မ့ၢ်နသ့ၣ်ညါဧါ
လၢယ့ၣ်ၡူးအစိၤန့ၣ် ပှၤဘၣ်ဟ့ၣ်တၢ်ခိတၢ်သွဲ ဒ်လဲၣ်တကလုာ်လဲၣ်
လၢအနံၣ်အါမးအတီၢ်ပူၤ ပှၤအံၣ်စရ့လးဖိတဖၣ် ဟ့ၣ်လီၤစ့လၢ ကမၤစၢၤတၢ်ဘူၣ်ထီၣ်ဘါထီၣ်အဂီၢ်လီၤ. ဘၣ်ဆၣ် လၢယ့ၣ်ၡူးအစိၤန့ၣ် ပှၤယူဒၤဖိတဖၣ် ဘၣ်ဟ့ၣ်တၢ်ခိတၢ်သွဲအါမး အဃိ ကီလၢအဝဲသ့ၣ်တၢ်အိၣ်မူအဂီၢ်လီၤ.
ဒ်သိးပှၤကဆီၣ်ထွဲမၤစၢၤ ဒဲစီဆှံဒီးတၢ်လုၢ်ဟံၣ်ကန့ၢ်အဂီၢ် ပှၤယူဒၤဖိလၢ အဒိၣ်တုာ်ခိၣ်ပှဲၤတဖၣ် ကဘၣ်ဟ့ၣ်လီၤတိၢ် ၡက့လးတဝး (ခံဒြးမူး) လီၤ. ဖဲယ့ၣ်ၡူးအစိၤန့ၣ် တၢ်ခိတၢ်သွဲလၢ ပှၤဒိးန့ၢ်ဘၣ်ဝဲတဖၣ်န့ၣ် ပှၤသူဝဲလၢ ပှၤဟ့ၣ်လုၢ်ထီၣ်တၢ်အဂီၢ်ဒီး ပှၤကွၢ်ကတဲာ်ကတီၤ တၢ်လုၢ်ဟံၣ်လၢ စီၤဟ့ရိာ်သူၣ်ထီၣ်ဝဲတဖျၢၣ်န့ၣ်လီၤ. ပှၤယူဒၤဖိတနီၤ သံကွၢ်စီၤပ့းတရူးလၢ မ့ၢ်ယ့ၣ်ၡူး ဟ့ၣ်တၢ်ခိတၢ်သွဲဧါ. ယ့ၣ်ၡူးတဲဝဲလၢ ပှၤဟ့ၣ်တၢ်ခိတၢ်သွဲသ့လီၤ. လၢတၢ်န့ၣ်အဃိ အဝဲမၢစီၤပ့းတရူး လဲၤဟံးန့ၢ်စ့တဘ့ၣ် ဒီးဟ့ၣ်လီၤတၢ်ခိတၢ်သွဲလီၤ.—မးသဲ ၁၇:၂၄-၂၇.
ဖဲန့ၣ်အဆၢကတီၢ် ကစၢ်ယွၤအခ့အပှၤ ကဘၣ်ဟ့ၣ် တၢ်ဆံဆဲၣ်ပူတပူ လၢအဒိးန့ၢ်ဘၣ်ဝဲလၢအစံာ်ပူၤ ဒီးအကျိၣ်စ့တၢ်ဟဲနုာ်တဖၣ်လီၤ. (၃ မိၤၡ့ ၂၇:၃၀-၃၂; ၄ မိၤၡ့ ၁၈:၂၆-၂၈) တၢ်ဘူၣ်တၢ်ဘါခိၣ်နၢ်တဖၣ် တဲဝဲလၢ ပှၤကဘၣ်ဟ့ၣ်တၢ်ခိတၢ်သွဲလၢ ကယဲၢ်တၢ်ဒိးတၢ်လၣ်တဖၣ် ဃုာ်ဒီး “ဟီၣ်ဝီၤသွ့, စးမူ ဒီးစံယၤသ့ၣ်” တဖၣ်လီၤ. ယ့ၣ်ၡူးတဲဝဲလၢ ပှၤဟ့ၣ်တၢ်ဆံဆဲၣ်ပူတပူန့ၣ် တကမၣ်ဘၣ်. ဘၣ်ဆၣ် ယ့ၣ်ၡူးပာ်ဖျါထီၣ်ဝဲ ပှၤကွဲးလံာ်ဒီးပှၤဖၤရံၤၡဲတဖၣ် အတၢ်ပာ်မၤအသးလီၤ.—မးသဲ ၂၃:၂၃.
