တၢ်မၤလိ ၃၁
ပာ်လုၢ်ပာ်ပှ့ၤ တၢ်ခွဲးတၢ်ယာ်လၢ ကဃ့ဘါထုကဖၣ်တၢ်အဂီၢ်
“လၢနမဲာ်ညါန့ၣ် မ်ယတၢ်ထုကဖၣ် လီၤဂာ်ဒ်သိးဒီး တၢ်နၢမူလၢ အဘၣ်တၢ်ကတဲာ်ကတီၤပာ်စၢၤအီၤ.”—စံးထီၣ်ပတြၢၤ ၁၄၁:၂.
တၢ်သးဝံၣ် ၄၇ ဃ့ဆူ ယဟိဝၤကိးနံၤ
တၢ်မၤလိအံၤ အတၢ်တိာ်ပာ် *
၁. ဘၣ်မနုၤအဃိ ပပာ်လုၢ်ပာ်ပှ့ၤ တၢ်ဃ့ဘါထုကဖၣ်လၢ ယဟိဝၤယွၤ အအိၣ်လဲၣ်.
ကစၢ်ယွၤလၢ အတ့လီၤမူခိၣ်ဒီးဟီၣ်ခိၣ်တဂၤန့ၣ် ဟ့ၣ်ပှၤတၢ်ခွဲးတၢ်ယာ်လၢ ပကဃ့ဘါထုကဖၣ်တၢ်လၢအအိၣ်. ဆိကမိၣ်ကွၢ် ပတဲတၢ်ဒီးအီၤလၢ ကျိာ်တမံၤဂ့ၤတမံၤဂ့ၤ ဒီးတၢ်ဆၢကတီၢ် တတီၤဂ့ၤတတီၤဂ့ၤန့ၢ်ခဲလၢာ်. ပမ့ၢ်အိၣ်လၢ တၢ်ဆါဟံၣ်မ့ၢ်ဂ့ၤ လၢဃိာ်ပူၤမ့ၢ်ဂ့ၤ ပနာ်သ့လၢ ယဟိဝၤယွၤ ကဒိကနၣ်ပတၢ်ထုကဖၣ်. အဃိ ပပာ်လုၢ်ပာ်ပှ့ၤ တၢ်ခွဲးတၢ်ယာ်တခါအံၤဒိၣ်မး.
၂. စီၤပၤဒၤဝံး ပာ်လုၢ်ပာ်ပှ့ၤ တၢ်ဃ့ဘါထုကဖၣ်န့ၣ် အပာ်ဖျါထီၣ်ဝဲဒ်လဲၣ်.
၂ စီၤပၤဒၤဝံး သးဝံၣ်န့ၢ်တၢ်လၢ ယဟိဝၤယွၤအဂီၢ်ဒီး တဲဝဲလၢ “လၢနမဲာ်ညါန့ၣ် မ်ယတၢ်ထုကဖၣ် လီၤဂာ်ဒ်သိးဒီး တၢ်နၢမူလၢ အဘၣ်တၢ်ကတဲာ်ကတီၤပာ်စၢၤအီၤ.” (စံးထီၣ်ပတြၢၤ ၁၄၁:၁, ၂) အဃိ ပထံၣ်ဘၣ်လၢ စီၤပၤဒၤဝံးန့ၣ် အပာ်လုၢ်ပာ်ပှ့ၤ တၢ်ခွဲးတၢ်ယာ်လၢအမ့ၢ် တၢ်ဃ့ဘါထုကဖၣ်ဒိၣ်မး. ဖဲစီၤဒၤဝံးအစိၤန့ၣ် ပှၤကတဲာ်ကတီၤဝဲ တၢ်နၢမူစီဆှံဂ့ၤဂ့ၤ ဒ်သိးပှၤလုၢ်တၢ်ဒိၣ် ကသူဝဲလၢ တၢ်ဘူၣ်ထီၣ်ဘါထီၣ် အမ့ၢ်အတီအဂီၢ်. (၂ မိၤၡ့ ၃၀:၃၄, ၃၅) ဒ်ပှၤကတဲာ်ကတီၤပာ်စၢၤဝဲ တၢ်နၢမူဂ့ၤဂ့ၤအသိး စီၤဒၤဝံးန့ၣ် ဖဲအဃ့ဘါထုကဖၣ်လၢ ယဟိဝၤယွၤအအိၣ်အခါ အဆိကမိၣ်ထံဝဲတၢ်လၢ အကတဲဝဲတဖၣ် လီၤတံၢ်လီၤဆဲး. ပဝဲစ့ၢ်ကီး ပအဲၣ်ဒိးလၢ ယဟိဝၤယွၤ ကဘၣ်သူၣ်ဘၣ်သး ပတၢ်ဃ့ဘါထုကဖၣ်. အဃိ တချုးလၢပဃ့ဘါထုကဖၣ် ဒံးဘၣ်န့ၣ် တၢ်လၢပကတဲအီၤတဖၣ် ပဆိကမိၣ်ထံအီၤ လီၤတံၢ်လီၤဆဲး.
၃. ပမ့ၢ်ဃ့ဘါထုကဖၣ်လၢ ယဟိဝၤယွၤ အအိၣ်န့ၣ် ပကဘၣ်အိၣ်ဒီး တၢ်ပာ်သူၣ်ပာ်သးဒ်လဲၣ် ဒီးဘၣ်မနုၤအဃိလဲၣ်.
