၁. ပှၤ​အါဂၤ ဂုာ်ကျဲးစၢး​မၤ​အါထီၣ်​ ယဟိဝၤ​ယွၤ​အ​တၢ်မၤ​ဒ်လဲၣ်.

 ပ​အိၣ်မူ​​​ဘၣ်​လၢ တၢ်​အ​စိၤ​အ​ကတၢၢ်​အဃိ ပ​တၢ်ဖံး​တၢ်မၤ​အိၣ်​အါမး​လီၤ (မးသဲ ၂၄:၁၄; လူၤကၣ်​ ၁၀:၂; ၁ ပ့းတရူး ၅:၂) ပ​​ဝဲ​ခဲလၢာ် ပ​အဲၣ်ဒိး​မၤ ယဟိဝၤ​ယွၤ​အ​တၢ်မၤ​လၢ အဂ့ၤ​ကတၢၢ်​လီၤ. အဃိ ပှၤ​အါဂၤ​ပၣ်ဃုာ်​အါထီၣ်​လၢ တၢ်​စံၣ်တဲၤ​တဲ​​လီၤ​တၢ်မၤ​အ​ပူၤ​လီၤ. မ့မ့ၢ်​ပှၤ​အဂၤ​တနီၤ​အဲၣ်ဒိး​မၤ ပှၤ​လဲၤလၢညါ​လီၤ. ဒီး​ပှၤလၢ​အဂၤ​တနီၤ ပာ်​​လီၤ​အသး​လၢ က​လဲၤ​မၤတၢ်​လၢ ဘ့ၤသ့လး မ့တမ့ၢ် လၢ​တၢ်​သူၣ်ထီၣ်​ဘှီထီၣ်​ တကပၤ​လီၤ. ဒီပုၢ်ဝဲၢ်​ခွါ​အါဂၤ ဂုာ်ကျဲးစၢး​ဝဲ ဒ်သိး​က​တုၤထီၣ်​ထီၣ်ဘး​လၢ ​က​ကဲထီၣ်​တၢ်​အိၣ်ဖှိၣ်​အပှၤ​မၤစၢၤ​တၢ်​ဒီး တၢ်​အိၣ်ဖှိၣ်​သးပှၢ်​တဖၣ်​လီၤ. (၁ တံၤမသ့း ၃:၁, ၈) ဖဲ​ယဟိဝၤ​ယွၤ​ထံၣ်ဝဲ အခ့​အပှၤ​တဖၣ်​သးအိၣ်​ ဟ့ၣ်​​​လီၤ​အသး​လၢ အ​တၢ်မၤ​အခါ အ​က​သးခု​ထဲလဲၣ်.—စံးထီၣ်​ပတြၢၤ ၁၁၀:၃; ယၡါယၤ ၆:၈.

၂. ပ​မၤ​လၢပှဲၤ​ပ​ဖီတၢၣ်​လၢ နီၢ်သး​တခီ မ့ၢ်​တ​န့ၢ်​​ဘၣ်​န့ၣ်​ ပ​က​တူၢ်​​ဘၣ်​ဒ်လဲၣ်.

^၂ ခီဖျိ​လၢ ပ​မၤ​လၢပှဲၤ​ပ​ဖီတၢၣ်​ ဒ်​ပ​မုၢ်လၢ်​ပာ်စၢၤ​အီၤ တ​န့ၢ်​​ဘၣ်​အဃိ ပသး​ဟးဂီၤ​​​ဝဲ​လီၤ. မ့တမ့ၢ် ခီဖျိ​လၢ ပ​သးပှၢ်​ထီၣ်​ ဒီး​ပ​တၢ်အိၣ်သး​အ​ဖီခိၣ်​အဃိ မူဒါ​တနီၤ​လၢ တၢ်ကရၢကရိ​အ​ပူၤ​န့ၣ်​ ပ​မၤ​အီၤ​တ​သ့​လၢၤဘၣ်. (ကတိၤဒိ ၁၃:၁၂) ပ​ကကွၢ်​သကိး ဒီပုၢ်ဝဲၢ်​မုၣ်​မဲ​လံ​စၤ * အဂ့ၢ်​လီၤ. အ​​ဝဲ​အဲၣ်ဒိး လဲၤ​မၤတၢ်​လၢ ဘ့ၤသ့လး ဒီး​လဲၤထီၣ်​ ပှၤစိာ်​ဘီမုၢ်​တၢ်​သးခု​ကစီၣ်​အ​ကၠိ​လီၤ. ဘၣ်ဆၣ်​ အ​တဲ​​ဝဲ​လၢ “ယ​သးပှၢ်​တလၢ လၢ​ယ​က​မၤတၢ်​သ့ၣ်​တဖၣ်​အံၤ အဂီၢ်​လီၤ. အဃိ ယ​သး​ဟးဂီၤ​​​ဝဲ​လီၤ.”

၃. ဒ်သိး​န​က​ဒိးန့ၢ်​အါထီၣ်​ဘၣ်​ တၢ်ခွဲး​တၢ်ယာ်​လၢ ယဟိဝၤ​ယွၤ​တၢ်မၤ​အဂီၢ် န​က​​​ဘၣ်​မၤ​တၢ်မနုၤ​လဲၣ်.

