• “ယတူၢ်ဘၣ်လၢ ယဝၤမၤကမၣ်မုၣ်ကမၣ်ခွါ တလီၢ်လီၢ်.”

• “ယတူၢ်ဘၣ်လၢ ယလုၢ်ယပှ့ၤတအိၣ်ဘၣ်, ယလာ်အၢ ဒီးယမဲာ်ဆှးညါ.”

• “ယတဲဘၣ်ပှၤဂၤလၢတၢ်ဂ့ၢ်အံၤ တဘူၣ်ဘၣ်​ အဃိ ယဘၣ်တူၢ်တၢ်ကစုဒုထဲတဂၤလီၤ.”

• “ယတူၢ်ဘၣ်လၢ ယဟိဝၤယွၤ တသးအိၣ်ယၤဘၣ်.”

တၢ်ကတိၤတဖၣ်အံၤ ပာ်ဖျါထီၣ်ဝဲလၢ ဖဲဝၤတဂၤကွၢ်တၢ်ဂီၤဘ့ၣ်ဆ့အခါ အမါကတူၢ်ဘၣ်တၢ်နးဒိၣ်မး. ဒီးအဝၤမ့ၢ်ကွၢ်ခူသူၣ်တၢ်ဂီၤဘ့ၣ်ဆ့ မ့ၢ်ယံာ်လၢ အလါ မ့တမ့ၢ် လၢအနံၣ်န့ၣ်​ အမါကတူၢ်ဘၣ်လၢ အနာ်န့ၢ်အဝၤ တသ့နီတစဲးလၢၤဘၣ်. မါတဂၤတဲဝဲလၢ “ယဆိမိၣ်လီၤသးလၢ ‘ယဝၤကဲပှၤဒ်လဲၣ်န့ၣ်​ ယတသ့ၣ်ညါအီၤလၢၤဘၣ်. တၢ်အဂၤလၢ အမၤခူသူၣ်ဝဲလၢ ယတသ့ၣ်ညါဘၣ်န့ၣ်​ အအိၣ်ဒံးဧါ.’”

တၢ်ဂ့ၢ်တခါအံၤ ပှၤကတဲာ်ကတီၤဝဲ လီၤလီၤဆီဆီလၢ မါလၢအဝၤကွၢ်ဝဲ တၢ်ဂီၤဘ့ၣ်ဆ့ အဂီၢ်. a တၢ်ဂ့ၢ်တခါအံၤ ကပာ်ဖျါထီၣ်​ လံာ်စီဆှံ အတၢ်ဟံးစုနဲၣ်ကျဲလၢ ကမၤမုာ်ထီၣ်​ မါတဂၤအံၤအသး ဒီးဒုးနာ်န့ၢ်အီၤလၢ ယဟိဝၤယွၤအဲၣ်အီၤ ဒီးဘၣ်သးမၤစၢၤအီၤ. တကးဒံးဘၣ်​ တၢ်ဂ့ၢ်တခါအံၤ ကမၤစၢၤအီၤလၢ အကပာ်သးမုာ်မုာ် ဒီးဆဲးအိၣ်ဒီး တၢ်ရ့လိာ်သးဒီးယဟိဝၤယွၤ လၢအဂ့ၤ. b

တၢ်လၢနဝၤ မၤဝဲန့ၣ်​ နတြီအီၤတသ့ခဲလၢာ်ဘၣ်. ဘၣ်ဆၣ်​ ဒ်သိးနတတူၢ်ဘၣ်တၢ်နးနးတဂ့ၤ ဒီးပာ်နသးမုာ်မုာ် ကန့ၢ်အဂီၢ် တၢ်လၢနမၤအီၤသ့န့ၣ်​ အိၣ်ဝဲ. ပကကွၢ်သကိး တၢ်ဂ့ၢ်တနီၤ.