၃ ပမ့ၢ်ဃ့ဘါထုကဖၣ်လၢ ယဟိဝၤယွၤအအိၣ်န့ၣ် ပကဘၣ်အိၣ်ဒီးတၢ်ပာ်ကဲ. ဆိကမိၣ်ကွၢ် ဘၣ်ဃးဒီး ဝံယၡါယၤ, ဝံယဃ့းစက့လး, ဝံဒၤနံးယ့လး ဒီးစီၤယိၤဟၣ်န့ၣ် အဝဲသ့ၣ်ဒိးန့ၢ်ဘၣ် တၢ်ထံၣ်လၢညါခီလၢ အလီၤကမၢကမၣ်တဖၣ်. အဝဲသ့ၣ် အတၢ်ထံၣ်လၢညါခီတဖၣ် တဒ်သိးလိာ်အသးဘၣ်. ဘၣ်ဆၣ် တၢ်လၢ အလီၤဂာ်လိာ်သးတမံၤန့ၣ် မ့ၢ်ဝဲအဝဲသ့ၣ်ထံၣ် ယဟိဝၤယွၤ ဒ်သိးဒီးစီၤပၤလၢ အဖျါလီၤကဟုကညီၢ်. ဝံယၡါယၤ “ထံၣ် ယဟိဝၤယွၤ ဆ့ၣ်နီၤလၢ အလီၢ်ပစိာ်လၢအအိၣ်ထီၣ်ထီ အလိၤ.” (ယၡါယၤ ၆:၁-၃) ဝံယဃ့းစက့လး ထံၣ်ဝဲ ယဟိဝၤယွၤ ဆ့ၣ်နီၤလၢ လ့ၣ်ကဟၣ်အလိၤလၢမူခိၣ် ဒီး “တၢ်ကပီၤတခါလၢအ . . . လီၤဂာ်ဒီး တၢၢ်ကွဲၤ” န့ၣ်အိၣ်ဝးတရံးအီၤ. (ယဃ့းစက့လး ၁:၂၆-၂၈) ဝံဒၤနံးယ့လး ထံၣ်ဝဲ “ပှၤအိၣ်လၢပျၢၤ လံၤလံၤတဂၤ” လၢအသိးဃာ်ဝဲဒီး တၢ်ကူတၢ်ကၤဝါတဖၣ် ဒီးမ့ၣ်အူလၣ်တဖၣ်ကဲၤထီၣ်လၢအလီၢ်ပစိာ်. (ဒၤနံးယ့လး ၇:၉, ၁၀) ဒီးမ့မ့ၢ်လၢ စီၤယိၤဟၣ်န့ၣ် အထံၣ်ဝဲ ယဟိဝၤယွၤဆ့ၣ်နီၤလၢ လီၢ်ပစိာ်အဖီခိၣ် လၢအဖျါလီၤဂာ်ဒီး တၢ်မျၢ်လါဟ့ လၢအလီၤဂာ်ဒီးတၢၢ်ကွဲၤန့ၣ် အိၣ်ဝးတရံး အလီၢ်ပစိာ်. (လီၣ်ဖျါ ၄:၂-၄) ပမ့ၢ်ဆိကမိၣ်ထံ ဘၣ်ဃးဒီး ယဟိဝၤယွၤ အတၢ်လၤတၢ်ကပီၤ လၢအလီၤဘီလီၤမုၢ်အံၤန့ၣ် ပကပာ်လုၢ်ပာ်ပှ့ၤ တၢ်ခွဲးတၢ်ယာ်လၢ ပကဃ့ဘါထုကဖၣ်လၢအအိၣ်. ဘၣ်ဆၣ် ပဃ့တၢ်မနုၤသ့လဲၣ်.
“သုကဘၣ်ဃ့ထုကဖၣ်တၢ် ဒ်အံၤ”
၄. ကစၢ်အတၢ်ဃ့ဘါထုကဖၣ်လၢ အအိၣ်လၢ မးသဲ ၆:၉, ၁၀ အပူၤန့ၣ် ပမၤလိန့ၢ်ဘၣ် တၢ်မနုၤလဲၣ်.
၄ ဖး မးသဲ ၆:၉, ၁၀. ဖဲယ့ၣ်ၡူး စံၣ်တဲၤတဲလီၤတၢ်လၢ ကစၢၢ်ခိၣ်အခါ ဒ်သိးအပျဲၢ်အဘီၣ်တဖၣ် ကသ့ၣ်ညါလၢ ကဃ့တၢ်လၢ အဘၣ်ကစၢ်ယွၤအသး ကသ့အဂီၢ် ယ့ၣ်ၡူးသိၣ်လိအဝဲသ့ၣ်လၢ “သုကဘၣ်ဃ့ထုကဖၣ်တၢ် ဒ်အံၤ” တၢ်အရ့ဒိၣ်ကတၢၢ် ဒီးအဆိကတၢၢ်လၢ ယ့ၣ်ၡူးဃ့ဝဲန့ၣ် ဒ်သိးယဟိဝၤယွၤအမံၤ ကဘၣ်တၢ်ပာ်စီဆှံအီၤ, ယွၤအဘီအမုၢ်ကဟဲ, ဘီမုၢ်အံၤ ကမၤဟးဂီၤဝဲ ကစၢ်ယွၤအဒုၣ်အဒါတဖၣ် ဒီးခါဆူညါန့ၣ် ကစၢ်ယွၤ ကမၤဂ့ၤထီၣ်ဟီၣ်ခိၣ် ဒီးကဆိၣ်ဂ့ၤပှၤဟီၣ်ခိၣ်ဖိ. အဃိ ပမ့ၢ်ဃ့ဘါထုကဖၣ်ဒ် ယ့ၣ်ၡူး သိၣ်လိပှၤအသိးန့ၣ် မ့ၢ်ဒၣ်ပပာ်ဖျါထီၣ် ယဟိဝၤယွၤ အတၢ်ဘၣ်သးန့ၣ် အရ့ဒိၣ်လၢပဂီၢ်.
၅. ပဃ့ဘါထုကဖၣ်လၢ ပနီၢ်ကစၢ်အတၢ်လိၣ်ဘၣ် အဂီၢ်သ့ဧါ.
