တၢ်မၤလိ ၃၄
“ဆဲးလဲၤတၢ်လၢ တၢ်မ့ၢ်တၢ်တီ အပူၤ”
“ဆဲးလဲၤတၢ်လၢ တၢ်မ့ၢ်တၢ်တီ အပူၤ.”—၃ ယိၤဟၣ် ၄.
တၢ်သးဝံၣ် ၁၁၁ တၢ်ဂ့ၢ်လၢ အမၤသးခုပှၤ
တၢ်မၤလိအံၤ အတၢ်တိာ်ပာ် a
၁. ပမ့ၢ်တဲသကီးတၢ် ဘၣ်ဃးဒီး ပန့ၢ်ဘၣ် “တၢ်မ့ၢ်တၢ်တီ” ဒ်လဲၣ်န့ၣ် ကကဲဘျုးဒ်လဲၣ်.
ဖဲပအဲၣ်ဒိးသ့ၣ်ညါအါထီၣ် ဘၣ်ဃးဒီး ပဒီပုၢ်ဝဲၢ်တဂၤအဂ့ၢ်အခါ အဆိကတၢၢ်န့ၣ် ပသံကွၢ်အီၤလၢ “နန့ၢ်ဘၣ်တၢ်မ့ၢ်တၢ်တီဒ်လဲၣ်.” ဘၣ်သ့ၣ်သ့ၣ် နန့ၢ်ဘၣ် တၢ်မ့ၢ်တၢ်တီဒ်လဲၣ်န့ၣ် နတဲပၠးဘၣ်ပှၤဂၤတဘျုးဘျီလံ. ဖဲပဒီပုၢ်ဝဲၢ်မုၣ်ခွါတဖၣ် တဲပၠးဘၣ်ပှၤလၢ အဝဲသ့ၣ် သ့ၣ်ညါထီၣ် ယဟိဝၤယွၤဒ်လဲၣ် ဒီးအဝဲသ့ၣ် စးထီၣ်အဲၣ် ယဟိဝၤယွၤ ဒ်လဲၣ်အခါ ပကနၣ်မုာ်ဒိၣ်မး. ပဝဲစ့ၢ်ကီး ပက့ၤတဲပၠးဘၣ်ကဒါက့ၤ အဝဲသ့ၣ်လၢ ပကဲဘၣ် ယဟိဝၤပှၤအုၣ်အသးတဂၤအဃိ ပသးခုဒိၣ်မး. (ရိမ့ၤ ၁:၁၁) ဖဲပတဲသကီး တၢ်ဂ့ၢ်တဖၣ်အံၤအခါ မၤစၢၤပှၤလၢ ပကသ့ၣ်နီၣ်ထီၣ်လၢ ပအိၣ်ဘၣ်လၢ တၢ်မ့ၢ်တၢ်တီအပူၤအဃိ အကဲဝဲ တၢ်ခွဲးတၢ်ယာ် လီၤဆီတခါ. တကးဒံးဘၣ် ကမၤစၢၤပှၤလၢ ပကပာ်လီၤပသး ဂၢၢ်ဂၢၢ်ကျၢၤကျၢၤလၢ ပက “ဆဲးလဲၤတၢ်လၢ တၢ်မ့ၢ်တၢ်တီ အပူၤ” ခီဖျိ ပကဆဲးမၤတၢ်ဒ်သိး ပကဒိးန့ၢ်ဘၣ် ယဟိဝၤယွၤအတၢ်ဆိၣ်ဂ့ၤ ဒီးမၤတၢ်လၢ အဘၣ်ယဟိဝၤယွၤအသး.—၃ ယိၤဟၣ် ၄.
၂. လၢတၢ်မၤလိအံၤအပူၤ ပကတဲသကီး တၢ်ဂ့ၢ်မနုၤလဲၣ်.
၂ လၢတၢ်မၤလိအံၤအပူၤ ပကတဲသကီးဘၣ်ဃးဒီး ဘၣ်မနုၤအဃိ ပအဲၣ်တၢ်မ့ၢ်တၢ်တီလဲၣ်. ဒီးပကတဲသကီးစ့ၢ်ကီးဘၣ်ဃးဒီး ပဆဲးပာ်ဖျါထီၣ်လၢ ပပာ်လုၢ်ပာ်ပှ့ၤ တၢ်ဟ့ၣ်လၢအမ့ၢ် တၢ်မ့ၢ်တၢ်တီအံၤ ကသ့ဒ်လဲၣ်. ဒီးဒ်သိး ယဟိဝၤယွၤ ကမူၤဃီၤပှၤလၢ တၢ်မ့ၢ်တၢ်တီအပူၤအဂီၢ် အဝဲမၤန့ၢ်တၢ်လၢပဂီၢ်အါမး. အဃိ တၢ်မၤလိအံၤ ကမၤစၢၤပှၤလၢ ပကပာ်လုၢ်ပာ်ပှ့ၤအါထီၣ် တၢ်လၢ ယဟိဝၤယွၤ မၤန့ၢ်ပှၤတဖၣ်. (ယိၤဟၣ် ၆:၄၄) ဒီးတၢ်မၤလိအံၤကမၤစၢၤစ့ၢ်ကီးပှၤ ဒ်သိးပကသးဆူၣ်လၢ ပကတဲဘၣ်ပှၤဂၤလၢ တၢ်မ့ၢ်တၢ်တီ.
ဘၣ်မနုၤအဃိ ပအဲၣ် “တၢ်မ့ၢ်တၢ်တီ” လဲၣ်
၃. ဘၣ်မနုၤအဃိ ပအဲၣ်တၢ်မ့ၢ်တၢ်တီလဲၣ်န့ၣ် တၢ်ဂ့ၢ်လၢအရ့ဒိၣ်ကတၢၢ် မ့ၢ်မနုၤလဲၣ်.
