ပှၤဖးလံာ်ဖိတဖၣ် အတၢ်သံကွၢ်
ယ့ၣ်ၡူး အိၣ်ဖျဲၣ်ထီၣ် ဝံၤအလီၢ်ခံ ဘၣ်မနုၤအဃိ နီၢ်မၤရံ ဒီးစီၤယိၤသး ဆဲးအိၣ်ဒံးလၢ ဝ့ၢ်ဘ့ၤသလ့ဃ့ၣ် ဒီးတက့ၤကဒါလၢ ဝ့ၢ်နစၤရ့း တဘျီဃီဘၣ်လဲၣ်.
လံာ်စီဆှံ တတဲဝဲဘၣ်. ဘၣ်ဆၣ် ဖဲန့ၣ်အဆၢကတီၢ် ဘၣ်မနုၤအဃိ အဝဲသ့ၣ် ဆၢတဲာ်လီၤသးလၢ တက့ၤကဒါလၢ ဝ့ၢ်နစၤရ့း တဘျီဃီဘၣ်လဲၣ်န့ၣ် လံာ်စီဆှံ ပာ်ဖျါထီၣ်န့ၢ်ပှၤ တၢ်ဂ့ၢ်တနီၤ.
မူခိၣ်ကလူးတဂၤ တဲဘၣ် နီၢ်မၤရံလၢ နီၢ်မၤရံကဒၢထီၣ် ဒီးကအိၣ်ဖျဲၣ်ထီၣ်အဖိ. ဖဲမူခိၣ်ကလူးတဂၤ တဲဘၣ် နီၢ်မၤရံလၢ တၢ်ကစီၣ်အံၤအခါ နီၢ်မၤရံ ဒီးစီၤယိၤသး အိၣ်လၢဝ့ၢ်နစၤရ့း ဖဲကၤလံလါ အဟီၣ်ကဝီၤ. (လူၤကၣ် ၁:၂၆-၃၁; ၂:၄) သနာ်က့ လၢခံ ဖဲအဝဲသ့ၣ် ဟးထီၣ်လၢ ကီၢ်အဲၤကူပတူးအခါ အဝဲသ့ၣ် က့ၤကဒါလၢ ဝ့ၢ်နစၤရ့း. ယ့ၣ်ၡူး ဒိၣ်ထီၣ်လၢ ဝ့ၢ်နစၤရ့း ဒီးအကဲထီၣ် ပှၤနစၤရ့းဖိ. (မးသဲ ၂:၁၉-၂၃) အဃိ ဖဲပတဲဘၣ်ဃး ယ့ၣ်ၡူး, စီၤယိၤသး ဒီးနီၢ်မၤရံအခါ ပကနီၣ်ဘၣ်လၢ အဝဲသ့ၣ် အိၣ်လၢဝ့ၢ်နစၤရ့း.
လၢယူဒၤအဟီၣ်ကဝီၤန့ၣ် နီၢ်မၤရံ အဘူးအတံၢ်အိၣ်တဂၤ လၢအမံၤမ့ၢ်ဝဲ နီၢ်အ့းလံၤစါဘ့း. နီၢ်အ့းလံၤစါဘ့းန့ၣ် အကဲဝဲ ပှၤလုၢ်တၢ်ဒိၣ်စီၤစဃၤရံအမါ ဒီးအကဲဝဲ ပှၤဘျၢတၢ်စီၤယိၤဟၣ်အမိ. (လူၤကၣ် ၁:၅, ၉, ၁၃, ၃၆) နီၢ်မၤရံ လဲၤအိၣ်သကိး နီၢ်အ့းလံၤစါဘ့း ဒီးအိၣ်ဒီး နီၢ်အ့းလံၤစါဘ့းဖဲန့ၣ်သၢလါ. ဝံၤဒီး နီၢ်မၤရံ က့ၤကဒါလၢ ဝ့ၢ်နစၤရ့း. (လူၤကၣ် ၁:၃၉, ၄၀, ၅၆) အဃိ ယူဒၤအဟီၣ်ကဝီၤ အတၢ်အိၣ်သး အိၣ်ဒ်လဲၣ်န့ၣ် နီၢ်မၤရံ သ့ၣ်ညါဘၣ်ဝဲတနီၤ.
