တၢ်မၤလိ ၃၃
ယဟိဝၤယွၤကွၢ်ထွဲ အပှၤဂီၢ်မုၢ်
“ယဟိဝၤယွၤ အမဲာ်ချံန့ၣ် ကွၢ်ထွဲဝဲပှၤလၢ အပျံၤအီၤတဖၣ်.” —စံးထီၣ်ပတြၢၤ ၃၃:၁၈.
တၢ်သးဝံၣ် ၄ ယဟိဝၤမ့ၢ် ပှၤကွၢ်သိ
တၢ်မၤလိအံၤ အတၢ်တိာ်ပာ် a
၁. ဘၣ်မနုၤအဃိ ယ့ၣ်ၡူးဃ့ဝဲလၢ ယဟိဝၤယွၤ ကကွၢ်ထွဲ အပျဲၢ်အဘီၣ်တဖၣ်လဲၣ်.
တချုးလၢ ယ့ၣ်ၡူးသံအနၤန့ၣ် အဝဲဃ့ဘါထုကဖၣ်လၢ ယဟိဝၤယွၤအအိၣ် ဒ်သိး ယဟိဝၤယွၤ ကကွၢ်ထွဲ အပျဲၢ်အဘီၣ်တဖၣ်. (ယိၤဟၣ် ၁၇:၁၅, ၂၀) နီၢ်ကီၢ်န့ၣ် ယဟိဝၤယွၤ ကွၢ်ထွဲဒီးဒီသဒၢ အခ့အပှၤတဖၣ် ထီဘိ. ဘၣ်ဆၣ် ယ့ၣ်ၡူးသ့ၣ်ညါလၢ အပျဲၢ်အဘီၣ်တဖၣ် ကထံၣ်ဘၣ် မုၣ်ကီၤလံၢ်အတၢ်ထီဒုၣ်ထီဒါနးမး. ဒီးအပျဲၢ်အဘီၣ်တဖၣ်စ့ၢ်ကီး ကလိၣ်ဘၣ်ယဟိဝၤယွၤ အတၢ်မၤစၢၤ ဒ်သိးကတြီဆၢက့ၤ မုၣ်ကီၤလံၢ် အတၢ်ထီဒုၣ်ထီဒါ ကန့ၢ်အဂီၢ်.
၂. ဒ် စံးထီၣ်ပတြၢၤ ၃၃:၁၈-၂၀ ပာ်ဖျါထီၣ်ဝဲအသိး ပမ့ၢ်ထံၣ်ဘၣ် တၢ်ကီတၢ်ခဲန့ၣ် ဘၣ်မနုၤအဃိ ပတလိၣ်ပျံၤတၢ်ဘၣ်လဲၣ်.
၂ ဆၢကတီၢ်ခဲအံၤ မုၣ်ကီၤလံၢ် ဒုးအိၣ်ထီၣ် တၢ်ကီတၢ်ခဲ လၢပဒီပုၢ်ဝဲၢ်မုၣ်ခွါတဖၣ် အဂီၢ်အါမး. ပထံၣ်ဘၣ်ဒီး တၢ်ကီတၢ်ခဲလၢ အမၤလီၤစၢ်ပသး ဒီးတၢ်အိၣ်သး လၢအမၤကွၢ်ပတၢ်သးတီ လၢယဟိဝၤယွၤအဖီခိၣ်. ဘၣ်ဆၣ် ပကမၤလိဘၣ်လၢ ပတလိၣ် ပျံၤတၢ်နီတမံၤဘၣ်. ယဟိဝၤယွၤ ကွၢ်ထွဲပှၤအဃိ အဝဲသ့ၣ်ညါဝဲ တၢ်ကီတၢ်ခဲ တခါဂ့ၤတခါဂ့ၤလၢ ပထံၣ်ဘၣ်အီၤ. ထီဘိန့ၣ် အဝဲသးအိၣ်မၤစၢၤပှၤဒ်သိး ပလဲၤခီဖျိ တၢ်ကီတၢ်ခဲတဖၣ်အံၤ ကန့ၢ်အဂီၢ်. ပကကွၢ် တၢ်အဒိခံခါ လၢအပာ်ဖျါထီၣ်ဝဲ ယဟိဝၤယွၤ “ကွၢ်ထွဲဝဲပှၤလၢ အပျံၤအီၤတဖၣ်.”—ဖး စံးထီၣ်ပတြၢၤ ၃၃:၁၈-၂၀.
ယဟိဝၤယွၤ မၤစၢၤပှၤ ဖဲပတူၢ်ဘၣ်လၢ ပအိၣ်ထဲတဂၤအခါ
၃. ဘၣ်မနုၤအဃိ ပကတူၢ်ဘၣ်လၢ ပအိၣ်ထဲတဂၤလဲၣ်.
၃ ပအိၣ်ဒီး ဒီပုၢ်ဝဲၢ်မုၣ်ခွါတဖၣ်အါမး ဘၣ်ဆၣ် တဘျီတခီၣ် ပကတူၢ်ဘၣ်လၢ ပအိၣ်ထဲတဂၤ. အဒိ ပှၤသးစၢ်လၢ အဘၣ်တဲဖျါထီၣ်အတၢ်နာ်လၢကၠိ မ့တမ့ၢ် လၢအလဲၤပၠီလၢ တၢ်အိၣ်ဖှိၣ်အဂၤန့ၣ် ဘၣ်သ့ၣ်သ့ၣ် ကတူၢ်ဘၣ်ဝဲလၢ အအိၣ်ထဲတဂၤ. ပဝဲအါဂၤန့ၣ် ပကတူၢ်ဘၣ် တၢ်သးအုး မ့တမ့ၢ် ပတူၢ်ဘၣ်တၢ် တမုာ်တမံၤမံၤ ဒီးပဆိကမိၣ်လၢ ပဘၣ်လဲၤခီဖျိ တၢ်တူၢ်ဘၣ်တဖၣ်အံၤ ထဲတဂၤ. ဒီးဘၣ်သ့ၣ်သ့ၣ် ကမ့ၢ်လၢ ပဘၣ်ယိၣ်လၢ ပှၤတနၢ်ပၢၢ် ပတၢ်တူၢ်ဘၣ်အဃိ ပတဲပၠး အဝဲသ့ၣ်လၢ ပတၢ်တူၢ်ဘၣ်တဘူၣ်ဘၣ်. တဘျီတခီၣ်န့ၣ် ပကဆိကမိၣ်ဘၣ်လၢ ပှၤတသးအိၣ်ပှၤ အနီၢ်ကီၢ် နီတဂၤဘၣ်. ပတူၢ်ဘၣ်လၢ ပအိၣ်ထဲတဂၤ မ့ၢ်ယံာ်ထီၣ်န့ၣ် ပကတူၢ်ဘၣ်လၢ ပှၤမၤစၢၤပှၤတသ့ဘၣ် ဒီးပကဘၣ်ယိၣ်တၢ် ဒီးသူၣ်ကိၢ်သးဂီၤ တၢ်. ယဟိဝၤယွၤ တအဲၣ်ဒိးလၢ ပကတူၢ်ဘၣ်ဒ်န့ၣ် နီတဘျီဘၣ်. ဘၣ်မနုၤအဃိ ပတဲဒ်န့ၣ်သ့လဲၣ်.