၃ ဘၣ်မနုၤအဃိ ပအဲၣ်တၢ်မ့ၢ်တၢ်တီလဲၣ်န့ၣ် တၢ်ဂ့ၢ်အိၣ်ဝဲအါမး. တၢ်ဂ့ၢ်လၢအရ့ဒိၣ် ကတၢၢ်တမံၤန့ၣ် မ့ၢ်ဝဲ ပအဲၣ်ယဟိဝၤယွၤ လၢအကဲဝဲ တၢ်မ့ၢ်တၢ်တီ အခီၣ်ထံးခီၣ်ဘိ. လံာ်စီဆှံ ပာ်ဖျါထီၣ်န့ၢ်ပှၤလၢ ကစၢ်ယွၤန့ၣ် အကဲပှၤလၢ အစိကမီၤဒိၣ် ဒီးအတ့လီၤမူခိၣ်ဟီၣ်ခိၣ် တကးဒံးဘၣ် အကဲစ့ၢ်ကီး ပါလၢအအိၣ်ဒီး တၢ်အဲၣ်တၢ်ကွံ ဒီးအဝဲကဟုကယာ်ပှၤ. (၁ ပ့းတရူး ၅:၇) ပသ့ၣ်ညါလၢ ပကစၢ်ယွၤန့ၣ် “အသးကညီၤတၢ်, အသးဂ့ၤ, တသးဒိၣ်ထီၣ်တၢ် ချ့ချ့ဘၣ်, အိၣ်ဒီး တၢ်အဲၣ်လၢအတီဒိၣ်မး, တီဒီးအတၢ်ကတိၤ ထီဘိ.” (၂ မိၤၡ့ ၃၄:၆) ယဟိဝၤယွၤန့ၣ် အဲၣ်တၢ်စံၣ်ညီၣ်တီ. (ယၡါယၤ ၆၁:၈) အဃိ ဖဲယဟိဝၤယွၤ ထံၣ်ဝဲလၢ ပတူၢ်ဘၣ် တၢ်ကီတၢ်ခဲအခါ အဝဲသးဘၣ်ဒိဒိၣ်မး. ဒီးအဝဲအဲၣ်ဒိးမၤလီၤမၢ်န့ၢ်ပှၤ တၢ်ကီတၢ်ခဲ ဒီးအဝဲခိးကွၢ်လၢ်ဝဲ တၢ်ဆၢကတီၢ်လၢ အကမၤလီၤမၢ်ကွံာ် တၢ်ကီတၢ်ခဲ ခဲလၢာ်. (ယံးရမံယၤ ၂၉:၁၁) ပအိၣ်ခိးကွၢ်လၢ် တၢ်ဆၢကတီၢ် အဝဲန့ၣ်စ့ၢ်ကီး ဒီးပအဲၣ်ယဟိဝၤယွၤဒိၣ်မး.
လံာ်စီဆှံတၢ်မ့ၢ်တၢ်တီန့ၣ် အလီၤဂာ်ဒ်သိးဒီး . . . နီၣ်သက့ၤ
ဒ်နီၣ်သက့ၤ မၤဂၢၢ်ကျၢၤဝဲ ကဘီအသိး ဖဲပထံၣ်ဘၣ်ဒီး တၢ်ကီတၢ်ခဲအခါ ပတၢ်မုၢ်လၢ်လၢ အဒိးသန့ၤထီၣ်အသးလၢ လံာ်စီဆှံပူၤန့ၣ် ကမၤစၢၤပှၤဒ်သိး ပပာ်ပသး မုာ်မုာ်ခုၣ်ခုၣ် ကသ့အဂီၢ်. ဒီးလံာ်စီဆှံတၢ်မ့ၢ်တၢ်တီန့ၣ် ထိၣ်ဟူးထိၣ်ဂဲၤထီၣ်ပှၤလၢ ပကတဲဘၣ်ပှၤဂၤ ဘၣ်ဃးဒီး ပတၢ်မုၢ်လၢ်လၢခါဆူညါ (ကွၢ်လံာ်အဆၢ ၄-၇)
၄-၅. ဘၣ်မနုၤအဃိ တၢ်မၢဖိပီလူး ထိၣ်သတြီၤဝဲ ပတၢ်မုၢ်လၢ် ဒီးနီၣ်သက့ၤလဲၣ်.
၄ ဘၣ်မနုၤအဃိ ပအဲၣ်တၢ်မ့ၢ်တၢ်တီလဲၣ်န့ၣ် တၢ်ဂ့ၢ်လၢအဂၤတခါန့ၣ် မ့ၢ်ဝဲ တၢ်မ့ၢ်တၢ်တီန့ၣ် ကဲဘျုးလၢ ပတၢ်အိၣ်မူပူၤဒိၣ်မး. အဒိ လံာ်စီဆှံ တၢ်မ့ၢ်တၢ်တီန့ၣ် ဟ့ၣ်ပှၤတၢ်မုၢ်လၢ် လၢခါဆူညါ. တၢ်မုၢ်လၢ်အံၤ အလုၢ်အပှ့ၤဒိၣ်ထဲလဲၣ်န့ၣ် စီၤပီလူးတဲဝဲလၢ “ပတၢ်မုၢ်လၢ်အံၤ လီၤဂာ်ဒ်သိးဒီး ပသးသမူ အနီၣ်သက့ၤလီၤ. တၢ်မုၢ်လၢ်အံၤ မ့ၢ်တၢ်လၢအလီၤတံၢ်ဒီး ဂၢၢ်ကျၢၤဝဲ.” (ဧ့ၤဘြံၤ ၆:၁၉) ဒ်နီၣ်သက့ၤ မၤဂၢၢ်ကျၢၤဝဲကဘီအသိး ဖဲပထံၣ်ဘၣ်ဒီးတၢ်ကီတၢ်ခဲအခါ ပတၢ်မုၢ်လၢ်လၢ အဒိးသန့ၤထီၣ်အသးလၢ လံာ်စီဆှံအပူၤန့ၣ် ကမၤစၢၤပှၤ ဒ်သိးဒီး ပပာ်ပသး မုာ်မုာ်ခုၣ်ခုၣ် ကသ့အဂီၢ်.
