တၢ်မၤလိ ၄၄
ဆဲးမၤဂၢၢ်ကျၢၤထီၣ် နတၢ်မုၢ်လၢ်ထီဘိ
“မုၢ်လၢ်တၢ်လၢ ယဟိဝၤယွၤတက့ၢ်.”—စံးထီၣ်ပတြၢၤ ၂၇:၁၄.
တၢ်သးဝံၣ် ၁၄၄ ကွၢ်ဆူခိၣ်ဖးထီဘိ
တၢ်မၤလိအံၤ အတၢ်တိာ်ပာ် *
၁. ယဟိဝၤယွၤ ဟ့ၣ်လီၤပှၤ တၢ်မုၢ်လၢ်မနုၤလဲၣ်.
ယဟိဝၤယွၤ ဟ့ၣ်လီၤပှၤတၢ်မုၢ်လၢ်လၢ ပကအိၣ်မူဘၣ် လီၤထူလီၤယိာ်န့ၣ် အလီၤသးခုညါ. ပှၤတနီၤန့ၣ် အိၣ်ဒီးတၢ်မုၢ်လၢ်လၢ ကလဲၤထီၣ်ဘၣ်လၢ မူခိၣ် ဒီးကကဲထီၣ်ပှၤနီၢ်သးဖိ လၢအသံတသ့လၢၤဘၣ်. (၁ ကရံၣ်သူး ၁၅:၅၀, ၅၃) မ့မ့ၢ်လၢ ပဝဲအါဂၤန့ၣ် ပအိၣ်ဒီးတၢ်မုၢ်လၢ်လၢ ပကအိၣ်မူဘၣ် လၢဟီၣ်ခိၣ်ချၢ ဒီးအိၣ်ဒီးတၢ်အိၣ်ဆူၣ်အိၣ်ချ့ လၢအဂ့ၤ ဒီးပကသးခုနီၢ်ကီၢ်. (လီၣ်ဖျါ ၂၁:၃, ၄) ပမ့ၢ်အိၣ်ဒီး တၢ်မုၢ်လၢ်လၢ ပကလဲၤထီၣ်ဘၣ် လၢမူခိၣ်မ့ၢ်ဂ့ၤ အိၣ်ဘၣ် လၢဟီၣ်ခိၣ်ချၢမ့ၢ်ဂ့ၤ ပပာ်လုၢ်ပာ်ပှ့ၤ ပတၢ်မုၢ်လၢ်သပှၢ်တၢၢ်.
၂. တၢ်မုၢ်လၢ်န့ၣ် မ့ၢ်မနုၤလဲၣ် ဒီးဘၣ်မနုၤအဃိ ပတဲဒ်န့ၣ်လဲၣ်.
၂ လၢလံာ်စီဆှံအပူၤ တၢ်ကတိၤ လၢအမ့ၢ် “တၢ်မုၢ်လၢ်” န့ၣ်အဲၣ်ဒီးတဲဝဲ အခီပညီ “ပအိၣ်ခီးကွၢ်လၢ် တၢ်လၢအဂ့ၤတမံၤမံၤ ကဟဲကဲထီၣ်သး.” အဃိ တၢ်မုၢ်လၢ်လၢ ယဟိဝၤယွၤ ဟ့ၣ်လီၤပှၤန့ၣ် ပနာ်သပှၢ်တၢၢ်လၢ အကဟဲလၢပှဲၤထီၣ်ဝဲ. (ရိမ့ၤ ၁၅:၁၃) ပသ့ၣ်ညါတၢ်လၢ ယဟိဝၤယွၤအၢၣ်လီၤပှၤ ဒီးပသ့ၣ်ညါလၢ အကမၤလၢပှဲၤထီၣ် အတၢ်အၢၣ်လီၤထီဘိ. (၄ မိၤၡ့ ၂၃:၁၉) တကးဒံးဘၣ် တၢ်လၢယဟိဝၤယွၤ တဲဝဲတဖၣ်န့ၣ် အသးအိၣ်မၤ လၢပှဲၤထီၣ်ဝဲ ဒီးအမၤလၢပှဲၤထီၣ်ဝဲသ့န့ၣ် ပနာ်အီၤသ့သပှၢ်တၢၢ်. အဃိ ပတၢ်မုၢ်လၢ်န့ၣ် အတကဲထဲ တၢ်လၢပဘၣ်သး မၢအကဲထီၣ်ဘၣ် ဒီးအတကဲဝဲ တၢ်မံမီၢ်ဘၣ်. ပတၢ်မုၢ်လၢ်န့ၣ် အကဲဝဲ တၢ်လၢ အကဟဲကဲထီၣ်သးနီၢ်ကီၢ်.
၃. လၢတၢ်မၤလိ တခါအံၤန့ၣ် ပကတဲသကီး တၢ်ဂ့ၢ်မနုၤလဲၣ်. (စံးထီၣ်ပတြၢၤ ၂၇:၁၄)
၃ ပပၢ်ယဟိဝၤယွၤန့ၣ် အအဲၣ်ပှၤဒိၣ်မး ဒီးအအဲၣ်ဒိးလၢ ပကမုၢ်လၢ်တၢ်လၢအအိၣ် ဒီနာ်န့ၢ်အီၤ. (ဖး စံးထီၣ်ပတြၢၤ ၂၇:၁၄.) ပမ့ၢ်နာ်န့ၢ်ယဟိဝၤယွၤ ဒီးမုၢ်လၢ်တၢ်လၢအအိၣ်န့ၣ် ပလဲၤခီဖျိ တၢ်ကီတၢ်ခဲကန့ၢ် ဒီးတၢ်မ့ၢ်ကဲထီၣ်သးဒီးပှၤ ဒ်လဲၣ်ဒ်လဲၣ် သနာ်က့ ပကအိၣ်ဒီးတၢ်သးဒူ ဒီးတၢ်သးခု. အဃိ ပမ့ၢ်အိၣ်ဒီး တၢ်မုၢ်လၢ်န့ၣ် အကမၤစၢၤပှၤ ဖးအါညါ. အဆိကတၢၢ်န့ၣ် ပကတဲသကီး ဘၣ်ဃးဒီး ပတၢ်မုၢ်လၢ်န့ၣ် အလီၤဂာ်ဒ်သိးဒီး နီၣ်သက့ၤ ဒီးခိၣ်ဖျီၣ်ထး ဒ်လဲၣ်. ဝံၤဒီး ပကတဲသကီး ဘၣ်ဃးဒီး ပမၤဂၢၢ်ကျၢၤထီၣ် ပတၢ်မုၢ်လၢ် ကသ့ဒ်လဲၣ်.