တဘၣ်ပာ်တၢ်ကမၣ်လၢ နနီၢ်ကစၢ်အလိၤတဂ့ၤ. အဒိ ဒီပုၢ်ဝဲၢ်မုၣ်အဲလဲး c တူၢ်ဘၣ်ဝဲလၢ အဒိၣ်တၢ်တဂ့ၤလၢ အဝၤအဂီၢ်ဘၣ်. တကးဒံးဘၣ်​ အတဲဝဲလၢ ‘ယအိၣ်လံသနာ်က့ ဘၣ်မနုၤအဃိ ယဝၤဟးကွၢ်ဒံး ပှၤပိာ်မုၣ်အဂၤလဲၣ်.’ ဘၣ်သ့ၣ်သ့ၣ်​ မါတနီၤ ကတူၢ်ဘၣ်ဝဲလၢ အဝၤကွၢ်တၢ်ဂီၤဘ့ၣ်ဆ့န့ၣ်​ ကဲဝဲမါအတၢ်ကမၣ်​ ဒီးမါတဖၣ်အံၤ ပာ်တၢ်ကမၣ်လၢ အနီၢ်ကစၢ်အလိၤ. ဒီပုၢ်ဝဲၢ်မုၣ်ဒဲၤနံၤယဲ တဲဝဲလၢ “ခီဖျိလၢ ယသးဘၣ်တံာ်တာ်ဒီး သးဒိၣ်ထီၣ်တၢ်အဃိ ယတူၢ်ဘၣ်လၢ ယမၤဟးဂီၤ ယတၢ်ဆီဟံၣ်ဆီဃီ.”

နတၢ်တူၢ်ဘၣ်မ့ၢ်အိၣ်​ ဒ်န့ၣ်န့ၣ်​ သ့ၣ်ညါလၢ ယဟိဝၤယွၤ တဟံနၤအရ့ ခီဖျိတၢ်လၢ နဝၤမၤဝဲအဃိဘၣ်. ယၤကိာ် ၁:၁၄ တဲဝဲလၢ “ပှၤတဂၤစုာ်စုာ်န့ၣ်​ ဘၣ်တၢ်မၤကွၢ်အီၤခီဖျိလၢ အနီၢ်ကစၢ် အတၢ်သူၣ်လီသးကွံ  ကွဲန့ၢ်လွဲန့ၢ်အီၤ ဒီးလ့ပစီအီၤအဃိ.” (ရိ ၁၄:၁၂; ဖံလံး ၂:၁၂) ယဟိဝၤယွၤ ပာ်လုၢ်ပာ်ပှ့ၤ နတၢ်သးတီဒီးအီၤ ဒီးအတပာ်တၢ်ကမၣ်​ လၢနလိၤဘၣ်.—၂ ကွဲး ၁၆:၉.

မါတဂၤလၢ အဝၤကွၢ်တၢ်ဂီၤဘ့ၣ်ဆ့န့ၣ်​ ဘၣ်သ့ၣ်သ့ၣ်​ အကတူၢ်ဘၣ်လၢ အဝၤကွၢ်တၢ်ဂီၤဘ့ၣ်ဆ့န့ၣ်​ ခီဖျိလၢ အဒိၣ်တၢ်တဂ့ၤလၢ အဝၤအဂီၢ်ဘၣ်. ဘၣ်ဆၣ်​ နီၢ်ကီၢ်န့ၣ်​ တမ့ၢ်ဒ်န့ၣ်ဘၣ်. ပှၤကူၣ်ဘၣ်ကူၣ်သ့ တဲဝဲလၢ ပှၤလၢအကွၢ်တၢ်ဂီၤဘ့ၣ်ဆ့န့ၣ်​ အအိၣ်ဒီး တၢ်သးကွံတဖၣ်လၢ ပှၤပိာ်မုၣ်တဂၤမၣ်​ မၤလၢပှဲၤဝဲတန့ၢ်ဘၣ်.

