝဲ လံာ်လၢအမ့ၢ် ကစၢ်ယွၤအတနၢ် (The Harp of God) ဒ်သိးကမၤစၢၤပှၤဂၤလၢ ကသ့ၣ်ညါထီၣ် လံာ်စီဆှံတၢ်မ့ၢ်တၢ်တီတဖၣ်အဂီၢ်. ဒ်တၢ်ဆၢကတီၢ် လဲၤပူၤကွံာ်ဝဲအသိး အဝဲသ့ၣ် ထုးထီၣ်ဝဲလံာ်လဲၢ် လၢအဂၤတဖၣ် အါမး. ဒ်သိးနကနုာ်လီၤလၢ တၢ်မ့ၢ်တၢ်တီပူၤအဂီၢ် လံာ်လၢအမၤစၢၤနၤန့ၣ် မ့ၢ်လံာ်ဖဲလဲၣ်တဘ့ၣ်လဲၣ်. မ့ၢ်လံာ်လၢအမ့ၢ် “ကစၢ်ယွၤမ့ၢ် ယွၤလၢအမ့ၢ်အတီ” (“Let God Be True”), တၢ်မ့ၢ်တၢ်တီဆှၢနၤဆူ တၢ်မူအထူအယိာ် (The Truth That Leads to Eternal Life), အိၣ်မူလီၤထူလီၤယိာ်လၢ ဟီၣ်ခိၣ်ပၤရဒံစူးအပူၤ (You Can Live Forever in Paradise on Earth), တၢ်သ့ၣ်ညါနၢ်ပၢၢ်လၢ ကဆှၢနၤဆူ တၢ်မူအထူအယိာ် (Knowledge That Leads to Everlasting Life), လံာ်စီဆှံ သိၣ်လိတၢ် နီၢ်နီၢ် မ့ၢ်မနုၤလဲၣ်, လံာ်စီဆှံ ကသိၣ်လိပှၤ တၢ်ဂ့ၢ်မနုၤလဲၣ် န့ၣ်ဧါ. မ့တမ့ၢ် နဟဲနုာ်လီၤလၢ တၢ်မ့ၢ်တၢ်တီအပူၤ ခီဖျိလၢ လံာ်အသီတဘ့ၣ်လၢအမ့ၢ် အိၣ်မူလီၤထူလီၤယိာ် ပှဲၤဒီးတၢ်သးခု န့ၣ်ဧါ. လံာ်တဘ့ၣ်ဘၣ်တဘ့ၣ်န့ၣ် ဖဲပှၤထုးထီၣ်အီၤအခါ ကဲဘျုးဝဲလၢ ပကဒုးကဲထီၣ်ပှၤဂၤလၢ ယ့ၣ်ၡူးအပျဲၢ်အဘီၣ်အဂီၢ်.
၁၁. ဘၣ်မနုၤအဃိ ပကဘၣ်ဟံအီၣ် နီၢ်သးတၢ်အီၣ်လဲၣ်.
