တၢ်မၤလိ ၄၀
တၢ်ပီၢ်ယၢ်လီၤက့ၤသး အနီၢ်ကီၢ်န့ၣ် မ့ၢ်မနုၤလဲၣ်
“ယဟဲဒ်သိး ကကိး ပှၤတၢ်ဒဲးဘးဖိတဖၣ်လၢ ကပီၢ်ယၢ်လီၤက့ၤအသး အဂီၢ်လီၤ.” —လူၤကၣ် ၅:၃၂.
တၢ်သးဝံၣ် ၃၆ ပဘၣ်ပၢၤပသး
တၢ်မၤလိအံၤ အတၢ်တိာ်ပာ် *
၁-၂. စီၤပၤအၤဃာ် ဒီးစီၤပၤမနၤၡ့ၤန့ၣ် လီၤဆီလိာ်အသးဒ်လဲၣ် ဒီးပကတဲသကိး တၢ်သံကွၢ်မနုၤလဲၣ်.
ပကတဲသကိး စီၤပၤလၢညါခံဂၤအဂ့ၢ်လီၤ. စီၤပၤတဂၤ လၢအပၢဝဲ အံၣ်စရ့လး အဒူၣ်တဆံအဘီမုၢ် ဒီးစီၤပၤလၢအဝဲတဂၤန့ၣ် ပၢဝဲယူဒၤခံဒူၣ် အဘီမုၢ်လီၤ. အဝဲသ့ၣ်ခံဂၤန့ၣ် အိၣ်မူတၢ်ဆၢကတီၢ် တဒ်သိးလိာ်သးဘၣ် ဘၣ်ဆၣ် အဝဲသ့ၣ်မၤတၢ်လၢ အလီၤဂာ်လိာ်သးအိၣ်အါမး. စီၤပၤခံဂၤလၢာ်အံၤ ထီဒါဝဲ ယဟိဝၤယွၤ ဒီးမၤဝဲဒ်သိး ယွၤအခ့အပှၤတဖၣ် ကမၤတၢ်ဒဲးဘးအဂီၢ်လီၤ. အဝဲသ့ၣ် ဘူၣ်ထီၣ်ဘါထီၣ် ယွၤလၢအကမၣ်တဖၣ် ဒီးမၤသံတၢ်လီၤ. ဘၣ်ဆၣ် စီၤပၤခံဂၤအံၤ အတၢ်လီၤဆီလိာ်သးအိၣ်ဝဲလီၤ. စီၤပၤတဂၤန့ၣ် အမၤဝဲ တၢ်အၢတၢ်သီ တုၤလၢအသံတစုလီၤ. ဘၣ်ဆၣ် အဝဲတဂၤန့ၣ် အပီၢ်ယၢ်လီၤက့ၤအသး ဒီးကစၢ်ယွၤပျၢ်ကွံာ် အတၢ်ကမၣ်လီၤ. စီၤပၤခံဂၤအံၤ မ့ၢ်မတဂၤလဲၣ်.
၂ အဝဲသ့ၣ်မ့ၢ်ဝဲ အံၣ်စရ့လးအစီၤပၤအၤဃာ် ဒီးယူဒၤအစီၤပၤမနၤၡ့ၤလီၤ. စီၤပၤခံဂၤအံၤ အတၢ်လီၤဆီလိာ်သးန့ၣ် ကမၤစၢၤပှၤလၢ ပကနၢ်ပၢၢ်ထီၣ် ဘၣ်ဃးဒီး တၢ်ပီၢ်ယၢ်လီၤက့ၤသးန့ၣ် မ့ၢ်တၢ်လၢအရ့ဒိၣ် ထဲလဲၣ်အဂ့ၢ်. (မၤတၢ် ၁၇:၃၀; ရိမ့ၤ ၃:၂၃) တၢ်ပီၢ်ယၢ်လီၤက့ၤသးန့ၣ် မ့ၢ်မနုၤလဲၣ် ဒီးပပာ်ဖျါထီၣ်လၢ ပပီၢ်ယၢ်လီၤသး ကသ့ဒ်လဲၣ်. ပကဘၣ်သ့ၣ်ညါ တၢ်ဂ့ၢ်အဝဲအံၤ, မ့ၢ်လၢ ဖဲပမၤကမၣ်ဘၣ်တၢ်အခါ ပအဲၣ်ဒိးလၢ ယဟိဝၤယွၤကပျၢ်ကွံာ် ပတၢ်ကမၣ်အဃိလီၤ. ဒ်သိးပကသ့ၣ်ညါ တၢ်စံးဆၢအဂီၢ် ပကကွၢ်သကိး စီၤပၤခံဂၤအံၤ အတၢ်အိၣ်မူ ဒီးပကမၤလိန့ၢ် တၢ်လၢအဝဲသ့ၣ် အဒိအတဲာ်တဖၣ်လီၤ. ဝံၤဒီး ပကကွၢ်သကိး ယ့ၣ်ၡူးသိၣ်လိပှၤ ဘၣ်ဃးဒီး တၢ်ပီၢ်ယၢ်လီၤက့ၤသး အဂ့ၢ်လီၤ.
ပမၤလိန့ၢ်တၢ်လၢ စီၤပၤအၤဃာ်အအိၣ် ကသ့ဒ်လဲၣ်
၃. စီၤပၤအၤဃာ် မ့ၢ်ပှၤဒ်လဲၣ်တဂၤလဲၣ်.
၃ စီၤအၤဃာ်မ့ၢ်ဝဲ အံၣ်စရ့လး အဒူၣ်တဆံ အစီၤပၤနွံဂၤတဂၤလီၤ. အဝဲဖျီအသးဒီး စံဒိၣ်အစီၤပၤ အဖိမုၣ် နီၢ်အံၤစ့ဘ့ၤလး လၢအမ့ၢ် ပှၤကလုာ်လၢအထူးတီၤလၢ အအိၣ်လၢ ကလံၤစိးတခီလီၤ. ခီဖျိလၢ စီၤအၤဃာ်ဖျီသးဒီး နီၢ်အံၤစ့ဘ့ၤလးအဃိ ပှၤအံၣ်စရ့လးဖိတဖၣ်အိၣ်ဒီး တၢ်ခွဲးတၢ်ယာ်အါမးလၢ ကဃုကျိၣ်စ့အဂီၢ် ဘၣ်ဆၣ် မၤဘၣ်ဒိဝဲ ပှၤအံၣ်စရ့လးဖိတဖၣ် အတၢ်ရ့လိာ်သးဒီး ယဟိဝၤယွၤစ့ၢ်ကီးလီၤ. ခီဖျိလၢနီၢ်အံၤစ့ဘ့ၤလး ဘူၣ်ထီၣ်ဘါထီၣ်ဝဲ ဘဧၤလး အဃိ အဝဲမၢအဝၤ စီၤအၤဃာ်လၢ ကဆီၣ်ထွဲဝဲ တၢ်ဘူၣ်တၢ်ဘါလၢ အလီၤသးဘၣ်အၢ လၢအပၣ်ဃုာ်ဒီး တၢ်လုၢ်ဟံၣ်လၢအအိၣ်ဒီး ပှၤဆါလီၤအီၣ်သး ဒီးပှၤလုၢ်ထီၣ်ဖိသၣ် လၢမ့ၣ်အူလီၤ. ဖဲနီၢ်အံၤစ့ဘ့ၤလး ကဲနီၢ်ပၤမုၣ်အခါ ယဟိဝၤယွၤအဝံတဖၣ်န့ၣ် တအိၣ်ဘၣ် ဘံၣ်ဘံၣ်ဘၢဘၢဘၣ်. နီၢ်အံၤစ့ဘ့ၤလး မၤသံ ယွၤအဝံအါမးလီၤ. (၁ စီၤပၤ ၁၈:၁၃) စီၤအၤဃာ် အနီၢ်ကစၢ်စ့ၢ်ကီး “မၤတၢ်အၢလၢယွၤအမဲာ်ညါ နးန့ၢ်ကယဲၢ်ပှၤလၢ အအိၣ်ဝဲလၢအမဲာ်ညါ ခဲလၢာ်တက့ၢ်လီၤ.” (၁ စီၤပၤ ၁၆:၃၀) တၢ်လၢ စီၤအၤဃာ်ဒီး နီၢ်အံၤစ့ဘ့ၤလး မၤဝဲန့ၣ် ယဟိဝၤယွၤထံၣ်ဝဲ ခဲလၢာ်လီၤ. ဘၣ်ဆၣ် ယဟိဝၤယွၤ ပာ်ဖျါထီၣ်တၢ်သးကညီၤဒီး ဆှၢလီၤဝဲ ဝံအ့ၤလံယၤလၢ ကဟ့ၣ်ပလီၢ်ပှၤဂီၢ်မုၢ် လၢကဆီတလဲက့ၤအသးဒီး မၤက့ၤယဟိဝၤယွၤအတၢ်မၤလီၤ. ဘၣ်ဆၣ် စီၤအၤဃာ်ဒီး နီၢ်အံၤစ့ဘ့ၤလး တဒိကနၣ် တၢ်ဟ့ၣ်ပလီၢ်ဘၣ်.