ပတၢ်မုၢ်လၢ်န့ၣ် လီၤဂာ်ဒ်သိးဒီး နီၣ်သက့ၤ
၄. ဘၣ်မနုၤအဃိ စီၤပီလူးတဲဝဲလၢ တၢ်မုၢ်လၢ်န့ၣ် အလီၤဂာ်ဒ်သိးဒီး နီၣ်သက့ၤလဲၣ်. (ဧ့ၤဘြံၤ ၆:၁၉)
၄ တၢ်မၢဖိပီလူးကွဲးန့ၢ် လံာ်ပရၢလၢ ပှၤဧ့ၤဘြံၤဖိအအိၣ် ဒီးလၢလံာ်ပရၢအပူၤန့ၣ် စီၤပီလူးတဲဝဲလၢ ပတၢ်မုၢ်လၢ်န့ၣ် အလီၤဂာ်ဒ်သိးဒီး နီၣ်သက့ၤ. (ဖး ဧ့ၤဘြံၤ ၆:၁၉.) စီၤပီလူးန့ၣ် အါတက့ၢ် အလဲၤတၢ်လၢကဘီ အဃိအသ့ၣ်ညါဝဲလၢ နီၣ်သက့ၤန့ၣ် ပှၤသူဝဲလၢ ကမၤစၢၤကဘီ ဒ်သိးဒီး ကဘီကအိၣ်ဂၢၢ် ဒီးတဒံဝ့ၤဒံဝီၤတဂ့ၤအဂီၢ်. ဘၣ်တဘျီ စီၤပီလူး အိၣ်လၢကဘီပူၤ ဒီးကလံၤမုၢ်လီၤဝဲ ဖးဒိၣ်ညါ. ဖဲကလံၤမုၢ်လီၤ အဆၢကတီၢ်န့ၣ် ဒ်သိးဒီး ကဘီတဒံဝ့ၤဒံဝီၤ ဒီးဘၣ်ထံးဒီး လၢၢ်ဖးဒိၣ်တဂ့ၤအဂီၢ် စီၤပီလူးထံၣ်ဝဲ ပှၤနီကဘီဖိတဖၣ် ကွံာ်လီၤဝဲ နီၣ်သက့ၤ လၢထံကျါ. (မၤတၢ် ၂၇:၂၉, ၃၉-၄၁) ဒ်နီၣ်သက့ၤ မၤဂၢၢ်ဝဲ ကဘီအသိး ပတၢ်မုၢ်လၢ်စ့ၢ်ကီး မၤစၢၤပှၤလၢ ပတၢ်ရ့လိာ်သးဒီး ယဟိဝၤယွၤ ကဂ့ၤဒိၣ်ထီၣ်. အဃိ လၢပတၢ်အိၣ်မူပူၤ ပမ့ၢ်ထံၣ်ဘၣ်ဒီး တၢ်ကီတၢ်ခဲ ဖးဒိၣ်နာ်က့ ပတယံၤထီၣ်ဒီး ယဟိဝၤယွၤဘၣ်. ယ့ၣ်ၡူး တဲဆိပာ်စၢၤဝဲလၢ ပှၤကမၤအၢမၤနးပှၤ. (ယိၤဟၣ် ၁၅:၂၀) တကးဒံးဘၣ် ပမ့ၢ်ထံၣ်ဘၣ် တၢ်ကီတၢ်ခဲနာ်က့ ပနာ်သပှၢ်တၢၢ်လၢ ပတၢ်အိၣ်သး ကဂ့ၤထီၣ်က့ၤ အဃိ ပတၢ်မုၢ်လၢ်န့ၣ် အမၤစၢၤပှၤလၢ ပကပာ်ပသး မုာ်မုာ်ခုၣ်ခုၣ်. အဃိ ပမ့ၢ်ဆိကမိၣ်ထံ ကစၢ်ယွၤ အတၢ်အၢၣ်လီၤ ဘၣ်ဃးဒီး ခါဆူညါအဂ့ၢ်န့ၣ် ကမၤစၢၤပှၤလၢ ပကဆဲးမၤ ယဟိဝၤယွၤ အတၢ်မၤ.
၅. ယ့ၣ်ၡူးသ့ၣ်ညါဝဲလၢ အကဘၣ်သံသနာ်က့ တၢ်မုၢ်လၢ်မၤစၢၤအီၤဒ်လဲၣ်.
၅ ယ့ၣ်ၡူးသ့ၣ်ညါဝဲလၢ အကဘၣ်သံသနာ်က့ တၢ်မုၢ်လၢ်မၤစၢၤအီၤလၢ အကဆဲးအိၣ်ဒီး တၢ်သးတီဒ်လဲၣ်. အဒိ ဖဲ ခ.န ၃၃ ဘူၣ်ယဲၢ်ဆံအနံၤန့ၣ် တၢ်မၢဖိပ့းတရူး တဲဖျါထီၣ်ဝဲ ဝံအတၢ်စံးပာ် ဘၣ်ဃးဒီးယ့ၣ်ၡူးအဂ့ၢ် လၢအအိၣ်လၢ လံာ်စံးထီၣ်ပတြၢၤအပူၤ. ဖဲန့ၣ် အတဲဖျါထီၣ် ယ့ၣ်ၡူး အတၢ်ကတိၤ လၢအတဲဝဲလၢ “ယကအိၣ်မူလၢ တၢ်မုၢ်လၢ်အပူၤ မ့ၢ်လၢ နတပာ်တ့ၢ်ယၤလၢ တၢ်သွၣ်ခိၣ် အပူၤဘၣ် ဒီးပှၤလၢ အတီဒီးနၤတဂၤန့ၣ် နတပျဲလၢ အကအုၣ်သံကျၣ်သံဘၣ် အဃိလီၤ. နဒုးသ့ၣ်ညါယၤလၢ တၢ်မူအကျဲ ဒီးနကမၤပှဲၤယသးဒီး တၢ်သူၣ်ခုသးခု ဒိၣ်ဒိၣ်လၢ နမဲာ်ညါ.” (မၤတၢ် ၂:၂၅-၂၈; စံးထီၣ်ပတြၢၤ ၁၆:၈-၁၁) ဖဲအံၤန့ၣ် ပထံၣ်ဘၣ်လၢ ယ့ၣ်ၡူးသ့ၣ်ညါဝဲလၢ အမ့ၢ်သံသနာ်က့ အနာ်ဝဲသပှၢ်တၢၢ်လၢ ယဟိဝၤယွၤ ကမၤသမူထီၣ်က့ၤအီၤ ဒီးအအိၣ်ခီးကွၢ်လၢ် တၢ်ဆၢကတီၢ်လၢ အကက့ၤအိၣ်ဘၣ် တပူၤဃီဒီးအပါ လၢမူခိၣ်.—ဧ့ၤဘြံၤ ၁၂:၂, ၃.
