တၢ်မၤလိ ၄၁
နဒိးန့ၢ်ဘၣ် တၢ်သးခုနီၢ်ကီၢ်သ့
“ပှၤလၢအပျံၤ ယဟိဝၤယွၤဒီးလဲၤတၢ်လၢ အကျဲကိးဂၤဒဲးန့ၣ် ကသးခုဝဲ.” —စံးထီၣ်ပတြၢၤ ၁၂၈:၁.
တၢ်သးဝံၣ် ၁၁၀ “တၢ်သးခုလၢ အဟဲလၢ ယဟိဝၤယွၤအအိၣ်”
တၢ်မၤလိအံၤ အတၢ်တိာ်ပာ် *
၁. ပလိၣ်ဘၣ် “ကစၢ်ယွၤ အတၢ်ဟံးစုနဲၣ်ကျဲန့ၣ်” အဲၣ်ဒီးတဲဝဲ အခီပညီဒ်လဲၣ် ဒီးအဘၣ်ဃးလိာ်သးဒီး ပတၢ်သးခုနီၢ်ကီၢ်ဒ်လဲၣ်.
တၢ်သးခုနီၢ်ကီၢ်န့ၣ် တမ့ၢ်ထဲ တၢ်တူၢ်ဘၣ်တခါလၢ အဟဲကဲထီၣ်အသး ဒီးလီၤမၢ်ကွံာ်ဘၣ်. ပှၤလၢအအိၣ်ဒီး တၢ်သးခုနီၢ်ကီၢ်န့ၣ် အကသးခုလၢ အတၢ်အိၣ်မူ ဒီတစိၤ. မ့မ့ၢ်ဒ်န့ၣ်န့ၣ် ပအိၣ်ဒီး တၢ်သးခုနီၢ်ကီၢ် ကသ့ဒ်လဲၣ်. ဖဲယ့ၣ်ၡူးစံၣ်တဲၤတဲလီၤတၢ် လၢကစၢၢ်ဒီခိၣ်အခါ အတဲဝဲလၢ “ပှၤလၢ အသ့ၣ်ညါလီၤအသးလၢ အလိၣ်ဘၣ် ကစၢ်ယွၤ အတၢ်ဟံးစုနဲၣ်ကျဲန့ၣ် ကသးခုဝဲ.” (မးသဲ ၅:၃) ယ့ၣ်ၡူး သ့ၣ်ညါဝဲလၢ တၢ်ဘၣ်တ့ကစၢ် ယဟိဝၤယွၤန့ၣ် အတ့လီၤပှၤဟီၣ်ခိၣ်ဖိဃုာ်ဒီး သးလၢကအဲၣ်ဒီးသ့ၣ်ညါ အတၢ်ဘၣ်တ့ကစၢ် ဒီးဘူၣ်ထီၣ်ဘါထီၣ်အီၤ. ဒီးယဟိဝၤယွၤန့ၣ် အကဲ “ကစၢ်ယွၤလၢ အသးခုတဂၤ” အဃိ ပှၤလၢ အဘူၣ်ထီၣ်ဘါထီၣ်အီၤန့ၣ် ကဒိးန့ၢ်ဘၣ်စ့ၢ်ကီး တၢ်သးခုနီၢ်ကီၢ်.—၁ တံၤမသ့း ၁:၁၁.
၂-၃. (က) ယ့ၣ်ၡူးတဲဝဲလၢ မတဂၤသ့ၣ်တဖၣ် အိၣ်ဒီးတၢ်သးခုနီၢ်ကီၢ် သ့လဲၣ်. (ခ) လၢတၢ်မၤလိအံၤန့ၣ် ပကတဲသကီး တၢ်ဂ့ၢ်မနုၤလဲၣ်.
၂ ပတၢ်ကီတၢ်ခဲ မ့ၢ်တအိၣ်ဘၣ်မၣ် ပကသးခုဧါ. နီၢ်ကီၢ်န့ၣ် ပတၢ်ကီတၢ်ခဲ မ့ၢ်အိၣ်နာ်က့ ပသးခုသ့ဒံး. ဖဲယ့ၣ်ၡူးစံၣ်တဲၤတဲလီၤတၢ်အခါ အတဲဝဲလၢ “ပှၤလၢ အသးအုး” ခီဖျိလၢ အတၢ်ကမၣ်အဃိ မ့တမ့ၢ် ခီဖျိလၢ အထံၣ်ဘၣ်ဒီး တၢ်ကီတၢ်ခဲ လၢအတၢ်အိၣ်မူပူၤန့ၣ် အသးခုသ့ဒံး. တကးဒံးဘၣ် “ပှၤလၢ အဘၣ်တၢ်မၤအၢမၤနးအီၤခီဖျိလၢ အမၤတၢ်တီတီလိၤလိၤအဃိ” န့ၣ်ယ့ၣ်ၡူးတဲဝဲလၢ အဝဲသ့ၣ်သးခုသ့စ့ၢ်ကီး. ဒီးပှၤလၢ အဘၣ်တၢ် “ဒုၣ်ဒွဲၣ်” အီၤခီဖျိလၢ အကဲယ့ၣ်ၡူးအပျဲၢ်အဘီၣ်အဃိန့ၣ် အသးခုစ့ၢ်ကီး. (မးသဲ ၅:၄, ၁၀, ၁၁) အဃိ ပမ့ၢ်ထံၣ်ဘၣ်ဒီး တၢ်အိၣ်သးဒ်အံၤန့ၣ် ပသးခု ကသ့ဒ်လဲၣ်.
၃ ယ့ၣ်ၡူးသိၣ်လိပှၤလၢ တၢ်သးခုနီၢ်ကီၢ်န့ၣ် တသန့ၤထီၣ်အသးလၢ ပတၢ်အိၣ်သးဂ့ၤ အဃိဘၣ်. တၢ်သးခုနီၢ်ကီၢ်န့ၣ် ဟဲခီဖျိလၢ ပသ့ၣ်ညါလီၤပသးလၢ ပလိၣ်ဘၣ် ကစၢ်ယွၤအတၢ်ဟံးစုနဲၣ်ကျဲ ဒီးပသုးဘူးပသးလၢ ကစၢ်ယွၤအအိၣ်. (ယၤကိာ် ၄:၈) အဃိ ဒ်သိးပကအိၣ်ဒီး တၢ်သးခုနီၢ်ကီၢ်အဂီၢ် ပကဘၣ်မၤဒ်လဲၣ်. လၢတၢ်မၤလိအံၤန့ၣ် ပကတဲသကီး တၢ်ဂ့ၢ်သၢခါ လၢပကဘၣ်မၤအီၤ.