၄. ယဟိဝၤယွၤ တဲဝဲလၢ အကစံၣ်ညီၣ်စီၤအၤဃာ်ဒ်လဲၣ် ဒီးစီၤအၤဃာ်မၤဝဲဒ်လဲၣ်.
၄ လၢခံ ယဟိဝၤယွၤပာ်လီၤသးလၢ ကမၤတၢ်တမံၤမံၤလီၤ. ယဟိဝၤယွၤဆှၢလီၤ ဝံအ့ၤလံယၤလၢ ကတဲဘၣ်စီၤပၤအၤဃာ်ဒီး နီၢ်အံၤစ့ဘ့ၤလးလၢ အကစံၣ်ညီၣ် အဝဲသ့ၣ်ဒ်လဲၣ်လီၤ. အဝဲသ့ၣ်အဟံၣ်ဖိဃီဖိ ခဲလၢာ်ကဘၣ်တၢ်မၤသံအီၤလီၤ. ဖဲစီၤအၤဃာ် နၢ်ဟူဝံအ့ၤလံယၤ အတၢ်ကတိၤအံၤအခါ အသူၣ်အုးသးအုးဒိၣ်မး. အဃိ စီၤအၤဃာ်လၢအအိၣ်ဒီး တၢ်ပာ်ထီၣ်ထီအသးတဂၤအံၤ “ဆီၣ်လီၤအသး” လီၤ.—၁ စီၤပၤ ၂၁:၁၉-၂၉.
ခီဖျိလၢ စီၤပၤအၤဃာ် တပီၢ်ယၢ်လီၤက့ၤ အသးနီၢ်ကီၢ်ဘၣ်အဃိ အထၢနုာ်လီၤယွၤအဝံ လၢဃိာ်ပူၤ (ကွၢ်လံာ်အဆၢ ၅-၆) *
၅-၆. စီၤပၤအၤဃာ် တပီၢ်ယၢ်လီၤသး အနီၢ်ကီၢ်ဘၣ်န့ၣ် ပသ့ၣ်ညါဘၣ် ဒ်လဲၣ်.
၅ စီၤအၤဃာ်ဆီၣ်လီၤအသးလၢ တၢ်တဘျီန့ၣ် ဘၣ်ဆၣ် တၢ်လၢအမၤဝဲလၢခံန့ၣ် ပာ်ဖျါထီၣ်ဝဲလၢ အတပီၢ်ယၢ်လီၤက့ၤအသး နီၢ်ကီၢ်ဘၣ်. အဝဲတဂုာ်ကျဲးစၢး မၤလီၤမၢ်ကွံာ် ဘၤဧလး အတၢ်ဘူၣ်တၢ်ဘါ လၢအဘီမုၢ်အပူၤဘၣ်. ဒီးအတဟ့ၣ်ဂံၢ်ဟ့ၣ်ဘါ ပှၤဂီၢ်မုၢ်လၢ ကဘူၣ်ထီၣ်ဘါထီၣ် ယဟိဝၤယွၤအဂီၢ်ဘၣ်. တၢ်အဂၤလၢစီၤအၤဃာ်မၤဝဲန့ၣ် အပာ်ဖျါထီၣ်စ့ၢ်ကီးလၢ အတပီၢ်ယၢ်လီၤက့ၤအသး နီၢ်ကီၢ်ဘၣ်.
၆ လၢခံ စီၤပၤအၤဃာ် ကွဲမုာ်ယူဒၤအစီၤပၤ ယဟိၡၤဖး လၢကဖီၣ်လိာ်သးစု ဒီးဒုးဝဲပှၤစူၤရံဖိလီၤ. စီၤပၤယဟိၡၤဖးန့ၣ် မ့ၢ်စီၤပၤလၢအဂ့ၤဒီး အနာ်န့ၢ်ယဟိဝၤယွၤ ဒီးအတဲဝဲလၢ တချုးလၢ အဝဲသ့ၣ် လဲၤဒုးတၢ်ဒံးဘၣ်န့ၣ် ကဘၣ်သံကွၢ်ဆိတၢ်လၢ ယဟိဝၤယွၤအဝံလီၤ. အခီၣ်ထံးခါန့ၣ် စီၤအၤဃာ် တအဲၣ်ဒိးမၤဝဲ ဒ်န့ၣ်ဘၣ် ဒီးအတဲဝဲလၢ “ပှၤလၢ ပကသံကွၢ်ယွၤလၢအီၤ အိၣ်ဒံးတဂၤ, . . . ဘၣ်ဆၣ်ဒီး ယသးဟ့အီၤလီၤ. အဂ့ၢ်ဒ်အံၤ, ကတိၤတၢ်လၢဝံအကျိာ်လၢ တၢ်ဂ့ၤလၢယဂ့ၢ်ယကျိၤတမ့ၢ်ဘၣ်, မ့ၢ်တၢ်အၢလီၤ.” ဘၣ်ဆၣ် အဝဲသ့ၣ် သံကွၢ်ဝံမံၤကါယၤလီၤ. ဒ်စီၤအၤဃာ်တဲဝဲအသိး ယွၤအဝံတဂၤန့ၣ် တဲတၢ်ကစီၣ်တဂ့ၤလၢ စီၤအၤဃာ်အဂီၢ်လီၤ. စီၤအၤဃာ်လၢ အအၢသံတဂၤအံၤ အတပီၢ်ယၢ်လီၤအသးဒီး တဃ့ပျၢ်တၢ်ကမၣ်လၢ ယဟိဝၤယွၤ အအိၣ်ဘၣ်အလီၢ် အဝဲထၢနုာ်ဝံတဂၤအံၤလၢ ဃိာ်ပူၤလီၤ. (၁ စီၤပၤ ၂၂:၇-၉, ၂၃, ၂၇) စီၤအၤဃာ်ထၢနုာ် ဝံမံၤကါယၤလၢ ဃိာ်ပူၤသနာ်က့ အမၤဝဲဒ်သိး ဝံအတၢ်စံးပာ်အံၤ တလၢထီၣ်ပှဲၤထီၣ်တဂ့ၤ အဂီၢ်န့ၣ် တသ့ဘၣ်. အဃိ စီၤအၤဃာ်သံဝဲလၢ တၢ်ဒုးအပူၤလီၤ.—၁ စီၤပၤ ၂၂:၃၄-၃၈.