^၃ မ့မ့ၢ် ပှၤလၢ​အသး​စၢ် ဒီး​အ​တၢ်​အိၣ်ဆူၣ်​အိၣ်​ချ့​ဂ့ၤ​န့ၣ်​ ဒ်သိး​က​တုၤထီၣ်​ထီၣ်ဘး​လၢ  နီၢ်သး​အ​ဖီတၢၣ်​အဂီၢ် အဝဲသ့ၣ်​ က​​​ဘၣ်​ဒိၣ်တုာ်​ခိၣ်ပှဲၤ လၢ​နီၢ်သး​တခီ ဒီး​က​​​ဘၣ်​အိၣ်ဒီး ခရံာ်ဖိ​တၢ်ဂ့ၤ​တၢ်ဝါ​တဖၣ်​လီၤ. အဒိ, အဝဲသ့ၣ်​တနီၤ အ​ဖၠဲး, က​မၤတၢ်​ဆၢတဲာ်​လၢ အချ့ ဒီး​မၤတၢ်​ဆူၣ်​လီၤ. ဘၣ်ဆၣ်​ အဝဲသ့ၣ်​က​​​ဘၣ်​မၤလိ​အါထီၣ်​အသး ဒ်သိး​ကအိၣ်​ဒီး​တၢ်​ဝံသးစူၤ, မၤ​တၢ်မၤ​လီၤတံၢ်​လီၤဆဲး ဒီး​ပာ်ကဲ​အါထီၣ်​ပှၤဂၤ​လီၤ. နမ့ၢ်​ဂုာ်ကျဲးစၢး ဒ်သိး န​က​မၤ​အိၣ်​ထီၣ်​ တၢ်ဂ့ၤ​တၢ်ဝါ​သ့ၣ်​တဖၣ်​အံၤန့ၣ်​ ဒီပုၢ်ဝဲၢ် က​ဟ့ၣ်​​​လီၤ​အါထီၣ်​နၤ မူဒါ​တဖၣ်​လီၤ. ပ​ကကွၢ်​သကိး ဒီပုၢ်ဝဲၢ်​ခွါ​နံးခ် အ​တၢ်​လဲၤ​ခီဖျိ​လီၤ. ဖဲ​အသး​အိၣ်​ အ​နံၣ်​ ၂၀ အခါ​န့ၣ်​ အ​တ​ကဲထီၣ်​ဘၣ်​ တၢ်​အိၣ်ဖှိၣ်​အပှၤ​မၤစၢၤ​တၢ်​​ဘၣ်​အဃိ အသး​ဟးဂီၤ​​​ဝဲ​လီၤ. အ​တဲ​​ဝဲ​လၢ “ယ​ဆိကမိၣ်​ဒု တၢ်လိၣ်​ဒီး​ယၤ​အိၣ်​တမံၤ​မံၤ​လီၤ.” ဒီပုၢ်ဝဲၢ်​ခွါ​နံးခ် တ​ဟ့ၣ်​အၡူ​ဘၣ်. အ​​ဝဲ​ဂုာ်ကျဲးစၢး မၤစၢၤ​တၢ်​လၢ တၢ်​အိၣ်ဖှိၣ်​အ​ပူၤ ဒီး​တၢ်​စံၣ်တဲၤ​တဲ​​လီၤ​တၢ်မၤ လၢ​အဂ့ၤ​ကတၢၢ်​လီၤ. ခဲအံၤ အ​​ဝဲ​ကဲထီၣ်​ ဝဲၤတြၢ်​ကမံးတံာ်​လီၤ.

၄. လၢ​တၢ်​မၤလိ​အံၤ​အ​ပူၤ ပ​က​တဲသကိး​တၢ်ဂ့ၢ်​မနုၤ​လဲၣ်.

^၄ ခီဖျိ​လၢ န​တ​တုၤထီၣ်​ထီၣ်ဘး​လၢ န​နီၢ်သး​ဖီတၢၣ်​အဃိ မ့ၢ်န​သး​ဟးဂီၤ​ဧါ. န​သး​မ့ၢ်​ဟးဂီၤ​န့ၣ်​ ဃ့​ဘါ​ထုကဖၣ်​လၢ ယဟိဝၤ​ယွၤ​အ​အိၣ်ဒီး တဲ​​​ဘၣ်​အီၤ​န​တၢ်​တူၢ်​​ဘၣ်​တဖၣ်​တက့ၢ်. (စံးထီၣ်ပတြၢၤ ၃၇:၅-၇) တကး​ဒံးဘၣ်​ ဃ့​ပှၤလၢ​အ​ဒိၣ်တုာ်​ခိၣ်ပှဲၤ​တဖၣ်​ အ​တၢ်​မၤစၢၤ ဒ်သိး​က​ဟ့ၣ်ကူၣ်​နၤ​လၢ န​က​​​ဘၣ်​မၤဂ့ၤ​ထီၣ်​န​သး​ဒ်လဲၣ်​ ဝံၤဒီး​မၤထွဲ​အ​တၢ်​ဟ့ၣ်ကူၣ်​ လၢ​အဂ့ၤ​ကတၢၢ်​တက့ၢ်. နမ့ၢ်​မၤ​ဒ်​န့ၣ်​န့ၣ်​ ​​ဘၣ်​သ့ၣ်​သ့ၣ်​ န​က​တုၤထီၣ်​ထီၣ်ဘး လၢ​န​နီၢ်သး​ဖီတၢၣ်​လီၤ. ဘၣ်ဆၣ်​ ဒ်​ဒီပုၢ်ဝဲၢ်​မုၣ်​မဲ​လံ​စၤ အသိး နီၢ်သး​ဖီတၢၣ်​တနီၤ​န့ၣ်​ န​မၤ​အီၤ​တ​တုၤထီၣ်​ထီၣ်ဘး​ဘၣ်​ က​အိၣ်​​ဝဲ​လီၤ. မ့မ့ၢ်​ဒ်​နၣ်​န့ၣ်​ န​က​မၤ​ဒ်လဲၣ်. ဒီး​န​ဆဲး​ပၢၤဃာ်​န​တၢ်​သးခု က​သ့​လၢ​ကျဲ​ဒ်လဲၣ်. ဒ်သိး​န​စံးဆၢ​တၢ်​သံကွၢ်​အံၤ က​သ့​အဂီၢ် လၢ​တၢ်​မၤလိ​အံၤ​အ​ပူၤ ပ​က​တဲသကိး​ဝဲ (၁) တၢ်မနုၤ​က​မၤ​သးခု​နၤ​လဲၣ်, (၂) နမၤ​အါထီၣ်​တၢ်​သးခု က​သ့​ဒ်လဲၣ်​ ဒီး (၃) ဒ်သိး​န​ကအိၣ်​ဒီး​တၢ်​သးခု​အဂီၢ် န​ကြၢး​ပာ်​​လီၤ​ဖီတၢၣ်​ဒ်လဲၣ်.

၅. ဒ်သိး ပ​ကအိၣ်​ဒီး​တၢ်​သးခု​အဂီၢ် ပ​က​​​ဘၣ်​သးစၢၢ်ဆၢ​တၢ်မနုၤ​လဲၣ်. (စံၣ်တဲၤ​တဲ​​လီၤ​တၢ် ၆:၉)

