တၢ်မၤလိ ၄၃
တၢ်ကူၣ်သ့နီၢ်ကီၢ် ကီးပသူထီၣ်ဖးဒိၣ်
“တၢ်ကူၣ်သ့နီၢ်ကီၢ် ကိးပသူထီၣ်ဖးဒိၣ်လၢ ကျဲပူၤဒီးမၤဒိၣ်ထီၣ် အကလုၢ်လၢ တၢ်ဆါတၢ်ပှ့ၤအလီၢ်.”—ကတိၤဒိ ၁:၂၀.
တၢ်သးဝံၣ် ၈၈ ဒုးသ့ၣ်ညါယၤ တၢ်လၢအဘၣ်နသး
တၢ်မၤလိအံၤ အတၢ်တိာ်ပာ် *
၁. ဘၣ်ဃးဒီး ယဟိဝၤယွၤ အတၢ်ကူၣ်သ့န့ၣ် ပှၤအါဂၤ အတၢ်ထံၣ်အိၣ်ဒ်လဲၣ်. (ကတိၤဒိ ၁:၂၀, ၂၁)
လၢထံကီၢ်အါဘ့ၣ်န့ၣ် ညီနုၢ်ပထံၣ်ဘၣ်လၢ ပဒီပုၢ်ဝဲၢ်မုၣ်ခွါတဖၣ် ဆၢထၢၣ်လၢ လ့ၣ်ဆီၣ်လၢ တၢ်စံၣ်တဲၤတဲလီၤတၢ် အကပၤ လၢတၢ်လီၢ်လၢ ပှၤလ့ၢ်ထီၣ်လ့ၢ်လိၤအါအလီၢ် ဒီးဟ့ၣ်လီၤဝဲ လံာ်လဲၢ်တဖၣ်လၢ ပှၤလၢအဲၣ်ဒီးဖးဝဲ. နၤစ့ၢ်ကီး နမ့ၢ်မၤဘၣ် လ့ၣ်ဆီၣ်လၢ တၢ်စံၣ်တဲၤတဲလီၤတၢ်န့ၣ် ဘၣ်သ့ၣ်သ့ၣ် နကနီၣ်ဘၣ် လံာ်စီဆှံအဆၢလၢ ကတိၤဒိအပူၤ လၢအတဲဘၣ်ဃးဒီး တၢ်ကူၣ်သ့နီၢ်ကီၢ် ကီးပသူထီၣ်ဖးဒိၣ် လၢကျဲပူၤ ဒ်သိးဒီး ပှၤကနၢ်ဟူဘၣ် အတၢ်ကူၣ်သ့. (ဖး ကတိၤဒိ ၁:၂၀, ၂၁.) တကးဒံးဘၣ် လံာ်စီဆှံဒီး ပတၢ်ကရၢကရိ လံာ်လဲၢ်တဖၣ်န့ၣ် အအိၣ်ဒီး “တၢ်ကူၣ်သ့နီၢ်ကီၢ်” လၢအကဲဝဲ ယဟိဝၤယွၤ အတၢ်ကူၣ်သ့. တၢ်ကူၣ်သ့တခါအံၤ ကမၤစၢၤပှၤဒ်သိး ပကဒိးန့ၢ်ဘၣ် တၢ်မူထူယိာ်အဃိ အရ့ဒိၣ်လၢ ပကဘၣ်သ့ၣ်ညါအီၤ. ဒီးပှၤတဂၤဂၤ ဖးဝဲပတၢ်ကရၢကရိလံာ်လဲၢ် မ့ၢ်မုာ်န့ၣ် ပသးခုညါ. သနာ်က့ ပှၤတဘၣ်သးဖးဝဲ ကီးဂၤဒဲးဘၣ်. ပှၤတနီၤန့ၣ် တဘၣ်သး သ့ၣ်ညါဝဲတၢ်လၢ လံာ်စီဆှံတဲဝဲဘၣ်. မ့မ့ၢ်လၢ အဂၤတနီၤန့ၣ် ဆိကမိၣ်ဝဲလၢ လံာ်စီဆှံအတၢ်ဟ့ၣ်ကူၣ်န့ၣ် တကဲဘျုးလၢ ဆၢကတီၢ်ခဲအံၤလၢၤဘၣ်. အဃိ အဝဲသ့ၣ်ထံၣ်ပှၤဘျီ နံၤဘၣ်ပှၤ. တကးဒံးဘၣ် ပှၤအဂၤတနီၤန့ၣ် ဆိကမိၣ်ဝဲလၢ ပှၤလၢအအိၣ်မူမၤထွဲ လံာ်စီဆှံ အတၢ်ဟံးစုနဲၣ်ကျဲန့ၣ် အတရ့ဒီးပှၤဂၤ ဂ့ၤဂ့ၤဘၣ်. ဒီးအဝဲသ့ၣ် ထံၣ်လီၤအသးလၢ အကဲပှၤတီပှၤလိၤ. ဘၣ်ဃးဒီး ယဟိဝၤယွၤ အတၢ်ကူၣ်သ့န့ၣ် ပှၤအါဂၤအတၢ်ထံၣ် မ့ၢ်အိၣ်ဒ်လဲၣ်ဒ်လဲၣ် သနာ်က့ ယဟိဝၤယွၤ အဲၣ်ပှၤကီးဂၤဒဲး အဃိ အဟ့ၣ်လီၤ ပှၤကီးဂၤဒဲးလၢ အတၢ်ကူၣ်သ့ထီဘိ. ယဟိဝၤယွၤဟ့ၣ်လီၤပှၤ အတၢ်ကူၣ်သ့ဒ်လဲၣ်.
၂. ယဟိဝၤယွၤ အတၢ်ကူၣ်သ့န့ၣ် ပထံၣ်န့ၢ်အီၤသ့ဖဲလဲၣ် ဒီးပှၤအါဂၤ ပာ်လီၤသးလၢ ကမၤမနုၤလဲၣ်.
၂ ယဟိဝၤယွၤ အတၢ်ကူၣ်သ့န့ၣ် အိၣ်လၢအကလုၢ်ကထါ လံာ်စီဆှံအပူၤ. ပှၤအါတက့ၢ်န့ၣ် အလံာ်စီဆှံအိၣ်ဝဲ. ဒီးပတၢ်ကရၢကရိလံာ်လဲၢ် လၢအသန့ၤထီၣ်သး လၢလံာ်စီဆှံန့ၣ် အအိၣ်လၢကျီာ် ၁,၀၀၀ ဘျဲၣ်ညါ. အဃိ ပှၤလၢအဖး ဒီးမၤထွဲဝဲ လံာ်စီဆှံ ဒီးပတၢ်ကရၢကရိ လံာ်လဲၢ်တဖၣ်န့ၣ် အဝဲသ့ၣ် ကဒိးန့ၢ်ဘၣ် တၢ်ကူၣ်သ့နီၢ်ကီၢ်. သနာ်က့ ပှၤအါတက့ၢ်န့ၣ် တဘၣ်သးကနၣ်ဃုာ်ဝဲ ကစၢ်ယွၤ အတၢ်ကူၣ်သ့ဘၣ်. အဃိ အဝဲသ့ၣ်မ့ၢ်ဘၣ်ဆၢတဲာ်တၢ် န့ၣ် အဝဲသ့ၣ်သန့ၤအသးလၢ အနီၢ်ကစၢ် အတၢ်ကူၣ်သ့ ဒီးမၤထွဲဝဲ ပှၤဟီၣ်ခိၣ်ဖိ အတၢ်ဟ့ၣ်ကူၣ်. တကးဒံးဘၣ် အဝဲသ့ၣ် ဆိကမိၣ်ဆံးဝဲ ပှၤလၢအမၤထွဲလံာ်စီဆှံ အတၢ်ဟံးစုနဲၣ်ကျဲတဖၣ်. ဘၣ်မနုၤအဃိ ပှၤတနီၤအိၣ်ဒီး တၢ်ထံၣ်ဒ်အံၤလဲၣ်. အဆိကတၢၢ်န့ၣ် ပကတဲသကီး ဘၣ်ဃးဒီး ပကကဲထီၣ် ပှၤကူၣ်တၢ်သ့အဂီၢ် ပကဘၣ်မၤဒ်လဲၣ်.