၄. ဘၣ်မနုၤအဃိ ဝံအ့ၤလံယၤတဲဝဲလၢယ “အိၣ်တ့ၢ်ထဲယၤတဂၤ” လဲၣ်.
၄ ပကဆိကမိၣ်ကွၢ် ဝံအ့ၤလံယၤလၢအအိၣ်ဒီး တၢ်သးတီတဂၤ အဒိအတဲာ်. ခီဖျိလၢ နီၢ်အံၤစ့ဘ့ၤလး ပာ်လီၤအသးလၢ ကမၤသံအီၤအဃိ အဝဲဃ့ၢ်ပူၤဖျဲးအသး အိၣ်ဝဲအသီ ၄၀ ဘျဲၣ်လံ. (၁ စီၤပၤ ၁၉:၁-၉) ဖဲအဝဲအိၣ်လၢ လ့ကိပူၤထဲတဂၤအခါ အတဲဘၣ်ယဟိဝၤယွၤလၢဝံ “အိၣ်တ့ၢ်ထဲယၤတဂၤ.” (၁ စီၤပၤ ၁၉:၁၀) ဖဲန့ၣ်အဆၢကတီၢ် ဝံလၢအဂၤတဖၣ် အိၣ်ဒံးဝဲ. စီၤဧိၤဘါဒယၤ မၤစၢၤဝဲ ဝံအဂၤတကယၤ လၢကပူၤဖျဲးလၢ နီၢ်အံၤစ့ဘ့ၤလးအစုပူၤ. (၁ စီၤပၤ ၁၈:၇, ၁၃) ဘၣ်ဆၣ် ဘၣ်မနုၤအဃိ ဝံအ့ၤလံယၤ တူၢ်ဘၣ်ဝဲလၢ အအိၣ်တ့ၢ်ထဲတဂၤလဲၣ်. ဘၣ်သ့ၣ်သ့ၣ် အကဆိကမိၣ်ဘၣ်ဝဲလၢ ဝံလၢစီၤဧိၤဘါဒယၤ မၤစၢၤအီၤတဖၣ်န့ၣ် သံလၢာ်လံ. ဒီးအဂၤတခါန့ၣ် လၢကစၢၢ်ကၢ်မ့ၤလးန့ၣ် ယဟိဝၤယွၤပာ်ဖျါထီၣ်လၢ အမ့ၢ်ယွၤလၢအမ့ၢ်အတီ ဝံၤလံ သနာ်က့ ဘၣ်သ့ၣ်သ့ၣ် ကမ့ၢ်လၢ ပှၤတမၤသကီး ကစၢ်ယွၤအတၢ်မၤဒီးအီၤ နီတဂၤဘၣ်အဃိ အကတူၢ်ဘၣ်ဝဲလၢ အအိၣ်ထဲတဂၤ. မ့တမ့ၢ် အဝဲကတူၢ်ဘၣ်ဝဲလၢ အထံၣ်ဘၣ် တၢ်လီၤဘၣ်ယိၣ်ထဲလဲၣ်န့ၣ် ပှၤတသ့ၣ်ညါ နီတဂၤဘၣ် ဒီးပှၤတသးအိၣ်အီၤ နီတဂၤဘၣ်. ဘၣ်မနုၤအဃိ ဝံအ့ၤလံယၤ တူၢ်ဘၣ်ဝဲလၢ အအိၣ်တ့ၢ်ထဲတဂၤလဲၣ်န့ၣ် လံာ်စီဆှံ တပာ်ဖျါထီၣ်န့ၢ်ပှၤ လီၤတံၢ်လီၤဆဲးဘၣ်. ဘၣ်ဆၣ် ပသ့ၣ်ညါသပှၢ်ကတၢၢ်လၢ ယဟိဝၤယွၤနၢ်ပၢၢ် အတၢ်တူၢ်ဘၣ် ဒီးကဘၣ်မၤစၢၤအီၤဒ်လဲၣ်န့ၣ် အသ့ၣ်ညါဝဲ.
ပသ့ၣ်ညါဘၣ်လၢ ယဟိဝၤယွၤ မၤစၢၤဝဲ ဝံအ့ၤလံယၤဒ်လဲၣ်အဃိ ပမ့ၢ်တူၢ်ဘၣ်လၢ ပအိၣ်ထဲတဂၤနာ်က့ ပသးမုာ်ထီၣ်က့ၤ သ့ဒ်လဲၣ် (ကွၢ်လံာ်အဆၢ ၅-၆)
၅. ဖဲဝံအ့ၤလံယၤ တူၢ်ဘၣ်လၢ အအိၣ်ထဲတဂၤအခါ ယဟိဝၤယွၤ မၤမုာ်ထီၣ်အသးဒ်လဲၣ်.
၅ ယဟိဝၤယွၤမၤစၢၤ ဝံအ့ၤလံယၤ အါမး. အဝဲမၤစၢၤ ဝံအ့ၤလံယၤ ဒ်သိးအကတဲဖျါထီၣ် အတၢ်တူၢ်ဘၣ်အဂီၢ်. ယဟိဝၤယွၤ သံကွၢ် ဝံအ့ၤလံယၤလၢ “နဟဲမၤမနုၤ ဖဲအံၤလဲၣ်.” ယဟိဝၤယွၤ သံကွၢ်အီၤဒ်န့ၣ် ခံဘျီညါ. (၁ စီၤပၤ ၁၉:၉, ၁၃) ဖဲယဟိဝၤယွၤ သံကွၢ်အီၤဝံၤ အဝဲတဲဖျါထီၣ် အတၢ်တူၢ်ဘၣ် တဘျီဂ့ၤတဘျီဂ့ၤအခါ ယဟိဝၤယွၤဒိကနၣ်န့ၢ်အီၤ. ယဟိဝၤယွၤ ဒိကနၣ် ဝံအ့ၤလံယၤန့ၣ် အပာ်ဖျါထီၣ်ဝဲလၢ အအိၣ်ဒီးအီၤတပူၤဃီ ဒီးပာ်ဖျါထီၣ်န့ၢ်အီၤ အစိအကမီၤဖးဒိၣ်. ဒီးယဟိဝၤယွၤ ဒုးသ့ၣ်ညါအီၤလၢ ပှၤအံၣ်စရ့လးဖိလၢ အဘူၣ်ထီၣ်ဘါထီၣ်အီၤန့ၣ် အိၣ်တီၢ်ဒံး ဒီဒူၣ်ဒံး. (၁ စီၤပၤ ၁၉:၁၁, ၁၂, ၁၈) ဖဲဝံအ့ၤလံယၤပာ်ဖျါထီၣ် အတၢ်တူၢ်ဘၣ် လၢယဟိဝၤယွၤအအိၣ်ဝံၤဒီး ယဟိဝၤယွၤ ဒိကနၣ်န့ၢ်အီၤအခါန့ၣ် အသးကမုာ်ထီၣ် ဖးဒိၣ်ညါ. ဒီးယဟိဝၤယွၤ ဟ့ၣ်လီၤအါထီၣ်အီၤ မူဒါလၢအရ့ဒိၣ်တဖၣ်. ယဟိဝၤယွၤ မၢအဒိးဖှူ စီၤဃစ့လး လၢကကဲထီၣ် ကီၢ်စူၤရံ အစီၤပၤ, ဒီးဒိးဖှူ စီၤယ့ၤဟူ လၢကကဲထီၣ် အံၣ်စရ့လးအစီၤပၤ ဒီးဒိးဖှူ စီၤအလံၤၡါ လၢက ကဲထီၣ်ဝံတဂၤ. (၁ စီၤပၤ ၁၉:၁၅, ၁၆) ယဟိဝၤယွၤ ဟ့ၣ်လီၤဝံအ့ၤလံယၤ မူဒါတဖၣ်အံၤအဃိ ကညီလၢ အဝဲကသးစၢၢ်ဆၢ တၢ်လၢအဂ့ၤတကပၤ. ဒီးယဟိဝၤယွၤ ဒုးကဲထီၣ်စီၤအလံၤၡါလၢ အသကီးလၢ အမုာ်ဒီးအီၤဒိၣ်မး. နမ့ၢ်တူၢ်ဘၣ်လၢ နအိၣ်ထဲတဂၤအခါ နဒိးန့ၢ်ဘၣ် ကစၢ်ယွၤ အတၢ်မၤစၢၤ ကသ့ဒ်လဲၣ်.