၅ ယ့ၣ်ၡူးသိၣ်လိစ့ၢ်ကီးပှၤလၢ ပကဃ့ဘါထုကဖၣ်လၢ ပနီၢ်ကစၢ်အတၢ်လိၣ်ဘၣ်အဂီၢ်. ပဃ့ယဟိဝၤယွၤလၢ အကဟ့ၣ်လီၤပှၤ တၢ်အီၣ်လၢ တနံၤအဂီၢ်တနံၤအဂီၢ်, အကပျၢ်ကွံာ်ပတၢ်ကမၣ်, အကဒီသဒၢပှၤလၢ တၢ်လ့ပစီအပူၤ ဒီးကမၤပူၤဖျဲးပှၤလၢ မုၣ်ကီၤလံၢ်အစုပူၤ. (မးသဲ ၆:၁၁-၁၃) ပမ့ၢ်ဃ့ယဟိဝၤယွၤ တၢ်သ့ၣ်တဖၣ်အံၤန့ၣ် ပပာ်ဖျါထီၣ်လၢ ပသန့ၤပသးလၢအီၤ ဒီးပအဲၣ်ဒိးမၤအတၢ်ဘၣ်သး.
၆. ဖဲပဃ့ဘါထုကဖၣ်အခါ မ့ၢ်ပဃ့သ့ထဲ တၢ်ဂ့ၢ်လၢအအိၣ်လၢ ကစၢ်အတၢ်ဃ့ဘါထုကဖၣ်အပူၤလီၤဧါ. တဲဖျါထီၣ်စ့ၢ်ကီး.
၆ ပမ့ၢ်ကွၢ် ဖဲယ့ၣ်ၡူးဃ့ဘါထုကဖၣ်လၢ တၢ်ဆၢကတီၢ်အဂၤအခါ အဝဲတဲဖျါထီၣ် အတၢ်တူၢ်ဘၣ် ဒီးအတၢ်ဘၣ်ယိၣ်ဘၣ်ဘှီတဖၣ်. (မးသဲ ၂၆:၃၉, ၄၂; ယိၤဟၣ် ၁၇:၁-၂၆) အဃိဖဲအံၤ ပထံၣ်ဘၣ်လၢ ယ့ၣ်ၡူးတအဲၣ်ဒိးလၢ အပျဲၢ်အဘီၣ်တဖၣ် ကတိၢ်ရူးသံ ကစၢ်အတၢ်ထုကဖၣ်ဘၣ်. ဒ်န့ၣ်အသိး ဖဲပဃ့ဘါထုကဖၣ်တၢ်အခါ ပတဲဘၣ်ကစၢ်ယွၤလၢ ပတၢ်ဘၣ်ယိၣ်ဘၣ်ဘှီတဖၣ်သ့. ဒီးဖဲပကဘၣ်မၤ တၢ်ဆၢတဲာ်အခါန့ၣ် ပဃ့လၢကစၢ်ယွၤ ကဟ့ၣ်ပှၤတၢ်ကူၣ်သ့ ဒီးတၢ်သ့ၣ်ညါနၢ်ပၢၢ်သ့ဝဲ. (စံးထီၣ်ပတြၢၤ ၁၁၉:၃၃, ၃၄) ဖဲပလီၤဘၣ်မူဒါလၢ အကီအခဲအခါ ပဃ့ယဟိဝၤယွၤ အတၢ်မၤစၢၤ ဒ်သိးပကသ့ၣ်ညါလၢ ပကဘၣ်မၤအီၤဒ်လဲၣ်အဂီၢ်သ့. (ကတိၤဒိ ၂:၆) မိပါတဖၣ် ဃ့ဘါထုကဖၣ်န့ၢ်တၢ်လၢ အဖိတဖၣ်အဂီၢ်သ့ ဒီးဖိတဖၣ် ဃ့ထုကဖၣ်န့ၢ်တၢ်လၢ အမိအပါအဂီၢ်သ့စ့ၢ်ကီး. ဒီးပဝဲကိးဂၤဒဲး ပကြၢးဃ့ဘါထုကဖၣ်န့ၢ်တၢ်လၢ ပပှၤမၤလိလံာ်စီဆှံဖိ ဒီးပှၤလၢပစံၣ်တဲၤတဲလီၤအီၤတဖၣ်အဂီၢ်. ဘၣ်ဆၣ် ဖဲပဃ့ဘါထုကဖၣ်အခါ ပတကြၢးဃ့ထဲ ကစၢ်ယွၤကမၤစၢၤပှၤတခါဘၣ်.
၇. ပမ့ၢ်ဃ့ဘါထုကဖၣ်န့ၣ် ဘၣ်မနုၤအဃိ ပကြၢးစံးပတြၢၤ ယဟိဝၤယွၤလဲၣ်.
၇ ပမ့ၢ်ဃ့ဘါထုကဖၣ်န့ၣ် ပကြၢး စံးပတြၢၤ ယဟိဝၤယွၤစ့ၢ်ကီး. ပှၤလၢအကြၢးဒိးန့ၢ်ဘၣ် ပတၢ်စံးပတြၢၤ ထဲသိးဒီး ကစၢ်ယွၤန့ၣ် တအိၣ်နီတဂၤဘၣ်. ကစၢ်ယွၤန့ၣ် “မ့ၢ်ပှၤလၢအဂ့ၤ ဒီးပျၢ်ကွံာ်တၢ်ကမၣ်ညီ.” တကးဒံးဘၣ် “အသးကညီၤတၢ်, အသးဂ့ၤ, တသးဒိၣ်ထီၣ်တၢ် ချ့ချ့ဘၣ်, အိၣ်ဒီးတၢ်အဲၣ်ဒိၣ်မး.” (စံးထီၣ်ပတြၢၤ ၈၆:၅, ၁၅) ယဟိဝၤယွၤ မ့ၢ်ပှၤဒ်လဲၣ် ဒီးအမၤန့ၢ်ပှၤတၢ်မနုၤလဲၣ်န့ၣ် ပစံးပတြၢၤအီၤသ့.