၅ ဖဲလံာ်စီဆှံတဆၢအံၤအပူၤန့ၣ် စီၤပီလူးတဲဝဲဘၣ်ဃးဒီး တၢ်မုၢ်လၢ်လၢမူခိၣ်လၢ ခရံာ်ဖိလၢ အဘၣ်တၢ်ဒိးဖှူအီၤတဖၣ် ဒိးန့ၢ်ဘၣ်ဝဲ. ဘၣ်ဆၣ် လံာ်စီဆှံတဆၢအံၤန့ၣ် ဘၣ်ထွဲစ့ၢ်ကီးဒီး ခရံာ်ဖိတဖၣ်လၢ အအိၣ်ဒီးတၢ်မုၢ်လၢ်လၢ ကအိၣ်မူဘၣ်လၢ ဟီၣ်ခိၣ်ပၤရဒံစူးအပူၤ လီၤထူလီၤယိာ်. (ယိၤဟၣ် ၃:၁၆) အဃိ ပမ့ၢ်မၤလိဘၣ်ဃးဒီး တၢ်မုၢ်လၢ်လၢ ပကအိၣ်မူဘၣ် လီၤထူလီၤယိာ်န့ၣ် ပကအိၣ်ဒီး တၢ်သးခုနီၢ်ကီၢ်.
၆-၇. ဒီပုၢ်ဝဲၢ်မုၣ်အံဖီ မၤလိဘၣ်တၢ်မ့ၢ်တၢ်တီလၢ အဘၣ်ဃးဒီးခါဆူညါအဂ့ၢ်အဃိ ကဲဘျုးလၢအဂီၢ်ဒ်လဲၣ်.
၆ ပကကွၢ်သကီး ဒီပုၢ်ဝဲၢ်မုၣ်အံဖီ အတၢ်လဲၤခီဖျိ. ဒီပုၢ်ဝဲၢ်မုၣ်အံၤ အတဒိၣ်ထီၣ်ဘၣ်လၢ တၢ်မ့ၢ်တၢ်တီအပူၤဘၣ် အဃိဖဲအနီၢ်ဆံးခါန့ၣ် အဝဲပျံၤတၢ်သံဒိၣ်မး. ဒီပုၢ်ဝဲၢ်မုၣ်အံဖီ သ့ၣ်နီၣ်ထီၣ်ဘၣ်ဝဲ တၢ်ကတိၤတခါလၢ အဝဲဖးဘၣ်လၢအမ့ၢ် “မုၢ်ကအိၣ်ဝဲတနံၤန့ၣ် ပကဘၣ်သံ ကီးဂၤဒဲး.” ဒီးဒီပုၢ်ဝဲၢ်မုၣ်အံၤတဲဝဲလၢ “ခီဖျိလၢ တၢ်ကတိၤတခါအံၤအဃိ ယမ့ၢ်ဆိကမိၣ်ထီၣ် ဘၣ်ဃးဒီး ခါဆူညါအဂ့ၢ်န့ၣ် ယမံတန့ၢ်ဘၣ်. ယဆိကမိၣ်ဒု ပဟဲအိၣ်မူန့ၣ် တမ့ၢ်လၢ ပကသံအဂီၢ်ဘၣ်. ယဆိကမိၣ်ထီၣ်လၢ ‘ဘၣ်မနုၤအဃိ ယဘၣ်ဟဲအိၣ်မူလၢ ဟီၣ်ခိၣ်ချၢလဲၣ်.’ ဒီးယတအဲၣ်ဒိးသံဘၣ်.”
၇ လၢခံဖဲဒီပုၢ်ဝဲၢ်မုၣ်အံဖီ ဒိၣ်ထီၣ်သီသီအခါ အဝဲထံၣ်လိာ်သးဒီး ယဟိဝၤပှၤအုၣ်အသးတဖၣ်. ဒီးအတဲဝဲလၢ “ခဲအံၤန့ၣ်ယနာ်လၢ ယအိၣ်ဒီးတၢ်မုၢ်လၢ်လၢ ယအိၣ်မူဘၣ် လီၤထူလီၤယိာ် လၢဟီၣ်ခိၣ်ပၤရဒံစူးအပူၤသ့.” ဒီပုၢ်ဝဲၢ်မုၣ်တဂၤအံၤ မၤလိန့ၢ်ဘၣ် တၢ်မ့ၢ်တၢ်တီအဃိ အဒိးန့ၢ်ဘၣ်အဘျုးဒ်လဲၣ်. အတဲဝဲလၢ “ခဲအံၤ ဖဲယမံနီၤလၢမုၢ်နၤခီန့ၣ် ယတဘၣ်ယိၣ်တၢ် ဘၣ်ဃးဒီး ခါဆူညါ ဒီးယတပျံၤတၢ်သံလၢၤဘၣ်.” ဖဲအံၤန့ၣ် ပသ့ၣ်ညါဘၣ်လၢ ဒီပုၢ်ဝဲၢ်မုၣ်တဂၤအံၤ အဲၣ်ဝဲလံာ်စီဆှံ တၢ်မ့ၢ်တၢ်တီဒိၣ်မး. ဒီးအဝဲတဲပၠးဘၣ်ပှၤဂၤ ဘၣ်ဃးဒီးတၢ်မုၢ်လၢ်လၢ ခါဆူညါအဂ့ၢ်အဃိ အဝဲသးခုဒိၣ်မး.—၁ တံၤမသ့း ၄:၁၆.