ပမ့ၢ်သ့ၣ်ညါယဟိဝၤယွၤန့ၣ် ပကကဲထီၣ် ပှၤကူၣ်တၢ်သ့နီၢ်ကီၢ်
၃. ပမ့ၢ်ဘၣ်သးကဲထီၣ် ပှၤလၢ အကူၣ်တၢ်သ့နီၢ်ကီၢ်န့ၣ် ပကဘၣ်မၤဒ်လဲၣ်.
၃ ပမ့ၢ်သူ ပတၢ်သ့ၣ်ညါလၢ ပကဆၢတဲာ် တၢ်လၢအဘၣ်န့ၣ် ပကဲပှၤလၢ အအိၣ်ဒီးတၢ်ကူၣ်သ့. ဘၣ်ဆၣ် ပမ့ၢ်ဘၣ်သးကဲထီၣ် ပှၤလၢ အကူၣ်တၢ်သ့နီၢ်ကီၢ်န့ၣ် ပကဘၣ်မၤ အါန့ၢ်အန့ၣ်ဒံး. လံာ်စီဆှံတဲဝဲလၢ “တၢ်ပျံၤ ယဟိဝၤယွၤန့ၣ် မ့ၢ်ဝဲ တၢ်ကူၣ်သ့ အဂံၢ်ခီၣ်ထံးလီၤ. တၢ်သ့ၣ်ညါ ဘၣ်ဃးဒီး တၢ်စီဆှံ ဒိၣ်ကတၢၢ်တဂၤန့ၣ် ဒုးအိၣ်ထီၣ် တၢ်သ့ၣ်ညါနၢ်ပၢၢ်.” (ကတိၤဒိ ၉:၁၀) အဃိ ပမ့ၢ်ဘၣ်ဆၢတဲာ်တၢ်ဂ့ၢ်လၢ အရ့ဒိၣ်တမံၤမံၤန့ၣ် ပကဘၣ်ဃု “တၢ်သ့ၣ်ညါ ဘၣ်ဃးဒီး တၢ်စီဆှံ ဒိၣ်ကတၢၢ်တဂၤ” အတၢ်ထံၣ် ဘၣ်ဃးဒီး တၢ်ဂ့ၢ်တဖၣ် လၢပကဆၢတဲာ်. ပဃုသ့ၣ်ညါ ယဟိဝၤယွၤ အတၢ်ထံၣ်သ့ခီဖျိ ပဖးလံာ်စီဆှံ ဒီးဖးပတၢ်ကရၢကရိ လံာ်လဲၢ်တဖၣ်. ပမ့ၢ်မၤဒ်န့ၣ်မၣ် ပကကဲပှၤလၢ အအိၣ်ဒီးတၢ်ကူၣ်သ့နီၢ်ကီၢ်.—ကတိၤဒိ ၂:၅-၇.
၄. ဘၣ်မနုၤအဃိ ပတဲလၢ ယဟိဝၤယွၤန့ၣ် အကဲပှၤထဲတဂၤလၢ အဟ့ၣ်လီၤပှၤ တၢ်ကူၣ်သ့နီၢ်ကီၢ်သ့လဲၣ်.
၄ ယဟိဝၤယွၤန့ၣ် အကဲပှၤထဲတဂၤလၢ အဟ့ၣ်လီၤပှၤ တၢ်ကူၣ်သ့နီၢ်ကီၢ်သ့. (ရိမ့ၤ ၁၆:၂၇) ပတဲလၢ တၢ်ကူၣ်သ့ ဟဲလၢယဟိဝၤယွၤ အအိၣ်န့ၣ် ခီဖျိလၢ တၢ်ဂ့ၢ်လၢလာ် သၢထံၣ်အံၤ. တၢ, ယဟိဝၤယွၤန့ၣ် အကဲတၢ်ဘၣ်တ့ကစၢ်အဃိ အသ့ၣ်ညါဝဲ အတၢ်ဘၣ်တ့တဖၣ် အဂ့ၢ်ခဲလၢာ်. (စံးထီၣ်ပတြၢၤ ၁၀၄:၂၄) ခံ, တၢ်လၢယဟိဝၤယွၤ မၤဝဲတဖၣ်န့ၣ် ပာ်ဖျါထီၣ်ဝဲလၢ အအိၣ်ဒီးတၢ်ကူၣ်သ့အါမး. (ရိမ့ၤ ၁၁:၃၃) သၢ, ပမ့ၢ်မၤထွဲ ယဟိဝၤယွၤ အတၢ်ဟ့ၣ်ကူၣ်န့ၣ် ကကဲဘျုးလၢ ပဂီၢ်ထီဘိ. (ကတိၤဒိ ၂:၁၀-၁၂) အဃိ ပမ့ၢ်ဘၣ်သးကဲထီၣ် ပှၤလၢ အကူၣ်တၢ်သ့နီၢ်ကီၢ်န့ၣ် ပကဘၣ်တူၢ်လိာ် တၢ်မ့ၢ်တၢ်တီ သၢထံၣ်အံၤကၠ့ၤ.
၅. ခီဖျိလၢ ပှၤအါဂၤ တတူၢ်လိာ် တၢ်ကူၣ်သ့နီၢ်ကီၢ် လၢအဟဲလၢ ယဟိဝၤယွၤ အအိၣ်ဘၣ်အဃိ တၢ်ကဲထီၣ်သးဒ်လဲၣ်.