၆. နမ့ၢ်တူၢ်ဘၣ်လၢ နအိၣ်ထဲတဂၤန့ၣ် နကဘၣ်ဃ့ဘါထုကဖၣ်ဒ်လဲၣ်. (စံးထီၣ်ပတြၢၤ ၆၂:၈)
၆ ယဟိဝၤယွၤမၢ ပဃ့ဘါထုကဖၣ်တၢ်လၢအအိၣ်. ယဟိဝၤယွၤသ့ၣ်ညါဝဲ တၢ်ကီတၢ်ခဲလၢ ပထံၣ်ဘၣ်အီၤတဖၣ် ဒီးအဝဲအၢၣ်လီၤဝဲလၢ အကဒိကနၣ် ပတၢ်ထုကဖၣ် ကိးဆၢကတီၢ်ဒဲး. (၁ သ့းစၤလနံ ၅:၁၇) ဒီးပမ့ၢ်ဃ့ဘါထုကဖၣ်န့ၣ် ယဟိဝၤယွၤ ဒိကနၣ်ပှၤမုာ်မး. (ကတိၤဒိ ၁၅:၈) နမ့ၢ်တူၢ်ဘၣ်လၢ နအိၣ်ထဲတဂၤန့ၣ် နဃ့တၢ်မနုၤသ့လဲၣ်. တဲဘၣ်ယဟိဝၤယွၤ လၢနတၢ်တူၢ်ဘၣ်ခဲလၢာ် ဒ်ဝံအ့ၤလံယၤမၤဝဲအသိး. (ဖး စံးထီၣ်ပတြၢၤ ၆၂:၈.) တဲဘၣ်ယဟိဝၤယွၤ လၢနတၢ်ကီတၢ်ခဲတဖၣ် ဒီးခီဖျိလၢ တၢ်ကီတၢ်ခဲတဖၣ်အံၤအဃိ နတူၢ်ဘၣ်တၢ်ဒ်လဲၣ်. ဒီးဃ့အီၤတၢ်မၤစၢၤ ဒ်သိးနလဲၤခီဖျိ နတၢ်တူၢ်ဘၣ်တဖၣ်အံၤ ကန့ၢ်အဂီၢ်. ဒီးဖဲနဘၣ်တဲဖျါထီၣ် နတၢ်နာ်လၢကၠိအခါ နမ့ၢ်တူၢ်ဘၣ်လၢ နအိၣ်ထဲတဂၤ မ့တမ့ၢ် နမ့ၢ်ပျံၤတၢ်န့ၣ် ဃ့ယဟိဝၤယွၤ လၢအကဟ့ၣ်နၤ တၢ်သးဒူ. ဒ်သိး နတဲဖျါထီၣ် နတၢ်နာ် သ့သ့ဘၣ်ဘၣ် ကသ့အဂီၢ် နဃ့ယဟိဝၤယွၤ အတၢ်ကူၣ်သ့သ့. (လူၤကၣ် ၂၁:၁၄, ၁၅) နမ့ၢ်အိၣ်ဒီး တၢ်တူၢ်ဘၣ်လၢ အတမုာ်ဘၣ်န့ၣ် ဃ့ယဟိဝၤယွၤ အတၢ်မၤစၢၤလၢ နကတဲဖျါထီၣ် နတၢ်တူၢ်ဘၣ်လၢ ဒီပုၢ်ဝဲၢ်မုၣ်ခွါ လၢအအိၣ်ဒီး တၢ်လဲၤခီဖျိတဖၣ်အအိၣ် ကဘူၣ်အဂီၢ်. ဒီးဃ့ယဟိဝၤယွၤ လၢအကမၤစၢၤဝဲ ပှၤလၢအဒိကနၣ်နၤတဂၤ ကနၢ်ပၢၢ်စၢၤ နတၢ်တူၢ်ဘၣ်အဂီၢ်. တဲဖျါထီၣ် နတၢ်တူၢ်ဘၣ်လၢ ယဟိဝၤယွၤအအိၣ် ဒီးပာ်သူၣ်ပာ်သး လၢအဝဲစံးဆၢ နတၢ်ထုကဖၣ်ဒ်လဲၣ် ဒီးတူၢ်လိာ်ပှၤဂၤအတၢ်မၤစၢၤ. နမ့ၢ်မၤဒ်န့ၣ်န့ၣ် နတတူၢ်ဘၣ်လၢ နအိၣ်ထဲတဂၤလၢၤဘၣ်.
မ့ၢ်နဂုာ်ကျဲးစၢး လၢကစံၣ်တဲၤတဲလီၤတၢ်အါထီၣ် ဒီးကစံၣ်တဲၤတဲလီၤတၢ်ဒီး ဒီပုၢ်ဝဲၢ်မုၣ်ခွါတဖၣ်ဧါ (ကွၢ်လံာ်အဆၢ ၇)
၇. ပမၤလိန့ၢ်တၢ်လၢ ဒီပုၢ်ဝဲၢ်ခွါမီရံစံအိ အအိၣ်ဒ်လဲၣ်.