တဘၣ်ဘၣ်ယိၣ်တၢ် အါတလၢတဂ့ၤ. ဒီပုၢ်ဝဲၢ်မုၣ်ခဲးသရ့ တဲဝဲ လၢအခိၣ်နူာ်ပူၤန့ၣ်​ အိၣ်ထဲအဝၤန့ၣ်​ ကွၢ်ဝဲတၢ်ဂီၤဘ့ၣ်ဆ့. ဒီပုၢ်ဝဲၢ်မုၣ်ဖြဲစံၤ တဲဝဲလၢ “ယမ့ၢ်တထံၣ်ယဝၤဘၣ်န့ၣ်​ ယဘၣ်ယိၣ်တၢ်လံ. ဒီးယဘၣ်ယိၣ်တၢ် ဒီတနံၤကျၢၤ.” ဒီပုၢ်ဝဲၢ်မုၣ်တနီၤ တဲဝဲလၢ အဝဲသ့ၣ်မ့ၢ်အိၣ်တပူၤဃီဒီး ဒီပုၢ်ဝဲၢ်မုၣ်ခွါလၢ အသ့ၣ်ညါ အဝၤတၢ်ကီတၢ်ခဲန့ၣ်​ အဝဲသ့ၣ်မဲာ်ဆှးဒိၣ်မး. မ့မ့ၢ်လၢ ဒီပုၢ်ဝဲၢ်မုၣ်အဂၤတနီၤန့ၣ်​ ဆိမိၣ်ဝဲလၢ ပှၤတနၢ်ပၢၢ်အဝဲသ့ၣ်​ အတၢ်အိၣ်သးဘၣ်အဃိ အတူၢ်ဘၣ်လၢ အအိၣ်ထဲတဂၤ.

နတၢ်တူၢ်ဘၣ်အိၣ်ဒ်အံၤန့ၣ်​ အတကမၣ်ဘၣ်. ဘၣ်ဆၣ်​ နမ့ၢ်ဆဲးဆိမိၣ်ထဲ တၢ်ဂ့ၢ်တဖၣ်န့ၣ်​ အိၣ်ဒၣ်​ နတၢ်ဘၣ်ယိၣ်ကအါထီၣ်လီၤ. အဃိ တဘၣ်သးစၢၢ်ဆၢထဲ တၢ်ဂ့ၢ်တဖၣ်န့ၣ်တဂ့ၤ. သးစၢၢ်ဆၢလၢ နတၢ်ရ့လိာ်သးဒီး ယဟိဝၤယွၤဟီ. နမ့ၢ်မၤဒ်န့ၣ်မၣ်​ ကမၤစၢၤနၤလၢ နကအိၣ်ဒီးတၢ်တူၢ်န့ၢ်ခီၣ်ကဲ.—စံး ၆၂:၂; အ့း ၆:၁၀.

နမ့ၢ်ဖးဒီးဆိမိၣ်ထံ တၢ်ဂ့ၢ်လၢ လံာ်စီဆှံအပူၤ ဘၣ်ဃးဒီး ပိာ်မုၣ်လၢအထံၣ်ဘၣ်ဒီး တၢ်ကီတၢ်ခဲ သနာ်က့ အဃ့ထုကဖၣ်လၢ ယဟိဝၤယွၤအအိၣ်​ ဒီးအသးမုာ်ထီၣ်က့ၤန့ၣ်​ ကကဲထီၣ်တၢ်မၤစၢၤလၢနဂီၢ်. ပထံၣ်ဘၣ်လၢ ယဟိဝၤယွၤ တမၤလီၤမၢ်န့ၢ် အဝဲသ့ၣ်တၢ်ကီတၢ်ခဲ ထီဘိဘၣ်, ဘၣ်ဆၣ်​ ယဟိဝၤယွၤ မၤမုာ်ထီၣ်က့ၤအဝဲသ့ၣ်အသး. အဒိ နီၢ်ဃးနၤန့ၣ်​ အထံၣ်ဘၣ်ဒီး တၢ်ကီတၢ်ခဲအဃိ “အသးဘၣ်ဒိဒိၣ်မး” သနာ်က့အ “ဃ့ထုကဖၣ်​ လၢယဟိဝၤယွၤအအိၣ်​ ဖးယံာ်” ဝံၤဒီး အသးမုာ်ထီၣ်က့ၤ. ပမ့ၢ်ကွၢ် နီၢ်ဃးနၤန့ၣ်​ ခါဆူညါ တၢ်ကကဲထီၣ်အသးဒီးအီၤ ဒ်လဲၣ်န့ၣ်​ အတသ့ၣ်ညါဒံးဘၣ်​ သနာ်က့ အဃ့ထုကဖၣ်​ ဝံၤအလီၢ်ခံအသးမုာ်ထီၣ်က့ၤ.—၁ မူၤ ၁:၁၀, ၁၂, ၁၈; ၂ ကရံၣ်​ ၁:၃, ၄.

