တၢ်မၤလိ ၃၆
ယဟိဝၤယွၤ အပှၤဂီၢ်မုၢ်တဖၣ် အဲၣ်တၢ်တီတၢ်လိၤ
“ပှၤလၢအလီကီ တၢ်တီတၢ်လိၤန့ၣ် ကသးခုဝဲ.”—မးသဲ ၅:၆.
တၢ်သးဝံၣ် ၉ ယဟိဝၤမ့ၢ်ပစီၤပၤ
တၢ်မၤလိအံၤ အတၢ်တိာ်ပာ် a
၁. စီၤယိၤသး ထံၣ်ဘၣ်ဒီး တၢ်မၤကွၢ်ဒ်လဲၣ် ဒီးအမၤဝဲဒ်လဲၣ်.
စီၤယၤကိာ်အဖိခွါ စီၤယိၤသးန့ၣ် ထံၣ်ဘၣ်တၢ်မၤကွၢ်ဖးဒိၣ်တခါ. အကစၢ်စီၤပိၤတံၤဖၢ် အမါတဲအီၤလၢ “ဟဲမံဃုာ်ဒီးယၤမီၤ.” ဘၣ်ဆၣ် စီၤယိၤသး တမၤဝဲဘၣ်. ပှၤတနီၤ ကဆိကမိၣ်ဘၣ်ဝဲလၢ ‘ဘၣ်မနုၤအဃိ စီၤယိၤသး တတူၢ်လိာ်ဝဲဘၣ်လဲၣ်.’ ဖဲန့ၣ်အခါ စီၤပိၤတံၤဖၢ် တအိၣ်လၢဟံၣ်ဘၣ်. စီၤယိၤသးန့ၣ် အဘၣ်ကဲကုၢ် ဖဲန့ၣ်အဃိ အဝဲမ့ၢ်တမၤဝဲဒ် စီၤပိၤတံၤဖၢ်အမါ အတၢ်ဘၣ်သးဘၣ်န့ၣ် တၢ်မၤကီမၤခဲအီၤသ့. ဘၣ်မနုၤအဃိ စီၤယိၤသး တမံဃုာ်ဒီး အကစၢ်အမါဘၣ်လဲၣ်. အတဲဝဲလၢ “ယမၤတၢ်အၢတၢ်သီ လၢအဒိၣ်တမံၤအံၤ ဒီးမၤကမၣ်ဘၣ် ကစၢ်ယွၤ ကသ့ဒ်လဲၣ်.”—၁ မိၤၡ့ ၃၉:၇-၁၂.
၂. တၢ်အဲၣ်ဘၢမါအဲၣ်ဘၢဝၤန့ၣ် ကစၢ်ယွၤထံၣ်ဝဲလၢ အကမၣ်န့ၣ် စီၤယိၤသး သ့ၣ်ညါဝဲဒ်လဲၣ်.
၂ ကစၢ်ယွၤထံၣ်ဝဲ တၢ်အဲၣ်ဘၢမါအဲၣ်ဘၢဝၤဒ် “တၢ်အၢတၢ်သီ လၢအဒိၣ်တမံၤ” န့ၣ်စီၤယိၤသး သ့ၣ်ညါဝဲဒ်လဲၣ်. ဖဲစီၤယိၤသးအစိၤန့ၣ် စီၤမိၤၡ့အတၢ်သိၣ်တၢ်သီလၢ “နတဘၣ် အဲၣ်ဘၢမါအဲၣ်ဘၢဝၤ တဂ့ၤ” န့ၣ်တအိၣ်ဒံးဘၣ်. လၢခံအနံၣ် ခံကယၤဃၣ်ဃၣ်မၣ် ပှၤကွဲးဝဲ တၢ်သိၣ်တၢ်သီတခါအံၤ. (၂ မိၤၡ့ ၂၀:၁၄) ဘၣ်ဆၣ် ယဟိဝၤယွၤ တဘၣ်သးဝဲ တၢ်အဲၣ်ဘၢမါအဲၣ်ဘၢဝၤဘၣ်န့ၣ် စီၤယိၤသး သ့ၣ်ညါဝဲလီၤတံၢ်လီၤဆဲး. အသ့ၣ်ညါဝဲဒ်လဲၣ်. အဒိ စီၤယိၤသး သ့ၣ်ညါဝဲလၢ ဖဲယဟိဝၤယွၤ ဒုးအိၣ်ထီၣ် တၢ်ဆီဟံၣ်ဆီဃီအခါ အဒိးဖျီဝဲ ပိာ်မုၣ်တဂၤ ဒီးပိာ်ခွါတဂၤ. တကးဒံးဘၣ် အသ့ၣ်ညါဝဲလၢ ဒ်သိးဒီး ပှၤဃၣ်ဃၢၤ တမံဃုာ်ဒီး အဖံဖးဒိၣ် နီၢ်စၤရါတဂ့ၤအဂီၢ် ယဟိဝၤယွၤဒီသဒၢအီၤ ခံဘျီညါ. ဒီးအကသ့ၣ်ညါ စ့ၢ်ကီးဝဲလၢ ကစၢ်ယွၤဒီသဒၢ စီၤအံၤစဲးအမါ နီၢ်ရံးဘကၤ ဒ်န့ၣ်စ့ၢ်ကီး. (၁ မိၤၡ့ ၂:၂၄; ၁၂:၁၄-၂၀; ၂၀:၂-၇; ၂၆:၆-၁၁) စီၤယိၤသး ဆိကမိၣ်ထံဝဲ တၢ်ဂ့ၢ်သ့ၣ်တဖၣ်န့ၣ်အဃိ တၢ်အဘၣ်ဒီးတၢ်အကမၣ် လၢယဟိဝၤယွၤအမဲာ်ညါ အိၣ်ဒ်လဲၣ်န့ၣ် အသ့ၣ်ညါဝဲ. စီၤယိၤသးန့ၣ် အဲၣ်ယဟိဝၤယွၤအဃိ အပာ်လီၤအသးလၢ အကမၤတၢ်အဘၣ် ဒီးတၢ်တီတၢ်လိၤလၢ ယဟိဝၤယွၤအမဲာ်ညါ.
၃. ပကတဲသကီး တၢ်ဂ့ၢ်မနုၤလဲၣ်.
၃ ပနာ်သပှၢ်ကတၢၢ်လၢ နကအဲၣ်တၢ်တီတၢ်လိၤ. ဘၣ်ဆၣ် မ့ၢ်လၢပတလၢတပှဲၤဘၣ်အဃိ ပမ့ၢ်တပလီၢ်သးဘၣ်န့ၣ် ဘၣ်ဃးဒီး တၢ်တီတၢ်လိၤန့ၣ် ပတၢ်ထံၣ် လီၤဂာ်ထီၣ်ဒီး ပှၤတၢ်ချၢတဖၣ်သ့ ညီညီဖိ. (ယၡါယၤ ၅:၂၀; ရိမ့ၤ ၁၂:၂) ပကတဲသကီးဘၣ်ဃးဒီး တၢ်တီတၢ်လိၤန့ၣ် မ့ၢ်မနုၤလဲၣ် ဒီးပမ့ၢ်မၤထွဲ ဒ်တၢ်တီတၢ်လိၤ အိၣ်ဝဲအသိးန့ၣ် ကကဲဘျုးလၢ ပတၢ်အိၣ်မူပူၤဒ်လဲၣ်. တကးဒံးဘၣ် ပကတဲသကီး တၢ်ဂ့ၢ်သၢထံၣ် လၢအကမၤစၢၤပှၤဒ်သိး ပတၢ်အဲၣ်ယဟိဝၤယွၤ အတၢ်သိၣ်တၢ်သီလၢ ဘၣ်ဃးဒီး တၢ်တီတၢ်လိၤန့ၣ် ကအါထီၣ်အဂီၢ်.