၇ ယဟိဝၤယွၤ ဟ့ၣ်ပှၤတၢ်မၤလၢ အလီၤသူၣ်မံသးမုာ်. တၢ်ဖံးတၢ်မၤ လၢပမၤအီၤလၢ တၢ်အိၣ်ဖှိၣ်ပူၤမ့ၢ်ဂ့ၤ, လၢတၢ်စံၣ်တဲၤတဲလီၤတၢ်မၤပူၤမ့ၢ်ဂ့ၤ ယဟိဝၤယွၤ ထံၣ်ဝဲဒီးပာ်လုၢ်ပာ်ပှ့ၤဝဲခဲလၢာ်. (စံးထီၣ်ပတြၢၤ ၁၁၀:၃) ဖဲပတူၢ်ဘၣ်လၢ ပအိၣ်ထဲတဂၤအခါ ပမ့ၢ်မၤကစၢ်ယွၤအတၢ်မၤ ဆူၣ်ဆူၣ်န့ၣ် ကမၤစၢၤပှၤဒ်လဲၣ်. ပကကွၢ်သကီး ဒီပုၢ်ဝဲၢ်ခွါသးစၢ် မီရံစံအိ အတၢ်လဲၤခီဖျိ. b ဖဲဒီပုၢ်ဝဲၢ်ခွါမီရံစံအိ ဒိးဘျၢထံဝံၤတယံာ်ဘၣ်န့ၣ် အသကီးလၢ အမုာ်ဒီးအီၤတဂၤ ယံၤထီၣ်ဒီး တၢ်မ့ၢ်တၢ်တီ ကယီကယီ. အဃိ အတဲဝဲလၢ “ဖဲယထံၣ်လၢ ယသကီးတဂၤ ပာ်တ့ၢ်ကွံာ် တၢ်မ့ၢ်တၢ်တီအခါ ယတၢ်နာ်န့ၢ်လီၤသးတအိၣ်လၢၤဘၣ်. ယဆိကမိၣ်ဘၣ်လၢ မ့ၢ်ယမၤလၢပှဲၤ ယတၢ်အၢၣ်လီၤ ဖဲယဟ့ၣ်လုၢ်ထီၣ်ယသး လၢယဟိဝၤယွၤအအိၣ်အခါန့ၣ် ဘၣ်ကန့ၢ်ဒံးဧါ. ဒီးမ့ၢ်ယဆဲးအိၣ်လၢ ယဟိဝၤယွၤ အဟံၣ်ဖိဃီဖိအကျါထီဘိ ကသ့ဧါ. ယတူၢ်ဘၣ်လၢ ယအိၣ်ထဲတဂၤ ဒီးယဆိကမိၣ်လၢ ပှၤတနၢ်ပၢၢ်စၢၤ ယတၢ်တူၢ်ဘၣ် နီတဂၤဘၣ်.” ဘၣ်ဆၣ် တၢ်မနုၤမၤစၢၤ ဒီပုၢ်ဝဲၢ်ခွါမီရံစံအိလဲၣ်. အတဲဝဲလၢ “ယဟးစံၣ်တဲၤတဲလီၤတၢ်အါထီၣ် အဃိ မၤစၢၤယၤလၢ ယတဆိကမိၣ်ထဲ ယနီၢ်ကစၢ်အဂီၢ် ဒီးယတၢ်တူၢ်ဘၣ် လၢအတမုာ်တဖၣ်န့ၣ်ဘၣ်. ယဟးစံၣ်တဲၤတဲလီၤတၢ် ဒီးပှၤဂၤအဃိ ယသးခုဒိၣ်မး ဒီးယတတူၢ်ဘၣ်လၢ ယအိၣ်ထဲတဂၤလၢၤဘၣ်.” ပဟးစံၣ်တဲၤတဲလီၤတၢ်ဒီးပှၤဂၤ လၢပနီၢ်ကစၢ် မ့ၢ်တသ့ဒံးဘၣ် သနာ်က့ ပမ့ၢ်ကွဲးသကီး လံာ်ပရၢ ဒီးစံၣ်တဲၤတဲလီၤတၢ်လၢ လီတဲစိပူၤ ဒီးပဒီပုၢ်ဝဲၢ်မုၣ်ခွါတဖၣ်န့ၣ် ကကဲထီၣ် တၢ်ဂံၢ်တၢ်ဘါ လၢပဂီၢ်ဒိၣ်မး. တၢ်မနုၤမၤစၢၤဒံး ဒီပုၢ်ဝဲၢ်ခွါ မီရံစံအိလဲၣ်. အတဲဝဲလၢ “ယမၤစၢၤအါထီၣ်တၢ်လၢ တၢ်အိၣ်ဖှိၣ်ပူၤ ဒီးကၠိဖိမူဒါလၢ ယဒိးန့ၢ်အီၤတဖၣ်န့ၣ် ယဂုာ်ကျဲးစၢး ကတဲာ်ကတီၤအီၤ လၢအဂ့ၤကတၢၢ်. ခီဖျိလၢ ယမၤဘၣ် မူဒါတဖၣ်အံၤအဃိ ယတူၢ်ဘၣ်လၢ ယဟိဝၤယွၤ ဒီးဒီပုၢ်ဝဲၢ်မုၣ်ခွါတဖၣ် ပာ်လုၢ်ပာ်ပှ့ၤယၤ အနီၢ်ကီၢ်.”
ဖဲပထံၣ်ဘၣ် တၢ်ကီတၢ်ခဲနးမးအခါ ပသးဟးဂီၤ
၈. ခီဖျိလၢ ပထံၣ်ဘၣ်တၢ်ကီတၢ်ခဲတဖၣ်အဃိ ပကတူၢ်ဘၣ်ဒ်လဲၣ်.
၈ ပအိၣ်မူဘၣ်လၢ မုၢ်နံၤခံကတၢၢ်အဃိ ပကထံၣ်ဘၣ် တၢ်ကီတၢ်ခဲတဖၣ်န့ၣ် ပသ့ၣ်ညါပာ်စၢၤလံ. (၂ တံၤမသ့း ၃:၁) ဘၣ်ဆၣ် ဖဲပထံၣ်ဘၣ် တၢ်ကီတၢ်ခဲလၢ ပတဆိကမိၣ်ဘၣ်အီၤအခါန့ၣ် ပဖုးဘၣ်ပသး ဒီးပသးဟးဂီၤစ့ၢ်ကီး. အဒိ လၢတၢ်တမုၢ်လၢ်အပူၤ ပကထံၣ်ဘၣ် တၢ်ကီတၢ်ခဲဒ်သိးဒီး ပဖံးအီၣ်မၤအီၣ်တၢ် တညီလၢၤဘၣ်, ပသ့ၣ်ညါထီၣ်လၢ ပအိၣ်ဒီး တၢ်ဆူးတၢ်ဆါတမံၤမံၤ မ့တမ့ၢ် ပှၤလၢပအဲၣ်ဘၣ်အီၤတဂၤ သံသဒၣ်ကွံာ်ပှၤ. လီၤဆီဒၣ်တၢ် ပမ့ၢ်ထံၣ်ဘၣ် တၢ်သ့ၣ်တဖၣ်အံၤ ကဲထီၣ်အသး တခါဝံၤတခါ မ့တမ့ၢ် ကဲထီၣ်အသးတဘျီဃီ ခဲလၢာ်န့ၣ် ပကသးဟးဂီၤ ဒီးသူၣ်ကိၢ်သးဂီၤတၢ်ဒိၣ်မး. ဘၣ်ဆၣ် ပကဘၣ်သ့ၣ်နီၣ်ထီၣ်လၢ ယဟိဝၤယွၤန့ၣ် ကွၢ်ထွဲပှၤထီဘိ ဒီးမၤစၢၤပှၤဒ်သိး ပလဲၤခီဖျိ တၢ်ကီတၢ်ခဲ တခါဂ့ၤတခါဂ့ၤ ကန့ၢ်အဂီၢ်.