ဃ့တၢ်အိၣ်ဖှိၣ်သးပှၢ်တဖၣ်​ အတၢ်မၤစၢၤ. အဝဲသ့ၣ်န့ၣ်​ လီၤဂာ် ဒ်သိးဒီး “တၢ်အိၣ်သဒၢကလံၤအလီၢ်, တၢ်ပူၤဖျဲး အလီၢ်ဖဲကလံၤမုၢ် ဟဲအခါ.” (ၡါ ၃၂:၂) ဘၣ်သ့ၣ်သ့ၣ်​ အဝဲသ့ၣ်​ ကဒုးသ့ၣ်ညါနၤဒီး ဒီပုၢ်ဝဲၢ်မုၣ်တဂၤလၢ နတဲဘၣ်အီၤ နတၢ်ခူသူၣ်ဘူၣ်​ ဒီးအကမၤမုာ်ထီၣ်နသး.—ကတိၤ ၁၇:၁၇.

ဘၣ်သ့ၣ်သ့ၣ်​ နမၤစၢၤ နဝၤလၢ အကပတုာ် ကွၢ်တၢ်ဂီၤဘ့ၣ်ဆ့သ့. အဒိ ပမ့ၢ်ဘၣ်မၤဘၣ်ဂီၢ်ထီၣ်က့ၤ တၢ်ဂ့ၢ်ကီ ဒီးပမ့ၢ်ဘၣ်မၤနၢၤက့ၤ ဒုၣ်ဒါလၢ အစိကမီၤဒိၣ်တဂၤန့ၣ်​ လံာ်စီဆှံပာ်ဖျါထီၣ်ဝဲလၢ  “ပှၤခံဂၤန့ၣ်​ ဂ့ၤဒိၣ်န့ၢ်ဒံး ပှၤတဂၤ” ဒံး. (စံၣ်​ ၄:၉-၁၂) တကးဒံးဘၣ်​ ပှၤကူၣ်ဘၣ်ကူၣ်သ့ တဲဝဲလၢ ပှၤဒီမိၢ်ဝၤခံဂၤ မ့ၢ်မၤစၢၤလိာ်သးန့ၣ်​ ညီလၢအဝၤ ကပာ်ပတုာ်ကွံာ် တၢ်ကွၢ်တၢ်ဂီၤဘ့ၣ်ဆ့ ဒီးအမါစ့ၢ်ကီး ကနာ်န့ၢ်က့ၤအီၤ.

နဝၤမ့ၢ်ကျဲးစၢးဆူၣ်ဆူၣ်​ ဒီးမ့ၢ်ပာ်လီၤသးလၢ အကပတုာ် ကွၢ်တၢ်ဂီၤဘ့ၣ်ဆ့မၣ်​ နမၤစၢၤအီၤကသ့. မ့ၢ်အဃ့ကညး ယဟိဝၤယွၤဒ်သိး အပတုာ်ကွံာ်ဝဲကန့ၢ် ဒီးဃ့တၢ်အိၣ်ဖှိၣ်သးပှၢ်တဖၣ်​ အတၢ်မၤစၢၤဧါ. (၂ ကရံၣ်​ ၄:၇; ယၤ ၅:၁၄, ၁၅) မ့ၢ်အပာ်လီၤသးလၢ အကဟးဆှဲး တၢ်ကွၢ်တၢ်ဂီၤဘ့ၣ်ဆ့ဧါ. အဒိ လၢအလီတဲစိန့ၣ်​ မ့ၢ်အပာ်ပနီၣ်ဃာ် တၢ်လၢအတဘၣ်ကွၢ်ဝဲဘၣ်ဧါ. မ့ၢ်အဟးဆှဲးတၢ်အိၣ်သးလၢ အကထံၣ်ဘၣ်​ တၢ်မၤကွၢ်ဧါ. (ကတိၤ ၂၇:၁၂) မ့ၢ်အသးအိၣ်တူၢ်လိာ် တၢ်မၤစၢၤ, ပာ်လီၤသးလၢ အကသးတီဒီးနၤ ဒီးတတဲလံၣ်နၤဘၣ်ဧါ. အမ့ၢ်မၤဒ်န့ၣ်မၣ်​ နမၤစၢၤအီၤကသ့.

