တၢ်မၤလိ ၃၃
တၢ်ဂဲၤဆၢထၢၣ်သမူထီၣ်က့ၤ ပာ်ဖျါထီၣ်ဝဲ ယဟိဝၤယွၤအတၢ်အဲၣ်, တၢ်ကူၣ်သ့ ဒီးတၢ်ဝံသးစူၤ
ပှၤ “ကဂဲၤဆၢထၢၣ်က့ၤလီၤ.” —မၤတၢ် ၂၄:၁၅.
တၢ်သးဝံၣ် ၁၅၁ ယွၤကကိး
တၢ်မၤလိအံၤ အတၢ်တိာ်ပာ် *
၁. ဘၣ်မနုၤအဃိ ယဟိဝၤယွၤတ့လီၤ တၢ်သးသမူလဲၣ်.
တဘျီအခါ ယဟိဝၤယွၤအိၣ်ထဲတဂၤဧိၤလီၤ. ဘၣ်ဆၣ် အတတူၢ်ဘၣ်လၢ အအိၣ်သယုၢ်ထဲတဂၤဧိၤဘၣ်. ယဟိဝၤယွၤတလိၣ်ဘၣ် ပှၤနီတဂၤလၢ ကမၤမုာ်အသးဘၣ်. ဘၣ်ဆၣ် ယဟိဝၤယွၤအဲၣ်ဒိးလၢ ပှၤဂၤကအိၣ်မူဘၣ် ဒီးကသးခုစ့ၢ်ကီးလီၤ. ခီဖျိလၢ တၢ်အဲၣ်တၢ်ကွံ ထိၣ်ဟူးထိၣ်ဂဲၤထီၣ်အီၤအဃိ ယဟိဝၤယွၤစးထီၣ်တ့လီၤတၢ်လီၤ.—စံးထီၣ်ပတြၢၤ ၃၆:၉; ၁ ယိၤဟၣ် ၄:၁၉.
၂. ဖဲယဟိဝၤယွၤတ့လီၤ တၢ်ခဲလၢာ်အခါ ယ့ၣ်ၡူးဒီးမူခိၣ်ကလူးတဖၣ် တူၢ်ဘၣ်ဝဲဒ်လဲၣ်.
၂ ယဟိဝၤယွၤတ့လီၤဝဲ အဖိခွါယ့ၣ်ၡူးအဆိကတၢၢ်လီၤ. ဝံၤဒီး ယဟိဝၤယွၤသူဝဲ အဖိခွါဝဲၢ်ကိလၢ ကတ့လီၤတၢ်ခဲလၢာ် ဖဲန့ၣ်အကျါ ပၣ်ဃုာ်ဒီး မူခိၣ်ကလူးတဖၣ်လီၤ. (ကလီးစဲ ၁:၁၆) ယ့ၣ်ၡူးဒိးန့ၢ်ဘၣ် တၢ်ခွဲးတၢ်ယာ်လၢ အမၤသကိးဘၣ် တၢ်ဒီးအပၢ်အဃိ အသးခုဒိၣ်မးလီၤ. (ကတိၤဒိ ၈:၃၀) တကးဒံးဘၣ် ဖဲယဟိဝၤယွၤ တ့လီၤဝဲမူခိၣ် ဒီးဟီၣ်ခိၣ်အခါ အဖိခွါယ့ၣ်ၡူးမၤစၢၤအီၤလီၤ. ဖဲန့ၣ်အခါ မူခိၣ်ကလူးတဖၣ် ထံၣ်ဘၣ်ဝဲအဃိ အဝဲသ့ၣ်သးခုဝဲ ဒိၣ်မးလီၤ. မူခိၣ်ကလူးတဖၣ်အံၤ ပာ်ဖျါထီၣ်ဝဲ တၢ်သးခုဒ်လဲၣ်. ဖဲကစၢ်ယွၤတ့လီၤ ကယဲၢ်တၢ်ဘၣ်တ့ခဲလၢာ် ဒီးပှၤဟီၣ်ခိၣ်ဖိအခါ မူခိၣ်ကလူးခဲလၢာ် “ကိးထီၣ်တၢ်လၢ အသူၣ်ဖှံအသးညီ” အပူၤလီၤ. (ယိၤဘး ၃၈:၇; ကတိၤဒိ ၈:၃၁) ယဟိဝၤယွၤ အတၢ်ဘၣ်တ့ တခါစုာ်စုာ်န့ၣ် ပာ်ဖျါထီၣ်ဝဲ အတၢ်အဲၣ်တၢ်ကွံ ဒီးအတၢ်ကူၣ်သ့လီၤ.—စံးထီၣ်ပတြၢၤ ၁၀၄:၂၄; ရိမ့ၤ ၁:၂၀.
၃. ဒ် ၁ ကရံၣ်သူး ၁၅:၂၁, ၂၂ ပာ်ဖျါထီၣ်ဝဲအသိး ယ့ၣ်ၡူးအတၢ်ပှ့ၤက့ၤန့ၣ် ဒုးအိၣ်ထီၣ်တၢ်မုၢ်လၢ် လၢပဂီၢ်ဒ်လဲၣ်.
၃ ယဟိဝၤယွၤအဲၣ်ဒိးလၢ ပှၤဟီၣ်ခိၣ်ဖိကအိၣ်မူဘၣ် လီၤထူလီၤယိာ်လၢ ဟီၣ်ခိၣ်လၢအတ့လီၤဝဲ ဃံဃံလၤလၤတဘ့ၣ်အံၤအပူၤလီၤ. ဘၣ်ဆၣ် နီၢ်အံၣ်အုဒီး စီၤအၤဒၣ်ထီဒါဝဲ အပၢ်ယဟိဝၤယွၤ အဃိ အဝဲသ့ၣ်တအိၣ်မူဘၣ် လီၤထူလီၤယိာ်လၢၤဘၣ်. ဒီးအဝဲသ့ၣ် အဖိအလံၤတဖၣ် ဒိးန့ၢ်ဘၣ်တၢ်ဒဲးဘး ဒီးဘၣ်သံဝဲလီၤ. (ရိမ့ၤ ၅:၁၂) အဃိ ယဟိဝၤယွၤမၤဝဲဒ်လဲၣ်. ယဟိဝၤယွၤ စးထီၣ်ရဲၣ်ကျဲၤဝဲတဘျီဃီလၢ ကအုၣ်က့ၤခီၣ်က့ၤ ပှၤဟီၣ်ခိၣ်ဖိလီၤ. (၁ မိၤၡ့ ၃:၁၅) ယဟိဝၤယွၤဟ့ၣ်လီၤ အဖိခွါယ့ၣ်ၡူး ဒ်တၢ်ပှ့ၤက့ၤအသိးလီၤ. ခီဖျိလၢ ယ့ၣ်ၡူးအတၢ်ပှ့ၤက့ၤအဃိ စီၤအၤဒၣ်ဒီးနီၢ်အံၣ်အု အဖိအလံၤတဖၣ် ပူၤဖျဲးထီၣ်ဝဲလၢ တၢ်ဒဲးဘးဒီးတၢ်သံလီၤ. ဝံၤဒီး ယဟိဝၤယွၤဟ့ၣ် အဝဲသ့ၣ်တဂၤစုာ်စုာ် တၢ်ခွဲးတၢ်ယာ်လၢ ကဘူၣ်ထီၣ်ဘါထီၣ်အီၤဒီး ကအိၣ်မူဘၣ် လီၤထူလီၤယိာ်အဂီၢ်လီၤ.—ယိၤဟၣ် ၃:၁၆; ရိမ့ၤ ၆:၂၃; ဖး ၁ ကရံၣ်သူး ၁၅:၂၁, ၂၂ တက့ၢ်.
