၁. ခရံာ်ဖိတဖၣ်​ ကဘၣ်လီၤဂာ်ဒီး သ့ၣ်ထူၣ်ဒ်လဲၣ်. (ကွၢ်စ့ၢ်ကီးတၢ်ဂီၤ.)

 တၢ်ကတိၤဒိအိၣ်ဝဲလၢ “သ့ၣ်ထူၣ်လၢ အစၢ် ဒီးအက့ၣ်လီၤညီန့ၣ်​ ကလံၤမ့ၢ်အူဘၣ်အီၤနာ်က့ အတကၢ်ညီညီဘၣ်.” ခီဖျိလၢ သ့ၣ်ထူၣ်တနီၤနီၤန့ၣ်​ အစၢ် ဒီးအက့ၣ်လီၤညီအဃိ အဝဲသ့ၣ်တကၢ်ဘၣ်​ ဒီးဒိၣ်ထီၣ်ဝဲကွ့ၢ်ကွ့ၢ်. ဒ်န့ၣ်အသိး ပဝဲစ့ၢ်ကီး ပကဒိၣ်ထီၣ်ထီထီၣ်လၢ နီၢ်သးတကပၤအဂီၢ် ပကဘၣ်လီၤဂာ်ဒ်န့ၣ်. ပကလီၤဂာ်ဒ်န့ၣ်အဂီၢ် ပကဘၣ်မၤဒ်လဲၣ်. ပမ့ၢ်အိၣ်ဒီး တၢ်ထံၣ်အကြၢးအဘၣ်န့ၣ်​ ပတၢ်အိၣ်သးမ့ၢ်ဆီတလဲမ့ၢ်ဂ့ၤ ပှၤဂၤအတၢ်ထံၣ်​ မ့ၢ်လီၤဆီဒီးပှၤမ့ၢ်ဂ့ၤ ပကဆဲးမၤယဟိဝၤယွၤတၢ်မၤလၢ တၢ်သးခု.

၂. တၢ်ဂ့ၤတၢ်ဝါ လၢကမၤစၢၤပှၤ ဒ်သိးပကဆီတလဲသး ဒ်တၢ်အိၣ်သးအိၣ်ဝဲအသိးန့ၣ်​ မ့ၢ်မနုၤလဲၣ်. ဒီးလၢတၢ်မၤလိတခါအံၤ ပကတဲသကိး တၢ်ဂ့ၢ်မနုၤလဲၣ်.

^၂ ယဟိဝၤယွၤ အခ့အပှၤတဖၣ်န့ၣ်​ ကဘၣ်အိၣ်ဒီး တၢ်ထံၣ်အကြၢးအဘၣ်. တကးဒံးဘၣ်​ အဝဲသ့ၣ်ကဘၣ်အိၣ်ဒီး တၢ်ဆီၣ်လီၤသး ဒီးတၢ်သးကညီၤ. လၢတၢ်မၤလိအံၤန့ၣ်​ ပကထံၣ်ဘၣ်လၢ တၢ်ဂ့ၤတၢ်ဝါတဖၣ်အံၤ မၤစၢၤဝဲ ခရံာ်ဖိတနီၤလၢ ကဆီတလဲသး ဒ်တၢ်အိၣ်သးအိၣ်ဝဲအသိး. ဒီးပကထံၣ်ဘၣ်လၢ တၢ်ဂ့ၤတၢ်ဝါတဖၣ်အံၤ မၤစၢၤပှၤ ကသ့ဒ်လဲၣ်. အဆိကတၢၢ် ပကမၤလိသကိး ယဟိဝၤယွၤဒီးယ့ၣ်ၡူး အဒိအတဲာ်လၢ အအိၣ်ဒီး တၢ်ထံၣ်အကြၢးအဘၣ်.

၃. ယဟိဝၤယွၤ အိၣ်ဒီး တၢ်ထံၣ်အကြၢးအဘၣ်န့ၣ်​ ပသ့ၣ်ညါဘၣ်ဒ်လဲၣ်.

^၃ ယဟိဝၤယွၤန့ၣ်​ အအိၣ်ဂၢၢ်ဆိးကျၢၤ ဒီးတဒံဝ့ၤဒံဝီၤဘၣ်​ အဃိ လံာ်စီဆှံကိးအီၤလၢ “လၢၢ်တဖျၢၣ်.” (၅ မိၤ ၃၂:၄) တကးဒံးဘၣ်​ ယဟိဝၤယွၤအိၣ်ဒီး တၢ်ထံၣ်အကြၢးအဘၣ်စ့ၢ်ကီး. ပထံၣ်ဘၣ်လၢ ဟီၣ်ခိၣ်တၢ်အိၣ်သး ဆီတလဲနာ်က့ ယဟိဝၤယွၤ အိၣ်ဒီး တၢ်ထံၣ်အကြၢးအဘၣ်​ ဒီးမၤဝဲဒ်သိး အတၢ်အၢၣ်လီၤ ကဟဲလၢပှဲၤထီၣ်ခဲလၢာ်.  ယဟိဝၤယွၤ တ့လီၤပှၤဟီၣ်ခိၣ်ဖိ ဒ်အက့ၢ်အဂီၤအသိး အဃိအဟ့ၣ်လီၤပှၤ တၢ်သ့တၢ်ဘၣ်လၢ ပကဆီတလဲသး ဒ်တၢ်အိၣ်သးအိၣ်ဝဲအသိး. တကးဒံးဘၣ်​ ဖဲပထံၣ်ဘၣ်ဒီး တၢ်အိၣ်သးဆီတလဲအခါ ယဟိဝၤယွၤဟ့ၣ်လီၤပှၤ လံာ်စီဆှံတၢ်ဟံးစုနဲၣ်ကျဲလၢ ကမၤစၢၤပှၤဒ်သိး ပကဆၢတဲာ် တၢ်လၢအဘၣ်. ယဟိဝၤယွၤ အဒိအတဲာ် ဒီးအတၢ်ဟံးစုနဲၣ်ကျဲလၢ ပဖးဘၣ်လၢလံာ်စီဆှံပူၤန့ၣ်​ ပာ်ဖျါထီၣ်န့ၢ်ပှၤလၢ ယဟိဝၤယွၤန့ၣ်​ အကဲ “လၢၢ်တဖျၢၣ်” သနာ်က့ အအိၣ်ဒီး တၢ်ထံၣ်အကြၢးအဘၣ်.

