တၢ်မၤလိ ၂၉
နအိၣ်ကတီၤပာ်စၢၤသးလၢ တၢ်နးတၢ်ဖှီၣ်ဖးဒိၣ်လံဧါ
“အိၣ်ကတဲာ်ကတီၤ သုသး.”—မး ၂၄:၄၄.
တၢ်သးဝံၣ် ၁၅၀ ဃုယွၤဒ်သိး နကန့ၢ်တၢ်အုၣ်က့ၤခီၣ်က့ၤ
တၢ်မၤလိအံၤ အတၢ်တိာ်ပာ် a
၁. ပမ့ၢ်အိၣ်ကတီၤပာ်စၢၤသးလၢ န့ဆၢၣ်တၢ်ဘၣ်ဒိဘၣ်ထံးန့ၣ် ကကဲဘျုးဒ်လဲၣ်.
ပမ့ၢ်အိၣ်ကတီၤပာ်စၢၤသးန့ၣ် ပသးသမူပူၤဖျဲးသ့. အဒိ န့ဆၢၣ်တၢ်ဘၣ်ဒိဘၣ်ထံး မ့ၢ်ကဲထီၣ်န့ၣ် ပှၤလၢအအိၣ်ကတီၤပာ်စၢၤသးတဖၣ် ညီလၢအဝဲသ့ၣ်ကပူၤဖျဲး ဒီးကမၤစၢၤပှၤအဂၤ. ယူရပၤ တၢ်ကရၢကရိတဖုလၢ အမၤစၢၤပှၤဂၤန့ၣ် တဲဝဲလၢ “တၢ်အိၣ်ကတီၤပာ်စၢၤသးဂ့ၤဂ့ၤန့ၣ် မၤပူၤဖျဲး ပှၤသးသမူသ့.”
၂. ဘၣ်မနုၤအဃိ ပကဘၣ် အိၣ်ကတီၤပာ်စၢၤသးလၢ တၢ်နးတၢ်ဖှီၣ်ဖးဒိၣ်လဲၣ်. (မးသဲ ၂၄:၄၄)
၂ “တၢ်နးတၢ်ဖှီၣ်ဖးဒိၣ်” ကကဲထီၣ်အသး သတူၢ်ကလာ်. (မး ၂၄:၂၁) ဘၣ်ဆၣ် ပသ့ၣ်ညါပာ်စၢၤလၢ တၢ်နးတၢ်ဖှီၣ်ဖးဒိၣ်ကဟဲဝဲ အဃိ အလီၤဆီဒီး န့ဆၢၣ်တၢ်ဘၣ်ဒိဘၣ်ထံးအဂၤတဖၣ်. လၢအပူၤကွံာ် ကအိၣ်လၢအနံၣ် ၂,၀၀၀ န့ၣ်ယ့ၣ်ၡူးဟ့ၣ်ပလီၢ် အပျဲၢ်အဘီၣ် လၢမုၢ်နံၤအဝဲန့ၣ်. (ဖး မးသဲ ၂၄:၄၄.) အဃိ ပမ့ၢ်အိၣ်ကတီၤပာ်စၢၤသးလၢ မုၢ်နံၤအဝဲန့ၣ် ညီလၢပကလဲၤခီဖျိ တၢ်ကီတၢ်ခဲ ဒီးပမၤစၢၤပှၤဂၤလၢ အလဲၤခီဖျိတၢ် ကန့ၢ်စ့ၢ်ကီး.—လူၤ ၂၁:၃၆.
၃. တၢ်တူၢ်န့ၢ်ခီၣ်ကဲ, တၢ်သးကညီၤ ဒီးတၢ်အဲၣ်န့ၣ် မၤစၢၤပှၤလၢ ပကအိၣ်ကတီၤပာ်စၢၤသးလၢ တၢ်နးတၢ်ဖှီၣ်ဖးဒိၣ်ဒ်လဲၣ်.
၃ ဒ်သိး ပကအိၣ်ကတီၤပာ်စၢၤသးလၢ တၢ်နးတၢ်ဖှီၣ်ဖးဒိၣ်အဂီၢ် ပကဘၣ် မၤအိၣ်ထီၣ်တၢ်ဂ့ၤတၢ်ဝါသၢခါ. ပှၤမ့ၢ်မၢ ပစံၣ်တဲၤတဲလီၤတၢ်စံၣ်ညီၣ်အကစီၣ် ဒီးပှၤလၢအတစူၢ်တနာ်တၢ်တဖၣ် မ့ၢ်ထီဒါပှၤန့ၣ် ပကမၤဒ်လဲၣ်. (လီၣ် ၁၆:၂၁) ဒ်သိးပကဒိကနၣ် ယဟိဝၤယွၤအကလုၢ်အဂီၢ် ပကဘၣ်အိၣ်ဒီး တၢ်တူၢ်န့ၢ်ခီၣ်ကဲ ဒီးနာ်လၢ အကဒီသဒၢပှၤ. အဒိ ပဒီပုၢ်ဝဲၢ်မုၣ်ခွါတဖၣ် အဟံၣ်အဃီဒီးအတၢ်ဖိတၢ်လံၤ မ့ၢ်ဟးဂီၤကွံာ် တနီၤမ့ၢ်ဂ့ၤ ခဲလၢာ်မ့ၢ်ဂ့ၤ ပကမၤဒ်လဲၣ်. (ဃဘး ၃:၁၇, ၁၈) ပကဘၣ်အိၣ်ဒီး တၢ်သးကညီၤ ဒီးမၤစၢၤအဝဲသ့ၣ်. ပှၤကလုာ်တဖၣ် လၢအပာ်ဖှိၣ်ထီၣ်အသး မ့ၢ်ဟဲထီဒါပှၤ ဒီးပမ့ၢ်ဘၣ်အိၣ် တပူၤဃီဒီး ပဒီပုၢ်ဝဲၢ်မုၣ်ခွါ တစိၢ်တလီၢ်န့ၣ် ပကမၤဒ်လဲၣ်. (ဃ့း ၃၈:၁၀-၁၂) ဒ်သိးပလဲၤခီဖျိ တၢ်ကီတၢ်ခဲ ကန့ၢ်အဂီၢ် ပကဘၣ်အိၣ်ဒီး တၢ်အဲၣ်လၢအဂၢၢ်ကျၢၤ.
၄. ပကဆဲးမၤအါထီၣ် တၢ်တူၢ်န့ၢ်ခီၣ်ကဲ, တၢ်သးကညီၤ ဒီးတၢ်အဲၣ်အဂီၢ် လံာ်စီဆှံ ဟ့ၣ်ဂံၢ်ဟ့ၣ်ဘါပှၤဒ်လဲၣ်.