၆. ဘၣ်ဃးဒီး တၢ်မုၢ်လၢ်န့ၣ် ဒီပုၢ်ဝဲၢ်ခွါတဂၤ တဲဝဲဒ်လဲၣ်.
၆ တၢ်မုၢ်လၢ်န့ၣ် မၤစၢၤဝဲ ပဒီပုၢ်ဝဲၢ်မုၣ်ခွါအါဂၤလၢ အဝဲသ့ၣ်တူၢ်တၢ်ကကဲ. အဒိ ဒီပုၢ်ဝဲၢ်ခွါ လံၤဧိၤနၣ် ခၠ့ လၢအအိၣ်လၢ ကီၢ်အဲကလံးန့ၣ် အကဲပှၤလၢ အသးတီတဂၤ. ဖဲဟီၣ်ခိၣ်တၢ်ဒုး တၢတဘျီန့ၣ် ခီဖျိလၢ အတလဲၤကဲသုးဘၣ်အဃိ အလီၤဘၣ်လၢဃိာ်ပူၤ. လၢခံန့ၣ် ပှၤပာ်အီၤလၢ ဃိာ်လၢအဃံးဒိၣ်ထီၣ်တဖျၢၣ် ခံလါညါ ဒီးဖဲန့ၣ် ပှၤမၢအမၤတၢ်နးမး. ဒီပုၢ်ဝဲၢ်ခွါ လံၤဧိၤနၣ် တဲဝဲလၢ “လၢယတၢ်လဲၤခီဖျိတခါအံၤန့ၣ် ယသ့ၣ်ညါဘၣ်လၢ တၢ်မုၢ်လၢ်န့ၣ် မၤစၢၤယၤလၢ ယတူၢ်တၢ်ကကဲ ဖးဒိၣ်ညါ. တကးဒံးဘၣ် ယ့ၣ်ၡူး, တၢ်မၢဖိတဖၣ် ဒီးဝံတဖၣ် အဒိအတဲာ်န့ၣ် မၤစၢၤယၤ ဒီးတၢ်အၢၣ်လီၤ လၢလံာ်စီဆှံပူၤန့ၣ် မၤစၢၤယၤအါမး. ပှၤသ့ၣ်တဖၣ်အံၤ အဒိအတဲာ် ဒီးတၢ်အၢၣ်လီၤလၢ လံာ်စီဆှံအပူၤန့ၣ် မၤစၢၤယၤလၢ ယကဆဲးမၤဂၢၢ်ကျၢၤထီၣ် ယတၢ်မုၢ်လၢ် ဒီးယတူၢ်တၢ်ကကဲအါထီၣ်.” လၢဒီပုၢ်ဝဲၢ်ခွါ လံၤဧိၤနၣ် အတၢ်လဲၤခီဖျိန့ၣ် ပသ့ၣ်ညါဘၣ်လၢ အတၢ်မုၢ်လၢ်န့ၣ် ဂၢၢ်ကျၢၤဝဲဒ်သိးဒီး နီၣ်သက့ၤ. အဃိ ပဝဲစ့ၢ်ကီး ပတၢ်မုၢ်လၢ် ကဘၣ်ဂၢၢ်ကျၢၤဒ်န့ၣ်.
၇. တၢ်မၤကွၢ်န့ၣ် အမၤဂၢၢ်ကျၢၤထီၣ် ပတၢ်မုၢ်လၢ်ဒ်လဲၣ်. (ရိမ့ၤ ၅:၃-၅; ယၤကိာ် ၁:၁၂)
၇ ပလဲၤခီဖျိ တၢ်မၤကွၢ်မ့ၢ်န့ၢ် ဒီးပမ့ၢ်သ့ၣ်ညါလၢ ယဟိဝၤယွၤ မၤစၢၤပှၤဒီး ဘၣ်သးပှၤန့ၣ် ပတၢ်မုၢ်လၢ် ကဟဲဂၢၢ်ကျၢၤအါထီၣ်. (ဖး ရိမ့ၤ ၅:၃-၅; ယၤကိာ် ၁:၁၂.) အဃိ ခဲအံၤန့ၣ် ပတၢ်မုၢ်လၢ် ကဂၢၢ်ကျၢၤဒိၣ်န့ၢ်ဒံး ဖဲပသ့ၣ်ညါတၢ်မ့ၢ်တၢ်တီ သီသီခါဒံး. မုၣ်ကီၤလံၢ်ဘၣ်သးဝဲလၢ ပကဆိကမိၣ်ထဲ တၢ်ကီတၢ်ခဲလၢ ပထံၣ်ဘၣ်တဖၣ်. ဘၣ်ဆၣ် ခီဖျိလၢ ယဟိဝၤယွၤ အတၢ်မၤစၢၤအဃိ ပလဲၤခီဖျိ တၢ်ကီတၢ်ခဲ ကန့ၢ်ဝဲထီဘိ.