^၅ ဒ် စံၣ်တဲၤ​တဲ​​လီၤ​တၢ် ၆:၉ ပာ်ဖျါ​ထီၣ်​​ဝဲ​အသိး ပ​ကအိၣ်​ဒီး​တၢ်​သးခု​အဂီၢ် ပ​က​​​ဘၣ်​မၤ တၢ်မနုၤ​လဲၣ်. (ဖး​တက့ၢ်.) ပ​တၢ်အိၣ်သး​မ့ၢ်​အိၣ်​ ဒ်လဲၣ်​ဂ့ၤ​ဒ်လဲၣ်​ဂ့ၤ သနာ်က့ ပ​မ့ၢ်​သးမံ​ဒီး “တၢ်​လၢ​ပ​မဲာ်​ထံၣ်တၢ်” န့ၣ်​ ပ​က​ပာ်လုၢ်​ပာ်ပှ့ၤ တၢ်​လၢ​အ​အိၣ်ဒီး​ပှၤလီၤ. ဘၣ်ဆၣ်​ ပ​မ့ၢ် “သး​ဟး​ဝ့ၤဝီၤ​ဆၢ​န့ၢ်​တၢ်” လၢ​ပ​ဒိးန့ၢ်​​​ဘၣ်​အီၤ​တ​သ့​​​ဘၣ်​န့ၣ်​ အိၣ်​ဒၣ်​ပသး​က​ဟးဂီၤ​လီၤ. အဃိ ပ​မၤလိ​န့ၢ် တၢ်မနုၤ​လဲၣ်. ဒ်သိး​ပ​ကအိၣ်​ဒီး တၢ်​သးခု​အဂီၢ် ပ​က​​​ဘၣ်​သးစၢၢ်ဆၢ တၢ်​လၢ​အ​အိၣ်ဒီး​ပှၤ ဒီး​သးစၢၢ်ဆၢ​ဖီတၢၣ်​လၢ ပ​မၤ​လၢပှဲၤ​အီၤ​န့ၢ်​တဖၣ်​လီၤ.

၆. ခဲအံၤ ပ​က​တဲသကိး တၢ်​အဒိ​မနုၤ​လဲၣ်​ ဒီး​ဘၣ်ဃး​ဒီး​တၢ်ဂ့ၢ်​အံၤန့ၣ်​ ပ​မၤလိ​န့ၢ်​​ဘၣ်​တၢ်မနုၤ​လဲၣ်.

^၆ တၢ်​လၢ​အ​အိၣ်ဒီး​ပှၤ​န့ၣ်​ ပသး​မံ​ဒီး​အီၤ သပှၢ်​ကတၢၢ်​ဧါ. ဒ်တၢ်​ဆၢကတီၢ် လဲၤ​ပူၤကွံာ်​အသိး ပ​က​အဲၣ်ဒိး​မၤကွၢ် တၢ်​လၢ​အသီ​တဖၣ်​လီၤ. ပ​က​မၤ​ဒ်​န့ၣ်​အဂီၢ် ညီ​ဒိၣ်မး​လီၤ. ပသး​မံ​ဒီး​တၢ်​လၢ အ​အိၣ်ဒီး​ပှၤ​ခဲအံၤ​တဖၣ်​ က​သ့​လၢ​ကျဲ​ဒ်လဲၣ်. ဒ်သိး​ပ​က​သ့ၣ်ညါ​အဂီၢ် ပ​ကကွၢ်​သကိး ယ့ၣ်ၡူး​ဟ့ၣ်​တၢ်​အဒိ ဘၣ်ဃး​ဒီး စ့​တၤလၣ်​တဖၣ်​လၢ မးသဲ ၂၅:၁၄-၃၀ အ​ပူၤ​န့ၣ်​လီၤ. ပ​က​တဲသကိး ဘၣ်ဃး​ဒီး​စ့​တၤလၣ်​အဂ့ၢ်​န့ၣ်​ ပ​မၤလိ​န့ၢ်​တၢ်မနုၤ​လဲၣ်. ဒီး​ပ​မၤ​အါထီၣ်​ပ​တၢ်​သးခု ဒီး​ပ​က​သးမံ ဒီး​တၢ်​လၢ​အ​အိၣ်ဒီး​ပှၤ​ခဲအံၤ က​သ့​ဒ်လဲၣ်.

၇. တဲဖျါ​ထီၣ်​ ယ့ၣ်ၡူး​ဟ့ၣ်​တၢ်​အဒိ ဘၣ်ဃး​ဒီး​စ့​တၤလၣ်​အဂ့ၢ်​န့ၣ်​တက့ၢ်.

^၇ လၢ​ယ့ၣ်ၡူး​ဟ့ၣ်​ တၢ်​အဒိ​အ​ပူၤ​န့ၣ်​ ပိာ်ခွါ​တဂၤ​လဲၤ​တၢ်​လၢ တၢ်လီၢ်​အယံၤ​လီၤ. တချုး​လၢ​အ​လဲၤ​တၢ်​ဒံး​​ဘၣ်​အခါ အ​​ဝဲ​ကိး​​ဝဲ​အ​ကုၢ်​တဖၣ်​ ဒီး​ဟ့ၣ်​​​လီၤ​​​ဝဲ​အ​ကုၢ်​လၢ စ့​တၤလၣ်​တဖၣ်​လၢ ကဖံးအီၣ်​မၤအီၣ်​တၢ်​အဂီၢ်​လီၤ. * ခီဖျိ​လၢ အ​သ့ၣ်ညါ​​​ဝဲ​အ​ကုၢ်​တဂၤ​စုာ်စုာ် အ​တၢ်အိၣ်သး​အဃိ အ​​ဝဲ​ဟ့ၣ်​​​လီၤ​​​ဝဲ​အ​ကုၢ် အဆိ​ကတၢၢ်​တဂၤ​လၢ စ့​ယဲၢ်​တၤလၣ်, ခံဂၤ​တဂၤ​လၢ စ့​ခံ​တၤလၣ်​ ဒီး​သၢ​ဂၤတဂၤ​လၢ စ့​တ​တၤလၣ်​လီၤ. အ​ကုၢ်​အဆိ​ကတၢၢ်​ခံဂၤ​န့ၣ်​ ဂုာ်ကျဲးစၢး​မၤတၢ်​ဆူၣ်ဆူၣ်​ဒ်သိး က​မၤ​အါထီၣ်​စ့​အဂီၢ်​လီၤ. ဘၣ်ဆၣ်​ ကုၢ်​သၢ​ဂၤတဂၤ​န့ၣ်​ တ​မၤ​အါထီၣ်​ အ​စ့​တၤလၣ်​​​ဘၣ်​အဃိ အကစၢ်​နီ​ဟးထီၣ်​ကွံာ်​အီၤ​လီၤ.

၈. ​​ဘၣ်​မနုၤ​အဃိ ကုၢ်​အဆိ​ကတၢၢ်​တဂၤ​လၢ ယ့ၣ်ၡူး​ဟ့ၣ်​တၢ်​အဒိ​အ​ပူၤ​န့ၣ်​ သးခု​​​ဝဲ​လဲၣ်.