၄. ယဟိဝၤယွၤ အိၣ်ဒီး တၢ်ထံၣ်အကြၢးအဘၣ်ဒ်လဲၣ်. ဟ့ၣ်တၢ်အဒိ. (၃ မိၤၡ့ ၅:၇, ၁၁)

^၄ ယဟိဝၤယွၤ မ့ၢ်ပှၤလၢ အလၢအပှဲၤတဂၤ ဒီးအိၣ်ဒီး တၢ်ထံၣ်အကြၢးအဘၣ်. တကးဒံးဘၣ်​ အရ့ဒီးပှၤဟီၣ်ခိၣ်ဖိတဖၣ်​ ဂ့ၤဂ့ၤ. အဒိ ပထံၣ်ဘၣ်လၢ ဖဲယဟိဝၤယွၤ ရ့ဒီးပှၤအံၣ်စရ့လးဖိအခါ အတကွၢ်ထဲအနီၢ်ကစၢ်အဂီၢ်ဘၣ်​ ဒီးအအိၣ်ဒီး တၢ်ထံၣ်အကြၢးအဘၣ်. ပထံၣ်ဘၣ်လၢ ပှၤအံၣ်စရ့လးဖိ ကဲဒိၣ်မ့ၢ်ဂ့ၤ ဖှီၣ်မ့ၢ်ဂ့ၤ ယဟိဝၤယွၤ တမၢအဝဲသ့ၣ်​ ဟ့ၣ်လုၢ်ထီၣ်တၢ်လုၢ်လၢ အပှ့ၤထဲသိးသိးဘၣ်. တၢ်အိၣ်သးတနီၤနီၤန့ၣ်​ ယဟိဝၤယွၤ ဟ့ၣ်အခွဲးလၢ အဝဲသ့ၣ်ကလုၢ်ထီၣ်တၢ် ဒ်တၢ်လၢအိၣ်ဒီးအဝဲသ့ၣ်အသိး.—ဖး ၃ မိၤၡ့ ၅:၇, ၁၁.

၅. ယဟိဝၤယွၤ ပာ်ဖျါထီၣ်လၢ အအိၣ်ဒီး တၢ်ဆီၣ်လီၤသး ဒီးတၢ်သးကညီၤ ဒ်လဲၣ်. ဟ့ၣ်တၢ်အဒိ.

^၅ ခီဖျိလၢ ယဟိဝၤယွၤ အိၣ်ဒီး တၢ်ဆီၣ်လီၤသး ဒီးတၢ်သးကညီၤအဃိ အအိၣ်ဒီး တၢ်ထံၣ်အကြၢးအဘၣ်. အဒိ တချုးဖဲ ယဟိဝၤယွၤ ကမၤဟးဂီၤ ပှၤအၢပှၤသီလၢ ဝ့ၢ်စဒိၣ်အပူၤ ဒံးဘၣ်န့ၣ်​ အပာ်ဖျါထီၣ်​ တၢ်ဆီၣ်လီၤသးဒ်လဲၣ်. ယဟိဝၤယွၤဆှၢလီၤ မူခိၣ်ကလူးတဖၣ်လၢ ကတဲဘၣ်စီၤလိာ်လၢ ကလဲၤဃ့ၢ်ပူၤဖျဲးသးလၢ ကစၢၢ်ကလိအကျါ. ဘၣ်ဆၣ်​ စီၤလိာ် လဲၤဃ့ၢ်ပူၤဖျဲးအသးဖဲန့ၣ်​ တဘူၣ်ဘၣ်. ဒီးအဃ့ကညး ယဟိဝၤယွၤလၢ အကဃ့ၢ်လၢ ဝ့ၢ်စိၤဧၢ်လၢ အကဲဝဲ ဝ့ၢ်ဆံးဆံးဖိတဖျၢၣ်. နီၢ်ကီၢ်န့ၣ်​ ယဟိဝၤယွၤ ကမၤဟးဂီၤဝဲ ဝ့ၢ်တဖျၢၣ်အံၤ စ့ၢ်ကီး. ဒီးယဟိဝၤယွၤ မ့ၢ်မၢဆူၣ်စီၤလိာ်လၢ ကဒိကနၣ်​ အတၢ်ဟံးစုနဲၣ်ကျဲန့ၣ်​ အမၤဝဲသ့ ဘၣ်ဆၣ်​ ယဟိဝၤယွၤ တမၤဝဲဒ်န့ၣ်ဘၣ်. ယဟိဝၤယွၤ ဒိကနၣ်စီၤလိာ် အတၢ်ဃ့ကညး ဒီးအတမၤဟးဂီၤ ဝ့ၢ်စိၤဧၢ်လၢၤဘၣ်. (၁ မိၤ ၁၉:၁၈-၂၂) အနံၣ်လၢအကယၤ ပူၤကွံာ်အလီၢ်ခံ ယဟိဝၤယွၤ ပာ်ဖျါထီၣ်စ့ၢ်ကီး တၢ်သးကညီၤလၢ ပှၤနံၤနဝ့ဖိ အဖီခိၣ်ဒ်လဲၣ်. ယဟိဝၤယွၤ ဆှၢလီၤဝဲ ဝံယိၤနါဒ်သိး ကလဲၤတဲဘၣ်​ ပှၤနံၤနဝ့ဖိ လၢအအၢအသီတဖၣ်လၢ ယဟိဝၤယွၤ ကမၤဟးဂီၤဝဲ ဝ့ၢ်နံၤနဝ့ ဒီးပှၤနံၤနဝ့ဖိခဲလၢာ်. ပှၤနံၤနဝ့ဖိတဖၣ်န့ၣ်​ ပီၢ်ယၢ်လီၤက့ၤအသး ဒီးယဟိဝၤယွၤ သးကညီၤဘၣ်အဝဲသ့ၣ်​ အဃိ ယဟိဝၤယွၤ တမၤဟးဂီၤအဝဲသ့ၣ်လၢၤဘၣ်.—ယိၤနါ ၃:၁, ၁၀; ၄:၁၀, ၁၁.

၆. ယဟိဝၤယွၤ အိၣ်ဒီး တၢ်ထံၣ်အကြၢးအဘၣ်အဃိ ယ့ၣ်ၡူး ကွၢ်လိအီၤဒ်လဲၣ်.

