တၢ်မၤလိ ၃၁
“အိၣ်ဂၢၢ်ဆိးကျၢၤ ဒီးတဘၣ် ဒံဝ့ၤဒံဝီၤတဂ့ၤ”
“ယဒီပုၢ်ဝဲၢ်သးဘိသ့ၣ်ဧၢ, . . . အိၣ်ဂၢၢ်ဆိးကျၢၤ ဒီးတဘၣ် ဒံဝ့ၤဒံဝီၤတဂ့ၤ.” —၁ ကရံၣ် ၁၅:၅၈.
တၢ်သးဝံၣ် ၁၂၂ အိၣ်ဂၢၢ်အိၣ်ကျၢၤ, ဒံဝ့ၤဒံဝီၤတဂ့ၤ
တၢ်မၤလိအံၤ အတၢ်တိာ်ပာ် a
၁-၂. ခရံာ်ဖိတဖၣ် လီၤဂာ်ဒီး တၢးဖးထီတဖျၢၣ် ဒ်လဲၣ်. (၁ ကရံၣ်သူး ၁၅:၅၈)
ဖဲ ၁၉၇၈ လၢဝ့ၢ်ထိခံးယိၤ, ကီၢ်ယပၣ်န့ၣ် ပှၤတ့ထီၣ်တၢးဖးထီတဖျၢၣ် လၢအအိၣ်အကထြၢ ၆၀. ပှၤအါတက့ၢ် ဆိမိၣ်ဝဲလၢ ဝ့ၢ်တဖျၢၣ်န့ၣ် ဟီၣ်ခိၣ်ဟူးမၢ်မၢ်အဃိ တၢးတဖျၢၣ်အံၤ ကကျၢၤဒ်လဲၣ်. ဒ်သိးတၢးတဖျၢၣ်အံၤ ကကျၢၤအဂီၢ် ပှၤတ့ထီၣ်ဝဲဒ်လဲၣ်. တၢးတဖျၢၣ်အံၤ ပှၤတ့ထီၣ်ဝဲ ကျၢၤကျၢၤဘၣ်ဆၣ် တတ့ဝဲဆှိၣ်တလၢ ဒီးတစၢ်တလၢဘၣ်. အဃိ ဟီၣ်ခိၣ်မ့ၢ်ဟူးဖးဒိၣ်နာ်က့ အတလီၤပှီၢ်ဘၣ်. ပဝဲခရံာ်ဖိတဖၣ် ပလီၤဂာ်ဒီး တၢးဖးထီတဖျၢၣ်အံၤဒ်လဲၣ်.
၂ ခရံာ်ဖိတဖၣ် ကဘၣ်အိၣ် ဂၢၢ်ဂၢၢ်ကျၢၤကျၢၤ ဘၣ်ဆၣ် တဘၣ်ကဲ ပှၤလၢအခိၣ်ကိၤဘၣ်. အကဘၣ်ပာ်လီၤသး ဂၢၢ်ဂၢၢ်ကျၢၤကျၢၤလၢ ကဒိကနၣ် ယဟိဝၤယွၤ အတၢ်သိၣ်တၢ်သီထီဘိ. (ဖး ၁ ကရံၣ်သူး ၁၅:၅၈.) အကဘၣ် “အိၣ်ကတဲာ်ကတီၤအသးလၢ ကဒိကနၣ်တၢ်” ဒီးဆဲးတီဒီး ယဟိဝၤယွၤထီဘိ. တကးဒံးဘၣ် အတဘၣ်မ့ၢ် “ပှၤလၢ အခိၣ်ကိၤဘၣ်” ဒီးတၢ်အိၣ်သးမ့ၢ်ဆီတလဲန့ၣ် အကတူၢ်လိာ်ဝဲ ဒီးမၤထွဲဝဲ. (ယၤ ၃:၁၇) ခရံာ်ဖိလၢ အအိၣ်ဒီးတၢ်ပာ်သးဒ်အံၤန့ၣ် အတအိၣ်ဒီးတၢ်ထံၣ် ဃံးတလၢဒီးစၢ်တလၢဘၣ်. လၢတၢ်မၤလိတခါအံၤ ပကသ့ၣ်ညါဘၣ် တၢ်ဂ့ၢ်ယဲၢ်မံၤလၢ မုၣ်ကီၤလံၢ် မၤကီမၤခဲပှၤ ဒ်သိးပတအိၣ် ဂၢၢ်ဂၢၢ်ကျၢၤကျၢၤလၢၤတဂ့ၤအဂီၢ်. ဒီးပကမၤလိဘၣ်လၢ ပကအိၣ် ဂၢၢ်ဂၢၢ်ကျၢၤကျၢၤအဂီၢ် ပကဘၣ်မၤဒ်လဲၣ်.
ပအိၣ်ဂၢၢ်ဆိးကျၢၤ ကသ့ဒ်လဲၣ်
၃. ဖဲမၤတၢ် ၁၅:၂၈, ၂၉ န့ၣ်ယဟိဝၤယွၤ ဟ့ၣ်လီၤပှၤတၢ်သိၣ်တၢ်သီ မနုၤလဲၣ်.
၃ ယဟိဝၤယွၤ အိၣ်ဒီးတၢ်ခွဲးတၢ်ယာ် အါကတၢၢ်လၢ ကဟ့ၣ်လီၤပှၤ တၢ်သိၣ်တၢ်သီ ဒီးအတၢ်သိၣ်တၢ်သီတဖၣ်န့ၣ် ပနၢ်ပၢၢ်ဘၣ်ညီ. (ၡါ ၃၃:၂၂) အဒိ ဖဲတၢ်မၢဖိအစိၤန့ၣ် ပှၤပၢဆှၢတၢ်ကမံးတံာ် ပာ်ဖျါထီၣ် တၢ်သိၣ်တၢ်သီသၢထံၣ်လၢ ခရံာ်ဖိကဘၣ် မၤထွဲဝဲ လီၤတံၢ်လီၤဆဲး. (၁) တဘၣ်မၤဘၣ်ဃးသးဒီး တၢ်ဂီၤတၢ်ဖှီၣ်ဘၣ်, ကဘၣ်ဘူၣ်ထီၣ်ဘါထီၣ်ထဲ ယဟိဝၤယွၤ. (၂) ကဘၣ်ပာ်လုၢ်ပာ်ပှ့ၤတၢ်သွံၣ်. (၃) ကဘၣ်ဟးဆှဲး တၢ်မၤကမၣ်မုၣ်ကမၣ်ခွါ. (ဖး မၤတၢ် ၁၅:၂၈, ၂၉.) ခရံာ်ဖိလၢ ဆၢကတီၢ်ခဲအံၤစ့ၢ်ကီး ဆဲးမၤထွဲ ယဟိဝၤယွၤ အတၢ်သိၣ်တၢ်သီ သၢထံၣ်အံၤ လီၤတံၢ်လီၤဆဲး ကသ့ဒ်လဲၣ်.