၉. စီၤယိၤဘး ထံၣ်ဘၣ်ဒီး တၢ်ကီတၢ်ခဲမနုၤတဖၣ်လဲၣ်.
၉ ယဟိဝၤယွၤ မၤစၢၤစီၤယိၤဘး ဒ်လဲၣ်န့ၣ် ခဲအံၤ ပကကွၢ်သကီး. စီၤယိၤဘး ထံၣ်ဘၣ်ဒီး တၢ်ကီတၢ်ခဲအါမး. လၢတနံၤဃီအတီၢ်ပူၤန့ၣ် စီၤယိၤဘး အဆၣ်ဖိကီၢ်ဖိတဖၣ် တအိၣ်လၢၤဘၣ်, အခ့အပှၤတဖၣ်သံ တကးဒံးဘၣ် အဖိလၢ အအဲၣ်ဘၣ်ဝဲတဖၣ် သံခဲလၢာ်. (ယိၤဘး ၁:၁၃-၁၉) အဃိ စီၤယိၤဘး ကသးအုးဝဲ သပှၢ်ကတၢၢ်. တကးဒံးဘၣ် အထံၣ်ဘၣ်ဒီး တၢ်ဆါနးနးဒံး. (ယိၤဘး ၂:၇) စီၤယိၤဘး ထံၣ်ဘၣ်ဒီး တၢ်အိၣ်သးလၢ အနးမးအဃိ အတဲဝဲလၢ “ယသးဟ့လီၤ ယတၢ်အိၣ်မူ အဃိ ယတအဲၣ်ဒိး ဆဲးအိၣ်မူလၢၤဘၣ်.”—ယိၤဘး ၇:၁၆.
ဒ်သိးစီၤယိၤဘးကနာ်လၢ ယဟိဝၤယွၤအဲၣ်အီၤဒီးကွၢ်ထွဲအီၤအဂီၢ် ယဟိဝၤယွၤ တဲဘၣ်အီၤလၢ အကွၢ်ထွဲဝဲ အတၢ်ဘၣ်တ့တဖၣ်ဒ်လဲၣ်အဂ့ၢ် (လံာ်အဆၢ ၁၀)
၁၀. ဒ်သိး စီၤယိၤဘး လဲၤခီဖျိ တၢ်ကီတၢ်ခဲတဖၣ် ကန့ၢ်အဂီၢ် ယဟိဝၤယွၤမၤစၢၤအီၤဒ်လဲၣ်. (ကွၢ်တၢ်ဂီၤလၢလံာ်ကုခိၣ်.)
၁၀ တၢ်လၢစီၤယိၤဘး တူၢ်ဘၣ်ဝဲတဖၣ်န့ၣ် ယဟိဝၤယွၤ ထံၣ်ဝဲခဲလၢာ်. ဒီးမ့ၢ်လၢ ယဟိဝၤယွၤအဲၣ်အီၤအဃိ ယဟိဝၤယွၤ မၤစၢၤအီၤဒ်သိး အလဲၤခီဖျိဝဲ တၢ်ကီတၢ်ခဲတဖၣ်အံၤလၢ တၢ်သးတီအပူၤ ကန့ၢ်အဂီၢ်. ဒီးယဟိဝၤယွၤ အိၣ်ဒီးတၢ်ကူၣ်သ့ထဲလဲၣ် ဒီးသးအိၣ် အတၢ်ဘၣ်တ့တဖၣ် ထဲလဲၣ်န့ၣ် ယဟိဝၤယွၤ တဲဘၣ်ဝဲစီၤယိၤဘး. တကးဒံးဘၣ် အတဲပၠးဝဲဘၣ်ဃးဒီး ဆၣ်ဖိကီၢ်ဖိလၢ အလီၤကမၢကမၣ်တဖၣ်အဂ့ၢ်. (ယိၤဘး ၃၈:၁, ၂; ၃၉:၉, ၁၃, ၁၉, ၂၇; ၄၀:၁၅; ၄၁:၁, ၂) ယဟိဝၤယွၤသူဝဲ စီၤအလံဟူၤလၢ ကဟ့ၣ်ဂံၢ်ဟ့ၣ်ဘါ ဒီးမၤမုာ်ထီၣ် စီၤယိၤဘးအသး. စီၤအလံဟူၤ ဒုးသ့ၣ်နီၣ်ထီၣ် စီၤယိၤဘးလၢ ယဟိဝၤယွၤန့ၣ် ဆိၣ်ဂ့ၤပှၤလၢ အဘူၣ်ထီၣ်ဘါထီၣ်အီၤ လၢအအိၣ်ဒီး တၢ်တူၢ်န့ၢ်ခီၣ်ကဲတဖၣ်ထီဘိ. တကးဒံးဘၣ် ယဟိဝၤယွၤ မၤဝဲဒ်သိး စီၤအလံဟူၤ ကဘှီဘၣ်ထီၣ်က့ၤ စီၤယိၤဘး လၢတၢ်အဲၣ်တၢ်ကွံအပူၤ. စီၤအလံဟူၤ မၤစၢၤစီၤယိၤဘး ဒ်သိးအတဆိကမိၣ်လီၤထဲ အဂ့ၢ်အါတလၢတဂ့ၤအဂီၢ်. စီၤအလံဟူၤ တဲဘၣ်အီၤလၢ ပှၤဟီၣ်ခိၣ်ဖိတဖၣ်န့ၣ် ပှၤမ့ၢ်ထိၣ်သတြီၤအီၤဒီး ယဟိဝၤယွၤန့ၣ် အတမ့ၢ် တၢ်နီတမံၤဘၣ်. (ယိၤဘး ၃၇:၁၄) ယဟိဝၤယွၤမၢ စီၤယိၤဘး ဃ့ပျၢ်န့ၢ် အသကီးသၢဂၤန့ၣ် အတၢ်ကမၣ်. (ယိၤဘး ၄၂:၈-၁၀) ဆၢကတီၢ်ခဲအံၤ ပမ့ၢ်ထံၣ်ဘၣ် တၢ်ကီတၢ်ခဲန့ၣ် ယဟိဝၤယွၤ ကမၤစၢၤပှၤဒ်လဲၣ်.