တၢ်တီတၢ်လိၤန့ၣ် မ့ၢ်မနုၤလဲၣ်
၄. ပှၤအါဂၤ ဆိကမိၣ်ဝဲလၢ ပှၤတီပှၤလိၤန့ၣ် ကဲပှၤဒ်လဲၣ်.
၄ ပှၤအါဂၤ ဆိကမိၣ်ဝဲလၢ တၢ်လၢပှၤအတီအလိၤန့ၣ် အကဲ ပှၤလၢအပာ်တီပာ်လိၤအသး, အပာ်ဒိၣ်အသး မ့တမ့ၢ် အဆိကမိၣ်လၢ အဂ့ၤဒိၣ်န့ၢ်ဒံးပှၤဂၤ. ဘၣ်ဆၣ် ကစၢ်ယွၤ တဘၣ်သူၣ်ဘၣ်သးဝဲ တၢ်ပာ်သူၣ်ပာ်သးဒ်န့ၣ် နီတစဲးဘၣ်. ဖဲယ့ၣ်ၡူးအိၣ်လၢ ဟီၣ်ခိၣ်အခါန့ၣ် တၢ်ဘူၣ်တၢ်ဘါခိၣ်နၢ်တဖၣ် ပာ်တီပာ်လိၤအသး အဃိ ယ့ၣ်ၡူးပာ်ဒ့ၣ်ပာ်ကမၣ် အဝဲသ့ၣ်. (စံၣ်တဲၤတဲလီၤတၢ် ၇:၁၆; လူၤကၣ် ၁၆:၁၅) အနီၢ်ကီၢ်န့ၣ် ပှၤလၢအမၤ တၢ်တီတၢ်လိၤလၢ ကစၢ်ယွၤအမဲာ်ညါန့ၣ် အတဆိကမိၣ်လၢ အဂ့ၤဒိၣ်န့ၢ်ဒံး ပှၤဂၤနီတဘျီဘၣ်.
၅. ဒ်လံာ်စီဆှံ ပာ်ဖျါထီၣ်ဝဲအသိး တၢ်တီတၢ်လိၤန့ၣ် အဲၣ်ဒိးတဲဝဲ တၢ်မနုၤလဲၣ်. ဟ့ၣ်တၢ်အဒိ.
၅ တၢ်တီတၢ်လိၤန့ၣ် မ့ၢ်တၢ်လၢ အဂ့ၤဒိၣ်မးတခါ. ပမ့ၢ်ဘၣ်တဲယိယိဖိန့ၣ် ပှၤလၢအမၤ တၢ်တီတၢ်လိၤန့ၣ် အဲၣ်ဒိးတဲဝဲ ပှၤလၢအမၤ တၢ်လၢယဟိဝၤယွၤ တဲဝဲလၢအဘၣ်. လံာ်စီဆှံသူဝဲ တၢ်ကတိၤလၢအမ့ၢ် “တၢ်တီတၢ်လိၤ” န့ၣ်အဲၣ်ဒိးတဲဝဲ ပှၤလၢအအိၣ်မူဒ် ယဟိဝၤယွၤ အတၢ်သိၣ်တၢ်သီ လၢအဂ့ၤဒိၣ်မး. အဒိ ယဟိဝၤယွၤ အတၢ်သိၣ်တၢ်သီအိၣ်ဝဲလၢ ပှၤဆါတၢ်ပှ့ၤတၢ်ဖိတဖၣ်န့ၣ် ကဘၣ်သူ “စီၤပီၢ်သၣ် . . . အတီအလိၤ.” (၅ မိၤၡ့ ၂၅:၁၅) အဃိ ခရံာ်ဖိတဂၤ မ့ၢ်အဲၣ်ဒိးမၤ တၢ်လၢယဟိဝၤယွၤ တဲဝဲလၢအဘၣ်န့ၣ် ကဘၣ်ဖံးအီၣ်မၤအီၣ်တၢ် တီတီလိၤလိၤ. ပှၤလၢအတီအလိၤန့ၣ် အမ့ၢ်ထံၣ်ဝဲ ပှၤရ့ပှၤဂၤ တတီတလိၤဘၣ်န့ၣ် ဘၣ်အီၤတမုာ်ဘၣ်. ပှၤလၢအတီအလိၤတဂၤန့ၣ် က “မၤတၢ်ဘၣ် [ယဟိဝၤယွၤ] အသးလၢ တၢ်ခဲလၢာ်အပူၤ,” အဃိ ဖဲအဝဲ ကဆၢတဲာ်တၢ်အခါ ယဟိဝၤယွၤ အတၢ်ထံၣ်အိၣ်ဒ်လဲၣ်န့ၣ် အကဆိကမိၣ်ထံဝဲ.—ကလီးစဲ ၁:၁၀.
၆. ယဟိဝၤယွၤ အတၢ်သိၣ်တၢ်သီ ဘၣ်ဃးဒီး တၢ်အဘၣ်ဒီးတၢ်အကမၣ်န့ၣ် ဘၣ်မနုၤအဃိ ပတဲသ့လၢ အကဲတၢ်လၢအဂ့ၤကတၢၢ်လဲၣ်. (ယၡါယၤ ၅၅:၈, ၉)
၆ လံာ်စီဆှံပာ်ဖျါထီၣ်ဝဲလၢ ယဟိဝၤယွၤမ့ၢ်ဝဲ “တၢ်တီတၢ်လိၤ အဂံၢ်ခီၣ်ထံး.” (ယံးရမံယၤ ၅၀:၇) ယဟိဝၤယွၤ မ့ၢ်တၢ်ဘၣ်တ့ကစၢ်အဃိ ထဲဒၣ်အဝဲတဂၤန့ၣ် အိၣ်ဒီးတၢ်ခွဲးတၢ်ယာ် လၢကပာ်လီၤ တၢ်သိၣ်တၢ်သီလၢ ဘၣ်ဃးဒီး တၢ်အဘၣ် ဒီးတၢ်အကမၣ်. ယဟိဝၤယွၤန့ၣ် အကဲပှၤလၢပှၤပှဲၤ ဒီးမ့မ့ၢ်ပှၤန့ၣ် ပကဲပှၤတလၢတပှဲၤဘၣ်အဃိ ယဟိဝၤယွၤအတၢ်ထံၣ်န့ၣ် ဂ့ၤဒိၣ်န့ၢ်ပှၤထီဘိ. (ကတိၤဒိ ၁၄:၁၂; ဖး ယၡါယၤ ၅၅:၈, ၉.) ဘၣ်ဆၣ် ကစၢ်ယွၤတ့လီၤပှၤ ဒ်အက့ၢ်အဂီၤအသိးအဃိ ပအိၣ်မူဒ် ကစၢ်ယွၤအတၢ်သိၣ်တၢ်သီလၢ ဘၣ်ဃးဒီး တၢ်တီတၢ်လိၤ အသိးသ့. (၁ မိၤၡ့ ၁:၂၇) ဒီးပအဲၣ်ဒိးမၤဒ်န့ၣ်. ပအဲၣ်ယဟိဝၤယွၤအဃိ ပအဲၣ်ဒိးဂုာ်ကျဲးစၢး ကွၢ်လိအီၤ လၢအဂ့ၤကတၢၢ်.—အ့းဖ့းစူး ၅:၁.