ဟံန့ၢ်အီၣ် နီၢ်သးအတၢ်အီၣ်
၄. ဒ်သိးပကအိၣ်ဒီး တၢ်သးခုနီၢ်ကီၢ်အဂီၢ် ပကဘၣ်မၤမနုၤလဲၣ်. (စံးထီၣ်ပတြၢၤ ၁:၁-၃)
၄ တၢ်လၢပကဘၣ်မၤအီၤ အဆိကတၢၢ်တခါ. ဒ်သိးပကအိၣ်ဒီး တၢ်သးခုနီၢ်ကီၢ်အဂီၢ် ပကဘၣ် ဟံန့ၢ်အီၣ် နီၢ်သးအတၢ်အီၣ်. ပှၤဟီၣ်ခိၣ်ဖိ ဒီးဆၣ်ဖိကီၢ်ဖိတဖၣ်န့ၣ် ဒ်သိးကဆဲးအိၣ်မူအဂီၢ် ကဘၣ်အီၣ်ဝဲ နီၢ်ခိအတၢ်အီၣ်. ဘၣ်ဆၣ် ထဲဒၣ်ပှၤဟီၣ်ခိၣ်ဖိန့ၣ် အအီၣ်ဝဲ နီၢ်သးအတၢ်အီၣ်သ့. ဒီးအဝဲသ့ၣ်လိၣ်ဘၣ် နီၢ်သးအတၢ်အီၣ်စ့ၢ်ကီး. ယ့ၣ်ၡူးတဲဝဲလၢ “ပှၤဟီၣ်ခိၣ်ဖိ တမူဝဲထဲလၢ ကိၣ်အဃိဘၣ်. မ့မ့ၢ် မူဝဲလၢကယဲၢ် တၢ်ကတိၤလၢ အဟဲထီၣ်လၢ ယဟိဝၤယွၤ အထးခိၣ်.” (မးသဲ ၄:၄) အဃိ ပကဘၣ်ဟံန့ၢ်အီၣ် နီၢ်သးအတၢ်အီၣ် လၢလၢပှဲၤပှဲၤ ခီဖျိပဖးလံာ်စီဆှံ ကီးနံၤဒဲး. ပှၤကွဲးထါစံးထီၣ်ပတြၢၤတဂၤ တဲဝဲလၢ ပှၤလၢအ “ဘၣ်သူၣ်ဘၣ်သး ယဟိဝၤယွၤ အတၢ်သိၣ်တၢ်သီ ဒီးအဝဲဖးဝဲ ဒီးဆိကမိၣ်ထံဝဲ ကစၢ်ယွၤ အတၢ်သိၣ်တၢ်သီ လၢမုၢ်ဆါခီ ဒီးလၢမုၢ်နၤခီ” န့ၣ်အသးခုဝဲ.—ဖး စံးထီၣ်ပတြၢၤ ၁:၁-၃.
၅-၆. (က) လၢလံာ်စီဆှံပူၤန့ၣ် ပမၤလိဘၣ် တၢ်မနုၤလဲၣ်. (ခ) ပမ့ၢ်ဖးလံာ်စီဆှံန့ၣ် ကကဲဘျုးလၢ ပဂီၢ်ဒ်လဲၣ်.
၅ ယဟိဝၤယွၤ အဲၣ်ပှၤအဃိ ဒ်သိးပကအိၣ်ဒီး တၢ်သးခုနီၢ်ကီၢ်အဂီၢ် ပကဘၣ်မၤဒ်လဲၣ်န့ၣ် အဝဲတဲပၠးပှၤလၢ လံာ်စီဆှံပူၤ. ပမၤလိလံာ်စီဆှံအဃိ ပသ့ၣ်ညါဘၣ် ကစၢ်ယွၤ အတၢ်တိာ်ပာ် လၢပှၤဟီၣ်ခိၣ်ဖိအဂီၢ်, ပကကဲထီၣ် ကစၢ်ယွၤအသကီးအဂီၢ် ပကဘၣ်မၤဒ်လဲၣ် ဒီးကစၢ်ယွၤကပျၢ်ကွံာ် ပတၢ်ကမၣ်အဂီၢ် ပကဘၣ်မၤဒ်လဲၣ်. တကးဒံးဘၣ် ပသ့ၣ်ညါဘၣ်လၢ ပအိၣ်ဒီးတၢ်မုၢ်လၢ် လၢခါဆူညါအဂီၢ်စ့ၢ်ကီး. (ယံးရမံယၤ ၂၉:၁၁) ပသ့ၣ်ညါဘၣ် တၢ်မ့ၢ်တၢ်တီတဖၣ်အံၤ လၢလံာ်စီဆှံပူၤအဃိ ပသးခုဒိၣ်မး.
၆ လံာ်စီဆှံ အတၢ်ဟ့ၣ်ကူၣ်တဖၣ်န့ၣ် ကဲဘျုးလၢ ပတၢ်အိၣ်မူကီးနံၤဒဲး. ပသ့ၣ်ညါဘၣ်လၢ ပမ့ၢ်မၤထွဲ လံာ်စီဆှံအတၢ်ဟံးစုနဲၣ်ကျဲန့ၣ် ပကသးခုနီၢ်ကီၢ်. အဃိ နမ့ၢ်ထံၣ်ဘၣ် တၢ်ကီတၢ်ခဲ, ဒီးနသးဂံၢ်ဘါမ့ၢ်လီၢ်စၢ် တဘျီဂ့ၤတဘျီဂ့ၤန့ၣ် ဖးအါထီၣ်လံာ်စီဆှံ ဒီးဆိကမိၣ်ထံအီၤ. ယ့ၣ်ၡူးတဲဝဲလၢ “ပှၤလၢအနၢ်ဟူ ကစၢ်ယွၤ အကလုၢ်ကထါဒီး မၤထွဲဝဲန့ၣ် ကသးခုဝဲ.”—လူၤကၣ် ၁၁:၂၈.