^၆ ယဟိဝၤယွၤ အိၣ်ဒီး တၢ်ထံၣ်အကြၢးအဘၣ်အဃိ ယ့ၣ်ၡူး ကွၢ်လိအီၤဒ်လဲၣ်. ယဟိဝၤယွၤ ဆှၢလီၤယ့ၣ်ၡူး ဒ်သိးကစံၣ်တဲၤတဲလီၤတၢ်လၢ “ပှၤအံၣ်စရ့လးဖိ လၢအမ့ၢ် သိလၢအလီၤမၢ်တဖု အအိၣ်.” ဖဲယ့ၣ်ၡူး မၤဝဲမူဒါအံၤအခါ အပာ်ဖျါထီၣ်လၢ အအိၣ်ဒီး တၢ်ထံၣ်အကြၢးအဘၣ်ဒ်လဲၣ်. ဘၣ်တဘျီ ပိာ်မုၣ်လၢ အတမ့ၢ်ပှၤအံၣ်စရ့လးဖိတဂၤ အဖိမုၣ်န့ၣ်​ “တၢ်ဝံတၢ်နါအိၣ်လၢ အလိၤအဃိ အဝဲဘၣ်တူၢ်တၢ်နးမး.” အဃိ ပိာ်မုၣ်တဂၤအံၤ ဃ့ကညး ယ့ၣ်ၡူးလၢ ကမၤဘျါက့ၤ အဖိမုၣ်. ယ့ၣ်ၡူးပာ်ဖျါထီၣ်​ တၢ်သးကညီၤခီဖျိ အဒိကနၣ်ဝဲ ပိာ်မုၣ်တဂၤအံၤ အတၢ်ဃ့ ဒီးမၤဘျါက့ၤဝဲ အဖိမုၣ်. (မး ၁၅:၂၁-၂၈) ပကကွၢ်သကိး တၢ်အဒိအသီတခါ. ဖဲယ့ၣ်ၡူးစးထီၣ်​ စံၣ်တဲၤတဲလီၤတၢ် သီသီအခါ အတဲဝဲလၢ “ပှၤလၢ အသမၢယၤ . . . န့ၣ်ယကသမၢ စ့ၢ်ကီးအီၤ.” (မး ၁၀:၃၃) ဘၣ်ဆၣ်​ ဖဲစီၤပ့းတရူးသမၢ ယ့ၣ်ၡူးသၢဘျီ ဝံၤအလီၢ်ခံ ယ့ၣ်ၡူး သးလၢာ်အီၤ လံဧါ. ခီဖျိလၢ စီၤပ့းတရူး ပီၢ်ယၢ်လီၤက့ၤသး နီၢ်ကီၢ် ဒီးအိၣ်ဒီးတၢ်နာ်အဃိ ယ့ၣ်ၡူးသးတလၢာ်အီၤဒံးဘၣ်. ယ့ၣ်ၡူး သမူထီၣ်က့ၤဝံၤအလီၢ်ခံ အလီၣ်ဖျါထီၣ်အသးလၢ စီၤပ့းတရူးအမဲာ်ညါ ဒီးဘၣ်သ့ၣ်သ့ၣ်​ ယ့ၣ်ၡူးကတဲဘၣ်​ စီၤပ့းတရူးလၢ အပျၢ်အတၢ်ကမၣ်လံ ဒီးအအဲၣ်အီၤဒံး.—လူၤ ၂၄:၃၃, ၃၄.

၇. ဒ်ဖံလံးပံၤ ၄:၅ ပာ်ဖျါထီၣ်အသိး ပဘၣ်သးလၢ ပှၤဂၤကထံၣ်ပှၤဒ်လဲၣ်.

^၇ ပသ့ၣ်ညါဘၣ်လၢ ယဟိဝၤယွၤ ဒီးယ့ၣ်ၡူးန့ၣ်​ အိၣ်ဒီး တၢ်ထံၣ်အကြၢးအဘၣ်. ဒီးယဟိဝၤယွၤ ဘၣ်သးလၢ ပကအိၣ်ဒီး တၢ်ထံၣ်အကြၢးအဘၣ်​ စ့ၢ်ကီး. (ဖး ဖံလံးပံၤ ၄:၅.) အဃိ ပကဘၣ်​ သံကွၢ်လီၤပသးလၢ ‘မ့ၢ်ပှၤထံၣ်ယၤဒ်သိးဒီး ပှၤလၢအအိၣ်ဒီး တၢ်ထံၣ်အကြၢးအဘၣ်ဧါ, ပှၤလၢအသးဂ့ၤကၠ့ၤဧါ ဒီးပှၤရ့ဒီးယၤ ညီကၠ့ၤဧါ. မ့တမ့ၢ် ပှၤထံၣ်ယၤ ဒ်ပှၤလၢအခိၣ်ကိၤဧါ, ပှၤလၢအအ့န့ဆူၣ်​ ဒီးအသးတဂ့ၤဘၣ်ဧါ. ဒီးမ့ၢ်ပှၤထံၣ်ယၤဒ် ယမ့ၢ်ပှၤလၢအမၢဆူၣ်ပှၤဂၤဒ်သိး ပှၤကမၤဒ်ယတၢ်ဘၣ်သးဧါ. မ့တမ့ၢ် ယကနၣ်န့ၢ်ပှၤဂၤဧါ ဒီးယကျဲးစၢးမၤဒ်သိး ပှၤဂၤအတၢ်ဘၣ်သးဧါ.’ ပမ့ၢ်ကျဲးစၢးအိၣ်ဒီး တၢ်ထံၣ်အကြၢးအဘၣ်ထီဘိန့ၣ်​ မ့ၢ်ဒၣ်ပ ကွၢ်လိအါထီၣ်​ ယဟိဝၤယွၤ ဒီးယ့ၣ်ၡူး. အဃိ ပတၢ်အိၣ်သးမ့ၢ်ဆီတလဲ ဒီးပှၤဂၤအတၢ်ထံၣ်​ မ့ၢ်လီၤဆီဒီးပှၤန့ၣ်​ ပအိၣ်ဒီး တၢ်ထံၣ်အကြၢးအဘၣ်​ ကသ့ဒ်လဲၣ်. ခဲအံၤပကတဲသကိး တၢ်အိၣ်သးလၢ အရ့ဒိၣ်ခံထံၣ်အံၤ.

၈. ဖဲပတၢ်အိၣ်သးဆီတလဲအခါ ဒ်သိးပကအိၣ်ဒီး တၢ်ထံၣ်အကြၢးအဘၣ်အဂီၢ် ပကဘၣ်မၤဒ်လဲၣ်. (ကွၢ်စ့ၢ်ကီး တၢ်ဂ့ၢ်အဘျဲၣ်.)