ပတၢ်မုၢ်လၢ်န့ၣ် လီၤဂာ်ဒ်သိးဒီး ခိၣ်ဖျီၣ်ထး
၈. ဘၣ်မနုၤအဃိ တၢ်မုၢ်လၢ်န့ၣ် အလီၤဂာ်ဒ်သိးဒီး ခိၣ်ဖျီၣ်ထးလဲၣ်. (၁ သ့းစၤလနံ ၅:၈)
၈ လံာ်စီဆှံ တဲစ့ၢ်ကီးဝဲလၢ ပတၢ်မုၢ်လၢ်န့ၣ် အလီၤဂာ်ဒ်သိးဒီး ခိၣ်ဖျီၣ်ထး. (ဖး ၁ သ့းစၤလနံ ၅:၈.) ပှၤသုးဖိတဂၤန့ၣ် ဒ်သိးအဒုၣ်အဒါအပျၢ် တဘၣ်အခိၣ်သၣ်ဃံတဂ့ၤအဂီၢ် အဖျီၣ်ဃာ်အခိၣ်လၢ ခိၣ်ဖျီၣ်ထး. လၢနီၢ်သးတခီန့ၣ် ပကဘၣ်ဒုးလိာ်သးဒီး မုၣ်ကီၤလံၢ်အဃိ ပကဘၣ်ဒီသဒၢ ပတၢ်ဆိကမိၣ်. မုၣ်ကီၤလံၢ် အဲၣ်ဒိးလၢ ပကဆိကမိၣ် တၢ်လၢအတဂ့ၤဘၣ် အဃိ အဝဲကလ့ပစီပှၤ အမၠိမၠိ. သနာ်က့ ဒ်ခိၣ်ဖျီၣ်ထး ဒီသဒၢ ပှၤသုးဖိ အခိၣ်သၣ်ဃံအသိး ပတၢ်မုၢ်လၢ်န့ၣ် ကဒီသဒၢ ပတၢ်ဆိကမိၣ်အဃိ ပဆဲးမၤ ယဟိဝၤယွၤ အတၢ်မၤ လၢတၢ်သးတီအပူၤ ကသ့ဝဲထီဘိ.
၉. ပှၤလၢအတၢ်မုၢ်လၢ် တအိၣ်ဘၣ်န့ၣ် အိၣ်မူဝဲဒ်လဲၣ်.
၉ ပတၢ်မုၢ်လၢ်လၢ ပကအိၣ်မူဘၣ် လီၤထူလီၤယိာ်န့ၣ် ကမၤစၢၤပှၤလၢ ပကအိၣ်ဒီးတၢ်ကူၣ်သ့ ဒီးပကဆၢတဲာ် တၢ်လၢအဘၣ်. ဘၣ်ဆၣ် ပတၢ်မုၢ်လၢ် မ့ၢ်တဂၢၢ်ကျၢၤဘၣ်န့ၣ် ပကလူၤဘၣ်ထဲ ပနီၢ်ကစၢ်အသး ဒီးပတနီၣ်ဘၣ် တၢ်မုၢ်လၢ်လၢ ပကအိၣ်မူဘၣ် လီၤထူလီၤယိာ်လၢၤဘၣ်. အဒိ ကစၢ်ယွၤ တၢ်အၢၣ်လီၤ ဘၣ်ဃးဒီး တၢ်မုၢ်လၢ်လၢ ပှၤကဂဲၤဆၢထၢၣ်သမူထီၣ်က့ၤန့ၣ် ခရံာ်ဖိလၢ ဝ့ၢ်ကရံၣ်သူးပူၤတနီၤ တနာ်ဝဲလၢၤဘၣ်. (၁ ကရံၣ်သူး ၁၅:၁၂) စီၤပီလူးတဲဝဲလၢ ပှၤလၢအတနာ်လၢ တၢ်ဂဲၤဆၢထၢၣ်သမူထီၣ်က့ၤ အိၣ်ဘၣ်န့ၣ် အဝဲသ့ၣ်အိၣ်မူ ဒ်သိးဒီး အနီၢ်ကစၢ်တၢ်ဘၣ်သး. (၁ ကရံၣ်သူး ၁၅:၃၂) ဆၢကတီၢ်ခဲအံၤ ပှၤအါဂၤလၢအတနာ် ကစၢ်ယွၤ အတၢ်အၢၣ်လီၤဘၣ်န့ၣ် အဝဲသ့ၣ်ဂုာ်ကျဲးစၢးမၤဝဲ တၢ်တမံၤမံၤလၢ ကဟ့ၣ်အီၤတၢ်သးခု. မ့မ့ၢ်ပဝဲန့ၣ် ပနာ်ကစၢ်ယွၤအတၢ်အၢၣ်လီၤ လၢခါဆူညါအဂီၢ် အဃိ ပတလီၤဂာ်ဒီး အဝဲသ့ၣ်ဘၣ်. ခီဖျိလၢ ပတၢ်မုၢ်လၢ်န့ၣ် အလီၤဂာ်ဒ်သိးဒီး ခိၣ်ဖျီၣ်ထး လၢအဒီသဒၢဝဲ ပတၢ်ဆိကမိၣ် အဃိ အကမၤစၢၤပှၤလၢ ပတဟးဆိကမိၣ် တၢ်လၢကမၤဟးဂီၤ ပတၢ်ရ့လိာ်သးဒီး ယဟိဝၤယွၤဘၣ်.—၁ ကရံၣ်သူး ၁၅:၃၃, ၃၄.
၁၀. တၢ်မုၢ်လၢ်န့ၣ် မၤစၢၤပှၤလၢ ပကအိၣ်ဒီးတၢ်ထံၣ် လၢအဂ့ၤဒ်လဲၣ်.