၄. ပဘူၣ်ထီၣ်ဘါထီၣ်ထဲ ယဟိဝၤယွၤတဂၤန့ၣ် ပပာ်ဖျါထီၣ်ဒ်လဲၣ်. (လီၣ်ဖျါ ၄:၁၁)
၄ ပတမၤဘၣ်ဃးသးဒီး တၢ်ဂီၤတၢ်ဖှီၣ်ဘၣ်, ပဘူၣ်ထီၣ်ဘါထီၣ်ထဲ ယဟိဝၤယွၤ. ယဟိဝၤယွၤ မၤလိာ် ပှၤအံၣ်စရ့လးဖိတဖၣ် လၢအဝဲသ့ၣ် ကဘၣ်ဘူၣ်ထီၣ်ဘါထီၣ် ထဲအီၤတဂၤ. (၅ မိၤ ၅:၆-၁၀) ဖဲမုၣ်ကီၤလံၢ် လ့ပစီယ့ၣ်ၡူးအခါ ယ့ၣ်ၡူးတဲဝဲလၢ ပကဘၣ်ဘူၣ်ထီၣ်ဘါထီၣ် ထဲယဟိဝၤယွၤတဂၤလီၤ. (မး ၄:၈-၁၀) အဃိ ပတဘၣ်ဘါထီၣ် တၢ်ဂီၤတၢ်ဖှီၣ်ဘၣ်. အဒိ ပှၤဟီၣ်ခိၣ်ဖိလၢအကဲ တၢ်ဘူၣ်တၢ်ဘါခိၣ်နၢ်, ထံကီၢ်ခိၣ်နၢ်, ပှၤလိာ်ကွဲဖိ လၢအမံၤဒိၣ်, မုၣ်ဂဲၤဒိခွါဂဲၤဒိ ဒီးပှၤသးဝံၣ်တၢ်ဖိလၢ အမံၤဒိၣ်တဖၣ်န့ၣ် ပတဘၣ်ပာ်ဒိၣ်ပာ်ကဲအဝဲသ့ၣ် ဒ်သိးဒီး ယွၤတဂၤဘၣ်. ပဘၣ်အိၣ်လၢ ယဟိဝၤယွၤအအိၣ်တကပၤ ဒီးပဘၣ်ဘူၣ်ထီၣ်ဘါထီၣ်ထဲ ကစၢ်ယွၤတဂၤလၢအ “တ့လီၤတၢ်ခဲလၢာ်.”—ဖး လီၣ်ဖျါ ၄:၁၁.
၅. ဘၣ်မနုၤအဃိ ပမၤထွဲ ယဟိဝၤယွၤ အတၢ်သိၣ်တၢ်သီ ဘၣ်ဃးဒီး တၢ်ပာ်လုၢ်ပာ်ပှ့ၤ သးသမူ ဒီးတၢ်သွံၣ်လဲၣ်.
၅ ပမၤထွဲ ယဟိဝၤယွၤ အတၢ်သိၣ်တၢ်သီ ဘၣ်ဃးဒီး တၢ်ပာ်လုၢ်ပာ်ပှ့ၤ သးသမူ ဒီးတၢ်သွံၣ်. ယဟိဝၤယွၤတဲဝဲလၢ တၢ်သွံၣ်န့ၣ် အကဲတၢ်သးသမူ ဒီးအကဲတၢ်ဟ့ၣ်လုၢ်ဒိၣ်ပှ့ၤဒိၣ်တခါ လၢအဟ့ၣ်လီၤပှၤ. (၃ မိၤ ၁၇:၁၄) ဖဲယဟိဝၤယွၤ ဟ့ၣ်ပှၤဟီၣ်ခိၣ်ဖိအခွဲးလၢ ကအီၣ်တၢ်ဖံးတၢ်ညၣ်အခါ အမၤလိာ် အဝဲသ့ၣ်လၢ တဘၣ်အီၣ် တၢ်သွံၣ်ဘၣ်. (၁ မိၤ ၉:၄) ဖဲယဟိဝၤယွၤ ဟ့ၣ်လီၤပှၤအံၣ်စရ့လးဖိ တၢ်သိၣ်တၢ်သီအခါ အမၤလိာ်စ့ၢ်ကီး အဝဲသ့ၣ်လၢ တဘၣ်အီၣ် တၢ်သွံၣ်ဘၣ်. (၃ မိၤ ၁၇:၁၀) ဒီးဖဲတၢ်မၢဖိအစိၤန့ၣ် ယဟိဝၤယွၤ မၤလိာ် ပှၤပၢဆှၢတၢ်ကမံးတံာ်လၢ ကတဲဘၣ် ခရံာ်ဖိခဲလၢာ်လၢ အဝဲသ့ၣ်ကဘၣ် “ဟးဆှဲး [တၢ်သွံၣ်] ထီဘိ.” (မၤတၢ် ၁၅:၂၈, ၂၉) ဆၢကတီၢ်ခဲအံၤစ့ၢ်ကီး ပမ့ၢ်ဘၣ်ဆၢတဲာ်တၢ် ဘၣ်ဃးဒီး ပတၢ်အိၣ်ဆူၣ်အိၣ်ချ့န့ၣ် ပကဘၣ် မၤထွဲတၢ်မၤလိာ်အံၤ လီၤတံၢ်လီၤဆဲး. b
၆. ဒ်သိး ပကဟးဆှဲး တၢ်မၤကမၣ်မုၣ်ကမၣ်ခွါအဂီၢ် ပကဘၣ်မၤမနုၤလဲၣ်.
၆ ကဘၣ်ဟးဆှဲး တၢ်မၤကမၣ်မုၣ်ကမၣ်ခွါ. (ဧ့ၤ ၁၃:၄) တၢ်မၢဖိပီလူး သူတၢ်ကတိၤလၢ “မၤသံကွံာ်” သုနီၢ်ခိက့ၢ်ဂီၤန့ၣ် အဲၣ်ဒိးတဲဝဲ အခီပညီလၢ ပကဘၣ်ကျဲးစၢး မၤလီၤမၢ်ကွံာ် တၢ်သူၣ်လီသးကွံလၢ အကမၣ်တဖၣ်. ပတဘၣ် ကွၢ်တၢ်တမံၤမံၤ မ့တမ့ၢ် မၤတၢ်တမံၤမံၤလၢ ပကမၤဘၣ် တၢ်မၤကမၣ်မုၣ်ကမၣ်ခွါန့ၣ်ဘၣ်. (ကလီး ၃:၅; ဘး ၃၁:၁) ပမ့ၢ်ထံၣ်ဘၣ်ဒီးတၢ်လ့ပစီလၢ ကမၤဟးဂီၤပတၢ်ရ့လိာ်သးဒီး ယဟိဝၤယွၤ လၢပတၢ်ဆိမိၣ်မ့ၢ်ဂ့ၤ လၢပတၢ်မၤမ့ၢ်ဂ့ၤန့ၣ် ပကဘၣ်ဟးဆှဲးအီၤတဘျီဃီ.