၄ လံာ်စီဆှံဟ့ၣ်ဂံၢ်ဟ့ၣ်ဘါပှၤလၢ ပကဆဲးမၤအါထီၣ် တၢ်တူၢ်န့ၢ်ခီၣ်ကဲ, တၢ်သးကညီၤ ဒီးတၢ်အဲၣ်. လူၤကၣ် ၂၁:၁၉ တဲဝဲလၢ “ခီဖျိလၢ သုတၢ်တူၢ်န့ၢ်ခီၣ်ကဲအဃိ သုကအုၣ်က့ၤခီၣ်က့ၤ သုသးသမူ.” ကလီးစဲ ၃:၁၂ တဲဝဲလၢ “ပာ်ဖျါထီၣ် တၢ်သးကညီၤ.” ဒီး ၁ သ့းစၤလနံ ၄:၉, ၁၀ တဲဝဲလၢ “ကစၢ်ယွၤ သိၣ်လိသုလၢ သုကအဲၣ်လိာ်သုသး တဂၤဒီးတဂၤလံ. . . . ဘၣ်ဆၣ် ဒီပုၢ်ဝဲၢ်သ့ၣ်ဧၢ, ပဟ့ၣ်သဆၣ်ထီၣ် သုလၢ သုကမၤဒ်အံၤ အါန့ၢ်အလီၢ်.” လံာ်စီဆှံအဆၢတဖၣ်အံၤ ပှၤကွဲးန့ၢ်ဝဲလၢ ယ့ၣ်ၡူးအပျဲၢ်အဘီၣ်တဖၣ်အဂီၢ်. ပမ့ၢ်ကွၢ် ယ့ၣ်ၡူးအပျဲၢ်အဘီၣ်တဖၣ်အံၤ အဝဲသ့ၣ်အိၣ်ဒီး တၢ်တူၢ်န့ၢ်ခီၣ်ကဲ, တၢ်သးကညီၤ ဒီးတၢ်အဲၣ်လံ ဘၣ်ဆၣ် အဝဲသ့ၣ် ကဘၣ်ဆဲးမၤအါထီၣ် တၢ်ဂ့ၤတၢ်ဝါတဖၣ်အံၤဒံး. ပဝဲစ့ၢ်ကီး ပကဘၣ်မၤ ဒ်သိးဒီးအဝဲသ့ၣ်. ခရံာ်ဖိလၢညါတဖၣ် ပာ်ဖျါထီၣ်ဝဲ တၢ်ဂ့ၤတၢ်ဝါတဖၣ်အံၤ တခါဘၣ်တခါဒ်လဲၣ်. ပကွၢ်လိ အဝဲသ့ၣ်ကသ့ဒ်လဲၣ် ဒီးပပာ်ဖျါထီၣ်လၢ ပအိၣ်ကတီၤပာ်စၢၤသးလၢ တၢ်နးတၢ်ဖှီၣ်ဖးဒိၣ် ကသ့ဒ်လဲၣ်.
မၤအါထီၣ် နတၢ်တူၢ်န့ၢ်ခီၣ်ကဲ
၅. ခရံာ်ဖိ ဖဲစီၤပီလူးအစိၤန့ၣ် အဝဲသ့ၣ် ထံၣ်ဘၣ်တၢ်ကီတၢ်ခဲ နာ်က့ အဝဲသ့ၣ်အိၣ်ဒီး တၢ်တူၢ်န့ၢ်ခီၣ်ကဲဒ်လဲၣ်.
၅ ခရံာ်ဖိ ဖဲစီၤပီလူးအစိၤန့ၣ် အဝဲသ့ၣ်ဘၣ်အိၣ်ဒီး တၢ်တူၢ်န့ၢ်ခီၣ်ကဲ. (ဧ့ၤ ၁၀:၃၆) ခရံာ်ဖိတဖၣ်န့ၣ် ထံၣ်ဘၣ်တၢ်ကီတၢ်ခဲ ဒ်ပှၤဂၤအသိး တကးဒံးဘၣ် အဝဲသ့ၣ်ထံၣ်ဘၣ် တၢ်ကီတၢ်ခဲ ခီဖျိလၢ အကဲခရံာ်ဖိအဃိစ့ၢ်ကီး. ပှၤယူဒၤဖိတၢ်ဘူၣ်တၢ်ဘါခိၣ်နၢ် ဒီးပှၤရိမ့ၤဖိ ပဒိၣ်တဖၣ် မၤအၢမၤနးအဝဲသ့ၣ် ဒီးအဟံၣ်ဖိဃီဖိ ထီဒါအဝဲသ့ၣ်. (မး ၁၀:၂၁) တကးဒံးဘၣ် လၢတၢ်အိၣ်ဖှိၣ်ပူၤန့ၣ် တဘျီတခီၣ် ပှၤတနီၤ ထီဒါက့ၤတၢ်မ့ၢ်တၢ်တီ ဒီးကျဲးစၢးမၤလီၤဖး တၢ်အိၣ်ဖှိၣ် အဃိ အဝဲသ့ၣ်ကဘၣ် ကျဲးစၢးဟးဆှဲး ပှၤတဖၣ်န့ၣ်. (မၤတၢ် ၂၀:၂၉, ၃၀) ခရံာ်ဖိတဖၣ်ထံၣ်ဘၣ် တၢ်အိၣ်သးဒ်န့ၣ် နာ်က့ အဝဲသ့ၣ်ဆဲးအိၣ်ဒီး တၢ်တူၢ်န့ၢ်ခီၣ်ကဲဒ်လဲၣ်. (လီၣ် ၂:၃) အဝဲသ့ၣ် ဆိမိၣ်ထံဝဲ ပှၤလၢအအိၣ်ဒီး တၢ်တူၢ်န့ၢ်ခီၣ်ကဲ အဒိအတဲာ် လၢအအိၣ်လၢ လံာ်စီဆှံအပူၤ ဒ်သိးဒီး စီၤယိၤဘး. (ယၤ ၅:၁၀, ၁၁) အဝဲသ့ၣ် ဃ့ထုကဖၣ် ဒ်သိးကအိၣ်ဒီး တၢ်ဂံၢ်တၢ်ဘါ. (မၤတၢ် ၄:၂၉-၃၁) တကးဒံးဘၣ် အဝဲသ့ၣ် သ့ၣ်ညါဝဲလၢ အမ့ၢ်အိၣ်ဒီး တၢ်တူၢ်န့ၢ်ခီၣ်ကဲန့ၣ် ယဟိဝၤယွၤ ကဟ့ၣ်အဝဲသ့ၣ်ခိၣ်ဖး.—မၤတၢ် ၅:၄၁.
၆. လၢဒီပုၢ်ဝဲၢ်မုၣ်မၢၤရံထၤ အတၢ်လဲၤခီဖျိန့ၣ် နန့ၢ်ဘၣ် တၢ်မၤလိဒ်လဲၣ်.