^၈ ဖဲပတၢ်အိၣ်သးဆီတလဲအခါ ပကဘၣ်အိၣ်ဒီး တၢ်ထံၣ်အကြၢးအဘၣ်. တၢ်ဆီတလဲတဖၣ်အံၤ ဘၣ်သ့ၣ်သ့ၣ်​ ဒုးအိၣ်ထီၣ်တၢ်ကီတၢ်ခဲလၢ ပတဆိမိၣ်ဘၣ်ဘၣ်သ့. အဒိ တၢ်ဆီတလဲအိၣ်ထီၣ်​ သတူၢ်ကလာ်လၢ ပတၢ်အိၣ်ဆူၣ်အိၣ်ချ့, စံပွါယ့တၢ်ဖံးအီၣ်မၤအီၣ်​ ဒီးထံဂ့ၢ်ကီၢ်ဂ့ၢ်အဃိ ပတၢ်အိၣ်သး ကကီခဲထီၣ်ဖးဒိၣ်. (စံၣ်​ ၉:၁၁; ၁ ကရံၣ်​ ၇:၃၁) တကးဒံးဘၣ်​ ဖဲပန့ၢ်ဘၣ်မူဒါအသီ လၢကစၢ်ယွၤ အတၢ်ကရၢကရိပူၤ မ့တမ့ၢ် ပလီၤဘၣ်မူဒါလၢ တၢ်လီၢ်အဂၤတတီၤအခါ ဘၣ်သ့ၣ်သ့ၣ်​ တၢ်ဆီတလဲတဖၣ်အံၤ ကကီလၢပဂီၢ်ဒိၣ်မး. ပမ့ၢ်ထံၣ်ဘၣ်​ တၢ်အိၣ်သးကီခဲ ဒ်လဲၣ်ဒ်လဲၣ်နာ်က့ ဒ်သိးပလဲၤခီဖျိကန့ၢ်အဂီၢ် ပကဘၣ်မၤထွဲ တၢ်ဂ့ၢ်လွံၢ်ထံၣ်အံၤ. (၁) သးအိၣ်တူၢ်လိာ် တၢ်ဆီတလဲ, (၂) ကွၢ်ဃီၤတၢ်လၢ ခါဆူညါ, (၃) သးစၢၢ်ဆၢ တၢ်လၢအဂ့ၤ, (၄) မၤစၢၤပှၤဂၤ. b ခဲအံၤ ပကတဲသကိး ဒီပုၢ်ဝဲၢ်မုၣ်ခွါတနီၤ မၤထွဲဝဲ တၢ်ဂ့ၢ်လွံၢ်ထံၣ်အံၤအဃိ အဝဲသ့ၣ်​ န့ၢ်ဘၣ်အဘျုးဒ်လဲၣ်.

၉. ပှၤဒီမိၢ်ဝၤခံဂၤ လၢအမၤမံၤၡၢၤနရံၤန့ၣ်​ အဝဲသ့ၣ်လဲၤခီဖျိ တၢ်ကီတၢ်ခဲ န့ၢ်ဒ်လဲၣ်.

^၉ သးအိၣ်တူၢ်လိာ် တၢ်ဆီတလဲ. ဒီပုၢ်ဝဲၢ်ခွါအ့ၤမၤနူၤအဲ ဒီးအမါဖြဲခၠၤစခၤန့ၣ်​ အဝဲသ့ၣ်ဘၣ်လဲၤမၤ မံၤၡၢၤနရံၤ လၢထံကီၢ်အဂၤ. ဖဲအဝဲသ့ၣ်စးထီၣ်မၤလိ ကျိာ်အသီ ဒီးရ့ဒီးဒီပုၢ်ဝဲၢ်မုၣ်ခွါ ဖဲတၢ်အိၣ်ဖှိၣ်ပူၤအခါ ခိၤရိၤနၤတၢ်ဆါ စးထီၣ်ရၤလီၤသးအဃိ အဝဲသ့ၣ်ကဘၣ်​ အိၣ်ယံၤဒီးပှၤဂၤ. ဖဲန့ၣ်အခါ ဒီပုၢ်ဝဲၢ်မုၣ်ဖြဲခၠၤစခၤ အမိသံသဒၣ်ကွံာ်အီၤ သတူၢ်ကလာ်. ဒီပုၢ်ဝဲၢ်မုၣ်ဖြဲခၠၤစခၤ ဘၣ်သးက့ၤလၢ အဟံၣ်ဖိဃီဖိအအိၣ်​ သပှၢ်တၢၢ် ဘၣ်ဆၣ်​ ခီဖျိလၢ ခိၤရိၤနၤတၢ်ဆါ ရၤလီၤသးအဃိ အက့ၤတသ့ဘၣ်. ဒီးအသးအုးဒိၣ်မး ဘၣ်ဆၣ်​ အလဲၤခီဖျိ တၢ်အိၣ်သးကီခဲ န့ၢ်ဝဲဒ်လဲၣ်. အဆိကတၢၢ် ဒ်သိး ဒီပုၢ်ဝဲၢ်ခွါအ့ၤမၤနူၤအဲ ဒီးအမါဖြဲခၠၤစခၤ ကအိၣ်ဒီး တၢ်ကူၣ်သ့လၢ ကလဲၤခီဖျိ တၢ်ကီတၢ်ခဲလၢ တနံၤဘၣ်တနံၤ ဒီးတသးကိၢ်တၢ် အါတလၢတဂ့ၤအဂီၢ် အဝဲသ့ၣ်​ ဃ့ထုကဖၣ်​ ဒ်သိးသိး. ယဟိဝၤယွၤ စံးဆၢအဝဲသ့ၣ်တၢ်ထုကဖၣ်​ ဘၣ်ဆၢဘၣ်ကတီၢ် ခီဖျိအတၢ်ရၢကရိ. အဒိ ဖဲအဝဲသ့ၣ်ကွၢ်ဝဲ ဒီပုၢ်ဝဲၢ်ခွါတဂၤအဂ့ၢ် လၢတၢ်ဂီၤမူပူၤအခါ အဝဲသ့ၣ်​ န့ၢ်ဘၣ်​ တၢ်ဂံၢ်တၢ်ဘါဒိၣ်မး. ဒီပုၢ်ဝဲၢ်ခွါလၢတၢ်ဂီၤမူပူၤ တဂၤန့ၣ်​ တဲဝဲလၢ “ပမ့ၢ်တူၢ်လိာ် တၢ်ဆီတလဲတဘျီဃီန့ၣ်​ ပကသးခုထီၣ်က့ၤ လၢအဆိအချ့. ဝံၤဒီး ပကကျဲးစၢး မၤဂ့ၤထီၣ်စ့ၢ်ကီး ပတၢ်အိၣ်သးအံၤ လၢအဂ့ၤကတၢၢ်.” c ခံခါတခါန့ၣ်​ ပှၤဒီမိၢ်ဝၤခံဂၤအံၤပာ်လီၤသးလၢ ကမၤဂ့ၤထီၣ်​ အတၢ်သ့တၢ်ဘၣ်လၢ ကစံၣ်တဲၤတဲလီၤတၢ်လၢ လီတဲစိ ဒီးအဝဲသ့ၣ်စးထီၣ်​ မၤလိဘၣ်လံာ်စီဆှံဒီးပှၤဂၤ. သၢခါတခါန့ၣ်​ အဝဲသ့ၣ်တူၢ်လိာ် ဒီပုၢ်ဝဲၢ်တဖၣ်​ အတၢ်အဲၣ်တၢ်ကဟုကယာ်, တၢ်ဟ့ၣ်ဂံၢ်ဟ့ၣ်ဘါ ဒီးတၢ်မၤစၢၤ. တကးဒံးဘၣ်​ လၢဒီတနံၣ်ညါ အတီၢ်ပူၤန့ၣ်​ ဒီပုၢ်ဝဲၢ်မုၣ်လၢ အသးဂ့ၤမးတဂၤ ဆှၢန့ၢ်အဝဲသ့ၣ်​ လံာ်ဖုၣ်ဖုၣ်ဖိ ဒီးလံာ်စီဆှံအဆၢ ကိးနံၤဒဲး. ပဝဲစ့ၢ်ကီး ပမ့ၢ်သးအိၣ်တူၢ်လိာ် တၢ်ဆီတလဲန့ၣ်​ ပကသးမံဒီး တၢ်လၢပမၤအီၤသ့.