လၢခံ ဖဲတၢ်ကလုၢ်လီၤလၢ ပှၤကဘၣ်က့ၤ “ဆဲးလီၤအမံၤ” အခါ ပထံၣ်ဘၣ်လၢ စီၤယိၤသး ဟးထီၣ်လၢ ဝ့ၢ်နစၤရ့း ဒီးက့ၤဝဲလၢ ဝ့ၢ်ဘ့ၤသလ့ဃ့ၣ် လၢအမ့ၢ် “စီၤဒၤဝံးအဝ့ၢ်.” တကးဒံးဘၣ် ဝံအတၢ်စံးပာ် အိၣ်ဝဲလၢ မ့းၡံအၤ ကအိၣ်ဖျဲၣ်ထီၣ်လၢ ဝ့ၢ်ဘ့ၤသလ့ဃ့ၣ်. (လူၤကၣ် ၂:၃, ၄; ၁ ၡမူၤအ့လး ၁၇:၁၅; ၂၀:၆; မံကၤ ၅:၂) နီၢ်မၤရံ အိၣ်ဖျဲၣ်ထီၣ်ယ့ၣ်ၡူး ဖဲန့ၣ်ဝံၤအလီၢ်ခံ ဘၣ်သ့ၣ်သ့ၣ် စီၤယိၤသး တဘၣ်သးလၢ နီၢ်မၤရံ ဒီးဖိသၣ် အိၣ်ဖျဲၣ်ထီၣ်သီအံၤ ကက့ၤကဒါဖးယံၤ လၢဝ့ၢ်နစၤရ့းဒံးဘၣ်. အဃိ အဝဲသ့ၣ်အိၣ်တ့ၢ်လၢ ဝ့ၢ်ဘ့ၤသလ့ဃ့ၣ် လၢအယံၤဝဲဒီး ဝ့ၢ်ယရူၤၡလ့ၣ် ၉ ကံလိမံထၢၣ် (ကအိၣ်ဝဲ ၆ မံးလး). ခီဖျိလၢ အဝဲသ့ၣ် အိၣ်တ့ၢ်ဖဲန့ၣ်အဃိ အဝဲသ့ၣ်လဲၤစိာ် အဖိအိၣ်ဖျဲၣ်ထီၣ်သီအံၤ လၢတၢ်လုၢ်ဟံၣ် ဒီးလုၢ်ထီၣ်တၢ် ဒ်စီၤမိၤၡ့တၢ်သိၣ်တၢ်သီ အိၣ်ဝဲအသိးန့ၣ်ညီဝဲ.—၃ မိၤၡ့ ၁၂:၂, ၆-၈; လူၤကၣ် ၂:၂၂-၂၄.
လၢခီၣ်ထံးန့ၣ် ကစၢ်ယွၤ အမူခိၣ်ကလူး တဲဘၣ် နီၢ်မၤရံလၢ အဖိခွါန့ၣ် ကန့ၢ်ဘၣ် “စီၤဒၤဝံး အလီၢ်ပစိာ်” ဒီးကပၢတၢ် “ဒ်စီၤပၤတဂၤအသိး.” အဃိ ဘၣ်သ့ၣ်သ့ၣ် နီၢ်မၤရံ ဒီးစီၤယိၤသး ဆိမိၣ်ဝဲလၢ ယ့ၣ်ၡူး အိၣ်ဖျဲၣ်ထီၣ်လၢ စီၤဒၤဝံးအဝ့ၢ်န့ၣ် တၢ်အရ့ဒိၣ် ကဘၣ်အိၣ်တမံၤမံၤ. (လူၤကၣ် ၁:၃၂, ၃၃; ၂:၁၁, ၁၇) ဒီးဘၣ်သ့ၣ်သ့ၣ် နီၢ်မၤရံ ဒီးစီၤယိၤသး ကဆိမိၣ်ဝဲလၢ အကဘၣ်အိၣ်တ့ၢ်ဒံးဖဲန့ၣ်တုၤလၢ အသ့ၣ်ညါဘၣ်တၢ်လၢ ကစၢ်ယွၤ ဘၣ်သးလၢ အဝဲသ့ၣ်ကမၤဝဲ.
တကးဒံးဘၣ် ဖဲပှၤမၤကူးဖိတနီၤ ဟဲတုၤလၢ ဝ့ၢ်ဘ့ၤသလ့ဃ့ၣ်အခါ နီၢ်မၤရံ, စီၤယိၤသး ဒီးဖိသၣ် အိၣ်ဖဲ ဝ့ၢ်ဘ့ၤသလ့ဃ့ၣ် ယံာ်ထဲလဲၣ်လံန့ၣ် ပတသ့ၣ်ညါဘၣ်. သနာ်က့ ဖဲန့ၣ်အဆၢကတီၢ် အဝဲသ့ၣ် အိၣ်လၢဟံၣ်ပူၤ ဒီးအဝဲသ့ၣ် အဖိခွါန့ၣ် ကဲဝဲ “ဖိသၣ်” လံ, အတကဲ ဖိသၣ်အိၣ်ဖျဲၣ်ထီၣ်သီသီလၢၤဘၣ်. (မးသဲ ၂:၁၁) အဃိ ပသ့ၣ်ညါဘၣ်လၢ နီၢ်မၤရံ ဒီးစီၤယိၤသး တက့ၤကဒါလၢ ဝ့ၢ်နစၤရ့း တဘျီဃီဘၣ်, ဘၣ်ဆၣ် အဆဲးအိၣ်ဒံးလၢ ဝ့ၢ်ဘ့ၤသလ့ဃ့ၣ် တတီၤဖိညါ.