၆ လၢလံာ်စီဆှံ ဒီးပတၢ်ကရၢကရိ လံာ်လဲၢ်အပူၤန့ၣ် ပဖးဘၣ် ပှၤလၢအအိၣ်ဒီး တၢ်တူၢ်န့ၢ်ခီၣ်ကဲ အဂ့ၢ်အါမး. အဃိ ပမ့ၢ်မၤလိ ဒီးဆိမိၣ်ထံ အဝဲသ့ၣ်အဂ့ၢ်မၢ်မၢ်န့ၣ် ပကအိၣ်ဒီး တၢ်တူၢ်န့ၢ်ခီၣ်ကဲစ့ၢ်ကီး. ဒီပုၢ်ဝဲၢ်မုၣ်မၢၤရံထၤ လၢအအိၣ်လၢ ကီၢ်အဲလဘ့နံယါန့ၣ် အမၤဝဲဒ်န့ၣ်အဃိ ဖဲအဟံၣ်ဖိဃီဖိ ထီဒါအီၤ ဒီးမၤအၢမၤနးအီၤအခါ အအိၣ်ဒီး တၢ်တူၢ်န့ၢ်ခီၣ်ကဲ. ဒီပုၢ်ဝဲၢ်မုၣ်မၢၤရံထၤ တဲဝဲလၢ “ဖဲယမၤလိ စီၤယိၤဘးအဂ့ၢ်ခါန့ၣ် ယန့ၢ်ဘၣ် တၢ်ဂံၢ်တၢ်ဘါ အါမး. စီၤယိၤဘးန့ၣ် အဘၣ်တူၢ်တၢ်နးမး ဒီးတၢ်နးတၢ်ဖှီၣ်လၢ အထံၣ်ဘၣ်ဝဲတဖၣ် မတဂၤ ဒုးအိၣ်ထီၣ်ဝဲလဲၣ်န့ၣ် အတသ့ၣ်ညါဝဲဘၣ်. သနာ်က့ အတဲဝဲလၢ ‘တုၤလၢယသံဒၣ်လဲာ် ယတမၤဟးဂီၤ ယတၢ်သးတီဘၣ်.’ (ဘး ၂၇:၅) ယဆိမိၣ်ထီၣ်လၢ တၢ်ကီတၢ်ခဲလၢ ယထံၣ်ဘၣ်န့ၣ် အမၣ်တနးထဲသိးဒီး စီၤယိၤဘး ထံၣ်ဘၣ်ဝဲဘၣ်. တကးဒံးဘၣ် မတဂၤဒုးအိၣ်ထီၣ် ယတၢ်ကီတၢ်ခဲလဲၣ်န့ၣ် ယသ့ၣ်ညါစ့ၢ်ကီး. မ့မ့ၢ်စီၤယိၤဘးန့ၣ် အမၣ်တသ့ၣ်ညါဝဲဘၣ်.”
၇. ခဲအံၤန့ၣ် ပမ့ၢ်တထံၣ်ဘၣ် တၢ်ကီတၢ်ခဲနးနးဘၣ် သနာ်က့ ပမၤလိဘၣ်လၢ ပကဘၣ်မၤ မနုၤလဲၣ်.
၇ ပမၤအါထီၣ်စ့ၢ်ကီး ပတၢ်တူၢ်န့ၢ်ခီၣ်ကဲသ့ခီဖျိ ပဃ့ထုကဖၣ်လၢ ယဟိဝၤယွၤအအိၣ် မၢ်မၢ် ဒီးတဲဘၣ်အီၤလၢ ပတၢ်ကိၢ်တၢ်ဂီၤခဲလၢာ်. (ဖံလံး ၄:၆; ၁ သ့း ၅:၁၇) ဘၣ်သ့ၣ်သ့ၣ် ခဲအံၤန့ၣ် နတထံၣ်ဘၣ် တၢ်ကီတၢ်ခဲနးနးဘၣ်. သနာ်က့ ဖဲနသးတမုာ်ဘၣ်, နခိၣ်နူာ်ဘံဘူ ဒီးနတသ့ၣ်ညါလၢ နကဘၣ်မၤမနုၤလဲၣ်အခါ နဃ့ယဟိဝၤယွၤ အတၢ်မၤစၢၤဧါ. တၢ်ကီတၢ်ခဲလၢ နထံၣ်ဘၣ်ခဲအံၤန့ၣ် အမ့ၢ်ကဲ တၢ်ယိယိဖိနာ်က့ နမ့ၢ်ဃ့တၢ်မၤစၢၤလၢ ယဟိဝၤယွၤအအိၣ် ထီဘိန့ၣ် ခါဆူညါ ဖဲနထံၣ်ဘၣ် တၢ်ကီတၢ်ခဲနးနးအခါ နကဃ့တၢ်မၤစၢၤလၢအအိၣ် တဘျီဃီ. နမ့ၢ်မၤဒ်န့ၣ်န့ၣ် နကနာ်သပှၢ်တၢၢ်လၢ ယဟိဝၤယွၤ ကဘၣ်မၤစၢၤနၤ လၢအဆၢကတီၢ်ဖဲလဲၣ် ဒီးအကဘၣ်မၤစၢၤနၤဒ်လဲၣ်န့ၣ် အသ့ၣ်ညါဝဲ အဂ့ၤကတၢၢ်.—စံး ၂၇:၁, ၃.
၈. ဒီပုၢ်ဝဲၢ်မုၣ်မံရၤ အတၢ်လဲၤခီဖျိ ပာ်ဖျါထီၣ်လၢ ပမ့ၢ်အိၣ်ဒီး တၢ်တူၢ်န့ၢ်ခီၣ်ကဲ လၢဆၢကတီၢ် ခဲအံၤန့ၣ် ကမၤစၢၤပှၤလၢ ပကလဲၤခီဖျိ တၢ်ကီတၢ်ခဲလၢ ခါဆူညါအဂီၢ်ဒ်လဲၣ်. (ယၤကိာ် ၁:၂-၄) (ကွၢ်စ့ၢ်ကီးတၢ်ဂီၤ.)