၇. ပကဘၣ်ပာ်လီၤသးလၢ ပကမၤမနုၤလဲၣ် ဒီးဘၣ်မနုၤအဃိလဲၣ်.
၇ ယဟိဝၤယွၤ ဘၣ်သးဝဲလၢ ပက ‘ဒိကနၣ်အီၤလၢ ပသူၣ်ကံၢ်သးလဲ.’ (ရိ ၆:၁၇) တကးဒံးဘၣ် ယဟိဝၤယွၤ အတၢ်ဟံးစုနဲၣ်ကျဲန့ၣ် ဂ့ၤလၢ ပဂီၢ်ထီဘိ ဒီးအတၢ်သိၣ်တၢ်သီန့ၣ် ပဆီတလဲတသ့ဘၣ်. (ၡါ ၄၈:၁၇, ၁၈; ၁ ကရံၣ် ၆:၉, ၁၀) ပကျဲးစၢးမၤ တၢ်ဘၣ်ယဟိဝၤယွၤအသး ဒီးပပာ်ဖျါထီၣ်လၢ ပအိၣ်ဒီးတၢ်ထံၣ် ဒ်သိးဒီး ပှၤကွဲးထါစံးထီၣ်ပတြၢၤ လၢအတဲဝဲလၢ “ယဆၢတဲာ်လီၤယသး ဂၢၢ်ဂၢၢ်ကျၢၤကျၢၤလၢ ယကဒိကနၣ် နတၢ်ဘျၢတဖၣ် တစိၤလၢယသး တုၤလၢအကတၢၢ်.” (စံး ၁၁၉:၁၁၂) သနာ်က့ ဒ်သိးပတမၤထွဲ ယဟိဝၤယွၤ အတၢ်ဘျၢတဂ့ၤအဂီၢ် မုၣ်ကီၤလံၢ် ကကျဲးစၢး မၤကီမၤခဲပှၤ. အကမၤဝဲဒ်လဲၣ်.
မုၣ်ကီၤလံၢ် ကျဲးစၢး မၤကီမၤခဲပှၤဒ်လဲၣ်
၈. ဒ်သိး ပတဆဲးတီဒီး ယဟိဝၤယွၤလၢၤတဂ့ၤအဂီၢ် မုၣ်ကီၤလံၢ် မၤအၢမၤနးပှၤဒ်လဲၣ်.
၈ တၢ်မၤအၢမၤနး. ဒ်သိး ပတဆဲးတီဒီး ယဟိဝၤယွၤလၢၤတဂ့ၤအဂီၢ် မုၣ်ကီၤလံၢ် မၤအၢမၤနးပှၤလၢ နီၢ်ခိတကပၤ ဒီးလၢပသးအတၢ်တူၢ်ဘၣ် တကပၤစ့ၢ်ကီး. မုၣ်ကီၤလံၢ် တိာ်ပာ်ဝဲလၢအ “ကယူၢ်လီၤကွံာ်” ပှၤ ဒီးအဘၣ်သးလၢ ပတၢ်ရ့လိာ်သးဒီး ယဟိဝၤယွၤကဟးဂီၤကွံာ်ဝဲ. (၁ ပ့း ၅:၈) ခရံာ်ဖိလၢ တၢ်မၢဖိအစိၤန့ၣ် အဝဲသ့ၣ်ပာ်လီၤသး ဂၢၢ်ဂၢၢ်ကျၢၤကျၢၤလၢ ကမၤထွဲ ယဟိဝၤယွၤအတၢ်သိၣ်တၢ်သီ အဃိ ပှၤမၤပျံၤမၤဖုး, ပှၤတီၢ် ဒီးမၤသံအဝဲသ့ၣ်. (မၤတၢ် ၅:၂၇, ၂၈, ၄၀; ၇:၅၄-၆၀) ဆၢကတီၢ်ခဲအံၤစ့ၢ်ကီး မုၣ်ကီၤလံၢ် ဆဲးမၤအၢမၤနး ခရံာ်ဖိတဖၣ်ဒံး. အဒိ လၢကီၢ်ရၢၡါ ဒီးထံကီၢ်အဂၤတနီၤန့ၣ် ပှၤထီဒါတၢ်တဖၣ် မၤအၢမၤနး ဒီးမၤဆါဝဲ ပဒီပုၢ်ဝဲၢ်မုၣ်ခွါတဖၣ် အမၠိမၠိ.
၉. ပထံၣ်ဘၣ်ဒီး တၢ်ဆီၣ်သနံး သတူၢ်ကလာ် သ့ဒ်လဲၣ်. ဟ့ၣ်တၢ်အဒိ.
၉ တၢ်ဆီၣ်သနံး သတူၢ်ကလာ်. မုၣ်ကီၤလံၢ်သူ “တၢ်ကူၣ်ထီၣ်ဖးလီၤတဖၣ်” ဒ်သိး ကမၤအၢမၤနးပှၤ. (အ့း ၆:၁၁) အဒိ ဒီပုၢ်ဝဲၢ်ခွါရီဘၢၤန့ၣ် အဘၣ်ထီၣ်တၢ်ဆါဟံၣ် လၢကဖွဲးသးအဂီၢ်. အတဲပာ်စၢၤ ကသံၣ်သရၣ်တဖၣ်လၢ တၢ်မ့ၢ်ကဲထီၣ်သးဒီးအီၤဒ်လဲၣ်နာ်က့ အတသွီတၢ်သွံၣ်ဘၣ်. ကသံၣ်သရၣ် တူၢ်လိာ် အတၢ်ဆၢတဲာ်. ဘၣ်ဆၣ် တချုးဖဲ ဒီပုၢ်ဝဲၢ်ခွါရီဘၢၤ ကဖွဲးသးတနၤန့ၣ် ကသံၣ်သရၣ်လၢအဂၤတဂၤ ဟဲထံၣ်လိာ်သးဒီးအီၤ. ဖဲန့ၣ်အခါ အဟံၣ်ဖိဃီဖိက့ၤလၢဟံၣ်လံ. ကသံၣ်သရၣ်တဂၤအံၤ ဆိမိၣ်ဝဲလၢ အဟံၣ်ဖိဃီဖိ မ့ၢ်တအိၣ်လၢအကပၤဘၣ်န့ၣ် ဘၣ်သ့ၣ်သ့ၣ် အကဆီတလဲအတၢ်ထံၣ်. အဃိကသံၣ်သရၣ်တဂၤအံၤ တဲဘၣ်အီၤလၢ ဘၣ်သ့ၣ်သ့ၣ် နတလိၣ်သွီသွံၣ်ဘၣ် နာ်က့ ပကတဲာ်ကတီၤပာ်စၢၤတၢ်သွံၣ် လၢနဂီၢ်. ဘၣ်ဆၣ် ဒီပုၢ်ဝဲၢ်ခွါရီဘၢၤ ပာ်လီၤသး ဂၢၢ်ဂၢၢ်ကျၢၤကျၢၤ ဒီးတဲဘၣ်အီၤလၢ တၢ်မ့ၢ်ကဲထီၣ်သးဒ်လဲၣ်နာ်က့ အတသွီတၢ်သွံၣ် နီတစဲးဘၣ်.