၁၀. ဒီပုၢ်ဝဲၢ်မုၣ်ခရံာ်စတံနၤ ထံၣ်ဘၣ်​ တၢ်ဆီတလဲဖးဒိၣ်နာ်က့ အလဲၤခီဖျိဝဲန့ၢ်ဒ်လဲၣ်.

^၁၀ ကွၢ်ဃီၤတၢ်လၢ ခါဆူညါ ဒီးသးစၢၢ်ဆၢ တၢ်လၢအဂ့ၤ. ဒီပုၢ်ဝဲၢ်မုၣ်ခရံာ်စတံနၤ လၢအကဲ ပှၤရိၤမ့နံယါဖိ လၢအအိၣ်လၢ ကီၢ်ယပၣ်န့ၣ်​ ဖဲကီၤလၤဝါတၢ်အိၣ်ဖှိၣ်​ လၢအထီၣ်ဝဲတဖျၢၣ်န့ၣ်​ တအိၣ်လၢၤဘၣ်အခါ အသးဟးဂီၤဝဲ. ဘၣ်ဆၣ်​ အတဆဲးဆိမိၣ်ဘၣ်ဃးဒီး တၢ်ဂ့ၢ်တခါအံၤလၢၤဘၣ်. အလဲၤထီၣ်က့ၤလၢ ယပၣ်တၢ်အိၣ်ဖှိၣ်​ ဒီးအကျဲးစၢး စံၣ်တဲၤတဲလီၤတၢ်လၢ ယပၣ်အကျိာ်. တကးဒံးဘၣ်​ ဒီပုၢ်ဝဲၢ်မုၣ်အံၤ အမၢဝဲ ပှၤလၢအမၤသကိးတၢ်ဒီးအီၤ လၢညါတဂၤလၢ ကသိၣ်လိအီၤ ယပၣ်အကျိာ်. ပိာ်မုၣ်တဂၤအံၤ တူၢ်လိာ်ဝဲလၢ အကသိၣ်လိ ဒီပုၢ်ဝဲၢ်မုၣ်ခရံာ်စတံနၤလၢ ယပၣ်အကျိာ် ဒီးကသူဝဲလံာ်စီဆှံ ဒီးအိၣ်မူလီၤထူလီၤယိာ် ပှဲၤဒီးတၢ်သးခု အလံာ်ဘရိၣ်ခၠၣ်. အဃိ ဒီပုၢ်ဝဲၢ်မုၣ်ခရံာ်စတံနၤ တဲယပၣ်အကျိာ်ဘၣ်ထီၣ်​ တကးဒံးဘၣ်​ ပိာ်မုၣ်တဂၤအံၤ ဘၣ်သးသ့ၣ်ညါအါထီၣ်စ့ၢ်ကီး လံာ်စီဆှံ. ပသ့ၣ်ညါဘၣ်လၢ ပမ့ၢ်ကွၢ်ဃီၤတၢ်လၢ ခါဆူညါ ဒီးသးစၢၢ်ဆၢ တၢ်လၢအဂ့ၤန့ၣ်​ ပကန့ၢ်ဘၣ်​ တၢ်ဆိၣ်ဂ့ၤလၢ ပတဆိမိၣ်ဘၣ်ဘၣ်.

၁၁. ပှၤဒီမိၢ်ဝၤခံဂၤ ထံၣ်ဘၣ်ဒီး ကျိၣ်စ့တၢ်ကီတၢ်ခဲနာ်က့ အဝဲသ့ၣ်လဲၤခီဖျိဝဲန့ၢ်ဒ်လဲၣ်.

^၁၁ မၤစၢၤပှၤဂၤ. ပှၤဒီမိၢ်ဝၤခံဂၤ အိၣ်ဘၣ်လၢ ထံကီၢ်လၢ ပှၤတြီဃာ် ပတၢ်စံၣ်တဲၤတဲလီၤတၢ်မၤ ဒီးလၢခံ ပှၤပံးကွံာ်စ့တၢးလၢကီၢ်တဘ့ၣ်န့ၣ်အဃိ အဝဲသ့ၣ်ထံၣ်ဘၣ်ဒီး ကျိၣ်စ့တၢ်ကီတၢ်ခဲ. အဝဲသ့ၣ်လဲၤခီဖျိဝဲ န့ၢ်ဒ်လဲၣ်. အဆိကတၢၢ်န့ၣ်​ အဝဲသ့ၣ်အိၣ်မူက့ၤယိယိဖိ ဒီးသူစှၤလီၤဝဲကျိၣ်စ့. ဝံၤဘျီ အဝဲသ့ၣ်တသးစၢၢ်ဆၢ အနီၢ်ကစၢ် တၢ်ကီတၢ်ခဲဘၣ်​ ဒီးအဝဲသ့ၣ်ပာ်လီၤသးလၢ ကမၤစၢၤက့ၤပှၤဂၤ ခီဖျိအဝဲသ့ၣ်​ စံၣ်တဲၤတဲလီၤတၢ်ဆူၣ်ဆူၣ်. (မၤတၢ် ၂၀:၃၅) ဒီပုၢ်ဝဲၢ်ခွါ တဲဝဲလၢ “ခီဖျိလၢ ပစံၣ်တဲၤတဲလီၤတၢ်ဆူၣ်ဆူၣ်အဃိ ပတဆိမိၣ်​ ပနီၢ်ကစၢ်တၢ်ကီတၢ်ခဲ အါအါဘၣ်. ဒီးပသးစၢၢ်ဆၢအါထီၣ်လၢ ပကမၤ ကစၢ်ယွၤအတၢ်ဘၣ်သး.” ဖဲပတၢ်အိၣ်သးဆီတလဲအခါ ပကဘၣ်နီၣ်ဘၣ်လၢ အရ့ဒိၣ်လၢ ပကမၤစၢၤပှၤဂၤ ခီဖျိပစံၣ်တဲၤတဲလီၤအဝဲသ့ၣ်.

၁၂. လၢတၢ်စံၣ်တဲၤတဲလီၤ တၢ်မၤအပူၤန့ၣ်​ ပကအိၣ်ဒီး တၢ်ထံၣ်အကြၢးအဘၣ်အဂီၢ် တၢ်မၢဖိပီလူး အဒိအတဲာ် မၤစၢၤပှၤဒ်လဲၣ်.