 ^၈ ကုၢ်​အဆိ​ကတၢၢ်​တဂၤ​န့ၣ်​ ဒိးန့ၢ်​​​ဘၣ်​​​ဝဲ​စ့​ယဲၢ်​တၤလၣ်​လၢ အ​ကစၢ်​အ​အိၣ်​လီၤ. အ​ဒိးန့ၢ်​​​ဘၣ်​စ့ဖး​အါ​ညါ ဒီး​ဖျါ​လၢ​အ​ကစၢ်​နာ်န့ၢ်​အီၤ​ဒိၣ်မး​လီၤ. ဘၣ်ဆၣ်​ မ့မ့ၢ်​လၢ​ကုၢ်​ခံဂၤ​တဂၤ​ဟီ​မီၤ. ကုၢ်​ခံဂၤ​တဂၤ အသး​က​ဟးဂီၤ​ခီဖျိ​လၢ အ​ဒိးန့ၢ်​​​ဘၣ်​စ့​စှၤန့ၢ်ဒံး ကုၢ်​လၢ​အဆိ​ကတၢၢ်​တဂၤ​သ့​​ဝဲ​လီၤ. ဘၣ်ဆၣ်​ အ​မၤ​​ဝဲ​ဒ်လဲၣ်.

၉. ဘၣ်ဃး​ဒီး​ကုၢ်​ခံဂၤ​တဂၤ​န့ၣ်​ ယ့ၣ်ၡူး​တဲဝဲ တၢ်မနုၤ​လဲၣ်. (မးသဲ ၂၅:၂၂, ၂၃)

^၉ ဖး မးသဲ ၂၅:၂၂, ၂၃ တက့ၢ်. ယ့ၣ်ၡူး​တ​တဲ​​ဝဲ​လၢ ကုၢ်​ခံဂၤ​တဂၤ​န့ၣ်​ အသး​ဟးဂီၤ​ဒီး သးဘၣ်ဒိ ခီဖျိ​လၢ​အ​ဒိးန့ၢ်​ဘၣ်​ စ့​ခံ​တၤလၣ်​အဃိ​ဘၣ်. ဒီး​ယ့ၣ်ၡူး​တ​တဲ​စ့ၢ်ကီး​​​ဝဲ​လၢ ကုၢ်​တဂၤ​အံၤ ကဒူး​ကဒ့ၣ်​တၢ်​ဒီး တဲ​​ဝဲ​လၢ ‘​​ဘၣ်​မနုၤ​အဃိ ယ​ကစၢ်​ဟ့ၣ်​ယၤ စ့​စှၤ​ထဲ​အံၤ​ညါ​လဲၣ်. ယ​မၤတၢ်​ဆူၣ်​ဒ်သိး​ဒီး ကုၢ်​လၢ​အ​ဒိးန့ၢ်​​​ဘၣ်​စ့ ယဲၢ်​တၤလၣ်​တဂၤ​န့ၣ်​လီၤ. ယ​ကစၢ်​မ့ၢ် တ​ပာ်လုၢ်​ပာ်ပှ့ၤ​ယၤ​​​ဘၣ်​န့ၣ်​ ယ​လဲၤ​ဘျၢ​​​လီၤ​စ့ ခံ​တၤလၣ်​အံၤ​လၢ ဟီၣ်ခိၣ်​ဖီလာ်​ဒီး မၤ​က့ၤ​တၢ်​လၢ ယ​နီၢ်ကစၢ်​အဂီၢ်​လီၤ.’

၁၀. ကုၢ်​ခံဂၤ​တဂၤ​န့ၣ်​ သူ​​ဝဲ​အ​စ့​တၤလၣ်​ လၢ​ကျဲ​ဒ်လဲၣ်.

^၁၀ ဒ်​ကုၢ်​အဆိ​ကတၢၢ်​တဂၤ​အသိး ကုၢ်​ခံဂၤ​တဂၤ​စ့ၢ်ကီး သ့ၣ်ညါ​​​ဝဲ​လၢ စ့​လၢ​အ​ကစၢ်​ဟ့ၣ်​အီၤ​န့ၣ်​ မ့ၢ်​တၢ်​အရ့ဒိၣ်​ဒိၣ်မး​အဃိ အ​​ဝဲ​မၤတၢ်​ဆူၣ်ဆူၣ်​ လၢ​အ​ကစၢ်​အဂီၢ်​လီၤ. လၢခံ အ​ဒိးန့ၢ်​အါထီၣ်​ဝဲ စ့​ခံစး လၢ​အ​ကစၢ်​အ​အိၣ်​လီၤ. ခီဖျိ​လၢ​ကုၢ်​အံၤ မၤတၢ်​ဆူၣ်​ အဃိ အ​ကစၢ်​ဟ့ၣ်​အီၤ​ခိၣ်ဖး​လီၤ. အ​ကစၢ်​သးခု​ဃုာ်ဒီး​အီၤ ဒီး​ဟ့ၣ်​အါထီၣ်​အီၤ​မူဒါ​တဖၣ်​လီၤ.

၁၁. န​မၤ​အါထီၣ်​ န​တၢ်​သးခု​က​သ့​ဒ်လဲၣ်.

^၁၁ ဒ်​န့ၣ်​အသိး ဖဲ​ပ​မၤ​ကစၢ်​ယွၤ​အ​တၢ်မၤ လၢ​အဂ့ၤ​ကတၢၢ် ဒီး​သူ​တၢ်​လၢ​အ​အိၣ်ဒီး​ပှၤ လၢ​ယဟိဝၤ​ယွၤ အ​တၢ်မၤ​အဂီၢ်​အခါ ပ​က​သးခု​အါထီၣ်​​​ဝဲ​လီၤ. “ဟ့ၣ်​တၢ်​ဆၢကတီၢ် လၢာ်​လၢာ်​ဆ့ဆ့” လၢ​တၢ်​စံၣ်တဲၤ​တဲ​​လီၤ​တၢ်မၤ​အ​ပူၤ​ဒီး လၢ​တၢ်​အိၣ်ဖှိၣ်​အဂီၢ်​ တက့ၢ်. (မၤတၢ် ၁၈:၅; ဧ့ၤဘြံၤ ၁၀:၂၄, ၂၅) ကတဲာ်​ကတီၤ​ပာ်စၢၤ​သး​ဂ့ၤဂ့ၤ​လၢ န​က​ဟ့ၣ်ထီၣ်​တၢ်​စံးဆၢ​လၢ အ​ကဲထီၣ်​တၢ်ဂံၢ်​တၢ်ဘါ​လၢ ဒီပုၢ်ဝဲၢ်​မုၣ်​ခွါ​အဂီၢ်​တက့ၢ်. န​မ့ၢ်​ဒိးန့ၢ်​​​ဘၣ်​မူဒါ​လၢ နွံဖးဖီ​တၢ်​အိၣ်ဖှိၣ်​အဂီၢ်​န့ၣ်​ ထံၣ်​အီၤ​လၢ​အမ့ၢ် တၢ်ခွဲး​တၢ်ယာ် လၢ​နဂီၢ်​တက့ၢ်. ပှၤ​မ့ၢ်​မၢ န​မၤစၢၤ​တၢ်​တခါခါ​လၢ တၢ်​အိၣ်ဖှိၣ်​အ​ပူၤ​န့ၣ်​ ကဲထီၣ်​ပှၤလၢ ပှၤ​နာ်န့ၢ်​​​ဝဲ​သ့​ဒီး ပာ်ကဲ​တၢ်​ဆၢကတီၢ်​တက့ၢ်. မူဒါ​လၢ န​ဒိးန့ၢ်​​​ဘၣ်​အီၤ​န့ၣ်​ တ​​ဘၣ်​ဆိကမိၣ်​လၢ အ​ရ့​တ​ဒိၣ်​​​ဘၣ်​န့ၣ်​တဂ့ၤ. ဂုာ်ကျဲးစၢး မၤတၢ်​ဆူၣ်ဆူၣ်​ ဒ်သိး​န​တၢ်​သ့​တၢ်ဘၣ်​ က​အါထီၣ်​တက့ၢ်. (ကတိၤဒိ ၂၂:၂၉) န​မၤတၢ်​မ့ၢ်​ဆူၣ်​လၢ ယဟိဝၤ​ယွၤ​အဂီၢ်​န့ၣ်​ န​တၢ်​ရ့လိာ်သး​ဒီး​အီၤ က​ဂ့ၤဒိၣ်​ထီၣ်​ ဒီး​န​က​သးခု​လီၤ. (ကလၤတံ ၆:၄) ဒီး​ဖဲ​ပှၤဂၤ​ဒိးန့ၢ်​မူဒါ​လၢ န​အဲၣ်ဒိး​မၤ​အခါ​ဒၣ်လဲာ် န​က​သးခု​ဃုာ်ဒီး​အဝဲသ့ၣ်​လီၤ.—ရိမ့ၤ ၁၂:၁၅; ကလၤတံ ၅:၂၆.