နမၤစၢၤအီၤကသ့ဒ်လဲၣ်. ပကကွၢ်သကိး တၢ်လဲၤခီဖျိတခါ. ဒီပုၢ်ဝဲၢ်မုၣ်ဖံလံစံယၤန့ၣ်​ အဆီဟံၣ်ဆီဃီဒီး ဒီပုၢ်ဝဲၢ်ခွါအံသၢၤ. အံသၢၤန့ၣ်​ ဖဲအသးစၢ်အခါ အစွဲတၢ်ကွၢ်တၢ်ဂီၤဘ့ၣ်ဆ့. ဖံလံစံယၤန့ၣ်​ ဖဲအဝၤဘၣ်သး ကွၢ်တၢ်ဂီၤဘ့ၣ်ဆ့အခါ အမၤဝဲဒ်သိး အဝၤတဲတၢ်ဒီးအီၤကဘူၣ်. အံသၢၤတဲဝဲလၢ “ယတဲတၢ်ဒီး ယမါပျီပျီ. ယမါ မၤစၢၤယၤလၢ တၢ်အဲၣ်တၢ်ကွံအပူၤ ဒီးအမၤစၢၤယၤဒ်သိး ယတထံၣ်ဘၣ်ဒီး တၢ်လ့ပစီတဂ့ၤ. ဒီးထီဘိန့ၣ်​ အသံကွၢ်ယၤလၢ ယမၤသးဒ်လဲၣ်. တကးဒံးဘၣ်​ အမၤစၢၤဒ်သိး ယကသူစှၤလီၤ အ့ၤထၢၤနဲၣ်.” ခီဖျိလၢ အံသၢၤဘၣ်သး ကွၢ်တၢ်ဂီၤဘ့ၣ်ဆ့အဃိ ဖံလံစံယၤ သးဘၣ်ဒိ. ဖံလံစံယၤ တဲဝဲလၢ “ယသးဒိၣ်ထီၣ်တၢ် ဒီးယသးဘၣ်ဒိ သနာ်က့ ယဝၤကွၢ်တၢ်ဂီၤဘ့ၣ်ဆ့ဒံး. အဃိ ပတဲသကိး အတၢ်ကီတၢ်ခဲတဖၣ်​ ဝံၤဒီး ယဝၤစ့ၢ်ကီး မၤစၢၤယၤ ဒ်သိး ယကမၤလီၤမၢ်ကွံာ် ယတၢ်တူၢ်ဘၣ်တဖၣ်.”

ပှၤဒီမိၢ်ဝၤခံဂၤ မ့ၢ်တဲသကိးတၢ်ပျီပျီန့ၣ်​ ကမၤစၢၤဝဲအဝၤလၢ အကဟးဆှဲး တၢ်ကွၢ်တၢ်ဂီၤဘ့ၣ်ဆ့ တကးဒံးဘၣ်​ အမါစ့ၢ်ကီး ကနာ်န့ၢ်က့ၤအီၤ. အဝၤစ့ၢ်ကီး မ့ၢ်တဲတၢ်ဒီးအမါပျီပျီ ဒီးတဲဘၣ်အမါလၢ အတၢ်ဂံၢ်စၢ်ဘါစၢ်, အအိၣ်ဖဲလဲၣ်​ ဒီးအမၤမနုၤလဲၣ်န့ၣ်​ အမါနာ်က့ၤအီၤကညီထီၣ်.