၁၀. ပှၤဟီၣ်ခိၣ်ဖိ အတၢ်ဆိမိၣ်န့ၣ် ဘၣ်မနုၤအဃိ အလီၤဘၣ်ယိၣ်လဲၣ်. (၁ ကရံၣ်သူး ၃:၁၉, ၂၀)
၁၀ ပှၤဟီၣ်ခိၣ်ဖိ အတၢ်ဆိမိၣ်. ပမ့ၢ်အိၣ်ဒီးတၢ်ထံၣ် ဒ်သိးဒီး ပှၤလၢအတပာ်ကဲ ယဟိဝၤယွၤ အတၢ်သိၣ်တၢ်သီဘၣ်န့ၣ် ပဝဲစ့ၢ်ကီး ပတကနၣ်ယဟိဝၤယွၤ ဒီးအတၢ်သိၣ်တၢ်သီလၢၤဘၣ်. (ဖး ၁ ကရံၣ်သူး ၃:၁၉, ၂၀.) ပှၤလၢအတူၢ်လိာ် “ဟီၣ်ခိၣ်အံၤ အတၢ်ကူၣ်သ့န့ၣ်” ညီနုၢ် အဝဲသ့ၣ် တဒိကနၣ် ယဟိဝၤယွၤ အကလုၢ်လၢၤဘၣ်. အဒိ ခရံာ်ဖိတနီၤလၢ ဝ့ၢ်ပ့ၢ်ကမူး ဒီးဝ့ၢ်သူၤအတံရၤန့ၣ် အိၣ်ဒီးတၢ်ထံၣ် ဒ်သိးဒီး ပှၤလၢအခိၣ်အဃၢၤ လၢအတအိၣ်ဒီး လုၢ်လၢ်လၢအဂ့ၤဘၣ် ဒီးဘူၣ်ထီၣ်ဘါထီၣ် တၢ်ဂီၤတၢ်ဖှီၣ်. ခီဖျိလၢ ခရံာ်ဖိတဖၣ်အံၤ တထံၣ် တၢ်မၤကမၣ်မုၣ်ကမၣ်ခွါ ဒ်တၢ်ကမၣ်အသိးဘၣ်အဃိ ယ့ၣ်ၡူးသိၣ်က့ၤအဝဲသ့ၣ်. (လီၣ် ၂:၁၄, ၂၀) ဆၢကတီၢ်ခဲအံၤ ပှၤလၢပဃၢၤတဖၣ် ကဆီၣ်သနံးပှၤလၢ ပကတူၢ်လိာ် တၢ်ထံၣ်လၢအကမၣ်. ပဟံၣ်ဖိဃီဖိ ဒီးပသကိးတနီၤ ကတဲပှၤလၢ ပှၤန့ၣ်ပဃံးတလၢ ဒီးပတလိၣ်မၤထွဲ ယဟိဝၤယွၤ အတၢ်သိၣ်တၢ်သီဘၣ်. အဝဲသ့ၣ် ကတဲပှၤလၢ လံာ်စီဆှံ အတၢ်ဘျၢန့ၣ် တကဲဘျုးလၢ ဆၢကတီၢ်ခဲအံၤလၢၤဘၣ်အဃိ ပမ့ၢ်မၤဒ် ပနီၢ်ကစၢ် တၢ်ဘၣ်သးနာ်က့ တဘၣ်နီမံၤဘၣ်.
၁၁. ပကအိၣ် ဂၢၢ်ဂၢၢ်ကျၢၤကျၢၤအဂီၢ် ပတဘၣ်မၤ မနုၤဘၣ်လဲၣ်.
၁၁ တဘျီတခီၣ်န့ၣ် ပကဆိမိၣ်ဘၣ်လၢ ယဟိဝၤယွၤ တဟ့ၣ်ပှၤ တၢ်ဟံးစုနဲၣ်ကျဲ လီၤတံၢ်လီၤဆဲးဘၣ်. အဃိ ဘၣ်သ့ၣ်သ့ၣ် ပကဘၣ်သး “မၤအါန့ၢ်ဒံး တၢ်ကွဲးအသးတဖၣ် အိၣ်ဝဲအသိး.” (၁ ကရံၣ် ၄:၆) အဒိ တၢ်ဘူၣ်တၢ်ဘါခိၣ်နၢ် လၢယ့ၣ်ၡူးအစိၤန့ၣ် အဝဲသ့ၣ်မၤဝဲဒ်န့ၣ်. အဝဲသ့ၣ် ဒုးအိၣ်ထီၣ်ဝဲ ပှၤဟီၣ်ခိၣ်ဖိ အတၢ်သိၣ်တၢ်သီ ဒီးမၢဝဲ ပှၤမုၢ်ဆ့ၣ်မုၢ်ဂီၤဖိ မၤထွဲဝဲ. (မး ၂၃:၄) ဆၢကတီၢ်ခဲအံၤ ယဟိဝၤယွၤဟ့ၣ်ပှၤ တၢ်ဟံးစုနဲၣ်ကျဲ ခီဖျိအကလုၢ်ကထါ ဒီးအတၢ်ကရၢကရိ လီၤတံၢ်လီၤဆဲး. အဃိ ပတဘၣ်မၤအါထီၣ် အတၢ်ဟံးစုနဲၣ်ကျဲ လၢအဟ့ၣ်ပာ်စၢၤပှၤဘၣ်. (ကတိၤ ၃:၅-၇) တကးဒံးဘၣ် ပတဘၣ်မၤအါန့ၢ်ဒံး တၢ်ကွဲးအသး လၢလံာ်စီဆှံပူၤ ဒီးဒုးအိၣ်ထီၣ်တၢ်သိၣ်တၢ်သီလၢ ပဒီပုၢ်ဝဲၢ်မုၣ်ခွါအဂီၢ်ဘၣ်.
၁၂. မုၣ်ကီၤလံၢ်သူဝဲ “တၢ်လီတၢ်ဝ့ၤ ကလီကလီ” ဒ်လဲၣ်.