၁၂. တၢ်မနုၤ​မၤစၢၤ ဒီပုၢ်ဝဲၢ်​မုၣ်​မဲ​လံ​စၤ ဒီး​ဒီပုၢ်ဝဲၢ်​ခွါ​နံးခ်​လၢ ကအိၣ်​ဒီး​တၢ်​သးခု​လဲၣ်.

^၁၂ န​နီၣ်ဘၣ်​ ဒီပုၢ်ဝဲၢ်​မုၣ်​မဲ​လံ​စၤ လၢ​အ​အဲၣ်ဒိး​လဲၤ​မၤတၢ်​လၢ ဘ့ၤသ့လး​ဒီး လဲၤထီၣ်​ဝဲ ပှၤ​စိာ်​ဘီ​မုၢ်​တၢ်​သး​ခု​က​စီၣ်​ဖိ​အ​ကၠိ​န့ၣ်​ဧါ. တၢ်​လၢ​အ​မုၢ်လၢ်​​ဝဲ​တဖၣ်​ အ​မၤ​​ဝဲ​တ​သ့​ဘၣ်​ သနာ်က့ အ​တဲ​​ဝဲ​လၢ “ယ​ဂုာ်ကျဲးစၢး​မၤ ပှၤ​လဲၤလၢညါ လၢ​အဂ့ၤ​ကတၢၢ် ဒီး​ယ​စံၣ်တဲၤ​တဲ​​လီၤ​တၢ်​လၢ ကျိၤ​ကျဲ​အ​ကလုာ်​ကလုာ်​လီၤ. ယ​မၤ​ဒ်အံၤ​အဃိ ယ​သးခု​ဒိၣ်မး​လီၤ.” ဖဲ​ပှၤ​တ​ပာ်ထီၣ်​ ဒီပုၢ်ဝဲၢ်​ခွါ​နံးခ်​လၢ တၢ်​အိၣ်ဖှိၣ်​ပှၤ​မၤစၢၤ​တၢ်​​ဘၣ်​အခါ အ​မၤ​​ဝဲ​ဒ်လဲၣ်. အ​တဲ​​ဝဲ​လၢ “ယ​သးစၢၢ်ဆၢ တၢ်​လၢ​ယ​မၤ​အီၤ​သ့​တဖၣ်​ ဒ်သိး​ဒီး တၢ်​စံၣ်တဲၤ​တဲ​​လီၤ​တၢ်မၤ ဒီး​ဟ့ၣ်ထီၣ်​တၢ်​စံးဆၢ​လၢ အ​ဟ့ၣ်ဂံၢ်​ဟ့ၣ်ဘါ​ပှၤဂၤ လၢ​တၢ်​အိၣ်ဖှိၣ်​ အ​ပူၤ​လီၤ. ဒီး​ယ​တီၣ်ထီၣ်​ လံာ်​ပတံထီၣ်​လၢ ဘ့ၤသ့လး ဒီး​လၢခံ​ပှၤ​တူၢ်လိာ်​ယၤ​လီၤ.”

၁၃. န​မ့ၢ်​ဂုာ်ကျဲးစၢး​မၤ​န​မူဒါ​ခဲအံၤ လၢ​အဂ့ၤ​တၢၢ်​န့ၣ်​ အဘျုး​ကအိၣ်​ဒ်လဲၣ်. (စံၣ်တဲၤ​တဲ​​လီၤ​တၢ် ၂:၂၄)

^၁၃ န​မ့ၢ်​သးမံ​ဒီး န​မူဒါ​လၢ​န​မၤ​အီၤ ခဲအံၤ​န့ၣ်​ မ့ၢ်​န​က​ဒိးန့ၢ်​အါထီၣ်​ဘၣ်​ မူဒါ​အသီ​လၢ​ခါဆူညါ​ဧါ. တၢ်​ကဲထီၣ်​အသး ဒီး​ဒီပုၢ်ဝဲၢ်​ခွါ​နံးခ် ဒ်​န့ၣ်​လီၤ. ဘၣ်ဆၣ်​ န​တၢ်အိၣ်သး မ့ၢ်​လီၤဂာ်​ဒီး ဒီပုၢ်ဝဲၢ်​မုၣ်​မဲ​လံ​စၤ​န့ၣ်​ န​ဆဲး​အိၣ်ဒီး​တၢ်​သးခု ဒီး​န​မၤ​ယဟိဝၤ​ယွၤ​အ​တၢ်မၤ လၢ​အဂ့ၤ​ကတၢၢ် သ့​​ဝဲ​လီၤ. (ဖး စံၣ်တဲၤ​တဲ​​လီၤ​တၢ် ၂:၂၄ တက့ၢ်.) တကး​ဒံးဘၣ်​ န​တၢ်​သးခု​က​အါထီၣ်​ မ့ၢ်​လၢ​န​သ့ၣ်ညါ​လၢ န​မၤ​သးခု ယ့ၣ်ၡူး​ခရံာ်​အသး​အဃိ​လီၤ.

