တၢ်မၤလိ ၃၀
ဆဲးမၤဒိၣ်ထီၣ် နတၢ်အဲၣ် ယဟိဝၤယွၤဒီးပှၤဂၤ
“မ်တၢ်အဲၣ်တၢ်ကွံ ထိၣ်ဟူးထိၣ်ဂဲၤထီၣ်ပှၤလၢ ပကဒိၣ်ထီၣ်ထီထီၣ် လၢတၢ်ခဲလၢာ်အပူၤ.”—အ့း ၄:၁၅.
တၢ်သးဝံၣ် ၂ ယဟိဝၤမ့ၢ်နမံၤ
တၢ်မၤလိအံၤ အတၢ်တိာ်ပာ် a
၁. ဖဲနမၤလိလံာ်စီဆှံ သီသီခါန့ၣ် နမၤလိဘၣ် တၢ်ဂ့ၢ်မနုၤလဲၣ်.
ဖဲနမၤလိ လံာ်စီဆှံ သီသီခါန့ၣ် နနီၣ်ဘၣ်ဒံးဧါ. နမၤလိဘၣ်လၢ ကစၢ်ယွၤန့ၣ် အအိၣ်ဒီးအမံၤ ဒီးနမၤလိဘၣ်စ့ၢ်ကီးလၢ ကစၢ်ယွၤန့ၣ် အတမၤနးမၤဖှီၣ် ပှၤဟီၣ်ခိၣ်ဖိလၢ လရာ်မ့ၣ်အူပူၤဘၣ်. ခီဖျိလၢ နသ့ၣ်ညါဘၣ် တၢ်ဂ့ၢ်တဖၣ်အံၤအဃိ နကမၢကမၣ်ဒိၣ်မး. တကးဒံးဘၣ် နမၤလိဘၣ်စ့ၢ်ကီးလၢ နကထံၣ်ဘၣ်က့ၤ ပှၤလၢနအဲၣ် လၢအသံသဒၣ်နၤ ဒီးနကအိၣ်ဘၣ်ဒီး အဝဲသ့ၣ်လၢ ဟီၣ်ခိၣ်ပၤရဒံစူးအပူၤ.
၂. ပမ့ၢ်မၤလိအါထီၣ် လံာ်စီဆှံတၢ်မ့ၢ်တၢ်တီန့ၣ် ကမၤစၢၤပှၤလၢ ပကမၤမနုၤလဲၣ်. (အ့းဖ့းစူး ၅:၁, ၂)
၂ ပမ့ၢ်မၤလိ လံာ်စီဆှံဆူၣ်ဆူၣ်န့ၣ် ပတၢ်အဲၣ်ယဟိဝၤယွၤ ကဒိၣ်ထီၣ်. တၢ်အဲၣ်န့ၣ် ထိၣ်ဟူးထိၣ်ဂဲၤထီၣ်ပှၤလၢ ပကမၤထွဲ တၢ်လၢပမၤလိဘၣ်တဖၣ်. ဒီးတၢ်အဲၣ်ယဟိဝၤယွၤန့ၣ် ကမၤစၢၤပှၤလၢ ပကဆၢတဲာ်တၢ်လၢ အဘၣ်လိာ်သးဒီး လံာ်စီဆှံ အတၢ်သိၣ်တၢ်သီ. တကးဒံးဘၣ် ခီဖျိလၢ ပဘၣ်သးမၤသးခု ကစၢ်ယွၤအသးအဃိ ပဆီတလဲ ပတၢ်ပာ်သူၣ်ပာ်သး ဒီးပလုၢ်လၢ်သကဲာ်ပဝးတဖၣ်. ဒ်ဖိသၣ်ကွၢ်လိဝဲ အမိအပါအသိး ပဝဲစ့ၢ်ကီး ပဘၣ်သးကွၢ်လိ ပပၢ်ယဟိဝၤယွၤ.—ဖး အ့းဖ့းစူး ၅:၁, ၂.
၃. ပကဘၣ် သံကွၢ်လီၤပသးဒ်လဲၣ်.
၃ ဘၣ်သ့ၣ်သ့ၣ် ပကသံကွၢ်လီၤပသးလၢ ‘အခဲအံၤ မ့ၢ်ယအဲၣ်ယဟိဝၤယွၤ ဒိၣ်န့ၢ်ဒံး ယသ့ၣ်ညါ တၢ်မ့ၢ်တၢ်တီသီသီ အခါဒံးဧါ. ဖဲယဒိးဘျၢထံ ဝံၤအလီၢ်ခံန့ၣ် မ့ၢ်ယအဲၣ် ယဒီပုၢ်ဝဲၢ်မုၣ်ခွါတဖၣ် ဒိၣ်ထီၣ်စ့ၢ်ကီးဧါ. ဒီးယတၢ်ဆိမိၣ် ဒီးတၢ်လၢယမၤန့ၣ် မ့ၢ်အလီၤဂာ်ဒိၣ်ထီၣ် ဒ်သိးဒီး ယဟိဝၤယွၤစ့ၢ်ကီးဧါ.’ အဒိ “နတၢ်အဲၣ်လၢ အအိၣ်ဒီးနၤလၢ အခီၣ်ထံး” န့ၣ်မ့ၢ်ခုၣ်လီၤသနာ်က့ တဘၣ်သးဟးဂီၤတဂ့ၤ. ခရံာ်ဖိလၢ တၢ်မၢဖိအစိၤစ့ၢ်ကီး တၢ်ကဲထီၣ်သးဒီး အဝဲသ့ၣ်ဒ်န့ၣ်. ဘၣ်ဆၣ် ယ့ၣ်ၡူးတသးလၢာ် အဝဲသ့ၣ်ဘၣ် ဒီးအတသးလၢာ်ပှၤစ့ၢ်ကီးဘၣ်. (လီၣ် ၂:၄, ၇) ယ့ၣ်ၡူးသ့ၣ်ညါဝဲလၢ ပက့ၤမၤဒိၣ်ထီၣ် ပတၢ်အဲၣ်ယဟိဝၤယွၤ ဒ်သိးလၢညါသ့.