၁၁ နီၢ်သးတၢ်အီၣ်တဖၣ်န့ၣ် မ့ၢ်ဝဲဒၣ်လၢ ပဝဲခဲလၢာ်အဂီၢ် ဒီးတမ့ၢ်ထဲလၢ ပှၤလၢအသ့ၣ်ညါ တၢ်မ့ၢ်တၢ်တီသီသီတဖၣ်အဂီၢ်ဘၣ်. တၢ်မၢဖိပီလူး ကွဲးဝဲလၢ “တၢ်အီၣ်အသံးအကာ်န့ၣ် မ့ၢ်ဝဲလၢပှၤလၢ အဒိၣ်တုာ်ခိၣ်ပှဲၤတဖၣ်အဂီၢ်.” တကးဒံးဘၣ် စီၤပီလူးပာ်ဖျါထီၣ်စ့ၢ်ကီးလၢ ပဝဲသ့ၣ်တဖၣ် ပမ့ၢ်ဟံန့ၢ်အီၣ် နီၢ်သးတၢ်အီၣ်တဖၣ်အံၤန့ၣ် ကမၤစၢၤပှၤလၢပ “ကပဲာ်ထံနီၤဖး တၢ်ဂ့ၤဒီးတၢ်အၢအဆၢ.” (ဧ့ၤဘြံၤ ၅:၁၄) ဆၢကတီၢ်ခဲအံၤန့ၣ် ပှၤဟီၣ်ခိၣ်ဖိတဖၣ် အလုၢ်လၢ်သကဲာ်ပဝး အၢထီၣ်မၣ်အၢထီၣ်. ပဝဲဒၣ်သ့ၣ်တဖၣ်န့ၣ် မ့ၢ်လၢပအိၣ်မူဘၣ်လၢ အဝဲသ့ၣ်အကျါအဃိ ပကမၤထွဲ ယဟိဝၤယွၤ အတၢ်သိၣ်တၢ်သီအဂီၢ် ကီထီၣ်လၢပဂီၢ်စ့ၢ်ကီး. လၢတၢ်န့ၣ်အဃိ ယ့ၣ်ၡူးရဲၣ်ကျဲၤဝဲ နီၢ်သးတၢ်အီၣ်တဖၣ်အံၤ ဒ်သိးပဂံၢ်ပဘါကအိၣ်အဂီၢ်. ဒီးနီၢ်သးတၢ်အီၣ်တဖၣ်အံၤန့ၣ် မ့ၢ်ဝဲကစၢ်ယွၤ အကလုၢ်ကထါလၢ အိၣ်လၢလံာ်စီဆှံအပူၤ. ဒီးကုၢ်လၢအတီ ဒီးအကူၣ်တၢ်သ့န့ၣ် ရဲၣ်ကျဲၤဝဲ နီၢ်သးတၢ်အီၣ်တဖၣ် ခီဖျိလၢ ယ့ၣ်ၡူး အတၢ်ဟံးစုနဲၣ်ကျဲ အဖီလာ်.
၁၂. ဒ်ယ့ၣ်ၡူးအသိး ပဝဲဒၣ်သ့ၣ်တဖၣ်စ့ၢ်ကီး ပထံၣ်ကစၢ်ယွၤအမံၤဒ်လဲၣ်.
၁၂ ဒ်ယ့ၣ်ၡူးအသိး ပဝဲသ့ၣ်တဖၣ်စ့ၢ်ကီး ပပာ်ဒိၣ်ကစၢ်ယွၤအမံၤ. (ယိၤဟၣ် ၁၇:၆, ၂၆) အဒိ ဖဲ ၁၉၃၁ န့ၣ်ပဒိးန့ၢ်ဘၣ်မံၤအသီတဖျၢၣ်လၢ အမ့ၢ်ဝဲ ယဟိဝၤပှၤအုၣ်အသး. ပဆီတလဲပမံၤဒ်န့ၣ်န့ၣ် မ့ၢ်ဒ်သိး ပကပာ်ဖျါထီၣ်လၢ ကစၢ်ယွၤအမံၤန့ၣ် အရ့ဒိၣ်လၢပဂီၢ်. ဒီးပအဲၣ်ဒိးလၢ ပှၤအဂၤတဖၣ် ကသ့ၣ်ညါပှၤလၢ ပမ့ၢ်ယဟိဝၤပှၤအုၣ်အသးတဖၣ်. (ယၡါယၤ ၄၃:၁၀-၁၂) စးထီၣ်လၢ ၁၉၃၁ လါအီးကထိဘၢၣ်န့ၣ် ကစၢ်ယွၤအမံၤ အိၣ်ဝဲလၢ ပမဲးကစံလံာ်ကုခိၣ်. တကးဒံးဘၣ် ဟီၣ်ခိၣ်သီ တၢ်ကွဲးကျိာ်ထံလံာ်စီဆှံ အပူၤန့ၣ် ပဖၢနုာ်က့ၤ ကစၢ်ယွၤအမံၤဒ်တၢ်ကွဲးအသး အိၣ်လၢအခီၣ်ထံးအသိး. ပမ့ၢ်ကွၢ်ခရံာ်ဖိ တၢ်ဘူၣ်တၢ်ဘါလၢအဂၤတဖၣ်န့ၣ် တမၤဝဲဒ်န့ၣ်ဘၣ်. အဝဲသ့ၣ်ထုးထီၣ်ကွံာ် ကစၢ်ယွၤအမံၤလၢ လံာ်စီဆှံလၢ အဝဲသ့ၣ်ကွဲးကျိာ်ထံဝဲ အါဘ့ၣ်အပူၤ.