၁၄. ဖဲ​ပ​ဆိကမိၣ်​ထီၣ်​ ဘၣ်ဃး​ဒီး​ပ​ဖီတၢၣ်​လၢ ယဟိဝၤ​ယွၤ​အ​တၢ်မၤ​အ​ပူၤ​အခါ ပ​က​​​ဘၣ်​သ့ၣ်နီၣ်​ထီၣ်​က့ၤ တၢ်မနုၤ​လဲၣ်.

^၁၄ ခဲအံၤ​ပ​မ့ၢ်​မၤ​ယဟိဝၤ​ယွၤ​အ​တၢ်မၤ​လၢ အဂ့ၤ​ကတၢၢ်​လံ​န့ၣ်​ မ့ၢ်​အဲၣ်ဒိး​တဲဝဲ ပ​တ​​ဘၣ်​ဂုာ်ကျဲးစၢး​မၤ​အါထီၣ်​ ယဟိဝၤ​ယွၤ​အ​တၢ်မၤ​လၢၤ​​ဘၣ်​ဧါ. တ​အဲၣ်ဒိး​တဲ​​ဝဲ​ဒ်​န့ၣ်​ဘၣ်. ပ​ကြၢး​ပာ်​​လီၤ​ဖီတၢၣ်​လၢ က​မၤစၢၤ​ပှၤ​ဒ်သိး ပ​စံၣ်တဲၤ​တဲ​​လီၤ​တၢ်​က​သ့​ထီၣ်​ ဒီးသိၣ်လိ​ပှၤဂၤ​က​သ့​ထီၣ်​ ဒီး​မၤစၢၤ​ဒီပုၢ်ဝဲၢ်​မုၣ်​ခွါ​တဖၣ်​လီၤ. ပ​မ့ၢ်​အိၣ်ဒီး​တၢ်​ဆီၣ်​​လီၤ​သး​ဒီး သးစၢၢ်ဆၢ​လၢ က​မၤစၢၤ​ပှၤဂၤ​အဂီၢ်​န့ၣ်​ ပ​က​တုၤထီၣ်​ထီၣ်ဘး​လၢ ပ​ဖီတၢၣ်​သ့​​ဝဲ​လီၤ.—ကတိၤဒိ ၁၁:၂; မၤတၢ် ၂၀:၃၅.

၁၅. ဒ်သိး​န​တၢ်​သးခု​က​အါထီၣ်​အဂီၢ် န​ပာ်​​လီၤ​ဖီတၢၣ်​မနုၤ​သ့​လဲၣ်.

^၁၅ ပ​ကြၢး​ပာ်​​လီၤ​ဖီတၢၣ်​ဒ်လဲၣ်. ဃ့​ဘါ​ထုကဖၣ်​လၢ ယဟိဝၤ​ယွၤ​အ​အိၣ်​ ဒ်သိး​က​မၤစၢၤ​နၤ​လၢ န​က​ပာ်​​လီၤ​ဖီတၢၣ်​လၢ န​မၤ​လၢပှဲၤ​အီၤ​န့ၢ်​တဖၣ်​လီၤ. (ကတိၤဒိ ၁၆:၃; ယၤကိာ် ၁:၅) ဖီတၢၣ်တဖၣ်လၢ  လံာ်အဆၢတၢအပူၤန့ၣ် မ့ၢ်နဂုာ်ကျဲးစၢးတုၤထီၣ်ထီၣ်ဘးအီၤ တခါခါ ကသ့ဧါ. မ့ၢ်​န​ဂုာ်ကျဲးစၢး တုၤထီၣ်​ထီၣ်ဘး​လၢ န​မၤ​ပှၤ​လဲၤလၢညါ​မၤစၢၤ​တၢ်, ပှၤ​လဲၤလၢညါ, မၤတၢ်​လၢ​ဘ့ၤသ့လး ဒီး​မၤတၢ်​လၢ​တၢ်​သူၣ်ထီၣ်​ဘှီထီၣ်​က​သ့ဧါ. မ့တမ့ၢ် န​မၤလိ​ကျိာ်​အသီ ဒီး​လဲၤ​မၤစၢၤ​တၢ်​လၢ တၢ်လီၢ်​လၢ​ပှၤ​လိၣ်​အါထီၣ်​ ပှၤ​စံၣ်တဲၤ​တဲ​​လီၤ​တၢ်ဖိ​က​သ့ဧါ. န​ဃု​သ့ၣ်ညါ​အါထီၣ်​ ဘၣ်ဃး​ဒီး​ဖီတၢၣ်​တဖၣ်​အံၤ​သ့​လၢ လံာ် Organized to Do Jehovah’s Will တၢ်​မၤလိ ၁၀ အ​ပူၤ ဒီးန​သံကွၢ်​တၢ်​အိၣ်ဖှိၣ်​သးပှၢ်​တဖၣ်​ သ့​စ့ၢ်ကီး​လီၤ. * ဖဲ​န​ဂုာ်ကျဲးစၢး​မၤ​လၢပှဲၤ န​ဖီတၢၣ်​အခါ ပှၤဂၤ​စ့ၢ်ကီး​က​ထံၣ်ဝဲ န​ဒိၣ်ထီၣ်​ထီထီၣ်​လၢ နီၢ်သး​တခီ ဒီး​န​တၢ်​သးခု​က​အါထီၣ်​စ့ၢ်ကီး​လီၤ.

၁၆. ဘၣ်ဆၣ်​ န​မၤ​လၢပှဲၤ​ဖီတၢၣ်​လၢ ပ​တဲသကိး​တဖၣ်​ မ့ၢ်​တန့ၢ်​ဒံး​​ဘၣ်​န့ၣ်​ န​က​မၤ​ဒ်လဲၣ်.

^၁၆ ဘၣ်ဆၣ်​ န​မၤ​လၢပှဲၤ​န​ဖီတၢၣ်​လၢ ပ​တဲသကိး​တဖၣ်​  မ့ၢ်တန့ၢ်​ဒံး​​ဘၣ်​န့ၣ်​ န​က​မၤ​ဒ်လဲၣ်. အဃိ ပာ်​​လီၤ​ဖီတၢၣ်​လၢ န​မၤ​လၢပှဲၤ​အီၤ​သ့​တဖၣ်​န့ၣ်​တက့ၢ်. ပ​ကကွၢ်​သကိး တၢ်ဂ့ၢ်​တနီၤ​လၢ က​မၤစၢၤ​ပှၤ​န့ၣ်​လီၤ.