လံာ်စီဆှံတၢ်မ့ၢ်တၢ်တီန့ၣ် အလီၤဂာ်ဒ်သိးဒီး . . . တၢ်လုၢ်ဒိၣ်ပှ့ၤဒိၣ်
ပမၤဘၣ် ယဟိဝၤယွၤအတၢ်မၤ ဒီးပအိၣ်ဒီးတၢ်မုၢ်လၢ်လၢ ကမၤဘၣ်အတၢ်မၤ လီၤထူလီၤယိာ်လၢ အဘီမုၢ်တၢ်ပၢဖီလာ်န့ၣ် လီၤဂာ်ဒ်သိးဒီး ပဒိးန့ၢ်ဘၣ် တၢ်လုၢ်ဒိၣ်ပှ့ၤဒိၣ်တခါ. ဒီးဒ်သိးပကန့ၢ်ဘၣ် တၢ်လုၢ်ဒိၣ်ပှ့ၤဒိၣ်တခါအံၤအဂီၢ် ပမ့ၢ်ဘၣ်ဟ့ၣ်ၡူကွံာ် တၢ်တမံၤဂ့ၤတမံၤဂ့ၤသနာ်က့ ပကန့ၢ်ဘၣ်က့ၤအါန့ၢ်ဒံးအလီၢ် (ကွၢ်လံာ်အဆၢ ၈-၁၁)
၈-၉. (က) လၢယ့ၣ်ၡူးဟ့ၣ်တၢ်အဒိတခါအပူၤန့ၣ် ပိာ်ခွါတဂၤပာ်လုၢ်ပာ်ပှ့ၤဝဲ တၢ်လုၢ်ဒိၣ်ပှ့ၤဒိၣ်လၢ အထံၣ်န့ၢ်ဝဲန့ၣ်ထဲလဲၣ်. (ခ) နပာ်လုၢ်ပာ်ပှ့ၤ တၢ်မ့ၢ်တၢ်တီထဲလဲၣ်.
၈ လံာ်စီဆှံ အတၢ်မ့ၢ်တၢ်တီလၢ အဂၤတခါန့ၣ် မ့ၢ်ဝဲ ကစၢ်ယွၤအဘီမုၢ် တၢ်သးခုကစီၣ်. တၢ်မ့ၢ်တၢ်တီဘၣ်ဃးဒီး ယွၤအဘီမုၢ်တခါအံၤန့ၣ် ယ့ၣ်ၡူးထိၣ်သတြီၤဝဲဒီး တၢ်လုၢ်ဒိၣ်ပှ့ၤဒိၣ်တခါလၢ အအိၣ်ခူသူၣ်. ဖဲ မးသဲ ၁၃:၄၄ န့ၣ် ယ့ၣ်ၡူးတဲဝဲလၢ “မူခိၣ်အဘီအမုၢ်န့ၣ် လီၤဂာ်ဒီး တၢ်လုၢ်ဒိၣ်ပှ့ၤဒိၣ်တခါလၢ အဘၣ်တၢ်ပာ်ခူသူၣ်အီၤလၢ စံာ်ပျီပူၤလီၤ. ဒီးပှၤလၢ အထံၣ်န့ၢ်ဝဲတဂၤန့ၣ် ပာ်ခူသူၣ်ကဒီးအီၤဖဲန့ၣ် ဒီးခီဖျိလၢ အသးခုဝဲအဃိ အဝဲလဲၤဆါလီၤကွံာ်ဝဲ တၢ်လၢအိၣ်ဒီးအီၤခဲလၢာ် ဒီးပှ့ၤဝဲ စံာ်ပျီတဘ့ၣ်န့ၣ်.” ဖဲအံၤန့ၣ် ပထံၣ်ဘၣ်လၢ ပိာ်ခွါတဂၤအံၤန့ၣ် တဃုဝဲတၢ်လုၢ်ဒိၣ်ပှ့ၤဒိၣ်ဘၣ်. ဘၣ်ဆၣ် ဖဲအဝဲထံၣ်န့ၢ်တၢ်လုၢ်ဒိၣ်ပှ့ၤဒိၣ်အခါ အဝဲသးအိၣ် ဟ့ၣ်ၡူကွံာ်တၢ်အါမး. တကးဒံးဘၣ် အဝဲလဲၤဆါလီၤကွံာ်ဝဲ တၢ်လၢအအိၣ်ဒီးအီၤခဲလၢာ်. ဘၣ်မနုၤအဃိ အသးအိၣ်မၤဝဲဒ်န့ၣ်လဲၣ်, အသ့ၣ်ညါဝဲလၢ တၢ်လုၢ်ဒိၣ်ပှ့ၤဒိၣ်တခါအံၤန့ၣ် အလုၢ်အပှ့ၤဒိၣ်န့ၢ်ဒံး တၢ်လၢအဘၣ် ဟ့ၣ်ၡူကွံာ်ဝဲတဖၣ် စၢၢ်တလၢၢ်.
၉ မ့မ့ၢ်နၤမီၤ နပာ်လုၢ်ပာ်ပှ့ၤ တၢ်မ့ၢ်တၢ်တီ ဒ်န့ၣ်စ့ၢ်ကီးဧါ. နကပာ်လုၢ်ပာ်ပှ့ၤ သပှၢ်တၢၢ်. ပမ့ၢ်မၤ ယဟိဝၤယွၤအတၢ်မၤန့ၣ် ပကဒိးန့ၢ်ဘၣ် တၢ်သးခုဒိၣ်န့ၢ်ဒံး ပမၤဟီၣ်ခိၣ်တၢ်မၤဒံး. တကးဒံးဘၣ် ပအိၣ်ဒီးတၢ်မုၢ်လၢ်လၢ ခါဆူညါန့ၣ် ပကအိၣ်မူဘၣ် လီၤထူလီၤယိာ်လၢ ကစၢ်ယွၤအဘီမုၢ် တၢ်ပၢဖီလာ်. ပအိၣ်ဒီးတၢ်ရ့လိာ်သး ဘူးဘူးတံၢ်တံၢ်ဒီး ယဟိဝၤယွၤအဃိ အကဲဝဲ တၢ်ခွဲးတၢ်ယာ်ဖးဒိၣ်တခါ. တၢ်ခွဲးတၢ်ယာ်တခါအံၤန့ၣ် ဂ့ၤဒိၣ်န့ၢ်ဒံး တၢ်လၢပဘၣ် ဟ့ၣ်ၡူကွံာ်အီၤတဖၣ်ဒံး. တၢ်လၢအမၤသးခုပှၤ အဒိၣ်ကတၢၢ်န့ၣ်မ့ၢ်ဝဲ ပ “မၤတၢ်ဘၣ်အသးလၢ တၢ်ခဲလၢာ်အပူၤ.”—ကလီးစဲ ၁:၁၀.