၇. ဘၣ်မနုၤအဃိ ပလိၣ်ဘၣ် တၢ်သိၣ်တၢ်သီလဲၣ်. ဟ့ၣ်တၢ်အဒိ.
၇ ပမ့ၢ်မၤထွဲ ယဟိဝၤယွၤ အတၢ်သိၣ်တၢ်သီ ဘၣ်ဃးဒီး တၢ်အဘၣ်ဒီးတၢ်အကမၣ်န့ၣ် ကကဲဘျုးလၢပဂီၢ်. ထံၣ်တမှံကွၢ်လၢ ပှၤတ့ထီၣ်တၢ်သူၣ်ထီၣ်ဖိ တဂၤဒီးတဂၤ အမ့ၢ်ပာ်ပနီၣ်ဝဲ တၢ်ထိၣ်တၢ်ဒွး တဂၤတမၠိန့ၣ် တၢ်ကကဲထီၣ်အသးဒ်လဲၣ်. တမ့ၢ်လၢ ပှၤတ့ထီၣ်တၢ် ကလဲၤအသးလၢ အဂ့ၢ်အဝီဘၣ်. ဒီးကသံၣ်သရၣ် မ့တမ့ၢ် ပှၤလၢအကွၢ်ပှၤဆါတဖၣ် မ့ၢ်တမၤထွဲ တၢ်သိၣ်တၢ်သီဘၣ်န့ၣ် ပှၤဆါတဖၣ်သံသ့. အဃိ ပထံၣ်ဘၣ်လၢ ပှၤမ့ၢ်မၤပိာ်ထွဲဝဲ တၢ်သိၣ်တၢ်သီန့ၣ် ကဲထီၣ်တၢ်ဒီသဒၢ. ဒ်န့ၣ်အသိး ကစၢ်ယွၤ အတၢ်သိၣ်တၢ်သီ ဘၣ်ဃးဒီး တၢ်အဘၣ်ဒီးတၢ်အကမၣ်န့ၣ် ဒီသဒၢပှၤနီၢ်ကီၢ်.
၈. ပှၤလၢအမၤ တၢ်လၢအဘၣ်န့ၣ် ကဒိးန့ၢ်ဘၣ် တၢ်ဆိၣ်ဂ့ၤဒ်လဲၣ်.
၈ ယဟိဝၤယွၤ ဆိၣ်ဂ့ၤဝဲ ပှၤလၢအဂုာ်ကျဲးစၢး အိၣ်မူ ဒ် အတၢ်သိၣ်တၢ်သီအသိး. ကစၢ်ယွၤ အၢၣ်လီၤဝဲလၢ “ပှၤတီပှၤလိၤ ကန့ၢ်သါဘၣ် ဟီၣ်ခိၣ် ဒီးအဝဲသ့ၣ် ကအိၣ်ဘၣ်ဝဲလၢ ဟီၣ်ခိၣ်ချၢ လီၤထူလီၤယိာ်.” (စံးထီၣ်ပတြၢၤ ၃၇:၂၉) ထံၣ်တမှံကွၢ် ပှၤကိးဂၤဒဲး မ့ၢ်မၤထွဲဝဲ ယဟိဝၤယွၤ အတၢ်သိၣ်တၢ်သီန့ၣ် တၢ်ဃူတၢ်ဖိး, တၢ်မုာ်တၢ်ခုၣ် ဒီးတၢ်သူၣ်ခုသးခု ကအိၣ်ဝဲလၢ ပှၤဟီၣ်ခိၣ်ဖိအကျါထဲလဲၣ်. ယဟိဝၤယွၤ အဲၣ်ဒိးဝဲလၢ နကဒိးန့ၢ်ဘၣ် တၢ်အိၣ်မူဒ်န့ၣ်. အဃိပဝဲကိးဂၤဒဲးန့ၣ် ပကြၢးမၤထွဲ တၢ်လၢယဟိဝၤယွၤ တဲဝဲလၢအဘၣ်. ဒ်သိးပအဲၣ်တၢ်တီတၢ်လိၤ ကအါထီၣ်အဂီၢ် ပကဘၣ်မၤဒ်လဲၣ်. ပကတဲသကီး တၢ်လၢပမၤအီၤသ့သၢမံၤ.
မၤအါထီၣ် နတၢ်အဲၣ်ယဟိဝၤယွၤ အတၢ်သိၣ်တၢ်သီ
၉. ပကအဲၣ် တၢ်တီတၢ်လိၤအဂီၢ် ပကဘၣ်အဲၣ် မတဂၤလဲၣ်.
၉ တၢ, အဲၣ်ပှၤလၢအပာ်လီၤန့ၢ်ပှၤ တၢ်သိၣ်တၢ်သီ. ဒ်သိး ပတၢ်အဲၣ် တၢ်တီတၢ်လိၤ ကအါထီၣ်အဂီၢ် ပကဘၣ် အဲၣ်ပှၤလၢအပာ်လီၤန့ၢ်ပှၤ တၢ်သိၣ်တၢ်သီ ဘၣ်ဃးဒီး တၢ်အဘၣ်ဒီးတၢ်အကမၣ်. ပတၢ်အဲၣ် ယဟိဝၤယွၤမ့ၢ်အါထီၣ်န့ၣ် ပကအဲၣ်ဒိး ဂုာ်ကျဲးစၢးအါထီၣ် လၢပကမၤထွဲ အတၢ်သိၣ်တၢ်သီအဂီၢ်. အဒိ နီၢ်အံၣ်အုဒီးစီၤအၤဒၣ် မ့ၢ်အဲၣ်ယဟိဝၤယွၤန့ၣ် အဝဲသ့ၣ် ကမၤထွဲဝဲ အတၢ်သိၣ်တၢ်သီထီဘိ.—၁ မိၤၡ့ ၃:၁-၆, ၁၆-၁၉.
၁၀. ဒ်သိး စီၤအၤဘြၤဟၣ် ကသ့ၣ်ညါအါထီၣ် ယဟိဝၤယွၤ အတၢ်ဆိကမိၣ်အဂီၢ် အမၤဝဲဒ်လဲၣ်.