ယ့ၣ်ၡူးကရၢကရိထီၣ် ကစၢ်ယွၤအပှၤဂီၢ်မုၢ်တဖၣ်
၁၃ ဘၣ်မနုၤအဃိ နနာ်လၢ ဆၢကတီၢ်ခဲအံၤ ယ့ၣ်ၡူးသူဝဲ “ကုၢ်လၢအတီ ဒီးအကူၣ်တၢ်သ့” လဲၣ်. (ယိၤဟၣ် ၆:၆၈)
၁၃ ယ့ၣ်ၡူးသူဝဲ “ကုၢ်လၢအတီ ဒီးအကူၣ်တၢ်သ့” ဒ်သိးကကရၢကရိထီၣ်ဝဲ ကစၢ်ယွၤ အတၢ်ကရၢကရိလၢ ဟီၣ်ခိၣ်အံၤအဂီၢ်. အဝဲမၤဝဲဒ်န့ၣ်န့ၣ် မ့ၢ်ဒ်သိးကဆီၣ်ထွဲဝဲ တၢ်ဘူၣ်တၢ်ဘါ စီဆှံအဂီၢ်. မ့ၢ်နထံၣ် ကစၢ်ယွၤ အတၢ်ကရၢကရိဒ်လဲၣ်. ဘၣ်သ့ၣ်သ့ၣ် နကစံးဆၢဒ် တၢ်မၢဖိပ့းတရူး စံးဆၢယ့ၣ်ၡူးလၢ “ကစၢ်ဧၢ, ပကလဲၤလၢ မတဂၤ အအိၣ်လဲၣ်. တၢ်ကတိၤလၢ အဘၣ်ဃးဒီး တၢ်မူအထူအယိာ်န့ၣ် အိၣ်ဒီးနၤ.” (ယိၤဟၣ် ၆:၆၈) ဆၢကတီၢ်ခဲအံၤ ပမ့ၢ်တအိၣ်လၢ ယဟိဝၤယွၤ အတၢ်ကရၢကရိအပူၤဘၣ်န့ၣ် တၢ်ကမၤအသးဒီးပှၤဒ်လဲၣ်. ပမ့ၢ်ကွၢ် ယ့ၣ်ၡူးန့ၣ်သူဝဲ ကစၢ်ယွၤ အတၢ်ကရၢကရိဒ်သိး ကလုၢ်အီၣ်ပှၤလၢ နီၢ်သးတၢ်အီၣ်အဂီၢ်. တကးဒံးဘၣ် ယ့ၣ်ၡူးမၤစၢၤပှၤဒ်သိး ပမၤတၢ်စံၣ်တဲၤတဲလီၤတၢ်မၤ ကကဲထီၣ်လိၣ်ထီၣ်အဂီၢ်. ဒ်သိးပကမၤတၢ်ဘၣ် ယဟိဝၤယွၤအသးအဂီၢ် ယ့ၣ်ၡူးမၤစၢၤပှၤလၢ ပကကူထီၣ်သိးထီၣ် လုၢ်လၢ်သကဲာ်ပဝးအသီ.—အ့းဖ့းစူး ၄:၂၄.
၁၄. ဖဲခိၤရိၤနၤတၢ်ဆါ ရၤလီၤအသးအခါ မ့ၢ်လၢပအိၣ်ဘၣ်လၢ ယဟိဝၤယွၤ အတၢ်ကရၢကရိအပူၤအဃိ ကဲဘျုးလၢပဂီၢ်ဒ်လဲၣ်.
