တၢ်မၤလိ ၂၅
တၢ်အိၣ်ဖှိၣ်သးပှၢ်တဖၣ် မၤလိန့ၢ်တၢ်လၢ စီၤကံးဒဧိၣ် အဒိအတဲာ်သ့
“ယမ့ၢ်ဆဲးတဲဖျါထီၣ် စီၤကံးဒဧိၣ်အဂ့ၢ်န့ၣ် . . . တၢ်ဆၢကတီၢ်တအိၣ်လၢ ယဂီၢ်လၢၤဘၣ်.”—ဧ့ၤဘြံၤ ၁၁:၃၂.
တၢ်သးဝံၣ် ၁၂၄ တီထီဘိ
တၢ်မၤလိအံၤ အတၢ်တိာ်ပာ် a
၁. ၁ ပ့းတရူး ၅:၂ ပာ်ဖျါထီၣ်ဝဲလၢ တၢ်အိၣ်ဖှိၣ်သးပှၢ်တဖၣ် အိၣ်ဒီးမူဒါအရ့ဒိၣ်လၢ ကဘၣ်မၤမနုၤလဲၣ်.
ယဟိဝၤယွၤ နာ်န့ၢ်ခရံာ်ဖိ တၢ်အိၣ်ဖှိၣ်သးပှၢ်တဖၣ်လၢ ကကွၢ်ထွဲအသိ လၢအလုၢ်ဒိၣ်ပှ့ၤဒိၣ်. တၢ်အိၣ်ဖှိၣ်သးပှၢ် လၢအဟ့ၣ်လီၤသးတဖၣ်အံၤ အပာ်လုၢ်ပာ်ပှ့ၤ တၢ်ခွဲးတၢ်ယာ်လၢ ကကွၢ်ထွဲဝဲ ဒီပုၢ်ဝဲၢ်မုၣ်ခွါ ဒီးအဝဲသ့ၣ်မၤတၢ်ဆူၣ်ဆူၣ်လၢ ကကဲထီၣ် “ပှၤကွၢ်သိတဖၣ်လၢ ကကွၢ်ထွဲအဝဲသ့ၣ် မူာ်မူာ်နီၢ်နီၢ်.” (ယံးရမံယၤ ၂၃:၄; ဖး ၁ ပ့းတရူး ၅:၂.) ပအိၣ်ဒီး တၢ်အိၣ်ဖှိၣ်သးပှၢ်ဒ်အံၤ လၢတၢ်အိၣ်ဖှိၣ်အပူၤအဃိ ပသးခုဒိၣ်မး.
၂. တၢ်အိၣ်ဖှိၣ်သးပှၢ်တနီၤ ထံၣ်ဘၣ်တၢ်မၤကွၢ် မနုၤတဖၣ်လဲၣ်.
၂ ဖဲတၢ်အိၣ်ဖှိၣ်သးပှၢ်တဖၣ် မၤဝဲမူဒါအခါ အဝဲသ့ၣ်ထံၣ်ဘၣ်ဒီး တၢ်ကီတၢ်ခဲအါမး. တၢ်အိၣ်ဖှိၣ်သးပှၢ်တဖၣ် ကဘၣ်မၤတၢ်ဆူၣ်ဆူၣ် ဒ်သိးကကွၢ်ထွဲတၢ်အိၣ်ဖှိၣ်အဂီၢ်. ဒီပုၢ်ဝဲၢ်ခွါထိနံၤ လၢအကဲတၢ်အိၣ်ဖှိၣ်သးပှၢ် လၢအအိၣ်လၢကီၢ်အမဲရကၤန့ၣ် အမၤလိဘၣ်ဝဲလၢ ဖဲအန့ၢ်ဘၣ်မူဒါ အါအါအခါ အကဘၣ်ပာ်အသးဖဲအဘၣ် ဒီးအကဘၣ်ဆီၣ်လီၤသးအါထီၣ်. အတဲဝဲလၢ “ဖဲခိၤရိၤနၤတၢ်ဆါ ရၤလီၤသး သီသီအခါ ယကျဲးစၢးအါထီၣ် ဒ်သိးယကကွၢ်ထွဲ တၢ်အိၣ်ဖှိၣ်ဒီးတၢ်စံၣ်တဲၤတဲလီၤ အတၢ်ရဲၣ်တၢ်ကျဲၤအဂီၢ်. ယမၤဖးအါလံ သနာ်က့ တၢ်မၤလၢ ယကဘၣ်မၤန့ၣ် အိၣ်ဒံးဒီဒူၣ်. အဃိ တၢ်ဆၢကတီၢ်လၢ ယကဖးလံာ်စီဆှံ, မၤနီၢ်ကစၢ် တၢ်မၤလိလံာ်စီဆှံ ဒီးဃ့ထုကဖၣ်န့ၣ် တအိၣ်အါအါလၢၤဘၣ်.” ဒီပုၢ်ဝဲၢ်ခွါအလံယၢၤ လၢအကဲတၢ်အိၣ်ဖှိၣ်သးပှၢ် လၢအအိၣ်လၢ ခိစိၤဘိၤန့ၣ် အထံၣ်ဘၣ်တၢ်မၤကွၢ်အဂၤအမံၤ. ခီဖျိလၢ အအိၣ်တၢ်လီၢ်န့ၣ် အိၣ်ဒီးတၢ်ဒုးတၢ်ယၤအဃိ အကမၤထွဲ တၢ်ကရၢကရိ တၢ်ဟံးစုနဲၣ်ကျဲန့ၣ် တညီဘၣ်. အတဲဝဲလၢ “ဖဲဝဲၤတြၢ်ဟ့ၣ်ယၤ မူဒါလၢ ယကဘၣ်လဲၤမၤစၢၤ ဒီပုၢ်ဝဲၢ်မုၣ်ခွါလၢ အအိၣ်တၢ်လီၢ်လၢ တၢ်လီၤဘၣ်ယိၣ် အိၣ်ဝဲန့ၣ် ယပျံၤတၢ်ဒိၣ်မး. ဒီးတၢ်ဟံးစုနဲၣ်ကျဲလၢ ယန့ၢ်ဘၣ်န့ၣ် ဖျါလၢ အတလိၤဘၣ်ယၤဘၣ်.” ဒီပုၢ်ဝဲၢ်ခွါထ့လၢ အမၤမံၤၡၢၤနရံၤလၢ အ့ၡၢၣ်န့ၣ် အထံၣ်ဘၣ်ဒီး တၢ်ကီတၢ်ခဲလၢ ကိးနံၤဒဲးန့ၣ် အကဘၣ်မၤတၢ် အိၣ်ဒီဒူၣ်. အဃိအတဲဝဲလၢ “တဘျီတခီၣ် ယတူၢ်ဘၣ်လၢ ယလီၤဘှံးဒိၣ်မး ဒီးယကွၢ်ထွဲ ဒီပုၢ်ဝဲၢ်မုၣ်ခွါတဖၣ် တန့ၢ်လၢၤဘၣ်.” တၢ်အိၣ်ဖှိၣ်သးပှၢ်လၢ အထံၣ်ဘၣ်ဒီး တၢ်ကီတၢ်ခဲဒ်အံၤန့ၣ် တၢ်မနုၤကမၤစၢၤ အဝဲသ့ၣ်လဲၣ်.
၃. ပဝဲခဲလၢာ် ပဟံန့ၢ်တၢ်မၤလိလၢ စံၣ်ညီၣ်ကွီၢ် စီၤကံးဒဧိၣ် အအိၣ်ကသ့ဒ်လဲၣ်.