၄. လၢတၢ်မၤလိအံၤအပူၤ ပကတဲသကိး တၢ်သံကွၢ်မနုၤတဖၣ်လဲၣ်.
၄ ကစၢ်ယွၤအတၢ်အၢၣ်လီၤ ဘၣ်ဃးဒီး ကမၤဂဲၤဆၢထၢၣ်သမူထီၣ်က့ၤ ပှၤသံန့ၣ် ပတၢ်သံကွၢ်အိၣ်ဝဲအါမးလီၤ. အဒိ တၢ်ဂဲၤဆၢထၢၣ်သမူထီၣ်က့ၤန့ၣ် ကမၤအသးဒ်လဲၣ်. ဖဲပှၤလၢပအဲၣ်ဘၣ်တဖၣ် ဂဲၤဆၢထၢၣ်သမူထီၣ်က့ၤအခါ မ့ၢ်ပကွၢ်နီၣ်အဝဲသ့ၣ်ကဘၣ်ဒံးဧါ. တၢ်ဂဲၤဆၢထၢၣ်သမူထီၣ်က့ၤန့ၣ် ကမၤသးခုပှၤလၢကျဲဒ်လဲၣ်. ဒီးတၢ်ဂဲၤဆၢထၢၣ်သမူထီၣ်က့ၤန့ၣ် သိၣ်လိပှၤဘၣ်ဃးဒီး ယဟိဝၤယွၤအတၢ်အဲၣ်, တၢ်ကူၣ်သ့ ဒီးတၢ်ဝံသးစူၤဒ်လဲၣ်. ပကတဲသကိး တၢ်သံကွၢ်တဖၣ်အံၤ အတၢ်စံးဆၢလီၤ.
တၢ်ဂဲၤဆၢထၢၣ်သမူထီၣ်က့ၤ လၢဟီၣ်ခိၣ်န့ၣ် ကမၤအသးဒ်လဲၣ်
၅. ဘၣ်မနုၤအဃိ ပနာ်သ့လၢပှၤသံတဖၣ် တဂဲၤဆၢထၢၣ်သမူထီၣ်က့ၤဝဲ တကတီၢ်ဃီဘၣ်လဲၣ်.
၅ ဖဲယဟိဝၤယွၤ သူဝဲအဖိခွါလၢ ကမၤဂဲၤဆၢထၢၣ်သမူထီၣ်က့ၤ ပှၤသံလၢအကကွဲၢ်တဖၣ်အခါ ပနာ်သ့လၢ အဝဲသ့ၣ်တဂဲၤဆၢထၢၣ်ဝဲ တကတီၢ်ဃီခဲလၢာ်ဘၣ်. ဘၣ်မနုၤအဃိ ပတဲဒ်န့ၣ်လဲၣ်. ပှၤမ့ၢ်ဂဲၤဆၢထၢၣ်ဘၣ်ဖုး တကတီၢ်ဃီခဲလၢာ်န့ၣ် တၢ်သဘံၣ်သဘုၣ် ကအိၣ်ထီၣ်ဝဲလီၤ. ယဟိဝၤယွၤန့ၣ် တဒုးအိၣ်ထီၣ် တၢ်သဘံၣ်သဘုၣ် နီတဘျီဘၣ်. လၢတၢ်န့ၣ်အလီၢ် ကစၢ်ယွၤကမၤဝဲတၢ်ခဲလၢာ် ကလဲၤအသး လၢအလီၢ်အကျဲဒၣ်ဝဲ ဂ့ၤဂ့ၤဘၣ်ဘၣ် ဒ်သိးပှၤဟီၣ်ခိၣ်ဖိ ကအိၣ်ဘၣ်ဝဲ မုာ်မုာ်ခုၣ်ခုၣ် အဂီၢ်န့ၣ်လီၤ. (၁ ကရံၣ်သူး ၁၄:၃၃) ယဟိဝၤယွၤ အိၣ်ဒီးတၢ်ကူၣ်သ့ဒီး တၢ်ဝံသးစူၤ ဖဲအမၤသကိးတၢ်ဒီးယ့ၣ်ၡူး လၢကတ့လီၤဟီၣ်ခိၣ် ဒ်သိးပှၤဟီၣ်ခိၣ်ဖိ ကအိၣ်ကဆိးဘၣ်ဝဲအဂီၢ်လီၤ. ယ့ၣ်ၡူးစ့ၢ်ကီး ကပာ်ဖျါထီၣ်ဝဲ အတၢ်ဂ့ၤတၢ်ဝါတဖၣ် ဒ်န့ၣ်အသိးလီၤ. ဖဲယ့ၣ်ၡူးပၢတၢ် အနံၣ်တကထိအတီၢ်ပူၤန့ၣ် အဝဲကမၤသကိးဃုာ်တၢ်ဒီး ပှၤလၢအပူၤဖျဲးထီၣ်လၢ အၢ်မက့းဒိၣ်တဖၣ် ဒ်သိးကမၤစၢၤက့ၤဝဲ ပှၤလၢအဂဲၤဆၢထၢၣ်သမူထီၣ်က့ၤတဖၣ်လီၤ.
ပှၤလၢအပူၤဖျဲးထီၣ်လၢ အၢ်မက့းဒိၣ်န့ၣ် ကသိၣ်လိပှၤလၢ အဂဲၤဆၢထၢၣ်သမူထီၣ်က့ၤတဖၣ်လၢ ယွၤအဘီအမုၢ်အဂ့ၢ်ဒီး ယွၤအတၢ်ဘၣ်သးတဖၣ် (ကွၢ်လံာ်အဆၢ ၆) *
၆. ဒ် မၤတၢ် ၂၄:၁၅ ပာ်ဖျါထီၣ်ဝဲအသိး ဖဲယဟိဝၤယွၤ မၤဂဲၤဆၢထၢၣ်သမူထီၣ်က့ၤ ပှၤသံတဖၣ်အကျါ မတၤတဖၣ်ကပၣ်ဃုာ်လဲၣ်.