၁၁. ဖဲပထံၣ်ဘၣ်တၢ်ကီတၢ်ခဲအခါ လံာ်စီဆှံ မၤမုာ်ထီၣ်ပသးဒ်လဲၣ်.
၁၁ ယဟိဝၤယွၤ တတဲတၢ်ဒီးပှၤလၢအနီၢ်ကစၢ် ဒ်အတဲတၢ်ဒီး စီၤယိၤဘးအသိးဘၣ်. ဘၣ်ဆၣ် အဝဲတဲတၢ်ဒီးပှၤ ခီဖျိလၢ အကလုၢ်ကထါ လံာ်စီဆှံ. (ရိမ့ၤ ၁၅:၄) ဒီးအဝဲမၤမုာ်ထီၣ်ပသး ခီဖျိ အဝဲဟ့ၣ်ပှၤ တၢ်မုၢ်လၢ်လၢခါဆူညါ. ခဲအံၤန့ၣ် ပကဆိကမိၣ်ကွၢ်သကီး လံာ်စီဆှံအဆၢတနီၤလၢ အမၤမုာ်ထီၣ်ပသး ဖဲပထံၣ်ဘၣ်ဒီး တၢ်ကီတၢ်ခဲအခါ. လံာ်စီဆှံ ပာ်ဖျါထီၣ်ဝဲလၢ ပမ့ၢ်ထံၣ်ဘၣ်ဒီး တၢ်ကီတၢ်ခဲဖးဒိၣ်သနာ်က့ တၢ်တမံၤမၣ် “မၤလီၤဖးပှၤဒီး ကစၢ်ယွၤအတၢ်အဲၣ် . . . တသ့နီတမံၤဘၣ်.” (ရိမ့ၤ ၈:၃၈, ၃၉) တကးဒံးဘၣ် အဝဲအၢၣ်လီၤစ့ၢ်ကီးပှၤလၢ အဝဲက “အိၣ်ဘူးဒီး ပှၤလၢအကိးထီၣ်အီၤ” လၢတၢ်ထုကဖၣ်အပူၤ. (စံးထီၣ်ပတြၢၤ ၁၄၅:၁၈) ယဟိဝၤယွၤ တဲဘၣ်ပှၤလၢ ပမ့ၢ်သန့ၤပသးလၢအီၤန့ၣ်ပလဲၤခီဖျိ တၢ်မၤကွၢ် တမံၤဂ့ၤတမံၤဂ့ၤကန့ၢ်. ဒီးပမ့ၢ်အိၣ်ဒီး တၢ်ကီတၢ်ခဲသနာ်က့ ပဆဲးအိၣ်ဒီး တၢ်သးခုသ့ဝဲ. (၁ ကရံၣ်သူး ၁၀:၁၃; ယၤကိာ် ၁:၂, ၁၂) လံာ်စီဆှံတဲဘၣ်ပှၤလၢ တၢ်ကီတၢ်ခဲလၢ ပထံၣ်ဘၣ်တဖၣ်န့ၣ် မ့ၢ်ဒၣ်တၢ်တစဲးဖိ ဒီးကအိၣ်ထဲ တစိၢ်တလီၢ်. ဘၣ်ဆၣ် တၢ်ဆိၣ်ဂ့ၤလၢ ပကဒိးန့ၢ်ဘၣ်အီၤတဖၣ်န့ၣ် ကအိၣ်လီၤထူလီၤယိာ်. (၂ ကရံၣ်သူး ၄:၁၆-၁၈) ယဟိဝၤယွၤ အၢၣ်လီၤဝဲ လၢ အဝဲကမၤဟးဂီၤကွံာ် ပှၤလၢအဒုးအိၣ်ထီၣ် တၢ်ကီတၢ်ခဲတဖၣ် လၢအမ့ၢ် မုၣ်ကီၤလံၢ် ဒီးပှၤလၢအအၢအသီ ဒ်သိးဒီးအီၤတဖၣ်. (စံးထီၣ်ပတြၢၤ ၃၇:၁၀) အဃိ ဒ်သိးနလဲၤခီဖျိ တၢ်ကီတၢ်ခဲလၢခါဆူညါ ကန့ၢ်အဂီၢ် မ့ၢ်နတိၢ်နီၣ်ဃာ် လံာ်စီဆှံအဆၢ တနီၤနီၤလံဧါ.
၁၂. ဒ်သိး ပကန့ၢ်ဘၣ်အဘျုးလၢ လံာ်စီဆှံပူၤ လၢလၢပှဲၤပှဲၤအဂီၢ် ယဟိဝၤယွၤ အဲၣ်ဒိးလၢ ပကမၤတၢ်မနုၤလဲၣ်.
၁၂ ယဟိဝၤယွၤ အဲၣ်ဒိးလၢ ပကဟံန့ၢ်တၢ်ဆၢကတီၢ်လၢ ကဖးလံာ်စီဆှံထီဘိ ဒီးဆိကမိၣ်ထံ တၢ်လၢပဖးတဖၣ် လီၤတံၢ်လီၤဆဲး. ဒီးပမ့ၢ်မၤထွဲ တၢ်လၢပမၤလိဘၣ်တဖၣ်န့ၣ် ပတၢ်နာ် ကဂၢၢ်ကျၢၤထီၣ် ဒီးပကဘူးဒိၣ်ထီၣ်ဒီး ယဟိဝၤယွၤ အဃိ ပလဲၤခီဖျိ တၢ်ကီတၢ်ခဲတဖၣ်ကန့ၢ်. တကးဒံးဘၣ် ပှၤလၢအသန့ၤအသးလၢ လံာ်စီဆှံန့ၣ် ယဟိဝၤယွၤ ကဟ့ၣ်အဝဲသ့ၣ် သးစီဆှံ. ဒီးသးစီဆှံ ကဟ့ၣ်အဝဲသ့ၣ် “တၢ်ဂံၢ်တၢ်ဘါလီၤဆီ” ဒ်သိး အဝဲသ့ၣ် လဲၤခီဖျိ တၢ်ကီတၢ်ခဲ တမံၤဂ့ၤတမံၤဂ့ၤ ကန့ၢ်အဂီၢ်.—၂ ကရံၣ်သူး ၄:၇-၁၀.
၁၃. ဒ်သိး ပလဲၤခီဖျိ တၢ်ကီတၢ်ခဲတဖၣ် ကန့ၢ်အဂီၢ် နီၢ်သးအတၢ်အီၣ်တၢ်အီလၢ “ကုၢ်လၢအတီ ဒီးအကူၣ်တၢ်သ့” ကတဲာ်ကတီၤန့ၢ်ပှၤန့ၣ် မၤစၢၤပှၤဒ်လဲၣ်.