၇. ဖဲပဖးလံာ်စီဆှံအခါ ဒ်သိးပကဒိးန့ၢ်အါထီၣ် အဘျုးအဂီၢ် ပကဘၣ်မၤဒ်လဲၣ်.
၇ ဖဲပဖးလံာ်စီဆှံအခါ ဒ်သိးပကဒိးန့ၢ်အါထီၣ် အဘျုးအဂီၢ် ပဘၣ်ဟံန့ၢ် တၢ်ဆၢကတီၢ် လၢပကဖးတၢ်ဂ့ၢ် ကယီကယီ ဒီးတဘၣ်ကရီဖးအီၤဘၣ်. အဒိ ပှၤတဂၤဖီဒုးအီၣ်ပှၤ တၢ်အီၣ်လၢပအီၣ်ဝံၣ် အဒိၣ်ကတၢၢ်တခွး. ဖဲပအီၣ် တၢ်အီၣ်တခွးန့ၣ်အခါ ပမ့ၢ်အီၣ်အီၤချ့ချ့ ဒီးဖဲပအီၣ်အီၤအခါ ပမ့ၢ်ဆိကမိၣ်တၢ်ဂ့ၢ် လၢအဂၤန့ၣ် ပတသ့ၣ်ညါထွဲ တၢ်အီၣ်အဝံၣ်အဘဲ မၤသးဒ်လဲၣ်န့ၣ်ဘၣ်. အဃိန့ၣ် ပကဘၣ်အီၣ်အီၤ ကယီကယီ. ဒ်န့ၣ်အသိး ပမ့ၢ်ကရီဖးလံာ်စီဆှံန့ၣ် ပတသ့ၣ်ညါထွဲ တၢ်ဂ့ၢ်လၢပဖးအီၤဘၣ်. အဃိ ဖဲပဖးလံာ်စီဆှံအခါ ပကဘၣ်ဟံန့ၢ် တၢ်ဆၢကတီၢ်, ထံၣ်တမှံကွၢ် တၢ်မၤအသးတဖၣ်, တၢ်ကလုၢ်သီၣ်ဒ်လဲၣ် ဒီးဆိကမိၣ်ထံ တၢ်ဂ့ၢ်လၢပဖးအီၤ. ပမ့ၢ်မၤဒ်န့ၣ်မၣ် ဖဲပဖးလံာ်စီဆှံအခါ ပကဒိးန့ၢ်အါထီၣ်အဘျုး ဒီးပကသးခုအါထီၣ်.
၈. “ကုၢ်လၢအတီ ဒီးအကူၣ်တၢ်သ့” မၤလၢပှဲၤဝဲ အမူဒါဒ်လဲၣ်. (ကွၢ်စ့ၢ်ကီး တၢ်ဂ့ၢ်အဘျဲၣ်.)
၈ ဒ်သိးပကဒိးန့ၢ်ဘၣ် နီၢ်သးအတၢ်အီၣ် လၢလၢပှဲၤပှဲၤအဂီၢ် ယ့ၣ်ၡူးဃုထၢထီၣ် “ကုၢ်လၢအတီ ဒီးအကူၣ်တၢ်သ့” လၢကဟ့ၣ်လီၤပှၤ နီၢ်သးအတၢ်အီၣ် ဖဲအဆၢကတီၢ်လၢ အကြၢးဝဲဘၣ်ဝဲ. * (မးသဲ ၂၄:၄၅) တၢ်ဂ့ၢ်တခါဂ့ၤတခါဂ့ၤ လၢကုၢ်လၢအတီ ထုးထီၣ်ဝဲန့ၣ် အဒိးသန့ၤထီၣ်အသးလၢ လံာ်စီဆှံအဆၢတဖၣ်. (၁ သ့းစၤလနံ ၂:၁၃) ဒီးနီၢ်သးအတၢ်အီၣ်တဖၣ်အံၤန့ၣ် ကမၤစၢၤပှၤဒ်သိးဒီး ပကနၢ်ပၢၢ်ထီၣ် ယဟိဝၤယွၤ အတၢ်ထံၣ် လၢလံာ်စီဆှံ ပာ်ဖျါထီၣ်ဝဲ. အဃိ ပဖးတၢးထီခိးတၢ် ဒီးပၢၢ်ထီၣ် မဲးကစံ ဒီးတၢ်ဂ့ၢ်တၢ်ကျိၤ လၢအအိၣ်လၢ jw.org အပူၤ. ပကတဲာ်ကတီၤပာ်စၢၤ တၢ်ဂ့ၢ်တၢ်ကျိၤလၢ နွံဖးဖီ ဒီးမုၢ်ဃုနံၤအိၣ်ဘှံးနံၤ တၢ်အိၣ်ဖှိၣ်အဂီၢ်. တကးဒံးဘၣ် ကီးလါဒဲးန့ၣ် ပကွၢ်ဘၣ် JW တၢ်ဂီၤမူ အတၢ်ရဲၣ်တၢ်ကျဲၤ. အဃိ နီၢ်သးအတၢ်အီၣ်တဖၣ်အံၤ ပမ့ၢ်အီၣ်အီၤ ထီဘိန့ၣ် အကမၤစၢၤပှၤ ဒ်သိးဒီး ပကအိၣ်ဒီး တၢ်သးခုနီၢ်ကီၢ် ဒီးကမၤစၢၤပှၤလၢ ပကမၤ တၢ်လၢပကဘၣ်မၤအီၤ ခံခါတခါ.
အိၣ်မူမၤထွဲ ယဟိဝၤယွၤ အတၢ်သိၣ်တၢ်သီ
၉. ဒ်သိးပကအိၣ်ဒီး တၢ်သးခုနီၢ်ကီၢ်အဂီၢ် တၢ်လၢပကဘၣ်မၤအီၤ ခံခါတခါန့ၣ် ကဲဝဲမနုၤလဲၣ်.