၈ ဆၢကတီၢ်ခဲအံၤ ဖဲပထံၣ်ဘၣ် တၢ်ကီတၢ်ခဲအခါ ပမ့ၢ်တီဒီး ယဟိဝၤယွၤန့ၣ် ခါဆူညါ ဖဲပထံၣ်ဘၣ် တၢ်နးတၢ်ဖှီၣ်ဖးဒိၣ်အခါ ပကအိၣ်ဒီး တၢ်တူၢ်န့ၢ်ခီၣ်ကဲ. (ရိ ၅:၃) ဘၣ်မနုၤအဃိ ပတဲဒ်န့ၣ်လဲၣ်. ဒီပုၢ်ဝဲၢ်မုၣ်ခွါအါဂၤ တဲဝဲလၢ ဖဲအဝဲသ့ၣ် လဲၤခီဖျိ တၢ်ကီတၢ်ခဲန့ၢ် တဘျီဘျီအခါ အမၤစၢၤ အဝဲသ့ၣ်ဒ်သိး အကဆဲးအိၣ်ဒီး တၢ်တူၢ်န့ၢ်ခီၣ်ကဲ ဖဲအဝဲသ့ၣ်ထံၣ်ဘၣ် တၢ်ကီတၢ်ခဲ လၢခံတဘျီ. ခီဖျိလၢ ယဟိဝၤယွၤ မၤစၢၤအဝဲသ့ၣ်လၢ ကလဲၤခီဖျိ တၢ်ကီတၢ်ခဲအဃိ အဝဲသ့ၣ် နာ်ဝဲသပှၢ်တၢၢ်လၢ ယဟိဝၤယွၤ ကဆဲးမၤစၢၤအဝဲသ့ၣ်ဒံး. တကးဒံးဘၣ် အဝဲသ့ၣ်နာ်န့ၢ် ယဟိဝၤယွၤအဃိ ဖဲအထံၣ်ဘၣ် တၢ်မၤကွၢ် လၢခံတဘျီအခါ အဝဲသ့ၣ်အိၣ်ဒီး တၢ်တူၢ်န့ၢ်ခီၣ်ကဲ. (ဖး ယၤကိာ် ၁:၂-၄.) အဒိ ဒီပုၢ်ဝဲၢ်မုၣ်မံရၤ လၢအကဲပှၤလဲၤလၢညါ လၢကီၢ်အဲလဘ့နံယါန့ၣ် သ့ၣ်ညါဘၣ်ဝဲလၢ တၢ်ကီတၢ်ခဲလၢ အလဲၤခီဖျိဘၣ်ဝဲလၢညါန့ၣ် မၤစၢၤအီၤလၢ အကဆဲးအိၣ်ဒီး တၢ်တူၢ်န့ၢ်ခီၣ်ကဲ. အတဲဝဲလၢ တဘျီတခီၣ်န့ၣ် အဆိမိၣ်ဝဲလၢ ပှၤလၢအထံၣ်ဘၣ် တၢ်ကီတၢ်ခဲဒီဒူၣ် ဒ်သိးအီၤန့ၣ် တအိၣ်နီတဂၤဘၣ်. ဘၣ်ဆၣ် အနီၣ်ဘၣ်က့ၤလၢ ပူၤကွံာ်အနံၣ် ၂၀ အတီၢ်ပူၤန့ၣ် ယဟိဝၤယွၤ မၤစၢၤအီၤထီဘိ. အဃိ အတဲလီၤအသးလၢ ‘ယဟိဝၤယွၤ မၤစၢၤနၤလၢနကလဲၤခီဖျိ နတၢ်ကီတၢ်ခဲ ဒီဒူၣ်လံအဃိ ဆဲးတီဒီးအီၤ ဒီးဆဲးမၤအတၢ်မၤထီဘိ.’ နၤစ့ၢ်ကီး နကဘၣ်ဆိမိၣ်ထီၣ်က့ၤ တၢ်လၢယဟိဝၤယွၤ မၤစၢၤတ့ၢ်နၤလၢညါတဖၣ်. ဒီးနကဘၣ်နာ်သပှၢ်တၢၢ်လၢ ဖဲနလဲၤခီဖျိ တၢ်ကီတၢ်ခဲ တဘျီဂ့ၤတဘျီဂ့ၤအခါ ယဟိဝၤယွၤ ထံၣ်ဝဲ ဒီးအကဟ့ၣ်နၤခိၣ်ဖး. (မး ၅:၁၀-၁၂) ဒီးလၢခံ ဖဲတၢ်နးတၢ်ဖှီၣ်ဖးဒိၣ် အိၣ်ထီၣ်အခါ နကသ့ၣ်ညါလၢ နကဘၣ်လဲၤခီဖျိ တၢ်ကီတၢ်ခဲဒ်လဲၣ် ဒီးနကဆဲးအိၣ်ဒီး တၢ်တူၢ်န့ၢ်ခီၣ်ကဲ.
ပာ်ဖျါထီၣ် တၢ်သးကညီၤ
၉. တၢ်အိၣ်ဖှိၣ်ဖိလၢ ဝ့ၢ်အၣ်တံၤအီာ် လၢကီၢ်စူၤရံန့ၣ် ပာ်ဖျါထီၣ် တၢ်သးကညီၤဒ်လဲၣ်.
၉ ဖဲတၢ်အိၣ်ဖှိၣ်ဖိလၢ ဝ့ၢ်အၣ်တံၤအီာ် လၢကီၢ်စူၤရံ နၢ်ဟူဝဲလၢ ခရံာ်ဖိလၢ ယူဒၤအဟီၣ်ကဝီၤ ထံၣ်ဘၣ်ဒီး တၢ်သၣ်ဝံၤလီၤဒိဖးဒိၣ်အခါ အဝဲသ့ၣ်သးကညီၤဘၣ် ဒီပုၢ်ဝဲၢ်ဖဲန့ၣ်တဖၣ် သပှၢ်တၢၢ်. အဃိ အဝဲသ့ၣ် “ပာ်လီၤအသးလၢ ဒ်အဝဲသ့ၣ် တဂၤစုာ်စုာ် မၤဝဲန့ၢ်အသိး အဝဲသ့ၣ်ကဆှၢလီၤဝဲ တၢ်မၤစၢၤလၢ ဒီပုၢ်ဝဲၢ်တဖၣ်လၢ အအိၣ်လၢ ယူဒၤအဟီၣ်ကဝီၤ.” (မၤတၢ် ၁၁:၂၇-၃၀) ဒီပုၢ်ဝဲၢ်လၢ အထံၣ်ဘၣ်ဒီး တၢ်သၣ်ဝံၤလီၤဒိန့ၣ် အအိၣ်ယံၤဒီး ဝ့ၢ်အၣ်တံၤအီာ် ဖးယံၤနာ်က့ ဒီပုၢ်ဝဲၢ်လၢ ဝ့ၢ်အၣ်တံၤအီာ်န့ၣ် ပာ်လီၤသးလၢ ကမၤစၢၤအဝဲသ့ၣ်.—၁ ယိၤ ၃:၁၇, ၁၈.
၁၀. ဖဲပဒီပုၢ်ဝဲၢ်မုၣ်ခွါတဖၣ် ထံၣ်ဘၣ်ဒီး န့ဆၢၣ်တၢ်ဘၣ်ဒိဘၣ်ထံးအခါ ပပာ်ဖျါထီၣ် တၢ်သးကညီၤ ကသ့ဒ်လဲၣ်. (ကွၢ်စ့ၢ်ကီးတၢ်ဂီၤ.)