၁၄ ဖဲတၢ်သဘံၣ်သဘုၣ် အိၣ်ထီၣ်ဝဲ အဆၢကတီၢ် ယ့ၣ်ၡူးဟံးစုနဲၣ်ကျဲပှၤ လီၤတံၢ်လီၤဆဲး. ဖဲခိၤရိၤနၤတၢ်ဆါ ကဲထီၣ်အဆၢကတီၢ်န့ၣ် ခီဖျိလၢ ပဒိကနၣ် တၢ်ဟံးစုနဲၣ်ကျဲတဖၣ်အဃိ ပထံၣ်ဘၣ် တၢ်အဘျုးအဖှိၣ်. ဖဲန့ၣ်အဆၢကတီၢ် ပှၤအဂၤတဖၣ်န့ၣ် ကဘၣ်မၤဝဲဒ်လဲၣ်န့ၣ် တသ့ၣ်ညါဝဲဘၣ်. မ့မ့ၢ်ပဝဲဒၣ်သ့ၣ်တဖၣ်န့ၣ် ဒ်သိးပကပူၤဖျဲးအဂီၢ် ယ့ၣ်ၡူးဟံးစုနဲၣ်ကျဲပှၤ လီၤတံၢ်လီၤဆဲး. ဖဲတၢ်ဆါရၤလီၤအသး အဆၢကတီၢ် တၢ်ကရၢကရိ ဟံးစုနဲၣ်ကျဲပှၤလၢ ဖဲပလဲၤလၢ ပှၤအါဂၤအကျါအခါ ပကကးဘၢ ပထးခိၣ် ဒီးပနါဒ့ တကးဒံးဘၣ် မ့ၢ်သ့န့ၣ် ပကဘၣ် အိၣ်ယံၤဒီးပှၤဂၤ. တၢ်အိၣ်ဖှိၣ်သးပှၢ်တဖၣ်စ့ၢ်ကီး ဒိးန့ၢ်ဘၣ် တၢ်ဟံးစုနဲၣ်ကျဲလၢ ကဘၣ်ဆဲးကျိးဒီး ဒီပုၢ်ဝဲၢ်မုၣ်ခွါလၢ တၢ်အိၣ်ဖှိၣ်ပူၤတဖၣ် ဒ်သိးကသ့ၣ်ညါဝဲ အဝဲသ့ၣ်အတၢ်လိၣ်ဘၣ်လၢ နီၢ်ခိဒီးနီၢ်သးတကပၤ အိၣ်ဒ်လဲၣ်. (ယၡါယၤ ၃၂:၁, ၂) တကးဒံးဘၣ် ပဒိးန့ၢ်ဘၣ် တၢ်ဟံးစုနဲၣ်ကျဲ ဒီးတၢ်ဟ့ၣ်ဂံၢ်ဟ့ၣ်ဘါ လၢကျဲအဂၤတဘိ ခီဖျိလၢ ပှၤပၢဆှၢတၢ်ကမံးတံာ် ပာ်ဖျါထီၣ် တၢ်ကစီၣ်အသီအဃိ.
၁၅. ဖဲခိၤရိၤနၤတၢ်ဆါ ရၤလီၤအသးအခါ ပဒိးန့ၢ်ဘၣ် တၢ်ဟံးစုနဲၣ်ကျဲလၢ ပကဘၣ် ထီၣ်တၢ်အိၣ်ဖှိၣ်ဒ်လဲၣ် ဒီးပကဘၣ် စံၣ်တဲၤတဲလီၤတၢ်ဒ်လဲၣ်. ခီဖျိလၢ ပအိၣ်ဒီး တၢ်ဒိကနၣ်အဃိ ပဒိးန့ၢ်ဘၣ်အဘျုးဒ်လဲၣ်.