၁၀-၁၁. တၢ်မနုၤထိၣ်ဟူးထိၣ်ဂဲၤထီၣ် ဒီပုၢ်ဝဲၢ်ခွါမဲကၢၤ လၢကဆီတလဲ အတၢ်အိၣ်မူလဲၣ်.
၁၀ ပဝဲအါဂၤန့ၣ် ဒ်သိးပကမၤ ယဟိဝၤယွၤအတၢ်ဘၣ်သးအဂီၢ် ပပာ်တ့ၢ်ကွံာ်တၢ်အါမး. ပှၤတနီၤန့ၣ် ပာ်တ့ၢ်ကွံာ်ဝဲ တၢ်မၤလၢအပတီၢ်ထီ ဒီးပှၤအဂၤတနီၤန့ၣ် တဂုာ်ကျဲးစၢးဝဲဒ်သိး ကထူးထီၣ်တီၤထီၣ်လၢၤဘၣ်. ဒီးမ့မ့ၢ်လၢအဂၤတနီၤန့ၣ် ဖဲအဝဲသ့ၣ် မၤလိဘၣ်ယဟိဝၤယွၤအဂ့ၢ်အခါ အဝဲသ့ၣ်ဆီတလဲကွံာ် အတၢ်အိၣ်မူ. ဒီပုၢ်ဝဲၢ်ခွါမဲကၢၤ မၤဝဲဒ်န့ၣ်. ခီဖျိလၢ မဲကၢၤတဒိၣ်ထီၣ်ဘၣ်လၢ တၢ်မ့ၢ်တၢ်တီအပူၤဘၣ်အဃိ ဖဲအသးစၢ်အခါန့ၣ် အမၤလိဝဲ ခရၤတ့အတၢ်ထိ. အတဲဝဲလၢ “ယပာ်ဒိၣ်လီၤယသးလၢ ယကဲပှၤလၢအဂံၢ်ဆူၣ်ကတၢၢ်. တဘျီတခီၣ်န့ၣ် ယတူၢ်ဘၣ်လၢ ပှၤထိယၤတနၢၤနီတဂၤဘၣ်.” ဘၣ်ဆၣ် မဲကၢၤ စးထီၣ်မၤလိ လံာ်စီဆှံအခါ အဝဲသ့ၣ်ညါထီၣ်ဘၣ်ဝဲလၢ ဘၣ်ဃးဒီးတၢ်မၤဆူၣ်မၤစိးန့ၣ် ယဟိဝၤယွၤထံၣ်ဝဲဒ်လဲၣ်. (စံးထီၣ်ပတြၢၤ ၁၁:၅) မဲကၢၤတဲဝဲလၢ “ပှၤဒီမိၢ်ဝၤခံဂၤလၢ အမၤလိယၤလံာ်စီဆှံန့ၣ် အဝဲသ့ၣ်တတဲယၤလၢ ယကဘၣ်ပာ်တ့ၢ်ကွံာ် ခရၤတ့အတၢ်ထိဘၣ်, အိၣ်ဒၣ် အဝဲသ့ၣ်ဆဲးမၤလိယၤ လံာ်စီဆှံ တၢ်မ့ၢ်တၢ်တီဟီ.”
၁၁ ဒီပုၢ်ဝဲၢ်ခွါမဲကၢၤ သ့ၣ်ညါယဟိဝၤယွၤအဂ့ၢ်ဒံးအါထီၣ်န့ၣ် အဝဲအဲၣ်ယဟိဝၤယွၤဒံးဒိၣ်ထီၣ်. ဒီးတကးဒံးဘၣ် တၢ်လၢအဘၣ်သးဝဲ အဒိၣ်ကတၢၢ်တခါန့ၣ် မ့ၢ်ဝဲ ယဟိဝၤယွၤ အိၣ်ဒီးတၢ်ဒိသူၣ်ဒိသးလၢ အပှၤဂီၢ်မုၢ်တဖၣ်အဖီခိၣ်. လၢခံ မဲကၢၤသ့ၣ်ညါထီၣ်ဝဲလၢ အကဘၣ်ဆီတလဲအတၢ်အိၣ်မူ. အတဲဝဲလၢ “ယကဘၣ်ပာ်တ့ၢ်ကွံာ် ခရၤတ့အတၢ်ထိန့ၣ် လၢယဂီၢ်န့ၣ် အကီကတၢၢ်. ဘၣ်ဆၣ်ယသ့ၣ်ညါ ယမ့ၢ်မၤဒ်န့ၣ်န့ၣ် ယဟိဝၤယွၤကသးခု. ဒီးယနာ်နီၢ်ကီၢ်လၢ ယမၤဘၣ် ယဟိဝၤယွၤအတၢ်မၤန့ၣ် အကဲဝဲတၢ်ခွဲးတၢ်ယာ် ဂ့ၤဒိၣ်န့ၢ်ဒံး တၢ်လၢယဘၣ်ပာ်တ့ၢ်ကွံာ်တဖၣ်ဒံး.” မဲကၢၤ ပာ်လုၢ်ပာ်ပှ့ၤဝဲ တၢ်မ့ၢ်တၢ်တီလၢ အမၤလိဘၣ်ဝဲတဖၣ်ဒိၣ်မးအဃိ အသးအိၣ် ဆီတလဲအတၢ်အိၣ်မူနီၢ်ကီၢ်.—ယၤကိာ် ၁:၂၅.
လံာ်စီဆှံတၢ်မ့ၢ်တၢ်တီန့ၣ် အလီၤဂာ်ဒ်သိးဒီး . . . မ့ၣ်အူဒၢ
ဖဲပအိၣ်လၢ တၢ်ခံးကျါအခါ မ့ၣ်အူဒၢအတၢ်ကပီၤန့ၣ် မၤစၢၤပှၤဒ်သိးပကထံၣ်တၢ်. ဒ်န့ၣ်အသိး ပအိၣ်လၢ ဟီၣ်ခိၣ်လၢမုၣ်ကီၤလံၢ်ပၢဝဲသနာ်က့ ကစၢ်ယွၤကလုၢ်ကထါ လံာ်စီဆှံ မၤစၢၤပှၤဒ်သိး ပဆၢတဲာ်တၢ်လၢအဘၣ် ကသ့အဂီၢ် (ကွၢ်လံာ်အဆၢ ၁၂-၁၃)
၁၂-၁၃. လံာ်စီဆှံတၢ်မ့ၢ်တၢ်တီ မၤစၢၤ ဒီပုၢ်ဝဲၢ်မုၣ်မ့ၤလ့ ဒ်လဲၣ်.