၈. ပစံးဘျုး ယဟိဝၤယွၤလၢ တၢ်ဂ့ၢ်မနုၤသ့လဲၣ်. (စံးထီၣ်ပတြၢၤ ၁၀၄:၁၂-၁၅, ၂၄)
၈ ပစံးပတြၢၤ ယဟိဝၤယွၤလၢ ပတၢ်ထုကဖၣ်အပူၤ သ့ခီဖျိ ပစံးဘျုးအီၤလၢ တၢ်လၢအဟ့ၣ်လီၤပှၤသ့ၣ်တဖၣ်. အဒိ ယဟိဝၤယွၤဟ့ၣ်လီၤပှၤ ဖီဃံလၤလၢ အလွဲၢ်အိၣ်အကလုာ်ကလုာ်, တၢ်အီၣ်တၢ်အီၣ်လၢ အဝံၣ်အဘဲ ဒီဒူၣ်ဒီထၢ, ဒီးအဟ့ၣ်ပှၤသကိးလၢအဂ့ၤ လၢအမၤမုာ်ထီၣ်ပသး အဃိ ပစံးဘျုးအီၤလၢ တၢ်သ့ၣ်တဖၣ်အံၤသ့. ကစၢ်ယွၤအဲၣ်ဒိးလၢ ပကသးခုအဃိ အဟ့ၣ်လီၤပှၤတၢ်သ့ၣ်တဖၣ်အံၤ. (ဖး စံးထီၣ်ပတြၢၤ ၁၀၄:၁၂-၁၅, ၂၄.) တၢ်လၢအရ့ဒိၣ်ကတၢၢ်န့ၣ် ယဟိဝၤယွၤဟ့ၣ်လီၤပှၤ နီၢ်သးတၢ်အီၣ်တၢ်အီ လၢလၢပှဲၤပှဲၤ ဒီးတၢ်မုၢ်လၢ်လၢ ခါဆူညါအဂီၢ် အဃိ ပစံးဘျုးအီၤသ့.
၉. ဒ်သိး ပကနီၣ်ဘၣ် စံးဘျုးယဟိဝၤယွၤအဂီၢ် ပကဘၣ်မၤဒ်လဲၣ်. (၁ သ့းစၤလနံ ၅:၁၇, ၁၈)
၉ တၢ်လၢ ယဟိဝၤယွၤ မၤန့ၢ်ပှၤသ့ၣ်တဖၣ်န့ၣ် ပတနီၣ်ဘၣ် စံးဘျုးအီၤ ထီဘိဘၣ်. ဒ်သိး ပကနီၣ်ဘၣ် စံးဘျုးအီၤအဂီၢ် ပကဘၣ်မၤဒ်လဲၣ်. ကွဲးလီၤဃာ် တၢ်လၢနဃ့ယဟိဝၤယွၤတဖၣ် ဒီးအဝဲစံးဆၢ နတၢ်ထုကဖၣ်ဒ်လဲၣ်န့ၣ် လၢခံနက့ၤကွၢ်ကဒါက့ၤသ့. ဝံၤဘျီ စံးဘျုးအီၤလၢ တၢ်လၢအမၤန့ၢ်နၤတဖၣ်. (ဖး ၁ သ့းစၤလနံ .) မ့မ့ၢ်ပဝဲန့ၣ် ပှၤဂၤမ့ၢ်စံးဘျုးပှၤ ဒီးအဲၣ်ပှၤန့ၣ်ပသးခုဒိၣ်မး. ဒ်န့ၣ်အသိး ပမ့ၢ်စံးဘျုး ယဟိဝၤယွၤလၢ အစံးဆၢ ပတၢ်ထုကဖၣ်န့ၣ် အဝဲကသးခုဒိၣ်မး. ( ၅:၁၇, ၁၈ကလီးစဲ ၃:၁၅) ဒီးတၢ်ဂ့ၢ်အရ့ဒိၣ် လၢပကဘၣ်စံးဘျုး ယဟိဝၤယွၤန့ၣ် အိၣ်ဒံး.
စံးဘျုးက့ၤ ယဟိဝၤယွၤ ခီဖျိလၢ အဟ့ၣ်လီၤပှၤ အဖိခွါသးဘိ အဃိ
၁၀. ဘၣ်မနုၤအဃိ ပကဘၣ်စံးဘျုး ယဟိဝၤယွၤ ခီဖျိအဆှၢလီၤ အဖိခွါလၢ ဟီၣ်ခိၣ်လဲၣ်. (၁ ပ့းတရူး ၂:၂၁)
၁၀ ဖး ၁ ပ့းတရူး ၂:၂၁. ပကဘၣ်စံးဘျုးယဟိဝၤယွၤ ခီဖျိအဆှၢလီၤ အဖိခွါလၢ ကသိၣ်လိပှၤအဃိ. ပမၤလိယ့ၣ်ၡူးအဂ့ၢ်အဃိ ပသ့ၣ်ညါထီၣ်ဘၣ် ယဟိဝၤယွၤအဂ့ၢ် ဒီးပကဘၣ်မၤသးခုအီၤဒ်လဲၣ်. ဒီးပမ့ၢ်နာ် ယ့ၣ်ၡူးအတၢ်ပှ့ၤက့ၤန့ၣ် ပကကဲထီၣ်ဘၣ် ကစၢ်ယွၤအသကိး ဒီးအိၣ်ဃူအိၣ်ဖိးဘၣ်ဒီး ကစၢ်ယွၤ.—ရိမ့ၤ ၅:၁.
၁၁. ဘၣ်မနုၤအဃိ ပဘၣ်ဃ့ဘါထုကဖၣ်လၢ ယဟိဝၤယွၤအအိၣ် ခီဖျိလၢ ယ့ၣ်ၡူးအမံၤလဲၣ်.
၁၁ ပစံးဘျုးယဟိဝၤယွၤ သ့ခီဖျိပဃ့ဘါထုကဖၣ်လၢ အအိၣ်ခီဖျိလၢ အဖိခွါယ့ၣ်ၡူးအမံၤ. ယဟိဝၤယွၤ စံးဆၢပတၢ်ထုကဖၣ် ခီဖျိလၢ ယ့ၣ်ၡူး. ယဟိဝၤယွၤန့ၣ် အဒိကနၣ် ပတၢ်ထုကဖၣ် ဒီးပမ့ၢ်ဃ့တၢ်လၢ ယ့ၣ်ၡူးအမံၤန့ၣ် အဝဲကစံးဆၢက့ၤပှၤ. ယ့ၣ်ၡူးတဲဝဲလၢ “သုမ့ၢ်ဃ့ တၢ်တမံၤဂ့ၤတမံၤဂ့ၤ လၢယမံၤန့ၣ် ယကမၤအီၤ ဒ်သိး ပၢ်ကဘၣ် တၢ်မၤလၤကပီၤအီၤ ခီဖျိဖိခွါ.”—ယိၤဟၣ် ၁၄:၁၃, ၁၄.