၁၂ တၢ်လံၣ်တၢ်လီ. မုၣ်ကီၤလံၢ်သူဝဲ “တၢ်လီတၢ်ဝ့ၤ ကလီကလီ” ဒီး “ပှၤဟီၣ်ခိၣ်ဖိ အလုၢ်အလၢ် ဒီးဟီၣ်ခိၣ်အတၢ်ထံၣ်” ဒ်သိးကဆှၢကမၣ် ဒီးမၤလီၤဖး ပှၤဟီၣ်ခိၣ်ဖိ. (ကလီး ၂:၈) ဖဲတၢ်မၢဖိအစိၤန့ၣ် ပှၤယူဒၤဖိသိၣ်လိဝဲ ပှၤဟီၣ်ခိၣ်ဖိ အတၢ်ထံၣ်တဖၣ်လၢ အတသန့ၤထီၣ်သးလၢ လံာ်စီဆှံဘၣ် ဒီးအဝဲသ့ၣ် သိၣ်လိဝဲလၢ ခရံာ်ဖိတဖၣ် ကဘၣ်မၤထွဲဝဲ စီၤမိၤၡ့ အတၢ်သိၣ်တၢ်သီ. တၢ်သိၣ်လိတဖၣ်အံၤ အကဲတၢ်လံၣ်တၢ်လီ လၢအမၤယံၤထီၣ်ပှၤဂၤဒီး ယဟိဝၤယွၤ လၢအမ့ၢ်တၢ်ကူၣ်သ့ အဂံၢ်ခီၣ်ထံး. ဆၢကတီၢ်ခဲအံၤစ့ၢ်ကီး မုၣ်ကီၤလံၢ်သူဝဲ ကမျၢၢ်တၢ်ကစီၣ် ဒီးအ့ၤထၢၤနဲၣ် ဒ်သိးကရၤလီၤဝဲ တၢ်ကစီၣ်လၢအကမၣ် ဒီးအတမ့ၢ်တတီဘၣ် လၢထံကီၢ်ခိၣ်နၢ်တဖၣ် ရၤလီၤဝဲ. အဒိ ဖဲခိၤရိၤနၤတၢ်ဆါ ရၤလီၤသးအဆၢကတီၢ်န့ၣ် ပထံၣ်ဘၣ် တၢ်စီၣ်လၢ အတမ့ၢ်တတီ ဘၣ်ဒီဒူၣ်. c အဃိ ပှၤလၢအကနၣ် တၢ်ကစီၣ်လၢ အတမ့ၢ်တတီဘၣ်တဖၣ်န့ၣ် အသူၣ်ကိၢ်သးဂီၤတၢ်အါမး. မ့မ့ၢ် ပဝဲယဟိဝၤပှၤအုၣ်အသးန့ၣ် ပကနၣ်ဒီးမၤထွဲ တၢ်ဟံးစုနဲၣ်ကျဲလၢ ပတၢ်ကရၢကရိဟ့ၣ်ပှၤအဃိ ပတသူၣ်ကိၢ်သးဂီၤတၢ်အါအါ ဒ်သိးဒီး အဝဲသ့ၣ်ဘၣ်.—မး ၂၄:၄၅.
၁၃. ဘၣ်မနုၤအဃိ ပကဘၣ်ပလီၢ်သးလၢ တၢ်လၢအမၤတံာ်တာ်ပှၤလဲၣ်.
၁၃ တၢ်လၢအမၤတံာ်တာ်ပှၤ. လံာ်စီဆှံ တဲဝဲလၢ ပကဘၣ်သးစၢၢ်ဆၢ “တၢ်လၢအရ့ဒိၣ်ကတၢၢ်တဖၣ်.” (ဖံလံး ၁:၉, ၁၀) ဘၣ်ဆၣ် ပမ့ၢ်တပလီၢ်သးဘၣ်န့ၣ် တၢ်လၢအမၤတံာ်တာ်ပှၤတဖၣ် ကမၤလၢာ်ဂီၤ ပတၢ်ဆၢကတီၢ် ဒီးပဂံၢ်ပဘါအါမး. အဒိ ညီနုၢ်န့ၣ် ပအီၣ်တၢ်အီတၢ်, ပဖံးအီၣ်မၤအီၣ် ဒီးပမၤမုာ်မၤဖှံသး. ဘၣ်ဆၣ် ပမ့ၢ်ပာ်ဆိ တၢ်သ့ၣ်တဖၣ်အံၤ လၢပတၢ်အိၣ်မူပူၤန့ၣ် အကမၤတံာ်တာ်ပှၤ ဒီးပတသးစၢၢ်ဆၢ တၢ်လၢအရ့ဒိၣ်တဖၣ်ဘၣ်. (လူၤ ၂၁:၃၄, ၃၅) တကးဒံးဘၣ် ပနၢ်ဟူဘၣ် ဒီးပဖးဘၣ် တၢ်ကစီၣ် ဘၣ်ဃးဒီး ပှၤထီဒါပဒိၣ် ဒီးပှၤကဃုထၢထီၣ်ပဒိၣ်အဂ့ၢ် ကိးနံၤဒဲး. အဃိ ပတဘၣ်ပျဲလၢ တၢ်ကစီၣ်တဖၣ်အံၤ ကမၤတံာ်တာ်ပှၤဘၣ်. ပမ့ၢ်တပလီၢ်သးဘၣ်န့ၣ် ပကဆီၣ်ထွဲဘၣ် ပဒိၣ်တဖုဖု လၢပတၢ်ဆိမိၣ် ဒီးလၢပသးပူၤ. ဒီးဒ်သိး ပတမၤတၢ်လၢအဘၣ်တဂ့ၤအဂီၢ် မုၣ်ကီၤလံၢ် မၤကီမၤခဲပှၤဒ်လဲၣ်န့ၣ် ပသ့ၣ်ညါဘၣ်လံ. အဃိ ဒ်သိးပကထီဒါကွံာ်အီၤ ဒီးဆဲးအိၣ် ဂၢၢ်ဂၢၢ်ကျၢၤကျၢၤအဂီၢ် ပကဘၣ်မၤဒ်လဲၣ်န့ၣ် ခဲအံၤပကကွၢ်သကိး တၢ်ဟ့ၣ်ကူၣ်လွံၢ်ထံၣ်.
ပဆဲးအိၣ် ဂၢၢ်ဂၢၢ်ကျၢၤကျၢၤ ကသ့ဒ်လဲၣ်
ဒ်သိးပကဆဲးအိၣ် ဂၢၢ်ဂၢၢ်ကျၢၤကျၢၤအဂီၢ် ပကဘၣ်ဆိမိၣ်ထံက့ၤ ပတၢ်ဟ့ၣ်လုၢ်ထီၣ်သး ဒီးတၢ်ဒိးဘျၢထံ, မၤလိကစၢ်ယွၤ အကလုၢ်ကထါ ဒီးဆိမိၣ်ထံအီၤ, မၤဂၢၢ်ကျၢၤထီၣ်ပသး ဒီးနာ်န့ၢ်ယဟိဝၤယွၤ (ကွၢ်လံာ်အဆၢ ၁၄-၁၈)
၁၄. ပမ့ၢ်ဘၣ်သး ဆဲးအိၣ် ဂၢၢ်ဂၢၢ်ကျၢၤကျၢၤ လၢယဟိဝၤယွၤ အအိၣ်တခီန့ၣ် ပကဘၣ်မၤ မနုၤလဲၣ်.