၅ ပှၤလၢအအိၣ်လၢ တၢ်လီၢ်အါတီၤန့ၣ် အါတက့ၢ် တဲဝဲလၢ တၢ်ဘၣ်တ့တဖၣ်န့ၣ် ဖျါဃံလၤ ဒီးအလီၤကမၢကမၣ်ညါ. သနာ်က့ အဝဲသ့ၣ်တနာ်လၢ တၢ်ဘၣ်တ့ကစၢ်အိၣ်ဘၣ်. ပှၤတနီၤန့ၣ် နာ်ဝဲလၢ ကစၢ်ယွၤအိၣ် ဘၣ်ဆၣ် အဝဲသ့ၣ်ဆိကမိၣ်ဝဲလၢ လံာ်စီဆှံန့ၣ် တကဲဘျုးလၢ ဆၢကတီၢ်ခဲအံၤလၢၤဘၣ်. အဃိ အဝဲသ့ၣ်အိၣ်မူဝဲ ဖဲအသး. ခီဖျိလၢ ပှၤအါဂၤ သန့ၤလီၤအသးလၢ အနီၢ်ကစၢ်တၢ်ကူၣ်သ့ ဒီးတသန့ၤအသးလၢ ကစၢ်ယွၤ အတၢ်ကူၣ်သ့ဘၣ်အဃိ ဟီၣ်ခိၣ်တၢ်အိၣ်သး မၤသးဒ်လဲၣ်. ပှၤအါဂၤ သန့ၤလီၤအသးလၢ အနီၢ်ကစၢ် တၢ်ကူၣ်သ့အဃိ အတသးခုနီၢ်ကီၢ်ဘၣ် ဒီးအတအိၣ်ဒီး တၢ်မုၢ်လၢ်နီၢ်ကီၢ်ကၠ့ၤဘၣ်. အဃိ ပမ့ၢ်ကွၢ် ဟီၣ်ခိၣ်တၢ်အိၣ်သး ခဲအံၤန့ၣ် ပသ့ၣ်ညါဘၣ်လၢ “တၢ်ကူၣ်သ့, တၢ်သ့ပဲာ်ထံနီၤဖးတၢ် ဒီးတၢ်ဟ့ၣ်ကူၣ် လၢအထီဒါ ယဟိဝၤယွၤ” န့ၣ်အတကဲဘျုး နီတမံၤဘၣ်. (ကတိၤဒိ ၂၁:၃၀) ပသ့ၣ်ညါဘၣ် တၢ်မ့ၢ်တၢ်တီ တထံၣ်အံၤအဃိ ပဘၣ်သးဃ့အါထီၣ် တၢ်ကူၣ်သ့ လၢယဟိဝၤယွၤအအိၣ်. ဘၣ်ဆၣ် ဘၣ်မနုၤအဃိ ပှၤအါတက့ၢ်န့ၣ် တဘၣ်သးမၤဝဲ ဒ်န့ၣ်ဘၣ်လဲၣ်.
ဘၣ်မနုၤအဃိ ပှၤတနီၤ တကနာ်ဃုာ် တၢ်ကူၣ်သ့နီၢ်ကီၢ်ဘၣ်လဲၣ်
၆. ကတိၤဒိ ၁:၂၂-၂၅ ပာ်ဖျါထီၣ်ဝဲလၢ မတဂၤသ့ၣ်တဖၣ် တကနၣ်ဃုာ် ကစၢ်ယွၤ အတၢ်ကူၣ်သ့ဘၣ်လဲၣ်.
၆ တၢ်ကူၣ်သ့နီၢ်ကီၢ် မ့ၢ် “ကိးပသူထီၣ်ဖးဒိၣ်လၢ ကျဲပူၤ” သနာ်က့ ပှၤအါဂၤန့ၣ် တကနၣ်ဃုာ်ဝဲဘၣ်. ပှၤလၢအတကနၣ်ဃုာ် တၢ်ကူၣ်သ့နီၢ်ကီၢ်ဘၣ်န့ၣ် အိၣ်ဝဲသၢဖု. ပှၤသၢဖုအံၤ လံာ်စီဆှံ ကီးအဝဲသ့ၣ်လၢ ပှၤလၢ “အတၢ်လဲၤခီဖျိစှၤ,” ပှၤလၢ “အတဲဆါတၢ်မုာ်” ဒီး “ပှၤဟးဂီၤဖိ.” (ဖး ကတိၤဒိ ၁:၂၂-၂၅.) ခဲအံၤ ပကဃုသ့ၣ်ညါအါထီၣ်လၢ ဘၣ်မနုၤအဃိ ပှၤသ့ၣ်တဖၣ်အံၤ အတကနၣ်ဃုာ် ကစၢ်ယွၤ အတၢ်ကူၣ်သ့ဘၣ်လဲၣ်. ဒီးပမ့ၢ်တအဲၣ်ဒိးကဲထီၣ် ဒ်သိးဒီး အဝဲသ့ၣ်ဘၣ်န့ၣ် ပကဘၣ်မၤဒ်လဲၣ်.
၇. ဘၣ်မနုၤအဃိ ပှၤတနီၤလၢ “အတၢ်လဲၤခီဖျိစှၤ” န့ၣ်တဘၣ်သး ဆီတလဲအသးဘၣ်လဲၣ်.
၇ ပှၤတၢတဖုန့ၣ် အကဲဝဲ ပှၤလၢ “အတၢ်လဲၤခီဖျိစှၤ.” ပှၤလၢ အတၢ်လဲၤခီဖျိအိၣ်စှၤန့ၣ် အကဲပှၤလၢ အနာ်တၢ်ညီ ဒီးပှၤ လံၣ်အီၣ်အီၤညီ. (ကတိၤဒိ ၁၄:၁၅) ဖဲပဟးစံၣ်တဲၤတဲလီၤတၢ်အခါန့ၣ် အါတက့ၢ် ပတိလိာ်သးဒီး ပှၤလၢ အတၢ်လဲၤခီဖျိအိၣ်စှၤ. အဒိ တၢ်ဘူၣ်တၢ်ဘါခိၣ်နၢ် ဒီးထံကီၢ်ခိၣ်နၢ်တဖၣ်န့ၣ် လံၣ်န့ၢ်ဝဲ ပှၤလၢအကကွဲၢ်တဖၣ်ညါ. လၢခံ အဝဲသ့ၣ်တနီၤန့ၣ် သ့ၣ်ညါက့ၤဝဲလၢ ခိၣ်နၢ်တဖၣ်အံၤ လံၣ်န့ၢ်အဝဲသ့ၣ်အဃိ အဝဲသ့ၣ်ဖုးဘၣ်အသး. မ့မ့ၢ်ပှၤလၢ အတၢ်လဲၤခီဖျိစှၤ ဖဲကတိၤဒိ ၁:၂၂ ပာ်ဖျါထီၣ်ဝဲဟီန့ၣ် အဝဲသ့ၣ် အတၢ်လဲၤခီဖျိစှၤ သနာ်က့ အဘၣ်သးအိၣ်ဝဲ ကၠဲန့ၣ်ထီဘိ ဒီးတဘၣ်သး ဆီတလဲအသးဘၣ်. (ယံးရမံယၤ ၅:၃၁) ပှၤလၢ အတၢ်လဲၤခီဖျိစှၤန့ၣ် အဲၣ်ဒီးမၤတၢ်ထဲအသး ဒီးတဘၣ်သးဃုသ့ၣ်ညါ လံာ်စီဆှံ အတၢ်ဟံးစုနဲၣ်ကျဲ ဒီးမၤထွဲဝဲဘၣ်. အဒိ ပိာ်မုၣ်တဂၤ လၢအအိၣ်လၢ ခွံဘဲး ခဲနဒၤန့ၣ် တဲဘၣ်ဝဲ ဒီပုၢ်ဝဲၢ်တဂၤလၢ “ပတၢ်ဘူၣ်တၢ်ဘါ ခိၣ်နၢ်တဖၣ် မ့ၢ်လံၣ်အီၣ်ပှၤဒု ကဲဝဲအဝဲသ့ၣ် အတၢ်ကမၣ်လီၤ, တကဲပတၢ်ကမၣ်ဘၣ်.” ပထံၣ်ဘၣ်လၢ ပှၤအါဂၤန့ၣ် အိၣ်ဒီးတၢ်ထံၣ် ဒ်သိးဒီး ပိာ်မုာ်တဂၤအံၤ. ဘၣ်ဆၣ် ပမ့ၢ်အဲၣ်ဒီးကဲထီၣ် ပှၤလၢ အကူၣ်တၢ်သ့နီၢ်ကီၢ်န့ၣ် ပတဘၣ်အိၣ်ဒီး တၢ်ထံၣ်ကၠဲအံၤဘၣ်.—ကတိၤဒိ ၁:၃၂; ၂၇:၁၂.