၄. လၢတၢ်မၤလိတခါအံၤ ပကတဲသကိး တၢ်ဂ့ၢ်မနုၤလဲၣ်.
၄ လၢတၢ်မၤလိတခါအံၤ ပကတဲသကိး ဘၣ်ဃးဒီး ပဆဲးမၤဒိၣ်ထီၣ်အါထီၣ် ပတၢ်အဲၣ်ယဟိဝၤယွၤ ဒီးပှၤဂၤကသ့ဒ်လဲၣ်. ဒီးဖဲပမၤဒိၣ်ထီၣ်အါထီၣ် ပတၢ်အဲၣ်ယဟိဝၤယွၤ ဒီးပဒီပုၢ်ဝဲၢ်မုၣ်ခွါအခါ ပကန့ၢ်ဘၣ် တၢ်ဆိၣ်ဂ့ၤဒ်လဲၣ်.
မၤဒိၣ်ထီၣ်အါထီၣ် နတၢ်အဲၣ် ယဟိဝၤယွၤ
၅-၆. (က) ဖဲတၢ်မၢဖိပီလူး မၤကစၢ်ယွၤတၢ်မၤအခါ အထံၣ်ဘၣ်တၢ်ကီတၢ်ခဲ မနုၤလဲၣ်. (ခ) တၢ်မၢဖိပီလူး ကဆဲးမၤ ယဟိဝၤယွၤ အတၢ်မၤအဂီၢ် တၢ်မနုၤမၤစၢၤအီၤလဲၣ်.
၅ တၢ်မၢဖိပီလူးန့ၣ် အမၤကစၢ်ယွၤ အတၢ်မၤမုာ်မး နာ်က့ အထံၣ်ဘၣ် တၢ်ကီတၢ်ခဲတဖၣ်စ့ၢ်ကီး. တဘျီတခီၣ် စီၤပီလူးဘၣ်လဲၤတၢ်ဖးယံၤ ဒီးဖဲန့ၣ်အဆၢကတီၢ် တၢ်လဲၤတၢ်က့ၤန့ၣ် တညီဘၣ်. ဖဲစီၤပီလူး လဲၤတၢ်က့ၤတၢ်အခါ တဘျီတခီၣ် အထံၣ်ဘၣ် “တၢ်ဘၣ်ယိၣ်အလီၢ်လၢ ထံကျိတဖၣ်” ဒီး “လၢတမျာ်တဖၣ်.” တကးဒံးဘၣ် အဒုၣ်အဒါတဖၣ်စ့ၢ်ကီး ထိအီၤတီၢ်အီၤ. (၂ ကရံၣ် ၁၁:၂၃-၂၇) ဒီးခရံာ်ဖိ ဒီပုၢ်ဝဲၢ်မုၣ်ခွါတနီၤန့ၣ် စီၤပီလူးကျဲးစၢး မၤစၢၤအဝဲသ့ၣ်နာ်က့ အဝဲသ့ၣ်တပာ်လုၢ်ပာ်ပှ့ၤ အတၢ်မၤစၢၤဘၣ်.—၂ ကရံၣ် ၁၀:၁၀; ဖံလံး ၄:၁၅.
၆ စီၤပီလူးကဆဲးမၤ ယဟိဝၤယွၤ အတၢ်မၤအဂီၢ် တၢ်မနုၤမၤစၢၤအီၤလဲၣ်. စီၤပီလူး ဃုသ့ၣ်ညါအါထီၣ် ယဟိဝၤယွၤအဂ့ၢ် လၢလံာ်စီဆှံပူၤ ဒီးအမၤလိန့ၢ်တၢ်လၢ အနီၢ်ကစၢ် တၢ်လဲၤခီဖျိ. ဒီးစီၤပီလူးနာ်ဝဲ သပှၢ်တၢၢ်လၢ ယဟိဝၤယွၤ အဲၣ်အီၤ. (ရိ ၈:၃၈, ၃၉; အ့း ၂:၄, ၅) စီၤပီလူး အဲၣ်ယဟိဝၤယွၤဒိၣ်မး. ဒီးအပာ်ဖျါထီၣ် အတၢ်အဲၣ်ယဟိဝၤယွၤ ‘ခီဖျိလၢ အမၤစၢၤတ့ၢ် ပှၤစီဆှံတဖၣ် ဒီးအဆဲးမၤစၢၤ အဝဲသ့ၣ်အဃိ.’—ဧ့ၤ ၆:၁၀.
၇. ပမၤဒိၣ်ထီၣ်အါထီၣ် ပတၢ်အဲၣ်ယဟိဝၤယွၤ ကသ့ဒ်လဲၣ်.