၁၄ ဆိမိၣ်ထံက့ၤ နတၢ်ဟ့ၣ်လုၢ်ထီၣ်သး ဒီးတၢ်ဒိးဘျၢထံ. ခီဖျိလၢ နဘၣ်သးအိၣ်လၢ ယဟိဝၤယွၤ အအိၣ်တခီအဃိ နဟ့ၣ်လုၢ်ထီၣ်သး ဒီးဒိးဘျၢထံ. ဒ်သိးနကနာ်လၢ နထံၣ်န့ၢ်တၢ်မ့ၢ်တၢ်တီအဂီၢ် တၢ်မနုၤမၤစၢၤနၤလဲၣ်န့ၣ် ဆိမိၣ်ထီၣ်က့ၤ. နသ့ၣ်ညါထီၣ် ယဟိဝၤယွၤအဂ့ၢ်အဃိ နပာ်ကဲအီၤ, အဲၣ်အီၤ ဒီးနထံၣ်အီၤ ဒ်သိးပါတဂၤ. နတၢ်နာ်ဟဲအါထီၣ် ဒီးနပီၢ်ယၢ်လီၤက့ၤသး. တကးဒံးဘၣ် နတမၤတၢ်လၢ ယဟိဝၤယွၤ သးဟ့ဝဲလၢၤဘၣ် ဒီးနအိၣ်မူက့ၤဒ် အတၢ်ဘၣ်သး. ဒီးနသ့ၣ်ညါဘၣ်လၢ ယဟိဝၤယွၤ ပျၢ်ကွံာ်နတၢ်ကမၣ်အဃိ နသးမုာ်ထီၣ်. (စံး ၃၂:၁, ၂) နလဲၤထီၣ် တၢ်အိၣ်ဖှိၣ် ဒီးတၢ်လၢနမၤလိဘၣ်တဖၣ်န့ၣ် နတဲဘၣ်က့ၤပှၤဂၤ. ခဲအံၤန့ၣ် နလဲၤတၢ်လၢ တၢ်မူအကျဲ ဒ်ခရံာ်ဖိလၢ အဟ့ၣ်လုၢ်ထီၣ်သး ဒီးဒိးဘျၢထံဝံၤတဂၤအသိး. ဒီးဒ်သိး နကဆဲးလဲၤတၢ်လၢ ကျဲအံၤအဂီၢ် နကျဲးစၢးလၢအဂ့ၤကတၢၢ်.—မး ၇:၁၃, ၁၄.
၁၅. ပမ့ၢ်မၤလိ ဒီးဆိမိၣ်ထံ ကစၢ်ယွၤ အကလုၢ်ကထါန့ၣ် ကကဲဘျုးလၢပဂီၢ်ဒ်လဲၣ်.
၁၅ မၤလိကစၢ်ယွၤ အကလုၢ်ကထါ ဒီးဆိမိၣ်ထံအီၤ. သ့ၣ်တထူၣ် အဂံၢ်စဲၤလီၤသးမ့ၢ်ယိာ်န့ၣ် အကအိၣ် ဂၢၢ်ဂၢၢ်ကျၢၤကျၢၤ. ဒ်န့ၣ်အသိး ပတၢ်နာ် မ့ၢ်သန့ၤထီၣ်သးလၢ ကစၢ်ယွၤ အကလုၢ်ကထါန့ၣ် ပကအိၣ် ဂၢၢ်ဂၢၢ်ကျၢၤကျၢၤ. တကးဒံးဘၣ် ဖဲသ့ၣ်တထူၣ်ဒိၣ်ထီၣ်အခါ အဂံၢ်ကဟဲအါထီၣ် ဒီးအဂံၢ်ကစဲၤလီၤသးကျၢၤကျၢၤ. ပဝဲစ့ၢ်ကီး ဖဲပမၤလိ ကစၢ်ယွၤ အကလုၢ်ကထါ ဒီးဆိမိၣ်ထံအီၤအခါ ပမၤဂၢၢ်ကျၢၤထီၣ်ပတၢ်နာ် ဒီးပနာ်နီၢ်ကီၢ်လၢ တၢ်လၢကစၢ်ယွၤတဲဝဲန့ၣ် အဘၣ်ကတၢၢ်. (ကလီး ၂:၆, ၇) ဒီးလၢညါ ကစၢ်ယွၤ သိၣ်လိ, ဟံးစုနဲၣ်ကျဲ ဒီးဒီသဒၢအပှၤဂီၢ်မုၢ်ဒ်လဲၣ်န့ၣ် ဆိမိၣ်ထံအီၤ. အဒိ ဖဲဝံယဃ့းစက့လး ထံၣ်ဝဲတၢ်ထံၣ်လၢညါခီ ဘၣ်ဃးဒီး မူခိၣ်ကလူးတဂၤ ထိၣ်ဝဲတၢ်လုၢ်ဟံၣ် လီၤတံၢ်လီၤဆဲးအခါ ဝံယဃ့စက့လး ကွၢ်ဝဲထံထံ. တၢ်ထံၣ်လၢညါခီအံၤ မၤဆူၣ်ထီၣ် ဝံယဃ့းစက့လးအသး ဒီးပမၤလိဘၣ်စ့ၢ်ကီးလၢ ပကဘၣ်မၤထွဲ ယဟိဝၤယွၤ အတၢ်သိၣ်တၢ်သီ ဘၣ်ဃးဒီး တၢ်ဘူၣ်ထီၣ်ဘါထီၣ်စီဆှံ. d (ဃ့း ၄၀:၁-၄; ၄၃:၁၀-၁၂) အဃိ ပထံၣ်ဘၣ်လၢ ပမ့ၢ်ဟံန့ၢ်တၢ်ဆၢကတီၢ်လၢ ပကမၤလိ ကစၢ်ယွၤ အကလုၢ်ကထါ ဒီးဆိမိၣ်ထံ တၢ်ဂ့ၢ်လၢအဒိၣ်အယိာ်န့ၣ် ပကန့ၢ်ဘၣ် အဘျုးအါမး.
၁၆. ဒီပုၢ်ဝဲၢ်ခွါရီဘၢၤ အိၣ်ဒီး သးလၢအဂၢၢ်ကျၢၤအဃိ မၤစၢၤအီၤဒ်လဲၣ်. (စံးထီၣ်ပတြၢၤ ၁၁၂:၇)
၁၆ မၤဂၢၢ်ကျၢၤထီၣ်နသး. စီၤဒၤဝံးတဲဖျါထီၣ် အတၢ်အဲၣ်ဂၢၢ်ကျၢၤ လၢယဟိဝၤယွၤအဂီၢ် ဒီးအသးဝံၣ်ဝဲလၢ “ယသးတီဒီးနၤ, အိ ကစၢ်ယွၤဧၢ.” (စံး ၅၇:၇) ပဝဲစ့ၢ်ကီး ပမ့ၢ်နာ်န့ၢ်ယဟိဝၤယွၤ လၢပသးဒီဖျၢၣ်န့ၣ် ပအိၣ်ဒီး သးလၢအဂၢၢ်ကျၢၤသ့. (ဖး စံးထီၣ်ပတြၢၤ ၁၁၂:၇.) ဒီပုၢ်ဝဲၢ်ခွါရီဘၢၤ လၢပတဲသကိးအဂ့ၢ်န့ၣ် အအိၣ်ဒီး သးလၢအဂၢၢ်ကျၢၤအဃိ မၤစၢၤအီၤဒ်လဲၣ်. ဖဲကသံၣ်သရၣ် တဲဘၣ်အီၤလၢ အတလိၣ်တၢ်သွံၣ်ဘၣ်နာ်က့ ပှၤကတဲာ်ကတီၤပာ်စၢၤတၢ်သွံၣ် လၢအဂီၢ်အခါ ဒီပုၢ်ဝဲၢ်ခွါရီဘၢၤ တဲဝဲတဘျီဃီလၢ အမ့ၢ်ဘၣ်သွီတၢ်သွံၣ်န့ၣ် အကစံၣ်လီၤလၢ တၢ်ဆါဟံၣ်တဘျီဃီ. လၢခံ ဒီပုၢ်ဝဲၢ်ခွါရီဘၢၤ တဲဝဲလၢ “တၢ်မ့ၢ်ကဲထီၣ်သး ဒ်လဲၣ်ဒ်လဲၣ်နာ်က့ ယသးတဒ့ဒီဘၣ် ဒီးယတကိၢ်တၢ်နီမံၤဘၣ်.”
ပမ့ၢ်ထံၣ်ဘၣ်တၢ်မၤကွၢ် ဒ်လဲၣ်ဒ်လဲၣ်နာ်က့ ပတၢ်နာ်မ့ၢ်ဂၢၢ်ကျၢၤန့ၣ် ပအိၣ်ဒီး သးလၢအဂၢၢ်ကျၢၤသ့ (ကွၢ်လံာ်အဆၢ ၁၇)
၁၇. လၢဒီပုၢ်ဝဲၢ်ခွါရီဘၢၤ အတၢ်လဲၤခီဖျိန့ၣ် ပန့ၢ်ဘၣ်တၢ်မၤလိဒ်လဲၣ်. (ကွၢ်စ့ၢ်ကီးတၢ်ဂီၤ.)
၁၇ တချုးလၢ ဒီပုၢ်ဝဲၢ်ခွါရီဘၢၤ လဲၤထီၣ်တၢ်ဆါဟံၣ်ဒံးဘၣ်န့ၣ် အဆၢတဲာ်ပာ်စၢၤအသး လီၤတံၢ်လီၤဆဲးလံအဃိ အအိၣ်ဒီး သး လၢအဂၢၢ်ကျၢၤ. အဆိကတၢၢ်န့ၣ် အပာ်လီၤသးလၢ အကမၤသးခု ယဟိဝၤယွၤအသး. ခံမံၤတမံၤန့ၣ် အမၤလိလံာ်စီဆှံ ဒီးလံာ်လဲၢ်လၢ အသန့ၤထီၣ်သးလၢ လံာ်စီဆှံ ဘၣ်ဃးဒီး သးသမူ ဒီးတၢ်သွံၣ်အဂ့ၢ်. သၢမံၤတမံၤန့ၣ် အနာ်ဝဲသပှၢ်တၢၢ်လၢ အမ့ၢ်မၤထွဲ ယဟိဝၤယွၤ အတၢ်ဟံးစုနဲၣ်ကျဲန့ၣ် ကကဲဘျုးလၢအဂီၢ်နီၢ်ကီၢ်. ပဝဲစ့ၢ်ကီး ပမ့ၢ်ထံၣ်ဘၣ်တၢ်မၤကွၢ် ဒ်လဲၣ်ဒ်လဲၣ်နာ်က့ ပအိၣ်ဒီး သးလၢအဂၢၢ်ကျၢၤသ့.
စီၤဘါရး ဒီးအပှၤတဖၣ် လူၤဝဲ စီၤစံစရၤ အသုးမုၢ် လၢတၢ်သးဒူ (ကွၢ်တၢ်မၤလိ ၃၁, လံာ်အဆၢ ၁၈)
၁၈. စီၤဘါရး အဒိအတဲာ် ပာ်ဖျါထီၣ်ဝဲလၢ ပမ့ၢ်နာ်န့ၢ် ယဟိဝၤယွၤန့ၣ် ကကဲဘျုးဒ်လဲၣ်. (ကွၢ်တၢ်တၢ်ဂီၤလၢ လံာ်ကုခိၣ်.)
၁၈ နာ်န့ၢ်ယဟိဝၤယွၤ. စီၤဘါရးန့ၣ် အနာ်န့ၢ် ယဟိဝၤယွၤ အတၢ်ဟံးစုနဲၣ်ကျဲအဃိ အမၤနၢၤတၢ်. ဖဲန့ၣ်အခါ ပှၤအံၣ်စရ့လးဖိ တအိၣ်ကတဲာ်ကတီၤအသးလၢ တၢ်ဒုးအဂီၢ်ဒံးဘၣ်. အဝဲသ့ၣ် ကတီၤမ့ၢ်ဂ့ၤ, အဘီမ့ၢ်ဂ့ၤ တဘ့ၣ်မၣ်တအိၣ်ဘၣ်. သနာ်က့ ယဟိဝၤယွၤ တဲဘၣ်စီၤဘါရးလၢ ကလဲၤဒုးဝဲ ပှၤကနၤဧၣ်ဖိ အသုးခိၣ် စီၤစံစရၤ ဒီးအသုးမုၢ်. ပှၤကနၤဧၣ်ဖိတဖၣ်အံၤ အဝဲသ့ၣ်တၢ်စုကဝဲၤ အိၣ်အါမး. (စံၣ်ညီၣ် ၅:၈) ဝံမုၣ်နီၢ်ဒဘိရၤ တဲဘၣ် စီၤဘါရးလၢ ကလဲၤလီၤလၢ တၢ်ပၢၤခိၣ်ဒီးဒုးဝဲ စီၤစံစရၤ ဒီးအလ့ၣ်ကဟၣ်သုး အခိၣ် ၉၀၀. စီၤဘါရးသ့ၣ်ညါဝဲလၢ အဝဲသ့ၣ်မ့ၢ်အိၣ်လၢ တၢ်ပၢၤခိၣ် ဒီးဒုးဝဲလ့ၣ်ကဟၣ်သုး လၢအလဲၤတၢ်ချ့မးန့ၣ် အဝဲသ့ၣ် ဒုးဝဲတနၢၤဘၣ်. သနာ်က့ စီၤဘါရး မၤထွဲဝဲ တၢ်ဟံးစုနဲၣ်ကျဲတခါအံၤ. ဖဲစီၤဘါရး ဒီးအသုးဖိတဖၣ် လဲၤလီၤလၢ ကစၢၢ်တၤဘိၢ်အလိၤအခါ ယဟိဝၤယွၤ ဒုးစူၤလီၤမူခိၣ်ဖးဒိၣ်. စီၤစံစရၤ အလ့ၣ်ကဟၣ်သုးတဖၣ် ကတာ်ဒီးကပံာ်အဃိ ယဟိဝၤယွၤ မၤစၢၤစီၤဘါရးလၢကမၤနၢၤတၢ်. (စံၣ်ညီၣ် ၄:၁-၇, ၁၀, ၁၃-၁၆) ပဝဲစ့ၢ်ကီး ပမ့ၢ်နာ်န့ၢ် ယဟိဝၤယွၤ ဒီးမၤထွဲ တၢ်ဟံးစုနဲၣ်ကျဲလၢ အတၢ်ကရၢကရိ ဟ့ၣ်ပှၤန့ၣ် ပသ့ၣ်ညါလၢ ယဟိဝၤယွၤ ကမၤစၢၤပှၤ ဒ်သိးပကမၤနၢၤတၢ်.—၅ မိၤ ၃၁:၆.