၃ တၢ်အိၣ်ဖှိၣ်သးပှၢ်တဖၣ် မၤလိန့ၢ်တၢ်လၢ စံၣ်ညီၣ်ကွီၢ် စီၤကံးဒဧိၣ် အဒိအတဲာ်သ့. (ဧ့ၤဘြံၤ ၆:၁၂; ၁၁:၃၂) စီၤကံးဒဧိၣ်န့ၣ် အဘၣ်ဒီသဒၢ ဒီးကွၢ်ထွဲ ကစၢ်ယွၤအပှၤဂီၢ်မုၢ်. (စံၣ်ညီၣ်ကွီၢ် ၂:၁၆; ၁ ကွဲးနီၣ်တၢ် ၁၇:၆) ဒ်စီၤကံးဒဧိၣ်အသိး ယဟိဝၤယွၤဃုထၢထီၣ် တၢ်အိၣ်ဖှိၣ်သးပှၢ်တဖၣ်လၢ အဝဲသ့ၣ် ကကွၢ်ထွဲ အပှၤဂီၢ်မုၢ် ဖဲတၢ်ကီတၢ်ခဲ အဆၢကတီၢ်. (မၤတၢ် ၂၀:၂၈; ၂ တံၤမသ့း ၃:၁) စီၤကံးဒဧိၣ်န့ၣ် အအိၣ်ဒီး တၢ်ပာ်သးဖဲအဘၣ်, တၢ်ဆီၣ်လီၤသး, တၢ်ဒိကနၣ် ဒီးတၢ်တူၢ်န့ၢ်ခီၣ်ကဲ အဃိ တၢ်အိၣ်ဖှိၣ်သးပှၢ်တဖၣ် ဟံန့ၢ်တၢ်မၤလိလၢ စီၤကံးဒဧိၣ်အအိၣ်သ့. ပမ့ၢ်တကဲတၢ်အိၣ်ဖှိၣ်သးပှၢ်ဘၣ်နာ်က့ စီၤကံးဒဧိၣ် အဒိအတဲာ်န့ၣ် ကမၤစၢၤပှၤလၢ ပကပာ်လုၢ်ပာ်ပှ့ၤအါထီၣ် ပတၢ်အိၣ်ဖှိၣ်သးပှၢ်တဖၣ်. ပတၢ်အိၣ်ဖှိၣ်သးပှၢ်တဖၣ်အံၤ မၤတၢ်ဆူၣ်ဆူၣ်လၢ ကကွၢ်ထွဲတၢ်အိၣ်ဖှိၣ်အဃိ ပဆီၣ်ထွဲမၤစၢၤ အဝဲသ့ၣ်သ့.—ဧ့ၤဘြံၤ ၁၃:၁၇.
ဖဲနကဘၣ်မၤအါထီၣ် တၢ်ဆီၣ်လီၤသး
၄. စီၤကံးဒဧိၣ် ပာ်ဖျါထီၣ် တၢ်ဆီၣ်လီၤသးဒ်လဲၣ်.
၄ စီၤကံးဒဧိၣ်န့ၣ် အကဲပှၤလၢအအိၣ်ဒီး တၢ်ဆီၣ်လီၤသး. b အဒိ ဖဲယဟိဝၤယွၤ အမူခိၣ်ကလူး တဲစီၤကံးဒဧိၣ်လၢ ကစၢ်ယွၤဃုထၢထီၣ်အီၤ လၢအကမၤပူၤဖျဲး ပှၤအံၣ်စရ့လးဖိလၢ ပှၤမံးဒယၣ်ဖိ အစုပူၤအခါ စီၤကံးဒဧိၣ်တဲဝဲလၢ “ယဒူၣ်ဖိထၢဖိမ့ၢ် ဒူၣ်ဖိထၢဖိလၢ အရ့တဒိၣ်ဘၣ်တဒူၣ်လၢ မနၤၡ့ၤအဒူၣ်အကျါလီၤ. ဒီးယမ့ၢ်ပှၤလၢ အဆံးကတၢၢ်လၢ ယပၢ်အဒူၣ်ဖိထၢဖိ အကျါ.” (စံၣ်ညီၣ်ကွီၢ် ၆:၁၅) စီၤကံးဒဧိၣ် ဆိမိၣ်ဝဲလၢ အမၤလၢပှဲၤ မူဒါတခါန့ၣ် တန့ၢ်ဘၣ်. ဘၣ်ဆၣ် ယဟိဝၤယွၤ သ့ၣ်ညါဝဲလၢ အမၤဝဲန့ၢ်. လၢခံန့ၣ် ခီဖျိလၢ ယဟိဝၤယွၤ အတၢ်မၤစၢၤအဃိ စီၤကံးဒဧိၣ် မၤလၢပှဲၤအမူဒါန့ၢ်ဝဲ.
၅. တၢ်အိၣ်ဖှိၣ်သးပှၢ်တဖၣ်န့ၣ် ကီလၢ အကပာ်ဖျါထီၣ် တၢ်ဆီၣ်လီၤသး လၢအခါဖဲလဲၣ်.
၅ တၢ်အိၣ်ဖှိၣ်သးပှၢ်တဖၣ်န့ၣ် တသ့ဖဲအသ့ အပာ်ဖျါထီၣ် တၢ်ဆီၣ်လီၤသးလၢ တၢ်ကီးမံၤဒဲးအပူၤ. (မံကၤ ၆:၈; မၤတၢ် ၂၀:၁၈, ၁၉) အဝဲသ့ၣ် ပာ်ဖျါထီၣ် တၢ်ဆီၣ်လီၤသး ခီဖျိ အဝဲသ့ၣ် တပတြၢၤလီၤသးလၢ တၢ်လၢအမၤဝဲသ့ ဒီးတၢ်လၢ အမၤကဲထီၣ်လိၣ်ထီၣ်ဝဲ အဃိဘၣ်. ဒီးအမၤတၢ် မ့ၢ်ကမၣ်နာ်က့ အကျဲးစၢးဝဲဒ်သိး အတဆိမိၣ်လီၤသးလၢ အတကျီးဘၣ်န့ၣ်ဘၣ်. ဘၣ်ဆၣ် အဝဲသ့ၣ် ကပာ်ဖျါထီၣ် တၢ်ဆီၣ်လီၤသးန့ၣ် တဘျီတခီၣ် တညီစ့ၢ်ကီးဘၣ်. အဒိ တၢ်အိၣ်ဖှိၣ်သးပှၢ်တဂၤ အကတူၢ်လိာ်မူဒါဒီဒူၣ် ဒီးလၢခံမၣ် အသ့ၣ်ညါလီၤသးလၢ အမၤဝဲ တန့ၢ်ခဲလၢာ်ဘၣ်. အမၤလၢပှဲၤအမူဒါ ဒ်လဲၣ်ဒ်လဲၣ်န့ၣ် တဘျီတခီၣ် ပှၤကပာ်ဒ့ၣ်ပာ်ကမၣ်အီၤ မ့တမ့ၢ် ပှၤကပတြၢၤအီၤ. ဖဲန့ၣ်အခါ ဘၣ်သ့ၣ်သ့ၣ် ကကီလၢ အကပာ်ဖျါထီၣ်တၢ်ဆီၣ်လီၤသး. အဃိ တၢ်အိၣ်ဖှိၣ်သးပှၢ်တဖၣ် ဟံးန့ၢ်တၢ်မၤလိလၢ စီၤကံးဒဧိၣ်အအိၣ် ကသ့ဒ်လဲၣ်.