၁၇. ဒ် ၁ တံၤမသ့း ၄:၁၃, ၁၅ ပာ်ဖျါ​ထီၣ်​​ဝဲ​အသိး ဒ်သိး​ဒီပုၢ်ဝဲၢ်​ခွါ​က​ကဲထီၣ်​ ပှၤ​သိၣ်လိ​တၢ်ဖိ​လၢ​အဂ့ၤ​တဂၤ​အဂီၢ် အ​က​​​ဘၣ်​မၤ​တၢ်မနုၤ​လဲၣ်.

^၁၇ ဖး ၁ တံၤမသ့း ၄:၁၃, ၁၅ တက့ၢ်. န​မ့မ့ၢ်​ဒီပုၢ်ဝဲၢ်​ခွါ​လၢ အ​ဒိး​ဘျၢထံ​ဝံၤ​န့ၣ်​ န​ဂုာ်ကျဲးစၢး​ဒ်သိး န​ဟ့ၣ်​တၢ်​စံၣ်တဲၤ​တဲ​​လီၤ​တၢ် ဒီး​သိၣ်လိ​တၢ်ဂ့ၤ​ထီၣ်​ သ့​​ဝဲ​လီၤ. ​​ဘၣ်​မနုၤ​အဃိ​လဲၣ်. ခီဖျိ​လၢ န “သးစၢၢ်ဆၢ” တၢ်​ဖးလံာ်​ဖးလဲၢ်, တၢ်​စံၣ်တဲၤ​တဲ​​လီၤ​တၢ် ဒီးသိၣ်လိ​တၢ်ဂ့ၤဂ့ၤ​အဃိ န​မၤစၢၤ​​​ဘၣ်​ပှၤလၢ အ​ဒိကနၣ်​တၢ်​တဖၣ်​လီၤ. ပာ်​​လီၤ​ဖီတၢၣ်​လၢ န​က​မၤလိ​ဒီး​မၤဂ့ၤ​ထီၣ်​ န​တၢ်​သ့​တၢ်​​ဘၣ်​လၢ လံာ်​ဘရိၣ်ခၠၣ်​ လၢ​အမ့ၢ် ဂုာ်ကျဲးစၢး​မၤဂ့ၤ​ထီၣ်​ နတၢ်​ဖးလံာ်​ဖးလဲၢ် ဒီး န​တၢ်​သိၣ်လိ​တက့ၢ်. ဃု​သ့ၣ်ညါ​တၢ်​သ့​တၢ်ဘၣ်​ တခါ​​​ဘၣ်​တခါ, ကၠီးလိ​န​သး​လၢ​ဟံၣ်​ ဒီး​မၤထွဲ​တၢ်​လၢ​န​မၤလိ​​​ဘၣ်​တဖၣ်​ ဖဲ​န​​​ဘၣ်​ဟ့ၣ်​တၢ်​စံၣ်တဲၤ​တဲ​​လီၤ​တၢ်​အခါ​န့ၣ်​တက့ၢ်. ဃ့တၢ်​ဟ့ၣ်ကူၣ်​လၢ ပှၤ​ဟ့ၣ်​ကူၣ်တၢ်​လီၤဆီ မ့တမ့ၢ် တၢ်​အိၣ်ဖှိၣ်​သးပှၢ်​တဖၣ်​လၢ “အ​ဂုာ်ကျဲးစၢး​လၢ တၢ်​စံၣ်တဲၤ​တဲ​​လီၤ​တၢ် ဒီး​တၢ်​သိၣ်လိ​နဲၣ်လိ​တၢ်” အ​အိၣ်​န့ၣ်​တက့ၢ်. * (၁ တံၤမသ့း ၅:၁၇) န​တ​​ဘၣ်​သးစၢၢ်ဆၢ​ထဲ န​က​မၤထွဲ​တၢ်​မၤလိ​လၢ လံာ်​ဘရိၣ်ခၠၣ်​အ​ပူၤ​န့ၣ်​တဂ့ၤ. ဘၣ်ဆၣ်​ န​က​​​ဘၣ်​သးစၢၢ်ဆၢ​စ့ၢ်ကီး​လၢ န​က​မၤစၢၤ​ပှၤ​ဒိကနၣ်​တၢ်ဖိ​တဖၣ်​ လၢ​က​မၤဂၢၢ်​ကျၢၤထီၣ်​အ​တၢ်နာ် ဒီး​ထိၣ်ဟူး​ထိၣ်ဂဲၤ​ထီၣ်​အဝဲသ့ၣ်​လၢ က​မၤထွဲ​တၢ်​လၢ​အ​မၤလိ​​​ဘၣ်​အ​​ဝဲ​တဖၣ်​လီၤ. န​မ့ၢ်​မၤ​ဒ်​န့ၣ်​န့ၣ်​ န​တၢ်​သးခု​က​အါထီၣ်​ ဒီး​ပှၤဂၤ​စ့ၢ်ကီး​က​သးခု​လီၤ.

၁၈. ဒ်သိး​န​မၤ​လၢပှဲၤ န​ဖီတၢၣ်​လၢ တၢ်​စံၣ်တဲၤ​တဲ​​လီၤ​တၢ်မၤ​က​န့ၢ်​အဂီၢ် တၢ်မနုၤ​က​မၤစၢၤ​နၤ​လဲၣ်.

^၁၈ ပ​​ဝဲ​ခဲလၢာ် ပ​အိၣ်ဒီး​မူဒါ​လၢ က​​​ဘၣ်​စံၣ်တဲၤ​တဲ​​လီၤ​တၢ်​ဒီး ဒုး​ကဲထီၣ်​ပှၤဂၤ​လၢ ခရံာ်​အပျဲၢ်​အဘီၣ်​လီၤ. (မးသဲ ၂၈:၁၉, ၂၀; ရိမ့ၤ ၁၀:၁၄) မ့ၢ်​န​အဲၣ်ဒိး​လၢ န​တၢ်​သ့​တၢ်​​ဘၣ်​လၢ တၢ်မၤ​အရ့ဒိၣ်​ အံၤ က​ဂ့ၤဒိၣ်​ထီၣ်​ဧါ. မၤလိ လံာ်​ဘရိၣ်ခၠၣ်​ တၢ်​ဖးလံာ်​ဖးလဲၢ်​ဒီး​သိၣ်လိ​တၢ် ဒီး​မၤထွဲ​တၢ်​လၢ န​မၤလိ​​​ဘၣ်​တဖၣ်​န့ၣ်​တက့ၢ်. နဒိးန့ၢ်​​​ဘၣ်​တၢ်​မၤစၢၤ​သ့​စ့ၢ်ကီး​လၢ ခရံာ်ဖိ အ​တၢ်​အိၣ်မူ​ဒီး တၢ်စံၣ်တဲၤ​တဲ​​လီၤ​တၢ်​ကၠိ—ကၠိဖိ​လံာ်​တၢ်​မၤလိ ဒီး​ကွၢ်​တၢ်ဂီၤမူ တၢ်​ထံၣ်​လိာ်သး​ဒီး​ဟံၣ်​ကစၢ်​လၢ ပှၤ​ဒုးနဲၣ်​​ဝဲ​ဖဲ နွံဖးဖီ​တၢ်​အိၣ်ဖှိၣ်​အဂီၢ်​န့ၣ်​တက့ၢ်. ဂုာ်ကျဲးစၢး​မၤကွၢ်​တၢ်​ဟ့ၣ်ကူၣ်​လၢ ကျဲ​အါဘိ​ဒ်သိး နမၤဂ့ၤ​ထီၣ်​ န​တၢ်​စံၣ်တဲၤ​တဲ​​လီၤ​တၢ်မၤ​အဂီၢ်​တက့ၢ်. ဖဲ​န​မၤထွဲ တၢ်ဟ့ၣ်ကူၣ်​တဖၣ်​န့ၣ်​အခါ န​စံၣ်တဲၤ​တဲ​​လီၤ​တၢ် က​သ့​ဂ့ၤထီၣ်​ဒီး န​က​သးခု အါထီၣ်​စ့ၢ်ကီး​လီၤ.—၂ တံၤမသ့း ၄:၅.