၈. ပကကဲထီၣ် ပှၤလၢ အကူၣ်တၢ်သ့နီၢ်ကီၢ်အဂီၢ် တၢ်မနုၤကမၤစၢၤပှၤလဲၣ်.
၈ ပမ့ၢ်အဲၣ်ဒီးကဲထီၣ် ပှၤလၢ အကူၣ်တၢ်သ့နီၢ်ကီၢ်န့ၣ် ပတဘၣ်ဆဲးကဲ ပှၤလၢ “အတၢ်လဲၤခီဖျိစှၤ” ဘၣ်. တကးဒံးဘၣ် လံာ်စီဆှံ ဟ့ၣ်ကူၣ်ပှၤလၢ ပက “ကဲထီၣ် ပှၤဒိၣ်တုာ်ခိၣ်ပှဲၤလၢ တၢ်သ့ၣ်ညါနၢ်ပၢၢ် တကပၤ.” (၁ ကရံၣ်သူး ၁၄:၂၀) အဃိ ပမ့ၢ်မၤထွဲ လံာ်စီဆှံ အတၢ်ဟံးစုနဲၣ်ကျဲ လၢပတၢ်အိၣ်မူအပူၤန့ၣ် ပကကဲထီၣ် ပှၤလၢ အကူၣ်တၢ်သ့နီၢ်ကီၢ်. လၢခံ ကယီကယီန့ၣ် ပကသ့ၣ်ညါဘၣ်လၢ လံာ်စီဆှံ အတၢ်ဟံးစုနဲၣ်ကျဲတဖၣ်အံၤ ကမၤစၢၤပှၤဒ်သိး ပကဟးဆှဲး တၢ်ကီတၢ်ခဲတဖၣ် ဒီးပကဆၢတဲာ်တၢ်လၢအဘၣ်. တကးဒံးဘၣ် တၢ်လၢပဆၢတဲာ်ပာ်တဖၣ်န့ၣ် ပဘၣ်ဆိကမိၣ်ထံက့ၤအီၤ. အဒိ ပမၤလိလံာ်စီဆှံ ဒီးထီၣ်တၢ်အိၣ်ဖှိၣ် မ့ၢ်အိၣ်တတီၤဖိလံန့ၣ် ဘၣ်သ့ၣ်သ့ၣ် ပကဘၣ် သံကွၢ်လီၤပသးလၢ ဘၣ်မနုၤအဃိ ပတဟ့ၣ်လုၢ်ထီၣ်ပသး လၢယဟိဝၤယွၤအအိၣ် ဒီးဒိးဘျၢထံဒံးဘၣ်လဲၣ်. ပမ့ၢ်ကဲပှၤလၢ အဒိးဘျၢထံဝံၤတဂၤန့ၣ် ပမၤဂ့ၤထီၣ် ပတၢ်သ့တၢ်ဘၣ် လၢတၢ်စံၣ်တဲၤတဲလီၤ ဒီးတၢ်သိၣ်လိနဲၣ်လိတၢ် တကပၤကသ့ဧါ. ပတၢ်ဆၢတဲာ်တဖၣ်န့ၣ် မ့ၢ်အပာ်ဖျါထီၣ်လၢ ပအိၣ်မူမၤထွဲဒ်သိးဒီး လံာ်စီဆှံ အတၢ်ဟံးစုနဲၣ်ကျဲလံဧါ. မ့ၢ်ပရ့ဒီး ပှၤဂၤဂ့ၤဂ့ၤ ဒ်သိးဒီး ယ့ၣ်ၡူးရ့ဒီးပှၤဂၤဧါ. ယဟိဝၤယွၤ အတၢ်ဟံးစုနဲၣ်ကျဲန့ၣ် “ဒုးကူၣ်သ့ ပှၤလၢအတၢ်လဲၤခီဖျိ တအိၣ်ဘၣ်” အဃိ ပမ့ၢ်သ့ၣ်ညါလီၤပသးလၢ ပကဘၣ်မၤဂ့ၤထီၣ်ပသး တမံၤမံၤန့ၣ် ပကဘၣ်မၤအီၤ.—စံးထီၣ်ပတြၢၤ ၁၉:၇.
၉. ပှၤလၢ “အတဲဆါတၢ်မုာ်” တဖၣ်န့ၣ် အဝဲသ့ၣ် တကနၣ်ဃုာ် ယဟိဝၤယွၤ အတၢ်ကူၣ်သ့ဘၣ်န့ၣ် ဒ်လဲၣ်.
၉ ပှၤခံဖုတဖုန့ၣ် အကဲဝဲ ပှၤလၢ “အတဲဆါတၢ်မုာ်.” ပှၤသ့ၣ်တဖၣ်အံၤန့ၣ် ဖဲပဟးစံၣ်တဲၤတဲလီၤတၢ်အခါ တဘျီတခီၣ် ပတိလိာ်သးဒီးအဝဲသ့ၣ်. အဝဲသ့ၣ်န့ၣ် အကဲပှၤလၢ အပာ်ဆံးပှၤဂၤ. (စံးထီၣ်ပတြၢၤ ၁၂၃:၄) တကးဒံးဘၣ် လံာ်စီဆှံ တဲပာ်စၢၤဝဲလၢ ဖဲမုၢ်နံၤခံကတၢၢ်တဖၣ်အပူၤန့ၣ် ပှၤလၢ အတဲဆါတၢ်မုာ် ကအိၣ်ဝဲဒီဒူၣ်ညါ. (၂ ပ့းတရူး ၃:၃, ၄) ဆၢကတီၢ်ခဲအံၤ ပှၤအါဂၤန့ၣ် တကနၣ်ဃုာ် ကစၢ်ယွၤ အတၢ်ဟ့ၣ်ပလီၢ်လၢၤဘၣ်. အဝဲသ့ၣ်တနီၤန့ၣ် လီၤဂာ်ဒ်သိးဒီး ပှၤတီပှၤလိၤ စီၤလိာ်အမာ်တဖၣ်. (၁ မိၤၡ့ ၁၉:၁၄) တကးဒံးဘၣ် ပှၤလၢ အတဲဆါတၢ်မုာ်တဖၣ်န့ၣ် အဝဲသ့ၣ်ပာ်ဆံးဝဲ ပှၤလၢအအိၣ်မူမၤထွဲ လံာ်စီဆှံ အတၢ်ဟံးစုနဲၣ်ကျဲ. အဝဲသ့ၣ် ဒုၣ်ဒွဲၣ်တၢ်ဒီး “မၤထွဲဝဲ အနီၢ်ကစၢ် အတၢ်သူၣ်လီသးကွံလၢ အအၢအသီ.” (ယူဒၤ ၇, ၁၇, ၁၈) ပှၤလၢ အတဲဆါတၢ်မုာ်တဖၣ်န့ၣ် အတၢ်ပာ်သူၣ်ပာ်သး လီၤဂာ်ဒ်သိးဒီး ပှၤလၢအထီဒါက့ၤ တၢ်မ့ၢ်တၢ်တီ ဒီးပှၤလၢအတကနၣ်ဃုာ် ယဟိဝၤယွၤ အတၢ်ကူၣ်သ့ဘၣ်.