၇. ဖဲစီၤအၤဃာ် သံဝံၤအလီၢ်ခံ ယဟိဝၤယွၤ ပာ်ဖျါထီၣ် အဂ့ၢ်ဒ်လဲၣ်.
၇ ဖဲစီၤပၤအၤဃာ်သံဝံၤအလီၢ်ခံ ယဟိဝၤယွၤ အတၢ်ထံၣ်အိၣ်လၢ အဖီခိၣ်ဒ်လဲၣ်န့ၣ် အပာ်ဖျါထီၣ်ဝဲ. ဖဲစီၤပၤယဟိၡၤဖး ဟဲက့ၤတုၤလၢ ဟံၣ်အခါ ယဟိဝၤယွၤဆှၢလီၤ ဝံယ့ၤဟူလၢ ကတဲဘၣ်အီၤလၢ အလဲၤမၤစၢၤစီၤအၤဃာ်န့ၣ် ကမၣ်ဝဲ. ယဟိဝၤယွၤအဝံ တဲဝဲလၢ “နကမၤစၢၤပှၤတတီတလိၤ, ဒီးအဲၣ်ပှၤလၢအသးဟ့ယွၤန့ၣ်ဧါ.” (၂ ကွဲးနီၣ်တၢ် ၁၉:၁, ၂) စီၤအၤဃာ်မ့ၢ်ပီၢ်ယၢ်လီၤသး အနီၢ်ကီၢ်န့ၣ် တမ့ၢ်လၢ ဝံကကိးအီၤလၢ ပှၤတတီတလိၤဒီး ပှၤလၢအသးဟ့ ယဟိဝၤယွၤန့ၣ်ဘၣ်. ပထံၣ်ဘၣ်လၢ အခီၣ်ထံးခါန့ၣ် စီၤအၤဃာ်ပီၢ်ယၢ်လီၤအသး ဘၣ်ဆၣ် လၢခံအဝဲတဆဲး ပီၢ်ယၢ်လီၤက့ၤသး တုၤလၢအကတၢၢ်ဘၣ်.
၈. ဘၣ်ဃးဒီး တၢ်ပီၢ်ယၢ်လီၤသးန့ၣ် ပမၤလိန့ၢ်ဘၣ် တၢ်လၢစီၤအၤဃာ်အအိၣ်ဒ်လဲၣ်.
၈ ပမၤလိန့ၢ်တၢ်လၢ စီၤအၤဃာ်အအိၣ် ကသ့ဒ်လဲၣ်. ဖဲအဝဲနၢ်ဟူ ဝံအ့ၤလံယၤတဲတၢ်ကစီၣ်ဘၣ်ဃးဒီး အဟံၣ်ဖိဃီဖိ ကဘၣ်တၢ်မၤဟးဂီၤအီၤအခါ အဝဲဆီၣ်လီၤအသးလီၤ. အမၤဝဲဒ်အံၤန့ၣ် ဂ့ၤဒိၣ်မး. ဘၣ်ဆၣ် လၢခံတၢ်လၢအမၤဝဲတဖၣ်န့ၣ် ပာ်ဖျါထီၣ်ဝဲလၢ အတပီၢ်ယၢ်လီၤသး နီၢ်ကီၢ်ဘၣ်. အဃိ တၢ်ပီၢ်ယၢ်လီၤသးန့ၣ် တမ့ၢ်ထဲပတဲလၢ ပသးတမုာ်လၢ တၢ်ကမၣ်လၢ ပမၤတ့ၢ်အီၤတဖၣ်အဃိဘၣ်. ပကကွၢ်သကိး တၢ်အဒိအဂၤတခါလၢ ကမၤစၢၤပှၤဒ်သိး ပကသ့ၣ်ညါထီၣ် တၢ်ပီၢ်ယၢ်လီၤသးနီၢ်နီၢ်န့ၣ် ပၣ်ဃုာ်ဒီးတၢ်မနုၤလဲၣ်.
ပမၤလိန့ၢ်တၢ်လၢ စီၤပၤမနၤၡ့ၤအအိၣ် ကသ့ဒ်လဲၣ်
၉. စီၤမနၤၡ့ၤ မ့ၢ်စီၤပၤဒ်လဲၣ်တဂၤလဲၣ်.
၉ ပူၤကွံာ်အနံၣ် ခံကယၤဝံၤအလီၢ်ခံ စီၤမနၤၡ့ၤကဲထီၣ်ဝဲ ယူဒၤအစီၤပၤလီၤ. ဘၣ်သ့ၣ်သ့ၣ် အကမၤကမၣ်ဘၣ်တၢ် အါန့ၢ်ဒံးစီၤအၤဃာ်လီၤ. လံာ်စီဆှံတဲဝဲလၢ “လၢယွၤအမဲာ်န့ၣ်” စီၤမနၤၡ့ၤ “မၤတၢ်အၢအါမံၤလၢ တၢ်ထိၣ်ဂဲၤအသးထီၣ်လီၤ.” (၂ ကွဲးနီၣ်တၢ် ၃၃:၁-၉) စီၤမနၤၡ့ၤ တ့ထီၣ်တၢ်လုၢ်လီၢ်လၢ ယွၤလၢအကမၣ်တဖၣ်အဂီၢ်, တကးဒံးဘၣ် အဝဲတ့ထီၣ် ကစၢ်မုၣ်အၡ့ရၤအဂီၤ လၢယဟိဝၤယွၤ အတၢ်လုၢ်ဟံၣ်အပူၤလီၤ. ဒီးတၢ်ဂီၤန့ၣ် ဘၣ်သ့ၣ်သ့ၣ် ကမ့ၢ်ဝဲတၢ်မံဃုာ်အိၣ်ဃုာ် အတၢ်ပနီၣ်လီၤ. စီၤမနၤၡ့ၤ မၤတၢ်မၤကဒါပှၤမဲာ်, ဖးတၢ်ကမၤအသး ခါဆူညါ ဒီးဆဲးကျိာ်ဒီးပှၤသံလီၤ. တကးဒံးဘၣ် အဝဲ “လူလီၤစ့ၢ်ကီးတၢ်သွံၣ်, လၢအတၢ်ဒဲးဘးတအိၣ်ဘၣ် အါအါကလဲာ်” လီၤ. အမၤသံပှၤအါဂၤ ဒီးလုၢ်ထီၣ် “အဖိခွါ” လၢ “မ့ၣ်အူ” လၢယွၤလၢအကမၣ်တဖၣ် အမဲာ်ညါလီၤ.—၂ စီၤပၤ ၂၁:၆, ၇, ၁၀, ၁၁, ၁၆.
၁၀. ယဟိဝၤယွၤ စံၣ်ညီၣ်စီၤမနၤၡ့ၤဒ်လဲၣ် ဒီးစီၤမနၤၡ့ၤမၤဝဲဒ်လဲၣ်.