၁၀ ပတအဲၣ်ဒိး မၤဘၣ်တၢ်ကမၣ် ဒ်သိးဒီး နီၢ်အံၣ်အု ဒီးစီၤအၤဒၣ်ဘၣ်. ပမ့ၢ်မၤလိအါထီၣ် ယဟိဝၤယွၤအဂ့ၢ် ဒီးဘၣ်သူၣ်ဘၣ်သး အတၢ်ဂ့ၤတၢ်ဝါတဖၣ် ဒီးဆိကမိၣ်တၢ် ဒ်သိးဒီးအီၤန့ၣ် ကမၤစၢၤပှၤဒ်သိး ပတမၤကမၣ် အတၢ်သိၣ်တၢ်သီတဂ့ၤအဂီၢ် ဒီးပတၢ်အဲၣ် ယဟိဝၤယွၤ ကအါထီၣ်. ပကဆိကမိၣ်ကွၢ် စီၤအၤဘြၤဟၣ် အဒိအတဲာ်. စီၤအၤဘြၤဟၣ်န့ၣ် အဲၣ်ယဟိဝၤယွၤနီၢ်ကီၢ်. အဝဲမ့ၢ်တနၢ်ပၢၢ် ယဟိဝၤယွၤ အတၢ်ဆၢတဲာ်နာ်က့ အတထီဒါ ယဟိဝၤယွၤဘၣ်. ဒီးအဝဲဃုသ့ၣ်ညါအါထီၣ် ယဟိဝၤယွၤအဂ့ၢ်. အဒိ ဖဲစီၤအၤဘြၤဟၣ် သ့ၣ်ညါဝဲလၢ “ဟီၣ်ခိၣ်ဒီဘ့ၣ်ညါ အပှၤစံၣ်ညီၣ်ကွီၢ်” ကမၤဟးဂီၤ ဝ့ၢ်စဒိၣ် ဒီးဂမိရၤအခါ အဘၣ်ယိၣ်ဝဲလၢ ပှၤတီပှၤလိၤတဖၣ် ကဘၣ်တၢ်မၤဟးဂီၤဃုာ်ဘၣ်ဖုးအီၤဒီး ပှၤအၢပှၤသီ. စီၤအၤဘြၤဟၣ် သ့ၣ်ညါဝဲလၢ တမ့ၢ်လၢ ယဟိဝၤယွၤ ကမၤဝဲဒ်န့ၣ်ဘၣ်အဃိ လၢတၢ်ဆီၣ်လီၤသးအပူၤ အသံကွၢ် ယဟိဝၤယွၤ တဘျီဝံၤတဘျီ. ဒီးယဟိဝၤယွၤ တဲဆၢအီၤလၢ တၢ်သူၣ်စူၤသးစူၤအပူၤအဃိ အသ့ၣ်ညါထီၣ်ဝဲလၢ ယဟိဝၤယွၤန့ၣ် အကွၢ်ဝဲပှၤသး ဒီးအတစံၣ်ညီၣ်ဝဲ ပှၤတီပှၤလိၤဃုာ်ဒီး ပှၤအၢပှၤသီ နီတဘျီဘၣ်.—၁ မိၤၡ့ ၁၈:၂၀-၃၂.
၁၁. စီၤအၤဘြၤဟၣ် ပာ်ဖျါထီၣ်ဝဲလၢ အအဲၣ်ယဟိဝၤယွၤ ဒီးအနာ်န့ၢ် ယဟိဝၤယွၤဒ်လဲၣ်.
၁၁ ဘၣ်ဃးဒီး ဝ့ၢ်စဒိၣ်ဒီး ဂမိရၤအဂ့ၢ်န့ၣ် စီၤအၤဘြၤဟၣ် တဲသကီးတၢ်ဒီး ယဟိဝၤယွၤအဃိ အကဲဘျုးလၢအဂီၢ်ဒိၣ်မး. ဖဲအဝဲ တဲသကီးတၢ်ဒီး ယဟိဝၤယွၤ ဝံၤအလီၢ်ခံ အတၢ်အဲၣ် ဒီးတၢ်ပာ်ကဲယဟိဝၤယွၤ ဟဲဒိၣ်ထီၣ်ဝဲ သပှၢ်ကတၢၢ်. ဒီးလၢခံန့ၣ် စီၤအၤဘြၤဟၣ် အတၢ်နာ် ဘၣ်တၢ်မၤကွၢ်အီၤ ဖးဒိၣ်. ယဟိဝၤယွၤ မၢအဟ့ၣ်လုၢ်ထီၣ် အဖိခွါထဲတဂၤ စီၤအံၤစဲး. ဘၣ်ဆၣ် စီၤအၤဘြၤဟၣ် သ့ၣ်ညါယဟိဝၤယွၤ ဂ့ၤဂ့ၤလံအဃိ တဘျီညါအံၤန့ၣ် အဝဲတတဲအါတၢ်လၢၤဘၣ်. အမၤဝဲဒ် ယဟိဝၤယွၤ မၢအီၤအသိး. အဃိ ထံၣ်တမှံကွၢ်လၢ ဖဲစီၤအၤဘြၤဟၣ် ကတဲာ်ကတီၤထီၣ်ဝဲလၢ ကလုၢ်ထီၣ်အဖိခွါအခါ အသးကဘၣ်ဒိထဲလဲၣ်. ဘၣ်ဆၣ် ဖဲန့ၣ်အခါ အကဆိကမိၣ်ထံဝဲ ယဟိဝၤယွၤအဂ့ၢ်လၢ အသ့ၣ်ညါပာ်စၢၤဝဲတဖၣ်. အသ့ၣ်ညါပာ်စၢၤဝဲလၢ ယဟိဝၤယွၤန့ၣ် တမၤတၢ်တတီတလိၤ ဒီးတမၤတၢ်အၢအၢသီသီ နီတဘျီဘၣ်. တၢ်မၢဖိပီလူး ပာ်ဖျါထီၣ်ဝဲလၢ စီၤအၤဘြၤဟၣ် သ့ၣ်ညါဝဲလၢ ယဟိဝၤယွၤ မၤသမူထီၣ်က့ၤ အဖိခွါ စီၤအံၤစဲးသ့. (ဧ့ၤဘြံၤ ၁၁:၁၇-၁၉) စီၤအၤဘြၤဟၣ် သ့ၣ်ညါဝဲလၢ ယဟိဝၤယွၤ အၢၣ်လီၤဝဲလၢ စီၤအံၤစဲး ကကဲထီၣ် ပှၤတကလုာ်အပၢ်. သနာ်က့ ဖဲန့ၣ်အခါ စီၤအံၤစဲးအဖိတအိၣ်ဒံးဘၣ်. တၢ်လၢယဟိဝၤယွၤမၢ စီၤအၤဘြၤဟၣ်န့ၣ်အကီဝဲ ဘၣ်ဆၣ် စီၤအၤဘြၤဟၣ် အဲၣ်ယဟိဝၤယွၤ ဒီးနာ်ဝဲလၢ ယဟိဝၤယွၤ ကမၤတၢ်တီတၢ်လိၤထီဘိအဃိ မ့ၢ်ကီလၢအဂီၢ်နာ်က့ အမၤဝဲ.—၁ မိၤၡ့ ၂၂:၁-၁၂.