၁၀. ပမ့ၢ်တအဲၣ်ဒီးကဲထီၣ် ပှၤလၢ အတဲဆါတၢ်မုာ်ဘၣ်န့ၣ် ပကဘၣ်မၤဒ်လဲၣ်. (စံးထီၣ်ပတြၢၤ ၁:၁)
၁၀ ပမ့ၢ်တဘၣ်သး ကဲထီၣ်ပှၤလၢ အတဲတၢ်ဆါမုာ်ဘၣ်န့ၣ် ပကဘၣ်မၤဒ်လဲၣ်. ပတဘၣ်ရ့ဒီးပှၤလၢ အကဒူးကဒ့ၣ်တၢ်မုာ်တဖၣ်ဘၣ်. (ဖး စံးထီၣ်ပတြၢၤ ၁:၁.) အဃိန့ၣ် ပတဘၣ် ဖး, ကွၢ် မ့တမ့ၢ် ဒိကနၣ် တၢ်ဂ့ၢ်တၢ်ကျိၤလၢ ပှၤလၢအထီဒါက့ၤ တၢ်မ့ၢ်တၢ်တီတဖၣ် ထုးထီၣ်ဝဲန့ၣ်ဘၣ်. ပမ့ၢ်တပလီၢ်ပသးဘၣ်န့ၣ် ပကကဲထီၣ် ပှၤလၢအကဒူးကဒ့ၣ်တၢ်မုာ်. ဒီးလၢခံန့ၣ် ပတနာ်န့ၢ် ယဟိဝၤယွၤလၢၤဘၣ် ဒီးပတနာ်န့ၢ် အတၢ်ကရၢကရိ အတၢ်ဟံးစုနဲၣ်ကျဲလၢၤဘၣ်. ပတဘၣ်သးလၢ တၢ်ကကဲထီၣ်သးဒီးပှၤ ဒ်န့ၣ်ဘၣ်. အဃိန့ၣ် ပကဘၣ် သံကွၢ်လီၤပသးလၢ ‘ပတၢ်ကရၢကရိ မ့ၢ်ဟ့ၣ်လီၤပှၤ တၢ်ဟံးစုနဲၣ်ကျဲအသီ ဒီးတဲပၠးပှၤ တၢ်နၢ်ပၢၢ်အသီ တမံၤမံၤန့ၣ် မ့ၢ်ပတူၢ်လိာ်အီၤ တဘျီဃီဧါ မ့တမ့ၢ်ဘၣ်န့ၣ် မ့ၢ်ပကဒူးကဒ့ၣ်တၢ်ဧါ. မ့ၢ်ပဘၣ်သး ဃုထံၣ်ထဲ ပှၤလၢအတီခိၣ်ရိၤမဲတၢ်တဖၣ် အတၢ်ကမၣ်ဧါ.’ ပမ့ၢ်သ့ၣ်ညါလီၤပသးလၢ ပကဘၣ်မၤဂ့ၤထီၣ်က့ၤ ပတၢ်ထံၣ် ဒီးပမ့ၢ်မၤဂ့ၤထီၣ်က့ၤအီၤ တဘျီဃီန့ၣ် ပကမၤသးခု ယဟိဝၤယွၤအသး.—ကတိၤဒိ ၃:၃၄, ၃၅.
၁၁. “ပှၤဟးဂီၤဖိ” တဖၣ်န့ၣ်ထံၣ်ဝဲ ယဟိဝၤယွၤ အတၢ်သိၣ်တၢ်သီ ဒ်လဲၣ်.
၁၁ ပှၤသၢဖုတဖုန့ၣ် အကဲဝဲ “ပှၤဟးဂီၤဖိ.” ပှၤသ့ၣ်တဖၣ်အံၤ တအိၣ်မူမၤထွဲဝဲ ကစၢ်ယွၤ အတၢ်သိၣ်တၢ်သီဘၣ်. အဝဲသ့ၣ် ဆိမိၣ်လီၤအသး လၢအဘၣ်ထီဘိ ဒီးမၤဖဲဒၣ်အသးအဃိ အဝဲသ့ၣ်ကဲ ပှၤဟးဂီၤဖိ. (ကတိၤဒိ ၁၂:၁၅) တကးဒံးဘၣ် အဝဲသ့ၣ် တတူၢ်လိာ် တၢ်ကူၣ်သ့လၢ အဟဲလၢ ယဟိဝၤယွၤအအိၣ်ဘၣ်. (စံးထီၣ်ပတြၢၤ ၅၃:၁) ဖဲပဟးစံၣ်တဲၤတဲလီၤတၢ်အခါ တဘျီတခီၣ်န့ၣ် ပတိဘၣ်ဒီး ပှၤသ့ၣ်တဖၣ်အံၤကၠ့ၤ. ဒီးခီဖျိလၢ ပအိၣ်မူမၤထွဲ လံာ်စီဆှံ အတၢ်ဟံးစုနဲၣ်ကျဲအဃိ အဝဲသ့ၣ်တဲဆါပှၤ. သနာ်က့ အဝဲသ့ၣ်ဟ့ၣ်ပှၤ တၢ်ဟ့ၣ်ကူၣ် လၢအဂ့ၤန့ၢ် လံာ်စီဆှံ အတၢ်ဟံးစုနဲၣ်ကျဲန့ၣ် မၣ်တသ့ဘၣ်. အဃိ လံာ်စီဆှံ တဲဝဲလၢ “ပှၤဟးဂီၤဖိ မၤန့ၢ်ဝဲ တၢ်ကူၣ်သ့နီၢ်ကီၢ် တသ့ဘၣ်. ဒီးဖဲဝ့ၢ်အတြဲၤန့ၣ် အတဲတၢ် တဘၣ်နီတမံၤဘၣ်.” (ကတိၤဒိ ၂၄:၇) ပထံၣ်ဘၣ်လၢ ပှၤဟးဂီၤဖိန့ၣ် တအိၣ်ဒီး တၢ်ကူၣ်သ့နီၢ်ကီၢ်ဘၣ်အဃိ အဝဲသ့ၣ်ဟ့ၣ်ပှၤ တၢ်ဟ့ၣ်ကူၣ်လၢအဂ့ၤ တသ့ဘၣ်. အဃိ ယဟိဝၤယွၤ ဟ့ၣ်ပလီၢ်ပှၤလၢ ပကဘၣ် “အိၣ်ယံၤယံၤဒီး” “ပှၤဟးဂီၤဖိ.”—ကတိၤဒိ ၁၄:၇.
၁၂. ပမ့ၢ်တဘၣ်သးလီၤဂာ်ဒီး ပှၤဟးဂီၤဖိဘၣ်န့ၣ် ပကဘၣ်မၤဒ်လဲၣ်.