၁၂ ဒ်သိးပကသ့ၣ်ညါလၢ တၢ်မ့ၢ်တၢ်တီ အလုၢ်ဒိၣ်ပှ့ၤဒိၣ်ထဲလဲၣ်အဂီၢ် လံာ်စီဆှံထိၣ်သတြီၤဝဲ တၢ်မ့ၢ်တၢ်တီဒ် မ့ၣ်အူဒၢလၢ အကပီၤလၢတၢ်ခံးကျါ. (စံးထီၣ်ပတြၢၤ ၁၁၉:၁၀၅; အ့းဖ့းစူး ၅:၈) ဒီပုၢ်ဝဲၢ်မုၣ်မ့ၤလ့ လၢအိၣ်လၢ ကီၢ်အစၤဘၤကၠဲန့ၣ် အပာ်လုၢ်ပာ်ပှ့ၤဝဲ လံာ်စီဆှံဒိၣ်မး. ဒီပုၢ်ဝဲၢ်မုၣ်အံၤ အမိအပါန့ၣ် အတၢ်ဘူၣ်တၢ်ဘါ တဒ်သိးလိာ်သးဘၣ်. အပါန့ၣ် ကဲဝဲ ပှၤမူးစလ့ၣ်ဖိ ဒီးမ့မ့ၢ်အမိန့ၣ် အိၣ်လၢယူဒၤအတၢ်ဘူၣ်တၢ်ဘါ. အတဲဝဲလၢ “ကစၢ်ယွၤအိၣ်န့ၣ်ယနာ်နီၢ်ကီၢ်. ဘၣ်ဆၣ် တၢ်လၢယအဲၣ်ဒိးသ့ၣ်ညါန့ၣ် အိၣ်အါမး. ယအဲၣ်ဒိးသ့ၣ်ညါလၢ ‘ဘၣ်မနုၤအဃိ ကစၢ်ယွၤတ့လီၤ ပှၤဟီၣ်ခိၣ်ဖိလဲၣ်.’ ‘ဘၣ်မနုၤအဃိလၢ ပှၤဟီၣ်ခိၣ်ဖိအတၢ်အိၣ်မူပူၤန့ၣ် ထံၣ်ဘၣ်ထဲ တၢ်နးတၢ်ဖှီၣ် ဒီးတကးဒံးဘၣ် ကဘၣ်က့ၤတူၢ်ဘၣ်စ့ၢ်ကီး တၢ်မၤအၢမၤနးလၢ လရာ်မ့ၣ်အူပူၤလဲၣ်.’ ပှၤဟီၣ်ခိၣ်ဖိအါဂၤန့ၣ် တဲဝဲလၢ တၢ်ကဲထီၣ်သးခဲလၢာ်န့ၣ် ကဲဝဲ ကစၢ်ယွၤအတၢ်ဘၣ်သး, အဃိ ယဆိကမိၣ်ဘၣ်လၢ ‘မ့ၢ်ကစၢ်ယွၤ ရဲၣ်ကျဲၤဝဲ မ့ၢ်ဒ်သိး ကကွၢ်ဒိးဝဲလၢ ပှၤဟီၣ်ခိၣ်ဖိတဖၣ် ကထံၣ်ဘၣ်တၢ်နးတၢ်ဖှီၣ်ဧါ.’”
၁၃ ဒီပုၢ်ဝဲၢ်မုၣ်မ့ၤလ့ ဆဲးဃုဝဲ အတၢ်သံကွၢ်တဖၣ်န့ၣ် အတၢ်စံးဆၢ. လၢခံအဝဲမၤလိလံာ်စီဆှံ ဒီးအကဲထီၣ် ယဟိဝၤပှၤအုၣ်အသးတဂၤ. အတဲဝဲလၢ “လံာ်စီဆှံမၤစၢၤယၤဒ်သိး ယကအိၣ်ဒီးတၢ်သးခု လၢယတၢ်အိၣ်မူအပူၤ. တၢ်လၢယမၤလိဘၣ်လၢ လံာ်စီဆှံပူၤသ့ၣ်တဖၣ်န့ၣ် ယနာ်န့ၢ်အီၤသ့ ဒီးဟ့ၣ်ယၤ တၢ်သူၣ်မံသးမုာ်.” ဒ်ဒီပုၢ်ဝဲၢ်မုၣ်မ့ၤလ့ အသိး ပဝဲစ့ၢ်ကီး ပအဲၣ်ဒိးစံးထီၣ်ပတြၢၤ ယဟိဝၤယွၤလၢအမ့ၢ် “ပှၤလၢ အကိးထီၣ်သုလၢ တၢ်ခံးကျါဆူ အတၢ်ကပီၤလီၤလးအပူၤ.”—၁ ပ့းတရူး ၂:၉.
၁၄. ဒ်သိး ပအဲၣ်တၢ်မ့ၢ်တၢ်တီ ကအါထီၣ်အဂီၢ် ပကဘၣ်မၤဒ်လဲၣ်. (ကွၢ်စ့ၢ်ကီး တၢ်လွံၢ်နၢၣ်လၢအမ့ၢ် “ တၢ်အဂၤလၢ ပထိၣ်သတြီၤအီၤဒီး လံာ်စီဆှံတၢ်မ့ၢ်တၢ်တီသ့.”)