နၤမီၤ နဆိမိၣ်​ နမၤစၢၤနဝၤ ဒ်န့ၣ်ကသ့ဧါ. မ့ၢ်သ့န့ၣ်​ ဖးဒီးတဲသကိး တၢ်ဂ့ၢ်တခါအံၤ ဒီးနဝၤဒ်သိးသိး. ဒီးနဝၤကဘၣ်ပာ်လီၤသးလၢ အကပတုာ် တၢ်ကွၢ်တၢ်ဂီၤဘ့ၣ်ဆ့ ဒီးပာ်ဖျါထီၣ်လၢ နနာ်န့ၢ်က့ၤအီၤသ့. ခီဖျိလၢ နတဲသကိးတၢ်ဂ့ၢ်အံၤဒီး နဝၤအဃိ အတဘၣ်သးထီၣ်နၤဘၣ်. နဝၤမၤဒ်အံၤန့ၣ်​ အမၤဘၣ်ဒိနၤစ့ၢ်ကီးအဃိ အကဘၣ်​ နၢ်ပၢၢ်စၢၤနတၢ်တူၢ်ဘၣ်. နဝၤကျဲးစၢးပတုာ်ကွံာ် လုၢ်လၢ်လၢအတဂ့ၤဘၣ်အဃိ နကဘၣ်ဆီၣ်ထွဲအီၤ ဒီးဟ့ၣ်အီၤ တၢ်ခွဲးတၢ်ယာ်လၢ အကပာ်ဖျါထီၣ်လၢ နနာ်န့ၢ်က့ၤအီၤသ့. တကးဒံးဘၣ်​ ဘၣ်မနုၤအဃိ ပှၤတဂၤ ဘၣ်သးကွၢ် တၢ်ဂီၤဘ့ၣ်ဆ့လဲၣ်​ ဒီးအပတုာ် လုၢ်လၢ်လၢအတဂ့ၤဘၣ်အံၤ ကသ့ဒ်လဲၣ်န့ၣ်​ သုခံဂၤလၢာ် ကဘၣ်ဃုသ့ၣ်ညါ. d

 ဖဲသုတဲသကိး တၢ်ဂ့ၢ်အံၤအခါ နမ့ၢ်ဘၣ်ယိၣ်လၢ နၤဒီးနဝၤ ကသးထီၣ်တၢ်န့ၣ်​ ဃ့တၢ်အိၣ်ဖှိၣ်သးပှၢ်လၢ သုခံဂၤလၢာ် လီၤဒုးဒီးအီၤတဂၤဂၤ အတၢ်မၤစၢၤ ဒ်သိးအကဒိကနၣ်န့ၢ်သု. နဝၤပတုာ်ကွံာ် တၢ်ကွၢ်တၢ်ဂီၤဘ့ၣ်ဆ့ မ့ၢ်န့ၢ်လံသနာ်က့ နနာ်န့ၢ်က့ၤအီၤ ကဘူၣ်အဂီၢ် နကလိၣ်ဘၣ်တၢ်ဆၢကတီၢ်. အဃိ တဘၣ်ဟ့ၣ်အၡူတဂ့ၤ. ဃုကျဲလၢ သုကမၤဂ့ၤထီၣ်က့ၤ သုတၢ်ရ့လိာ်သး. သုမ့ၢ်အိၣ်ဒီး တၢ်ဝံသးစူၤန့ၣ်​ လၢခံကယီကယီ သုတၢ်ဆီဟံၣ်ဆီဃီ ဂ့ၤထီၣ်ကဒါက့ၤသ့.—စံၣ်​ ၇:၈; ၁ ကရံၣ်​ ၁၃:၄.