၁၂ ပမ့ၢ်တဘၣ်သးလီၤဂာ်ဒီး ပှၤဟးဂီၤဖိဘၣ်န့ၣ် ပကဘၣ်မၤထွဲ ကစၢ်ယွၤ အတၢ်သိၣ်တၢ်သီ ဒီးဂုာ်ကျဲးစၢးအိၣ်ဒီးတၢ်ထံၣ် ဒ်သိးဒီးကစၢ်ယွၤ. ပှၤဟးဂီၤဖိတဖၣ်န့ၣ် ခီဖျိလၢအဝဲသ့ၣ် တကနၣ်ဃုာ် ကစၢ်ယွၤ အတၢ်ဟ့ၣ်ကူၣ်ဘၣ်အဃိ အဝဲသ့ၣ်ထံၣ်ဘၣ်ဒီး တၢ်ကီတၢ်ခဲ. မ့မ့ၢ်လၢပဝဲဒၣ်န့ၣ် ပဒိကနၣ် ကစၢ်ယွၤအကလုၢ်အဃိ ပတၢ်အိၣ်မူဂ့ၤဒိၣ်န့ၢ်ဒံး အဝဲသ့ၣ်ဒံး. (စံးထီၣ်ပတြၢၤ ၃၂:၈, ၁၀) အဃိ ပမ့ၢ်ထိၣ်သတြီၤကွၢ် ပှၤလၢအတဒိကနၣ် ကစၢ်ယွၤ အတၢ်သိၣ်တၢ်သီ ဒီးပှၤလၢအဒိကနၣ် ကစၢ်ယွၤ အတၢ်သိၣ်တၢ်သီ အတၢ်အိၣ်မူန့ၣ် ကမၤစၢၤပှၤလၢ ပကဒိကနၣ်အါထီၣ် ကစၢ်ယွၤအကလုၢ်.
၁၃. မ့ၢ်ယဟိဝၤယွၤ မၢဆူၣ်ပှၤလၢ ပကတူၢ်လိာ် ဒီးမၤထွဲအတၢ်ဟ့ၣ်ကူၣ်ဧါ.
၁၃ ယဟိဝၤယွၤန့ၣ် အဘၣ်သးဟ့ၣ်လီၤ အတၢ်ကူၣ်သ့ ဒီးအဘၣ်သးဟ့ၣ်ကူၣ် ပှၤကီးဂၤဒဲး. ဘၣ်ဆၣ် ပှၤကတူၢ်လိာ် အတၢ်ဟ့ၣ်ကူၣ်ဧါ, တတူၢ်လိာ်ဧါန့ၣ် အတမၢန့ၢ်ဆူၣ်ဝဲဘၣ်. သနာ်က့ ပှၤလၢအတကနၣ်ဃုာ် အတၢ်ဟ့ၣ်ကူၣ်တဖၣ် ကထံၣ်ဘၣ်ဒီး တၢ်အိၣ်သးဒ်လဲၣ်န့ၣ် ကစၢ်ယွၤ တဲဆိပာ်စၢၤဝဲလံ. (ကတိၤဒိ ၁:၂၉-၃၂) တကးဒံးဘၣ် ပှၤလၢအတဘၣ်သးမၤထွဲ ယဟိဝၤယွၤ အတၢ်ဟ့ၣ်ကူၣ်တဖၣ်န့ၣ် ကထံၣ်ဘၣ်ဒီး တၢ်ကိၢ်တၢ်ဂီၤ, တၢ်ကီတၢ်ခဲ ဒီးလၢခံန့ၣ် ယဟိဝၤယွၤ ကမၤဟးဂီၤကွံာ်အဝဲသ့ၣ်. အဃိ ယဟိဝၤယွၤတဲဘၣ် ပှၤလၢအတကနၣ်ဃုာ် အတၢ်ဟ့ၣ်ကူၣ်ဘၣ်တဖၣ်န့ၣ်လၢ “သုကတူၢ်ဘၣ် တၢ်လၢသုကြၢးတူၢ်ဘၣ်.” မ့မ့ၢ်ပှၤလၢ အတူၢ်လိာ် ယဟိဝၤယွၤ အတၢ်ဟ့ၣ်ကူၣ် ဒီးအိၣ်မူမၤထွဲဝဲတဖၣ်န့ၣ် ယဟိဝၤယွၤ အၢၣ်လီၤအဝဲသ့ၣ်ဒ်အံၤ. ယဟိဝၤယွၤ တဲဝဲလၢ “ပှၤလၢ အဒိကနၣ်ယကလုၢ်န့ၣ် အဝဲသ့ၣ် ကအိၣ်ဘၣ် ဘံၣ်ဘံၣ်ဘၢဘၢ ဒီးအဝဲသ့ၣ် တလိၣ်ပျံၤ တၢ်နးတၢ်ဖှီၣ်နီတမံၤဘၣ်.”—ကတိၤဒိ ၁:၃၃.
တၢ်ကူၣ်သ့နီၢ်ကီၢ်န့ၣ် အကဲဘျုးလၢပဂီၢ်
၁၄-၁၅. ဖဲ ကတိၤဒိ ၄:၂၃ န့ၣ်ပမၤလိန့ၢ်ဘၣ် တၢ်မနုၤလဲၣ်.
၁၄ ပမ့ၢ်တူၢ်လိာ် ဒီးမၤထွဲကစၢ်ယွၤ အတၢ်ဟ့ၣ်ကူၣ်န့ၣ် အကကဲဘျုး လၢပဂီၢ်ထီဘိ. လၢတၢ်မၤလိတခါအံၤ ပသ့ၣ်ညါဘၣ်လၢ ယဟိဝၤယွၤန့ၣ် အဘၣ်သးဟ့ၣ်လီၤ အတၢ်ကူၣ်သ့လၢ ပှၤခဲလၢာ်အအိၣ်. အဒိ လၢလံာ်ကတိၤဒိအပူၤန့ၣ် အအိၣ်ဒီး တၢ်ဟ့ၣ်ကူၣ် လၢအကဲဘျုးဝဲထီဘိ. တၢ်ဟ့ၣ်ကူၣ်တဖၣ်အံၤ ပမ့ၢ်မၤထွဲအီၤန့ၣ် ပ တၢ်အိၣ်မူကဂ့ၤထီၣ် ဖးအါညါ. ခဲအံၤ ပကတဲသကီး တၢ်ဟ့ၣ်ကူၣ်လွံၢ်ခါ လၢအကဲဘျုးလၢပဂီၢ်.