၁၅ ဖဲခိၤရိၤနၤတၢ်ဆါ ရၤလီၤအသး အဆၢကတီၢ်န့ၣ် ပန့ၢ်ဘၣ်တၢ်ဟံးစုနဲၣ်ကျဲ လီၤတံၢ်လီၤဆဲးလၢ ပကဘၣ်ထီၣ် တၢ်အိၣ်ဖှိၣ်ဒ်လဲၣ် ဒီးပကဘၣ် စံၣ်တဲၤတဲလီၤတၢ်ဒ်လဲၣ်. ပမ့ၢ်ကွၢ် ဖဲတၢ်ဆါ ရၤလီၤအသး အဆၢကတီၢ်န့ၣ် ပထီၣ်ဘၣ်တၢ်အိၣ်ဖှိၣ်, ကဝီၤတၢ်အိၣ်ဖှိၣ် ဒီးတၢ်အိၣ်ဖှိၣ်ဖးဒိၣ်တဖၣ် ခီဖျိလၢ အ့ၤထၢၤနဲၣ်. ပစံၣ်တဲၤတဲလီၤတၢ် ခီဖျိ ပကွဲးလံာ်ပရၢ ဒီးပကိးပှၤဂၤလၢ လီတဲစိ. ယဟိဝၤယွၤ ဆိၣ်ဂ့ၤ ပတၢ်ထဲးဂံၢ်ထဲးဘါအဃိ ပထံၣ်ဘၣ်လၢ ဝဲၤတြၢ်အါဖျၢၣ်န့ၣ် ပှၤစံၣ်တဲၤတဲလီၤတၢ်ဖိ အနီၣ်ဂံၢ်အါထီၣ်ဝဲ. တကးဒံးဘၣ် ဖဲတၢ်ဆါ ရၤလီၤအသး အဆၢကတီၢ်န့ၣ် ဒီပုၢ်ဝဲၢ်မုၣ်ခွါအါဂၤ အိၣ်ဒီးတၢ်လဲၤခီဖျိ လၢအဂ့ၤအါမး.—ကွၢ်တၢ်လွံၢ်နၢၣ် “ ယဟိဝၤယွၤ ဆိၣ်ဂ့ၤ ပတၢ်စံၣ်တဲၤတဲလီၤတၢ်မၤ.”
၁၆. ပနာ် တၢ်မနုၤသ့လဲၣ်.
၁၆ တၢ်ဟံးစုနဲၣ်ကျဲလၢ ပဒိးန့ၢ်ဘၣ်အီၤလၢ တၢ်ကရၢကရိအအိၣ် ဖဲခိၤရိၤနၤတၢ်ဆါ ရၤလီၤအသး အဆၢကတီၢ်န့ၣ် ပဝဲတနီၤ ပကဆိကမိၣ်ဘၣ်လၢ အဃံးတလၢ. ဘၣ်ဆၣ် ပထံၣ်တၢ်အုၣ်သးလၢ ကစၢ်ယွၤ အတၢ်ကရၢကရိ အတၢ်ဟံးစုနဲၣ်ကျဲတဖၣ်န့ၣ် ပှဲၤဝဲဒီးတၢ်ကူၣ်သ့ ထီဘိ. (မးသဲ ၁၁:၁၉) ပဝဲဒၣ်သ့ၣ်တဖၣ် ပမ့ၢ်ဆိကမိၣ်ထံ ယ့ၣ်ၡူးဟံးစုနဲၣ်ကျဲဝဲ ကစၢ်ယွၤအပှၤဂီၢ်မုၢ်လၢ တၢ်အဲၣ်တၢ်ကွံအပူၤန့ၣ် ပနာ်သ့သပှၢ်တၢၢ်လၢ ခါဆူညါ တၢ်မ့ၢ်ကဲထီၣ်အသး ဒ်လဲၣ်ဂ့ၤဒ်လဲၣ်ဂ့ၤ ယဟိဝၤယွၤ ဒီးယ့ၣ်ၡူးန့ၣ် ကအိၣ်ဒီးပှၤ.—ဖး ဧ့ၤဘြံၤ ၁၃:၅, ၆.
၁၇. မ့ၢ်လၢ နမၤဘၣ်တၢ်လၢ ယ့ၣ်ၡူးအတၢ်ဟံးစုနဲၣ်ကျဲ အဖီလာ်အဃိ မ့ၢ်နတူၢ်ဘၣ်ဒ်လဲၣ်.