၉ တၢ်လၢပကဘၣ်မၤအီၤ ခံခါတခါ. ဒ်သိးပကအိၣ်ဒီး တၢ်သးခုနီၢ်ကီၢ်အဂီၢ် ပကဘၣ် အိၣ်မူမၤထွဲ ယဟိဝၤယွၤ အတၢ်သိၣ်တၢ်သီ. ပှၤကွဲးထါစံးထီၣ်ပတြၢၤတဂၤ တဲဝဲလၢ “ပှၤလၢအပျံၤ ယဟိဝၤယွၤ ဒီးလဲၤတၢ်လၢ အကျဲကိးဂၤဒဲးန့ၣ် ကသးခုဝဲ.” (စံးထီၣ်ပတြၢၤ ၁၂၈:၁) ပပျံၤယဟိဝၤယွၤန့ၣ် အဲၣ်ဒီးတဲဝဲ ပပာ်ကဲယဟိဝၤယွၤဒိၣ်မး အဃိ တၢ်လၢ အတဘၣ်သးဝဲဘၣ်န့ၣ် ပတမၤနီတမံၤဘၣ်. (ကတိၤဒိ ၁၆:၆) ယဟိဝၤယွၤ အတၢ်သိၣ်တၢ်သီ လၢအဘၣ်ဃးဒီး တၢ်အဘၣ် ဒီးတၢ်အကမၣ် လၢလံာ်စီဆှံပူၤန့ၣ် ပဂုာ်ကျဲးစၢးမၤထွဲအီၤ လၢအဂ့ၤကတၢၢ်. (၂ ကရံၣ်သူး ၇:၁) တကးဒံးဘၣ် ပမ့ၢ်မၤတၢ်လၢ ယဟိဝၤယွၤ ဘၣ်သးဝဲ ဒီးဟးဆှဲးတၢ်လၢ ယဟိဝၤယွၤ သးဟ့ဝဲတဖၣ်န့ၣ် ပကသးခု.—စံးထီၣ်ပတြၢၤ ၃၇:၂၇; ၉၇:၁၀; ရိမ့ၤ ၁၂:၉.
၁၀. ရိမ့ၤ ၁၂:၂ ပာ်ဖျါထီၣ်ဝဲလၢ ပကဘၣ်မၤတၢ်မနုၤလဲၣ်.
၁၀ ဖး ရိမ့ၤ ၁၂:၂. ယဟိဝၤယွၤအိၣ်ဒီး တၢ်ခွဲးတၢ်ယာ်လၢ အကပာ်ပနီၣ် တၢ်အဘၣ် ဒီးတၢ်အကမၣ်န့ၣ် ပှၤတဂၤကသ့ၣ်ညါဝဲ တကးဒံးဘၣ် အကဘၣ်မၤထွဲဝဲစ့ၢ်ကီး. အဒိ ပှၤတဂၤ ကသ့ၣ်ညါဝဲလၢ ပဒိၣ်န့ၣ် အိၣ်ဒီးတၢ်ခွဲးတၢ်ယာ်လၢ ကပာ်လီၤတၢ်သိၣ်တၢ်သီ လၢပှၤနီကါဖိအဂီၢ်. ဘၣ်ဆၣ် ဘၣ်သ့ၣ်သ့ၣ် အတဘၣ်သး မၤထွဲဝဲဘၣ်. အဃိ အဝဲကနီကါ ချ့န့ၢ်ဒံး ပဒိၣ်ပာ်ပနီၣ်ဃာ်ဝဲဒံး. လၢတၢ်အဒိတခါအံၤန့ၣ် ပသ့ၣ်ညါဘၣ်လၢ ပမ့ၢ်နာ်လၢ ယဟိဝၤယွၤ တၢ်သိၣ်တၢ်သီ မ့ၢ်တၢ်အဂ့ၤကတၢၢ် လၢပဂီၢ်န့ၣ် ပကဘၣ်ပာ်ဖျါထီၣ်လၢ ပတၢ်မၤ. (ကတိၤဒိ ၁၂:၂၈) စီၤဒၤဝံးစ့ၢ်ကီး နာ်ဝဲဒ်န့ၣ်အဃိ အတဲယဟိဝၤယွၤလၢ “နဒုးသ့ၣ်ညါယၤလၢ တၢ်မူအကျဲလီၤ. လၢနမဲာ်ညါန့ၣ် တၢ်သးခု အိၣ်ဝဲအါမးလီၤ. ဒီးလၢနစုထွဲတခီန့ၣ် တၢ်သူၣ်ဖှံသးညီ အိၣ်ဝဲ လီၤစိၤလီၤထီ.”—စံးထီၣ်ပတြၢၤ ၁၆:၁၁.
၁၁-၁၂. (က) ပမ့ၢ်ထံၣ်ဘၣ်တၢ်ကီတၢ်ခဲ ဒီးပသးဂံၢ်ဘါမ့ၢ်လီၤစၢ်န့ၣ် ပကဘၣ်ပလီၢ်သးလၢ တၢ်မနုၤလဲၣ်. (ခ) ဖဲပဃုထၢ တၢ်မၤမုာ်မၤဖှံသးအခါ တၢ်ကတိၤလၢ အအိၣ်လၢ ဖံလံးပံၤ ၄:၈ အပူၤန့ၣ် မၤစၢၤပှၤဒ်လဲၣ်.
၁၁ ပမ့ၢ်ထံၣ်ဘၣ် တၢ်ကီတၢ်ခဲ ဒီးပသးဂံၢ်ဘါမ့ၢ်လီၢ်စၢ်န့ၣ် ဘၣ်သ့ၣ်သ့ၣ် ပကဘၣ်သးမၤ တၢ်တမံၤမံၤလၢ ကမၤလီၤမၢ်ကွံာ် ပတၢ်ကိၢ်တၢ်ဂီၤ ဒီးကမၤမုာ်ထီၣ်ပသး. ပဝဲအါဂၤန့ၣ် ပကတူၢ်ဘၣ်ဒ်န့ၣ် ဘၣ်ဆၣ် ဒ်သိး ပတမၤဘၣ်တၢ်လၢ ယဟိဝၤယွၤသးဟ့ဝဲတဂ့ၤအဂီၢ် ပကဘၣ်ပလီၢ်သး.—အ့းဖ့းစူး ၅:၁၀-၁၂, ၁၅-၁၇.