၁၀ ဒ်စီၤအၤဃာ်အသိး စီၤမနၤၡ့ၤစ့ၢ်ကီး အခိၣ်ကိၤဒီးတဒိကနၣ် ယဟိဝၤယွၤအဝံတဖၣ် အတၢ်ဟ့ၣ်ပလီၢ်ဘၣ်. အဃိ “ယွၤဒုးဟဲထီဒါအီၤလၢ အၤၡူၢ်အစီၤပၤ အပှၤသုးမုၢ်အခိၣ်တဖၣ်လၢ အမၤန့ၢ်စီၤမနၤၡ့ၤလၢတၤဆှုၣ်, ဒီးစၢဃာ်အီၤလၢထးသွဲ, ဒီးစိာ်ထီၣ်ကွံာ်အီၤဆူ ဘၤဘူၤလိၣ်အပူၤလီၤ.” ဖဲစီၤမနၤၡ့ၤလီၤဘၣ်လၢ ဘၤဘူၤလိၣ်ဃိာ်ပူၤအခါ ဖျါလၢ အဝဲဆိကမိၣ်ထီၣ် တၢ်လၢအမၤကမၣ်ဘၣ်တ့ၢ်တဖၣ် လီၤတံၢ်လီၤဆဲးလီၤ. အဝဲ “ဆီၣ်လီၤအသးဒိၣ်ဒိၣ်ကလဲာ်လၢ အပၢ်တဖၣ်အကစၢ်အမဲာ်ညါလီၤ.” ထဲန့ၣ်တကးဒံးဘၣ် စီၤမနၤၡ့ၤ “ဃ့ကညးယွၤအကစၢ်” ဒီးဆဲး “ဘါထုကဖၣ်” တၢ်လၢ ယဟိဝၤယွၤအအိၣ်လီၤ. စီၤပၤလၢအအၢအသီတဂၤအံၤ အဆီတလဲက့ၤအသး ဒီးအစးထီၣ်ထံၣ် ယဟိဝၤယွၤ ဒ် “အကစၢ်” ဒီးဃ့ဘါထုကဖၣ်လၢအအိၣ် ထီဘိလီၤ.—၂ ကွဲးနီၣ်တၢ် ၃၃:၁၀-၁၃.
ခီဖျိလၢ စီၤပၤမနၤၡ့ၤ ပီၢ်ယၢ်လီၤက့ၤအသးနီၢ်ကီၢ်အဃိ အထီဒါက့ၤ တၢ်ဘူၣ်ထီၣ်ဘါထီၣ် လၢအကမၣ်တဖၣ် (ကွၢ်လံာ်အဆၢ ၁၁) *
၁၁. ဒ် ၂ ကွဲးနီၣ်တၢ် ၃၃:၁၅, ၁၆ ပာ်ဖျါထီၣ်ဝဲအသိး စီၤမနၤၡ့ၤ ပာ်ဖျါထီၣ်လၢ အပီၢ်ယၢ်လီၤသး သပှၢ်ကတၢၢ်ဒ်လဲၣ်.
၁၁ လၢခံ ယဟိဝၤယွၤ စံးဆၢစီၤမနၤၡ့ၤ အတၢ်ထုကဖၣ်. ယဟိဝၤယွၤထံၣ်ဝဲလၢ စီၤမနၤၡ့ၤ ဆီတလဲအသးနီၢ်ကီၢ် ခီဖျိတၢ်လၢ စီၤမနၤၡ့ၤဃ့ဝဲတဖၣ်လီၤ. အဃိ ဖဲစီၤမနၤၡ့ၤဃ့ပျၢ်ကွံာ် အတၢ်ကမၣ်အခါ ယဟိဝၤယွၤ ဒိကနၣ်အီၤဒီး ပာ်ထီၣ်က့ၤအီၤလၢစီၤပၤလီၤ. စီၤမနၤၡ့ၤ ဂုာ်ကျဲးစၢး ပီၢ်ယၢ်လီၤသး သပှၢ်ကတၢၢ်လီၤ. အမၤဝဲ တၢ်လၢစီၤအၤဃာ်တမၤဝဲ နီတဘျီဘၣ်. အဆီတလဲက့ၤအသး ဒီးထီဒါက့ၤ တၢ်ဘူၣ်ထီၣ်ဘါထီၣ် လၢအကမၣ်တဖၣ် ဒီးဟ့ၣ်ဂံၢ်ဟ့ၣ်ဘါ ပှၤဂီၢ်မုၢ်လၢ ကဘူၣ်ထီၣ်ဘါထီၣ် ယဟိဝၤယွၤအဂီၢ်လီၤ. (ဖး ၂ ကွဲးနီၣ်တၢ် ၃၃:၁၅, ၁၆.) စီၤမနၤၡ့ၤ ကမၤဝဲဒ်န့ၣ်အဂီၢ် လိၣ်ဘၣ်ဝဲ တၢ်သးဒူဒီးတၢ်နာ် သပှၢ်တၢၢ်. တချုးလၢ အပီၢ်ယၢ်လီၤက့ၤသးဒံးဘၣ်န့ၣ် အဝဲတအိၣ်ဒီး ဒိဂ့ၤတဲာ်ဘၣ်လၢ အဟံၣ်ဖိဃီဖိအဖီခိၣ်, အပှၤဒိၣ်ပှၤပှၢ်တဖၣ် ဒီးပှၤဂီၢ်မုၢ်တဖၣ်အဂီၢ် လၢအနံၣ်အါမး. ဘၣ်ဆၣ် ဖဲအသးပှၢ်ထီၣ်အခါ အဝဲဂုာ်ကျဲးစၢး မၤဂ့ၤထီၣ်က့ၤ တၢ်လၢအမၤကမၣ် ဘၣ်တ့ၢ်တဖၣ်လီၤ. လၢတၢ်န့ၣ်အဃိ လီၤဂာ်လၢ အဝဲအဒိအတဲာ်န့ၣ် ကဲဘျုးလၢ အလံၤခွါ စီၤယိၤၡံယၤအဂီၢ် ဒီးလၢခံစီၤယိၤၡံယၤ ကဲထီၣ်စီၤပၤ လၢအဂ့ၤတဂၤလီၤ.—၂ စီၤပၤ ၂၂:၁, ၂.
၁၂. ဘၣ်ဃးဒီး တၢ်ပီၢ်ယၢ်လီၤက့ၤသးန့ၣ် ပမၤလိန့ၢ်တၢ်လၢ စီၤမနၤၡ့ၤအအိၣ် ဒ်လဲၣ်.
၁၂ ပမၤလိန့ၢ်တၢ်လၢ စီၤမနၤၡ့ၤအအိၣ် ကသ့ဒ်လဲၣ်. အဝဲဆီၣ်လီၤအသးဒီး မၤဝဲအါန့ၢ်အန့ၣ်ဒံး. အဝဲဃ့ကညး ယဟိဝၤယွၤ ဒ်သိးဒီး အကဒိးန့ၢ်ဘၣ် တၢ်သးကညီၤ ဒီးအဆီတလဲက့ၤအသးလီၤ. တၢ်လၢအမၤကမၣ် ဘၣ်တ့ၢ်တဖၣ်န့ၣ် အဝဲဂုာ်ကျဲးစၢး မၤဘၣ်ဂီၢ်ထီၣ်က့ၤဝဲ ဒီးအဘူၣ်ထီၣ်ဘါထီၣ်က့ၤ ယဟိဝၤယွၤဒီး အမၤစၢၤပှၤဂၤလၢ ကဘူၣ်ထီၣ်ဘါထီၣ် ယဟိဝၤယွၤစ့ၢ်ကီးလီၤ. စီၤမနၤၡ့ၤ အဒိအတဲာ်န့ၣ် ကမၤစၢၤပှၤလၢ အမၤကမၣ်တၢ် ဖးဒိၣ်တဖၣ်လီၤ. စီၤမနၤၡ့ၤ အတၢ်လဲၤခီဖျိန့ၣ် ပာ်ဖျါထီၣ်ဝဲလၢ ယဟိဝၤယွၤ “မ့ၢ်တၢ်ဂ့ၤ, ဒီး . . . ပျၢ်ကွံာ်တၢ်ညီ” လီၤ. (စံးထီၣ်ပတြၢၤ ၈၆:၅) ပှၤလၢအပီၢ်ယၢ်လီၤအသးနီၢ်ကီၢ်န့ၣ် ယဟိဝၤယွၤပျၢ်ကွံာ် အဝဲသ့ၣ်အတၢ်ကမၣ်လီၤ.