၁၀ ပတၢ်မုၢ်လၢ်န့ၣ် ကမၤစၢၤပှၤလၢ ပတဟးဆိကမိၣ် တၢ်လၢအတဂ့ၤဘၣ်. ဘၣ်ဆၣ် တဘျီတခီၣ်န့ၣ် ပကဆိကမိၣ်ဘၣ်လၢ ပဂုာ်ကျဲးစၢးမၤလၢ အဂ့ၤကတၢၢ်လံ သနာ်က့ ယဟိဝၤယွၤ တဘၣ်သးပှၤဒံးဘၣ်. အဒိ ပှၤတနီၤ ကဆိကမိၣ်ဝဲလၢ ‘ယၤန့ၣ် ယဘျုးတအိၣ်နီတမံၤဘၣ်. ယမၤထွဲ ကစၢ်ယွၤ အတၢ်ဘၣ်သး တန့ၢ်နီတဘျီဘၣ် အဃိ ယတအိၣ်မူဘၣ် လီၤထူလီၤယိာ်ဘၣ်.’ စီၤယိၤဘး အသကီးစီၤအလံဖးစးစ့ၢ်ကီး တဲဝဲတၢ်ကတိၤ လၢအလီၤဂာ်လိာ်သးဒ်န့ၣ်. စီၤအလံဖးစး တဲဝဲလၢ “ပှၤဟီၣ်ခိၣ်ဖိန့ၣ် စီဆှံ ကသ့ဒ်လဲၣ်.” တကးဒံးဘၣ် အတဲဝဲလၢ ကစၢ်ယွၤန့ၣ် “အဝဲတနာ်န့ၢ် အမူခိၣ်ကလူးတဖၣ်ဘၣ် ဒီးမူခိၣ်န့ၣ် တစီဆှံလၢ အမဲာ်ညါ စ့ၢ်ကီးဘၣ်.” (ယိၤဘး ၁၅:၁၄, ၁၅) တၢ်ကတိၤတဖၣ်အံၤ တဘၣ်နီတစဲးဘၣ်. ဘၣ်ဆၣ် ပကဘၣ်နီၣ်ဘၣ်လၢ မုၣ်ကီၤလံၢ်န့ၣ် ဘၣ်သးလၢ ပကဆိကမိၣ်တၢ်ဒ်န့ၣ်. မုၣ်ကီၤလံၢ် သ့ၣ်ညါဝဲလၢ ပမ့ၢ်ဆဲးဆိကမိၣ်တၢ်ဒ်န့ၣ်န့ၣ် ပတၢ်မုၢ်လၢ် ကလီၤမၢ်ကွံာ်ဝဲ. အဃိ ပတဘၣ်နာ် မုၣ်ကီၤလံၢ် အတၢ်လံၣ်တဖၣ်ဘၣ် ဒီးပကဘၣ်သးစၢၢ်ဆၢလၢ ယဟိဝၤယွၤ အတၢ်အၢၣ်လီၤတဖၣ်. ပကဘၣ်နာ်သပှၢ်တၢၢ်လၢ ယဟိဝၤယွၤ ဘၣ်သးဝဲလၢ ပကအိၣ်မူဘၣ် လီၤထူလီၤယိာ် ဒီးအဝဲကမၤစၢၤပှၤလၢ ပကအိၣ်မူဘၣ် လီၤထူလီၤယိာ်စ့ၢ်ကီး.—၁ တံၤမသ့း ၂:၃, ၄.
ဆဲးမၤဂၢၢ်ကျၢၤထီၣ် နတၢ်မုၢ်လၢ်ထီဘိ
၁၁. ပတၢ်မုၢ်လၢ် ကဟဲလၢပှဲၤထီၣ်အဂီၢ် ဘၣ်မနုၤအဃိ ပကဘၣ်အိၣ်ခီးတၢ်လၢ တၢ်ဝံသးစူၤလဲၣ်.
၁၁ မ့ၢ်လၢပဘၣ်အိၣ်ခီး ယဟိဝၤယွၤ လၢအကမၤလၢပှဲၤထီၣ် အတၢ်အၢၣ်လီၤအဃိ တဘျီတခီၣ်န့ၣ် ပသးတစူၤလၢၤဘၣ် ဒီးပကဆဲးမၤဂၢၢ်ကျၢၤထီၣ် ပတၢ်မုၢ်လၢ်န့ၣ် တညီဝဲထီဘိဘၣ်. သနာ်က့ ပသ့ၣ်ညါလၢ ယဟိဝၤယွၤန့ၣ် အိၣ်ဝဲလီၤထူလီၤယိာ်. အဃိ ပမ့ၢ်ဆိကမိၣ်လၢ ပဘၣ်အိၣ်ခီးတၢ် ဖးယံာ်သနာ်က့ လၢယဟိဝၤယွၤ အတၢ်ထံၣ်န့ၣ် အိၣ်ဒၣ်တစိၢ်ဖိဒံးလီၤ. (၂ ပ့းတရူး ၃:၈, ၉) ယဟိဝၤယွၤ ကမၤလၢပှဲၤထီၣ် အတၢ်အၢၣ်လီၤ လၢအခါဖဲလဲၣ်န့ၣ် ပတသ့ၣ်ညါလီၤတံၢ်ဘၣ် နာ်က့ ပနာ်သပှၢ်တၢၢ်လၢ အခါမ့ၢ်ဘၣ်န့ၣ် အကမၤလၢပှဲၤထီၣ် အတၢ်အၢၣ်လီၤ. အဃိ ဒ်သိးပကဆဲးအိၣ်ခီး ယဟိဝၤယွၤ လၢတၢ်ဝံသးစူၤ ဒီးပကဆဲးမၤဂၢၢ်ကျၢၤထီၣ် ပတၢ်မုၢ်လၢ်ထီဘိအဂီၢ် တၢ်မနုၤ ကမၤစၢၤပှၤလဲၣ်.—ယၤကိာ် ၅:၇, ၈.