တၢ်အိၣ်ဖှိၣ်သးပှၢ်တဂၤ ကွၢ်လိစီၤကံးဒဧိၣ် အတၢ်ဆီၣ်လီၤသးခီဖျိ အဃ့ပှၤဂၤတၢ်မၤစၢၤ ဖဲအရဲၣ်ကျဲၤ လ့ၣ်ဆီၣ်လၢ တၢ်စံၣ်တဲၤတဲလီၤတၢ်အခါ (ကွၢ်လံာ်အဆၢ ၆)
၆. တၢ်အိၣ်ဖှိၣ်သးပှၢ်တဖၣ် မၤလိန့ၢ်တၢ်လၢ စီၤကံးဒဧိၣ် အတၢ်ဆီၣ်လီၤသးသ့ဒ်လဲၣ်. (ကွၢ်စ့ၢ်ကီးတၢ်ဂီၤ.)
၆ ဃ့တၢ်မၤစၢၤ. ပှၤလၢအအိၣ်ဒီး တၢ်ဆီၣ်လီၤသးန့ၣ် အသ့ၣ်ညါဝဲလၢ အမၤတၢ် တသ့ခဲလၢာ်ဘၣ်. စီၤကံးဒဧိၣ်န့ၣ် အပာ်ဖျါထီၣ်လၢ အအိၣ်ဒီး တၢ်ဆီၣ်လီၤသးခီဖျိ အဃ့ပှၤဂၤ တၢ်မၤစၢၤ. (စံၣ်ညီၣ်ကွီၢ် ၆:၂၇, ၃၅; ၇:၂၄) တၢ်အိၣ်ဖှိၣ်သးပှၢ်လၢ အကူၣ်တၢ်သ့န့ၣ် ကမၤဝဲဒ်န့ၣ်. ဒီပုၢ်ဝဲၢ်ခွါထိနံၤ လၢပတဲအဂ့ၢ် ဖဲမကၢာ်န့ၣ် အတဲဝဲ “ဖဲယနီၢ်ဆံးခါ ပှၤသိၣ်လိပာ်စၢၤယၤလၢ ယကဘၣ်မၤတၢ်ဆူၣ်ဆူၣ် အဃိ ယတူၢ်လိာ်တၢ်မၤအါန့ၢ် တၢ်လၢယမၤအီၤန့ၢ်ဒံး. အဃိ လၢဟံၣ်ဖိဃီဖိ တၢ်မၤလိလံာ်စီဆှံအဂီၢ်န့ၣ် ယဃုထၢတၢ်ဂ့ၢ်လၢ အဘၣ်ဃးဒီး တၢ်ဆီၣ်လီၤသး ဒီးယမၢယမါ တဲဖျါထီၣ် အတၢ်ထံၣ်. တကးဒံးဘၣ် ပကွၢ်သကီး တၢ်ဂီၤမူလၢ jw.org လၢအခိၣ်တီမ့ၢ်ဝဲ သိၣ်လိနဲၣ်လိ, နာ်န့ၢ် ဒီးဟ့ၣ်လီၤမူဒါလၢ ပှၤဂၤဒ်ယ့ၣ်ၡူးအသိးတက့ၢ်.” ဒီပုၢ်ဝဲၢ်ခွါထိနံၤ ဃ့ပှၤဂၤ အတၢ်မၤစၢၤအဃိ ကဲဘျုးဒ်လဲၣ်. အတဲဝဲလၢ “တၢ်အိၣ်ဖှိၣ်တၢ်မၤတဖၣ်န့ၣ် ပှၤဂၤကွၢ်ထွဲမၤစၢၤဝဲအဃိ ယတၢ်ဆၢကတီၢ် အိၣ်အါထီၣ်လၢ ယကမၤဂ့ၤဒိၣ်ထီၣ် ယတၢ်ရ့လိာ်သးဒီး ယဟိဝၤယွၤ.”
၇. တၢ်အိၣ်ဖှိၣ်သးပှၢ်တဖၣ် ပှၤမ့ၢ်ပာ်ဒ့ၣ်ပာ်ကမၣ် အဝဲသ့ၣ်န့ၣ် အဝဲသ့ၣ်ကွၢ်လိ စီၤကံးဒဧိၣ် အဒိအတဲာ် ကသ့ဒ်လဲၣ်. (ယၤကိာ် ၃:၁၃)
၇ ပှၤတဂၤဂၤ မ့ၢ်ပာ်ဒ့ၣ်ပာ်ကမၣ်နၤန့ၣ် တဲတၢ်ဒီးအဝဲသ့ၣ်မုာ်မုာ်. တၢ်မၤကွၢ်အဂၤတခါလၢ တၢ်အိၣ်ဖှိၣ်သးပှၢ် ကထံၣ်ဘၣ်ဝဲန့ၣ် မ့ၢ်ဝဲပှၤပာ်ဒ့ၣ်ပာ်ကမၣ်အဝဲသ့ၣ်. စီၤကံးဒဧိၣ် အဒိအတဲာ်န့ၣ် မၤစၢၤတၢ်အိၣ်ဖှိၣ်သးပှၢ်သ့. စီၤကံးဒဧိၣ် သ့ၣ်ညါဝဲလၢ အတမ့ၢ်ပှၤလၢပှၤပှဲၤဘၣ် အဃိ ဖဲပှၤအ့ဖရဲၣ်ဖိတဖၣ် ပာ်ဒ့ၣ်ပာ်ကမၣ်အီၤအခါ စီၤကံးဒဧိၣ် ပာ်အသးမုာ်မုာ်. (စံၣ်ညီၣ်ကွီၢ် ၈:၁-၃) စီၤကံးဒဧိၣ် တသးပှံၢ်ထီၣ်အဝဲသ့ၣ်ဘၣ်. ဒီးအပာ်ဖျါထီၣ် တၢ်ဆီၣ်လီၤသးခီဖျိ အကနၣ်န့ၢ် အဝဲသ့ၣ် ဒီးတဲတၢ်ဒီးအဝဲသ့ၣ်မုာ်မုာ်. အဃိ ပှၤအ့ဖရဲၣ်ဖိတဖၣ် အသးခုၣ်လီၤက့ၤဝဲ. တၢ်အိၣ်ဖှိၣ်သးပှၢ်လၢ အကူၣ်တၢ်သ့န့ၣ် ပှၤမ့ၢ်ပာ်ဒ့ၣ်ပာ်ကမၣ် အဝဲသ့ၣ်နာ်က့ အဝဲသ့ၣ်ကွၢ်လိ စီၤကံးဒဧိၣ် ခီဖျိပာ်အသးမုာ်မုာ် ဒီးကနၣ်န့ၢ်ပှၤဂၤ. (ဖး ယၤကိာ် ၃:၁၃.) အဝဲသ့ၣ်မၤဝဲဒ်န့ၣ်အဃိ လၢတၢ်အိၣ်ဖှိၣ်ပူၤ တၢ်ဃူတၢ်ဖိးအိၣ်အါထီၣ်.
၈. တၢ်အိၣ်ဖှိၣ်သးပှၢ်တဖၣ် ပှၤမ့ၢ်ပတြၢၤအဝဲသ့ၣ်န့ၣ် အဝဲသ့ၣ်ကြၢးမၤဝဲဒ်လဲၣ်. ဟ့ၣ်တၢ်အဒိ.