^၁၂ လၢတၢ်စံၣ်တဲၤတဲလီၤ တၢ်မၤအပူၤန့ၣ်​ ပကဘၣ်အိၣ်ဒီး တၢ်ထံၣ်အကြၢးအဘၣ်. ဖဲပလဲၤစံၣ်တဲၤတဲလီၤတၢ်အခါ ပကထံၣ်ဘၣ်ဒီး ပှၤလၢအတၢ်စူၢ်တၢ်နာ်, အတၢ်ပာ်သူၣ်ပာ်သး ဒီးအဒိၣ်ထီၣ်တၢ်လီၢ် လီၤဆီလိာ်သး. တၢ်မၢဖိပီလူးန့ၣ်​ အအိၣ်ဒီး တၢ်ထံၣ်အကြၢးအဘၣ်​ ဒီးပမၤလိန့ၢ်တၢ်လၢ အအိၣ်သ့. ပသ့ၣ်ညါဘၣ်လၢ ယ့ၣ်ၡူးဃုထၢ စီၤပီလူးဒ် “တၢ်မၢဖိလၢ ပှၤကလုာ်တဖၣ်အဂီၢ်.” (ရိ ၁၁:၁၃) အဃိ စီၤပီလူးစံၣ်တဲၤတဲလီၤဝဲ ပှၤအကလုာ်ကလုာ် ဒ်သိးဒီး ပှၤယူဒၤဖိ, ပှၤကြံးဖိ, ပှၤလၢအအိၣ်ဒီး တၢ်ကူၣ်ဘၣ်ကူၣ်သ့, ပှၤမုၢ်ဆ့ၣ်မုၢ်ဂီၤဖိ, ပဒိၣ်ဒီးစီၤပၤတဖၣ်. ဒ်သိးစီၤပီလူးကထုးန့ၢ် ပှၤတဖၣ်အံၤ အသးအဂီၢ် စီၤပီလူး “ကဲထီၣ်​ တၢ်ခဲလၢာ်လၢ ပှၤအကလုာ်ကလုာ်အဂီၢ်.” (၁ ကရံၣ်​ ၉:၁၉-၂၃) ဒီးဒ်သိးစီၤပီလူး ကစံၣ်တဲၤတဲလီၤ ပှၤတဖၣ်အံၤအဂီၢ် အဆိမိၣ်ထံဝဲ အဝဲသ့ၣ်​ ဒိၣ်ထီၣ်တၢ်လီၢ်, အတၢ်ဆဲးတၢ်လၤ ဒီးအတၢ်စူၢ်တၢ်နာ်အဂ့ၢ် လီၤတံၢ်လီၤဆဲး. ခီဖျိလၢ စီၤပီလူး ဆိမိၣ်ထံဝဲ တၢ်ဂ့ၢ်တဖၣ်အံၤအဃိ အအိၣ်ဒီး တၢ်ထံၣ်အကြၢးအဘၣ်​ ဒီးအမၤစၢၤဘၣ်ပှၤဂၤ ဒ်သိးပှၤကတူၢ်လိာ် ကစၢ်ယွၤကလုၢ်ကထါ. ပဝဲစ့ၢ်ကီး ဖဲပစံၣ်တဲၤတဲလီၤတၢ်အခါ ပမ့ၢ်အိၣ်ဒီး တၢ်ထံၣ်အကြၢးအဘၣ်​ ဒီးကျဲးစၢး မၤစၢၤ ပှၤတဂၤဘၣ်တဂၤ လၢအဂ့ၤကတၢၢ်န့ၣ်​ ပတၢ်စံၣ်တဲၤတဲလီၤ ကကဲဘျုးဒိၣ်ထီၣ်.

၁၃. ၁ ကရံၣ်သူး ၈:၉ ပာ်ဖျါထီၣ်ဝဲလၢ ပမ့ၢ်ပာ်ကဲပှၤဂၤ အတၢ်ထံၣ်န့ၣ်​ ပတဘၣ်မၤ မနုၤဘၣ်လဲၣ်.

^၁၃ ပအိၣ်ဒီး တၢ်ထံၣ်အကြၢးအဘၣ်န့ၣ်​ မၤစၢၤပှၤလၢ ပကပာ်ကဲပှၤဂၤ အတၢ်ထံၣ်စ့ၢ်ကီး. အဒိ ဒီပုၢ်ဝဲၢ်မုၣ်တနီၤန့ၣ်​ မၤဃံမၤလၤထီၣ်သး မုာ်မး ဒီးအဂၤတနီၤန့ၣ်​ တမၤဝဲဘၣ်. ဒီပုၢ်ဝဲၢ်မုၣ်ခွါတနီၤန့ၣ်​ ထံၣ်ဝဲလၢ တၢ်အီသံးဖဲအကြၢးန့ၣ်​ တဘၣ်နီမံၤဘၣ်​ ဘၣ်ဆၣ်​ အဂၤတနီၤန့ၣ်​ ပာ်လီၤသးလၢ တအီသံးနီတစဲးဘၣ်. ပဝဲခဲလၢာ်န့ၣ်​ ပဘၣ်သးအိၣ်ဆူၣ်အိၣ်ချ့ ဘၣ်ဆၣ်​ ပဝဲတဂၤဘၣ်တဂၤန့ၣ်​ ပကွၢ်ထွဲလီၤ ပနီၢ်ကစၢ် တၢ်အိၣ်ဆူၣ်အိၣ်ချ့ တဒ်သိးလိာ်သးဘၣ်. ပမ့ၢ်ဆိမိၣ်လၢ ပတၢ်ဃုထၢ ဂ့ၤန့ၢ်ဒံးပှၤဂၤန့ၣ်​ ဘၣ်သ့ၣ်သ့ၣ်​ ပကကျဲးစၢးမၤဒ်သိး ပှၤဂၤကဃုထၢတၢ် ဒ်သိးဒီးပှၤ. ပမ့ၢ်မၤဒ်န့ၣ်န့ၣ်​ ကကဲထီၣ်​ တၢ်လီၤဃံၢ်လၢပှၤဂၤအဂီၢ် ဒီး ပကဒုးအိၣ်ထီၣ်​ တၢ်လီၤမုၢ်လီၤဖး. အဃိ ပတဘၣ်သးမၤဒ်န့ၣ်​ နီတစဲးဘၣ်. (ဖး ၁ ကရံၣ်သူး ၈:၉; ၁၀:၂၃, ၂၄) ပမ့ၢ်မၤထွဲ လံာ်စီဆှံအတၢ်ဟံးစုနဲၣ်ကျဲန့ၣ်​ ကမၤစၢၤပှၤလၢ ပကအိၣ်ဒီး တၢ်ထံၣ်အကြၢးအဘၣ်​ ဒီးပကဆဲးအိၣ်ဒီး တၢ်ဃူတၢ်ဖိး. ခဲအံၤ ပကတဲသကိး တၢ်အိၣ်သးခံခါလၢကမၤစၢၤပှၤ.

၁၄. ဖဲပဆၢတဲာ်လီၤသးလၢ ပကကူတၢ်ကၤတၢ် ဒီးခွံခိၣ်ခွံနၢ် ဒ်လဲၣ်အခါ ပကဘၣ်နီၣ်ဘၣ်​ လံာ်စီဆှံတၢ်ဟံးစုနဲၣ်ကျဲ မနုၤလဲၣ်.