၁၄ လံာ်စီဆှံတၢ်မ့ၢ်တၢ်တီ မ့ၢ်တၢ်လၢအရ့ဒိၣ်ထဲလဲၣ်န့ၣ် ပတဲသကီးတၢ်အဒိ ဝံၤစှၤကီးခါလံ. ဘၣ်ဆၣ် ပဆိကမိၣ်ထီၣ် တၢ်အဒိလၢအဂၤ သ့ဒီဒူၣ်ဒံး. အဃိ ပအဲၣ်ဒိးဟ့ၣ်ဂံၢ်ဟ့ၣ်ဘါသုလၢ ဖဲသုမၤ နီၢ်ကစၢ်တၢ်မၤလိ လံာ်စီဆှံအခါ ဆိကမိၣ်ထီၣ် တၢ်အဒိလၢအဂၤသ့ၣ်တဖၣ်လၢ ဘၣ်မနုၤအဃိ ပကြၢးအဲၣ်တၢ်မ့ၢ်တၢ်တီလဲၣ်. ပအဲၣ်တၢ်မ့ၢ်တၢ်တီ မ့ၢ်အါထီၣ်န့ၣ် ပကအဲၣ်ဒိးဂုာ်ကျဲးစၢးပာ်ဖျါအါထီၣ်လၢ ပအဲၣ်တၢ်မ့ၢ်တၢ်တီ.
ပပာ်ဖျါထီၣ်လၢ ပပာ်လုၢ်ပာ်ပှ့ၤတၢ်ဟ့ၣ်လၢအမ့ၢ် တၢ်မ့ၢ်တၢ်တီအံၤ ကသ့ဒ်လဲၣ်
၁၅. ပအဲၣ်တၢ်မ့ၢ်တၢ်တီန့ၣ် ပပာ်ဖျါထီၣ်အီၤကသ့ဒ်လဲၣ်.
၁၅ ပပာ်ဖျါထီၣ်လၢ ပပာ်လုၢ်ပာ်ပှ့ၤ လံာ်စီဆှံတၢ်မ့ၢ်တၢ်တီ သ့ခီဖျိ ပဖးလံာ်စီဆှံ ဒီးလံာ်လဲၢ်လၢ တၢ်ကရၢကရိ ထုးထီၣ်ဝဲတဖၣ်ထီဘိ. ပအိၣ်လၢ တၢ်မ့ၢ်တၢ်တီအပူၤ မ့ၢ်ယံာ်ထဲလဲၣ် သနာ်က့ ပမၤလိ တၢ်မ့ၢ်တၢ်တီ လၢာ်တသ့နီတဘျီဘၣ်. တၢးထီခိးတၢ် လၢပှၤထုးထီၣ်ဝဲ အဆိကတၢၢ်တဘ့ၣ်န့ၣ် ပာ်ဖျါထီၣ်ဝဲလၢ “တၢ်မ့ၢ်တၢ်တီန့ၣ် လီၤဂာ်ဒ် ဖီဖိတဖီးလၢ အဟဲမဲထီၣ်လၢနီၣ်ကျါ. ဒ်သိးနကထံၣ် ဖီဖိတဖီးအံၤအဂီၢ် နကဘၣ်ဃုကွၢ်အီၤ လီၤတံၢ်လီၤဆဲး. ဘၣ်ဆၣ် ဖဲနထံၣ်န့ၢ် ဖီဖိတဖီးအံၤအခါ နသးတမံဒံးဘၣ်, နကအဲၣ်ဒိးဆဲးဃုအါထီၣ် ဖီဖိလၢအဂၤတဖၣ်ဒံး. ဒ်န့ၣ်အသိး ပမ့ၢ်ထံၣ်န့ၢ်တၢ်မ့ၢ်တၢ်တီတခါလံ သနာ်က့ ပတဘၣ်သးမံဒံးဘၣ်. ပကဘၣ်သးဆူၣ်လၢ ပကဆဲးဃုအါထီၣ် တၢ်မ့ၢ်တၢ်တီအဂၤတဖၣ်ဒံး.” ပကမၤလိတၢ်အဂီၢ် တညီဘၣ်, ဘၣ်ဆၣ် ပမ့ၢ်ဂုာ်ကျဲးစၢးမၤအီၤဒ်န့ၣ်န့ၣ် ပကန့ၢ်ဘၣ်အဘျုးအါမး.
၁၆. ဖဲနဖးလံာ်စီဆှံအခါ ဒ်သိးကကဲဘျုးလၢနဂီၢ်န့ၣ် နမၤအီၤဒ်လဲၣ်. (ကတိၤဒိ ၂:၄-၆)
၁၆ ပဝဲတနီၤန့ၣ် ပဖးလံာ်ဒီးပမၤလိတၢ် တမုာ်အါအါဘၣ်. ဘၣ်ဆၣ် ယဟိဝၤယွၤ ဟ့ၣ်ဂံၢ်ဟ့ၣ်ဘါပှၤလၢ ပက “ဆဲးဃု” သ့ၣ်ညါ တၢ်မ့ၢ်တၢ်တီလၢ အဒိၣ်အယိာ်သ့ၣ်တဖၣ်. (ဖး ကတိၤဒိ ၂:၄-၆.) အဃိ ပမ့ၢ်ဂုာ်ကျဲးစၢး မၤအီၤဒ်န့ၣ်န့ၣ် ပကန့ၢ်ဘၣ်အဘျုးအါမး. ဒီပုၢ်ဝဲၢ်ခွါခိရ့ၤန့ၣ် ဖဲအဖးလံာ်စီဆှံအခါ အဝဲဆိကမိၣ်ထံဝဲ လံာ်စီဆှံအဆၢဖိ တဆၢဝံၤမၣ်တဆၢ. ဖဲအမၤနီၢ်ကစၢ်တၢ်ဖးလံာ်စီဆှံအခါ အမၤဝဲဒ်လဲၣ်န့ၣ် အတဲဝဲလၢ “ဖဲယဖးလံာ်စီဆှံအခါန့ၣ် ယဖးတၢ်ဂ့ၢ်အဘျဲၣ်ခဲလၢာ်, ယဖးလံာ်စီဆှံအဆၢလၢ အဘၣ်ထွဲလိာ်သးတဖၣ် ဒီးယဃုသ့ၣ်ညါအါထီၣ် တၢ်ဂ့ၢ်လၢအဂၤသ့ၣ်တဖၣ်. ယမၤအီၤဒ်န့ၣ်အဃိ ယသ့ၣ်ညါအါထီၣ်တၢ်ဂ့ၢ်အါမး.” ပမ့ၢ်ဂုာ်ကျဲးစၢး ဟံန့ၢ်တၢ်ဆၢကတီၢ်လၢ ပကဖးလံာ်စီဆှံဒီး ပမ့ၢ်မၤအီၤဒ် ဒီပုၢ်ဝဲၢ်ခိရ့ၤမၤဝဲအသိးမ့ၢ်ဂ့ၤ, ပမ့ၢ်မၤအီၤလၢ ကျဲလၢအဂၤမ့ၢ်ဂ့ၤန့ၣ် မ့ၢ်ဝဲပပာ်ဖျါထီၣ်လၢ ပပာ်လုၢ်ပာ်ပှ့ၤ တၢ်မ့ၢ်တၢ်တီ.—စံးထီၣ်ပတြၢၤ ၁:၁-၃.