၈ ဟ့ၣ်တၢ်လၤကပီၤခဲလၢာ်လၢ ယဟိဝၤယွၤအအိၣ်. ဖဲစီၤကံးဒဧိၣ် မၤနၢၤ ပှၤမံးဒယၣ်ဖိအခါ အဟ့ၣ်တၢ်လၤကပီၤခဲလၢာ်လၢ ယဟိဝၤယွၤအအိၣ်. (စံၣ်ညီၣ်ကွီၢ် ၈:၂၂, ၂၃) တၢ်အိၣ်ဖှိၣ်သးပှၢ်တဖၣ် ကွၢ်လိ စီၤကံးဒဧိၣ်ကသ့ဒ်လဲၣ်. အဝဲသ့ၣ် ကွၢ်လိစီၤကံးဒဧိၣ်သ့ခီဖျိ ဖဲအမၤတၢ်တမံၤဂ့ၤတမံၤဂ့ၤအခါ အဟ့ၣ် တၢ်လၤကပီၤခဲလၢာ်လၢ ယဟိဝၤယွၤအအိၣ်. (၁ ကရံၣ်သူး ၄:၆, ၇) အဒိ တၢ်အိၣ်ဖှိၣ်သးပှၢ်တဂၤ ပှၤမ့ၢ်ပတြၢၤအီၤလၢ အသိၣ်လိတၢ်ဂ့ၤမးန့ၣ် ဘၣ်သ့ၣ်သ့ၣ် အကတဲက့ၤလၢ တၢ်သိၣ်လိတဖၣ်န့ၣ် အသန့ၤထီၣ်သးလၢ ကစၢ်ယွၤအကလုၢ်ကထါ ဒီးအန့ၢ်ဘၣ်တၢ်သိၣ်လိလၢ ယဟိဝၤယွၤ အတၢ်ကရၢကရိအအိၣ်. တၢ်အိၣ်ဖှိၣ်သးပှၢ်တဖၣ် ကဘၣ်ဆိမိၣ်ထံလၢ ဖဲအဝဲသ့ၣ်သိၣ်လိတၢ်အခါ အဘၣ်သးလၢ ပှၤကပတြၢၤ ယဟိဝၤယွၤဧါ မ့တမ့ၢ် အဘၣ်သးလၢ ပှၤကပတြၢၤအဝဲသ့ၣ်ဧါ. ပကတဲသကီး တၢ်အိၣ်ဖှိၣ်သးပှၢ်ထံမသ့း အတၢ်လဲၤခီဖျိ. ဖဲဒီပုၢ်ဝဲၢ်ခွါထံမသ့း ကဲထီၣ်တၢ်အိၣ်ဖှိၣ်သးပှၢ် သီသီအခါ အဟ့ၣ် ကမျၢၢ်တၢ်စံၣ်တဲၤတဲလီၤမုာ်မး. အတဲဝဲလၢ “ဖဲယစးထီၣ် တၢ်ကတိၤအိးထီၣ်အခါ ယတဲတၢ်ဖးအါ ဒီးယတဲတၢ်အဒိလၢ အပတီၢ်ထီ ဒီးအခီပညီယိာ်မး. အဃိ ပှၤပတြၢၤယၤမၢ်မၢ် ဒီးပှၤသးစၢၢ်ဆၢ အါထီၣ်လၢယၤ. ပှၤတသးစၢၢ်ဆၢ လံာ်စီဆှံ ဒီးယဟိဝၤယွၤ အါအါလၢၤဘၣ်.” လၢခံန့ၣ် ဒီပုၢ်ဝဲၢ်ခွါထံမသ့း သ့ၣ်ညါထီၣ်ဝဲလၢ ဒ်သိးဒီး ပှၤတသးစၢၢ်ဆၢအီၤ အါန့ၢ်ဒံး ပှၤသးစၢၢ်ဆၢ လံာ်စီဆှံဒီးယဟိဝၤယွၤ တဂ့ၤအဂီၢ် အကဘၣ်ဆီတလဲ အတၢ်သိၣ်လိ အကျိၤအကျဲ. (ကတိၤဒိ ၂၇:၂၁) အမၤဝဲဒ်န့ၣ်အဃိ ကဲဘျုးဒ်လဲၣ်. အတဲဝဲလၢ “ခဲအံၤ ဒီပုၢ်ဝဲၢ်မုၣ်ခွါတဖၣ် တဲဘၣ်ယၤလၢ ယတၢ်စံၣ်တဲၤတဲလီၤန့ၣ် မၤစၢၤအဝဲသ့ၣ်လၢ အဝဲသ့ၣ်လဲၤခီဖျိ တၢ်ကီတၢ်ခဲကန့ၢ် ဒီးမၤစၢၤအဝဲသ့ၣ်လၢ အတၢ်ရ့လိာ်သးဒီး ယဟိဝၤယွၤ ကဂ့ၤထီၣ်. အဝဲသ့ၣ်တဲယၤဒ်န့ၣ်အဃိ ယသးခုဒိၣ်န့ၢ်ဒံး အဝဲသ့ၣ်ပတြၢၤယၤ လၢညါဒံး.”
ဖဲနကဘၣ်မၤအါထီၣ် တၢ်ဒိကနၣ် ဒီးတၢ်သးဒူ
စီၤကံးဒဧိၣ် ဒိကနၣ် ယဟိဝၤယွၤအကလုၢ်အဃိ အမၤစှၤလီၤသုးဖိနီၣ်ဂံၢ် ဒီးအဃုထၢက့ၤထဲသုးဖိ အဂၤ ၃၀၀ လၢအအိၣ်ဒီးတၢ်ပလီၢ်သး (ကွၢ်လံာ်အဆၢ ၉)
၉. စီၤကံးဒဧိၣ် ကဒိကနၣ်ယဟိဝၤယွၤ ဒီးကအိၣ်ဒီးတၢ်သးဒူအဂီၢ် ဘၣ်မနုၤအဃိ ကကီလဲၣ်. (ကွၢ်တၢ်ဂီၤလၢ လံာ်ကုခိၣ်.)
၉ ဖဲစီၤကံးဒဧိၣ် ကဲထီၣ်စံၣ်ညီၣ်ကွီၢ် ဝံၤအလီၢ်ခံ အကဘၣ်အိၣ်ဒီး တၢ်ဒိကနၣ် ဒီးတၢ်သးဒူ အါထီၣ်. စီၤကံးဒဧိၣ် န့ၢ်ဘၣ်မူဒါလၢ အကဘၣ်မၤဟးဂီၤကွံာ် အပါအတၢ်လုၢ်လီၢ်လၢ အပါတ့ထီၣ်ဝဲလၢ ဘဧၤလးအဂီၢ် ဒီးမူဒါအံၤ တညီဘၣ်. (စံၣ်ညီၣ်ကွီၢ် ၆:၂၅, ၂၆) လၢခံ ဖဲစီၤကံးဒဧိၣ် ပာ်ဖှိၣ်ထီၣ် သုးဖိလၢကလဲၤဒုးတၢ် ဝံၤအလီၢ်ခံ ယဟိဝၤယွၤ မၢအမၤလီၤစှၤဝဲ သုးဖိနီၣ်ဂံၢ် ခံဘျီညါ. (စံၣ်ညီၣ်ကွီၢ် ၇:၂-၇) ဒီးလၢခံကတၢၢ်န့ၣ် ယဟိဝၤယွၤ မၢအလဲၤဒုးဝဲ အဒုၣ်ဒါအဒဲကဝီၤ လၢမုၢ်နၤခီ.—စံၣ်ညီၣ်ကွီၢ် ၇:၉-၁၁.