၁၂. ပတၢ်မုၢ်လၢ် ကဂၢၢ်ကျၢၤထီဘိအဂီၢ် ဘၣ်မနုၤအဃိ ပတၢ်နာ်ကဘၣ်အိၣ်လဲၣ်. (ဧ့ၤဘြံၤ ၁၁:၁, ၆)
၁၂ ယဟိဝၤယွၤ ကမၤလၢပှဲၤထီၣ်ပတၢ်မုၢ်လၢ် အဃိ ပတၢ်ရ့လိာ်သးဒီး ယဟိဝၤယွၤ မ့ၢ်ဂ့ၤဒိၣ်ထီၣ်န့ၣ် ပတၢ်မုၢ်လၢ် ကဂၢၢ်ကျၢၤဒိၣ်ထီၣ်. သနာ်က့ ပကအိၣ်ဒီး တၢ်မုၢ်လၢ်အဂီၢ် ပကဘၣ်နာ်လၢ ယဟိဝၤယွၤ အိၣ်ဝဲသပှၢ်တၢၢ် ဒီးပကဘၣ်နာ်လၢ ယဟိဝၤယွၤန့ၣ် အကဲ “ပှၤလၢ အဟ့ၣ်လီၤခိၣ်ဖးဆူ ပှၤလၢအဃုအီၤလၢ တၢ်သူၣ်ဆူၣ်သးဆူၣ် အပူၤ.” (ဖး ဧ့ၤဘြံၤ ၁၁:၁, ၆.) တကးဒံးဘၣ် ပမ့ၢ်နာ်လၢ ယဟိဝၤယွၤ အိၣ်ဝဲနီၢ်ကီၢ်န့ၣ် ပကနာ်သပှၢ်တၢၢ်လၢ အကမၤလၢပှဲၤထီၣ် အတၢ်အၢၣ်လီၤခဲလၢာ်. ခဲအံၤ ပကတဲသကီး တၢ်လၢ ပကဘၣ်မၤအီၤတနီၤ လၢကမၤစၢၤပှၤ ဒ်သိးပကမၤဂ့ၤထီၣ် ပတၢ်ရ့လိာ်သးဒီး ယဟိဝၤယွၤ ဒီးဆဲးမၤဂၢၢ်ကျၢၤထီၣ် ပတၢ်မုၢ်လၢ်.
တၢ်ထုကဖၣ် ဒီးတၢ်ဆိကမိၣ်ထံတၢ်န့ၣ် ကမၤစၢၤပှၤလၢ ပကဆဲးမၤဂၢၢ်ကျၢၤထီၣ် ပတၢ်မုၢ်လၢ်ထီဘိ (ကွၢ်လံာ်အဆၢ ၁၃-၁၅) *
၁၃. ပတၢ်ရ့လိာ်သးဒီး ယဟိဝၤယွၤ ကဂ့ၤဒိၣ်ထီၣ်အဂီၢ် ပကဘၣ်မၤဒ်လဲၣ်.
၁၃ ဃ့ထုကဖၣ် ဒီးဖးလံာ်စီဆှံ. ယဟိဝၤယွၤန့ၣ် ပထံၣ်အီၤတသ့ဘၣ် သနာ်က့ ပရ့လိာ်သးဒီးအီၤသ့. ပတဲတၢ်ဒီးအီၤ ခီဖျိ ပဃ့ထုကဖၣ်လၢအအိၣ် ဒီးပနာ်လၢ အကဒိကနၣ်ပှၤ. (ယံးရမံယၤ ၂၉:၁၁, ၁၂) ပဒိကနၣ် ကစၢ်ယွၤအကလုၢ်သ့ ခီဖျိ ပဖးလံာ်စီဆှံ ဒီးဆိကမိၣ်ထံ တၢ်လၢပဖးတဖၣ်. ပဖးလံာ်စီဆှံအဃိ ပသ့ၣ်ညါဘၣ်လၢ ယဟိဝၤယွၤန့ၣ် ကွၢ်ထွဲဝဲအပှၤဂီၢ်မုၢ် လၢအသးတီဒီးအီၤတဖၣ် အဃိပတၢ်မုၢ်လၢ် ဟဲဂၢၢ်ကျၢၤဒိၣ်ထီၣ်. တကးဒံးဘၣ် တၢ်ခဲလၢာ်လၢ အအိၣ်လၢ လံာ်စီဆှံအပူၤန့ၣ် “တၢ်ကွဲးအီၤလၢ ကသိၣ်လိပှၤအဂီၢ်လီၤ. အဃိ ပအိၣ်ဒီးတၢ်မုၢ်လၢ် ခီဖျိလၢ ပတၢ်တူၢ်န့ၢ်ခီၣ်ကဲ ဒီးတၢ်မၤမုာ်ထီၣ်က့ၤလၢ ပဒိးန့ၢ်ဘၣ်အီၤလၢ တၢ်ကွဲးအသးတဖၣ်အပူၤ.”—ရိမ့ၤ ၁၅:၄.
၁၄. ပမ့ၢ်ဆိကမိၣ်ထံ တၢ်အၢၣ်လီၤလၢ ယဟိဝၤယွၤ မၤလၢပှဲၤဝဲတဖၣ်န့ၣ် ကကဲဘျုးဒ်လဲၣ်.
၁၄ ဆိကမိၣ်ထံ တၢ်အၢၣ်လီၤလၢ ယဟိဝၤယွၤမၤလၢပှဲၤဝဲတဖၣ်. ခဲအံၤ ပကကွၢ်သကီး ယဟိဝၤယွၤ မၤန့ၢ်တၢ်လၢ စီၤအၤဘြၤဟၣ် ဒီးနီၢ်စၤရါအဂီၢ်. စီၤအၤဘြၤဟၣ် ဒီးနီၢ်စၤရါန့ၣ် အသးပှၢ်လံအဃိ အဖိအိၣ်တန့ၢ်လၢၤဘၣ်. ဘၣ်ဆၣ် ကစၢ်ယွၤအၢၣ်လီၤ အဝဲသ့ၣ်လၢ အဖိကအိၣ်ဝဲတဂၤ. (၁ မိၤၡ့ ၁၈:၁၀) လံာ်စီဆှံတဲဝဲလၢ စီၤအၤဘြၤဟၣ်န့ၣ် “အဝဲအိၣ်ဒီးတၢ်နာ်လၢ အကကဲထီၣ် ပှၤအါကလုာ်အပၢ်.” (ရိမ့ၤ ၄:၁၈) ပမ့ၢ်ကွၢ်လၢ ပှၤဟီၣ်ခိၣ်ဖိ အတၢ်ထံၣ်န့ၣ် အဝဲသ့ၣ်သးပှၢ်လံ အဃိ အဖိအိၣ်တန့ၢ်လၢၤဘၣ်. ဘၣ်ဆၣ် စီၤအၤဘြၤဟၣ် နာ်ဝဲလၢ ယဟိဝၤယွၤ ကမၤလၢပှဲၤထီၣ်အတၢ်အၢၣ်လီၤ. ဒီးစီၤအၤဘြၤဟၣ် အတၢ်နာ်တခါန့ၣ် တကဲထီၣ် တၢ်ကလီကလီဘၣ်. (ရိမ့ၤ ၄:၁၉-၂၁) တၢ်လဲၤခီဖျိဒ်အံၤန့ၣ် မၤစၢၤပှၤလၢ ပကနာ်န့ၢ် ယဟိဝၤယွၤ အတၢ်အၢၣ်လီၤထီဘိ. ဒီးတၢ်အၢၣ်လီၤတဖၣ်အံၤ မ့ၢ်ဖျါလၢ အကဲထီၣ်သး တသ့ဘၣ်နာ်က့ ပနာ်သပှၢ်တၢၢ်လၢ ယဟိဝၤယွၤ ကမၤလၢပှဲၤထီၣ်ဝဲ.