^၁၄ တၢ်ကူတၢ်ကၤ ဒီးတၢ်ခွံခိၣ်ခွံနၢ်. ပကကူတၢ်ကၤတၢ်ဒ်လဲၣ်န့ၣ်​ ယဟိဝၤယွၤ တပာ်လီၤ တၢ်သိၣ်တၢ်သီ လီၤတံၢ်လီၤဆဲးဘၣ်, ဘၣ်ဆၣ်​ အဟ့ၣ်ပှၤတၢ်ဟံးစုနဲၣ်ကျဲလၢ ပကမၤထွဲအီၤ. ပကဘၣ်​ ကူတၢ်ကၤတၢ်လၢ အကြၢးအဘၣ်လၢ ကမၤလၤကပီၤ ကစၢ်ယွၤ, ပာ်ဖျါထီၣ်လၢ ပအိၣ်ဒီး တၢ်ထံၣ်အကြၢးအဘၣ်, အိၣ်ဒီးတၢ်ဆီၣ်လီၤသး ဒီးကဲ “ပှၤလၢ အဆိကမိၣ်ထံတၢ်သ့ဂ့ၤဂ့ၤ.” (၁ တံၤ ၂:၉, ၁၀; ၁ ပ့း ၃:၃) ပတဘၣ်ကူကၤတၢ် တုၤလၢ ပှၤဂၤသးစၢၢ်ဆၢထဲပှၤဘၣ်. လံာ်စီဆှံတၢ်ဟံးစုနဲၣ်ကျဲန့ၣ်​ မၤစၢၤတၢ်အိၣ်ဖှိၣ်သးပှၢ်တဖၣ်လၢ အဝဲသ့ၣ်တပာ်လီၤ အနီၢ်ကစၢ် တၢ်သိၣ်တၢ်သီ ဒ်သိးဒီး ပှၤကဘၣ်ကူကၤတၢ်ဒ်လဲၣ်​ ဒီးကဘၣ်ပာ်ခိၣ်ဆူၣ်​ ဒ်လဲၣ်န့ၣ်ဘၣ်. အဒိ လၢတၢ်အိၣ်ဖှိၣ်တဖျၢၣ်အပူၤ တၢ်အိၣ်ဖှိၣ်သးပှၢ်တဖၣ်​ ဘၣ်သးမၤစၢၤဝဲ ဒီပုၢ်ဝဲၢ်ခွါသးစၢ်တနီၤလၢ အတံာ်ခိၣ်ဆူၣ်​ ဖုၣ်ဖုၣ်​ ဒီးပာ်ဖုရုဝဲလၢအဖီခိၣ်​ ဒ်သိးဒီး ပှၤလၢစိၤခဲအံၤမၤဝဲ. ဘၣ်ဆၣ်​ တၢ်အိၣ်ဖှိၣ်သးပှၢ်တဖၣ်​ မၤစၢၤအဝဲသ့ၣ်​ ကသ့ဒ်လဲၣ်. ကဝီၤအပှၤကွၢ်တၢ်တဂၤ ဟ့ၣ်ကူၣ်တၢ်အိၣ်ဖှိၣ်သးပှၢ်တဖၣ်လၢ ကတဲဘၣ်​ ဒီပုၢ်ဝဲၢ်ခွါသးစၢ်တဖၣ်လၢ “ဖဲနမၤမူဒါလၢ တၢ်မဲာ်ညါအခါ ပှၤဒိကနၣ်တၢ်ဖိ မ့ၢ်သးစၢၢ်ဆၢနၤ အါန့ၢ်ဒံးတၢ်လၢနတဲန့ၣ်​ နကဘၣ်သ့ၣ်ညါလၢ နတၢ်ကူတၢ်ကၤ ဒီးနတၢ်ခွံခိၣ်ခွံနၢ်န့ၣ်​ အလိၣ်တမံၤမံၤလံ.” တၢ်ဟ့ၣ်ကူၣ်အံၤ မၤစၢၤဒီပုၢ်ဝဲၢ်သးစၢ်တဖၣ်လၢ ကနၢ်ပၢၢ်ထီၣ်လၢ အဝဲသ့ၣ်ကဘၣ်မၤ မနုၤလဲၣ်​ ဒီးတၢ်အိၣ်ဖှိၣ်သးပှၢ်စ့ၢ်ကီး တဘၣ်ပာ်လီၤ အနီၢ်ကစၢ် တၢ်သိၣ်တၢ်သီဘၣ်. d

၁၅. ဖဲပကဆၢတဲာ်တၢ် ဘၣ်ဃးဒီး ပတၢ်အိၣ်ဆူၣ်အိၣ်ချ့အခါ လံာ်စီဆှံတၢ်သိၣ်တၢ်သီ ဒီးအတၢ်ဟံးစုနဲၣ်ကျဲ မၤစၢၤပှၤကသ့ဒ်လဲၣ်. (ရိမ့ၤ ၁၄:၅)