၁၂ တၢ်မၢဖိပီလူး ကွဲးဟ့ၣ်ဂံၢ်ဟ့ၣ်ဘါ ခရံာ်ဖိလၢဖံလံးပံၤ ဒ်သိး အဝဲသ့ၣ် ကဆဲးဆိကမိၣ် တၢ်ဂ့ၢ်သ့ၣ်တဖၣ်လၢ “အတီအလိၤ, တၢ်လၢအစီဆှံ, တၢ်လၢ အထိၣ်ဟူးထိၣ်ဂဲၤထီၣ်ပှၤ လၢကအဲၣ်တၢ်, . . . [ဒီး]တၢ်လၢအဂ့ၤ.” (ဖး ဖံလံးပံၤ ၄:၈.) တၢ်ဂ့ၢ်လၢ စီၤပီလူးတဲဝဲတခါအံၤ တဘၣ်ထွဲဒီး တၢ်မၤမုာ်မၤဖှံသး လိၤလိၤဘၣ်သနာ်က့ ဖဲပဃုထၢ တၢ်မၤမုာ်မၤဖှံသးအခါ ပမၤထွဲ တၢ်ဟံးစုနဲၣ်ကျဲတခါအံၤသ့. အဒိ ပကဘၣ် သံကွၢ်လီၤပသးလၢ တၢ်သးဝံၣ်လၢပဒိကနၣ်, တၢ်ဂီၤမူလၢပကွၢ်, လံာ်လဲၢ်လၢပဖး ဒီးဘံၤဒံးအိၤက့ လၢပလိၣ်ကွဲတဖၣ်န့ၣ် အဘၣ်လိာ်သးဒီး တၢ်ဂ့ၢ်လၢ စီၤပီလူးပာ်ဖျါထီၣ်ဝဲဧါ. ပမ့ၢ်သံကွၢ်လီၤပသး ဒ်န့ၣ်မၣ် တၢ်လၢပဃုထၢတဖၣ်န့ၣ် မ့ၢ်ကစၢ်ယွၤ တူၢ်လိာ်အီၤသ့ဧါ တသ့ဘၣ်ဧါန့ၣ် ပကသ့ၣ်ညါ. တကးဒံးဘၣ် ယဟိဝၤယွၤ အတၢ်သိၣ်တၢ်သီ လၢအဂ့ၤဒိၣ်မးန့ၣ် ပဘၣ်မၤထွဲအီၤထီဘိ. (စံးထီၣ်ပတြၢၤ ၁၁၉:၁-၃) ပမ့ၢ်မၤဒ်န့ၣ်မၣ် ပကအိၣ်ဒီး သးလၢအသ့ၣ်ညါဒၣ်တၢ် လၢအကဆှီ, ပကအိၣ်ဒီး တၢ်သးခုနီၢ်ကီၢ် ဒီးကမၤစၢၤပှၤလၢ ပကမၤ တၢ်လၢပကဘၣ်မၤအီၤ သၢခါတခါ.—မၤတၢ် ၂၃:၁.
ပာ်ဆိတၢ်ဘူၣ်ထီၣ်ဘါထီၣ် ယဟိဝၤယွၤ လၢနီၣ်ဂံၢ်တၢ
၁၃. ဒ်သိးပကအိၣ်ဒီး တၢ်သးခုနီၢ်ကီၢ်အဂီၢ် တၢ်လၢပကဘၣ်မၤအီၤ သၢခါတခါန့ၣ် ကဲဝဲမနုၤလဲၣ်. (ယိၤဟၣ် ၄:၂၃, ၂၄)
၁၃ တၢ်လၢပကဘၣ်မၤအီၤ သၢခါတခါ. ဒ်သိးပကအိၣ်ဒီး တၢ်သးခုနီၢ်ကီၢ်အဂီၢ် လၢပတၢ်အိၣ်မူအပူၤန့ၣ် ပကဘၣ်ဂုာ်ကျဲးစၢး ပာ်ဆိတၢ်ဘူၣ်ထီၣ်ဘါထီၣ် ယဟိဝၤယွၤ လၢနီၣ်ဂံၢ်တၢ. ယဟိဝၤယွၤကဲ ပတၢ်ဘၣ်တ့ကစၢ်အဃိ ပကြၢးဘူၣ်ထီၣ်ဘါထီၣ်အီၤ. (လီၣ်ဖျါ ၄:၁၁; ၁၄:၆, ၇) ယဟိဝၤယွၤ အဲၣ်ဒီးဝဲလၢ ပကဘူၣ်ထီၣ်ဘါထီၣ်အီၤ “ဒ်သးစီဆှံ အတၢ်ဟံးစုနဲၣ်ကျဲအသိး ဒီးလၢတၢ်မ့ၢ်တၢ်တီ အပူၤ.” အဃိ အရ့ဒိၣ်လၢ ပကဘၣ် ဘူၣ်ထီၣ်ဘါထီၣ် ယဟိဝၤယွၤ ဒ်အဘၣ်သးဝဲအသိး. (ဖး ယိၤဟၣ် ၄:၂၃, ၂၄.) ပတၢ်ဘူၣ်ထီၣ်ဘါထီၣ်န့ၣ် ကဘၣ်ဘၣ်လိာ်သးဒီး တၢ်မ့ၢ်တၢ်တီလၢ အအိၣ်လၢ လံာ်စီဆှံပူၤအဃိ ပကဘၣ်ပျဲလၢ သးစီဆှံဟံးစုနဲၣ်ကျဲပှၤ. ဒီးပမ့ၢ်အိၣ်ဘၣ်တၢ်လီၢ်လၢ ပဒိၣ်တြီဃာ် ပတၢ်ဖံးတၢ်မၤ ဒီးတဟ့ၣ်အခွဲးနီတစဲးဘၣ် သနာ်က့ အရ့ဒိၣ်လၢ ပကဘၣ် ပာ်ဆိတၢ်ဘူၣ်ထီၣ်ဘါထီၣ် ယဟိဝၤယွၤ လၢနီၣ်ဂံၢ်တၢ. ဆၢကတီၢ်ခဲအံၤန့ၣ် ပဒီပုၢ်ဝဲၢ်မုၣ်ခွါအဂၤ ၁၀၀ ဘျဲၣ် လီၤဘၣ်လၢဃိာ်ပူၤ မ့ၢ်လၢအဝဲသ့ၣ်ကဲ ယဟိဝၤပှၤအုၣ်အသးအဃိ. * အဝဲသ့ၣ် ဘၣ်အိၣ်လၢဃိာ်ပူၤ သနာ်က့ တသ့ဖဲအသ့န့ၣ် အဝဲသ့ၣ်ဃ့ဘါထုကဖၣ်, မၤလိလံာ်စီဆှံ ဒီးဂုာ်ကျဲးစၢးတဲဘၣ် ပှၤဂၤလၢ ကစၢ်ယွၤ ဒီးအဘီမုၢ်အဂ့ၢ်. ပှၤမ့ၢ်တဲဆါပှၤ ဒီးမၤအၢမၤနးပှၤနာ်က့ ပသ့ၣ်ညါလၢ ကစၢ်ယွၤ ကအိၣ်ဒီးပှၤ ဒီးကဆိၣ်ဂ့ၤပှၤအဃိ ပသးခု.—ယၤကိာ် ၁:၁၂; ၁ ပ့းတရူး ၄:၁၄.