၆ ပှၤလၢအလဲၤခီဖျိ အၢ်မက့းဒိၣ်တဖၣ် ကဘၣ်သိၣ်လိက့ၤ ပှၤလၢအဂဲၤဆၢထၢၣ် သမူထီၣ်က့ၤတဖၣ် ဘၣ်ဃးဒီး ယွၤအဘီအမုၢ်ဒီး ယဟိဝၤယွၤအတၢ်ဘၣ်သးလီၤ. ဘၣ်မနုၤအဃိလဲၣ်. မ့ၢ်လၢ ပှၤလၢကဂဲၤဆၢထၢၣ်သမူထီၣ်က့ၤ အါတက့ၢ်န့ၣ် မ့ၢ်ဝဲပှၤ “တတီဘၣ်” အဃိလီၤ. (ဖး မၤတၢ် ၂၄:၁၅ တက့ၢ်.) အဝဲသ့ၣ်ကဘၣ်ဆီတလဲ အတၢ်အိၣ်မူအါမး ဒ်သိးကဒိးန့ၢ်ဘၣ်တၢ်ဆိၣ်ဂ့ၤ ခီဖျိလၢခရံာ် အတၢ်ပှ့ၤက့ၤအဃိလီၤ. ထံၣ်တမှံကွၢ် ပမ့ၢ်ဘၣ်သိၣ်လိ ပှၤလၢအကကွဲၢ်တဖၣ် လၢအတသ့ၣ်ညါ ယဟိဝၤယွၤအဂ့ၢ် နီတဘျီဒံးဘၣ်န့ၣ် ပတၢ်မၤကအါထဲလဲၣ်တက့ၢ်. ဖဲပှၤတဂၤစုာ်စုာ် ဂဲၤဆၢထၢၣ်သမူထီၣ်က့ၤအခါ မ့ၢ်ပှၤကသိၣ်လိအဝဲသ့ၣ် ဒ်မုၢ်မဆါတနံၤအံၤ အသိးစ့ၢ်ကီးဧါ. ဒီးပှၤတဖၣ်အံၤန့ၣ် မ့ၢ်ပှၤကဟ့ၣ်အီၤမူဒါလၢ အကဘၣ်ကွၢ်ထွဲ တၢ်အိၣ်ဖှိၣ်တဖၣ် ဒီးအကဘၣ်သိၣ်လိ ပှၤလၢကဂဲၤဆၢထၢၣ်သမူထီၣ်က့ၤ လၢခံတဖၣ်အဂီၢ်ဧါ. ခဲအံၤန့ၣ် ပတသ့ၣ်ညါဒံးဘၣ်. ဘၣ်ဆၣ် ပသ့ၣ်ညါဘၣ်လၢ ခရံာ်ပၢတၢ်အနံၣ်တကထိ မ့ၢ်ဝံၤန့ၣ် “ဟီၣ်ခိၣ်ကပှဲၤဝဲဒီး တၢ်သ့ၣ်ညါယွၤ” လီၤ. (ယၡါယၤ ၁၁:၉) ဖဲအနံၣ်တကထိ အတီၢ်ပူၤန့ၣ် ပကမၤဘၣ်တၢ်လၢ အပှဲၤဒီးတၢ်သူၣ်ခုသးခုလီၤ.
၇. ဖဲယွၤအခ့အပှၤတဖၣ် မၤစၢၤဝဲပှၤလၢ အဂဲၤဆၢထၢၣ်သမူထီၣ်က့ၤတဖၣ်အခါ ဘၣ်မနုၤအဃိ အဝဲသ့ၣ်အိၣ်ဒီး တၢ်ဒိသူၣ်ဒိသးလဲၣ်.
၇ ဖဲခရံာ်ပၢတၢ် အနံၣ်တကထိအတီၢ်ပူၤ ယဟိဝၤယွၤအခ့အပှၤလၢ ဟီၣ်ခိၣ်ချၢခဲလၢာ်န့ၣ် အဝဲသ့ၣ်ကဘၣ် ဆဲးမၤဂ့ၤထီၣ်အတၢ်အိၣ်မူ လၢကမၤသးခု ယဟိဝၤယွၤအဂီၢ်လီၤ. တကးဒံးဘၣ် အဝဲသ့ၣ်ကဘၣ်အိၣ်ဒီး တၢ်ဒိသူၣ်ဒိသး ဖဲအမၤစၢၤဝဲ ပှၤလၢအဂဲၤဆၢထၢၣ် သမူထီၣ်က့ၤတဖၣ် ဒ်သိးပှၤသ့ၣ်တဖၣ်န့ၣ် ကဆီတလဲက့ၤအတၢ်အိၣ်မူ, အတၢ်ဆိကမိၣ် ဒီးအတၢ်သးကွံလၢ အတဂ့ၤဘၣ်တဖၣ် ဒီးအဝဲသ့ၣ်ကအိၣ်မူ မၤထွဲက့ၤဝဲဒ် ကစၢ်ယဟိဝၤယွၤ အတၢ်ဘၣ်သးအသိးလီၤ. (၁ ပ့းတရူး ၃:၈) ပှၤလၢအဂဲၤဆၢထၢၣ် သမူထီၣ်က့ၤတဖၣ် ကထံၣ်ဘၣ်ဝဲ ယဟိဝၤယွၤအခ့အပှၤတဖၣ် အိၣ်ဒီးတၢ်ဆီၣ်လီၤသးဒီး ဆဲးဆီတလဲအတၢ်အိၣ်မူ ဒ်သိးကမၤသးခု ယဟိဝၤယွၤအသးအဂီၢ်လီၤ. အဃိ အဝဲသ့ၣ်စ့ၢ်ကီး ကအဲၣ်ဒိးဘူၣ်ထီၣ်ဘါထီၣ် ယဟိဝၤယွၤဃုာ်ဒီး ယွၤအခ့အပှၤတဖၣ်အံၤလီၤ.—ဖံလံးပံၤ ၂:၁၂.
ပှၤလၢအဂဲၤဆၢထၢၣ် သမူထီၣ်က့ၤတဖၣ် မ့ၢ်ပကွၢ်နီၣ် အဝဲသ့ၣ်ကဘၣ်ဧါ
၈. ဘၣ်မနုၤအဃိ ပတဲသ့လၢ ပှၤလၢအကဂဲၤဆၢထၢၣ်သမူထီၣ်တဖၣ်န့ၣ် အဟံၣ်ဖိဃီဖိဒီး အတံၤသကိးတဖၣ် ကွၢ်နီၣ်အဝဲသ့ၣ်ကဘၣ်လဲၣ်.