၁၂. ပကွၢ်လိ စီၤအၤဘြၤဟၣ် ကသ့ဒ်လဲၣ်. (စံးထီၣ်ပတြၢၤ ၇၃:၂၈)
၁၂ ပကွၢ်လိ စီၤအၤဘြၤဟၣ် ကသ့ဒ်လဲၣ်. ပကဘၣ်ဆဲး ဃုသ့ၣ်ညါ အါထီၣ် ယဟိဝၤယွၤအဂ့ၢ် ဒ်သိးဒီး စီၤအၤဘြၤဟၣ်. ပမ့ၢ်မၤဒ်န့ၣ်န့ၣ် ပကဘူးဒိၣ်ထီၣ်ဒီး ယဟိဝၤယွၤ ဒီးပတၢ်အဲၣ်အီၤ ကအါထီၣ်. (ဖး စံးထီၣ်ပတြၢၤ ၇၃:၂၈.) ဒီးပတၢ်ဆိကမိၣ် ကလီၤဂာ်ထီၣ်ဒီး ယဟိဝၤယွၤ. (ဧ့ၤဘြံၤ ၅:၁၄) အဃိ ပှၤမ့ၢ်မၢပမၤ တၢ်လၢအကမၣ်နာ်က့ တမ့ၢ်လၢ ပကမၤအီၤဘၣ်. ဒီးပကဟးဆှဲး တၢ်ကိးမံၤဒဲးလၢ အကမၤဘၣ်ဒိ ကစၢ်ယွၤအသး ဒီးအကမၤဘၣ်ဒိ ပတၢ်ရ့လိာ်သးဒီးအီၤ. ပကဆဲးတဲသကီး တၢ်ဂ့ၢ်အဂၤတခါ လၢကမၤစၢၤပှၤ ဒ်သိးပကအဲၣ်တၢ်တီတၢ်လိၤ.
၁၃. ဒ်သိး ပတၢ်အဲၣ်တၢ်တီတၢ်လိၤ ကအါထီၣ်အဂီၢ် ပကဘၣ်မၤဒ်လဲၣ်. (ကတိၤဒိ ၁၅:၉)
၁၃ ခံ, ဂုာ်ကျဲးစၢးမၤအါထီၣ် နတၢ်အဲၣ်တၢ်တီတၢ်လိၤကိးနံၤဒဲး. ပတၢ်အဲၣ်ယဟိဝၤယွၤ အတၢ်သိၣ်တၢ်သီ ဘၣ်ဃးဒီး တၢ်တီတၢ်လိၤ ကအါထီၣ်အဂီၢ် ပကဘၣ်မၤဒ်လဲၣ်. အဒိ ပမ့ၢ်အဲၣ်ဒိးလၢ ပဖံးပညၣ် ကဆှိၣ်ထီၣ်အဂီၢ်န့ၣ် ပကဘၣ်မၤ နီၢ်ခိ အတၢ်ဟူးတၢ်ဂဲၤထီဘိ. ဒ်န့ၣ်အသိး ပမ့ၢ်အဲၣ်ဒိးလၢ ပတၢ်အဲၣ် ယဟိဝၤယွၤ အတၢ်သိၣ်တၢ်သီ ကအါထီၣ်န့ၣ် ပကဘၣ်ဂုာ်ကျဲးစၢးထဲးဂံၢ်ထဲးဘါ ကိးနံၤဒဲး. ဒီးပကမၤအီၤအဂီၢ်န့ၣ် တကီတလၢဘၣ်. ယဟိဝၤယွၤန့ၣ် နၢ်ပၢၢ်စၢၤပှၤ ဒီးအတမုၢ်လၢ်တၢ်လၢပအိၣ် အါန့ၢ်ဒံး တၢ်လၢပမၤအီၤသ့န့ၣ်ဘၣ်. (စံးထီၣ်ပတြၢၤ ၁၀၃:၁၄) ဒီးကစၢ်ယွၤ “အဲၣ်ဝဲ” “ပှၤလၢအလူၤ တၢ်တီတၢ်လိၤ.” (ဖး ကတိၤဒိ ၁၅:၉.) ဒ်သိးပကတုၤထီၣ်ထီၣ်ဘးလၢ ပဖီတၢၣ်လၢ ကစၢ်ယွၤ အတၢ်မၤအဂီၢ်န့ၣ် ပကဘၣ်ထဲးဂံၢ်ထဲးဘါ ဒီးဆဲးဂုာ်ကျဲးစၢး တုၤလၢ ပလဲၤတုၤလၢ ပဖီတၢၣ်. ဒ်န့ၣ်အသိး ပမ့ၢ်အဲၣ်ဒိးလၢ ပတၢ်အဲၣ်တၢ်တီတၢ်လိၤ ကအါထီၣ်အဂီၢ်န့ၣ် ပကဘၣ်မၤဒ်န့ၣ်. ဒီးယဟိဝၤယွၤစ့ၢ်ကီး ကမၤစၢၤပှၤ ဒ်သိးပတၢ်အဲၣ်တၢ်တီတၢ်လိၤ ကအါထီၣ် ကယီကယီ.—စံးထီၣ်ပတြၢၤ ၈၄:၅, ၇.
၁၄. “တၢ်တီတၢ်လိၤ အသဃိး” န့ၣ်အကဲမနုၤလဲၣ် ဒီးဘၣ်မနုၤအဃိ ပလိၣ်ဘၣ်အီၤလဲၣ်.
၁၄ ယဟိဝၤယွၤ တဲဘၣ်ပှၤလၢ ပကမၤတၢ်တီတၢ်လိၤအဂီၢ်န့ၣ် တမ့ၢ်တၢ်ဝံဃၢလၢပဂီၢ်ဘၣ်. (၁ ယိၤဟၣ် ၅:၃) တကးဒံးဘၣ် တၢ်တီတၢ်လိၤန့ၣ် အကဲတၢ်ဒီသဒၢလၢပဂီၢ် ဒီးပလိၣ်ဘၣ် တၢ်ဒီသဒၢတခါအံၤ ကိးနံၤဒဲး. ပကဆိကမိၣ်ကွၢ် နီၢ်သးအတၢ်စုကဝဲၤလၢ စီၤပီလူးတဲဝဲ. (အ့းဖ့းစူး ၆:၁၄-၁၈) တၢ်စုကဝဲၤလၢ အဒီသဒၢ ပှၤသုးဖိအသးန့ၣ် အကဲမနုၤလဲၣ်. အကဲဝဲ “တၢ်တီတၢ်လိၤ အသဃိး.” ဒီးသဃိးန့ၣ် အဲၣ်ဒိးတဲဝဲ ယဟိဝၤယွၤ အတၢ်သိၣ်တၢ်သီလၢ အတီအလိၤ. တၢ်လၢသဃိးန့ၣ်ဒီသဒၢဝဲ ပှၤသုးဖိတဂၤ အသး. ဒ်န့ၣ်အသိး ယဟိဝၤယွၤ အတၢ်သိၣ်တၢ်သီလၢ အတီအလိၤန့ၣ် ကဒီသဒၢ ပတၢ်ပာ်သး ဒီးပတၢ်ဆိကမိၣ်တဖၣ်. အဃိ အရ့ဒိၣ်လၢ ပကဘၣ်သီးထီၣ် တၢ်စုကဝဲၤခဲလၢာ် ဒီးပတဘၣ်သးပ့ၤနီၣ် သီးထီၣ် တၢ်တီတၢ်လိၤ အသဃိးဘၣ်.—ကတိၤဒိ ၄:၂၃.