၁၃. တၢ်ပီၢ်ယၢ်လီၤက့ၤသးနီၢ်ကီၢ် မ့ၢ်တၢ်မနုၤလဲၣ်န့ၣ် ဟ့ၣ်တၢ်အဒိတက့ၢ်.
၁၃ စီၤမနၤၡ့ၤ အသးတမုာ်လၢ တၢ်ကမၣ်လၢ အမၤတ့ၢ်ဝဲအဃိ ဒီးအမၤဝဲအါန့ၢ်ဒံး အဃ့ပျၢ်ကွံာ် အတၢ်ကမၣ်လီၤ. အဃိ ပသ့ၣ်ညါဘၣ်လၢ တၢ်ပီၢ်ယၢ်လီၤသးနီၢ်ကီၢ်န့ၣ် မ့ၢ်မနုၤလဲၣ်. ပကကွၢ် တၢ်အဒိတခါ. နလဲၤလၢ ပှၤဆါကိၣ်အလီၢ် ဒီးနအဲၣ်ဒိးပှ့ၤ ကိၣ်ခ့းတလိၣ် ဘၣ်ဆၣ် ပှၤဆါတၢ်ဖိတဂၤ မ့ၢ်ဟ့ၣ်လီၤနၤလၢ ဆီဒံၣ်တဖျၢၣ်န့ၣ် တမ့ၢ်လၢ နကသးခုဘၣ်. အဃိ အမ့ၢ်တဲပၠးနၤလၢ ကိၣ်ခ့းန့ၣ် ပှၤတ့အီၤဒီးဆီဒံၣ်န့ၣ် တမ့ၢ်လၢနကသးခုထီၣ်ဒံးဘၣ်. ဒ်န့ၣ်အသိး ယဟိဝၤယွၤအဲၣ်ဒိးလၢ ပှၤမၤကမၣ်တၢ်တဂၤ ကပီၢ်ယၢ်လီၤအသးနီၢ်ကီၢ်. ပှၤမၤကမၣ်တၢ်တဂၤ အသးမ့ၢ်တမုာ်လၢတၢ်ကမၣ်လၢ အမၤတ့ၢ်ဘၣ်တဖၣ်အဃိန့ၣ် ဂ့ၤဝဲလီၤ. တၢ်တူၢ်ဘၣ်ဒ်န့ၣ်န့ၣ် ကမၤစၢၤအီၤလၢ အကပီၢ်ယၢ်လီၤသးအဂီၢ်. ဘၣ်ဆၣ် အကဘၣ်မၤဝဲ အါန့ၢ်အန့ၣ်ဒံး. အကဘၣ်မၤတၢ်မနုၤလဲၣ်. ဘၣ်ဃးဒီး တၢ်ပီၢ်ယၢ်လီၤက့ၤသးအဂ့ၢ်န့ၣ် ပကမၤလိအါထီၣ်ဘၣ်လၢ ယ့ၣ်ၡူးဟ့ၣ်တၢ်အဒိအပူၤလီၤ.
ပသ့ၣ်ညါလၢ ပှၤတဂၤ ပီၢ်ယၢ်လီၤက့ၤအသး နီၢ်ကီၢ်ကသ့ဒ်လဲၣ်
ဖဲဖိသဒါလၢအဟးဖျိးတဂၤ သ့ၣ်ညါလီၤက့ၤအသး လၢအမၤတၢ်ကမၣ်ဝံၤအလီၢ်ခံ အဝဲဟဲက့ၤကဒါလၢအဟံၣ် လၢတၢ်ဒ့ၣ်စၢၤဖးယံၤ (ကွၢ်လံာ်အဆၢ ၁၄-၁၅) *
၁၄. ဖိသဒါလၢ အဟးဖျိးတဂၤန့ၣ် အဝဲပီၢ်ယၢ်လီၤအသးန့ၣ် ပသ့ၣ်ညါဘၣ်ဒ်လဲၣ်.
၁၄ ဖဲ လူၤကၣ် ၁၅:၁၁-၃၂ န့ၣ် ယ့ၣ်ၡူးဟ့ၣ်တၢ်အဒိဘၣ်ဃးဒီး ဖိသဒါလၢအဟးဖျိးတဂၤ အဂ့ၢ်လီၤ. ဖိသဒါတဂၤထီဒါက့ၤအပၢ်, စံၣ်လီၤလၢဟံၣ်ပူၤ ဒီးလဲၤဝဲလၢ “ထံကီၢ်လၢအယံၤ” လီၤ. ဒီးအဝဲအိၣ်မူဝဲ လီၤရၢၢ်လီၤစၢၢ်ဒီး အိၣ်မူနါစိၤလီၤ. ဖဲအထံၣ်ဘၣ် တၢ်ကီတၢ်ခဲအခါ အဝဲဆိကမိၣ်ထံက့ၤ တၢ်ကမၣ်လၢအမၤဝဲတဖၣ်လီၤ. ဒီးအသ့ၣ်ညါလီၤအသးလၢ ဖဲအအိၣ်လၢအပၢ်အဟံၣ်အခါ အတၢ်အိၣ်မူန့ၣ် ဂ့ၤဒိၣ်န့ၢ်အခဲအံၤစၢၢ်တလၢၢ်လီၤ. ယ့ၣ်ၡူးတဲဝဲလၢ ဖိသဒါတဂၤအံၤ “သ့ၣ်ညါလီၤက့ၤ အသး” လီၤ. ဖိသဒါအံၤ ပာ်လီၤအသးလၢ ကက့ၤလၢအပၢ်အဟံၣ် ဒီးဃ့ပျၢ်အတၢ်ကမၣ်လၢ အပၢ်အအိၣ်လီၤ. ပထံၣ်ဘၣ်လၢ အရ့ဒိၣ်ဒိၣ်မးလၢ ဖိသဒါအံၤ ကသ့ၣ်ညါလီၤက့ၤ အတၢ်ကမၣ်လီၤ. ဘၣ်ဆၣ် ထဲအသ့ၣ်ညါလီၤက့ၤ အတၢ်ကမၣ်န့ၣ် တလၢပှဲၤဒံးဘၣ်. အဝဲကဘၣ်ဆီတလဲ အတၢ်အိၣ်မူလီၤ.
၁၅. ဖိသဒါလၢအဟးဖျိးတဂၤန့ၣ် ပာ်ဖျါထီၣ်ဝဲလၢ အပီၢ်ယၢ်လီၤက့ၤအသးဒ်လဲၣ်.