၁၇ ပမၤဘၣ်တၢ်လၢ ယ့ၣ်ၡူး အတၢ်ဟံးစုနဲၣ်ကျဲအဖီလာ်အဃိ ပဒိးန့ၢ်ဘၣ်တၢ်ဆိၣ်ဂ့ၤအါမး. တကးဒံးဘၣ် ပအိၣ်ဘၣ်လၢ တၢ်ကရၢကရိတခါလၢ အိၣ်ဒီးတၢ်ဆဲးတၢ်လၤ အကလုာ်ကလုာ်, ပှၤအကလုာ်ကလုာ် ဒီးပှၤကတိၤကျိာ် အကလုာ်ကလုာ် သနာ်က့ ပဝဲခဲလၢာ် ပအိၣ်ဒီးတၢ်ဃူတၢ်ဖိး. ထဲန့ၣ်တကးဒံးဘၣ် ပအီၣ်ဘၣ်နီၢ်သးတၢ်အီၣ် လၢလၢပှဲၤပှဲၤ ဒ်သိးပဆဲးစံၣ်တဲၤတဲလီၤ ဘီမုၢ်တၢ်သးခုကစီၣ် ကသ့အဂီၢ်. တကးဒံးဘၣ် ပဝဲကီးဂၤဒဲးန့ၣ် ပဒိးန့ၢ်ဘၣ် တၢ်မၤစၢၤဒ်သိး ပကကူထီၣ်သိးထီၣ် လုၢ်လၢ်သကဲာ်ပဝးအသီ. ဒီးပန့ၢ်ဘၣ်တၢ်မၤလိလၢ ပကအဲၣ်လိာ်သး တဂၤဒီးတဂၤ. ခီဖျိလၢ တၢ်သ့ၣ်တဖၣ်အံၤအဃိ ပပာ်ကဖၢလၢပသးလၢ ယ့ၣ်ၡူးမ့ၢ် ပှၤလၢအတီခိၣ်ရိၤမဲပှၤ.
တၢ်သးဝံၣ် ၁၆ ပတြၢၤယဟိဝၤယွၤလၢ အဒိးဖှူအဖိခွါအဃိ
^ ပှၤလၢအကကွဲၢ်လၢ အစံၣ်တဲၤတဲလီၤတၢ်တဖၣ်န့ၣ် ပၣ်ဃုာ်ဒီးပိာ်မုၣ်, ပိာ်ခွါ ဒီးဖိဒံဖိသၣ်တဖၣ်. ဒီးအဝဲသ့ၣ်တဖၣ်န့ၣ် စံၣ်တဲၤတဲလီၤ တၢ်သးခုကစီၣ်လၢ တၢ်သးဆူၣ်အပူၤ. လၢအဝဲသ့ၣ်အကျါန့ၣ် မ့ၢ်နပၣ်ဃုာ်စ့ၢ်ကီးဧါ. နမ့ၢ်ပၣ်ဃုာ်န့ၣ် နမၤတၢ်လၢ ကစၢ်ယ့ၣ်ၡူး လၢအတီခိၣ်ရိၤမဲတၢ်တဂၤ အတၢ်ဟံးစုနဲၣ်ကျဲအဖီလာ်. လၢတၢ်မၤလိအံၤအပူၤန့ၣ် ပကတဲသကိး တၢ်အုၣ်အသးလၢ ယ့ၣ်ၡူးန့ၣ် မ့ၢ်ပှၤလၢ အဟံးစုနဲၣ်ကျဲဝဲ တၢ်စံၣ်တဲၤတဲလီၤတၢ်မၤ လၢဆၢကတီၢ်ခဲအံၤ. ပမ့ၢ်ဆိကမိၣ်ထံ တၢ်ဂ့ၢ်တဖၣ်အံၤန့ၣ် ကမၤစၢၤပှၤလၢ ပကဆၢတဲာ်လီၤပသး လၢပကဆဲးမၤ ယဟိဝၤယွၤ အတၢ်မၤ ဒ်ပကစၢ်ယ့ၣ်ၡူး ဟံးစုနဲၣ်ကျဲဝဲအသိး.