^၁၅ တၢ်ကွၢ်ထွဲ တၢ်အိၣ်ဆူၣ်အိၣ်ချ့. ခရံာ်ဖိတဂၤဘၣ်တဂၤ ကကွၢ်ထွဲလီၤ အနီၢ်ကစၢ် တၢ်အိၣ်ဆူၣ်အိၣ်ချ့ဒ်လဲၣ်န့ၣ်​ အကဘၣ်ဆၢတဲာ်တၢ်လၢ အနီၢ်ကစၢ်. (ကလၤ ၆:၅) ဖဲခရံာ်ဖိတဖၣ်​ ဃုထၢ တၢ်ကူစါယါဘျါအခါ အဝဲသ့ၣ်ကဘၣ်မၤထွဲ လံာ်စီဆှံအတၢ်သိၣ်တၢ်သီ  လၢကဘၣ်ဟးဆှဲး တၢ်သွံၣ်​ ဒီးတၢ်ဝံတၢ်နါ အတၢ်ဖံးတၢ်မၤ. (မၤတၢ် ၁၅:၂၀; ကလၤ ၅:၁၉, ၂၀) မ့မ့ၢ်တၢ်ကူစါယါဘျါ လၢအဂၤတဖၣ်န့ၣ်​ အဝဲသ့ၣ်​ ကဘၣ်ဆၢတဲာ်တၢ်လၢ အနီၢ်ကစၢ်. ပှၤတနီၤနီၤန့ၣ်​ လဲၤကူစါယါဘျါသးလၢ တၢ်ဆါဟံၣ်​ ဒီးပှၤအဂၤတနီၤန့ၣ်​ ဘၣ်သးကူစါယါဘျါသးလၢ အနီၢ်ကစၢ် အကျိၤအကျဲ. ဘၣ်သ့ၣ်သ့ၣ်​ ပကဆိမိၣ်ဘၣ်လၢ ပတၢ်ကူစါယါဘျါသးန့ၣ်​ ဂ့ၤန့ၢ်ဒံးပှၤဂၤ ဘၣ်ဆၣ်​ ပကဘၣ်ပာ်ကဲ ပှၤဂၤအတၢ်ဆၢတဲာ် ဘၣ်ဃးဒီး အဝဲသ့ၣ်တၢ်ကူစါယါဘျါ. အဃိ ပကမၤဒ်န့ၣ်အဂီၢ် ပကဘၣ်နီၣ်ဘၣ်​ တၢ်ဂ့ၢ်လွံၢ်ထံၣ်. (၁) ထဲဒၣ်ကစၢ်ယွၤ အဘီအမုၢ်န့ၣ်​ ကမၤလီၤမၢ်ကွံာ် တၢ်ဆူးတၢ်ဆါခဲလၢာ်. (ၡါ ၃၃:၂၄) (၂) ခရံာ်ဖိတဂၤဘၣ်တဂၤ ကဘၣ်ဆိကမိၣ်ထံ ဒီးဆၢတဲာ်တၢ်အဂ့ၤကတၢၢ် လၢအတၢ်အိၣ်ဆူၣ်အိၣ်ချ့အဂီၢ်. (ဖး ရိမ့ၤ ၁၄:၅.) (၃) ပတဘၣ်စံၣ်ညီၣ်ပှၤဂၤ တၢ်ဆၢတဲာ် ဒီးဒုးအိၣ်ထီၣ်​ တၢ်လီၤဃံၢ်လၢ ပှၤဂၤအဂီၢ်ဘၣ်. (ရိ ၁၄:၁၃) (၄) ခရံာ်ဖိတဖၣ်​ ပာ်ဖျါထီၣ်တၢ်အဲၣ်​ ဒီးသ့ၣ်ညါဝဲလၢ တၢ်ဃူတၢ်ဖိးလၢ တၢ်အိၣ်ဖှိၣ်ပူၤန့ၣ်​ အရ့ဒိၣ်န့ၢ် အနီၢ်ကစၢ်တၢ်ထံၣ်ဒံး. (ရိ ၁၄:၁၅, ၁၉, ၂၀) ပမ့ၢ်နီၣ်ဘၣ်​ တၢ်ဂ့ၢ်တဖၣ်အံၤထီဘိန့ၣ်​ ပကအိၣ်ဒီး တၢ်ရ့လိာ်သးဒီး ပဒီပုၢ်ဝဲၢ်မုၣ်ခွါလၢအဂ့ၤ ဒီးလၢတၢ်အိၣ်ဖှိၣ်ပူၤစ့ၢ်ကီး တၢ်ဃူတၢ်ဖိးကအါထီၣ်.

၁၆. တၢ်အိၣ်ဖှိၣ်သးပှၢ်တဂၤ ပာ်ဖျါထီၣ်လၢ အအိၣ်ဒီး တၢ်ထံၣ်အကြၢးအဘၣ်​ ကသ့ဒ်လဲၣ်. (ကွၢ်စ့ၢ်ကီးတၢ်ဂီၤ.)

^၁၆ တၢ်အိၣ်ဖှိၣ်သးပှၢ်တဖၣ်​ ကဘၣ်ပာ်လီၤ တၢ်အဒိလၢအဂ့ၤ ဒီးကဘၣ်အိၣ်ဒီး တၢ်ထံၣ်အကြၢးအဘၣ်. (၁ တံၤ ၃:၂, ၃) အဒိ တၢ်အိၣ်ဖှိၣ်သးပှၢ်လၢ အညါပှၢ်န့ၢ်ဒံး တၢ်အိၣ်ဖှိၣ်သးပှၢ် အဂၤတဖၣ်န့ၣ်​ အတဘၣ်ဆိမိၣ်လၢ ပှၤကဘၣ်တူၢ်လိာ် အတၢ်ထံၣ်ကိးဘျီဒဲးဘၣ်. အကဘၣ်နီၣ်ဘၣ်ဝဲလၢ ဒ်သိးအဝဲသ့ၣ်​ ကဆၢတဲာ်တၢ်လၢအဘၣ်အဂီၢ် ယဟိဝၤယွၤ အသးစီဆှံ သူဝဲတၢ်အိၣ်ဖှိၣ်သးပှၢ် တဂၤဂ့ၤတဂၤဂ့ၤ လၢကတဲဖျါထီၣ်​ အတၢ်ထံၣ်သ့. ဒီးတၢ်အိၣ်ဖှိၣ်သးပှၢ်အါဂၤ မ့ၢ်တူၢ်လိာ် တၢ်ဆၢတဲာ်တခါလၢ အမ့ၢ်တထီဒါဒီး လံာ်စီဆှံ တၢ်သိၣ်တၢ်သီဘၣ်န့ၣ်​ တၢ်အိၣ်ဖှိၣ်သးပှၢ်လၢ အအိၣ်ဒီး တၢ်ထံၣ်အကြၢးအဘၣ်တဂၤ အတၢ်ထံၣ်မ့ၢ်လီၤဆီဒီး ပှၤဂၤနာ်က့ အကတူၢ်လိာ် တၢ်ဆၢတဲာ်တခါလၢ ပှၤအါဂၤဘၣ်သးဝဲ.

၁၇. ပမ့ၢ်အိၣ်ဒီး တၢ်ထံၣ်အကြၢးအဘၣ်န့ၣ်​ ပကန့ၢ်ဘၣ်အဘျုး ဒ်လဲၣ်.

^၁၇ ပမ့ၢ်အိၣ်ဒီး တၢ်ထံၣ်အကြၢးအဘၣ်န့ၣ်​ ပကန့ၢ်ဘၣ်အဘျုးအါမး. ပတၢ်ရ့လိာ်သးဒီး ပဒီပုၢ်ဝဲၢ်မုၣ်ခွါ ကဂ့ၤဒိၣ်ထီၣ်​ ဒီးလၢတၢ်အိၣ်ဖှိၣ်ပူၤန့ၣ်​ တၢ်ဃူတၢ်ဖိးကအိၣ်အါထီၣ်. လၢပတၢ်အိၣ်ဖှိၣ်ပူၤန့ၣ်​ ပဒီပုၢ်ဝဲၢ်မုၣ်ခွါတဖၣ်​ ဒိၣ်ထီၣ်တၢ်လီၢ် တဒ်သိးဘၣ်​ ဒီးအတၢ်ဆဲးတၢ်လၤ လီၤဆီလိာ်သး. ဘၣ်ဆၣ်​ ပဘူၣ်ထီၣ်ဘါထီၣ်ဘၣ်​ ယဟိဝၤယွၤတပူၤဃီအဃိ ပသးခုဒိၣ်မး. တကးဒံးဘၣ်​ ပသ့ၣ်ညါဘၣ်လၢ ပကွၢ်လိယဟိဝၤယွၤ လၢအိၣ်ဒီး တၢ်ထံၣ်အကြၢးအဘၣ်​ သ့အဃိ ပသးခုဒိၣ်မး.