၁၀. တၢ်အိၣ်ဖှိၣ်သးပှၢ်တဖၣ် ကအိၣ်ဒီးတၢ်ဒိကနၣ်အဂီၢ် ဘၣ်မနုၤအဃိ တဘျီတခီၣ်န့ၣ် ကကီလဲၣ်.
၁၀ တၢ်အိၣ်ဖှိၣ်သးပှၢ်တဖၣ် ကဘၣ် “အိၣ်ကတဲာ်ကတီၤအသးလၢ ကဒိကနၣ်တၢ်အဂီၢ်.” (ယၤကိာ် ၃:၁၇) တၢ်အိၣ်ဖှိၣ်သးပှၢ်လၢ အအိၣ်ဒီးတၢ်ဒိကနၣ်န့ၣ် အကမၤထွဲတၢ်လၢ လံာ်စီဆှံတဲဝဲ ဒီးကမၤထွဲဝဲ တၢ်ကရၢကရိ အတၢ်ဟံးစုနဲၣ်ကျဲ ထီဘိ. တဘျီတခီၣ် မ့ၢ်ကီလၢအက ဒိကနၣ်တၢ်နာ်က့ အကပာ်လီၤ တၢ်ဒိတၢ်တဲာ်အဂ့ၤလၢ ပှၤဂၤအဂီၢ်. အဒိ အကန့ၢ်ဘၣ် တၢ်သိၣ်လိနဲၣ်လိ ဒီဒူၣ် မ့တမ့ၢ် တၢ်ဟံးစုနဲၣ်ကျဲတနီၤ ဆီတလဲသးချ့မးအဃိ အကမၤထွဲဝဲအဂီၢ် ကီဒိၣ်မး. ဒီးတဘျီတခီၣ် အကဆိမိၣ်ဘၣ်လၢ တၢ်ဟံးစုနဲၣ်ကျဲတနီၤန့ၣ် အတလိၤအါအါဘၣ်. မ့တမ့ၢ် အကန့ၢ်ဘၣ်မူဒါတခါခါ ဒီးခီဖျိလၢ မူဒါအံၤအဃိ ပှၤကဖီၣ်အီၤ. ဖဲတၢ်အိၣ်ဖှိၣ်သးပှၢ်တဖၣ် ထံၣ်ဘၣ်တၢ်အိၣ်သး ဒ်န့ၣ်အခါ အဝဲသ့ၣ်ကွၢ်လိ စီၤကံးဒဧိၣ် အတၢ်ဒိကနၣ် ကသ့ဒ်လဲၣ်.
၁၁. တၢ်အိၣ်ဖှိၣ်သးပှၢ်တဖၣ် ကဒိကနၣ် ယဟိဝၤယွၤအဂီၢ် ကဘၣ်မၤမနုၤလဲၣ်.
၁၁ ဒိကနၣ် ဒီးမၤထွဲတၢ်ဟံးစုနဲၣ်ကျဲ လီၤတံၢ်လီၤဆဲး. စီၤကံးဒဧိၣ် ကဘၣ်မၤဟးဂီၤကွံာ် အပါအတၢ်လုၢ်လီၢ်ဒ်လဲၣ်, အကဘၣ်တ့ထီၣ် ယဟိဝၤယွၤအတၢ်လုၢ်လီၢ်ဖဲလဲၣ် ဒီးအကဘၣ်လုၢ်ထီၣ် ဆၣ်ဖိကီၢ်ဖိ မနုၤလဲၣ်န့ၣ် ယဟိဝၤယွၤ တဲဘၣ်အီၤ. ပထံၣ်ဘၣ်လၢ စီၤကံးဒဧိၣ်တတဲအါတၢ်ဘၣ် ဒီးအမၤထွဲဒ် ယဟိဝၤယွၤ မၢအီၤခဲလၢာ်. ဆၢကတီၢ်ခဲအံၤ တၢ်အိၣ်ဖှိၣ်သးပှၢ်တဖၣ် န့ၢ်ဘၣ်တၢ်ဟံးစုနဲၣ်ကျဲလၢ တၢ်ကရၢကရိအအိၣ် ဒ်သိးဒီး လံာ်ပရၢ, တၢ်ဘိးဘၣ်သ့ၣ်ညါ, တၢ်ဟံးစုနဲၣ်ကျဲလၢ ကမၤစၢၤပှၤ ဒ်သိး ပကအိၣ်ဘၣ် ပူၤပူၤဖျဲးဖျဲး ဒီးပကဆဲးအိၣ်ဒီး တၢ်ရ့လိာ်သးဒီး ယဟိဝၤယွၤလၢအဂ့ၤ. တၢ်အိၣ်ဖှိၣ်သးပှၢ်တဖၣ်န့ၣ် ပအဲၣ်အဝဲသ့ၣ်ဒိၣ်မး. ဒီးခီဖျိလၢ အဝဲသ့ၣ် အိၣ်ဒီးတၢ်သးတီ ဒီးမၤထွဲ တၢ်ကရၢကရိ အတၢ်ဟံးစုနဲၣ်ကျဲ အဃိ တၢ်အိၣ်ဖှိၣ်ဒီတဖျၢၣ် ဒိးန့ၢ်ဘၣ်အဘျုး.—စံးထီၣ်ပတြၢၤ ၁၁၉:၁၁၂.
၁၂. တၢ်ဆီတလဲ မ့ၢ်အိၣ်ထီၣ်လၢ တၢ်ကရၢကရိ အတၢ်ဟံးစုနဲၣ်ကျဲန့ၣ် တၢ်အိၣ်ဖှိၣ်သးပှၢ်တဖၣ် မၤထွဲ ဧ့ၤဘြံၤ ၁၃:၁၇ သ့ဒ်လဲၣ်.