တၢ်လဲၤခီဖျိနီၢ်ကီၢ်
၁၄. ဒီပုၢ်ဝဲၢ်ခွါသးစၢ်တဂၤ လၢအအိၣ်လၢ ထးကၠံကံစတါန့ၣ် တၢ်ကဲထီၣ်သးဒီးအီၤဒ်လဲၣ် ဒီးဘၣ်မနုၤအဃိလဲၣ်.
၁၄ ပဒီပုၢ်ဝဲၢ်မုၣ်ခွါတနီၤ အတၢ်လဲၤခီဖျိန့ၣ် ပာ်ဖျါထီၣ်ဝဲလၢ အဝဲသ့ၣ် တၢ်အိၣ်သး မ့ၢ်အိၣ်ဒ်လဲၣ်ဂ့ၤ ဒ်လဲၣ်ဂ့ၤနာ်က့ မ့ၢ်လၢအဝဲသ့ၣ်မၤထွဲဝဲ တၢ်လၢအကဘၣ်မၤဝဲ သၢခါအံၤအဃိ အဝဲသ့ၣ်အိၣ်ဒီး တၢ်သးခုနီၢ်ကီၢ်. ပကကွၢ်သကီး ဒီပုၢ်ဝဲၢ်ခွါ ကၠိၤဝါဒၢၤ ဘၤဘၤကၠိနိၤ လၢအအိၣ်လၢ ထးကၠံကံစတါ အတၢ်လဲၤခီဖျိ. ဒီပုၢ်ဝဲၢ်ခွါအံၤ အသးနံၣ်အိၣ်ဝဲ ၁၉ နံၣ် ဒီးအတလဲၤကဲသုးဘၣ်. အဃိ ဖဲ ၂၀၁၉ လါအီးကထိဘၢၣ် ၄ သီန့ၣ် ပှၤဟဲဖီၣ်အီၤလၢအဟံၣ် ဒီးပှၤပာ်အီၤလၢ ဃိာ်ပူၤတဘျုးလါညါ. တကးဒံးဘၣ် ပှၤပာ်ပနီၣ်အီၤ ဒ်သိးဒီး ပှၤအၢပှၤသီတဂၤ. တၢ်ကစီၣ်ဘၣ်ဃးဒီး တၢ်တတီတလိၤလၢ ဒီပုၢ်ဝဲၢ်ခွါတဂၤအံၤ ထံၣ်ဘၣ်ဝဲန့ၣ် ရၤလီၤအသးလၢ ထံကီၢ်တဘျုးဘ့ၣ်ညါ. ဒီပုၢ်ဝဲၢ်ခွါတဂၤအံၤ ပှၤတီၢ်အီၤ ဒီးပှၤဆီၣ်သနံးအီၤလၢ အကမၤတၢ်အၢၣ်လီၤ လၢထံကီၢ်အဂီၢ် ဒီးကသီးဝဲ သုးအတၢ်ကူတၢ်ကၤ. ဒီးစံၣ်ညီၣ်ကွီၢ်န့ၣ် ဆၢတဲာ်ဝဲလၢ အတၢ်ကမၣ်အိၣ် အဃိ ပှၤပၢနုာ်အီၤလၢဃိာ်ပူၤ. ဘၣ်ဆၣ်လၢခံန့ၣ် ကီၢ်ခိၣ်ပျၢ်ကွံာ်အီၤ ဒီးအဟးထီၣ်ဘၣ်လၢဃိာ်ပူၤ. ပထံၣ်ဘၣ်လၢ ဒီပုၢ်ဝဲၢ်ခွါ ကၠိၤဝါဒၢၤန့ၣ် အပာ်ဆိ အနီၢ်သးတၢ်လိၣ်ဘၣ် လၢညါအဃိ ဖဲအထံၣ်ဘၣ် တၢ်အိၣ်သးဒ်န့ၣ်အခါ အဝဲဆဲးအိၣ်ဒီးတၢ်သးတီ ဒီးတၢ်သးခုနီၢ်ကီၢ်.