၁၅ ဖိသဒါလၢအဟးဖျိးတဂၤန့ၣ် ပာ်ဖျါထီၣ်ဝဲလၢ အပီၢ်ယၢ်လီၤက့ၤအသးလၢ တၢ်ကမၣ်လၢ အမၤတ့ၢ်ဘၣ်တဖၣ်အဃိလီၤ. အဟဲက့ၤလၢအဟံၣ် လၢတၢ်ဒ့ၣ်စၢၤဖးယံၤ. ဒီးဖဲအထံၣ်လိာ်သးဒီးအပၢ်အခါ အတဲအပၢ်လၢ “ယမၤကမၣ်ဘၣ် ကစၢ်ယွၤ ဒီးနၤလံ. တကြၢးလၢ ပှၤကကိးယၤလၢ နဖိခွါလၢၤဘၣ်.” (လူၤကၣ် ၁၅:၂၁) ဖိသဒါအံၤ အတၢ်ကတိၤန့ၣ် ပာ်ဖျါထီၣ်ဝဲလၢ အအဲၣ်ဒိးမၤဂ့ၤထီၣ်က့ၤ အတၢ်ရ့လိာ်သးဒီး ယဟိဝၤယွၤလီၤ. ဒီးအသ့ၣ်ညါလီၤအသးလၢ တၢ်လၢအမၤဝဲတဖၣ်န့ၣ် မၤဘၣ်ဒိအပၢ်အသးလီၤ. ဒီးအပာ်လီၤအသးလၢ ကမၤတၢ်ဆူၣ်ဆူၣ် ဒ်သိးကဒိးန့ၢ်ဘၣ်က့ၤ အပၢ်အတၢ်ဘၣ်သးလီၤ. ဒ်သိး အတၢ်ရ့လိာ်သးဒီး အပၢ်ကဂ့ၤထီၣ်အဂီၢ် အသးအိၣ်မၤတၢ်ဒ် အပၢ်အပှၤမၤတၢ်ဖိ တဂၤအသိးလီၤ. (လူၤကၣ် ၁၅:၁၉) တၢ်အဒိအံၤတမ့ၢ်ထဲ တၢ်တဲမုာ်နၢ်တခါဘၣ်. တၢ်အဒိတခါအံၤ ကဲဘျုးလၢ တၢ်အိၣ်ဖှိၣ်သးပှၢ်တဖၣ် အဂီၢ်ဒိၣ်မး. ဖဲတၢ်အိၣ်ဖှိၣ်သးပှၢ်တဖၣ် ဃုသ့ၣ်ညါဝဲ မ့ၢ်ပှၤမၤကမၣ်တၢ်တဂၤ ပီၢ်ယၢ်လီၤက့ အသးနီၢ်ကီၢ်ဧါန့ၣ် တၢ်အဒိတခါအံၤ မၤစၢၤအဝဲသ့ၣ်လီၤ.
၁၆. ဘၣ်မနုၤအဃိ ကီလၢတၢ်အိၣ်ဖှိၣ်သးပှၢ်တဖၣ် ကသ့ၣ်ညါဝဲလၢမ့ၢ်ပှၤတဂၤ ပီၢ်ယၢ်လီၤအသး အနီၢ်ကီၢ်ဧါန့ၣ်လဲၣ်.
၁၆ ပှၤလၢအမၤ တၢ်ကမၣ်ဖးဒိၣ်တဂၤ မ့ၢ်အပီၢ်ယၢ်လီၤက့ၤ အသးနီၢ်ကီၢ်ဧါန့ၣ် တၢ်အိၣ်ဖှိၣ်သးပှၢ်တဖၣ် ကသ့ၣ်ညါဝဲအဂီၢ်န့ၣ် တညီဘၣ်. ဘၣ်မနုၤအဃိလဲၣ်. မ့ၢ်လၢတၢ်အိၣ်ဖှိၣ်သးပှၢ်တဖၣ်န့ၣ် တထံၣ်တၢ်အိၣ်လၢ ပှၤသးပူၤဘၣ်. အဃိ တၢ်အိၣ်ဖှိၣ်သးပှၢ်တဖၣ် ဃုသ့ၣ်ညါ တၢ်အုၣ်အသးလီၤတံၢ်လီၤဆဲးလၢ ပှၤလၢအမၤ ကမၣ်တၢ်တဂၤ မ့ၢ်အပီၢ်ယၢ်လီၤ အသးအနီၢ်ကီၢ်လၢ အတၢ်ကမၣ်အဃိလံဧါ. တၢ်အိၣ်သးတနီၤနီၤန့ၣ် ဘၣ်သ့ၣ်သ့ၣ် ပှၤတဂၤ ကမၤဘၣ်တၢ်ကမၣ်ဖးဒိၣ် ဘၣ်ဆၣ် ဖဲတၢ်အိၣ်ဖှိၣ်သးပှၢ်တဖၣ် ထံၣ်လိာ်သးဒီးအီၤအခါ အဝဲသ့ၣ်တသ့ၣ်ညါဝဲလၢ မ့ၢ်ပှၤတဂၤန့ၣ် ပီၢ်ယၢ်လီၤက့ၤအသး အနီၢ်ကီၢ်ဧါန့ၣ်ဘၣ်.
၁၇. (က) တဘျီတခီၣ် ပှၤတဂၤမ့ၢ်သးတမုာ်လၢ တၢ်ကမၣ်လၢ အမၤဘၣ်တ့ၢ်ဘၣ်တဖၣ်အဃိ သနာ်က့ ဘၣ်မနုၤအဃိ ပတဲသ့လၢ အဝဲတပီၢ်ယၢ်လီၤအသး နီၢ်ကီၢ်ဒံးဘၣ်လဲၣ်. ဟ့ၣ်တၢ်အဒိတက့ၢ်. (ခ) ဒ် ၂ ကရံၣ်သူး ၇:၁၁ ပာ်ဖျါထီၣ်ဝဲအသိး ပှၤလၢအပီၢ်ယၢ်လီၤသးနီၢ်ကီၢ်န့ၣ် ကဘၣ်မၤတၢ်မနုၤလဲၣ်.
၁၇ ပကကွၢ်တၢ်အဒိတခါ. ဒီပုၢ်ဝဲၢ်ခွါတဂၤ အဲၣ်ဘၢအမါ အါဘျီ ဒီးယံာ်လၢအနံၣ်အါမး. ဘၣ်ဆၣ် လၢအကလဲၤဃ့တၢ်မၤစၢၤအလီၢ် အဝဲမၤခူသူၣ်ဒီး တဒုးသ့ၣ်ညါ အမါ, အသကိး ဒီးတၢ်အိၣ်ဖှိၣ်သးပှၢ်တဖၣ်ဘၣ်. ဒီးလၢခံတၢ်အိၣ်ဖှိၣ်သးပှၢ်တဖၣ် သ့ၣ်ညါထီၣ်ဝဲလီၤ. ဖဲတၢ်အိၣ်ဖှိၣ်သးပှၢ်တဖၣ် တဲအီၤလၢ အဝဲသ့ၣ် သ့ၣ်ညါလၢ အအဲၣ်ဘၢအမါအခါ အဝဲအၢၣ်လီၤအတၢ်ကမၣ် ဒီးဖျါလၢအသးတမုာ်ဒီး တၢ်လၢအမၤကမၣ်ဘၣ်ဝဲ အဃိလီၤ. အဃိ ပတဲလၢ အဝဲပီၢ်ယၢ်လီၤ အသးနီၢ်ကီၢ် သ့လံဧါ. တသ့ဒံးဘၣ်. ဘၣ်ဃးဒီး တၢ်ဂ့ၢ်အံၤန့ၣ် တၢ်အိၣ်ဖှိၣ်သးပှၢ်တဖၣ် ကဘၣ်ထံၣ်ဝဲလၢ ပှၤတဂၤအံၤ ကဘၣ်မၤတၢ်အါန့ၢ်ဒံး တၢ်လၢအပာ်ဖျါထီၣ်လၢ အသးဘၣ်ဒိလီၤ. ခီဖျိလၢ ပှၤတဂၤအံၤတမၤဘၣ် တၢ်ကမၣ်ထဲ တဘျီဧိၤဘၣ် လၢတၢ်န့ၣ်အလီၢ် အမၤဘၣ်တၢ်ကမၣ် အဘျီအါမး တံာ်တာ်လၢ အနံၣ်တဖၣ်ညါ. တကးဒံးဘၣ် ပှၤလၢအမၤကမၣ်တၢ်တဂၤအံၤ တအၢၣ်လီၤဆိ အတၢ်ကမၣ်ဘၣ်, အိၣ်ဒၣ် ပှၤလၢသ့ၣ်ညါအတၢ်ကမၣ်န့ၣ် လဲၤတဲဘၣ် တၢ်အိၣ်ဖှိၣ်သးပှၢ်ဟီ. အဃိ တၢ်အိၣ်ဖှိၣ်သးပှၢ်တဖၣ်န့ၣ် ကဘၣ်သ့ၣ်ညါဝဲ ပှၤတဂၤအံၤ အတၢ်ဆိကမိၣ်, အတၢ်တူၢ်ဘၣ်ဒီး အတၢ်ပာ်သူၣ်ပာ်သး ဆီတလဲအသးနီၢ်ကီၢ်ဧါ. (ဖး ၂ ကရံၣ်သူး ၇:၁၁.) ဘၣ်သ့ၣ်သ့ၣ် ပှၤတဂၤအံၤ ကဘၣ်ဟံးန့ၢ် တၢ်ဆၢကတီၢ်ယံာ်မးလၢအဝဲ ကဆီတလဲက့ၤ အသးအဂီၢ်လီၤ. ညီနုၢ် ပှၤဒ်အံၤတဖၣ်န့ၣ် ဘၣ်တၢ်ဟီထီၣ်ကွံာ် အဝဲသ့ၣ်လၢ တၢ်အိၣ်ဖှိၣ်အပူၤ တုၤလၢအပီၢ်ယၢ်လီၤက့ၤအသးနီၢ်ကီၢ် အဆၢကတီၢ်လီၤ.—၁ ကရံၣ်သူး ၅:၁၁-၁၃; ၆:၉, ၁၀.