၁၂ သးအိၣ်မၤထွဲ တၢ်ဆီတလဲ. သ့ၣ်နီၣ်ထီၣ်က့ၤလၢ ယဟိဝၤယွၤ မၢစီၤကံးဒဧိၣ် မၤစှၤလီၤသုးဖိနီၣ်ဂံၢ် ဘူးကလၢာ်ညါ. (စံၣ်ညီၣ်ကွီၢ် ၇:၈) ဘၣ်သ့ၣ်သ့ၣ် စီၤကံးဒဧိၣ် ကဆိမိၣ်ဝဲလၢ ‘တၢ်ဆီတလဲတခါအံၤ မ့ၢ်အလိၣ်ထဲန့ၣ်ညါဧါ ဒီးမ့ၢ်အဘၣ်ကၠ့ၤဧါ.’ သနာ်က့ စီၤကံးဒဧိၣ် ဒိကနၣ်ယဟိဝၤယွၤ အကလုၢ်. ဆၢကတီၢ်ခဲအံၤ တၢ်ဆီတလဲ မ့ၢ်အိၣ်ထီၣ်လၢ တၢ်ကရၢကရိ အတၢ်ဟံးစုနဲၣ်ကျဲန့ၣ် တၢ်အိၣ်ဖှိၣ်သးပှၢ်တဖၣ် ကွၢ်လိ စီၤကံးဒဧိၣ်သ့. (ဖး ဧ့ၤဘြံၤ ၁၃:၁၇.) အဒိ ဖဲ ၂၀၁၄ န့ၣ်ပှၤပၢဆှၢတၢ်ကမံးတံာ် ဆီတလဲတၢ်ရဲၣ်တၢ်ကျဲၤ ဘၣ်ဃးဒီး ပှၤကသူ တၢ်မၤဘူၣ်လၢ ပှၤကတ့ထီၣ်ဘှီထီၣ် ဘီမုၢ်ဘျီၣ်ဒိၣ် ဒီးကဝီၤဘျီၣ်ဒိၣ်အဂီၢ်. (၂ ကရံၣ်သူး ၈:၁၂-၁၄) လၢညါ ပှၤမ့ၢ်တ့ထီၣ် ဘီမုၢ်ဘျီၣ်ဒိၣ်န့ၣ် တၢ်ကရၢကရိ ဟ့ၣ်လီၤဆိစ့ ဒီးလၢခံန့ၣ် တၢ်အိၣ်ဖှိၣ်ဖိ ဘၣ်က့ၤဟ့ၣ်စ့လၢ တၢ်ကရၢကရိအအိၣ်. မ့မ့ၢ်ခဲအံၤန့ၣ် တၢ်ကရၢကရိသူဝဲ တၢ်မၤဘူၣ်လၢ ဟီၣ်ခိၣ်ဒီဘ့ၣ်အဂီၢ် လၢကမၤစၢၤတၢ်လီၢ်လၢ ပှၤကတ့ထီၣ် ဘီမုၢ်ဘျီၣ်ဒိၣ် ဒီးကဝီၤဘျီၣ်ဒိၣ်. အဃိ လီၢ်ကဝီၤ တၢ်အိၣ်ဖှိၣ် အစ့မ့ၢ်အိၣ်ထဲ တစဲးဖိနာ်က့ တလိၣ်လၢ ကဘၣ်ဟ့ၣ်က့ၤစ့လၢ တၢ်ကရၢကရိ အအိၣ်လၢၤဘၣ်. ဖဲဒီပုၢ်ဝဲၢ်ခွါဟိၤစ့ နၢ်ဟူ တၢ်ဆီတလဲအံၤအခါ အဆိမိၣ်ဝဲ ‘လၢပအိၣ်တၢ်လီၢ်န့ၣ် ပှၤတမၤဝဲဒ်န့ၣ်ဘၣ်. ပှၤမ့ၢ်မၤဒ်န့ၣ်ဒု ပှၤတ့ထီၣ် ဘီမုၢ်ဘျီၣ်ဒိၣ် တဝံၤနီတဖျၢၣ်ဘၣ်.’ ဘၣ်ဆၣ် တၢ်မနုၤမၤစၢၤ ဒီပုၢ်ဝဲၢ်ခွါဟိၤစ့လၢ ကတူၢ်လိာ် တၢ်ဟံးစုနဲၣ်ကျဲအံၤလဲၣ်. အတဲဝဲလၢ “တၢ်ကတိၤဖဲ ကတိၤဒိ ၃:၅, ၆ န့ၣ် ဒုးသ့ၣ်နီၣ်ယၤလၢ ယကဘၣ်နာ်န့ၢ် ယဟိဝၤယွၤ. လၢခံ ယထံၣ်ဘၣ်လၢ တၢ်ဆီတလဲအံၤ ကဲထီၣ်သးဂ့ၤမး. ခဲအံၤန့ၣ် တၢ်ကရၢကရိတ့အါထီၣ် ဘီမုၢ်ဘျီၣ်ဒိၣ်ဒီဒူၣ် တကးဒံးဘၣ် ဒ်သိး တၢ်အိၣ်ဖှိၣ်ကန့ၢ်ဘၣ် တၢ်မၤစၢၤ ဒ်သိးသိးအဂီၢ် ပဟ့ၣ်တၢ်မၤဘူၣ် သ့အါမး.”
ပမ့ၢ်အိၣ်လၢ တၢ်လီၢ်လၢ ပှၤတြီဃာ် ပတၢ်ဖံးတၢ်မၤနာ်က့ ပကဘၣ် အိၣ်ဒီးတၢ်သးဒူ ဒီးစံၣ်တဲၤတဲလီၤတၢ် သ့သ့ဘၣ်ဘၣ် (ကွၢ်လံာ်အဆၢ ၁၃)
၁၃. (က) စီၤကံးဒဧိၣ် နာ်န့ၢ်ဝဲမနုၤလဲၣ်. (ခ) တၢ်အိၣ်ဖှိၣ်သးပှၢ်တဖၣ် ကွၢ်လိ စီၤကံးဒဧိၣ် အဒိအတဲာ် ကသ့ဒ်လဲၣ်. (ကွၢ်စ့ၢ်ကီးတၢ်ဂီၤ.)
၁၃ အိၣ်ဒီးတၢ်သးဒူ ဒီးမၤထွဲယဟိဝၤယွၤ အတၢ်ဘၣ်သး. စီၤကံးဒဧိၣ် န့ၢ်ဘၣ်မူဒါလၢ အလီၤဘၣ်ယိၣ် ဒီးအပျံၤတၢ်နာ်က့ အဒိကနၣ် ယဟိဝၤယွၤအကလုၢ် ဒီးအမၤထွဲဝဲ. (စံၣ်ညီၣ်ကွီၢ် ၉:၁၇) တကးဒံးဘၣ် ဒ်သိးစီၤကံးဒဧိၣ် ကဒီသဒၢ ယဟိဝၤယွၤ အပှၤဂီၢ်မုၢ်အဂီၢ် ယဟိဝၤယွၤအၢၣ်လီၤလၢ အကအိၣ်ဒီးအီၤအဃိ စီၤကံးဒဧိၣ် နာ်ဝဲသပှၢ်တၢၢ်လၢ ယဟိဝၤယွၤ ကမၤစၢၤအီၤ. ဆၢကတီၢ်ခဲအံၤ တၢ်အိၣ်ဖှိၣ်သးပှၢ်လၢ အအိၣ်လၢ တၢ်လီၢ်လၢ ပှၤတြီဃာ်ပတၢ်ဖံးတၢ်မၤစ့ၢ်ကီး အဝဲသ့ၣ်ကွၢ်လိ စီၤကံးဒဧိၣ် အဒိအတဲာ်. အဝဲသ့ၣ် သ့ၣ်ညါဝဲလၢ အမ့ၢ်တီခိၣ်ရိၤမဲတၢ်လၢ တၢ်အိၣ်ဖှိၣ် ဒီးတၢ်စံၣ်တဲၤတဲလီၤန့ၣ် ပှၤကဖီၣ်အီၤ, ပှၤကသံကွၢ်သံဒိးအီၤ, ပှၤတပျဲအမၤတၢ်လၢၤဘၣ် ဒီးပှၤကမၤဆါအီၤ သနာ်က့ အဝဲသ့ၣ်အိၣ်ဒီးတၢ်သးဒူ ဒီးမၤဝဲဒံး. c ဖဲတၢ်နးတၢ်ဖှီၣ်ဖးဒိၣ် အဆၢကတီၢ်န့ၣ် တၢ်အိၣ်ဖှိၣ်သးပှၢ်တဖၣ် ကန့ၢ်ဘၣ်တၢ်ဟံးစုနဲၣ်ကျဲ ဒီးတၢ်ဟံးစုနဲၣ်ကျဲတဖၣ်န့ၣ် မ့ၢ်လီၤဘၣ်ယိၣ်သနာ်က့ အဝဲသ့ၣ် ကဘၣ်အိၣ်ဒီးတၢ်သးဒူလၢ ကမၤထွဲဝဲအဂီၢ်. အဒိ အဝဲသ့ၣ် ကန့ၢ်ဘၣ်တၢ်ဟံးစုနဲၣ်ကျဲ ဒ်သိးဒီး ပကဘၣ် စံၣ်တဲၤတဲလီၤ တၢ်စံၣ်ညီၣ်အကစီၣ်ဒ်လဲၣ် ဒီးဖဲစီၤကိးလၢကီၢ်မါကူး ဟဲဒုးပှၤအခါ ဒ်သိးပကပူၤဖျဲးအဂီၢ် ပကဘၣ်မၤဒ်လဲၣ်.—ယဃ့းစက့လး ၃၈:၁၈; လီၣ်ဖျါ ၁၆:၂၁.