၈ ဘၣ်မနုၤအဃိ ပတဲသ့လၢ ပှၤလၢအဂဲၤဆၢထၢၣ်သမူထီၣ်က့ၤ တဂၤစုာ်စုာ်န့ၣ် မ့ၢ်အဟံၣ်ဖိဃီဖိဒီး အတံၤသကိးတဖၣ် ကွၢ်နီၣ်အဝဲသ့ၣ်ကဘၣ်ဧါ. အဒိ ဖဲယဟိဝၤယွၤမၤသမူထီၣ်က့ၤ ပှၤသံလၢအပူၤကွံာ်တဖၣ်အခါ အဝဲသ့ၣ်ဟဲက့ၤသမူထီၣ်က့ၤ ဒ်အလီၢ်လီၢ်အသိးလီၤ. အဃိ ပတဲသ့လၢ ခါဆူညါစ့ၢ်ကီး ဖဲယဟိဝၤယွၤ မၤသမူထီၣ်က့ၤပှၤသံတဖၣ်အခါ အဝဲသ့ၣ်အက့ၢ်အဂီၤ, အတၢ်အိၣ်ထီၣ်အိၣ်လီၤ, အတၢ်တဲထီၣ်တဲလီၤတၢ်န့ၣ် ကလီၤဂာ်ဒ်အဝဲသ့ၣ် တချုးသံဒံးဘၣ်အသိးလီၤ. ပသ့ၣ်ညါဘၣ်လၢ ယ့ၣ်ၡူးဒိလီၤဝဲ တၢ်သံဒ်သိးတၢ်မံအဃိ ပှၤလၢအသံတ့ၢ်တဖၣ် ကဘၣ်တၢ်မၤဂဲၤဆၢထၢၣ် သမူထီၣ်က့ၤအီၤ ဒ်ပှၤကိးပၢၢ်ထီၣ်က့ၤ ပှၤမံအသိးလီၤ. (မးသဲ ၉:၁၈, ၂၄; ယိၤဟၣ် ၁၁:၁၁-၁၃) ဖဲပှၤတဂၤမံပၢၢ်ထီၣ်အခါ အဝဲသ့ၣ်အက့ၢ်အဂီၤ, အကလုၢ်ဒီး အတၢ်သ့ၣ်ညါတဖၣ် ကအိၣ်ဝဲဒ် အဝဲသ့ၣ်တချုး မံဒံးဘၣ်အသိးလီၤ. ပကကွၢ်သကိး စီၤလါစရူးအဂ့ၢ်တနီၤလီၤ. မ့ၢ်လၢအဝဲသံန့ၢ် လွံၢ်သီလံအဃိ အစိၣ်န့ၣ် ကအုၣ်သံကျၣ်သံဝဲလီၤ. ဖဲယ့ၣ်ၡူးမၤဂဲၤဆၢထၢၣ် သမူထီၣ်က့ၤ စီၤလါစရူးအခါ အဒီပုၢ်ဝဲၢ်မုၣ်ခံဂၤ ကွၢ်နီၣ်အီၤဘၣ်တဘျီဃီ ဒီးစီၤလါစရူးစ့ၢ်ကီး ကွၢ်နီၣ်အဝဲသ့ၣ်ဘၣ်တဘျီဃီလီၤ.—ယိၤဟၣ် ၁၁:၃၈-၄၄; ၁၂:၁, ၂.
၉. ဘၣ်မနုၤအဃိ ပှၤဂဲၤဆၢထၢၣ်သမူထီၣ်က့ၤတဖၣ် အဝဲသ့ၣ်တလၢထီၣ်ပှဲၤထီၣ် တဘျီဃီဘၣ်လဲၣ်.
၉ ယဟိဝၤယွၤအၢၣ်လီၤဝဲလၢ ပှၤလၢအအိၣ်မူလၢ ခရံာ်အတၢ်ပၢဖီလာ်တဖၣ် တတဲဝဲလၢ “ယမၤတကဲဘၣ်.” (ယၡါယၤ ၃၃:၂၄; ရိမ့ၤ ၆:၇) ပှၤလၢအဂဲၤဆၢထၢၣ် သမူထီၣ်က့ၤတဖၣ်န့ၣ် ကအိၣ်ဒီးတၢ်အိၣ်ဆူၣ်အိၣ်ချ့လၢအဂ့ၤလီၤ. ဘၣ်ဆၣ် အဝဲသ့ၣ်တလၢထီၣ်ပှဲၤထီၣ် တဘျီဃီဘၣ်. မ့တမ့ၢ်ဒ်န့ၣ်ဘၣ်န့ၣ် အဝဲသ့ၣ်ဟံၣ်ဖိဃီဖိ ဒီးအတံၤသကိးတဖၣ် ကွၢ်နီၣ်အဝဲသ့ၣ်တဘၣ်ဘၣ်. ဖဲခရံာ်ပၢတၢ် အနံၣ်တကထိအတီၢ်ပူၤန့ၣ် ပှၤဟီၣ်ခိၣ်ဖိခဲလၢာ် ကလၢထီၣ်ပှဲၤထီၣ်ဝဲဒၣ် ကယီကယီလီၤ. ဖဲအနံၣ်တကထိ အကတၢၢ်န့ၣ် ယ့ၣ်ၡူးကဟ့ၣ်က့ၤ အဘီမုၢ်လၢအပၢ်အအိၣ်လီၤ. ဝံၤဒီး ဘီမုၢ်အံၤကမၤလၢထီၣ်ပှဲၤထီၣ်ဝဲ ယဟိဝၤယွၤအတၢ်ဘၣ်သးခဲလၢာ်ဒီး ကမၤစၢၤပှၤဟီၣ်ခိၣ်ဖိ ဒ်သိးကလၢထီၣ်ပှဲၤထီၣ်အဂီၢ်လီၤ.—၁ ကရံၣ်သူး ၁၅:၂၄-၂၈; လီၣ်ဖျါ ၂၀:၁-၃.
တၢ်ဂဲၤဆၢထၢၣ်သမူထီၣ်က့ၤန့ၣ် ကဒုးသးခုပှၤလၢကျဲဒ်လဲၣ်
၁၀. ဘၣ်ဃးဒီး တၢ်ဂဲၤဆၢထၢၣ်သမူထီၣ်က့ၤန့ၣ် နကတူၢ်ဘၣ်ဒ်လဲၣ်.
၁၀ ထံၣ်တမှံကွၢ် ဖဲနထံၣ်ဘၣ်ကဒါက့ၤ ပှၤလၢနအဲၣ်ဘၣ်အီၤတဖၣ်အခါ နကတူၢ်ဘၣ်ဒ်လဲၣ်. နကသးခုအဃိ မ့ၢ်နကနံၤဧါ, မ့ၢ်နကဟီၣ်ဧါ. မ့ၢ်နကသးခု တုၤဒၣ်လဲာ် နကသးဝံၣ် စံးထီၣ်ပတြၢၤယဟိဝၤယွၤဧါ. ပနာ်သ့သပှၢ်ကတၢၢ်လၢ ပတၢ်အဲၣ်ယဟိဝၤယွၤဒီးအဖိခွါ ကဒိၣ်ထီၣ်အါထီၣ်ဝဲ ခီဖျိလၢ အဝဲသ့ၣ်မၤဂဲၤဆၢထၢၣ်သမူထီၣ်က့ၤဝဲ ပှၤသံတဖၣ်အဃိလီၤ.
၁၁. ယ့ၣ်ၡူးအတၢ်ကတိၤ ဖဲ ယိၤဟၣ် ၅:၂၈, ၂၉ ပှၤလၢအဒိကနၣ် ကစၢ်ယွၤအကလုၢ်န့ၣ် ကဒိးန့ၢ်ဘၣ်တၢ်မနုၤလဲၣ်.
၁၁ ထံၣ်တမှံကွၢ် ဖဲပှၤဂဲၤဆၢထၢၣ်သမူထီၣ်က့ၤတဖၣ် ဆီတလဲအတၢ်အိၣ်မူဒီး ဒိကနၣ်ကစၢ်ယွၤအကလုၢ်အခါ ကလီၤသးခုထဲလဲၣ်. ပှၤလၢအမၤဝဲဒ်န့ၣ်န့ၣ် အဝဲသ့ၣ်ကအိၣ်မူဘၣ် လီၤထူလီၤယိာ်လီၤ. မ့မ့ၢ်ပှၤလၢ အထီဒါကစၢ်ယွၤတဖၣ်န့ၣ် အဝဲသ့ၣ်တအိၣ်ဘၣ်လၢ ဟီၣ်ခိၣ်ပၤရဒံစူးအပူၤ ဒ်သိးကမၤတၢထီၣ်တၢလီၤတၢ် အဂီၢ်လၢၤဘၣ်.—ယၡါယၤ ၆၅:၂၀; ဖး ယိၤဟၣ် ၅:၂၈, ၂၉ တက့ၢ်.