၁၉. န​မၤ​အိၣ်​ထီၣ်​ ခရံာ်ဖိ​အ​တၢ်ဂ့ၤ​တၢ်ဝါ​တဖၣ်​ က​သ့​ဒ်လဲၣ်.

^၁၉ ဖဲ​ပ​ဆိကမိၣ်​ထီၣ်​က့ၤ ပ​ဖီတၢၣ်​အခါ ပ​က​​​ဘၣ်​သ့ၣ်နီၣ်​ထီၣ်​က့ၤ​လၢ တၢ်​အရ့ဒိၣ်​ကတၢၢ်​လၢ ပ​ပာ်​​လီၤ​ဖီတၢၣ်​အဂီၢ်​န့ၣ်​ မ့ၢ်​​ဝဲ​ပ​က​မၤ​အိၣ်​ထီၣ်​ ခရံာ်ဖိ​တၢ်ဂ့ၤ​တၢ်ဝါ​လၢ ယဟိဝၤ​ယွၤ​ဘၣ်သး​​​ဝဲ​တဖၣ်​လီၤ. (ကလၤတံ ၅:၂၂, ၂၃; ကလီးစဲ ၃:၁၂; ၂ ပ့းတရူး ၁:၅-၈) န​မၤ​လၢပှဲၤ န​ဖီတၢၣ်​က​သ့​ဒ်လဲၣ်. အဒိ, ​​ဘၣ်​သ့ၣ်​သ့ၣ်​ နအဲၣ်ဒိး​မၤဂၢၢ်​ကျၢၤထီၣ်​ န​တၢ်နာ်​လီၤ. န​က​ဖး​လံာ်လဲၢ်​လၢ ပ​တၢ်​ကရၢကရိ​ထုးထီၣ်​​​ဝဲ​တဖၣ်​ ဒ်သိး​န​က​ထံၣ်​န့ၢ်​တၢ်​ဟ့ၣ်ကူၣ်​လၢ န​က​မၤဂၢၢ်​ကျၢၤထီၣ်​ န​တၢ်နာ်​အဂီၢ်​လီၤ. န​က​ဒိးန့ၢ်​​​ဘၣ်​တၢ်​မၤစၢၤ​လၢ တၢ်ဂီၤမူ​ဖုၣ်ကိာ်​ဖိ ဘၣ်ဃး​ဒီး​တၢ်​စံၣ်တဲၤ​တဲ​​လီၤ​တဖၣ်​လၢ JW Broadcasting^® လၢ​အ​ပာ်ဖျါ​ထီၣ်ဝဲ ဒီပုၢ်ဝဲၢ်​မုၣ်​ခွါ​တဖၣ်​အ​တၢ်စူၢ်​တၢ်နာ် ဖဲ​အဝဲသ့ၣ်​ထံၣ်ဘၣ်​ တၢ်ကီ​တၢ်ခဲ​အခါ​လီၤ. ဝံၤဒီး​ဆိကမိၣ်​ထံ​လၢ န​ကွၢ်လိ​မၤဒိး အဝဲသ့ၣ်​အ​တၢ်နာ်​လၢ န​တၢ်​အိၣ်မူ​အ​ပူၤ က​သ့​ဒ်လဲၣ်​န့ၣ်​တက့ၢ်.

၂၀. ဒ်သိး​ပ​က​သးခု ဒီး​ပ​တၢ်​သူၣ်​ဟးဂီၤ​သး​ဟးဂီၤ က​​လီၤ​စှၤ​​​ဝဲ​အဂီၢ် ပ​က​​​ဘၣ်​မၤ​တၢ်မနုၤ​လဲၣ်.

^၂၀ ပ​​ဝဲ​ခဲလၢာ် ပ​မုၢ်လၢ်​လၢ ပ​က​မၤ​ဘၣ်​ ယဟိဝၤ​ယွၤ​အ​တၢ်မၤ အါန့ၢ်​ဒံး​လၢညါ. လၢ​ဟီၣ်ခိၣ်​သီ​အ​ပူၤ​န့ၣ်​ ပ​က​မၤ​​​ဘၣ်​ယဟိဝၤ​ယွၤ အ​တၢ်မၤ လၢ​လၢပှဲၤ​ပှဲၤ. အဃိ ခဲအံၤ ပ​က​မၤ​ယဟိဝၤ​ယွၤ အ​တၢ်မၤ​လၢ အဂ့ၤ​ကတၢၢ်​လီၤ. ပ​မ့ၢ်​မၤ​အီၤ​လၢ​အဂ့ၤ​ကတၢၢ်​န့ၣ်​ ပ​တၢ်​သးခု​က​အါထီၣ်​ ဒီး​ပ​တၢ်​သူၣ်​ဟးဂီၤ​သး​ဟးဂီၤ​တဖၣ်​ က​​လီၤ​စှၤ​​​ဝဲ​လီၤ. တၢ်​လၢ​အရ့ဒိၣ်​ကတၢၢ်​န့ၣ်​ ပ​က​မၤလၤ​ကပီၤ​ဒီး စံးထီၣ်​ပတြၢၤ​ယဟိဝၤ​ယွၤ ပ “ကစၢ်​ယွၤ လၢအ​သးခု” န့ၣ်​လီၤ. (၁ တံၤမသ့း ၁:၁၁) အဃိ မ်​ပ​က​သးခု​ဒီး တၢ်ခွဲး​တၢ်ယာ်​လၢ ပ​ဒိးန့ၢ်​​​ဘၣ်​အီၤ ခဲအံၤ​တဖၣ်​တက့ၢ်.