၁၂. ဘၣ်မနုၤအဃိ ပဘၣ်စံးဘျုး ယဟိဝၤယွၤ ခီဖျိလၢ အဟ့ၣ်လီၤပှၤအဖိခွါ အဃိလဲၣ်.
၁၂ ယဟိဝၤယွၤ ပျၢ်ကွံာ်ပတၢ်ကမၣ် ခီဖျိလၢ ယ့ၣ်ၡူးတၢ်ပှ့ၤက့ၤအဃိ. ဘၣ်ဃးဒီး ယ့ၣ်ၡူးန့ၣ် လံာ်စီဆှံတဲဝဲလၢ “ပှၤလုၢ်တၢ်ခိၣ် အဒိၣ်ကတၢၢ် ဒ်အံၤတဂၤလၢ အဆ့ၣ်နီၤဝဲလၢမူခိၣ် လၢတၢ်ကဟုကညီၢ်ကစၢ်တဂၤ အလီၢ်ပစိာ် အစုထွဲတခီ.” (ဧ့ၤဘြံၤ ၈:၁) ဒီးယ့ၣ်ၡူးမ့ၢ် “ပှၤမၤစၢၤတၢ်တဂၤလၢ . . . အအိၣ်ဒီးပၢ်.” (၁ ယိၤဟၣ် ၂:၁) ပစံးဘျုးဘၣ်ယဟိဝၤယွၤလၢ အဟ့ၣ်လီၤပှၤ ပှၤလုၢ်တၢ်ခိၣ် အဒိၣ်ကတၢၢ်တဂၤ လၢအနၢ်ပၢၢ်စၢၤ ပတၢ်ဂံၢ်စၢ်ဘါစၢ် ဒီးအ “ဃ့ကညးန့ၢ်တၢ်လၢ ပဂီၢ်.” (ရိမ့ၤ ၈:၃၄; ဧ့ၤဘြံၤ ၄:၁၅) ပကဲပှၤတလၢတပှဲၤဘၣ် အဃိ ယ့ၣ်ၡူး မ့ၢ်တဟ့ၣ်လုၢ်ထီၣ်အသး လၢပဂီၢ်ဘၣ်န့ၣ် ပဃ့ဘါထုကဖၣ်တၢ်လၢ ယဟိဝၤယွၤအအိၣ် တန့ၢ်ဘၣ်. ယဟိဝၤယွၤ ဟ့ၣ်လီၤပှၤအဖိခွါ လၢအမ့ၢ် တၢ်ဟ့ၣ်လၢ အလုၢ်ဒိၣ်ပှ့ၤဒိၣ်အံၤအဃိ ပစံးဘျုးအီၤဒိၣ်မး.
ဃ့ဘါထုကဖၣ်န့ၢ်တၢ်လၢ ဒီပုၢ်ဝဲၢ်မုၣ်ခွါတဖၣ်အဂီၢ်
၁၃. တချုးလၢ ယ့ၣ်ၡူးကသံတနၤန့ၣ် အပာ်ဖျါထီၣ်လၢ အအဲၣ်အပျဲၢ်အဘီၣ်တဖၣ် ဒ်လဲၣ်.
၁၃ တချုးလၢ ယ့ၣ်ၡူးကသံတနၤန့ၣ် အဃ့ဘါထုကဖၣ်န့ၢ်တၢ်လၢ အပျဲၢ်အဘီၣ်အဂီၢ် ဖးအါညါ. ဒီးအဃ့ဝဲဒ်သိးအပၢ်က “ဒီသဒၢ” အပျဲၢ်အဘီၣ်တဖၣ်လၢ “မုၣ်ကီၤလံၢ်အစုပူၤ.” (ယိၤဟၣ် ၁၇:၁၅) ယ့ၣ်ၡူးသ့ၣ်ညါဝဲလၢ တယံာ်လၢၤဘၣ်န့ၣ် အကထံၣ်ဘၣ်ဒီး တၢ်နးတၢ်ဖှီၣ်အါမး သနာ်က့ အဘၣ်ယိၣ်န့ၢ်တၢ်လၢ အတၢ်မၢဖိတဖၣ်အဂီၢ်. အဃိ ပထံၣ်ဘၣ်လၢ ယ့ၣ်ၡူးအဲၣ် အဝဲသ့ၣ်ဒိၣ်မး.
၁၄. ပအဲၣ် ပဒီပုၢ်ဝဲၢ်မုၣ်ခွါန့ၣ် ပပာ်ဖျါထီၣ် ကသ့ဒ်လဲၣ်.
၁၄ ပမ့ၢ်ကွၢ်လိ ယ့ၣ်ၡူးန့ၣ် ပတဃ့တၢ်ထဲလၢ ပနီၢ်ကစၢ်အဂီၢ်ဘၣ်. ပကဃ့န့ၢ်တၢ်လၢ ပဒီပုၢ်ဝဲၢ်မုၣ်ခွါအဂီၢ်စ့ၢ်ကီး. ပမ့ၢ် ဃ့ဘါထုကဖၣ်န့ၢ်တၢ်လၢ ပဒီပုၢ်ဝဲၢ်မုၣ်ခွါအဂီၢ်န့ၣ် မ့ၢ်ဒၣ်ပဒိကနၣ် ယ့ၣ်ၡူးအတၢ်မၤလိာ်လၢ ပကဘၣ်အဲၣ်လိာ်သး တဂၤဒီးတဂၤ. ဒီးပပာ်ဖျါထီၣ်န့ၢ် ယဟိဝၤယွၤလၢ ပအဲၣ် ပဒီပုၢ်ဝဲၢ်မုၣ်ခွါဒိၣ်မး. (ယိၤဟၣ် ၁၃:၃၄) ပမ့ၢ် ဃ့ဘါထုကဖၣ်န့ၢ်တၢ်လၢ ပဒီပုၢ်ဝဲၢ်မုၣ်ခွါတဖၣ်အဂီၢ်န့ၣ် တကဲထီၣ် တၢ်ကလီကလီဘၣ်, ကကဲထီၣ် တၢ်မၤစၢၤလၢ အဝဲသ့ၣ်အဂီၢ်. ကစၢ်ယွၤ ကလုၢ်ကထါ ပာ်ဖျါထီၣ်ဝဲလၢ “ပှၤတီပှၤလိၤတဂၤ အတၢ်ဃ့ကညးန့ၣ် အိၣ်ဒီးအစိအကမီၤလၢ အကမၤစၢၤတၢ်အဂီၢ်.”—ယၤကိာ် ၅:၁၆.