၇ ပဝဲစ့ၢ်ကီး ပမ့ၢ်မၤလိလံာ်စီဆှံဆူၣ်ဆူၣ်န့ၣ် ပတၢ်အဲၣ်ယဟိဝၤယွၤ ကဒိၣ်ထီၣ်. ဖဲပဖးလံာ်စီဆှံအခါ ပကဘၣ်ကျဲးစၢး ဃုသ့ၣ်ညါလၢ လံာ်စီဆှံတတီၤအံၤ ပာ်ဖျါထီၣ် ယဟိဝၤယွၤအဂ့ၢ်ဒ်လဲၣ်. ဒီးပကဘၣ် သံကွၢ်လီၤပသးလၢ ‘လံာ်စီဆှံတတီၤအံၤ ပာ်ဖျါထီၣ်လၢ ယဟိဝၤယွၤ အဲၣ်ယၤဒ်လဲၣ်. ဒီးတၢ်ဂ့ၢ်အံၤ မၤစၢၤယၤလၢ ယကအဲၣ်ယဟိဝၤယွၤ ဒ်လဲၣ်.’
၈. ပမ့ၢ်ဃ့ထုကဖၣ်န့ၣ် ပတၢ်အဲၣ်ယဟိဝၤယွၤ ကဒိၣ်ထီၣ်ဒ်လဲၣ်.
၈ ပမၤဒိၣ်ထီၣ်အါထီၣ် ပတၢ်အဲၣ်ယဟိဝၤယွၤ သ့ခီဖျိ ပဃ့ထုကဖၣ်လၢ ယဟိဝၤယွၤအအိၣ် ကိးနံၤဒဲး ဒီးတဲဘၣ်အီၤလၢ ပတၢ်တူၢ်ဘၣ်. (စံး ၂၅:၄, ၅) ဒီးယဟိဝၤယွၤ ကစံးဆၢက့ၤ ပတၢ်ထုကဖၣ်. (၁ ယိၤ ၃:၂၁, ၂၂) ဒီပုၢ်ဝဲၢ်မုၣ်ခၤ လၢအအိၣ်လၢ အ့ၡၢၣ်န့ၣ် တဲဝဲလၢ “ခီၣ်ထံးခါ ယသ့ၣ်ညါထီၣ် ယဟိဝၤယွၤအဂ့ၢ်အဃိ ယအဲၣ်အီၤ. တကးဒံးဘၣ် ယထံၣ်ဘၣ်လၢ ယဟိဝၤယွၤ စံးဆၢယတၢ်ထုကဖၣ်အဃိ ယအဲၣ်အီၤဒိၣ်ထီၣ်. အဃိ ယဘၣ်သးမၤတၢ်လၢ အမၤသးခု ယဟိဝၤယွၤအသး.” b
မၤဒိၣ်ထီၣ်အါထီၣ် နတၢ်အဲၣ်ပှၤဂၤ
၉. စီၤတံၤမသ့း မၤဒိၣ်ထီၣ်အါထီၣ် တၢ်အဲၣ်လၢ ဒီပုၢ်ဝဲၢ်မုၣ်ခွါတဖၣ် အဖီခိၣ်ဒ်လဲၣ်.
၉ စီၤပီလူးကဲထီၣ် ခရံာ်ဖိဝံၤအလီၢ်ခံ စှၤကိာ်နံၣ်ဘျီ အထံၣ်လိာ်သးဒီး စီၤတံၤမသ့း လၢအကဲ ပှၤသးစၢ်တဂၤ. စီၤတံၤမသ့းန့ၣ် အအဲၣ်ယဟိဝၤယွၤ ဒီးပှၤဂၤစ့ၢ်ကီး. စီၤပီလူးတဲဘၣ် ပှၤဖံလံးပံၤဖိလၢ “ပှၤအဂၤ လၢအတၢ်ပာ်သူၣ်ပာ်သး ဒ်သိးဒီး [စီၤတံၤမသ့း] လၢအကကွၢ်ထွဲ သုတၢ်လိၣ်ဘၣ်တဖၣ်လၢ တၢ်သူၣ်အိၣ်သးအိၣ်နီၢ်ကီၢ် အပူၤန့ၣ် တအိၣ်ဒီးယၤ နီတဂၤဘၣ်.” (ဖံလံး ၂:၂၀) စီၤပီလူး တပာ်ဖျါထီၣ်ဝဲလၢ စီၤတံၤမသ့း အိၣ်ဒီးတၢ်သ့တၢ်ဘၣ်လၢ အရဲၣ်ကျဲၤတၢ်သ့ ဒီးအတဲတၢ်လၢ ကမျၢၢ်မဲာ်ညါသ့န့ၣ်ဘၣ်. ဘၣ်ဆၣ် စီၤပီလူးထံၣ်ဝဲလၢ စီၤတံၤမသ့း အဲၣ်ဒီပုၢ်ဝဲၢ်မုၣ်ခွါဒိၣ်မး. အဃိ အဘၣ်သူၣ်ဘၣ်သး စီၤတံၤမသ့း သပှၢ်တၢၢ်. ဒီးဒီပုၢ်ဝဲၢ်မုၣ်ခွါတဖၣ် ခိးကွၢ်လၢ်ဝဲလၢ စီၤတံၤမသ့း ကဟဲဟးလၢ အဝဲသ့ၣ်အအိၣ်.—၁ ကရံၣ် ၄:၁၇.
၁၀. ဒီပုၢ်ဝဲၢ်မုၣ်အဲနၤ ဒီးအဝၤ ပာ်ဖျါထီၣ် တၢ်အဲၣ်လၢ ဒီပုၢ်ဝဲၢ်မုၣ်ခွါတဖၣ် အဖီခိၣ်ဒ်လဲၣ်.