ဖဲန့ၣ်အဆၢကတီၢ် ဘၣ်လၢရိမ့ၤပၢတၢ်အဃိ ပှၤယူဒၤဖိတဖၣ် ဘၣ်ဟ့ၣ်ဝဲ တၢ်ခိတၢ်သွဲအါမးလီၤ. အဒိ, ပှၤလၢအအိၣ်ဒီးဟီၣ်ခိၣ်လီၢ်တဖၣ်န့ၣ် ကဘၣ်ဟ့ၣ်တၢ်ခိတၢ်သွဲလၢစ့ မ့တမ့ၢ် တၢ်ဖိတၢ်လံၤတဖၣ်လီၤ. ဒီးတၢ်ခိတၢ်သွဲလၢ အဝဲသ့ၣ်ကဘၣ်ဟ့ၣ်လီၤဝဲန့ၣ် ကအိၣ်လၢ ၂၀ တုၤလၢ ၂၅ မျးကယၤညါလီၤ. ပှၤယူဒၤဖိတဂၤစုာ်စုာ် ကဘၣ်ဟ့ၣ်တၢ်ခိတၢ်သွဲလီၤ. တၢ်ခိတၢ်သွဲတခါအံၤန့ၣ် မ့ၢ်ဝဲတၢ်ခိတၢ်သွဲတခါဃီလၢ ပှၤဖၤရံၤၡဲသံကွၢ်ယ့ၣ်ၡူးန့ၣ်လီၤ. ပကဘၣ်ဟ့ၣ်တၢ်ခိတၢ်သွဲ ဒ်လဲၣ်န့ၣ် ယ့ၣ်ၡူးတဲဝဲလၢ “တၢ်လၢအဘၣ်ဃးဒီး ကဲစၢ်န့ၣ် ဟ့ၣ်က့ၤလၢ ကဲစၢ်တက့ၢ်. ဘၣ်ဆၣ် တၢ်လၢအဘၣ်ဃးဒီး ကစၢ်ယွၤန့ၣ် ဟ့ၣ်က့ၤလၢ ကစၢ်ယွၤတက့ၢ်.”—မးသဲ ၂၂:၁၅-၂၂.
တကးဒံးဘၣ် တၢ်ဖိတၢ်လံၤလၢ အဟဲနုာ်လီၤဒီးဟးထီၣ်လၢ အဝဲသ့ၣ်အဟီၣ်ကဝီၤအပူၤန့ၣ် ကဘၣ်ဟ့ၣ်ဝဲတၢ်ခိတၢ်သွဲလီၤ. ပှၤထၢတၢ်ခိတၢ်သွဲလၢ ကဘီသန့, တိၤခိၣ်ထိး, ကျဲခီတဲာ်, ကျဲနုာ်လီၤလၢဝ့ၢ်ပူၤ ဒီးတၢ်ဆါတၢ်ပှ့ၤအလီၢ်တဖၣ်လီၤ.
ဖဲရိမ့ၤပၢတၢ်အဆၢကတီၢ်န့ၣ် တၢ်ခိတၢ်သွဲတဖၣ် ကဲထီၣ်တၢ်ဝံတၢ်ယိာ်ဃၢလၢ ကမျၢၢ်တဖၣ်အဂီၢ်လီၤ. တၤစ့ၣ်ထါ(စ်) လၢအမ့ၢ် ပှၤကူၣ်ဘၣ်ကူၣ်သ့ ဘၣ်ဃးဒီး ပှၤရိမ့ၤဖိအတၢ်စံၣ်စိၤတဲစိၤန့ၣ် တဲဝဲလၢ တံၤဘ့းရံပၢတၢ် ဖဲယ့ၣ်ၡူးအိၣ်လၢ ဟီၣ်ခိၣ်ချၢအခါ “စူၤရံ ဒီးယူဒၤန့ၣ် မ့ၢ်လၢအဝဲသ့ၣ် ဟ့ၣ်ဝဲတၢ်ခိတၢ်သွဲ တန့ၢ်ဘၣ်အဃိ ဃ့ကညးဝဲလၢ ကဟ့ၣ်လီၤစှၤဝဲတၢ်ခိတၢ်သွဲအဂီၢ်လီၤ.”
ပှၤထၢတၢ်ခိတၢ်သွဲကစၢ်စ့ၢ်ကီး ဒုးအိၣ်ထီၣ် တၢ်ကီတၢ်ခဲလၢ ပှၤဂၤအဂီၢ်လီၤ. ပှၤလၢအတၤတၢ်နၢၤတဂၤန့ၣ် အဒိးန့ၢ်ဘၣ်တၢ်မၤအံၤလီၤ. ပှၤလၢအဟ့ၣ်စ့ န့ၢ်အါကတၢၢ်တဂၤန့ၣ် အမၤန့ၢ်တၢ်မၤ ဒီးငါက့ၤဝဲ ပှၤဃ့သွဲဖိနီၢ်နီၢ်တဖၣ်လီၤ. ဒ်သိးပှၤဃ့သွဲဖိတဖၣ် ကဒိးန့ၢ်ဘၣ်စ့အဘျဲၣ်အဂီၢ် ဃ့အါထီၣ်တၢ်အပှ့ၤလီၤ. ဖျါလၢပှၤလၢအဃ့တၢ်ခိတၢ်သွဲ ဒ်အံၤတဖၣ်န့ၣ် အိၣ်ဝဲလၢစီၤစးဃဲ အဖီလာ်လီၤ. (လူၤကၣ် ၁၉:၁, ၂) လၢတၢ်န့ၣ်အဃိ ပှၤဃ့တၢ်ခိတၢ်သွဲတဖၣ်န့ၣ် ပှၤတဘၣ်သူၣ်ဘၣ်သးအဝဲသ့ၣ် ဒီးသးဟ့အဝဲသ့ၣ်န့ၣ် ပနၢ်ပၢၢ်သ့လီၤ.