၁၈. ပှၤလၢအဘၣ် တၢ်ဟီထီၣ်ကွံာ်အီၤတဂၤ အပာ်ဖျါထီၣ်လၢ အပီၢ်ယၢ်လီၤက့ၤအသးနီၢ်ကီၢ် ကသ့ဒ်လဲၣ်. ဒီးအမ့ၢ်ပီၢ်ယၢ်လီၤက့ၤ အသးနီၢ်ကီၢ်န့ၣ် ကကဲဘျုးလၢ အဂီၢ်ဒ်လဲၣ်.
၁၈ ပှၤလၢအဘၣ် တၢ်ဟီထီၣ်ကွံာ်အီၤတဂၤ မ့ၢ်ပီၢ်ယၢ်လီၤက့ၤအသး နီၢ်ကီၢ်န့ၣ်အဝဲကဟဲထီၣ် တၢ်အိၣ်ဖှိၣ်ထီဘိ ဒီးကမၤထွဲ တၢ်အိၣ်ဖှိၣ်သးပှၢ်တဖၣ် အတၢ်ဟ့ၣ်ကူၣ် ဒ်သိးဒီး ကဃ့ဘါထုကဖၣ် ဒီးမၤလိလံာ်စီဆှံ ထီဘိလီၤ. အဝဲကဂုာ်ကျဲးစၢးဟးဆှဲး တၢ်လၢ ကမၤလီၤဃံၢ်အီၤတဖၣ်လီၤ. အမ့ၢ်ဂုာ်ကျဲးစၢးမၤဂ့ၤထီၣ် အတၢ်ရ့လိာ်သးဒီး ယဟိဝၤယွၤန့ၣ် အနာ်သ့လၢ ယဟိဝၤယွၤကပျၢ်ကွံာ် အတၢ်ကမၣ် လၢာ်လၢာ်ဆ့ဆ့ ဒီးတၢ်အိၣ်ဖှိၣ်သးပှၢ်တဖၣ် ကတူၢ်လိာ်က့ၤအီၤလၢ တၢ်အိၣ်ဖှိၣ်အပူၤလီၤ. ဖဲတၢ်အိၣ်ဖှိၣ်သးပှၢ်တဖၣ် ဂုာ်ကျဲးစၢး ဃုသ့ၣ်ညါဝဲ မ့ၢ်ပှၤလၢအမၤကမၣ်တၢ်တဂၤ ပီၢ်ယၢ်လီၤအသး နီၢ်ကီၢ်ဧါအခါ အဝဲသ့ၣ်သ့ၣ်ညါဝဲလၢ ပှၤတဂၤဒီးတဂၤ အတၢ်အိၣ်သးန့ၣ် တဒ်သိးလိာ်သးဘၣ် အဃိ အဝဲသ့ၣ်ကဘၣ် သမံသမိးဝဲ မူာ်မူာ်နီၢ်နီၢ်လီၤ.
၁၉. တၢ်ပီၢ်ယၢ်လီၤက့ၤသး နီၢ်ကီၢ်န့ၣ် ပၣ်ဃုာ်ဒီးတၢ်မနုၤလဲၣ်. (ယဃ့းစက့လး ၃၃:၁၄-၁၆)
၁၉ ပမၤလိဘၣ်လၢ ပှၤလၢအမၤဘၣ် တၢ်ကမၣ်တဂၤ မ့ၢ်တဲလၢအသးတမုာ်လၢ တၢ်ကမၣ်လၢ အမၤဘၣ်တ့ၢ်ဝဲန့ၣ် တလၢပှဲၤဒံးဘၣ် အကဘၣ်မၤတၢ် အါန့ၢ်အန့ၣ်ဒံး. အဝဲကဘၣ်ဆီတလဲ အတၢ်ဆိကမိၣ်, အတၢ်တူၢ်ဘၣ်ဒီး ပာ်ဖျါထီၣ်လၢအပီၢ်ယၢ်လီၤသးနီၢ်နီၢ်လီၤ. အဝဲကဘၣ်ပတုာ် လုၢ်လၢ်လၢအတဂ့ၤဘၣ်တဖၣ် ဒီးတူၢ်လိာ်ယဟိဝၤယွၤ အတၢ်ဘျၢတဖၣ်လီၤ. (ဖး ယဃ့းစက့လး ၃၃:၁၄-၁၆.) တၢ်အရ့ဒိၣ်ကတၢၢ်လၢ ပှၤမၤဘၣ်တၢ်ကမၣ်တဂၤန့ၣ် အဂီၢ်န့ၣ် မ့ၢ်ဝဲ အကဘၣ်မၤဂ့ၤထီၣ်က့ၤ အတၢ်ရ့လိာ်သး ဒီးယဟိဝၤယွၤလီၤ.
မၤစၢၤပှၤမၤတၢ်ကမၣ်ဖိလၢ ကပီၢ်ယၢ်လီၤက့ၤသးအဂီၢ်
၂၀-၂၁. ပမၤစၢၤပှၤလၢအမၤဘၣ် တၢ်ကမၣ်ဖးဒိၣ်တဂၤ ကသ့ဒ်လဲၣ်.
၂၀ ဘၣ်ဃးဒီး တၢ်အရ့ဒိၣ်တခါလၢ ယ့ၣ်ၡူးအတၢ်စံၣ်တဲၤတဲလီၤ တၢ်မၤအပူၤန့ၣ် ယ့ၣ်ၡူးတဲဝဲလၢ “ယဟဲဒ်သိး ကကိး ပှၤတၢ်ဒဲးဘးဖိတဖၣ်လၢ ကပီၢ်ယၢ်လီၤက့ၤအသး အဂီၢ်လီၤ.” (လူၤကၣ် ၅:၃၂) ပဝဲစ့ၢ်ကီး ပကြၢးမၤဒ်န့ၣ်. အဒိ, ပမ့ၢ်သ့ၣ်ညါလၢ ပသကိးတဂၤမၤဘၣ် တၢ်ကမၣ်ဖးဒိၣ်လံန့ၣ် ပကြၢးမၤဒ်လဲၣ်.