ဖဲနကဘၣ်မၤအါထီၣ် တၢ်တူၢ်န့ၢ်ခီၣ်ကဲ
၁၄. ဘၣ်မနုၤအဃိ စီၤကံးဒဧိၣ် ဘၣ်မၤအါထီၣ် တၢ်တူၢ်န့ၢ်ခီၣ်ကဲလဲၣ်.
၁၄ စီၤကံးဒဧိၣ် ကဲစံၣ်ညီၣ်ကွီၢ် အဃိ အဘၣ်မၤတၢ်ဆူၣ်မး. အဒိ ဖဲတၢ်ဒုးကဲထီၣ်လၢမုၢ်နၤခီ ဒီးပှၤမံးဒယၣ်ဖိ ဃ့ၢ်ပူၤဖျဲးသးအခါ စီၤကံးဒဧိၣ် လူၤအဝဲသ့ၣ် စးထီၣ်လၢ ယံးစရ့လး အတၢ်တြီၤပူၤ ဒီးတုၤလၢ ထံကျိယၢ်ဒ့ၣ် လၢအအိၣ်ဒီးတပှီာ်ဒီဒူၣ်. (စံၣ်ညီၣ်ကွီၢ် ၇:၂၂) စီၤကံးဒဧိၣ် ဒီးအပှၤသုးဖိ အဂၤ ၃၀၀ န့ၣ်လီၤဘှံးသနာ်က့ အဝဲသ့ၣ် တပတုာ်ဖဲ ထံကျိယၢ်ဒ့ၣ်ဘၣ်. အဝဲသ့ၣ် ခီဂာ်ထံကျိ ဒီးဆဲးလူၤဝဲ ပှၤမံးဒယၣ်ဖိ. လၢခံဘျီ အဝဲသ့ၣ်လူၤဝဲ ပှၤမံးဒယၣ်ဖိချုး ဒီးမၤနၢၤကွံာ်အဝဲသ့ၣ်.—စံၣ်ညီၣ်ကွီၢ် ၈:၄-၁၂.
၁၅. ဘၣ်မနုၤအဃိ တၢ်အိၣ်ဖှိၣ်သးပှၢ်တဖၣ် ကဘၣ်မၤအါထီၣ် တၢ်တူၢ်န့ၢ်ခီၣ်ကဲလဲၣ်.
၁၅ ဘၣ်သ့ၣ်သ့ၣ် တၢ်အိၣ်ဖှိၣ်သးပှၢ်တဂၤ ဘၣ်ကွၢ်ထွဲတၢ်လၢ တၢ်အိၣ်ဖှိၣ်ပူၤ ဒီးဘၣ်ကွၢ်ထွဲ အဟံၣ်ဖိဃီဖိအဃိ တဘျီတခီၣ် အဂံၢ်ဘါကလၢာ် ဒီးသးကလီၤဘှံးဒိၣ်မး. တၢ်အိၣ်ဖှိၣ်သးပှၢ်တဖၣ် မ့ၢ်ထံၣ်ဘၣ် တၢ်အိၣ်သးဒ်အံၤန့ၣ် အဝဲသ့ၣ်ကွၢ်လိ စီၤကံးဒဧိၣ် အဒိအတဲာ် ကသ့ဒ်လဲၣ်.
တၢ်အိၣ်ဖှိၣ်သးပှၢ်တဖၣ် ဟ့ၣ်ဂံၢ်ဟ့ၣ်ဘါ ဒီးမၤမုာ်ထီၣ် ပှၤလၢအလိၣ်ဘၣ်တၢ်မၤစၢၤတဖၣ် (ကွၢ်လံာ်အဆၢ ၁၆-၁၇)
၁၆-၁၇. (က) စီၤကံးဒဧိၣ် ကအိၣ်ဒီး တၢ်တူၢ်န့ၢ်ခီၣ်ကဲအဂီၢ် အမၤဝဲဒ်လဲၣ်. (ခ) တၢ်အိၣ်ဖှိၣ်သးပှၢ်တဖၣ် ကဘၣ်နာ်ဝဲ မနုၤလဲၣ်. (ယၡါယၤ ၄၀:၂၈-၃၁) (ကွၢ်စ့ၢ်ကီးတၢ်ဂီၤ.)
၁၆ နာ်လၢယဟိဝၤယွၤ ကမၤဆူၣ်ထီၣ်နဂံၢ်ဘါ. စီၤကံးဒဧိၣ် နာ်ဝဲလၢ ယဟိဝၤယွၤ ကမၤဆူၣ်ထီၣ်အဂံၢ်ဘါ ဒီးယဟိဝၤယွၤ မၤဆူၣ်ထီၣ်အဂံၢ်ဘါနီၢ်ကီၢ်. (စံၣ်ညီၣ်ကွီၢ် ၆:၁၄, ၃၄) ဘၣ်တဘျီန့ၣ် စီၤကံးဒဧိၣ် ဒီးအပှၤသုးဖိတဖၣ် ဃ့ၢ်လူၤဝဲ ပှၤမံးဒယၣ်ဖိအစီၤပၤခံဂၤ လၢအဒိးဝဲကီၤလၤအူး. (စံၣ်ညီၣ်ကွီၢ် ၈:၁၂, ၂၁) ယဟိဝၤယွၤ မၤစၢၤပှၤအံၣ်စရ့လးဖိအဃိ အဝဲသ့ၣ် မၤနၢၤကွံာ် အဒုၣ်အဒါ. ယဟိဝၤယွၤန့ၣ် အကဲပှၤလၢအ “တလီၤဘှံး ဒီးအဂံၢ်ဘါတလီၤစၢ် နီတဘျီဘၣ်.” (ဖး ယၡါယၤ ၄၀:၂၈-၃၁.) အဃိ တၢ်အိၣ်ဖှိၣ်သးပှၢ်တဖၣ် သန့ၤအသးလၢ ယဟိဝၤယွၤ ဒီးယဟိဝၤယွၤ ဟ့ၣ်အဝဲသ့ၣ် တၢ်ဂံၢ်တၢ်ဘါ.