၁၀ ဆၢကတီၢ်ခဲအံၤစ့ၢ်ကီး ဖဲပနၢ်ဟူဘၣ် ပဒီပုၢ်ဝဲၢ်မုၣ်ခွါတဖၣ် ထံၣ်ဘၣ်ဒီး န့ဆၢၣ်တၢ်ဘၣ်ဒိဘၣ်ထံးအခါ ပပာ်ဖျါထီၣ် တၢ်သးကညီၤသ့. ပဘၣ်သးမၤစၢၤ အဝဲသ့ၣ် တဘျီဃီအဃိ ပတဲဘၣ်တၢ်အိၣ်ဖှိၣ်သးပှၢ်လၢ ပဘၣ်သးလဲၤမၤစၢၤတၢ်လၢ န့ဆၢၣ်တၢ်ဘၣ်ဒိဘၣ်ထံး ကဲထီၣ်အလီၢ်. မ့တမ့ၢ် ပဟ့ၣ်လီၤတၢ်မၤဘူၣ်လၢ ဟီၣ်ခိၣ်ဒီဘ့ၣ် ဒီးပဃ့ထုကဖၣ်လၢ ပဒီပုၢ်ဝဲၢ်မုၣ်ခွါလၢ အထံၣ်ဘၣ်ဒီး န့ဆၢၣ်တၢ်ဘၣ်ဒိဘၣ်ထံးအဂီၢ်. b (ကတိၤ ၁၇:၁၇) အဒိဖဲ ၂၀၂၀ န့ၣ် န့ဆၢၣ်အတၢ်ဘၣ်ဒိဘၣ်ထံး ကမံးတံာ် လၢဟီၣ်ခိၣ်ဒီဘ့ၣ်န့ၣ် အိၣ်ဝဲ ၉၅၀ ဘျဲၣ်လၢကမၤစၢၤဝဲ ဒီပုၢ်ဝဲၢ်မုၣ်ခွါလၢ အထံၣ်ဘၣ် တၢ်ကီတၢ်ခဲ ဖဲခိၤရိၤနၤတၢ်ဆါ ရၤလီၤသးအခါ. ဒီပုၢ်ဝဲၢ်မုၣ်ခွါတဖၣ်လၢ အလဲၤမၤစၢၤတၢ်လၢ န့ဆၢၣ်တၢ်ဘၣ်ဒိဘၣ်ထံး ကမံးတံာ်အကျါန့ၣ် အဝဲသ့ၣ်ပာ်ဖျါထီၣ် တၢ်သးကညီၤအဃိ ပစံးဘျုးအဝဲသ့ၣ်ဒိၣ်မး. အဝဲသ့ၣ် မၤစၢၤဒီပုၢ်ဝဲၢ်မုၣ်ခွါ အတၢ်လိၣ်ဘၣ်လၢ နီၢ်ခိတကပၤ ဒီးမၤစၢၤဒီပုၢ်ဝဲၢ်မုၣ်ခွါလၢ ကဆဲးမၤ ယဟိဝၤယွၤအတၢ်မၤအဂီၢ်. တကးဒံးဘၣ် လၢတၢ်လီၢ်တနီၤနီၤန့ၣ် အဝဲသ့ၣ် တ့ထီၣ်န့ၢ်က့ၤ မ့တမ့ၢ် ဘှီဂ့ၤထီၣ်က့ၤ ဒီပုၢ်ဝဲၢ်မုၣ်ခွါအဟံၣ် ဒီးတၢ်အိၣ်ဖှိၣ်လီၢ်.—ထိၣ်သတြီၤဒီး ၂ ကရံၣ်သူး ၈:၁-၄.
၁၁. ပမ့ၢ်ပာ်ဖျါထီၣ် တၢ်သးကညီၤလၢ ပှၤဂၤအဖီခိၣ်န့ၣ် ပမၤလၤကပီၤ ယဟိဝၤယွၤဒ်လဲၣ်.
၁၁ ဖဲန့ဆၢၣ်တၢ်ဘၣ်ဒိဘၣ်ထံး အိၣ်ထီၣ်အခါ ပပာ်ဖျါထီၣ် တၢ်သးကညီၤလၢ ပဒီပုၢ်ဝဲၢ်မုၣ်ခွါ အဖီခိၣ်အဃိ ပှၤဂၤတဖၣ်ထံၣ်ဝဲ တၢ်လၢပမၤ. အဒိဖဲ ၂၀၁၉ န့ၣ်ကလံၤမုၢ်ဖးဒိၣ် ဒိၤရ့ လီၤဘၣ်လၢ ဘဟါမါ အဃိ ဘီမုၢ်ဘျီၣ်ဒိၣ် ဟးဂီၤကွံာ်ဝဲတဖျၢၣ်. ဖဲဒီပုၢ်ဝဲၢ်တဖၣ် တ့ထီၣ်က့ၤ ဘီမုၢ်ဘျီၣ်ဒိၣ်အခါ အဝဲသ့ၣ်သံကွၢ် ပှၤလၢအတ့ထီၣ်ဘှီထီၣ်တၢ် လၢအတကဲ ယဟိဝၤပှၤအုၣ်အသးဘၣ်တဂၤလၢ ဒ်သိး ဘီမုၢ်ဘျီၣ်ဒိၣ်တဖျၢၣ် ကကဲထီၣ်အဂီၢ် တၢ်လၢာ်ဘူၣ်လၢာ်စ့ၤ ကလၢာ်ထဲလဲၣ်. ပှၤတဂၤန့ၣ် တဲက့ၤအဝဲသ့ၣ်လၢ “ယဘၣ်သး ဒုးသူကလီသုလၢ . . . တၢ်ပီးတၢ်လီ ဒီးတၢ်ဖိတၢ်လံၤလၢ သုလိၣ်ဘၣ်တဖၣ် . . . လၢသုတၢ်ကရၢကရိအဂီၢ်. ယထံၣ်လၢ သုအဲၣ်သုသကိးဒိၣ်မးအဃိ ဘၣ်ယသးမုာ်ညါ.” ပှၤအါတက့ၢ်န့ၣ် တသ့ၣ်ညါ ယဟိဝၤယွၤဘၣ်. သနာ်က့ အဝဲသ့ၣ်အါတက့ၢ်န့ၣ် ထံၣ်ဘၣ်ဝဲတၢ်လၢ ယဟိဝၤပှၤအုၣ်အသးတဖၣ် မၤဝဲ. ပထံၣ်ဘၣ်လၢ ပမ့ၢ်ပာ်ဖျါထီၣ် တၢ်သးကညီၤလၢ ပှၤဂၤအဖီခိၣ်န့ၣ် အဝဲသ့ၣ်ကဘၣ်သး သ့ၣ်ညါအါထီၣ် ယဟိဝၤယွၤ လၢအကဲပှၤလၢအ “အိၣ်ဒီးတၢ်သးကညီၤအါမး” အဃိ ပသးခုဒိၣ်မး—အ့း ၂:၄.
၁၂. ပမ့ၢ်ပာ်ဖျါထီၣ် တၢ်သးကညီၤလၢ ဆၢကတီၢ်ခဲအံၤန့ၣ် ကမၤစၢၤပှၤလၢ တၢ်နးတၢ်ဖှီၣ်ဖးဒိၣ်အခါ ဒ်လဲၣ်. (လီၣ်ဖျါ ၁၃:၁၆, ၁၇)
၁၂ ဖဲတၢ်နးတၢ်ဖှီၣ်ဖးဒိၣ် အဆၢကတီၢ်န့ၣ် ဘၣ်မနုၤအဃိ ပကဘၣ်ပာ်ဖျါထီၣ် တၢ်သးကညီၤလဲၣ်. လံာ်စီဆှံတဲဝဲလၢ ပှၤလၢအတဆီၣ်ထွဲ ဟီၣ်ခိၣ်ပဒိၣ်ပပှၢ်တဖၣ်န့ၣ် အဝဲသ့ၣ် ကထံၣ်ဘၣ် တၢ်ကီတၢ်ခဲ လၢခဲအံၤ ဒီးလၢတၢ်နးတၢ်ဖှီၣ်ဖးဒိၣ် အဆၢကတီၢ်. (ဖး လီၣ်ဖျါ ၁၃:၁၆, ၁၇.) ဘၣ်သ့ၣ်သ့ၣ် ပဒီပုၢ်ဝဲၢ်မုၣ်ခွါတဖၣ် ကလိၣ်ဘၣ်ပတၢ်မၤစၢၤ ဒ်သိးအဝဲသ့ၣ်ကလဲၤခီဖျိ တၢ်ကီတၢ်ခဲအဂီၢ်. ဖဲပစီၤပၤ ယ့ၣ်ၡူးခရံာ် ဟဲစံၣ်ညီၣ်တၢ်အခါ ပဘၣ်သးလၢ အထံၣ်ဝဲလၢ ပပာ်ဖျါထီၣ် တၢ်သးကညီၤပှၤဂၤ ဒီးကတဲပှၤလၢ “ဟဲန့ၢ်သါဘၣ် ဘီမုၢ်.”—မး ၂၅:၃၄-၄၀.