၁၃ ယဟိဝၤယွၤ သူဝဲ “ကုၢ်လၢအတီ ဒီးအကူၣ်တၢ်သ့” ဒ်သိး ကထုးထီၣ်ဝဲ လံာ်လဲၢ် ဒီးတၢ်ဂ့ၢ်တၢ်ကျိၤတဖၣ်, တၢ်ဂီၤမူ ဒီးတၢ်သးဝံၣ်တဖၣ်. ဒီးတၢ်သ့ၣ်တဖၣ်အံၤ မၤစၢၤပှၤဒ်သိး ပတၢ်နာ် ကဂၢၢ်ကျၢၤ ဒီးပတၢ်ရ့လိာ်သးဒီး ယဟိဝၤယွၤ ကဂ့ၤထီဘိ. (မးသဲ ၂၄:၄၅) အဃိ ဒ်သိးပကဒိးန့ၢ်ဘၣ်အဘျုး လၢလၢပှဲၤပှဲၤအဂီၢ် ပကဘၣ်ဟံန့ၢ် တၢ်ဆၢကတီၢ်လၢ ပကကွၢ်ဒီးဖး တၢ်ဂ့ၢ်တၢ်ကျိၤလၢ ယဟိဝၤယွၤကတဲာ်ကတီၤ န့ၢ်ပှၤသ့ၣ်တဖၣ်အံၤ. ဒီပုၢ်ဝဲၢ်မုၣ်လၢ အအိၣ်လၢ ကီၢ်အမဲရကၤတဂၤ အပာ်လုၢ်ပာ်ပှ့ၤဝဲ နီၢ်သးအတၢ်အီၣ်လၢ အဒိးန့ၢ်ဘၣ်ဝဲတဖၣ်ဒိၣ်မး. အတဲဝဲလၢ “ဖဲယမၤယဟိဝၤယွၤအတၢ်မၤ အနံၣ် ၄၀ အတီၢ်ပူၤန့ၣ် ယထံၣ်ဘၣ် တၢ်ကီတၢ်ခဲလၢ အမၤကွၢ် ယတၢ်သးတီ အဘျီအါမး.” တၢ်မၤကွၢ်လၢ အထံၣ်ဘၣ်ဝဲတဖၣ်န့ၣ် မ့ၢ်ဝဲ ပှၤမူၤသံးတဂၤ တဲးသံဘၣ်အဖုလၢကါ တကးဒံးဘၣ် အမိအပါ ဆိးက့နးမး. ဒီးအနီၢ်ကစၢ်ဒၣ်ဝဲ ဘၣ်ခဲစၢၣ်တၢ်ဆါခံဘျီ. အဝဲထံၣ်ဘၣ် တၢ်ကီတၢ်ခဲတဖၣ်အံၤ သနာ်က့ ဒ်သိး အလဲၤခီဖျိဝဲ ကန့ၢ်အဂီၢ် တၢ်မနုၤမၤစၢၤအီၤလဲၣ်. အတဲဝဲလၢ “ယဟိဝၤယွၤ ကွၢ်ထွဲယၤ ထီဘိ. နီၢ်သးအတၢ်အီၣ်တၢ်အီလၢ ယဟိဝၤယွၤ ကတဲာ်ကတီၤဝဲ ခီဖျိ ကုၢ်လၢအတီ ဒီးအကူၣ်တၢ်သ့န့ၣ် မၤစၢၤယၤဒ်သိးဒီး ယတူၢ်တၢ်ကန့ၢ်. အဃိ ဒ်စီၤယိၤဘး တဲဝဲအသိး ယတဲသ့လၢ ‘တုၤလၢယသံဒၣ်လဲာ် ယတမၤဟးဂီၤ ယတၢ်သးတီဘၣ်.’”—ယိၤဘး ၂၇:၅.
ပမၤစၢၤတၢ်လၢ တၢ်အိၣ်ဖှိၣ်အပူၤ ကသ့ဒ်လဲၣ် (ကွၢ်လံာ်အဆၢ ၁၄)
၁၄. ဖဲပထံၣ်ဘၣ် တၢ်ကီတၢ်ခဲအခါ ဒ်သိးပလဲၤခီဖျိအီၤကန့ၢ်အဂီၢ် ယဟိဝၤယွၤသူဝဲ ပဒီပုၢ်ဝဲၢ်မုၣ်ခွါတဖၣ် လၢကမၤစၢၤပှၤဒ်လဲၣ်. (၁ သ့းစၤလနံ ၄:၉)
၁၄ ယဟိဝၤယွၤ သိၣ်လိဝဲ အပှၤဂီၢ်မုၢ်တဖၣ်လၢ ဖဲအဝဲသ့ၣ်ထံၣ်ဘၣ် တၢ်ကီတၢ်ခဲ အဆၢကတီၢ် ကအဲၣ်လိာ်သး ဒီးကမၤမုာ်ထီၣ်လိာ်သး တဂၤဒီးတဂၤ. (၂ ကရံၣ်သူး ၁:၃, ၄; ဖး ၁ သ့းစၤလနံ ၄:၉.) ပဒီပုၢ်ဝဲၢ်မုၣ်ခွါတဖၣ်န့ၣ် ကွၢ်လိဝဲ စီၤအလံဟူၤ အဃိ ဖဲပထံၣ်ဘၣ် တၢ်ကီတၢ်ခဲအခါ ဒ်သိး ပကဆဲးအိၣ်ဒီး တၢ်သးတီ ဒီးလဲၤခီဖျိ တၢ်ကီတၢ်ခဲ ကန့ၢ်အဂီၢ် အဝဲသ့ၣ် သးအိၣ်မၤစၢၤပှၤ. (မၤတၢ် ၁၄:၂၂) အဒိ ဒီပုၢ်ဝဲၢ်မုၣ်ဒၤယဲန့ၣ် ဖဲအဝၤအိၣ်တဆူၣ်ဘၣ် နးမးအခါ ဒ်သိး အနီၢ်သးတလီၤစၢ်တဂ့ၤအဂီၢ် ဒီပုၢ်ဝဲၢ်မုၣ်ခွါလၢ တၢ်အိၣ်ဖှိၣ်ပူၤတဖၣ် ဟ့ၣ်ဂံၢ်ဟ့ၣ်ဘါအီၤ ဒီးမၤစၢၤအီၤ. ဒီပုၢ်ဝဲၢ်မုၣ်ဒၤယဲ တဲဝဲလၢ “ဖဲန့ၣ်အဆၢကတီၢ်န့ၣ် ကီဒိၣ်မး. ဘၣ်ဆၣ် ဖဲတၢ်ကီတၢ်ခဲအဆၢကတီၢ် ပတူၢ်ဘၣ် ယဟိဝၤယွၤ အတၢ်အဲၣ် ဒီးအတၢ်ကဟုကယာ်. ဒီးဒီပုၢ်ဝဲၢ်လၢ တၢ်အိၣ်ဖှိၣ်ပူၤတဖၣ် မၤစၢၤပှၤအါမး. အဝဲသ့ၣ် ဟဲဟးအိၣ်သကီးပှၤ, တဲသကီးတၢ်ဒီးပှၤလၢလီတဲစိပူၤ ဒီးဟဲဖိးဟုပှၤ. အဝဲသ့ၣ် မၤဝဲဒ်န့ၣ်အဃိ မၤစၢၤပှၤ ဒ်သိးပလဲၤခီဖျိတၢ်ကန့ၢ်အဂီၢ်. ဒီးခီဖျိလၢ ယနီကါတသ့ဘၣ်အဃိ ဒီပုၢ်ဝဲၢ်မုၣ်ခွါတဖၣ် ရဲၣ်ကျဲၤဝဲဒ်သိး ယကလဲၤထီၣ်ဘၣ် တၢ်အိၣ်ဖှိၣ် ဒီးဟးစံၣ်တဲၤတဲလီၤဘၣ်တၢ်အဂီၢ်.” ပအိၣ်ဘၣ်လၢ နီၢ်သးအဟံၣ်ဖိဃီဖိလၢ အအိၣ်ဒီး တၢ်အဲၣ်တၢ်ကွံ ဒ်အံၤအဃိ အကဲဝဲ တၢ်ဆိၣ်ဂ့ၤဖးဒိၣ်.