၁၂. လၢယွၤအဘီအမုၢ် အတၢ်ပၢဖီလာ်န့ၣ် ယဟိဝၤယွၤကဆိၣ်ဂ့ၤ အခ့အပှၤခဲလၢာ် လၢကျဲဒ်လဲၣ်.
၁၂ ကတိၤဒိ ၁၀:၂၂ တဲဝဲလၢ “ယွၤအတၢ်ဆိၣ်ဂ့ၤန့ၣ် ဒုးထူးဒုးတီၤပှၤ, ဒီးတပာ်ဖှိၣ်ထီၣ် တၢ်သူၣ်အုးသးအုးဒီးအီၤဘၣ်.” လၢယွၤအဘီအမုၢ် အတၢ်ပၢဖီလာ်န့ၣ် ကစၢ်ယွၤအခ့အပှၤခဲလၢာ် ကထံၣ်ဘၣ်ဝဲလၢ လံာ်စီဆှံတဆၢအံၤ ဟဲလၢထီၣ်ပှဲၤထီၣ်ဝဲလီၤ. ခီဖျိလၢ ယဟိဝၤယွၤအသးစီဆှံ အတၢ်မၤစၢၤအဃိ ကစၢ်ယွၤအခ့အပှၤတဖၣ် ကထူးထီၣ်တီၤထီၣ်လၢ နီၢ်သးတခီ တကးဒံးဘၣ် အဝဲသ့ၣ်ကလၢထီၣ်ပှဲၤထီၣ်ဝဲလီၤ. (ယိၤဟၣ် ၁၃:၁၅-၁၇; အ့းဖ့းစူး ၄:၂၃, ၂၄) ကိးနံၤဒဲး အဝဲသ့ၣ်ကအိၣ်ဒီး တၢ်အိၣ်ဆူၣ်အိၣ်ချ့လၢအဂ့ၤ ဒီးကအိၣ်ဘၣ် မုာ်မုာ်ခုၣ်ခုၣ်လီၤ. အဃိ တၢ်အိၣ်မူဒ်အံၤန့ၣ် ကလီၤသးခု သပှၢ်ကတၢၢ်လီၤ. (ယိၤဘး ၃၃:၂၅) ပမ့ၢ်ဆိကမိၣ်ထံ တၢ်ဂဲၤဆၢထၢၣ် သမူထီၣ်က့ၤအဂ့ၢ်န့ၣ် ကမၤစၢၤပှၤလၢ ဆၢကတီၢ်ခဲအံၤဒ်လဲၣ်.
ပာ်လုၢ်ပာ်ပှ့ၤ ယဟိဝၤယွၤအတၢ်အဲၣ်တၢ်ကွံ
၁၃. ဒ်စံးထီၣ်ပတြၢၤ ၁၃၉:၁-၄ ပာ်ဖျါထီၣ်ဝဲအသိး တၢ်ဂဲၤဆၢထၢၣ်သမူထီၣ်က့ၤန့ၣ် ပာ်ဖျါထီၣ်ဝဲ ယဟိဝၤယွၤသ့ၣ်ညါပှၤဂ့ၤဂ့ၤဒ်လဲၣ်.
၁၃ ဒ်ပတဲတ့ၢ်လၢထးအသိး ဖဲယဟိဝၤယွၤ မၤဂဲၤဆၢထၢၣ်သမူထီၣ်က့ၤပှၤသံအခါ အဝဲသ့ၣ် အတၢ်သ့ၣ်ညါဒီး အတၢ်တူၢ်ဘၣ်တဖၣ် ကအိၣ်က့ၤဒ်အဝဲသ့ၣ်တချုးသံ ဒံးဘၣ်အသိးလီၤ. တၢ်ဂ့ၢ်အံၤ အဘၣ်ထွဲလိာ်သး ဒီးနၤဒ်လဲၣ်. ယဟိဝၤယွၤအဲၣ်နၤဒိၣ်မး အဃိ နတၢ်ထံၣ်, နတၢ်တူၢ်ဘၣ်, နတၢ်စံးတၢ်ကတိၤ ဒီးနတၢ်ဖံးတၢ်မၤတဖၣ်အိၣ်ဒ်လဲၣ်န့ၣ် အဝဲပာ်သူၣ်ပာ်သးဝဲ ဒီးနီၣ်ဘၣ်ဝဲခဲလၢာ်လီၤ. ဒီးအဝဲကတ့လီၤက့ၤ ပနီၢ်ခိဃုာ်ဒီး ပတၢ်သ့ၣ်ညါဒီး ပတၢ်ပာ်သူၣ်ပာ်သး ဒ်အလီၢ်လီၢ်အသိးလီၤ. စီၤပၤဒၤဝံးသ့ၣ်ညါဝဲလၢ ယဟိဝၤယွၤသ့ၣ်ညါ ပဝဲဒၣ်တဂၤစုာ်စုာ် လီၤတံၢ်လီၤဆဲးလီၤ. (ဖး စံးထီၣ်ပတြၢၤ ၁၃၉:၁-၄ တက့ၢ်.) ဖဲပနၢ်ပၢၢ်ထီၣ်လၢ ယဟိဝၤယွၤသ့ၣ်ညါပှၤဂ့ၤဂ့ၤအခါ ပတူၢ်ဘၣ်ဒ်လဲၣ်.
၁၄. ဖဲပဆိကမိၣ်ထံ ယဟိဝၤယွၤသ့ၣ်ညါပှၤဂ့ၤဂ့ၤအခါ ပဒိးန့ၢ်ဘၣ်အဘျုးဒ်လဲၣ်.
၁၄ ဖဲပဆိကမိၣ်ထံဘၣ်ဃးဒီး ယဟိဝၤယွၤသ့ၣ်ညါပှၤဂ့ၤဂ့ၤအခါ ပတလိၣ်ဘၣ်ယိၣ်တၢ်ဘၣ်. ဘၣ်မနုၤအဃိလဲၣ်. မ့ၢ်လၢယဟိဝၤယွၤ သူၣ်အိၣ်သးအိၣ်ပှၤ သပှၢ်ကတၢၢ်အဃိ အဝဲပာ်လုၢ်ပာ်ပှ့ၤ ပဝဲတဂၤစုာ်စုာ်လီၤ. လၢပတၢ်အိၣ်မူအပူၤ ပလဲၤခီဖျိဘၣ် တၢ်ဒ်လဲၣ်န့ၣ် ယဟိဝၤယွၤသ့ၣ်ညါဝဲခဲလၢာ်လီၤ. ပသ့ၣ်ညါဘၣ်ဒ်အံၤအဃိ ပသးခုဒိၣ်မးလီၤ. ပတကြၢးတူၢ်ဘၣ်လၢ ပအိၣ်ထဲတဂၤဧိၤဘၣ်. ယဟိဝၤယွၤအိၣ်ဒီးပှၤ ဒီးအဲၣ်ဒိးမၤစၢၤပှၤထီဘိလီၤ.—၂ ကွဲးနီၣ်တၢ် ၁၆:၉.