ပာ်လီၤသးလၢ နကအိၣ် ဂၢၢ်ဂၢၢ်ကျၢၤကျၢၤထီဘိ
၁၉. ဘၣ်မနုၤအဃိ နဘၣ်သးအိၣ် ဂၢၢ်ဂၢၢ်ကျၢၤကျၢၤထီဘိလဲၣ်.
၁၉ ပမ့ၢ်အိၣ်မူဘၣ်ဒံးလၢ ဟီၣ်ခိၣ်လၢမုၣ်ကီၤလံၢ် ပၢဝဲအံၤန့ၣ် ပကဘၣ်ဆဲး အိၣ်ဂၢၢ်ဂၢၢ်ကျၢၤကျၢၤထီဘိ. (၁ တံၤ ၆:၁၁, ၁၂; ၂ ပ့း ၃:၁၇) အဃိ တၢ်မၤအၢမၤနး, တၢ်ဆီၣ်သနံး သတူၢ်ကလာ်, ပှၤဟီၣ်ခိၣ်ဖိ အတၢ်ဆိမိၣ်, တၢ်လံၣ်တၢ်လီ ဒီးတၢ်လၢအမၤတံာ်တာ်ပှၤန့ၣ် ပတဘၣ်ပျဲလၢ အကမၤ ဒံဝ့ၤဒံဝီၤပသးဘၣ်. (အ့း ၄:၁၄) ဘၣ်ဆၣ် ပကဘၣ်အိၣ် ဂၢၢ်ဂၢၢ်ကျၢၤကျၢၤ, မၤဂၢၢ်ကျၢၤထီၣ်ပသး, အဲၣ်ယဟိဝၤယွၤ ဒီးမၤထွဲ အတၢ်မၤလိာ်ထီဘိ. ဒီးပကဘၣ်ကဲပှၤလၢ အအိၣ်ဒီး တၢ်ထံၣ်အကြၢးအဘၣ်. ပမ့ၢ်ကွၢ် ယဟိဝၤယွၤ ဒီးယ့ၣ်ၡူးန့ၣ် အဝဲသ့ၣ်အိၣ်ဒီး တၢ်ထံၣ်အကြၢးအဘၣ်. အဃိ တၢ်မၤလိလၢခံတခါန့ၣ် ပကတဲသကိး အဝဲသ့ၣ် အဒိအတဲာ်.
တၢ်သးဝံၣ် ၁၂၉ ပကဆဲးတူၢ်တၢ်လၢ တၢ်သးတီအပူၤ
a စးထီၣ်လၢ စီၤအၤဒၣ်ဒီးနီၢ်အံၣ်အုအစိၤန့ၣ် မုၣ်ကီၤလံၢ် ကျဲးစၢးမၤဝဲဒ်သိး ပှၤဟီၣ်ခိၣ်ဖိ ကဆိမိၣ်ဝဲလၢ အဝဲသ့ၣ် ကဘၣ်ဆၢတဲာ် တၢ်အဘၣ် ဒီးတၢ်အကမၣ်လၢအနီၢ်ကစၢ်. မုၣ်ကီၤလံၢ် ဘၣ်သးလၢ ပကအိၣ်ဒီးတၢ်ထံၣ်လၢ ပတလိၣ်မၤထွဲ ယဟိဝၤယွၤ အတၢ်သိၣ်တၢ်သီ ဒီးတၢ်ကရၢကရိ အတၢ်ဟံးစုနဲၣ်ကျဲဘၣ်. အဃိ ဒ်သိး ပတအိၣ်ဒီး တၢ်ထံၣ်ဒ်သိးဒီး ပှၤလၢအမၤထွဲမုၣ်ကီၤလံၢ် အတၢ်ဘၣ်သးတဂ့ၤအဂီၢ် တၢ်မၤလိတခါအံၤ ကမၤစၢၤပှၤ ဒီးကမၤစၢၤပှၤလၢ ပကပာ်လီၤသး ဂၢၢ်ဂၢၢ်ကျၢၤကျၢၤ လၢပကဒိကနၣ် ယဟိဝၤယွၤအကလုၢ်ထီဘိ.
b ဘၣ်ဃးဒီးတၢ်သွံၣ်န့ၣ် ခရံာ်ဖိတဖၣ် အိၣ်ဒီးတၢ်ထံၣ် ဒ်သိးဒီး ကစၢ်ယွၤ ကသ့ဒ်လဲၣ်, ကွၢ်တၢ်ဂ့ၢ်လၢ တၢ်မၤလိ ၃၉ လၢလံာ် အိၣ်မူလီၤထူလီၤယိာ် ပှဲၤဒီးတၢ်သးခု.
c ကွၢ်ကးတိလၢ လၢၢ်ဘ့ၣ်ဘၣ်ဝါအလိၤ လၢအခိၣ်တီမ့ၢ်ဝဲ “ဒီသဒၢလီၤနသးလၢ တၢ်ကစီၣ်လၢ အကမၣ်” လၢ jw.org.
d နကသ့ၣ်ညါအါထီၣ် တၢ်ဂ့ၢ်အဂီၢ် ကွၢ်တၢ်မၤလိ ၁၃ ဒီး ၁၄ လၢလံာ် Pure Worship of Jehovah—Restored At Last!