၁၀ ပဝဲစ့ၢ်ကီး ပဃုကျဲလၢ ပကမၤစၢၤ ပဒီပုၢ်ဝဲၢ်မုၣ်ခွါတဖၣ်. (ဧ့ၤ ၁၃:၁၆) ပကတဲသကိး ဒီပုၢ်ဝဲၢ်မုၣ်အဲနၤ လၢပတဲတ့ၢ်အဂ့ၢ်လၢ တၢ်မၤလိလၢ အပူၤကွံာ်တခါ အတၢ်လဲၤခီဖျိ. ဖဲကလံၤမုၢ်ဖးဒိၣ်လီၤ ဝံၤအလီၢ်ခံ ဒီပုၢ်ဝဲၢ်မုၣ်အဲနၤ ဒီးအဝၤ လဲၤလၢဒီပုၢ်ဝဲၢ်မုၣ်ခွါ အဟံၣ်တဖျၢၣ် ဒီးအဝဲသ့ၣ်ထံၣ်ဝဲလၢ ဟံၣ်တဖျၢၣ်န့ၣ် အခိၣ်ဒုးလီၤပှီၢ်ဝဲ. အဃိ ဟံၣ်ဖိဃီဖိတဒူၣ်န့ၣ် အတၢ်ကူတၢ်ကၤ လၢအကဆှီ တအိၣ်လၢၤဘၣ်. ဒီပုၢ်ဝဲၢ်မုၣ်အဲနၤ တဲဝဲလၢ “ပက့ၤစိာ်အဝဲသ့ၣ် တၢ်ကူတၢ်ကၤ ဒီးဆှုၣ်န့ၢ်အဝဲသ့ၣ် ဒီးပထူးဘျ့ထီၣ် ဒီးချံးထီၣ်တၢ်ကူတၢ်ကၤ ဝံၤဘျီ ပလဲၤဆှၢန့ၢ်က့ၤ အဝဲသ့ၣ်. တၢ်လၢ ပမၤစၢၤအဝဲသ့ၣ်န့ၣ် တကီလၢပဂီၢ်ဘၣ်. ဒီးခီဖျိလၢ ပမၤစၢၤအဝဲသ့ၣ် ဒ်န့ၣ်အဃိ ပရ့ဘၣ်ဒီး အဝဲသ့ၣ်ဂ့ၤဂ့ၤ တုၤလၢခဲအံၤ.” ဒီပုၢ်ဝဲၢ်မုၣ်အဲနၤ ဒီးအဝၤန့ၣ် အဲၣ်ဒီပုၢ်ဝဲၢ်မုၣ်ခွါတဖၣ်အဃိ အဝဲသ့ၣ်ကျဲးစၢးမၤစၢၤ ဒီပုၢ်ဝဲၢ်မုၣ်ခွါ လၢအဂ့ၤကတၢၢ်.—၁ ယိၤ ၃:၁၇, ၁၈.
၁၁. (က) ပမ့ၢ်ပာ်ဖျါထီၣ် လၢပအဲၣ်ပှၤဂၤန့ၣ် အဝဲသ့ၣ် ကတူၢ်ဘၣ်ဒ်လဲၣ်. (ခ) ကတိၤဒိ ၁၉:၁၇ တဲဝဲလၢ ပမ့ၢ်ပာ်ဖျါထီၣ် တၢ်အဲၣ်ပှၤဂၤန့ၣ် ယဟိဝၤယွၤ ထံၣ်ဝဲဒ်လဲၣ်.
၁၁ ပမ့ၢ်အဲၣ်ပှၤဂၤ ဒီးသးဂ့ၤလၢ ပှၤဂၤအဖီခိၣ်န့ၣ် အဝဲသ့ၣ်ကထံၣ်ဝဲလၢ ပကျဲးစၢး ကွၢ်လိ ယဟိဝၤယွၤ. ဒီးအဝဲသ့ၣ် ကပာ်လုၢ်ပာ်ပှ့ၤ တၢ်လၢပမၤတဖၣ်န့ၣ် အါန့ၢ်ပဆိမိၣ်ဒံး. ဒီပုၢ်ဝဲၢ်မုၣ်ခၤ လၢပတဲအဂ့ၢ် ဖဲမကၢာ်န့ၣ် အနီၣ်ဘၣ်က့ၤဝဲ ပှၤမၤစၢၤတ့ၢ်အီၤဒ်လဲၣ်န့ၣ် ဂ့ၤဂ့ၤ. ဒီးအတဲဝဲလၢ “ဒီပုၢ်ဝဲၢ်မုၣ်တဖၣ်န့ၣ် ကွဲယၤလၢ ယကလဲၤစံၣ်တဲၤတဲလီၤတၢ်ဒီး အဝဲသ့ၣ်အဃိ ယသးခုဒိၣ်မး ဒီးယစံးဘျုးအဝဲသ့ၣ်ဒိၣ်မး. အဝဲသ့ၣ်ဟဲအိၣ်စိၢ်ယၤ ဒီးကွဲယၤလၢ ကလဲၤအီၣ်သကိးတၢ်ဒီးအဝဲသ့ၣ် ဒီးအဝဲသ့ၣ်ဟဲက့ၤဆှၢယၤ လၢဟံၣ်ဂ့ၤဂ့ၤ. အခဲအံၤ ယသ့ၣ်ညါထီၣ်လၢ အဝဲသ့ၣ်ကမၤဝဲဒ်န့ၣ်အဂီၢ် အဘၣ်ထဲးဂံၢ်ထဲးဘါညါ. ဒီးခီဖျိလၢ အဝဲသ့ၣ်အဲၣ်ယၤအဃိ အဝဲသ့ၣ်မၤဝဲကဲ.” အါတက့ၢ် ပှၤလၢပမၤစၢၤအဝဲသ့ၣ်န့ၣ် အဝဲသ့ၣ် တစံးဘျုးက့ၤပှၤ ကိးဘျီဒဲးဘၣ်. ဘၣ်ဃးဒီး ပှၤလၢအမၤစၢၤအီၤန့ၣ် ဒီပုၢ်ဝဲၢ်မုၣ်ခၤ တဲဝဲလၢ “ပှၤလၢအသးဂ့ၤလၢ ယဖီခိၣ်န့ၣ် ယဘၣ်သး မၤစၢၤကဒါအဝဲသ့ၣ်ညါ. ဘၣ်ဆၣ် ခဲအံၤ အဝဲသ့ၣ်အိၣ်တၢ်လီၢ်ဖဲလဲၣ်န့ၣ် ယတသ့ၣ်ညါဘၣ်. သနာ်က့ ယဟိဝၤယွၤ သ့ၣ်ညါဝဲ. ဒီးယဃ့ထုကဖၣ်လၢ ယဟိဝၤယွၤ ကမၤစၢၤအဝဲသ့ၣ်.” ဒီပုၢ်ဝဲၢ်မုၣ်ခၤ တဲတၢ်န့ၣ်ဖၣ်ဘၣ်ညါ. ပမ့ၢ်မၤဂ့ၤတၢ်လၢ ပှၤဂၤအဖီခိၣ် အါမ့ၢ်ဂ့ၤ စှၤမ့ၢ်ဂ့ၤ ယဟိဝၤယွၤ ထံၣ်ဝဲခဲလၢာ်. တကးဒံးဘၣ် ယဟိဝၤယွၤထံၣ်ဝဲ ပတၢ်ဟ့ၣ်လီၤသး ဒီးအပာ်လုၢ်ပာ်ပှ့ၤဝဲ ဒီးအထံၣ်ဝဲဒ်သိးဒီး အကမၢ်အိၣ်ဒီးပှၤ ဒီးအကလိးကဒါပှၤ.—ဖး ကတိၤဒိ ၁၉:၁၇.
ပှၤတဂၤလၢ အနီၢ်သးဆူၣ်န့ၣ် အကဃုကျဲလၢ ကမၤစၢၤပှၤဂၤ (ကွၢ်လံာ်အဆၢ ၁၂)
၁၂. ဒီပုၢ်ဝဲၢ်ခွါတဖၣ် ပာ်ဖျါထီၣ်တၢ်အဲၣ်လၢ တၢ်အိၣ်ဖှိၣ်ပူၤကသ့ဒ်လဲၣ်. (ကွၢ်စ့ၢ်ကီးတၢ်ဂီၤ.)
၁၂ နမ့ၢ်ကဲဒီပုၢ်ဝဲၢ်ခွါန့ၣ် နပာ်ဖျါထီၣ်လၢ နအဲၣ်ပှၤဂၤ ဒီးနမၤစၢၤအဝဲသ့ၣ် ကသ့ဒ်လဲၣ်. ဒီပုၢ်ဝဲၢ်ခွါကၠီဒၢၣ် လၢအကဲပှၤသးစၢ်တဂၤ အသံကွၢ် တၢ်အိၣ်ဖှိၣ်သးပှၢ်တဂၤလၢ ဒ်သိးအကမၤစၢၤတၢ်လၢ တၢ်အိၣ်ဖှိၣ်ပူၤအဂီၢ် အကဘၣ်မၤဒ်လဲၣ်. တၢ်အိၣ်ဖှိၣ်သးပှၢ် ပတြၢၤအီၤလၢ တၢ်လၢအမၤတ့ၢ်ဝဲတဖၣ် ဒီးဟ့ၣ်ကူၣ်အီၤ တၢ်လၢအကဘၣ် မၤဂ့ၤထီၣ်ဝဲ. အဒိ တၢ်အိၣ်ဖှိၣ်သးပှၢ် ဟ့ၣ်ကူၣ်အီၤလၢ ဒ်သိးဒီး အကတူၢ်လိာ်မုာ်ပှၤဂၤအဂီၢ် အကဘၣ်ဟဲလၢ တၢ်အိၣ်ဖှိၣ်လီၢ်ဆိဆိ, ကဟ့ၣ်ထီၣ်တၢ်စံးဆၢ လၢတၢ်အိၣ်ဖှိၣ်ပူၤ, ကလဲၤစံၣ်တဲၤတဲလီၤတၢ်ဒီး ပှၤလၢအကရူၢ်ပူၤမၢ်မၢ် ဒီးဃုကျဲလၢ ကမၤစၢၤအါထီၣ်ပှၤဂၤ. ဖဲဒီပုၢ်ဝဲၢ်ခွါကၠီဒၢၣ် မၤထွဲတၢ်ဟ့ၣ်ကူၣ်အံၤအခါ အတၢ်အဲၣ်ဒီပုၢ်ဝဲၢ်မုၣ်ခွါ ဒိၣ်ထီၣ်ဝဲ. တကးဒံးဘၣ် အတၢ်သ့တၢ်ဘၣ် လၢအဂၤစ့ၢ်ကီး ဟဲအါထီၣ်ဝဲ. ဒီပုၢ်ဝဲၢ်ခွါကၠီဒၢၣ် သ့ၣ်ညါထီၣ်ဝဲလၢ ဒီပုၢ်ဝဲၢ်ခွါတဂၤ မ့ၢ်ကဲထီၣ်တၢ်အိၣ်ဖှိၣ် အပှၤမၤစၢၤတၢ်န့ၣ် တမ့ၢ်ထဲ အကဘၣ် စးထီၣ်မၤစၢၤပှၤဂၤဘၣ်, အကဘၣ် ဆဲးမၤစၢၤပှၤဂၤထီဘိ.—၁ တံၤ ၃:၈-၁၀, ၁၃.