၁၅ ဒီသဒၢနသး. လံာ်စီဆှံ တဲဝဲလၢ “မ့ၢ်လၢ နသးသမူ ဒိးသန့ၤထီၣ်အသးလၢ နသးအဖီခိၣ်အဃိ နကဘၣ်ဒီသဒၢနသး ဒိၣ်န့ၢ်ဒံး တၢ်အဂၤခဲလၢာ်.” (ကတိၤဒိ ၄:၂၃) ဆိကမိၣ်ကွၢ်မီၤ ပမ့ၢ်အဲၣ်ဒီးလၢ ပသးဖျၢၣ်ကမၤတၢ်ဂ့ၤဂ့ၤ ဒီးအိၣ်ဆူၣ်အိၣ်ချ့န့ၣ် ပကဘၣ်အီၣ် တၢ်အီၣ်လၢ အန့ၢ်ဂံၢ်န့ၢ်ဘါ, မၤနီၢ်ခိ အတၢ်ဟူးတၢ်ဂဲၤ ဒီးပကဘၣ်ဟးဆှဲး လုၢ်လၢ်လၢ အတဂ့ၤဘၣ်တဖၣ်. လၢနီၢ်သးတကပၤစ့ၢ်ကီး ပမ့ၢ်အဲၣ်ဒီး ဒီသဒၢပသးန့ၣ် ပကဘၣ်ဖး လံာ်စီဆှံ ကီးနံၤဒဲး. ပကဘၣ်ဖး ဒီးကတဲာ်ကတီၤပာ် တၢ်မၤလိလၢ လၢတၢ်အိၣ်ဖှိၣ်အဂီၢ်, ပကဘၣ်လဲၤထီၣ်တၢ်အိၣ်ဖှိၣ်, ပကဘၣ် ဟ့ၣ်ထီၣ်တၢ်စံးဆၢ လၢတၢ်အိၣ်ဖှိၣ်အပူၤ ဒီးပကဘၣ် စံၣ်တဲၤတဲလီၤတၢ် ဆူၣ်ဆူၣ်. တကးဒံးဘၣ် တၢ်မၤမုာ်မၤဖှံသး ဒီးတၢ်ရ့လိာ်သးလၢ အတဂ့ၤဘၣ် လၢအကဒုးအိၣ်ထီၣ် ပတၢ်ဆိကမိၣ် ဒီးလုၢ်လၢ်လၢအတဂ့ၤဘၣ်န့ၣ် ပကဘၣ်ဟးဆှဲးအီၤ.
၁၆. ဆၢကတီၢ်ခဲအံၤ ကတိၤဒိ ၂၃:၄, ၅ ကဲဘျုးလၢပဂီၢ်ဒ်လဲၣ်.
၁၆ သးမံဒီး တၢ်လၢအအိၣ်ဒီးနၤ. ကျိၣ်စ့ဒီးတၢ်ထူးတၢ်တီၤတဖၣ်န့ၣ် အလီၤမၢ်ကွံာ်သ့ ညီညီဖိလီၤ. အဃိ လံာ်စီဆှံ တဲဘၣ်ပှၤလၢ “မၤလီၤဘှံးနသးလၢ နကန့ၢ်ဘၣ် တၢ်ထူးတၢ်တီၤတဂ့ၤ.” “ဖဲနကွၢ်အီၤအခါ အတအိၣ်လၢၤဘၣ်. အကသလၣ်ထီၣ် အဒံး ဒ်လံာ်ကြီကြာ်အသိး ဒီးယူၤထီၣ်ကွံာ်လၢ မူခိၣ် သပှၢ်တၢၢ်.” (ကတိၤဒိ ၂၃:၄, ၅) ဆၢကတီၢ်ခဲအံၤန့ၣ် ပှၤကဲဒိၣ်မ့ၢ်ဂ့ၤ ပှၤဖှီၣ်ဖိမ့ၢ်ဂ့ၤ အဝဲသ့ၣ် ဘၣ်သးဃုအါထီၣ် ကျိၣ်စ့မၢ်မၢ်လီၤ. ခီဖျိလၢ အဝဲသ့ၣ် ဘၣ်သးန့ၢ်အါထီၣ် ကျိၣ်စ့အဃိ အမံၤမ့ၢ်ဟးဂီၤ, အတၢ်ရ့လိာ်သးဒီးပှၤဂၤ မ့ၢ်တဂ့ၤလၢၤဘၣ် ဒီးအတၢ်အိၣ်ဆူၣ်အိၣ်ချ့ မ့ၢ်ဘၣ်ဒိသနာ်က့ အဝဲသ့ၣ် ဆဲးဃုကျိၣ်စ့ဒံး. (ကတိၤဒိ ၂၈:၂၀; ၁ တံၤမသ့း ၆:၉, ၁၀) ပမ့ၢ်တဘၣ်သး လီၤဂာ်ဒ်သိးဒီး ပှၤသ့ၣ်တဖၣ်အံၤဘၣ်န့ၣ် ပကဘၣ်မၤထွဲ လံာ်စီဆှံ အတၢ်ဟ့ၣ်ကူၣ်. ပမ့ၢ်မၤထွဲ လံာ်စီဆှံ အတၢ်ဟ့ၣ်ကူၣ်မၣ် ပကအိၣ်ဒီး တၢ်ထံၣ်အကြၢးအဘၣ် ဘၣ်ဃးဒီးကျိၣ်စ့, ပကသးမံဒီး တၢ်လၢအအိၣ်ဒီးပှၤ ဒီးပကသးခုနီၢ်ကီၢ်.—စံၣ်တဲၤတဲလီၤတၢ် ၇:၁၂.
၁၇. ပမ့ၢ်ဘၣ်သး အိၣ်ဒီး “ပှၤကူၣ်တၢ်သ့ အပျ့ၤ” န့ၣ်ပကဘၣ်မၤဒ်လဲၣ်. (ကတိၤဒိ ၁၂:၁၈)
၁၇ တချုးလၢ နတဲတၢ်ဒံးဘၣ်န့ၣ် ဆိကမိၣ်ဆိ. ပမ့ၢ်တပလီၢ်ပသးဘၣ်န့ၣ် ပတၢ်ကတိၤတဖၣ် မၤဘၣ်ဒိပှၤဂၤသ့. အဃိ လံာ်စီဆှံ တဲဝဲလၢ “တၢ်ကတိၤလၢ ပှၤတဆိကမိၣ်ဆိအီၤဘၣ်ဒီး တဲအီၤန့ၣ် လီၤဂာ်ဒ်သိးဒီး နးလၢအဆဲးတၢ်တဘ့ၣ်, မ့မ့ၢ် ပှၤကူၣ်တၢ်သ့ အပျ့ၤန့ၣ် မၤဘျါက့ၤတၢ်လီၤ.” (ကတိၤဒိ ၁၂:၁၈) ပမ့ၢ်ဘၣ်သး အိၣ်ဃူအိၣ်ဖိးဒီးပှၤဂၤန့ၣ် ပှၤဂ့ၢ်လၢ အတမ့ၢ်တတီဘၣ်တဖၣ် ပတဘၣ်ဟးတဲဘၣ်. (ကတိၤဒိ ၂၀:၁၉) တကးဒံးဘၣ် ပမ့ၢ် အဲၣ်ဒီးလၢ ပတၢ်ကတိၤကမၤမုာ်ပှၤသး ဒီးတမၤဘၣ်ဒိပှၤသးဘၣ်န့ၣ် ပကဘၣ်ဖးလံာ်စီဆှံ ဒီးဆိကမိၣ်ထံအီၤ. (လူၤကၣ် ၆:၄၅) ပမ့ၢ်ဆိကမိၣ်ထံ တၢ်လၢလံာ်စီဆှံတဲဝဲန့ၣ် ပတၢ်ကတိၤတဖၣ် ကလီၤဂာ်ဒ်သိးဒီး “တၢ်ကူၣ်သ့ အထံထီၣ်ပၢၢ်” လၢကကဲထီၣ် တၢ်ဂံၢ်တၢ်ဘါ လၢပှၤဂၤအဂီၢ်.—ကတိၤဒိ ၁၈:၄.