စီၤဟ့ၤရိာ် ဟ့ၣ်လီၤ တၢ်ကလုၢ်လၢ ပှၤကမၤသံ “ကယဲၢ် ဖိသၣ်ပိာ်ခွါ ခံနံၣ်ဆူအဖီလာ် လၢအအိၣ်လၢ ဘ့ၤသလ့ဃ့ၣ် ဒီးတၢ်လီၢ်လၢ အခိၣ်အဃၢၤတဖၣ်.” (မးသဲ ၂:၁၆) အဃိ မူခိၣ်ကလူးတဂၤ ဟ့ၣ်ပလီၢ် စီၤယိၤသးလၢ တၢ်ဂ့ၢ်အံၤ. ဒီးခီဖျိလၢ တၢ်ဟ့ၣ်ပလီၢ်အံၤအဃိ နီၢ်မၤရံ, စီၤယိၤသး ဒီးယ့ၣ်ၡူး လဲၤဃ့ၢ်အိၣ်လၢ ကီၢ်အဲၤကူပတူး ဒီးအဝဲသ့ၣ် အိၣ်ဝဲဖဲန့ၣ် တုၤလၢ စီၤဟ့ၤရိာ်သံဝဲ. ဘၣ်ဆၣ် ဘၣ်မနုၤအဃိ အဝဲသ့ၣ် တက့ၤကဒါလၢ ဝ့ၢ်ဘ့ၤသလ့ဃ့ၣ်ဘၣ်လဲၣ်. ခီဖျိလၢ စီၤဟ့ၤရိာ် အဖိခွါ စီၤအၢ်ဃ့လး ပၢဝဲကီၢ်ယူဒၤ ဒီးအကဲ ပှၤအၢပှၤသီဒိၣ်မးတဂၤ. တကးဒံးဘၣ် မူခိၣ်ကလူး ဟ့ၣ်ပလီၢ်စ့ၢ်ကီး စီၤယိၤသးလၢ တဘၣ်က့ၤကဒါလၢ ဝ့ၢ်ဘ့ၤသလ့ဃ့ၣ်ဘၣ်အဃိ စီၤယိၤသး ကိးထီၣ်အဟံၣ်ဖိဃီဖိ ဒီးအဝဲသ့ၣ် က့ၤအိၣ်လၢ ဝ့ၢ်နစၤရ့း. ဒီးဖဲဝ့ၢ်နစၤရ့းန့ၣ် စီၤယိၤသး ကကွၢ်ဒိၣ်ထီၣ်ယ့ၣ်ၡူး ဒီးကမၤစၢၤယ့ၣ်ၡူးလၢ ကဘူၣ်ထီၣ်ဘါထီၣ် ကစၢ်ယွၤအဂီၢ် တၢ်လီၤဘၣ်ယိၣ် တအိၣ်ဘၣ်.—မးသဲ ၂:၁၉-၂၂; ၁၃:၅၅; လူၤကၣ် ၂:၃၉, ၅၂.
တချုးလၢ ယ့ၣ်ၡူးဘၣ်သံ ဒီးဒုးအိၣ်ထီၣ် တၢ်ခွဲးတၢ်ယာ်လၢ ပှၤကလဲၤထီၣ်လၢ မူခိၣ်ဒံးဘၣ်န့ၣ် ပထံၣ်ဘၣ်လၢ စီၤယိၤသးသံဆိလံ. ဘၣ်ဆၣ် စီၤယိၤသး ကဂဲၤဆၢထၢၣ်သမူထီၣ်က့ၤ လၢဟီၣ်ခိၣ်ချၢအဃိ ပှၤအါဂၤ ကထံၣ်ဘၣ်အီၤ. ဒီးဘၣ်မနုၤအဃိ ဖဲယ့ၣ်ၡူး အိၣ်ဖျဲၣ်ထီၣ်ဝံၤအလီၢ်ခံ အီၤဒီးနီၢ်မၤရံ ဆဲးအိၣ်ဒံးလၢ ဝ့ၢ်ဘ့ၤသလ့ဃ့ၣ်လဲၣ်န့ၣ် ပကသ့ၣ်ညါအါထီၣ်ဘၣ် တၢ်ဂ့ၢ်အံၤလၢ စီၤယိၤသးအအိၣ်.