၁၃. တၢ်အဲၣ်မၤစၢၤ ဒီပုၢ်ဝဲၢ်ခွါခြံၣ်စ့ၤ လၢကကဲထီၣ်က့ၤ တၢ်အိၣ်ဖှိၣ်သးပှၢ်ဒ်လဲၣ်.
၁၃ နကဲတၢ်အိၣ်ဖှိၣ် အပှၤမၤစၢၤတၢ်ဧါ မ့တမ့ၢ် တၢ်အိၣ်ဖှိၣ်သးပှၢ်တဂၤဧါ. နမ့ၢ်ကဲန့ၣ် ယဟိဝၤယွၤ တသးပ့ၤနီၣ် တၢ်လၢနမၤတ့ၢ်တဖၣ် ဒီးတၢ်အဲၣ်လၢ နပာ်ဖျါထီၣ်တဖၣ်ဘၣ်. (၁ ကရံၣ် ၁၅:၅၈) နဆဲးပာ်ဖျါထီၣ်တၢ်အဲၣ် တုၤလၢခဲအံၤန့ၣ် ယဟိဝၤယွၤထံၣ်ဝဲ. အဒိ ဒီပုၢ်ဝဲၢ်ခွါခြံၣ်စ့ၤန့ၣ် ပှၤပာ်ပတုာ်အီၤလၢ တၢ်အိၣ်ဖှိၣ်သးပှၢ်အဃိ အသးဘၣ်ဒိဒိၣ်မး. ဒီးအတဲဝဲလၢ “ယကဲတၢ်အိၣ်ဖှိၣ်သးပှၢ်မ့ၢ်ဂ့ၤ တကဲဘၣ်မ့ၢ်ဂ့ၤ ခီဖျိလၢ ယအဲၣ်ယဟိဝၤယွၤအဃိ ယပာ်လီၤသးလၢ ယကမၤ ယဟိဝၤယွၤအတၢ်မၤ လၢအဂ့ၤကတၢၢ်.” လၢခံဘျီ ဒီပုၢ်ဝဲၢ်ခွါခြံၣ်စ့ၤ ကဲထီၣ်က့ၤ တၢ်အိၣ်ဖှိၣ်သးပှၢ်. ဒီးအတဲဝဲလၢ “ယကကဲထီၣ်က့ၤ တၢ်အိၣ်ဖှိၣ်သးပှၢ်အဂီၢ် ယဘၣ်ယိၣ်တၢ်တစဲး. ဘၣ်ဆၣ် ခီဖျိလၢ ယအဲၣ်ယဟိဝၤယွၤ ဒီးယအဲၣ် ဒီပုၢ်ဝဲၢ်မုၣ်ခွါအဃိ ယဟိဝၤယွၤ မ့ၢ်ဘၣ်သးလၢ ယကကဲထီၣ်ကဒီး တၢ်အိၣ်ဖှိၣ်သးပှၢ်န့ၣ် ယကကဲ.”
၁၄. နမၤလိန့ၢ်ဘၣ်တၢ်လၢ ဒီပုၢ်ဝဲၢ်မုၣ်အလံနၤ အအိၣ်ဒ်လဲၣ်.
၁၄ ယဟိဝၤယွၤ အခ့အပှၤတဖၣ်န့ၣ် အဲၣ်ပှၤလၢအဃၢၤစ့ၢ်ကီး. (မး ၂၂:၃၇-၃၉) အဒိ ဒီပုၢ်ဝဲၢ်မုၣ်အလံနၤ လၢအအိၣ်လၢကၠီၣ်ကၠံယၢၣ်န့ၣ် တဲဝဲလၢ “တၢ်ဂ့ၢ်ခိၣ်သ့ၣ်လၢ ယစးထီၣ် ဟးစံၣ်တဲၤတဲလီၤတၢ်န့ၣ် မ့ၢ်လၢယအဲၣ် ယဟိဝၤယွၤအဃိ. ဖဲယတၢ်အဲၣ် ယဟိဝၤယွၤ ဒိၣ်ထီၣ်အခါ ယတၢ်အဲၣ်ပှၤလၢ ယဃၢၤစ့ၢ်ကီး ဒိၣ်ထီၣ်ဝဲ. ယကျဲးစၢးဆိမိၣ်လၢ အဝဲသ့ၣ်တဖၣ် ထံၣ်ဘၣ်ဒီး တၢ်ကီတၢ်ခဲဒ်လဲၣ် ဒီးအဝဲသ့ၣ်ဘၣ်သး တဲသကိး တၢ်ဂ့ၢ်မနုၤတဖၣ်လဲၣ်. ခီဖျိလၢ ယကျဲးစၢးဆိမိၣ်န့ၢ်တၢ်လၢ အဝဲသ့ၣ်အဂီၢ်ဒ်အံၤအဃိ ယဘၣ်သးမၤစၢၤ အဝဲသ့ၣ်အါထီၣ်.”—ရိ ၁၀:၁၃-၁၅.
ပမ့ၢ်ပပာ်ဖျါထီၣ် တၢ်အဲၣ်ပှၤဂၤန့ၣ် ယဟိဝၤယွၤ ကဆိၣ်ဂ့ၤပှၤ
နမ့ၢ်သးဂ့ၤလၢ ပှၤဂၤအဖီခိၣ်န့ၣ် ပှၤအါဂၤ ကန့ၢ်ဘၣ်အဘျုး (ကွၢ်လံာ်အဆၢ ၁၅-၁၆)
၁၅-၁၆. ဒ်တၢ်ဂီၤပူၤအသိး ပမ့ၢ်ပာ်ဖျါထီၣ် တၢ်အဲၣ်လၢပှၤဂၤအဖီခိၣ်န့ၣ် ပကန့ၢ်ဘၣ် တၢ်ဆိၣ်ဂ့ၤမနုၤလဲၣ်.