၁၈. ပမ့ၢ်မၤထွဲ တၢ်ဟ့ၣ်ကူၣ်ဖဲ ကတိၤဒိ ၂၄:၆ န့ၣ်ကမၤစၢၤပှၤလၢ ပတၢ်စံၣ်တဲၤတဲလီၤတၢ် ဒီးတၢ်သိၣ်လိနဲၣ်လိတၢ် တကပၤဒ်လဲၣ်.
၁၈ မၤထွဲ တၢ်ကရၢကရိ အတၢ်ဟံးစုနဲၣ်ကျဲ. လံာ်စီဆှံ တဲဝဲလၢ “ဖဲနလဲၤဒုးတၢ်အခါ နကဘၣ် မၤထွဲ တၢ်ဟံးစုနဲၣ်ကျဲလၢ အဂ့ၤလီၤ. ဒီးပှၤဟ့ၣ်ကူၣ်တၢ် မ့ၢ်အိၣ်အါဂၤန့ၣ် နဒုးတၢ်ကနၢၤ.” (ကတိၤဒိ ၂၄:၆) ပမ့ၢ်မၤထွဲ လံာ်စီဆှံ အတၢ်ဟ့ၣ်ကူၣ် တခါအံၤ အကမၤစၢၤပှၤလၢ ပတၢ်စံၣ်တဲၤတဲလီၤတၢ် ဒီးတၢ်သိၣ်လိနဲၣ်လိတၢ် တကပၤဒ်လဲၣ်. အဒိ ဖဲပစံၣ်တဲၤတဲလီၤတၢ်အခါ ပတမၤ ဒ်ပနီၢ်ကစၢ်တၢ်ထံၣ်အသိးဘၣ် ဘၣ်ဆၣ် ပမၤထွဲ တၢ်ဟ့ၣ်ကူၣ်လၢ ပတၢ်ကရၢကရိ ဟ့ၣ်လီၤပှၤ. ဒီးပမ့ၢ်လဲၤထီၣ် တၢ်အိၣ်ဖှိၣ်န့ၣ် ပကဒိးန့ၢ်ဘၣ် တၢ်ဟ့ၣ်ကူၣ်တဖၣ်အံၤ. လၢတၢ်အိၣ်ဖှိၣ်န့ၣ် ပကနၢ်ဟူဘၣ် တၢ်စံၣ်တဲၤတဲလီၤ ဒီးထံၣ်ဘၣ် တၢ်အဒိလၢကမၤစၢၤပှၤ ဒ်သိးဒီး ပကမၤဂ့ၤထီၣ် ပတၢ်သ့တၢ်ဘၣ်လၢ တၢ်စံၣ်တဲၤတဲလီၤတၢ်အဂီၢ်. တကးဒံးဘၣ် ပတၢ်ကရၢကရိ ထုးထီၣ်န့ၢ်ပှၤ လံာ်လဲၢ်ဒီးတၢ်ဂီၤမူတဖၣ် လၢပကမၤစၢၤပှၤဂၤ ဒ်သိးအဝဲသ့ၣ် ကသ့ၣ်ညါထီၣ် တၢ်မ့ၢ်တၢ်တီ. နၤမီၤ, တၢ်ဟ့ၣ်ကူၣ်လၢ ပတၢ်ကရၢကရိ ဟ့ၣ်လီၤပှၤတဖၣ်အံၤ နမၤထွဲအီၤကၠ့ၤဧါ.
၁၉. ယဟိဝၤယွၤ အတၢ်ဟ့ၣ်ကူၣ်န့ၣ် နထံၣ်ဒ်လဲၣ်. (ကတိၤဒိ ၃:၁၃-၁၈)
၁၉ ဖး ကတိၤဒိ ၃:၁၃-၁၈. လၢလံာ်စီဆှံပူၤန့ၣ် ယဟိဝၤယွၤ ဟ့ၣ်လီၤပှၤ အတၢ်ဟ့ၣ်ကူၣ်အါမး အဃိ ပစံးဘျုးအီၤသပှၢ်တၢၢ်. တၢ်ဟ့ၣ်ကူၣ်တဖၣ်အံၤ ကဲဘျုးလၢ ပတၢ်အိၣ်မူ တနံၤဘၣ်တနံၤအဂီၢ် ဒီးအမၤသးခုပသး. နီၢ်ကီၢ်န့ၣ် ယဟိဝၤယွၤ အတၢ်ဟ့ၣ်ကူၣ်တဖၣ် အိၣ်ဝဲလၢ လံာ်စီဆှံဒီတဘ့ၣ်ညါ. သနာ်က့ လၢတၢ်မၤလိတခါအံၤန့ၣ် ပတဲသကီး ထဲတၢ်ဟ့ၣ်ကူၣ်တနီၤ လၢအအိၣ်လၢ လံာ်ကတိၤဒိအပူၤ. ပှၤဟီၣ်ခိၣ်ဖိ အါတက့ၢ်န့ၣ် တပာ်လုၢ်ပာ်ပှ့ၤ ယဟိဝၤယွၤ အတၢ်ဟ့ၣ်ကူၣ်ဘၣ်. မ့မ့ၢ်လၢပှၤန့ၣ် ပနာ်သပှၢ်တၢၢ်လၢ ‘ပမ့ၢ်ဟံးဃာ် [တၢ်ကူၣ်သ့] ကျၢၤကျၢၤန့ၣ် ပကသးခု.’ အဃိ ပကဘၣ် ဂုာ်ကျဲးစၢးမၤထွဲ ယဟိဝၤယွၤ အတၢ်ဟ့ၣ်ကူၣ် လၢပတၢ်အိၣ်မူ ကီးသနၢၣ်ဒဲး.
တၢ်သးဝံၣ် ၃၆ ပဘၣ်ဒီသဒၢပသး
^ ယဟိဝၤယွၤ အတၢ်ကူၣ်သ့န့ၣ် အပတီၢ်ထီန့ၢ်ဒံး တၢ်ကူၣ်သ့လၢဟီၣ်ခိၣ်ချၢ. လၢတၢ်မၤလိတခါအံၤ ပကတဲသကီး တၢ်အဒိ လၢအဘၣ်ဃးဒီး တၢ်ကူၣ်သ့နီၢ်ကီၢ် ကီးပသူထီၣ်ဖးဒိၣ် လၢကျဲပူၤ လၢအအိၣ်လၢ လံာ်ကတိၤဒိအပူၤ. တကးဒံးဘၣ် ပကတဲသကီးဘၣ်ဃးဒီး ပကကဲထီၣ် ပှၤကူၣ်တၢ်သ့အဂီၢ် ပကဘၣ်မၤဒ်လဲၣ်, ဘၣ်မနုၤအဃိ ပှၤတနီၤ တကနာ်ဃုာ် ယဟိဝၤယွၤ အတၢ်ကူၣ်သ့ဘၣ်လဲၣ်. ပမ့ၢ်ဒိကနၣ် ယဟိဝၤယွၤ အတၢ်ကူၣ်သ့န့ၣ် ကကဲဘျုးလၢပဂီၢ် ဒ်လဲၣ်.