မၤဒိၣ်ထီၣ်အါထီၣ် နတၢ်အဲၣ်
၁၃. ရိမ့ၤ ၁၅:၇ ပာ်ဖျါထီၣ်ဝဲလၢ ခရံာ်ဖိလၢညါတဖၣ် မၤဒိၣ်ထီၣ်အါထီၣ် တၢ်အဲၣ်လိာ်သး တဂၤဒီးတဂၤဒ်လဲၣ်.
၁၃ ပှၤကိးဂၤဒဲး သ့ၣ်ညါဝဲလၢ ခရံာ်ဖိလၢညါတဖၣ်န့ၣ် အဝဲသ့ၣ်အဲၣ်လိာ်သး. ဘၣ်ဆၣ် အဝဲသ့ၣ် ကပာ်ဖျါထီၣ် တၢ်အဲၣ်လိာ်သးန့ၣ် ညီဝဲဧါ. အဒိ လၢတၢ်အိၣ်ဖှိၣ် လၢဝ့ၢ်ရိမ့ၤန့ၣ် ဒီပုၢ်ဝဲၢ်မုၣ်ခွါတနီၤ ကဲဝဲပှၤယူဒၤဖိလၢ အမၤထွဲ စီၤမိၤၡ့အတၢ်သိၣ်တၢ်သီ ဒီးတနီၤန့ၣ် ကဲဝဲ ပှၤကလုာ်အဂၤတဖၣ် လၢအအိၣ်ဒီး လုၢ်လၢ်လၢအလီၤဆီ. ဘၣ်သ့ၣ်သ့ၣ် အဝဲသ့ၣ်တနီၤန့ၣ် ကဲကုၢ် ဒီးတနီၤန့ၣ် ကဲပှၤမုၢ်ဆ့ၣ်မုၢ်ဂီၤဖိ ဒီးအဂၤတနီၤန့ၣ် ကဲဝဲကုၢ်ကစၢ်. ခရံာ်ဖိတဖၣ်အံၤ လီၤဆီလိာ်သးနာ်က့ အဝဲသ့ၣ်မၤဒိၣ်ထီၣ်အါထီၣ် တၢ်အဲၣ်လိာ်သး တဂၤဒီးတဂၤဒ်လဲၣ်. တၢ်မၢဖိပီလူး ဟ့ၣ်ဂံၢ်ဟ့ၣ်ဘါ အဝဲသ့ၣ်လၢ ကဘၣ် “တူၢ်လိာ်လိာ်သး တဂၤဒီးတဂၤ.” (ဖး ရိမ့ၤ ၁၅:၇.) စီၤပီလူး ဘၣ်သးတဲဝဲ ဒ်လဲၣ်. တၢ်ကတိၤ “တူၢ်လိာ်” အခီပညီန့ၣ် တူၢ်လိာ်ပှၤတဂၤဂ့ၤဂ့ၤ, သးအိၣ်တူၢ်လိာ်ခီၣ်ဆၢ ပှၤဂၤ, ကွဲမုာ်ပှၤဂၤလၢနဟံၣ် မ့တမ့ၢ် ရ့ဒီးပှၤဂၤလၢ နသကိးတဖၣ်အကျါ. အဒိ စီၤဖံၤလ့မိၣ် အကုၢ်စီၤအီးန့ၤစံမူး ဟးသဒၣ်ကွံာ်အီၤ သနာ်က့ စီၤပီလူးတဲဘၣ် စီၤဖံၤလ့မိၣ်လၢ “တူၢ်လိာ်က့ၤအီၤလၢ တၢ်အဲၣ်တၢ်ကွံအပူၤ.” (ဖံၤ ၁၇) စီၤအပီးလိၤန့ၣ် အတသ့ၣ်ညါ ခရံာ်ဖိအတၢ်စူၢ်တၢ်နာ် လီၤတံၢ်လီၤဆဲးဘၣ် အဃိ နီၢ်ပြံစကံးလၤ ဒီးစီၤအကူလၤ “က့ၤကိးအီၤ” ဒီးမၤစၢၤအီၤ. (မၤတၢ် ၁၈:၂၆) ခရံာ်ဖိတဖၣ်အံၤ အဝဲသ့ၣ် တၢ်အိၣ်သး တဒ်သိးလိာ်သးဘၣ် နာ်က့ အဝဲသ့ၣ် ရ့လိာ်သးဂ့ၤဂ့ၤ ဒီးအိၣ်ဃူအိၣ်ဖိး.
၁၄. ဒီပုၢ်ဝဲၢ်မုၣ်အဲနၤဒီးအဝၤန့ၣ် ပာ်ဖျါထီၣ်တၢ်အဲၣ်ဒ်လဲၣ်.
၁၄ ပပာ်ဖျါထီၣ်လၢ ပအဲၣ်ပဒီပုၢ်ဝဲၢ်မုၣ်ခွါတဖၣ် ခီဖျိ ပရ့လိာ်သးဒီးအဝဲသ့ၣ် ဒီးကဲထီၣ်အသကိး. ပမ့ၢ်မၤဒ်န့ၣ်န့ၣ် အဝဲသ့ၣ်နာ်က့ ကပာ်ဖျါထီၣ်က့ၤ တၢ်အဲၣ်လၢပဖီခိၣ်စ့ၢ်ကီး. (၂ ကရံၣ် ၆:၁၁-၁၃) ပကတဲသကိး ဒီပုၢ်ဝဲၢ်မုၣ်အဲနၤဒီးအဝၤ အတၢ်လဲၤခီဖျိ. အဝဲသ့ၣ်လီၤဘၣ် မံၤၡၢၤနရံၤလၢ အၤဖြံၤကၤ မုၢ်နုာ်တခီ. အဝဲသ့ၣ်လဲၤတုၤဖဲန့ၣ် တယံာ်ဘၣ်ဘျီ ခိၤရိၤနၤတၢ်ဆါ ရၤလီၤအသး. ခီဖျိလၢအဝဲသ့ၣ် လဲၤတုၤသီသီဒံးလီၤအဃိ အဝဲသ့ၣ်တထံၣ်လိာ်သးဒီး ဒီပုၢ်ဝဲၢ်မုၣ်ခွါလၢ အနီၢ်ကစၢ်ဘၣ်. အဃိ အဝဲသ့ၣ် ပာ်ဖျါထီၣ် တၢ်အဲၣ်ဒီပုၢ်ဝဲၢ်မုၣ်ခွါ ကသ့ဒ်လဲၣ်. အဝဲသ့ၣ် တဲသကိးတၢ်ဒီး ဒီပုၢ်ဝဲၢ်မုၣ်ခွါလၢ တၢ်ဂီၤမူပူၤ ဒီးတဲဘၣ်အဝဲသ့ၣ်လၢ အဘၣ်သး သ့ၣ်ညါအါထီၣ်အဝဲသ့ၣ်. ဒီပုၢ်ဝဲၢ်မုၣ်ခွါတဖၣ် ပာ်လုၢ်ပာ်ပှ့ၤ တၢ်အဲၣ်လၢ ဒီပုၢ်ဝဲၢ်မုၣ်အဲနၤဒီးအဝၤ ပာ်ဖျါထီၣ်ဝဲအဃိ အဝဲသ့ၣ် ဆှၢန့ၢ်လံာ် လၢလီတဲစိ ဒီးကိးဆိ ဒီပုၢ်ဝဲၢ်မုၣ်အဲနၤဒီးအဝၤ မၢ်မၢ်. ဘၣ်မနုၤအဃိ ဒီပုၢ်ဝဲၢ်မုၣ်အဲနၤဒီးအဝၤ ကျဲးစၢးဃုသ့ၣ်ညါအါထီၣ် ဒီပုၢ်ဝဲၢ်မုၣ်ခွါလၢ တၢ်အိၣ်ဖှိၣ်အပူၤလဲၣ်. ဒီပုၢ်ဝဲၢ်မုၣ်အဲနၤ တဲဝဲလၢ “လၢညါ ဖဲပတၢ်အိၣ်သး ဂ့ၤမ့ၢ်ဂ့ၤ တဂ့ၤဘၣ်မ့ၢ်ဂ့ၤ ဒီပုၢ်ဝဲၢ်မုၣ်ခွါတဖၣ် ပာ်ဖျါထီၣ်တၢ်အဲၣ်လၢ ယၤဒီးယဟံၣ်ဖိဃီဖိ အဖီခိၣ်န့ၣ် ယတသးပ့ၤနီၣ် နီတဘျီဘၣ်. အဝဲသ့ၣ် အဒိအတဲာ်န့ၣ် မၤစၢၤယၤလၢ ယကပာ်ဖျါထီၣ် တၢ်အဲၣ်ပှၤဂၤ.”