နဝၤမ့ၢ်ကွၢ်ဘၣ်ကဒီး တၢ်ဂီၤဘ့ၣ်ဆ့န့ၣ်​ မ့ၢ်အကဲပှၤလၢ အတပီၢ်ယၢ်လီၤက့ၤသး ဒီးအပတုာ်ကွံာ် လုၢ်လၢ်လၢအတဂ့ၤဘၣ်​ တန့ၢ်နီတဘျီလၢၤဘၣ်ဧါ. တမ့ၢ်ဒ်န့ၣ်ဘၣ်. လီၤဆီဒၣ်တၢ် အမ့ၢ်ကဲပှၤလၢ အစွဲပာ်စၢၤ တၢ်ကွၢ်တၢ်ဂီၤဘ့ၣ်ဆ့န့ၣ်​ အကဟးဆှဲး တၢ်ကွၢ်တၢ်ဂီၤဘ့ၣ်ဆ့အဂီၢ် ကကီလၢအဂီၢ်ဖးယံာ်ညါ. အဟးဆှဲး တၢ်ကွၢ်တၢ်ဂီၤဘ့ၣ်ဆ့ မ့ၢ်န့ၢ်လၢအနံၣ်တဖၣ်လံသနာ်က့ အကွၢ်ဘၣ်ကဒါက့ၤသ့ဒံး. အဃိ ဒ်သိးတၢ်တကဲထီၣ်သး ဒ်န့ၣ်တဂ့ၤအဂီၢ် လၢအလီတဲစိပူၤန့ၣ်​ အကဘၣ်​ ပာ်ပနီၣ်ဃာ် တၢ်လၢအတဘၣ်ကွၢ်ဝဲဘၣ်​ ဒီးအကဘၣ်ဟးဆှဲး တၢ်အိၣ်သးလၢ အကထံၣ်ဘၣ်တၢ်မၤကွၢ်. (ကတိၤ ၂၈:၁၄; မး ၅:၂၉; ၁ ကရံၣ်​ ၁၀:၁၂) အကဘၣ်ဒုးအိၣ်ထီၣ်​ “တၢ်ဆိကမိၣ်​ ဒီးတၢ်ပာ်သူၣ်ပာ်သး” လၢအသီ ဒီးမၤလိထီၣ်သးလၢက “သးဟ့ တၢ်အၢ” ဒ်သိးဒီး တၢ်ကွၢ်တၢ်ဂီၤဘ့ၣ်ဆ့, တၢ်ဖူးလဲး နီၢ်ကစၢ်မုၣ်ခွါက့ၢ်ဂီၤ ဒီးလုၢ်လၢ်သကဲာ်ပဝးလၢ အတကဆှီဘၣ်တဖၣ်. (အ့း ၄:၂၃; စံး ၉၇:၁၀; ရိ ၁၂:၉) အမ့ၢ်ကျဲးစၢး မၤတၢ်သ့ၣ်တဖၣ်အံၤန့ၣ်​ လၢခံအပတုာ်ကွံာ် အလုၢ်လၢ်လၢအတဂ့ၤဘၣ်​ ကန့ၢ်ဝဲ. e

နဝၤမ့ၢ်တဘၣ်သး ပတုာ်ကွံာ် လုၢ်လၢ်လၢအတဂ့ၤဘၣ်​ တခါအံၤဟီမီၤ. နသးကဟးဂီၤ, နကသးဒိၣ်ထီၣ်တၢ် ဒီးနကတူၢ်ဘၣ်လၢ အတတီဒီးနၤဘၣ်. အဃိ ပာ်ထီၣ်နတၢ်ဘၣ်ယိၣ်လၢ ယဟိဝၤယွၤအအိၣ်​ ဒီးအကမၤမုာ်ထီၣ်နသး. (၁ ပ့း ၅:၇) ဆဲးမၤဂ့ၤထီၣ်​ နတၢ်ရ့လိာ်သးဒီး ယဟိဝၤယွၤ ဒီးဆဲးမၤ နီၢ်ကစၢ်တၢ်မၤလိလံာ်စီဆှံ, ဃ့ထုကဖၣ်​ ဒီးဆိမိၣ်ထံတၢ်ထီဘိ. နမ့ၢ်ဆဲးမၤတၢ်သ့ၣ်တဖၣ်အံၤန့ၣ်​ နကသ့ၣ်ညါလၢ ယဟိဝၤယွၤအိၣ်ဘူးဒီးနၤ. ယၡါယၤ ၅၇:၁၅ တဲဝဲလၢ ယဟိဝၤယွၤ အိၣ်စ့ၢ်ကီးဒီး “ပှၤလၢ အသူၣ်ဘၣ်ဒိသးဘၣ်ထံး ဒီးပှၤလၢ အဆီၣ်လီၤအသး” ဒီးအဘၣ်သးမၤစၢၤ အဝဲသ့ၣ်​ ဒ်သိးအသးကမုာ်ထီၣ်က့ၤ. ဒ်နကဲခရံာ်ဖိ လၢအဂ့ၤတဂၤအသိး ဆဲးပာ်လီၤတၢ်ဒိတၢ်တဲာ်လၢအဂ့ၤ. ဃ့တၢ်အိၣ်ဖှိၣ်သးပှၢ်တဖၣ်​ အတၢ်မၤစၢၤ ဒီးဆဲးအိၣ်ဒီးတၢ်မုၢ်လၢ်လၢ မုၢ်ကအိၣ်ဝဲတနံၤန့ၣ်​ နဝၤကဘၣ်သး ပတုာ်ကွံာ် လုၢ်လၢ်လၢအတဂ့ၤဘၣ်တခါအံၤ ဒီးဆီတလဲက့ၤအသးသ့.—ရိ ၂:၄; ၂ ပ့း ၃:၉.