ဒီပုၢ်ဝဲၢ်ခွါ ကၠိၤဝါဒၢၤန့ၣ် ဟံန့ၢ်အီၣ်ဝဲ နီၢ်သးအတၢ်အီၣ်, အိၣ်မူမၤထွဲဝဲ ယဟိဝၤယွၤ အတၢ်သိၣ်တၢ်သီ ဒီးပာ်ဆိဝဲ တၢ်ဘူၣ်ထီၣ်ဘါထီၣ် ယဟိဝၤယွၤ လၢနီၣ်ဂံၢ်တၢ လၢအတၢ်အိၣ်မူအပူၤ (ကွၢ်လံာ်အဆၢ ၁၅-၁၇)
၁၅. ဖဲဒီပုၢ်ဝဲၢ်ခွါ ကၠိၤဝါဒၢၤ အိၣ်လၢဃိာ်ပူၤအခါ အဟံန့ၢ်အီၣ်ဝဲ နီၢ်သးတၢ်အီၣ်ဒ်လဲၣ်.
၁၅ ဖဲဒီပုၢ်ဝဲၢ်ခွါ ကၠိၤဝါဒၢၤ အိၣ်လၢဃိာ်ပူၤအခါ အလံာ်စီဆှံဒီး တၢ်ကရၢကရိလံာ်လဲၢ်တဖၣ် တအိၣ်ဘၣ်. သနာ်က့ အဝဲဟံန့ၢ်အီၣ်ဝဲ နီၢ်သးအတၢ်အီၣ်. အဝဲဒိးန့ၢ်ဘၣ် နီၢ်သးအတၢ်အီၣ်ဒ်လဲၣ်. ဖဲဒီပုၢ်ဝဲၢ်မုၣ်ခွါတဖၣ် ဟဲစိာ်န့ၢ်အီၤ တၢ်အီၣ်အခါ အဝဲသ့ၣ်ကွဲးလီၤဝဲ လံာ်စီဆှံအဆၢ လၢတၢ်အီၣ်အထၢၣ်လိၤ. အဃိ အဝဲဖးဘၣ်လံာ်စီဆှံအဆၢ ဒီးဆိကမိၣ်ထံဘၣ်ဝဲ ကီးနံၤဒဲး. ဒီးလၢခံ ဖဲအဟးထီၣ်ဘၣ်လၢ ဃိာ်ပူၤအခါ အဝဲဟ့ၣ်ကူၣ် ပှၤလၢအတထံၣ်ဘၣ်ဒီး တၢ်မၤကွၢ်နီတဘျီဒံးဘၣ် တဖၣ်န့ၣ် ဒ်အံၤ. အတဲဝဲလၢ “ဖဲပတၢ်ခွဲးတၢ်ယာ်အိၣ်ဒံးအခါ အရ့ဒိၣ်ဒိၣ်မးလၢ ပကဖးလံာ်စီဆှံ, ဖးတၢ်ကရၢကရိလံာ်လဲၢ်တဖၣ် ဒီးဃုသ့ၣ်ညါအါထီၣ် ယဟိဝၤယွၤအဂ့ၢ်.”
၁၆. ဒီပုၢ်ဝဲၢ်ခွါ ကၠိၤဝါဒၢၤန့ၣ် အသးစၢၢ်ဆၢဝဲ တၢ်ဂ့ၢ်မနုၤလဲၣ်.
၁၆ ပဒီပုၢ်ဝဲၢ်ခွါ ကၠိၤဝါဒၢၤန့ၣ် အိၣ်မူမၤထွဲဝဲ ယဟိဝၤယွၤ အတၢ်သိၣ်တၢ်သီ. အဝဲတဆိကမိၣ်ဝဲ တၢ်မိၣ်န့ၢ်သးလီ လၢအတဂ့ၤဘၣ် ဒီးအတမၤ တၢ်အၢတၢ်သီဘၣ်. အဝဲသးစၢၢ်ဆၢလၢ ယဟိဝၤယွၤ ဒီးတၢ်လၢယဟိဝၤယွၤ ဘၣ်သးဝဲတဖၣ်. ဒီပုၢ်ဝဲၢ်ခွါ ကၠိၤဝါဒၢၤန့ၣ် ဆိကမိၣ်ထံဝဲ ယဟိဝၤယွၤ အတၢ်ဘၣ်တ့ လၢအဃံလၤတဖၣ်အဂ့ၢ်. အဒိ ဖဲအပၢၢ်ထီၣ် ကီးဂီၤဒဲးန့ၣ် အဒိကနၣ်ဝဲ ထိၣ်ကီးသီၣ်ဒီးသးဝံၣ်တၢ်. မ့မ့ၢ်လၢ မုၢ်နၤခီဟီန့ၣ် အကွၢ်ထီၣ်ဝဲ လါဒီးဆၣ်တဖၣ်. အတဲဝဲလၢ “ယဟိဝၤယွၤ အတၢ်ဟ့ၣ်တဖၣ်အံၤန့ၣ် မၤသးခုယသး ဒီးကဲထီၣ်တၢ်ဂံၢ်တၢ်ဘါ လၢယဂီၢ်.” အဃိ ပသ့ၣ်ညါဘၣ်လၢ ပမ့ၢ်ပာ်လုၢ်ပာ်ပှ့ၤ တၢ်လၢယဟိဝၤယွၤ ဟ့ၣ်ပှၤလၢနီၢ်သးတကပၤ ဒီးလၢနီၢ်ခိတကပၤန့ၣ် ပကအိၣ်ဒီး တၢ်သးခုနီၢ်ကီၢ် ဒီးပကအိၣ်ဒီး တၢ်ဂံၢ်တၢ်ဘါလၢ ပလဲၤခီဖျိတၢ်ကန့ၢ်.
၁၇. တၢ်ကတိၤဖဲ ၁ ပ့းတရူး ၁:၆, ၇ န့ၣ်မၤစၢၤဝဲ ပှၤလၢအတၢ်အိၣ်သး လီၤဂာ်ဒီး ဒီပုၢ်ဝဲၢ်ခွါ ကၠိၤဝါဒၢၤန့ၣ် ကသ့ဒ်လဲၣ်.