၂၁ ပမ့ၢ်သ့ၣ်ညါလၢ ပသကိးတဂၤ မၤကမၣ်ဘၣ်တၢ် ဒီးပမ့ၢ်တတဲပၠးဘၣ် တၢ်အိၣ်ဖှိၣ်သးပှၢ်ဘၣ်န့ၣ် အိၣ်ဒၣ် ကမၤဘၣ်ဒိအီၤလီၤ. ဒီးပပာ်ခူသူၣ်အတၢ်ကမၣ် တန့ၢ်စ့ၢ်ကီးဘၣ်, မ့ၢ်လၢယဟိဝၤယွၤထံၣ်တၢ် ခဲလၢာ်အဃိလီၤ. (ကတိၤဒိ ၅:၂၁, ၂၂; ၂၈:၁၃) နမၤစၢၤနသကိးသ့ ခီဖျိတဲသ့ၣ်နီၣ်အီၤလၢ တၢ်အိၣ်ဖှိၣ်သးပှၢ်တဖၣ်န့ၣ် အဲၣ်ဒိးမၤစၢၤအီၤ. ဒီးနသကိးမ့ၢ် တလဲၤတဲဘၣ် တၢ်အိၣ်ဖှိၣ်သးပှၢ်တဖၣ်ဘၣ်န့ၣ် နကြၢးတဲဘၣ် တၢ်အိၣ်ဖှိၣ်သးပှၢ်တဖၣ်လီၤ. နမ့ၢ်မၤဒ်န့ၣ်မး နပာ်ဖျါထီၣ်လၢ နသးအိၣ်မၤစၢၤအီၤလီၤ. အရ့ဒိၣ်ဒိၣ်မးလၢ နကမၤဒ်အံၤ, မ့ၢ်လၢအဝဲမ့ၢ်တဒိးန့ၢ်ဘၣ် တၢ်မၤစၢၤလၢ တၢ်အိၣ်ဖှိၣ်သးပှၢ်တဖၣ် အအိၣ်ဒီး ပီၢ်ယၢ်လီၤက့ၤအသးဘၣ်န့ၣ် အတၢ်ရ့လိာ်သးဒီး ယဟိဝၤယွၤဟးဂီၤ သ့ဝဲအဃိလီၤ.
၂၂. တၢ်မၤလိလၢခံတခါန့ၣ် ပကတဲသကိး တၢ်မနုၤလဲၣ်.
၂၂ ပှၤလၢအမၤ ကမၣ်ဘၣ်တၢ်တဂၤ မ့ၢ်မၤဘၣ်တၢ်ကမၣ်အါဘျီ ဒီးဖးယံာ်လံန့ၣ် တၢ်အိၣ်ဖှိၣ်သးပှၢ်တဖၣ် မ့ၢ်ဆၢတဲာ်လၢ အကြၢးဘၣ်တၢ်ဟီထီၣ်ကွံာ်အီၤလၢ တၢ်အိၣ်ဖှိၣ်အပူၤန့ၣ် ပကြၢးထံၣ်ဒ်လဲၣ်. ပကြၢးထံၣ်လၢ တၢ်အိၣ်ဖှိၣ်သးပှၢ်တဖၣ်န့ၣ် တအိၣ်ဒီးတၢ်သးကညီၤဘၣ်ဧါ. တၢ်မၤလိလၢခံတခါန့ၣ် ပကတဲသကိး ယဟိဝၤယွၤအိၣ်ဒီး တၢ်သးကညီၤလၢ ကဘှီဘၣ်ထီၣ်က့ၤ ပှၤလၢအမၤ တၢ်ကမၣ်တဖၣ် ဒီးပကွၢ်လိမၤဒိးအီၤကသ့ဒ်လဲၣ်.
တၢ်သးဝံၣ် ၁၀၃ ပှၤကွၢ်သိတဖၣ်—တၢ်ဘျုးတၢ်ဖှိၣ်လၢပှၤကညီ
^ လံာ်အဆၢ. 5 ဖဲပပီၢ်ယၢ်လီၤပသးနီၢ်ကီၢ်အခါန့ၣ် တမ့ၢ်ထဲပကတဲလၢ ယသးတမုာ်လၢ တၢ်ကမၣ်လၢ ပမၤဘၣ်အီၤအဃိန့ၣ်ဘၣ်. ပကဘၣ်မၤအါန့ၢ်အန့ၣ်ဒံး. တၢ်မၤလိအံၤကမၤစၢၤ ပှၤလၢ ပကသ့ၣ်ညါထီၣ် တၢ်ပီၢ်ယၢ်လီၤသးနီၢ်နီၢ်န့ၣ် မ့ၢ်မနုၤလဲၣ်. ဒီးပကကွၢ်သကိး စီၤပၤအၤဃာ် ဒီးစီၤပၤမနၤၡ့ၤ အဒိအတဲာ် ဒီးယ့ၣ်ၡူးဟ့ၣ်တၢ်အဒိ ဘၣ်ဃးဒီးဖိသဒါ လၢအဟးဖျိးတဂၤ အဂ့ၢ်လီၤ. ပကတဲသကိးစ့ၢ်ကီး ဒီပုၢ်ဝဲၢ်လၢ အမၤကမၣ်တၢ်ဖးဒိၣ်တဂၤန့ၣ် မ့ၢ်အပီၢ်ယၢ်လီၤအသးနီၢ်ကီၢ်ဧါ တနီၢ်ကီၢ်ဧါန့ၣ် တၢ်အိၣ်ဖှိၣ်သးပှၢ်တဖၣ် တချုးလၢ အဝဲသ့ၣ် မၤတၢ်ဆၢတဲာ်ဘၣ်န့ၣ် ကဘၣ်ဆိမိၣ်ထံဝဲ ဒီးတဲသကိးတၢ်လီၤ.
^ လံာ်အဆၢ. 60 တၢ်တဲဖျါထီၣ်တၢ်ဂီၤ အခီပညီ– စီၤပၤအၤဃာ် လၢအခိၣ်ကိၤတဂၤန့ၣ် မၢအခ့အပှၤလၢ ကလဲၤဖီၣ် ယဟိဝၤယွၤ အဝံမံၤကါယၤ ဒီးထၢနုာ်အီၤလၢ ဃိာ်ပူၤ.
^ လံာ်အဆၢ. 62 တၢ်တဲဖျါထီၣ်တၢ်ဂီၤ အခီပညီ– စီၤပၤမနၤၡ့ၤ မၢလီၤပှၤမၤတၢ်ဖိတဖၣ်လၢ ကမၤဟးဂီၤကွံာ် တၢ်ဂီၤတၢ်ဖှီၣ်တဖၣ် လၢအပာ်ဝဲလၢတၢ်လုၢ်ဟံၣ်အပူၤ.
^ လံာ်အဆၢ. 64 တၢ်တဲဖျါထီၣ်တၢ်ဂီၤ အခီပညီ– ဖိသဒါလၢအဟးဖျိးတဂၤ ဟဲက့ၤလၢကျဲဖးယံၤအခါ အလီၤဘှံးလီၤတီၤဝဲဒိၣ်မး. ဘၣ်ဆၣ် ဖဲအထံၣ်စိဃီၤ အဟံၣ်လၢတၢ်ဒ့ၣ်စၢၤဖးယံၤအခါ အသးခုထီၣ်ဝဲ.