၁၅. နသီးထီၣ် တၢ်တီတၢ်လိၤအသဃိး ကသ့ဒ်လဲၣ်.
၁၅ ပသီးထီၣ် တၢ်တီတၢ်လိၤ အသဃိး ကသ့ဒ်လဲၣ်. ပသီးထီၣ်အီၤသ့ခီဖျိ ဖဲပမၤတၢ်ဆၢတဲာ် တမံၤဂ့ၤတမံၤဂ့ၤအခါ ပဆိကမိၣ်ထံ ယဟိဝၤယွၤ အတၢ်သိၣ်တၢ်သီတဖၣ်. တချုးလၢ နတဲတၢ်တမံၤမံၤ, ဒိကနၣ်တၢ်သးဝံၣ်, ကွၢ်တၢ်တမံၤမံၤ မ့တမ့ၢ် ဖးလံာ်တဘ့ၣ်ဘ့ၣ်အခါ သံကွၢ်လီၤနသးလၢ ‘ယမ့ၢ်မၤတၢ်မၤသ့ၣ်တဖၣ်အံၤန့ၣ် တၢ်မနုၤ ကနုာ်လီၤလၢယသးပူၤလဲၣ်. တၢ်လၢယတဲအီၤ, ဒိကနၣ်အီၤ, ကွၢ်အီၤ ဒီးဖးအီၤတဖၣ်န့ၣ် မ့ၢ်ယဟိဝၤယွၤ ကဘၣ်သူၣ်ဘၣ်သးဝဲဧါ, တၢ်သ့ၣ်တဖၣ်အံၤ ကဒုးဆိကမိၣ်ယၤ တၢ်မၤကမၣ်မုၣ်ကမၣ်ခွါ, တၢ်မၤအၢမၤသီ, တၢ်သူၣ်လီသးကွံ, တၢ်အဲၣ်လီၤထဲသး ဒီးတၢ်လၢယဟိဝၤယွၤ ထံၣ်ဝဲဒ် အကဲတၢ်တတီတလိၤဘၣ်တဖၣ်န့ၣ်ဧါ.’ (ဖံလံးပံၤ ၄:၈) နမ့ၢ်ဆၢတဲာ်တၢ် ဒ်အဘၣ်ယဟိဝၤယွၤအသးအသိးန့ၣ် ကလီၤဂာ်ဒ်နဟ့ၣ်အခွဲး လၢယဟိဝၤယွၤ အတၢ်သိၣ်တၢ်သီလၢအတီအလိၤ ကဒီသဒၢနသး.
၁၆-၁၇. ပအိၣ်မူဒ် ယဟိဝၤယွၤ အတၢ်သိၣ်တၢ်သီအသိး သ့ဝဲထီဘိန့ၣ် ယၡါယၤ ၄၈:၁၈ ဒုးသ့ၣ်ညါပှၤဒ်လဲၣ်.
၁၆ မ့ၢ်နဘၣ်ယိၣ်တၢ်လၢ မုၢ်ကအိၣ်ဝဲတနံၤန့ၣ် နမၤထွဲဒ် ယဟိဝၤယွၤ အတၢ်သိၣ်တၢ်သီလၢ အတီအလိၤ တန့ၢ်လၢၤဘၣ်န့ၣ် အိၣ်တဘျီဘျီဧါ. နမ့ၢ်ဘၣ်ယိၣ်ဒ်န့ၣ်န့ၣ် ဆိကမိၣ်ကွၢ် ယဟိဝၤယွၤ ဟ့ၣ်တၢ်အဒိဖဲ ယၡါယၤ ၄၈:၁၈. (ဖး.) ဖဲန့ၣ်ယဟိဝၤယွၤ တဲဝဲလၢ ပတၢ်တီတၢ်လိၤန့ၣ် “ကမၤအသးဒ်သိးဒီး ပီၣ်လဲၣ် အလပီတဖၣ်.” ထံၣ်တမှံကွၢ်လၢ နအိၣ်လၢပီၣ်လဲၣ်ကၢၢ်နံၤ ဒီးနကွၢ် ပီၣ်လဲၣ်အလပီတဖၣ် ဟဲထီၣ်ဝံၤဟဲထီၣ်က့ၤ ဒီးအတကတၢၢ်နီတဘျီလၢၤဘၣ်. ဖဲန့ၣ်န့ၣ် တမ့ၢ်လၢ နကဆိကမိၣ်ဘၣ်လၢ လပီတဖၣ်အံၤ တဟဲထီၣ်လၢၤဘၣ်န့ၣ်ဘၣ်. နသ့ၣ်ညါလၢ ပီၣ်လဲၣ်အလပီတဖၣ်န့ၣ် ဟဲထီၣ်ဝံၤဟဲထီၣ်က့ၤ အိၣ်လၢအနံၣ်လၢ အကထိလံ ဒီးကဆဲးဟဲဝဲဒံး.
၁၇ နမ့ၢ်အဲၣ်ဒိးလၢ နတၢ်တီတၢ်လိၤ ကလီၤဂာ်ဒ် ပီၣ်လဲၣ်အလပီတဖၣ်အသိးန့ၣ် နကဘၣ်မၤဒ်လဲၣ်. တချုးလၢ နကဆၢတဲာ်တၢ်ဒံးဘၣ်န့ၣ် ဆိကမိၣ်ထံ ဘၣ်ဃးဒီး ယဟိဝၤယွၤအဲၣ်ဒိးလၢ နမၤဒ်လဲၣ်. ဝံၤဒီး မၤထွဲအီၤ. တၢ်လၢနကဘၣ်ဆၢတဲာ်အီၤန့ၣ် အမ့မ့ၢ် တၢ်ဂ့ၢ်လၢ အကီထဲလဲၣ်ဂ့ၤထဲလဲၣ်ဂ့ၤ ကစၢ်ယွၤလၢအအိၣ်ဒီး တၢ်အဲၣ်တၢ်ကွံတဂၤန့ၣ် အကဆဲးဟ့ၣ်နၤ တၢ်ဂံၢ်တၢ်ဘါ ဒီးကမၤစၢၤနၤ ဒ်သိး နဆဲးမၤတၢ်လၢအဘၣ်ကိးနံၤဒဲး ကသ့အဂီၢ်.—ယၡါယၤ ၄၀:၂၉-၃၁.