၁၅ ဖဲပမၤစၢၤ ပဒီပုၢ်ဝဲၢ်မုၣ်ခွါတဖၣ်အခါ အကဲဘျုးလၢ အဝဲသ့ၣ်အဂီၢ် ဒီးပှၤဂၤအဂီၢ်. အဒိ ဖဲခိၤရိၤနၤတၢ်ဆါ ရၤလီၤသး သီသီခါန့ၣ် ဒီပုၢ်ဝဲၢ်ခွါဖီလိး ဒီးအမါ မၤစၢၤဝဲ ဒီပုၢ်ဝဲၢ်မုၣ်သးပှၢ်တဖၣ် လၢကသူဝဲ အံၣ်လဲးထြီနံး တၢ်ပီးတၢ်လီတဖၣ် ဒ်သိးကစံၣ်တဲၤတဲလီၤတၢ်. ခီၣ်ထံးခါ ဒီပုၢ်ဝဲၢ်မုၣ်သးပှၢ်တဂၤ သူဝဲတဘၣ်ဘၣ်, ဘၣ်ဆၣ်ခဲအံၤန့ၣ် အသူဝဲဘၣ်လံ. အဃိ အကွဲမုာ် အဘူးအတံၢ်တဖၣ်လၢ ကဟဲထီၣ် တၢ်သ့ၣ်နီၣ်ထီၣ်က့ၤ ယ့ၣ်ၡူးအတၢ်သံအမူလၢ စူပူၤ. ဖဲန့ၣ် အဘူးအတံၢ် အဂၤဃုဆံ ထီၣ်ဝဲတၢ်အိၣ်ဖှိၣ်လၢ စူပူၤ. ခီဖျိလၢ ဒီပုၢ်ဝဲၢ်ခွါဖီလိး ဒီးအမါ အတၢ်မၤစၢၤအဃိ ဒီပုၢ်ဝဲၢ်မုၣ်သးပှၢ် ဒီးအဘူးအတံၢ်တဖၣ် န့ၢ်ဘၣ်အဘျုးအါမး. လၢခံ ဒီပုၢ်ဝဲၢ်မုၣ်သးပှၢ်အံၤ ကွဲးန့ၢ် ဒီပုၢ်ဝဲၢ်ခွါဖီလိး အလံာ်လၢ “တၢ်ဘျုးဒိၣ်မးလၢ သုသိၣ်လိပဝဲပှၤသးပှၢ်တဖၣ် ဒ်အံၤ. ခီဖျိလၢ သုမၤစၢၤပှၤအဃိ ယသ့ၣ်ညါလၢ ယဟိဝၤယွၤအဲၣ်ပှၤဒိၣ်မး ဒီးယတသးပ့ၤနီၣ် သုတၢ်မၤစၢၤ နီတဘျီဘၣ်.”
၁၆ ဒီပုၢ်ဝဲၢ်ခွါဖီလိး န့ၢ်ဘၣ်တၢ်မၤလိလၢ တၢ်မၤစၢၤပှၤဂၤန့ၣ် မ့ၢ်တၢ်လၢအရ့ဒိၣ်. ဒီပုၢ်ဝဲၢ်ခွါအံၤ အသ့ၣ်ညါဘၣ်ဝဲလၢ တၢ်အဲၣ်န့ၣ် အရ့ဒိၣ်န့ၢ်ဒံး တၢ်သ့ၣ်ညါ ဒီးတၢ်သ့တၢ်ဘၣ်ဒံး. အတဲဝဲ “လၢညါန့ၣ် ယကဲ ကဝီၤအပှၤကွၢ်တၢ်. ဒီးခဲအံၤန့ၣ် ဘၣ်သ့ၣ်သ့ၣ် ဒီပုၢ်ဝဲၢ်မုၣ်ခွါတဖၣ် သးပ့ၤနီၣ်ဝဲ တၢ်လၢယစံၣ်တဲၤတဲလီၤ ဘၣ်ဆၣ် ဒီပုၢ်ဝဲၢ်မုၣ်ခွါတဖၣ် တသးပ့ၤနီၣ်တၢ်လၢ ယမၤန့ၢ်လၢ အဝဲသ့ၣ်အဂီၢ်ဘၣ်.”
၁၇. ပမ့ၢ်ပာ်ဖျါထီၣ် တၢ်အဲၣ်န့ၣ် မတဂၤကန့ၢ်ဘၣ်အဘျုးလဲၣ်.