၁၇ အဒိ ဒီပုၢ်ဝဲၢ်ခွါမဲၣ်သယူန့ၣ် အမၤတၢ်လၢ ကမံးတံာ်လၢ အဆဲးကျိးဒီး တၢ်ဆါဟံၣ်. ဒ်သိး အကမၤအါထီၣ် အတၢ်တူၢ်န့ၢ်ခီၣ်ကဲအဂီၢ် အမၤဝဲဒ်လဲၣ်. ဒီပုၢ်ဝဲၢ်ခွါမဲၣ်သယူ တဲဝဲလၢ “ဒ်ဖံလံးပံၤ ၄:၁၃ ပာ်ဖျါထီၣ်ဝဲအသိး ဖဲယလီၤဘှံးဒိၣ်မး ဒီးယဆိမိၣ်လၢ ယမၤတၢ်တကဲနီမံၤလၢၤဘၣ်အခါ ယထံၣ်ဘၣ်လၢ ယဟိဝၤယွၤ ဟ့ၣ်ယၤတၢ်ဂံၢ်တၢ်ဘါ. ယဃ့ထုကဖၣ်ဆူၣ်ဆူၣ် ဒီးဃ့ကညး ယဟိဝၤယွၤလၢ အကဟ့ၣ်ယၤ တၢ်ဂံၢ်တၢ်ဘါ လၢနီၢ်ခိ ဒီးနီၢ်သး ဒ်သိးယကမၤစၢၤ ယဒီပုၢ်ဝဲၢ်မုၣ်ခွါအဂီၢ်. ဖဲန့ၣ် ယသ့ၣ်ညါလၢ ယဟိဝၤယွၤ မၤဆူၣ်ထီၣ်ယသး ဒီးမၤစၢၤယၤ ဒ်သိးဒီး ယလဲၤခီဖျိတၢ်ကန့ၢ်.” ဒ်စီၤကံးဒဧိၣ်အသိး ပတၢ်အိၣ်ဖှိၣ်သးပှၢ်တဖၣ်စ့ၢ်ကီး ထံၣ်ဘၣ်တၢ်ကီတၢ်ခဲအါမးနာ်က့ ဒ်သိးအဝဲသ့ၣ် ကကွၢ်ထွဲ ယဟိဝၤယွၤ အခ့အပှၤအဂီၢ် အဝဲသ့ၣ်မၤတၢ်ဆူၣ်မး. ဘၣ်ဆၣ် တၢ်အိၣ်ဖှိၣ်သးပှၢ်တဖၣ်န့ၣ် ကဘၣ်အိၣ်ဒီး တၢ်ဆီၣ်လီၤသး ဒီးကဘၣ်သ့ၣ်ညါလီၤအသးလၢ အဝဲသ့ၣ်မၤတၢ်လၢ အဘၣ်သးမၤဝဲကီးမံၤဒဲး တသ့ဘၣ်. တကးဒံးဘၣ် ဒ်သိးအဝဲသ့ၣ် တၢ်တူၢ်န့ၢ်ခီၣ်ကဲ ကအိၣ်အါထီၣ်အဂီၢ် အဝဲသ့ၣ်ကဘၣ်နာ်ဝဲလၢ ယဟိဝၤယွၤ နၢ်ဟူအဝဲသ့ၣ် တၢ်ဃ့ကညး ဒီးကမၤဆူၣ်ထီၣ်အဂံၢ်အဘါ.—စံးထီၣ်ပတြၢၤ ၁၁၆:၁; ဖံလံးပံၤ ၂:၁၃.
၁၈. တၢ်အိၣ်ဖှိၣ်သးပှၢ်တဖၣ် ကွၢ်လိစီၤကံးဒဧိၣ် အဒိအတဲာ် ကသ့ဒ်လဲၣ်.
၁၈ တၢ်အိၣ်ဖှိၣ်သးပှၢ်တဖၣ် မၤလိန့ၢ်တၢ်လၢ စီၤကံးဒဧိၣ် အဒိအတဲာ်သ့ဒီဒူၣ်. ဖဲတၢ်အိၣ်ဖှိၣ်သးပှၢ်တဖၣ် တူၢ်လိာ်မူဒါအခါ, ဖဲပှၤတဲဆါအဝဲသ့ၣ်အခါ ဒီးဖဲပှၤပတြၢၤအဝဲသ့ၣ်အခါ အဝဲသ့ၣ် ကဘၣ်အိၣ်ဒီး တၢ်ဆီၣ်လီၤသး. ဆၢကတီၢ်ခဲအံၤ ပအိၣ်မူဘၣ်လၢ ဟီၣ်ခိၣ်လၢမုၣ်ကီၤလံၢ် ပၢဝဲအံၤ ကကတၢၢ်ဘူးထီၣ်လံအဃိ တၢ်အိၣ်ဖှိၣ်သးပှၢ်တဖၣ် ကဘၣ်အိၣ်ဒီး တၢ်ဒိကနၣ် ဒီးတၢ်သးဒူ အါန့ၢ်ဒံးလၢညါ. ဒီးအဝဲသ့ၣ် မ့ၢ်ထံၣ်ဘၣ်ဒီး တၢ်ကီတၢ်ခဲ တမံၤဂ့ၤတမံၤဂ့ၤနာ်က့ အဝဲသ့ၣ် ကဘၣ်နာ်ဝဲလၢ ယဟိဝၤယွၤ ကမၤစၢၤအဝဲသ့ၣ်. ပတၢ်အိၣ်ဖှိၣ်သးပှၢ်တဖၣ်အံၤ မၤတၢ်ဆူၣ်မးအဃိ ပစံးဘျုးအဝဲသ့ၣ် ဒီးပကဘၣ် ‘ဆဲးပာ်ဖျါထီၣ်လၢ ပပာ်လုၢ်ပာ်ပှ့ၤ အဝဲသ့ၣ်.’—ဖံလံးပံၤ ၂:၂၉.
တၢ်သးဝံၣ် ၁၂၀ ကွၢ်လိမၤဒိး ယ့ၣ်ၡူးအတၢ်သးစူၤ
a ဖဲပှၤအံၣ်စရ့လးဖိတဖၣ် ထံၣ်ဘၣ်တၢ်ကီတၢ်ခဲ နးမးအခါန့ၣ် ယဟိဝၤယွၤ ဃုထၢထီၣ်ဝဲ စီၤကံးဒဧိၣ်လၢ ကတီခိၣ်ရိၤမဲ ဒီးဒီသဒၢအဝဲသ့ၣ်. ဖဲစီၤကံးဒဧိၣ် မၤဝဲမူဒါအံၤအခါ အထံၣ်ဘၣ်ဒီး တၢ်ကီတၢ်ခဲဒီဒူၣ်. ဘၣ်ဆၣ် အမၤဝဲမူဒါလၢ တၢ်သးတီန့ၢ်အနံၣ် ၄၀ ညါ. ဆၢကတီၢ်ခဲအံၤ တၢ်အိၣ်ဖှိၣ်သးပှၢ်တဖၣ် မ့ၢ်ထံၣ်ဘၣ်ဒီး တၢ်မၤကွၢ်န့ၣ် စီၤကံးဒဧိၣ် အဒိအတဲာ် မၤစၢၤအဝဲသ့ၣ် သ့ဒ်လဲၣ်န့ၣ် ပကတဲသကီး.
b ပမ့ၢ်အိၣ်ဒီးတၢ်ဆီၣ်လီၤသးန့ၣ် ပတဆိမိၣ်ဒိၣ်လီၤသးဘၣ် ဒီးပသ့ၣ်ညါလီၤသးလၢ ပမၤတၢ်တသ့ခဲလၢာ်ဘၣ်. တကးဒံးဘၣ် ပပာ်ကဲပှၤဂၤ ဒီးပဆိမိၣ်လၢ ပှၤဂၤဂ့ၤဒိၣ်န့ၢ်ဒံးပှၤ.—ဖံလံးပံၤ ၂:၃.
c ကွၢ်တၢ်ဂ့ၢ် လၢအမ့ၢ် “ဖဲပဒိၣ်ပပှၢ်တြီဃာ် ပတၢ်ဖံးတၢ်မၤတဖၣ်အခါ ဆဲးဘူၣ်ထီၣ်ဘါထီၣ် ယဟိဝၤယွၤ” လၢအအိၣ်ဖဲ လါယူၤလံ ၂၀၁၉, တၢးထီခိးတၢ်, ကဘျံးပၤ ၁၀-၁၁, လံာ်အဆၢ ၁၀-၁၃.