၁၇ ဒီပုၢ်ဝဲၢ်ခွါ ကၠိၤဝါဒၢၤ ပာ်ဆိတၢ်ဘူၣ်ထီၣ်ဘါထီၣ် ယဟိဝၤယွၤ လၢနီၣ်ဂံၢ်တၢ. ယ့ၣ်ၡူးတဲဝဲလၢ “နကဘၣ် ဘူၣ်ထီၣ်ဘါထီၣ် နကစၢ်ယဟိဝၤယွၤ ဒီးနကဘၣ်မၤထဲ အတၢ်.” (လူၤကၣ် ၄:၈) အဃိ ဒီပုၢ်ဝဲၢ်ခွါအံၤ သ့ၣ်ညါဝဲလၢ အရ့ဒိၣ်လၢ အကဘၣ်သးတီဒီး ကစၢ်ယွၤထီဘိ. သုးခိၣ် ဒီးပှၤသုးဖိတဖၣ် တဘၣ်သးဝဲလၢ ဒီပုၢ်ဝဲၢ်ခွါ ကၠိၤဝါဒၢၤ ကကနၣ်ဃုာ် အတၢ်ဘူၣ်တၢ်ဘါလၢၤဘၣ်. ဘၣ်ဆၣ် ဒီပုၢ်ဝဲၢ်ခွါ ကၠိၤဝါဒၢၤ ဃ့ထုကဖၣ် ကီးနံၤဒဲး ကီးနၤဒဲး ဒ်သိးယဟိဝၤယွၤ ကမၤစၢၤအီၤ လၢအကဆဲးအိၣ်ဒီး တၢ်သးတီ ဒီးအတဟ့ၣ်ၡူတဂ့ၤအဂီၢ်. ဒီပုၢ်ဝဲၢ်ခွါ ကၠိၤဝါဒၢၤ ထံၣ်ဘၣ်ဒီး တၢ်တတီတလိၤဒ်အံၤ သနာ်က့ အဝဲဆဲးအိၣ်ဒီး တၢ်သးတီ. ပှၤက့ၤဖီၣ်အီၤ, တီၢ်အီၤ ဒီးအလီၤဘၣ်လၢဃိာ်ပူၤ သနာ်က့ အသးခု ဒီးအတၢ်နာ် အိၣ်အါန့ၢ်ဒံးလၢညါ.—ဖး ၁ ပ့းတရူး ၁:၆, ၇.
၁၈. ဒ်သိးပကဆဲးအိၣ်ဒီး တၢ်သးခုနီၢ်ကီၢ်အဂီၢ် ပကဘၣ်မၤဒ်လဲၣ်.
၁၈ ပကအိၣ်ဒီးတၢ်သးခုနီၢ်ကီၢ်အဂီၢ် ပကဘၣ်မၤဒ်လဲၣ်န့ၣ် ယဟိဝၤယွၤသ့ၣ်ညါဝဲ. အဃိ ဒ်သိးပကအိၣ်ဒီး တၢ်သးခုနီၢ်ကီၢ်အဂီၢ် ပမ့ၢ်မၤတၢ်ဂ့ၢ်သၢခါလၢ ပကဘၣ်မၤအီၤန့ၣ် ပမ့ၢ်ထံၣ်ဘၣ်ဒီးတၢ်ကီတၢ်ခဲနာ်က့ ပဆဲးအိၣ်ဒီးတၢ်သးခုနီၢ်ကီၢ်သ့. ဒီးပကသးခု ဒ်သိးဒီး ပှၤကွဲးထါစံးထီၣ်ပတြၢၤတဂၤ လၢအတဲဝဲလၢ “ပှၤလၢ အကစၢ်ယွၤမ့ၢ် ယဟိဝၤယွၤန့ၣ် ကသးခုဝဲ.”—စံးထီၣ်ပတြၢၤ ၁၄၄:၁၅.
တၢ်သးဝံၣ် ၈၉ ကနၣ်, မၤထွဲ, ဘၣ်ဆိၣ်ဂ့ၤ
^ ပှၤအါဂၤန့ၣ် ဆိကမိၣ်ဝဲလၢ အမ့ၢ်လူၤတၢ်မုာ်တၢ်ပၠီၣ်, အမ့ၢ်အိၣ်ဒီး တၢ်ထူးတၢ်တီၤ, တၢ်မံၤဟူသၣ်ဖျါ ဒီးတၢ်စိတၢ်ကမီၤမၣ် အကအိၣ်ဒီး တၢ်သးခုနီၢ်ကီၢ်. ဘၣ်ဆၣ် တၢ်သ့ၣ်တဖၣ်န့ၣ် တဟ့ၣ်အဝဲသ့ၣ် တၢ်သးခုနီၢ်ကီၢ်ဘၣ်. ဖဲယ့ၣ်ၡူးအိၣ်လၢ ဟီၣ်ခိၣ်ချၢအခါ အတဲဘၣ်ပှၤလၢ ဒ်သိးပကအိၣ်ဒီး တၢ်သးခုနီၢ်ကီၢ်အဂီၢ် ပကဘၣ်မၤဒ်လဲၣ်. လၢတၢ်မၤလိအံၤန့ၣ် ပကတဲသကီး တၢ်ဂ့ၢ်သၢခါလၢ ပကဘၣ်မၤအီၤ ဒ်သိးပကအိၣ်ဒီး တၢ်သးခုနီၢ်ကီၢ်.
^ ကွၢ်တၢ်ဂ့ၢ်လၢအမ့ၢ် “Are You Receiving ‘Food at the Proper Time’?” in the August 15, 2014, issue of The Watchtower.
^ နမ့ၢ်အဲၣ်ဒီး သ့ၣ်ညါအါထီၣ် တၢ်ဂ့ၢ်န့ၣ် ကွၢ်လၢ “Imprisoned for Their Faith” on jw.org.
^ တၢ်ဂီၤ အခီပညီ– တၢ်ဂီၤတဘ့ၣ်အံၤ ပာ်ဖျါထီၣ်ဝဲ တၢ်မၤအသးဖဲ ပှၤက့ၤဖီၣ်ဒီပုၢ်ဝဲၢ်ခွါတဂၤလၢ စံၣ်ညီၣ်ကွီၢ်အရူ ဒ်သိးပှၤကသံကွၢ်သံဒိးအီၤ ဒီးဒီပုၢ်ဝဲၢ်မုၣ်ခွါတဖၣ် လဲၤဆီၣ်ထွဲမၤစၢၤအီၤ.