၁၇. ထဲဒၣ်ပသ့ၣ်ညါ တၢ်မ့ၢ်တၢ်တီန့ၣ် လၢပှဲၤလံဧါ. (ယၤကိာ် ၁:၂၅)
၁၇ ထဲဒၣ်ပမၤလိ တၢ်မ့ၢ်တၢ်တီန့ၣ် တလၢပှဲၤဒံးဘၣ်. ဒ်သိးပကန့ၢ်ဘၣ်အဘျုး လၢလၢပှဲၤပှဲၤအဂီၢ်န့ၣ် ပကဘၣ်အိၣ်မူမၤထွဲ တၢ်မ့ၢ်တၢ်တီလၢ ပမၤလိဘၣ်သ့ၣ်တဖၣ်. ပမ့ၢ်မၤဒ်န့ၣ်မၣ် ပကဒိးန့ၢ်ဘၣ် တၢ်သးခုနီၢ်ကီၢ်. (ဖး ယၤကိာ် ၁:၂၅.) ပအိၣ်မူမၤထွဲဒ် တၢ်မ့ၢ်တၢ်တီလၢ ပမၤလိဘၣ်အသိးဧါ, ပတအိၣ်မူမၤထွဲဘၣ်ဧါန့ၣ် ဒ်သိးပကသ့ၣ်ညါအဂီၢ် ပကဘၣ်မၤဒ်လဲၣ်. ဒီပုၢ်ဝဲၢ်ခွါတဂၤ ဟ့ၣ်ကူၣ်ဝဲလၢ ပကဆိကမိၣ်ထံလီၤက့ၤ ပနီၢ်ကစၢ်အသး ဒ်သိးပကသ့ၣ်ညါလၢ မ့ၢ်ပအိၣ်မူမၤထွဲ ဒ်တၢ်လၢပမၤလိဘၣ်တဖၣ် အသိးဧါ ဒီးပကဘၣ် မၤဂ့ၤအါထီၣ်အီၤဖဲလဲၣ်. ဒီးတၢ်မၢဖိပီလူး တဲဝဲလၢ “ပလဲၤထီၣ်လဲၤထီပာ်စၢၤထဲလဲၣ် သနာ်က့ မ်ပဆဲးလဲၤထီၣ်လဲၤထီ ဒ်န့ၣ်ဆူညါတက့ၢ်.”—ဖံလံးပံၤ ၃:၁၆.
၁၈. ဘၣ်မနုၤအဃိ ပဂုာ်ကျဲးစၢး “ဆဲးလဲၤတၢ်လၢ တၢ်မ့ၢ်တၢ်တီ အပူၤ” လဲၣ်.
၁၈ ဆိကမိၣ်ကွၢ် ဖဲပဂုာ်ကျဲးစၢး “ဆဲးလဲၤတၢ်လၢ တၢ်မ့ၢ်တၢ်တီ အပူၤ” အခါ ပဒိးန့ၢ်ဘၣ်အဘျုးဒိၣ်မး. အဒိ ပမ့ၢ်ဆဲးလဲၤတၢ်လၢ တၢ်မ့ၢ်တၢ်တီအပူၤန့ၣ် ပတၢ်ပာ်သူၣ်ပာ်သး ကဂ့ၤဒိၣ်ထီၣ် တကးဒံးဘၣ် ယဟိဝၤယွၤကသးခု ဒီးပဒီပုၢ်ဝဲၢ်မုၣ်ခွါတဖၣ် စ့ၢ်ကီးကသးခု. (ကတိၤဒိ ၂၇:၁၁; ၃ ယိၤဟၣ် ၄) ခီဖျိလၢ တၢ်ဂ့ၢ်သ့ၣ်တဖၣ်အံၤအဃိ ပအဲၣ်တၢ်မ့ၢ်တၢ်တီ ဒီးပအိၣ်မူမၤထွဲဒ် တၢ်မ့ၢ်တၢ်တီလၢ ပမၤလိဘၣ်တဖၣ်အသိး.
တၢ်သးဝံၣ် ၁၄၄ ကွၢ်ဆူခိၣ်ဖးထီဘိ
a ညီနုၢ်န့ၣ် ပတဲလၢ ပတၢ်စူၢ်တၢ်နာ်န့ၣ်မ့ၢ် “တၢ်မ့ၢ်တၢ်တီ” ဒီးပအိၣ်မူဒ် တၢ်မ့ၢ်တၢ်တီအသိး. ပကဲထီၣ် ယဟိဝၤပှၤအုၣ်အသး သီသီမ့ၢ်ဂ့ၤ ပကဲထီၣ် ယဟိဝၤပှၤအုၣ်အသး ဖးယံာ်လံမ့ၢ်ဂ့ၤ ဖဲပတဲသကီး ဘၣ်ဃးဒီး ဘၣ်မနုၤအဃိ ပအဲၣ်တၢ်မ့ၢ်တၢ်တီလဲၣ်အခါ ကကဲဘျုးလၢပဂီၢ်ဒိၣ်မး. ဒီးကမၤစၢၤပှၤဒ်သိး ပကပာ်လီၤပသး ဂၢၢ်ဂၢၢ်ကျၢၤကျၢၤလၢ ပကမၤသးခု ယဟိဝၤယွၤအသး.