၁၅. ဘၣ်မနုၤအဃိ ပကဘၣ် ဆိကမိၣ်ထံ တၢ်လၢယဟိဝၤယွၤ မၤန့ၢ်ပှၤလဲၣ်.
၁၅ ဆိကမိၣ်ထံ တၢ်လၢယဟိဝၤယွၤ မၤန့ၢ်နၤ. ယဟိဝၤယွၤ အတၢ်အၢၣ်လီၤလၢ လံာ်စီဆှံပူၤ လၢအဟဲလၢထီၣ်ပှဲၤထီၣ်တဖၣ် အကဲဘျုး လၢနဂီၢ်ဒ်လဲၣ်န့ၣ် က့ၤဆိကမိၣ်ကွၢ်. အဒိ ယ့ၣ်ၡူးအၢၣ်လီၤဝဲလၢ အပါကဟ့ၣ်လီၤပှၤ တၢ်လၢပလိၣ်ဘၣ် လၢတနံၤအဂီၢ် တနံၤအဂီၢ်. (မးသဲ ၆:၃၂, ၃၃) တကးဒံးဘၣ် ယ့ၣ်ၡူးတဲဝဲလၢ ပှၤလၢအဃ့ ယဟိဝၤယွၤ အသးစီဆှံန့ၣ် ယဟိဝၤယွၤ ကဟ့ၣ်လီၤဝဲ. (လူၤကၣ် ၁၁:၁၃) တၢ်အၢၣ်လီၤတဖၣ်အံၤန့ၣ် ပထံၣ်ဘၣ်လၢ ယဟိဝၤယွၤ မၤလၢပှဲၤထီၣ်ဝဲလံ. တကးဒံးဘၣ် တၢ်အၢၣ်လီၤအဂၤလၢ ယဟိဝၤယွၤ မၤလၢပှဲၤထီၣ်ဝဲန့ၣ်အိၣ်ဒံး. အဒိ ယဟိဝၤယွၤ အၢၣ်လီၤဝဲလၢ အကပျၢ်နတၢ်ကမၣ်, အကမၤမုာ်ထီၣ်နသး ဒီးဒ်သိးနတၢ်ရ့လိာ်သးဒီးအီၤ ကဂ့ၤထီဘိအဂီၢ် အကဟ့ၣ်လီၤနၤ တၢ်မၤစၢၤလၢ နလိၣ်ဘၣ်တဖၣ်. (မးသဲ ၆:၁၄; ၂၄:၄၅; ၂ ကရံၣ်သူး ၁:၃) အဃိ နမ့ၢ်ဆိကမိၣ်ထံ တၢ်လၢယဟိဝၤယွၤ မၤတ့ၢ်လၢနဂီၢ်န့ၣ် နတၢ်မုၢ်လၢ် ကဟဲဂၢၢ်ကျၢၤဒိၣ်ထီၣ် ဒီးနကနာ်လၢ ယဟိဝၤယွၤ ကမၤလၢပှဲၤထီၣ် အတၢ်အၢၣ်လီၤ လၢခါဆူညါအဂီၢ် သပှၢ်တၢၢ်.
တၢ်မုၢ်လၢ်န့ၣ် မၤသးခုပသး
၁၆. ဘၣ်မနုၤအဃိ ပပာ်လုၢ်ပာ်ပှ့ၤ တၢ်ဟ့ၣ်လၢအမ့ၢ် တၢ်မုၢ်လၢ်လဲၣ်.
၁၆ ပတၢ်မုၢ်လၢ်လၢ ပကအိၣ်မူဘၣ် လီၤထူလီၤယိာ်န့ၣ် အကဲဝဲ ကစၢ်ယွၤအတၢ်ဟ့ၣ် ဒီးပပာ်လုၢ်ပာ်ပှ့ၤ တၢ်ဟ့ၣ်တခါအံၤ သပှၢ်တၢၢ်. ပခီးကွၢ်လၢ် တၢ်မုၢ်လၢ်တခါအံၤ ဒီးပနာ်သပှၢ်တၢၢ်လၢ အကဟဲလၢပှဲၤထီၣ်ဝဲ. ပတၢ်မုၢ်လၢ်တခါအံၤ အလီၤဂာ်ဒ်သိးဒီး နီၣ်သက့ၤ. အဃိ ပမ့ၢ်ထံၣ်ဘၣ်ဒီး တၢ်ကီတၢ်ခဲတမံၤမံၤန့ၣ် ပတၢ်မုၢ်လၢ်အံၤ ကမၤစၢၤပှၤ ဒ်သိးဒီး ပကပာ်ပသး မုာ်မုာ်ခုၣ်ခုၣ်, ပလဲၤခီဖျိ တၢ်မၤအၢမၤနးကန့ၢ် ဒီးပမ့ၢ်ဘၣ်သံသနာ်က့ ပသံဘူၣ်. တကးဒံးဘၣ် ပတၢ်မုၢ်လၢ်တခါအံၤ အလီၤဂာ်ဒ်သိးဒီး ခိၣ်ဖျီၣ်ထး စ့ၢ်ကီး, မ့ၢ်လၢ ပတၢ်မုၢ်လၢ်တခါအံၤ အမၤစၢၤပှၤဒ်သိး ပကအိၣ်ဒီး တၢ်ဆိကမိၣ်လၢအဂ့ၤ ဒီးပကမၤတၢ်လၢအဘၣ်. ပတၢ်မုၢ်လၢ်လၢ အအိၣ်လၢ လံာ်စီဆှံပူၤန့ၣ် မၤစၢၤပှၤလၢ ပကသ့ၣ်ညါ ယဟိဝၤယွၤအဂ့ၢ်ဂ့ၤထီၣ် ဒီးပသ့ၣ်ညါဘၣ်လၢ ယဟိဝၤယွၤန့ၣ် အအဲၣ်ပှၤ သပှၢ်တၢၢ်. အဃိ ပမ့ၢ်ဆဲးမၤဂၢၢ်ကျၢၤထီၣ် ပတၢ်မုၢ်လၢ်ထီဘိန့ၣ် ကကဲဘျုးလၢပဂီၢ် ဖးအါညါ.