၁၈. ဘၣ်မနုၤအဃိ ပတဘၣ်စံၣ်ညီၣ်ပှၤဂၤ ဒ်ပတၢ်ထံၣ်အိၣ်ဝဲအသိးဘၣ်လဲၣ်.
၁၈ သၢ, သ့ၣ်နီၣ်ထီၣ်လၢ ပှၤလၢအကဘၣ်စံၣ်ညီၣ်တၢ်န့ၣ် မ့ၢ်ယဟိဝၤယွၤ. ပမ့ၢ်ကဲပှၤလၢအအိၣ်မူဒ် ယဟိဝၤယွၤ အတၢ်သိၣ်တၢ်သီ လၢအတီအလိၤလံနာ်က့ ပတဘၣ်စံၣ်ညီၣ်ပှၤဂၤဘၣ် ဒီးပတဘၣ် ပာ်တီပာ်လိၤပသးဘၣ်. ပမ့ၢ်ထံၣ်ဆံးပှၤဂၤ ဒီးစံၣ်ညီၣ်ပှၤဂၤ ဒ်ပတၢ်ထံၣ်အိၣ်ဝဲအသိးန့ၣ် ပကဘၣ်သ့ၣ်နီၣ်ထီၣ်လၢ ထဲဒၣ်ယဟိဝၤယွၤန့ၣ် မ့ၢ်ဝဲ “ဟီၣ်ခိၣ်ဒီဘ့ၣ်ညါ အပှၤစံၣ်ညီၣ်ကွီၢ်.” (၁ မိၤၡ့ ၁၈:၂၅) ယဟိဝၤယွၤ တဟ့ၣ်အခွဲးလၢ ပကစံၣ်ညီၣ်ပှၤဂၤဘၣ်. ယ့ၣ်ၡူးတဲဝဲလၢ “ဒ်သိး သုတဘၣ် တၢ်စံၣ်ညီၣ်တဂ့ၤအဂီၢ် တဘၣ်စံၣ်ညီၣ် ပှၤဂၤလၢၤတဂ့ၤ.”—မးသဲ ၇:၁. b
၁၉. စီၤယိၤသး နာ်န့ၢ်ယဟိဝၤယွၤ အတၢ်စံၣ်ညီၣ်န့ၣ် ပာ်ဖျါထီၣ်ဝဲဒ်လဲၣ်.
၁၉ ခဲအံၤပကကွၢ်ကဒီး စီၤယိၤသးလၢ အကဲပှၤတီပှၤလိၤတဂၤအဂ့ၢ်. ပှၤမၤအီၤ အၢအၢသီသီဘၣ်ဆၣ် အဝဲတစံၣ်ညီၣ်ပှၤဂၤဘၣ်. အဒီပုၢ်ဝဲၢ်ခွါတဖၣ် မၤနၢၤအီၣ်ဃီၣ်အီၤ, ဆါလီၤကွံာ်အီၤလၢ ကုၢ်အလီၢ် ဒီးက့ၤတဲဘၣ်အပါလၢ အဝဲသံလံ. ဘၣ်ဆၣ် ပူၤကွံာ်အနံၣ်တဖၣ် ဝံၤအလီၢ်ခံ စီၤယိၤသး က့ၤထံၣ်လိာ်ဘၣ်အသး ဒီးအဟံၣ်ဖိဃီဖိ. တဘျီအံၤန့ၣ် စီၤယိၤသး အိၣ်ဒီးတၢ်စိတၢ်ကမီၤလံအဃိ အဝဲမ့ၢ်စံၣ်ညီၣ် အဒီပုၢ်ဝဲၢ်ခွါတဖၣ် ဆူၣ်ဆူၣ် ဒီးဟ့ၣ်ကၣ်အဝဲသ့ၣ်န့ၣ်သ့. ဖဲန့ၣ်အဆၢကတီၢ် စီၤယိၤသးအဒီပုၢ်ဝဲၢ်ခွါတဖၣ်န့ၣ် ပီၢ်ယၢ်လီၤအသးလံနာ်က့ ဘၣ်ယိၣ်ဝဲလၢ စီၤယိၤသး ကစံၣ်ညီၣ် အဝဲသ့ၣ်ဆူၣ်ဆူၣ် ဒီးဟ့ၣ်ကၣ်အဝဲသ့ၣ်. ဘၣ်ဆၣ် စီၤယိၤသး မၤမုာ်ထီၣ် အဒီပုၢ်ဝဲၢ်ခွါတဖၣ်အသး ဒီးတဲဝဲလၢ “ပျံၤတၢ်တဂ့ၤ. မ့ၢ်ယအိၣ်လၢ ကစၢ်ယွၤအလီၢ်ဧါ.” (၁ မိၤၡ့ ၃၇:၁၈-၂၀, ၂၇, ၂၈, ၃၁-၃၅; ၅၀:၁၅-၂၁) အဃိ ပသ့ၣ်ညါဘၣ်လၢ စီၤယိၤသး အိၣ်ဒီးတၢ်ဆီၣ်လီၤသး ဒီးအသ့ၣ်ညါဝဲလၢ ပှၤလၢအကဘၣ်စံၣ်ညီၣ်တၢ်န့ၣ် မ့ၢ်ယဟိဝၤယွၤ.
၂၀-၂၁. ပဟးဆှဲး တၢ်ပာ်တီပာ်လိၤသး ကသ့ဒ်လဲၣ်.
၂၀ ဒ်စီၤယိၤသးအသိး ပကဘၣ်ပျဲလၢ ယဟိဝၤယွၤစံၣ်ညီၣ်တၢ်. အဒိ ဖဲပဒီပုၢ်ဝဲၢ်တဖၣ် မၤတၢ်တမံၤမံၤအခါ အတၢ်ပာ်သူၣ်ပာ်သး အိၣ်ဒ်လဲၣ်န့ၣ် ပတဘၣ်စံၣ်ညီၣ် အဝဲသ့ၣ်ဘၣ်. ပတထံၣ် တၢ်အိၣ်လၢပှၤသးပူၤဘၣ်, ထဲဒၣ် ယဟိဝၤယွၤတဂၤန့ၣ် “သမံသမိးဝဲ ပှၤတၢ်ပာ်သူၣ်ပာ်သး.” (ကတိၤဒိ ၁၆:၂) ကစၢ်ယွၤ အဲၣ်ပှၤကိးကလုာ်, ကိးဒူၣ်ဒဲး ဒီးအဝဲဟ့ၣ်ဂံၢ်ဟ့ၣ်ဘါပှၤလၢပက “အိးထီၣ်[ပ]သးလဲၢ်လဲၢ်.” (၂ ကရံၣ်သူး ၆:၁၃) အဃိ ပအဲၣ်ပဒီပုၢ်ဝဲၢ်မုၣ်ခွါကိးဂၤဒဲး ဒီးပတစံၣ်ညီၣ် အဝဲသ့ၣ်ဘၣ်.