ပာ်လုၢ်ပာ်ပှ့ၤ ယဟိဝၤယွၤအတၢ်ကူၣ်သ့
၁၅. တၢ်ဂဲၤဆၢထၢၣ်သမူထီၣ်က့ၤန့ၣ် ပာ်ဖျါထီၣ်ဝဲလၢ ယဟိဝၤယွၤအိၣ်ဒီး တၢ်ကူၣ်သ့ဒ်လဲၣ်.
၁၅ တၢ်ပျံၤဘၣ်ဃးဒီး တၢ်သံန့ၣ်မ့ၢ်ဝဲ တၢ်စုကဝဲၤဖးဒိၣ်တခါလီၤ. ပှၤလၢအအိၣ်လၢ ဟီၣ်ခိၣ်လၢမုၣ်ကီၤလံၢ် ပၢဝဲတဘ့ၣ်အံၤအပူၤန့ၣ် ထီဒါက့ၤအတံၤသကိးဒီး တၢ်လၢအဝဲသ့ၣ် သ့ၣ်ညါဝဲလၢအကမၣ်န့ၣ် အဝဲသ့ၣ်မၤဝဲဒံးလီၤ. မ့မ့ၢ်လၢပဝဲသ့ၣ်န့ၣ် ပှၤဆီၣ်သနံးပှၤ ဒ်န့ၣ်တန့ၢ်ဘၣ်. ပသ့ၣ်ညါလၢပဒုၣ်ပဒါ မ့ၢ်မၤသံပှၤန့ၣ် ယဟိဝၤယွၤကမၤ ဂဲၤဆၢထၢၣ်သမူထီၣ်က့ၤပှၤလီၤ. (လီၣ်ဖျါ ၂:၁၀) ပနာ်သ့ သပှၢ်ကတၢၢ်လၢ အဝဲသ့ၣ်မ့ၢ်မၤပှၤ ဒ်လဲၣ်ဂ့ၤဒ်လဲၣ်ဂ့ၤ အဝဲသ့ၣ်မၤဟးဂီၤ ပတၢ်ရ့လိာ်သးဒီး ယဟိဝၤယွၤတန့ၢ်ဘၣ်. (ရိမ့ၤ ၈:၃၅-၃၉) ယဟိဝၤယွၤဟ့ၣ်ပှၤ တၢ်မုၢ်လၢ်လၢအမ့ၢ် တၢ်ဂဲၤဆၢထၢၣ်သမူထီၣ်က့ၤန့ၣ် ပာ်ဖျါထီၣ်ဝဲလၢ အဝဲအိၣ်ဒီး တၢ်ကူၣ်သ့နီၢ်နီၢ်လီၤ. လၢတၢ်န့ၣ်အဃိ ပတပျံၤမုၣ်ကီၤလံၢ် အတၢ်စုကဝဲၤလၢ ကမၤသံပှၤအဂီၢ်ဘၣ်. ဒီးပတမၤထွဲဒ် အဝဲသ့ၣ်မၢပှၤအသိးစ့ၢ်ကီးဘၣ်. လၢတၢ်န့ၣ်အလီၢ် ပကဘၣ်အိၣ်ဒီး တၢ်သးဒူလၢ ပကဆဲးတီဒီး ယဟိဝၤယွၤထီဘိလီၤ.
မ့ၢ်ပတၢ်ဆၢတဲာ်တဖၣ် ပာ်ဖျါထီၣ်ဝဲလၢ ပနာ်န့ၢ်ယဟိဝၤယွၤ အတၢ်အၢၣ်လီၤလၢ ကကွၢ်ထွဲပှၤလၢ နီၢ်ခိတခီန့ၣ်ဧါ (ကွၢ်လံာ်အဆၢ ၁၆) *
၁၆. နကဘၣ် သံကွၢ်လီၤနသးလၢ တၢ်သံကွၢ်မနုၤတဖၣ်လဲၣ် ဒီးနတၢ်စံးဆၢတဖၣ်န့ၣ် ကပာ်ဖျါထီၣ်လၢ နနာ်န့ၢ်ယဟိဝၤယွၤထဲလဲၣ်.
၁၆ ဖဲယဟိဝၤယွၤ အဒုၣ်အဒါတဖၣ် တဲပျံၤတဲဖုးနၤလၢ ကမၤသံနၤအခါ မ့ၢ်နနာ်လၢ ယဟိဝၤယွၤကမၤ ဂဲၤဆၢထၢၣ်သမူထီၣ်က့ၤနၤစ့ၢ်ကီးဧါ. နသ့ၣ်ညါအီၤ ကသ့ဒ်လဲၣ်. နကဘၣ်သံကွၢ်လီၤနသးလၢ ‘တၢ်ဆၢတဲာ်ဆံးဆံးဖိလၢ ယမၤအီၤကိးနံၤဒဲးန့ၣ် မ့ၢ်အပာ်ဖျါထီၣ်လၢ ယနာ်န့ၢ်ယဟိဝၤယွၤဧါ.’ (လူၤကၣ် ၁၆:၁၀) တၢ်သံကွၢ်လၢ အဂၤတခါန့ၣ် ‘လၢယတၢ်အိၣ်မူအပူၤ ယမ့ၢ်ပာ်ဆိ ယွၤအဘီအမုၢ်လၢ နီၢ်ဂံၢ်တၢန့ၣ် မ့ၢ်ယနာ်န့ၢ် ယဟိဝၤယွၤလၢ အကမၤလၢပှဲၤန့ၢ် ယတၢ်လိၣ်ဘၣ်လၢ နီၢ်ခိတကပၤဧါ.’ (မးသဲ ၆:၃၁-၃၃) ဒီးနမ့ၢ်မၤထွဲဒ် တၢ်သံကွၢ်တဖၣ်အံၤအသိးန့ၣ် နပာ်ဖျါထီၣ်လၢ နနာ်န့ၢ်ယဟိဝၤယွၤနီၢ်နီၢ် ဒီးအဝဲကမၤစၢၤနၤလၢ နလဲၤခီဖျိတၢ်မၤကွၢ်တဖၣ် ကန့ၢ်အဂီၢ်လီၤ.—ကတိၤဒိ ၃:၅, ၆.
ပာ်လုၢ်ပာ်ပှ့ၤ ယဟိဝၤယွၤ အတၢ်ဝံသးစူၤ
၁၇. (က) တၢ်ဂဲၤဆၢထၢၣ်သမူထီၣ်က့ၤန့ၣ် ပာ်ဖျါထီၣ်လၢ ယဟိဝၤယွၤအိၣ်ဒီး တၢ်ဝံသးစူၤဒ်လဲၣ်. (ခ) ပပာ်လုၢ်ပာ်ပှ့ၤ ယဟိဝၤယွၤအတၢ်ဝံသးစူၤ ကသ့ဒ်လဲၣ်.