၁၅. ဘၣ်မနုၤအဃိ အရ့ဒိၣ်လၢ ပကဘၣ် ဃ့ဘါထုကဖၣ်န့ၢ်တၢ်လၢ ပဒီပုၢ်ဝဲၢ်မုၣ်ခွါတဖၣ် အဂီၢ်လဲၣ်.
၁၅ ပဒီပုၢ်ဝဲၢ်မုၣ်ခွါတဖၣ် ထံၣ်ဘၣ်တၢ်မၤကွၢ် အါမးအဃိ အရ့ဒိၣ်လၢ ပကဘၣ် ဃ့ဘါထုကဖၣ်န့ၢ်တၢ်လၢ အဝဲသ့ၣ်အဂီၢ်. ပဒီပုၢ်ဝဲၢ်မုၣ်ခွါတနီၤန့ၣ် အဝဲသ့ၣ် အိၣ်တဆူၣ်ဘၣ်, ထံၣ်ဘၣ်ဒီး န့ဆၢၣ်တၢ်ဘၣ်ဒိဘၣ်ထံး, တၢ်ဒုးတၢ်ယၤ, တၢ်မၤအၢမၤနး ဒီးတၢ်ကီတၢ်ခဲအဂၤတဖၣ်. အဃိ ပဃ့ဘါထုကဖၣ်လၢ အဝဲသ့ၣ်က အိၣ်ဒီး တၢ်တူၢ်န့ၢ်ခီၣ်ကဲ အဂီၢ်သ့. ဘၣ်သ့ၣ်သ့ၣ် နကသ့ၣ်ညါ ဒီပုၢ်ဝဲၢ်မုၣ်ခွါလၢ အထံၣ်ဘၣ်ဒီး တၢ်ကီတၢ်ခဲဒ်န့ၣ်တဖၣ်. အဃိ ဖဲနဃ့ဘါထုကဖၣ်န့ၢ်တၢ်လၢ အဝဲသ့ၣ်အဂီၢ်အခါ နကိးထီၣ် အဝဲသ့ၣ်အမံၤသ့. ဒီးပဃ့ဘါထုကဖၣ်လၢ ပဒီပုၢ်ဝဲၢ်မုၣ်ခွါ လၢအဟ့ၣ်လီၤသး ဒီးအမၤစၢၤဝဲ ဒီပုၢ်ဝဲၢ်လၢ အလိၣ်ဘၣ်တၢ်မၤစၢၤတဖၣ် အဂီၢ်သ့. ပပာ်ဖျါထီၣ်လၢ ပအဲၣ် ပဒီပုၢ်ဝဲၢ်မုၣ်ခွါတဖၣ် အနီၢ်ကီၢ်သ့ခီဖျိ ပဃ့ဘါထုကဖၣ်လၢ ယဟိဝၤယွၤ ကမၤစၢၤအဝဲသ့ၣ်လၢ အကအိၣ်ဒီး တၢ်တူၢ်န့ၢ်ခီၣ်ကဲအဂီၢ်.
၁၆. ဘၣ်မနုၤအဃိ အရ့ဒိၣ်လၢ ပကဃ့ဘါထုကဖၣ်န့ၢ်တၢ်လၢ ပှၤလၢအတီခိၣ်ရိၤမဲပှၤတဖၣ် အဂီၢ်လဲၣ်.
၁၆ ပမ့ၢ်ဃ့ဘါထုကဖၣ်န့ၢ်တၢ်လၢ ပှၤလၢအတီခိၣ်ရိၤမဲတၢ်လၢ တၢ်အိၣ်ဖှိၣ်ပူၤအဂီၢ်န့ၣ် အဝဲသ့ၣ်သးခုဒီး ကဲဘျုးလၢအဝဲသ့ၣ်အဂီၢ်ဒိၣ်မး. တၢ်မၢဖိပီလူး တူၢ်ဘၣ်ဝဲလၢ ပှၤဂၤဃ့ဘါထုကဖၣ်န့ၢ်တၢ်လၢ အဂီၢ်န့ၣ် မ့ၢ်တၢ်လၢအရ့ဒိၣ်စ့ၢ်ကီး. အတဲဝဲလၢ “ဖဲယအိးထီၣ် ယထးခိၣ်အခါ ဒ်သိး ကစၢ်ယွၤကဟ့ၣ်ယၤ တၢ်ကတိၤလၢ အဘၣ် ဒီးယတဲဖျါထီၣ် တၢ်သးခုကစီၣ် အတၢ်ခူသူၣ်စီဆှံအဂ့ၢ် ဒူဒူကသ့အဂီၢ် ဃ့ထုကဖၣ်စ့ၢ်ကီး လၢယဂီၢ်တက့ၢ်.” (အ့းဖ့းစူး ၆:၁၉) ဆၢကတီၢ်ခဲအံၤစ့ၢ်ကီး ပဒီပုၢ်ဝဲၢ်ခွါတဖၣ်လၢ အမၤ ကစၢ်ယွၤအတၢ်မၤ ဆူၣ်ဆူၣ် လၢအတီခိၣ်ရိၤမဲပှၤန့ၣ် အိၣ်ဝဲအါမး. ပပာ်ဖျါထီၣ်လၢ ပအဲၣ်အဝဲသ့ၣ် ခီဖျိ ပဃ့ယဟိဝၤယွၤလၢ ကဆိၣ်ဂ့ၤ အဝဲသ့ၣ်အတၢ်မၤ.