၁၅. ဒီပုၢ်ဝဲၢ်မုၣ်ဘၢၤနဲစၤ အဲၣ်ဒီပုၢ်ဝဲၢ်မုၣ်ခွါ ခဲလၢာ်အဃိ ပမၤလိန့ၢ်ဘၣ်တၢ်လၢ အအိၣ်ဒ်လဲၣ်. (ကွၢ်စ့ၢ်ကီးတၢ်ဂီၤ.)
၁၅ လၢတၢ်အိၣ်ဖှိၣ်ပူၤန့ၣ် ပထံၣ်ဘၣ် ဒီပုၢ်ဝဲၢ်မုၣ်ခွါတဖၣ် ဒိၣ်ထီၣ်လၢ တၢ်လီၢ်လီၤဆီလိာ်သး ဒီးအဝဲသ့ၣ်တၢ်ပာ်သူၣ်ပာ်သး စ့ၢ်ကီး လီၤဆီလိာ်သး. ပမ့ၢ်သးစၢၢ်ဆၢအဝဲသ့ၣ် အတၢ်ဂ့ၤတၢ်ဝါန့ၣ် ပအဲၣ်အဝဲသ့ၣ်ကဒိၣ်ထီၣ်. ဒီပုၢ်ဝဲၢ်မုၣ်ဘၢၤနဲစၤ လၢအအိၣ်လၢ နယူစံလဲၣ်န့ၣ် တဲဝဲလၢ အကရ့ဒီးဒီပုၢ်ဝဲၢ်မုၣ်ခွါတနီၤ လၢတၢ်အိၣ်ဖှိၣ်ပူၤန့ၣ် ကီလၢအဂီၢ်ဒိၣ်မး. ဘၣ်ဆၣ် အဝဲဆဲးရ့ဒီး ဒီပုၢ်ဝဲၢ်မုၣ်ခွါတဖၣ်အံၤ ဒီးတဟးဆှဲးအဝဲသ့ၣ်ဘၣ်. ဒီးဘၣ်မနုၤအဃိ ယဟိဝၤယွၤ အဲၣ်အဝဲသ့ၣ်ဒိၣ်မးလဲၣ်န့ၣ် ဖဲအရ့ဘၣ်ဒီး ဒီပုၢ်ဝဲၢ်မုၣ်ခွါတဖၣ်အံၤအခါ အသ့ၣ်ညါထီၣ်ဝဲ. ဒီပုၢ်ဝဲၢ်မုၣ်အံၤ တဲဝဲလၢ “လၢခံန့ၣ် ယဝၤကဲထီၣ် ကဝီၤအပှၤကွၢ်တၢ် ဒီးပဘၣ်ရ့ဒီး ဒီပုၢ်ဝဲၢ်မုၣ်ခွါတဖၣ်လၢ အတၢ်ပာ်သး အိၣ်အကလုာ်ကလုာ် ဘၣ်ဆၣ် လၢယဂီၢ်န့ၣ် တကီတခဲလၢၤဘၣ်. အဃိ အခဲအံၤ ယရ့ဘၣ်ဒီး ဒီပုၢ်ဝဲၢ်မုၣ်ခွါလၢ အတၢ်ပာ်သူၣ်ပာ်သးအိၣ် အကလုာ်ကလုာ်ဒ်အံၤအဃိ ယရ့ဒီးအဝဲသ့ၣ်မုာ်မး. ယဟိဝၤယွၤ အဲၣ်ဒီပုၢ်ဝဲၢ်မုၣ်ခွါတဖၣ်အံၤအဃိ ယဟိဝၤယွၤ မူၤဃီၤအဝဲသ့ၣ် လၢအအိၣ်.” ပမ့ၢ်ထံၣ်ပဒီပုၢ်ဝဲၢ်မုၣ်ခွါ ဒ်ယဟိဝၤယွၤ ထံၣ်ဝဲအသိးန့ၣ် ပဝဲစ့ၢ်ကီး ပကအဲၣ်အဝဲသ့ၣ်.—၂ ကရံၣ် ၈:၂၄.
၁၆. ဖဲတၢ်နးတၢ်ဖှီၣ်ဖးဒိၣ် အဆၢကတီၢ်န့ၣ် ဘၣ်မနုၤအဃိ အရ့ဒိၣ်လၢ ပကဘၣ်အဲၣ် ပဒီပုၢ်ဝဲၢ်မုၣ်ခွါတဖၣ်လဲၣ်. (ကွၢ်စ့ၢ်ကီးတၢ်ဂီၤ.)