၁၇ ယဟိဝၤယွၤပာ်ပနီၣ်ဃာ် တၢ်ဆၢကတီၢ်လၢ အကမၤဟးဂီၤဝဲ ဟီၣ်ခိၣ်လၢ အအၢအသီတဘ့ၣ်အံၤန့ၣ် ဝံၤလံ. (မးသဲ ၂၄:၃၆) ယဟိဝၤယွၤအိၣ်ဒီး တၢ်သးစူၤအဃိ အဝဲကမၤဝဲဒ် အပာ်ပနီၣ်ဃာ်ဝဲ တၢ်ဆၢကတီၢ်အသိးလီၤ. အဝဲအဲၣ်ဒိး မၤဂဲၤဆၢထၢၣ်သမူထီၣ်က့ၤ ပှၤသံတဖၣ် သပှၢ်ကတၢၢ်လီၤ. ဘၣ်ဆၣ် အဝဲဆဲးဝံသးစူၤတၢ်လီၤ. (ယိၤဘး ၁၄:၁၄, ၁၅) ယဟိဝၤယွၤအိၣ်ခိးဝဲတုၤ တၢ်ဆၢကတီၢ်ကြၢးဝဲဘၣ်ဝဲမး ကမၤဂဲၤဆၢထၢၣ်သမူထီၣ်က့ၤ ပှၤသံတဖၣ်လီၤ. (ယိၤဟၣ် ၅:၂၈) ပစံးဘျုးစံးဖှိၣ်ဘၣ် ယဟိဝၤယွၤဒိၣ်မးလၢ အအိၣ်ဒီးတၢ်ဝံသးစူၤအဃိလီၤ. ဆိကမိၣ်ကွၢ်, ခီဖျိလၢ ယဟိဝၤယွၤတၢ်ဝံသးစူၤအဃိ ပှၤဟီၣ်ခိၣ်ဖိအါဂၤဃုာ်ဒီးပှၤ လၢ “ကန့ၢ်ဘၣ်တၢ်ပီၢ်ယၢ်လီၤက့ၤအသး” အဂီၢ် တၢ်ဆၢကတီၢ်အိၣ်ဒံးဝဲလီၤ. (၂ ပ့းတရူး ၃:၉) ယဟိဝၤယွၤအဲၣ်ဒိးဝဲလၢ ပှၤအါဂၤကဒိးန့ၢ်ဘၣ် တၢ်အိၣ်မူလီၤထူလီၤယိာ်လီၤ. အဃိ မ်ပကပာ်ဖျါထီၣ် တၢ်စံးဘျုးစံးဖှိၣ်လၢ ယဟိဝၤယွၤ အတၢ်ဝံသးစူၤတက့ၢ်. ပကပာ်ဖျါထီၣ်အီၤ လၢကျဲဒ်လဲၣ်. ပပာ်ဖျါထီၣ်အီၤ သ့ခီဖျိ ပဃုထံၣ်န့ၢ်ပှၤလၢ “တၢ်ပာ်အီၤလၢ အကန့ၢ်ဘၣ် တၢ်မူလီၤထူလီၤယိာ်” ဒီးမၤစၢၤအဝဲသ့ၣ်ဒ်သိး ကအဲၣ်ယဟိဝၤယွၤ ဒီးကသးအိၣ်မၤ ယဟိဝၤယွၤအတၢ်မၤအဂီၢ်လီၤ. (မၤတၢ် ၁၃:၄၈) အဝဲသ့ၣ်စ့ၢ်ကီး ကဒိးန့ၢ်ဘၣ် တၢ်ဘျုးတၢ်ဖှိၣ်လၢ ယဟိဝၤယွၤအတၢ်ဝံသးစူၤလီၤ.
၁၈. ဘၣ်မနုၤအဃိ ပကဘၣ် ဝံသးစူၤပှၤဂၤလဲၣ်.
၁၈ တချုးလၢ အနံၣ်တကထိကတၢၢ်ဒံးဘၣ်န့ၣ် ယဟိဝၤယွၤတမုၢ်လၢ်ဝဲလၢ ပကလၢထီၣ်ပှဲၤထီၣ် တဘျီဃီဘၣ်. လၢတၢ်န့ၣ်အလီၢ် ယဟိဝၤယွၤကအိၣ်ခိးပှၤလၢ တၢ်ဝံသးစူၤအပူၤလီၤ. တချုးအနံၣ်တကထိ ပှဲၤထီၣ်ဒံးဘၣ်န့ၣ် ယဟိဝၤယွၤကပျၢ်ကွံာ် ပတၢ်ဒဲးဘးလၢ တၢ်သူၣ်အိၣ်သးအိၣ်အပူၤလီၤ. အဃိ ပကြၢးကွၢ်လိမၤဒိး ယဟိဝၤယွၤဒီး ဃုထံၣ်န့ၢ်ပှၤဂၤ အတၢ်ဂ့ၤတၢ်ဝါတဖၣ်လီၤ. ဆိကမိၣ်ကွၢ် ဒီပုၢ်ဝဲၢ်မုၣ်တဂၤ အဒိအတဲာ်တက့ၢ်. မ့ၢ်လၢ အဝၤအိၣ်ဒီး တၢ်သူၣ်ကိၢ်သးဂီၤတၢ်ဆါအဃိ အဝၤတလဲၤထီၣ် တၢ်အိၣ်ဖှိၣ်လၢၤဘၣ်. ဒီးဒီပုၢ်ဝဲၢ်မုၣ်အံၤ တဲဝဲလၢ “လၢယဂီၢ်န့ၣ် ကီဒိၣ်မး. အဃိ ပတၢ်အိၣ်မူန့ၣ် ဆီတလဲအသး လၢာ်ပျီ. ဒီးပမၤသကိးတၢ်တပူၤဃီ ဒ်ပတိာ်ပာ်အီၤအသိး တသ့လၢၤဘၣ်.” ဘၣ်ဆၣ် ဒီပုၢ်ဝဲၢ်မုၣ်တဂၤအံၤ ဆဲးပာ်ဖျါထီၣ် အတၢ်ဝံသးစူၤလၢ အဝၤအဖီခိၣ်လီၤ. ဒီပုၢ်ဝဲၢ်မုၣ်အံၤ သန့ၤအသးလၢ ယဟိဝၤယွၤ ဒီးတတူၢ်ၡူအသး နီတဘျီဘၣ်. အဝဲတသးစၢၢ်ဆၢ အတၢ်ကီတၢ်ခဲတဖၣ်လၢၤဘၣ် လၢတၢ်န့ၣ်အလီၢ် အအိၣ်ဒီး တၢ်ထံၣ်လၢအဂ့ၤ ဒ်ယဟိဝၤယွၤအသိး ဒီးအဝဲဃုထံၣ်ဝဲ အဝၤအတၢ်ဂ့ၤတၢ်ဝါတဖၣ်လီၤ. ဒီးအဝဲတဲဝဲလၢ “ခီဖျိလၢ ယဝၤအိၣ်ဒီးတၢ်ဂ့ၤတၢ်ဝါတဖၣ်အဃိ လၢခံ အတၢ်သူၣ်ကိၢ်သးဂီၤတၢ်ဆါန့ၣ် ဟဲက့ၤဂ့ၤထီၣ်က့ၤဝဲ ကယီကယီလီၤ.” ပဟံၣ်ဖိဃီဖိ ဒီးပှၤလၢတၢ်အိၣ်ဖှိၣ်အပူၤတဖၣ် ကလဲၤခီဖျိ တၢ်ကီတၢ်ခဲကန့ၢ်အဂီၢ် အရ့ဒိၣ်လၢ ပကဘၣ်ဝံသးစူၤ အဝဲသ့ၣ်လီၤ.