စံးဘျုးယဟိဝၤယွၤ လၢအတၢ်အဲၣ် ဒီးတၢ်ကဟုကယာ်ပှၤအဃိ
၁၅. ဘၣ်မနုၤအဃိ ပနာ်သ့လၢ ပလဲၤခီဖျိ တၢ်ကီတၢ်ခဲ ကန့ၢ်လဲၣ်.
၁၅ ပဝဲကီးဂၤဒဲးန့ၣ် ပကထံၣ်ဘၣ် တၢ်ကီတၢ်ခဲတဖၣ်. ဘၣ်ဆၣ် ဒ်ပမၤလိတ့ၢ်ဘၣ်အသိးန့ၣ် ဖဲပထံၣ်ဘၣ် တၢ်ကီတၢ်ခဲအခါ ပတအိၣ်ထဲတဂၤဘၣ်. ဒ်ပၢ်လၢအအိၣ်ဒီး တၢ်အဲၣ်တၢ်ကွံတဂၤအသိး ယဟိဝၤယွၤန့ၣ် ကွၢ်ထွဲပှၤ, အိၣ်လၢပကပၤ ဒီးအိၣ်ခိးဒိကနၣ်ဝဲ ပတၢ်ဃ့ဘါထုကဖၣ် ဒ်သိးကမၤစၢၤပှၤအဂီၢ်. (ယၡါယၤ ၄၃:၂) ဒ်သိး ပလဲၤခီဖျိ တၢ်ကီတၢ်ခဲ ကန့ၢ်အဂီၢ် ယဟိဝၤယွၤ ဟ့ၣ်ပှၤတၢ်ဟ့ၣ်အါမး. အဝဲဟ့ၣ်ပှၤ တၢ်ဟ့ၣ်လၢအမ့ၢ် တၢ်ဃ့ဘါထုကဖၣ်, လံာ်စီဆှံ, နီၢ်သးအတၢ်အီၣ်တၢ်အီအါမး ဒီးဒီပုၢ်ဝဲၢ်မုၣ်ခွါလၢ အအဲၣ်ပှၤ လၢအကမၤစၢၤပှၤဖဲပလိၣ်ဘၣ် တၢ်မၤစၢၤအခါ. ယဟိဝၤယွၤ ဟ့ၣ်ပှၤတၢ်ခဲလၢာ်လၢ ပလိၣ်ဘၣ်အဃိ ပနာ်သ့သပှၢ်ကတၢၢ်လၢ ပလဲၤခီဖျိ တၢ်ကီတၢ်ခဲကန့ၢ်.
၁၆. ဒ်သိး ပကဆဲးဒိးန့ၢ်ဘၣ် ယဟိဝၤယွၤ အတၢ်အဲၣ် ဒီးအတၢ်ကဟုကယာ်ပှၤအဂီၢ် ပကဘၣ်မၤ တၢ်မနုၤလဲၣ်.
၁၆ ပအိၣ်ဒီး ပၢ်လၢအကွၢ်ထွဲ ဒီးကဟုကယာ်ပှၤအဃိ ပသးခုဒိၣ်မးဒီး “ပသးခုလၢ အဃိ.” (စံးထီၣ်ပတြၢၤ ၃၃:၂၁) ယဟိဝၤယွၤအဲၣ်ပှၤအဃိ ပပာ်ဖျါထီၣ်လၢ ပစံးဘျုးအီၤသ့ခီဖျိ ပဟံန့ၢ်တၢ်ဆၢကတီၢ် လၢပကကွၢ်ဒီး ဖးတၢ်ဂ့ၢ်တၢ်ကျိၤလၢ အဝဲကတဲာ်ကတီၤန့ၢ်ပှၤတဖၣ်. ဒ်သိး ပကဆဲးအိၣ်လၢ ကစၢ်ယွၤ အတၢ်ကဟုကယာ်ဖီလာ်အဂီၢ် တၢ်လၢပကဘၣ်မၤန့ၣ်အိၣ်ဝဲ. ပကဘၣ်ဂုာ်ကျဲးစၢး ဒိကနၣ် ယဟိဝၤယွၤ အကလုၢ်, မၤတၢ်လၢအဘၣ် လၢယဟိဝၤယွၤအမဲာ်ညါ. ဒီးပမ့ၢ်မၤဒ်န့ၣ်န့ၣ် ယဟိဝၤယွၤ ကကွၢ်ထွဲ ဒီးကကဟုကယာ်ပှၤ လီၤထူလီၤယိာ်.—၁ ပ့းတရူး ၃:၁၂.
တၢ်သးဝံၣ် ၃၀ ယသကိး, ယပၢ်, ယယွၤ
a ဒ်သိးပလဲၤခီဖျိ တၢ်ကီတၢ်ခဲတဖၣ် လၢဆၢကတီၢ်ခဲအံၤ ကန့ၢ်အဂီၢ် ပလိၣ်ဘၣ် ယဟိဝၤယွၤ အတၢ်မၤစၢၤ. တၢ်မၤလိတခါအံၤ ကပာ်ဖျါထီၣ်န့ၢ်ပှၤလၢ ယဟိဝၤယွၤ ကွၢ်ထွဲ အပှၤဂီၢ်မုၢ်တဖၣ် ဒီးတၢ်ကီတၢ်ခဲ တခါဂ့ၤတခါဂ့ၤ လၢပထံၣ်ဘၣ်အီၤန့ၣ် ယဟိဝၤယွၤ သ့ၣ်ညါဝဲခဲလၢာ်. ဒီးအဝဲမၤစၢၤပှၤ ဒ်သိးပလဲၤခီဖျိ တၢ်ကီတၢ်ခဲတဖၣ်အံၤ ကန့ၢ်အဂီၢ်.
b ပှၤမံၤတနီၤန့ၣ် ပှၤဆီတလဲဝဲ.