၂၁ တကးဒံးဘၣ် ပတအဲၣ်ဒိးစံၣ်ညီၣ် ပှၤတၢ်ချၢတဖၣ် စ့ၢ်ကီးဘၣ်. (၁ တံၤမသ့း ၂:၃, ၄) မ့ၢ်နကစံၣ်ညီၣ် နဘူးနတံၢ်လၢ အတၢ်စူၢ်တၢ်နာ် တဒ်သိးဒီးနၤဘၣ်တဂၤ ဒီးတဲလၢ “ပှၤတဂၤအံၤ တမ့ၢ်လၢအကဟဲနုာ်လီၤလၢ တၢ်မ့ၢ်တၢ်တီပူၤ နီတဘျီဘၣ်” န့ၣ်ဧါ. နမ့ၢ်စံၣ်ညီၣ်အီၤဒ်န့ၣ်န့ၣ် ကလီၤဂာ်ဒ်သိး နပာ်ထီၣ်ထီသး ဒီးနပာ်တီပာ်လိၤနသး. ပကဘၣ်နီၣ်ဘၣ်လၢ “ပှၤခဲလၢာ်လၢ အအိၣ်လၢ တၢ်လီၢ်ကိးတီၤဒဲး” န့ၣ်ယဟိဝၤယွၤ ဟ့ၣ်ဒံးအဝဲသ့ၣ် တၢ်ခွဲးတၢ်ယာ် လၢကပီၢ်ယၢ်လီၤသး. (မၤတၢ် ၁၇:၃၀) ဒီးပကဘၣ်နီၣ်ဘၣ်လၢ ပှၤလၢအပာ်တီပာ်လိၤအသးန့ၣ် ယဟိဝၤယွၤ ထံၣ်ဝဲလၢ အကဲပှၤတတီတလိၤဘၣ်.
၂၂. ဘၣ်မနုၤအဃိ ပကဘၣ်မၤအါထီၣ် ပတၢ်အဲၣ် တၢ်တီတၢ်လိၤလဲၣ်.
၂၂ ပကဘၣ်မၤအါထီၣ် ပတၢ်အဲၣ်ယဟိဝၤယွၤ အတၢ်သိၣ်တၢ်သီထီဘိ. ပမ့ၢ်မၤဒ်န့ၣ်န့ၣ် ပကသးခု ဒီးကကဲထီၣ် တၢ်ဂံၢ်တၢ်ဘါလၢ ပှၤဂၤအဂီၢ် ဒီးကမၤစၢၤပှၤဂၤဒ်သိး အဝဲသ့ၣ် အတၢ်အဲၣ်ယဟိဝၤယွၤ ဒီးအဲၣ်ပှၤ ကအါထီၣ်. ဒီးပကဘၣ် “လီကီ တၢ်တီတၢ်လိၤ.” (မးသဲ ၅:၆) နဂုာ်ကျဲးစၢး မၤတၢ်လၢအဘၣ် ဒီးနဂုာ်ကျဲးစၢး လဲၤထီၣ်လဲၤထီန့ၣ် ယဟိဝၤယွၤထံၣ်ဝဲ ဒီးဘၣ်သးဝဲဒိၣ်မး. ဟီၣ်ခိၣ်တဘ့ၣ်အံၤ ပှၤလၢအမၤတၢ်တတီတလိၤတဖၣ် အါထီၣ်ဝဲ သနာ်က့ တဘၣ်သးဟးဂီၤတဂ့ၤ. သ့ၣ်နီၣ်ထီၣ်လၢ “ယဟိဝၤယွၤ အဲၣ်ပှၤတီပှၤလိၤ.”—စံးထီၣ်ပတြၢၤ ၁၄၆:၈.
တၢ်သးဝံၣ် ၁၃၉ ထံၣ်တမှံကွၢ် ဖဲတၢ်ခဲလၢာ်မ့ၢ်တၢ်အသီ
a ဟီၣ်ခိၣ်တဘ့ၣ်အံၤ အိၣ်ထဲတၢ်အၢတၢ်သီအဃိ ပှၤလၢအအဲၣ်တၢ်တီတၢ်လိၤန့ၣ် တအိၣ်အါအါလၢၤဘၣ်. ဘၣ်ဆၣ် ပှၤလၢအအဲၣ်တၢ်တီတၢ်လိၤန့ၣ် အိၣ်လၢအကကွဲၢ်ညါဒံး. နၤစ့ၢ်ကီး နကမ့ၢ်ပှၤလၢအအဲၣ်တၢ်တီတၢ်လိၤ. ယဟိဝၤယွၤန့ၣ် အအဲၣ်တၢ်တီတၢ်လိၤ ဒီးပအဲၣ်ယဟိဝၤယွၤအဃိ ပဂုာ်ကျဲးစၢး မၤတၢ်လၢအတီအလိၤ. ပမၤအါထီၣ် ပတၢ်အဲၣ်တၢ်တီတၢ်လိၤ ကသ့ဒ်လဲၣ်. လၢတၢ်မၤလိအံၤအပူၤ ပကတဲသကီး ဘၣ်ဃးဒီး တၢ်တီတၢ်လိၤန့ၣ် မ့ၢ်မနုၤလဲၣ်. ဒီးပမ့ၢ်မၤထွဲဒ် တၢ်တီတၢ်လိၤ အိၣ်ဝဲအသိးန့ၣ် ကကဲဘျုးလၢ ပတၢ်အိၣ်မူပူၤဒ်လဲၣ်. ဒီးပကတဲသကီး ဘၣ်ဃးဒီး ပတၢ်အဲၣ်တၢ်တီတၢ်လိၤ ကအါထီၣ်အဂီၢ် ပကဘၣ်မၤ တဆီဘၣ်တဆီဒ်လဲၣ်.
b တဘျီတခီၣ် တၢ်အိၣ်ဖှိၣ်သးပှၢ်တဖၣ် ကဘၣ်စံၣ်ညီၣ်တၢ် ဘၣ်ဃးဒီး ပှၤမၤတၢ်ကမၣ်ဖးဒိၣ် ဒီးတၢ်ပီၢ်ယၢ်လီၤသး. (၁ ကရံၣ်သူး ၅:၁၁; ၆:၅; ယၤကိာ် ၅:၁၄, ၁၅) ဘၣ်ဆၣ် အဝဲသ့ၣ် အိၣ်ဒီးတၢ်ဆီၣ်လီၤသး ဒီးသ့ၣ်နီၣ်ထီၣ်ဝဲလၢ အတသ့ၣ်ညါ တၢ်အိၣ်လၢပှၤသးပူၤဘၣ် ဒီးအစံၣ်ညီၣ်န့ၢ်တၢ်လၢ ယဟိဝၤယွၤ အခၢၣ်စး. (ထိၣ်သတြီၤဒီး ၂ ကွဲးနီၣ်တၢ် ၁၉:၆.) အဝဲသ့ၣ် ကွၢ်လိယဟိဝၤယွၤအဃိ တစံၣ်ညီၣ်တၢ် ဆူၣ်တလၢဘၣ်, အဝဲသ့ၣ် အိၣ်ဒီးတၢ်သးကညီၤ ဒီးစံၣ်ညီၣ်တၢ် တီတီလိၤလိၤ.