ပမ့ၢ်ဃ့ဘါထုကဖၣ်လၢ ပှၤဂၤအမဲာ်ညါန့ၣ် ပကြၢးဃ့ဒ်လဲၣ်
၁၇-၁၈. ဘၣ်သ့ၣ်သ့ၣ် ပှၤကမၢပဃ့ဘါထုကဖၣ်လၢ ပှၤဂၤအမဲာ်ညါ လၢဆၢကတီၢ်ဖဲလဲၣ် ဒီးပကဘၣ်နီၣ်ဘၣ် တၢ်ဂ့ၢ်မနုၤလဲၣ်.
၁၇ တဘျီတခီၣ် ပှၤကမၢပဃ့ဘါထုကဖၣ်န့ၢ်တၢ်လၢ ပှၤဂၤအမဲာ်ညါ. အဒိ ဒီပုၢ်ဝဲၢ်မုၣ်လၢ အသိၣ်လိ ပှၤမၤလိလံာ်စီဆှံဖိတဂၤ အကမၢဒီပုၢ်ဝဲၢ်မုၣ်လၢ အလဲၤပိာ်အခံတဂၤ ကဃ့ဘါထုကဖၣ်လၢ တၢ်မၤလိလံာ်စီဆှံအဂီၢ်. ဒီပုၢ်ဝဲၢ်မုၣ်လၢအလဲၤပိာ်အခံတဂၤအံၤ မ့ၢ်တသ့ၣ်ညါဝဲ ပှၤမၤလိလံာ်စီဆှံဖိ အဂ့ၢ်ဂ့ၤဂ့ၤဘၣ်န့ၣ် ဘၣ်သ့ၣ်သ့ၣ် အကအဲၣ်ဒိးဃ့ဘါထုကဖၣ်လၢ တၢ်မၤလိလံာ်စီဆှံဝံၤမၣ်. အမ့ၢ်ဃ့ဘါထုကဖၣ်လၢ တၢ်မၤလိဝံၤမၣ်န့ၣ် ဖဲန့ၣ်အကသ့ၣ်ညါအါထီၣ်ဝဲ ပှၤမၤလိလံာ်စီဆှံဖိအဂ့ၢ် ဒီးအကဘၣ် ဃ့ဘါထုကဖၣ်န့ၢ်တၢ်လၢ ပှၤမၤလိလံာ်စီဆှံဖိ အဂီၢ်ဒ်လဲၣ်န့ၣ် အကသ့ၣ်ညါဝဲ.
၁၈ ဘၣ်သ့ၣ်သ့ၣ် ဒီပုၢ်ဝဲၢ်ခွါတဂၤ ပှၤကမၢ အဃ့ဘါထုကဖၣ်န့ၢ်တၢ်လၢ တၢ်အိၣ်ဖှိၣ်ရိဖှိၣ် လၢတၢ်စံၣ်တဲၤတဲလီၤတၢ်အဂီၢ် မ့တမ့ၢ် လၢပှၤကထီၣ် တၢ်အိၣ်ဖှိၣ်အဂီၢ်. ဒီပုၢ်ဝဲၢ်ခွါလၢ အဒိးန့ၢ်ဘၣ် တၢ်ခွဲးတၢ်ယာ်တဂၤ ဒ်သိး အတၢ်ဃ့ဘါထုကဖၣ် ကကဲဘျုးအဂီၢ် အကဘၣ်နီၣ်ဘၣ် တၢ်ဂ့ၢ်မနုၤလဲၣ်. တၢ်ဃ့ဘါထုကဖၣ်န့ၣ် တမ့ၢ်တၢ်ဆၢကတီၢ်လၢ နကသိၣ်ပှၤဂၤ ဒီးဘိးဘၣ်သ့ၣ်ညါလီၤ တၢ်တမံၤမံၤဘၣ်. အဒိ ပှၤပာ်ပနီၣ် တၢ်ဆၢကတီၢ် ယဲၢ်မံးနံးလၢ တၢ်သးဝံၣ် ဒီးတၢ်ဃ့ဘါထုကဖၣ်အဂီၢ်. အဃိ ဒီပုၢ်ဝဲၢ်ခွါလၢ အဒိးန့ၢ်ဘၣ်မူဒါ လၢအကဘၣ် ဃ့ဘါထုကဖၣ်န့ၣ် ဖဲအဃ့ဘါထုကဖၣ် အဆၢကတီၢ် အတဘၣ် “တဲတၢ်အါအါ” ဘၣ်. လီၤဆီဒၣ်တၢ် ဖဲပှၤကစးထီၣ် တၢ်အိၣ်ဖှိၣ်အခါ.—မးသဲ ၆:၇.
တၢ်ဃ့ဘါထုကဖၣ်န့ၣ် ပကဘၣ်ထံၣ်အီၤဒ် တၢ်အရ့ဒိၣ်တခါလၢပဂီၢ်
၁၉. ပအိၣ် ကတဲာ်ကတီၤ ပသးလၢ ကစၢ်ယွၤ အမုၢ်စံၣ်ညီၣ်နံၤအဂီၢ် ကသ့ဒ်လဲၣ်.
၁၉ ယဟိဝၤယွၤ ကစံၣ်ညီၣ်တၢ် အမုၢ်နံၤဘူးထီၣ်လံ အဃိ ပကဘၣ်ထံၣ် တၢ်ဃ့ဘါထုကဖၣ်န့ၣ် အရ့ဒိၣ်န့ၢ်ဒံးလၢညါ. ဘၣ်ဃးဒီး တၢ်ဂ့ၢ်အံၤန့ၣ် ယ့ၣ်ၡူးတဲဝဲလၢ “ဒ်သိးသုလဲၤခီဖျိ တၢ်သ့ၣ်တဖၣ်အံၤ . . . ကန့ၢ်အဂီၢ် အိၣ်ပလီၢ်သး ဒီးဃ့ကညးယွၤ ထီဘိတက့ၢ်.” (လူၤကၣ် ၂၁:၃၆) ပမ့ၢ် ဃ့ဘါထုကဖၣ်တၢ် ထီဘိန့ၣ် ပနီၢ်သးကဆူၣ်ထီၣ် ဒီးပကအိၣ် ကတဲာ်ကတီၤ ပသးလၢ ကစၢ်ယွၤ အမုၢ်စံၣ်ညီၣ်နံၤအဂီၢ်.