၁၆ ဖဲတၢ်နးတၢ်ဖှီၣ်ဖးဒိၣ် အဆၢကတီၢ် ပကဘၣ်အိၣ်ဒီးတၢ်အဲၣ်န့ၣ် မ့ၢ်တၢ်လၢ အရ့ဒိၣ် ဒိၣ်မး. ဖဲတၢ်နးတၢ်ဖှီၣ်ဖးဒိၣ် စးထီၣ်အခါ ယဟိဝၤယွၤ ကဒီသဒၢပှၤ. အဒိ ဖဲဘၤဘူၤလိၣ်အသုးမုၢ် ဟဲထီၣ်ဒုးတၢ်အခါ ယဟိဝၤယွၤ တဲဘၣ်အပှၤဂီၢ်မုၢ်လၢ “ယပှၤဂီၢ်မုၢ်သ့ၣ်ဧၢ, လဲၤနုာ်လီၤလၢ သုဒၢးဖိတဖၣ်အပူၤ ဒီးကးပံးသုတြဲၤတက့ၢ်. အိၣ်ခူသူၣ် တစိၢ်ဖိ တုၤလၢ တၢ်သးဒိၣ်ထီၣ် လဲၤတလၢကွံာ်တက့ၢ်.” (ၡါ ၂၆:၂၀) ဘၣ်သ့ၣ်သ့ၣ် ဖဲတၢ်နးတၢ်ဖှီၣ်ဖးဒိၣ် အဆၢကတီၢ်န့ၣ် ပကဘၣ်မၤထွဲ တၢ်ဟံးစုနဲၣ်ကျဲဒ်အံၤ. တၢ်ကတိၤလၢ “ဒၢးဖိတဖၣ်အပူၤ” န့ၣ်ဘၣ်သ့ၣ်သ့ၣ် အဲၣ်ဒိးတဲဝဲ ပတၢ်အိၣ်ဖှိၣ်တဖၣ်. ဒီးဖဲတၢ်နးတၢ်ဖှီၣ်ဖးဒိၣ် အဆၢကတီၢ် ပမ့ၢ်ဆဲးအိၣ်ဃူအိၣ်ဖိးဒီး ပဒီပုၢ်ဝဲၢ်မုၣ်ခွါန့ၣ် ယဟိဝၤယွၤ အၢၣ်လီၤလၢ အကဒီသဒၢပှၤ. အဃိ ဒ်သိးပကပူၤဖျဲးအဂီၢ် ခဲအံၤန့ၣ် ပကဘၣ်ကျဲးစၢးမၤအါထီၣ် ပတၢ်အဲၣ်ဒီပုၢ်ဝဲၢ်မုၣ်ခွါ ဒီးနၢ်ပၢၢ်စၢၤအဝဲသ့ၣ်.
အိၣ်ကတီၤပာ်စၢၤသးလၢ အခဲအံၤ
၁၇. ပမ့ၢ်အိၣ်ကတီၤပာ်စၢၤသးလၢ အခဲအံၤန့ၣ် ကမၤစၢၤပှၤ ဖဲတၢ်နးတၢ်ဖှီၣ်ဖးဒိၣ် အဆၢကတီၢ်ဒ်လဲၣ်.
၁၇ ဖဲ “ယဟိဝၤယွၤ အမုၢ်နံၤဖးဒိၣ်” ဟဲဝဲအခါ ပှၤဟီၣ်ခိၣ်ဖိခဲလၢာ် ကထံၣ်ဘၣ် တၢ်ကီတၢ်ခဲဖးဒိၣ်. (ဖါ ၁:၁၄, ၁၅) ယဟိဝၤယွၤ အပှၤဂီၢ်မုၢ်စ့ၢ်ကီး ကထံၣ်ဘၣ်တၢ်ကီတၢ်ခဲ. ဘၣ်ဆၣ် ပမ့ၢ်အိၣ်ကတီၤပာ်စၢၤသးလၢ အခဲအံၤန့ၣ် ပကပာ်ပသးမုာ်မုာ် ဒီးပမၤစၢၤပှၤဂၤကသ့. ပမ့ၢ်ထံၣ်ဘၣ်ဒီး တၢ်ကီတၢ်ခဲ ဒ်လဲၣ်ဂ့ၤဒ်လဲၣ်ဂ့ၤ ပကအိၣ်ဒီး တၢ်တူၢ်န့ၢ်ခီၣ်ကဲ. ဖဲပဒီပုၢ်ဝဲၢ်မုၣ်ခွါတဖၣ် ထံၣ်ဘၣ် တၢ်ကီတၢ်ခဲအခါ ပကမၤစၢၤအဝဲသ့ၣ် ခီဖျိပပာ်ဖျါထီၣ် တၢ်သးကညီၤ ဒီးဟ့ၣ်လီၤမၤစၢၤ တၢ်လၢအဝဲသ့ၣ်လိၣ်ဘၣ်တဖၣ်. ဒီးဆၢကတီၢ်ခဲအံၤ ပမ့ၢ်အဲၣ်ပဒီပုၢ်ဝဲၢ်မုၣ်ခွါတဖၣ်န့ၣ် လၢခါဆူညါစ့ၢ်ကီး ပကအဲၣ် ပဒီပုၢ်ဝဲၢ်မုၣ်ခွါတဖၣ် ဒိၣ်ထီၣ်. ယဟိဝၤယွၤ ကဟ့ၣ်ပှၤတၢ်မူလီၤထူလီၤယိာ် လၢဟီၣ်ခိၣ်သီအပူၤ ဒီးဖဲန့ၣ် တၢ်ကီတၢ်ခဲ ဒီးတၢ်နးတၢ်ဖှီၣ် တအိၣ်ဘၣ်.—ၡါ ၆၅:၁၇.
တၢ်သးဝံၣ် ၁၄၄ ကွၢ်ဆူခိၣ်ဖးထီဘိ
a တယံာ်ဘၣ်န့ၣ် တၢ်နးတၢ်ဖှီၣ်ဖးဒိၣ် ကစးထီၣ်အသး. ဖဲန့ၣ်အခါ ပှၤဟီၣ်ခိၣ်ဖိ ကထံၣ်ဘၣ် တၢ်ကီတၢ်ခဲဖးဒိၣ်လၢ ပှၤတလဲၤခီဖျိဘၣ် နီတဘျီဘၣ်. အဃိဒ်သိး ပလဲၤခီဖျိတၢ်ကန့ၢ်အဂီၢ် ပကဘၣ်အိၣ်ဒီး တၢ်တူၢ်န့ၢ်ခီၣ်ကဲ, တၢ်သးကညီၤ ဒီးတၢ်အဲၣ်. ပကတဲသကိး ခရံာ်ဖိလၢညါတဖၣ် ပာ်ဖျါထီၣ် တၢ်ဂ့ၤတၢ်ဝါတဖၣ်အံၤဒ်လဲၣ်. ဆၢကတီၢ်ခဲအံၤ ပပာ်ဖျါထီၣ် တၢ်ဂ့ၤတၢ်ဝါတဖၣ်အံၤ ကသ့ဒ်လဲၣ် ဒီးအမၤစၢၤပှၤလၢ ပကအိၣ်ကတီၤပာ်စၢၤသးလၢ တၢ်နးတၢ်ဖှီၣ်ဖးဒိၣ် ကသ့ဒ်လဲၣ်.
b ဒီပုၢ်ဝဲၢ်လၢ အဘၣ်သးလဲၤမၤစၢၤတၢ်လၢ န့ဆၢၣ်တၢ်ဘၣ်ဒိဘၣ်ထံးကဲထီၣ်အလီၢ်န့ၣ် အဝဲသ့ၣ် ကဘၣ်မၤပှဲၤဆိ လံာ်လၢ ပှၤကလဲၤမၤစၢၤ လီၢ်ကဝီၤတၢ်သူၣ်ထီၣ်ဘှီထီၣ်တၢ်မၤ (DC-50) မ့တမ့ၢ် လံာ်ပတံထီၣ်လၢ မုာ်သးမၤကလီ တၢ်မၤအဂီၢ် (A-19) ဝံၤဒီးအဝဲသ့ၣ် ကဘၣ်အိၣ်ခိးလၢ ပှၤကဒုးသ့ၣ်ညါက့ၤအဝဲသ့ၣ်.