၁၇ ပမ့ၢ်ပာ်ဖျါထီၣ် တၢ်အဲၣ်လၢပှၤဂၤအဖီခိၣ်န့ၣ် ပနီၢ်ကစၢ်စ့ၢ်ကီး ကန့ၢ်ဘၣ်အဘျုးကၠ့ၤ. ဒီပုၢ်ဝဲၢ်ခွါကၠီနသၢၤ လၢအအိၣ်လၢ ကီၢ်နယူစံလဲၣ်န့ၣ် အတဲပၠးပှၤဒ်အံၤ. ဘၣ်တနံၤ ဖဲမုၢ်ဃုနံၤဟါလီၤခီ တၢ်ကိၢ်ဒိၣ်မး အဆၢကတီၢ်န့ၣ် အထံၣ်ဘၣ်ဒီပုၢ်ဝဲၢ်ခွါလၢ အမၤပှၤလဲၤလၢညါတဂၤ ဟးစံၣ်တဲၤတဲလီၤတၢ်လၢကျဲပူၤ ထဲတဂၤ. ဖဲကၠီနသၢၤ ထံၣ်ဝဲဒ်န့ၣ်အခါ အပာ်လီၤသးလၢ အကလဲၤစံၣ်တဲၤတဲလီၤတၢ်ဒီးအီၤ. ဒီပုၢ်ဝဲၢ်ခွါကၠီနသၢၤ ပာ်ဖျါထီၣ် တၢ်အဲၣ်လၢဒီပုၢ်ဝဲၢ်ခွါတဂၤအံၤ အဖီခိၣ်အဃိ အနီၢ်ကစၢ်စ့ၢ်ကီး န့ၢ်ဘၣ်ဝဲအဘျုး. ဒီပုၢ်ဝဲၢ်ခွါကၠီနသၢၤ တဲဝဲလၢ “ဖဲန့ၣ်အခါ ယဟးစံၣ်တဲၤတဲလီၤတၢ် တမုာ်ဘၣ်. ဘၣ်ဆၣ် ဖဲယမၤသကိးတၢ်ဒီး ဒီပုၢ်ဝဲၢ်ခွါတဂၤအံၤအခါ ယထံၣ်ဘၣ် အသိၣ်လိတၢ်အကျိၤအကျဲ ဒီးပှၤကနၣ်အီၤဂ့ၤဂ့ၤအဃိ ယဟးစံၣ်တဲၤတဲလီၤတၢ် မုာ်ဒိၣ်ထီၣ်. တကးဒံးဘၣ် အကဲထီၣ် ယသကိးလၢ အမၤစၢၤယၤဒ်သိး ယနီၢ်သးကဆူၣ်ထီၣ်, ယဟးစံၣ်တဲၤတဲလီၤတၢ် ကမုာ်ထီၣ် ဒီးယတၢ်ရ့လိာ်သးဒီး ယဟိဝၤယွၤကဂ့ၤဒိၣ်ထီၣ်.”
၁၈. ယဟိဝၤယွၤ ဘၣ်သးလၢ ပကမၤမနုၤလဲၣ်.
၁၈ ယဟိဝၤယွၤ ဘၣ်သးဝဲလၢ ပကအဲၣ်အီၤ ဒီးပကအဲၣ်ပှၤဂၤ ဒိၣ်ထီၣ်. ဒ်သိး ပတၢ်အဲၣ်ယဟိဝၤယွၤ ကဒိၣ်ထီၣ်အဂီၢ် ပမၤလိဘၣ်လၢ ပဘၣ်ဖးလံာ်စီဆှံ, ဆိမိၣ်ထံ တၢ်လၢပဖး ဒီးဃ့ထုကဖၣ်လၢ အအိၣ်ထီဘိ. ဒ်သိးပတၢ်အဲၣ် ပဒီပုၢ်ဝဲၢ်မုၣ်ခွါ ကဒိၣ်ထီၣ်အဂီၢ် ပကဘၣ်မၤစၢၤ အဝဲသ့ၣ်လၢ နီၢ်ခိတကပၤစ့ၢ်ကီး. ပတၢ်အဲၣ်အံၤ မ့ၢ်ဒိၣ်ထီၣ်အါထီၣ်န့ၣ် ပတၢ်ရ့လိာ်သးဒီး ယဟိဝၤယွၤ ဒီးပဒီပုၢ်ဝဲၢ်မုၣ်ခွါတဖၣ်စ့ၢ်ကီး ကဂ့ၤဒိၣ်ထီၣ်. ယဟိဝၤယွၤ ဒီးဒီပုၢ်ဝဲၢ်မုၣ်ခွါတဖၣ် ကကဲဝဲ ပသကိး လီၤထူလီၤယိာ်.
တၢ်သးဝံၣ် ၁၀၉ အဲၣ်လိာ်ကွံလိာ်သုသးဒိၣ်ဒိၣ် လၢသူၣ်ဒီဖျၢၣ်သးဒီဖျၢၣ်
a ပသ့ၣ်ညါတၢ်မ့ၢ်တၢ်တီ သီသီမ့ၢ်ဂ့ၤ ဖးယံာ်လံမ့ၢ်ဂ့ၤ ပဝဲခဲလၢာ် ပကဘၣ်ဆဲးမၤဒိၣ်ထီၣ် ပတၢ်အဲၣ်ယဟိဝၤယွၤ ဒီးပှၤဂၤ. လၢတၢ်မၤလိ တခါအံၤန့ၣ် ပကမၤလိဘၣ်လၢ ပဆဲးမၤဒိၣ်ထီၣ် ပတၢ်အဲၣ်ယဟိဝၤယွၤ ဒီးပှၤဂၤ ကသ့ဒ်လဲၣ်. ဖဲပမၤလိတၢ်ဂ့ၢ်အံၤအခါ ပကဆိမိၣ်ထံလီၤက့ၤသးလၢ ခဲအံၤ ပအဲၣ်ယဟိဝၤယွၤ ဒိၣ်ထဲလဲၣ် ဒီးပဆဲးမၤဒိၣ်ထီၣ်အါထီၣ် ပတၢ်အဲၣ်ကသ့ဒ်လဲၣ်န့ၣ် ပကတဲသကိး.
b ပှၤမံၤတနီၤန့ၣ် ပှၤဆီတလဲဝဲ.