၁၇. ဘၣ်မနုၤအဃိ ပတၢ်မုၢ်လၢ်န့ၣ် မၤသးခုပသးလဲၣ်.
၁၇ တၢ်မၢဖိပီလူး ကွဲးလံာ်ပရၢလၢ ဒီပုၢ်ဝဲၢ်လၢ အအိၣ်လၢ ဝ့ၢ်ရိမ့ၤ ဒီးဟ့ၣ်ဂံၢ်ဟ့ၣ်ဘါ အဝဲသ့ၣ်လၢ “မ်သုတၢ်မုၢ်လၢ်န့ၣ် မၤသးခုသုသးတက့ၢ်.” (ရိမ့ၤ ၁၂:၁၂) စီၤပီလူးသ့ၣ်ညါဝဲလၢ အမ့ၢ်ဆဲးအိၣ်ဒီး တၢ်သးတီထီဘိန့ၣ် အကအိၣ်မူဘၣ် လီၤထူလီၤယိာ်လၢ မူခိၣ်အဃိ အတၢ်မုၢ်လၢ်တခါအံၤန့ၣ် မၤသးခုအသး. ပဝဲစ့ၢ်ကီး ပသ့ၣ်ညါလၢ ယဟိဝၤယွၤကမၤလၢပှဲၤ အတၢ်အၢၣ်လီၤအဃိ ပတၢ်မုၢ်လၢ်န့ၣ် အမၤသးခုပသး. ပှၤကွဲးထါ စံးထီၣ်ပတြၢၤတဂၤစ့ၢ်ကီး တဲဝဲလၢ “ပှၤလၢအမုၢ်လၢ်တၢ်လၢ ယဟိဝၤယွၤ အအိၣ်န့ၣ် ကသးခုဝဲ” မ့ၢ်လၢ ယဟိဝၤယွၤန့ၣ် “အမ့ၢ်ပှၤလၢ အသးတီ ထီဘိ.”—စံးထီၣ်ပတြၢၤ ၁၄၆:၅, ၆.
တၢ်သးဝံၣ် ၁၃၉ ထံၣ်တမှံကွၢ် ဖဲတၢ်ခဲလၢာ်မ့ၢ်တၢ်အသီ
^ တၢ်မုၢ်လၢ်လၢ ယဟိဝၤယွၤဟ့ၣ်လီၤပှၤ လၢခါဆူညါအဂီၢ်န့ၣ် ဖၣ်ဂ့ၤညါ. တၢ်မုၢ်လၢ်တခါန့ၣ် အမၤဆူၣ်ထီၣ်ပသး ဒီးအမၤစၢၤပှၤလၢ ပတသးစၢၢ်ဆၢ ထဲတၢ်ကီတၢ်ခဲလၢ ပထံၣ်ဘၣ်ခဲအံၤဘၣ်. တကးဒံးဘၣ် ပမ့ၢ်ထံၣ်ဘၣ် တၢ်ကီတၢ်ခဲ ဒ်လဲၣ်ဒ်လဲၣ် သနာ်က့ တၢ်မုၢ်လၢ်တခါအံၤ အမၤစၢၤပှၤ ဒ်သိးဒီး ပကဆဲး မၤယဟိဝၤယွၤ အတၢ်မၤထီဘိ. ဒီးတၢ်မုၢ်လၢ်တခါအံၤ ကမၤစၢၤပှၤဒ်သိးဒီး ပတဟးဆိကမိၣ် တၢ်လၢအတဂ့ၤဘၣ်. အဃိ လၢတၢ်မၤလိတခါအံၤန့ၣ် ပကတဲသကီး တၢ်ဂ့ၢ်တနီၤလၢ ကမၤစၢၤပှၤ ဒ်သိးဒီး ပကဆဲး မၤဂၢၢ်ကျၢၤထီၣ် ပတၢ်မုၢ်လၢ်ထီဘိ.
^ တၢ်ဂီၤ အခီပညီ– ခိၣ်ဖျီၣ်ထးန့ၣ် ဒီသဒၢဝဲ ပှၤသုးဖိတဂၤ အခိၣ်သၣ်ဃံ. နီၣ်သက့ၤန့ၣ် အမၤဂၢၢ်ဝဲ ကဘီ. ဒ်န့ၣ်အသိး ပတၢ်မုၢ်လၢ်န့ၣ် မၤစၢၤပှၤ ဒ်သိးဒီး ပကဆိကမိၣ် တၢ်လၢအဂ့ၤ. ဒီးပမ့ၢ်ထံၣ်ဘၣ်ဒီး တၢ်ကီတၢ်ခဲတမံၤမံၤန့ၣ် ပတၢ်မုၢ်လၢ်အံၤ ကမၤစၢၤပှၤ ဒ်သိးဒီး ပကပာ်ပသး မုာ်မုာ်ခုၣ်ခုၣ်. ဒီပုၢ်ဝဲၢ်မုၣ်တဂၤ ဃ့ထုကဖၣ်လၢ ယဟိဝၤယွၤအအိၣ်. ဒီပုၢ်ဝဲၢ်ခွါတဂၤ ဆိကမိၣ်ထံဝဲ ဘၣ်ဃးဒီး ယဟိဝၤယွၤ မၤလၢပှဲၤထီၣ် အတၢ်အၢၣ်လီၤဒီး စီၤအၤဘြၤဟၣ်. ဒီပုၢ်ဝဲၢ်ခွါ လၢအဂၤတဂၤ ဆိကမိၣ်ထံဝဲ တၢ်လၢယဟိဝၤယွၤ မၤန့ၢ်အီၤ.