၁၉. ပကြၢးဆၢတဲာ်လီၤ ပသးလၢ ပကမၤတၢ်မနုၤလဲၣ်.
၁၉ ဖဲကစၢ်ယွၤတ့လီၤ ဟီၣ်ခိၣ်သီသီအခါ ယ့ၣ်ၡူးဒီးမူခိၣ်ကလူးတဖၣ် သူၣ်ခုသးခုဝဲ ဒိၣ်မးလီၤ. ထံၣ်တမှံကွၢ် ဖဲအဝဲသ့ၣ်ထံၣ်ဘၣ် ဟီၣ်ခိၣ်ဒီဘ့ၣ်အိၣ်ပှဲၤဝဲဒီး ပှၤလၢပှၤပှဲၤ ဒီးပှၤလၢအအဲၣ်ယဟိဝၤယွၤ ဒီးမၤယဟိဝၤယွၤတၢ်မၤအခါ အဝဲသ့ၣ်ကသးခုဝဲ ထဲလဲၣ်န့ၣ်တက့ၢ်. ဒီးထံၣ်တမှံကွၢ်စ့ၢ်ကီး ပှၤလၢအလဲၤထီၣ် ပၢတၢ်ဒီးခရံာ်လၢ မူခိၣ်တဖၣ် ထံၣ်ဘၣ်ပှၤဟီၣ်ခိၣ်ဖိတဖၣ် ဒိးန့ၢ်ဘၣ်ဝဲအဘျုးလၢ အဝဲသ့ၣ်အတၢ်မၤအဃိ အဝဲသ့ၣ်ကသးခုဝဲ ထဲလဲၣ်န့ၣ်တက့ၢ်. (လီၣ်ဖျါ ၄:၄, ၉-၁၁; ၅:၉, ၁၀) ခီဖျိလၢ တၢ်ဆူးတၢ်ဆါ, တၢ်သူၣ်အုးသးအုးဒီး တၢ်သံတအိၣ်လၢၤဘၣ်အဃိ တၢ်သးအုးမဲာ်ထံန့ၣ် ကကဲထီၣ်က့ၤလၢ တၢ်သးခုအမဲာ်ထံလီၤ. (လီၣ်ဖျါ ၂၁:၄) အဃိ မ်ပကဆဲးကွၢ်လိမၤဒိး ပပၢ်လၢအပှဲၤဒီး တၢ်အဲၣ်, တၢ်ကူၣ်သ့ဒီး တၢ်ဝံသးစူၤတဂၤ အအိၣ်န့ၣ်တက့ၢ်. ပမ့ၢ်မၤဒ်န့ၣ်န့ၣ် ပမ့ၢ်ထံၣ်ဘၣ်တၢ်ကီတၢ်ခဲ သနာ်က့ ပကဆဲးအိၣ်ဒီးတၢ်သးခုလီၤ. (ယၤကိာ် ၁:၂-၄) ပစံးဘျုးစံးဖှိၣ်ဘၣ် ယဟိဝၤယွၤဒိၣ်မးလၢ အအၢၣ်လီၤပှၤလၢ ပှၤသံတဖၣ် “ကဂဲၤဆၢထၢၣ်” သမူထီၣ်က့ၤလီၤ.—မၤတၢ် ၂၄:၁၅.
တၢ်သးဝံၣ် ၁၄၁ သးသမူအတၢ်လီၤလး
^ လံာ်အဆၢ. 5 ယဟိဝၤယွၤမ့ၢ်တၢ်အဲၣ်တၢ်ကွံ ဒီးမ့ၢ်ပၢ်လၢအပှဲၤဒီး တၢ်ကူၣ်သ့ဒီး တၢ်ဝံသးစူၤလီၤ. ပထံၣ်ဘၣ် အတၢ်ဂ့ၤတၢ်ဝါတဖၣ်အံၤ ဖဲအတ့လီၤတၢ်ခဲလၢာ်အခါ ဒီးအအၢၣ်လီၤလၢ ကမၤသမူထီၣ်က့ၤ ပှၤသံတဖၣ်လီၤ. လၢတၢ်မၤလိအံၤအပူၤ ပကတဲသကိး တၢ်သံကွၢ်တနီၤလၢ အဘၣ်ဃးဒီး တၢ်ဂဲၤဆၢထၢၣ်သမူထီၣ်က့ၤအဂ့ၢ်လီၤ. ဒီးပပာ်ဖျါထီၣ် ပတၢ်စံးဘျုးစံးဖှိၣ်လၢ ယဟိဝၤယွၤအတၢ်အဲၣ်, တၢ်ကူၣ်သ့ ဒီးတၢ်ဝံသးစူၤ အဖီခိၣ်ကသ့ဒ်လဲၣ်န့ၣ်လီၤ.
^ လံာ်အဆၢ. 59 တၢ်တဲဖျါထီၣ်တၢ်ဂီၤ အခီပညီ– ပှၤအမဲရကၤထူလံၤဖိတဂၤ ဂဲၤဆၢထၢၣ်သမူထီၣ်က့ၤ ဖဲခရံာ်ပၢတၢ်အနံၣ်တကထိ အတီၢ်ပူၤလီၤ. ဒီပုၢ်ဝဲၢ်ခွါတဂၤလၢ အပူၤဖျဲးထီၣ်လၢ အၢ်မက့းဒိၣ်န့ၣ် သိၣ်လိပိာ်ခွါလၢ အဂဲၤဆၢထၢၣ်သမူထီၣ်က့ၤတဂၤအံၤ ဒ်သိးကဒိးန့ၢ်ဘၣ် တၢ်အဘျုးအဖှိၣ်လၢ ခရံာ်အတၢ်ပှ့ၤက့ၤလီၤ.
^ လံာ်အဆၢ. 61 တၢ်တဲဖျါထီၣ်တၢ်ဂီၤ အခီပညီ– ဒီပုၢ်ဝဲၢ်ခွါတဂၤ တဲဘၣ်အတၢ်မၤခိၣ်လၢ အဝဲမၤအါထီၣ်တၢ်မၤ လၢမုၢ်နံၤအဂၤတဖၣ်တသ့ဘၣ်. အတဲပၠးဝဲလၢ မုၢ်နံၤတဖၣ်န့ၣ် အဝဲကဘၣ်လဲၤစံၣ်တဲၤတဲလီၤတၢ်ဒီး လဲၤထီၣ်တၢ်အိၣ်ဖှိၣ်လီၤ. ဘၣ်ဆၣ် အမ့ၢ်ဘၣ်မၤတၢ်မၤလၢ တၢ်ဆၢကတီၢ်အဂၤန့ၣ် အသးအိၣ်မၤဝဲလီၤ.