၂၀. ပတၢ်ထုကဖၣ်န့ၣ် အလီၤဂာ်ဒ်သိးဒီး တၢ်နၢမူ ကသ့ဒ်လဲၣ်.
၂၀ ပတဲသကိးတ့ၢ် တၢ်ဂ့ၢ်လၢ အဘၣ်ဃးဒီး ပကဘၣ် ပာ်လုၢ်ပာ်ပှ့ၤ တၢ်ဃ့ဘါထုကဖၣ်. ဖဲပဃ့ဘါထုကဖၣ်တၢ်အခါ တၢ်ဂ့ၢ် အရ့ဒိၣ်ကတၢၢ်လၢ ပကြၢးဃ့အီၤန့ၣ် မ့ၢ်ဝဲတၢ်ဂ့ၢ်လၢ အဘၣ်ဃးဒီး ကစၢ်ယွၤ အတၢ်တိာ်ပာ်. ဒီးပစံးဘျုးကစၢ်ယွၤ ခီဖျိလၢ အဟ့ၣ်လီၤပှၤအဖိခွါ ဒီးအဘီမုၢ်အတၢ်ပၢအဃိ. ဒီးပဃ့ဘါထုကဖၣ်လၢ ပဒီပုၢ်ဝဲၢ်မုၣ်ခွါတဖၣ် အဂီၢ်စ့ၢ်ကီး. ယဟိဝၤယွၤ အဲၣ်ဒိးလၢ ပကဃ့ဘါထုကဖၣ်လၢ ပတၢ်လိၣ်ဘၣ် လၢနီၢ်ခိဒီးနီၢ်သး အဂီၢ်စ့ၢ်ကီး. တချုးလၢ ပဃ့ဘါထုကဖၣ်အခါ ပမ့ၢ် ဆိကမိၣ်ထံပာ်စၢၤ တၢ်ဂ့ၢ်လၢ ပကဃ့အီၤန့ၣ် မ့ၢ်ဒၣ်ပပာ်ဖျါထီၣ်လၢ ပပာ်လုၢ်ပာ်ပှ့ၤ တၢ်ခွဲးတၢ်ယာ်လၢ ပကဃ့ဘါထုကဖၣ်တၢ်. ပမ့ၢ်မၤဒ်န့ၣ်န့ၣ် ပတၢ်ထုကဖၣ် ကလီၤဂာ်ဒ် တၢ်နၢမူလၢ “ကစၢ်ယွၤ ဘၣ်သူၣ်ဘၣ်သးဝဲ.”—ကတိၤဒိ ၁၅:၈.
တၢ်သးဝံၣ် ၄၅ တၢ်လၢယဆိကမိၣ်ထံအီၤ
^ ပအဲၣ်ဒိးလၢ ပတၢ်ဃ့ဘါထုကဖၣ်န့ၣ် ကလီၤဂာ်ဒီးတၢ်နၢမူလၢ ကစၢ်ယွၤ ဘၣ်သူၣ်ဘၣ်သးဝဲ. အဃိ ပပာ်လုၢ်ပာ်ပှ့ၤ တၢ်ခွဲးတၢ်ယာ်လၢ ပကဃ့ဘါထုကဖၣ်တၢ်လၢ ယဟိဝၤယွၤအအိၣ်. လၢတၢ်မၤလိအံၤအပူၤ ပကတဲသကိး ဖဲပဃ့ဘါထုကဖၣ်အခါ ပဃ့တၢ်မနုၤသ့လဲၣ်. တကးဒံးဘၣ် ဖဲပှၤမ့ၢ်မၢ ပဃ့ဘါထုကဖၣ်န့ၢ်တၢ်လၢပှၤဂီၢ်အခါ ပကဘၣ်ပာ်သူၣ်ပာ်သး တၢ်ဂ့ၢ်မနုၤလဲၣ်.
^ တၢ်ဂီၤအခီပညီ– ဝၤတဂၤ ဃ့ဘါထုကဖၣ်ဒီးအမါ လၢအဖိလၢ အလဲၤထီၣ်ကၠိအဂီၢ်, အပါလၢ အအိၣ်တဆူၣ်ဘၣ်အဂီၢ် ဒီးပှၤမၤလိလံာ်စီဆှံဖိအဂီၢ်.
^ တၢ်ဂီၤအခီပညီ– ဒီပုၢ်ဝဲၢ်ခွါသးစၢ်တဂၤ အစံးဘျုး ယဟိဝၤယွၤလၢ အဟ့ၣ်လီၤပှၤ အဖိခွါယ့ၣ်ၡူး ဒ်သိးကပှ့ၤက့ၤပှၤ, အဟ့ၣ်လီၤပှၤ ဟီၣ်ခိၣ်ဃံလၤ လၢပကအိၣ် လၢအပူၤအဂီၢ် ဒီးတၢ်အီၣ်တၢ်အီ လၢအကဲထီၣ် တၢ်ဂံၢ်တၢ်ဘါအဂီၢ်.
^ တၢ်ဂီၤအခီပညီ– ဒီပုၢ်ဝဲၢ်မုၣ်တဂၤ ဃ့ဘါထုကဖၣ်လၢ ယဟိဝၤယွၤ ကမၤစၢၤ ပှၤပၢဆှၢတၢ်ကမံးတံာ် ခီဖျိအသးစီဆှံ, ဒီးမၤစၢၤဒီပုၢ်ဝဲၢ်မုၣ်ခွါ လၢအထံၣ်ဘၣ်ဒီး န့ဆၢၣ်တၢ်ဘၣ်ဒိဘၣ်ထံး ဒီးတၢ်မၤအၢမၤနးတဖၣ်.