၁-၂. ဖဲပဖးလံာ်စီဆှံအခါ ပကဘၣ်မၤဒ်လဲၣ်. ဟ့ၣ်တၢ်အဒိ.

 ထံၣ်တမှံကွၢ်လၢ နကပှ့ၤဟံၣ်တဖျၢၣ်. တချုးလၢ နကပှ့ၤဟံၣ်တဖျၢၣ်အံၤဒံးဘၣ်န့ၣ် နကမၤဆိမနုၤလဲၣ်. နကွၢ်ဟံၣ်တဖျၢၣ်အံၤ အဂီၤလၢတၢ်ဂီၤပူၤန့ၣ် တလၢပှဲၤဒံးဘၣ်. နကဘၣ်သး လဲၤကွၢ်ဟံၣ်အံၤ လၢနနီၢ်ကစၢ်. နကဘၣ်သး လဲၤတရံးကွၢ်ဟံၣ်အံၤ ဒီးလဲၤနုာ်လီၤကွၢ်လၢ ဟံၣ်အဒၢးပူၤခဲလၢာ် ဒီးကွၢ်ထံကွၢ်ဆးဟံၣ်ဒီတဖျၢၣ် လီၤတံၢ်လီၤဆဲး. ထဲန့ၣ်တကးဒံးဘၣ် နကဘၣ်သး သ့ၣ်ညါလၢ ဟံၣ်အံၤပှၤတ့အီၤဒ်လဲၣ် ဒီးပှၤတ့ဝဲလၢ အခါဖဲလဲၣ်. နမၤဒ်အံၤန့ၣ် ခီဖျိလၢ နဘၣ်သးသ့ၣ်ညါ ဟံၣ်တဖျၢၣ်အံၤအဂ့ၢ် ဂ့ၤဂ့ၤအဃိ.

^၂ ဖဲပဖးဒီးမၤလိ လံာ်စီဆှံအခါ ပကဘၣ်မၤဒ်န့ၣ်. ပှၤကူၣ်ဘၣ်ကူၣ်သ့ လၢလံာ်စီဆှံတဂၤ တဲဝဲလၢ “လံာ်စီဆှံန့ၣ် လီၤဂာ်ဒ်သိး တၢ်သူၣ်ထီၣ်ဖးဒိၣ်ဖးထီတဖျၢၣ်.” ဒ်သိး ပဖးလံာ်စီဆှံ ဒီးကနၢ်ပၢၢ်အီၤဂ့ၤဂ့ၤအဂီၢ် ပကဘၣ်မၤဒ်လဲၣ်. ပမ့ၢ်ကရီဖးအီၤချ့ချ့န့ၣ် ပကသ့ၣ်ညါ တၢ်ဂ့ၢ်တၢ်ကျိၤ ထဲတစဲးဖိ ဒီးပကသ့ၣ်ညါထဲ “ကစၢ်ယွၤ အကလုၢ်ကထါ အခီၣ်ထံးခီၣ်ဘိတဖၣ်.” (ဧ့ၤ ၅:၁၂) အဃိ ဖဲပဖးလံာ်စီဆှံအခါ ပကဘၣ်ဖးအီၤ လီၤတံၢ်လီၤဆဲး ဒီးဃုသ့ၣ်ညါ တၢ်ဂ့ၢ်တၢ်ကျိၤလၢ လံာ်စီဆှံအပူၤန့ၣ် ဘျးစဲလိာ်သးဒ်လဲၣ်. ဃုသ့ၣ်ညါ တၢ်မ့ၢ်တၢ်တီလၢ လံာ်စီဆှံအပူၤန့ၣ် မ့ၢ်မနုၤလဲၣ် ဒီးဘၣ်မနုၤအဃိ ပနာ်အီၤသ့လဲၣ်.

၃. တၢ်မၢဖိပီလူး ဟ့ၣ်ဂံၢ်ဟ့ၣ်ဘါဝဲ ဒီပုၢ်ဝဲၢ်မုၣ်ခွါတဖၣ် ဒ်လဲၣ် ဒီးဒီပုၢ်ဝဲၢ်မုၣ်ခွါတဖၣ် မ့ၢ်မၤဝဲဒ်န့ၣ်န့ၣ် ကကဲဘျုးဒ်လဲၣ်. (အ့းဖ့းစူး ၃:၁၄-၁၉)

^၃ ဒ်သိး ပကသ့ၣ်ညါ တၢ်မ့ၢ်တၢ်တီ လၢလံာ်စီဆှံအပူၤ လီၤတံၢ်လီၤဆဲးအဂီၢ် ပကဘၣ် ထဲးဂံၢ်ထဲးဘါ ဒီးဃုသ့ၣ်ညါအီၤ လီၤတံၢ်လီၤဆဲး. တၢ်မၢဖိစီၤပီလူး ဟ့ၣ်ဂံၢ်ဟ့ၣ်ဘါဝဲ ဒီပုၢ်ဝဲၢ်မုၣ်ခွါတဖၣ်လၢ ကမၤလိ ကစၢ်ယွၤကလုၢ်ကထါ ဒ်သိးအဝဲသ့ၣ် “ကနၢ်ပၢၢ်ထီၣ် လီၤတံၢ်လီၤဆဲးလၢ တၢ်မ့ၢ်တၢ်တီန့ၣ် အလဲၢ်ထဲလဲၣ်, အထီထဲလဲၣ်, အကစီၤထီထဲလဲၣ် ဒီးအယိာ် ထဲလဲၣ်.” အဝဲသ့ၣ် မ့ၢ်မၤဝဲဒ်န့ၣ်န့ၣ် တၢ်မ့ၢ်တၢ်တီ “အဂံၢ်” က “စဲၤလီၤအသးကျၢၤကျၢၤ” လၢအဝဲသ့ၣ် အသးပူၤ. (ဖး အ့းဖ့းစူး ၃:၁၄-၁၉.) ပဝဲစ့ၢ်ကီး ပကဘၣ်မၤဒ်န့ၣ်. ခဲအံၤ ပကတဲသကိး ဘၣ်ဃးဒီး ဒ်သိးပကသ့ၣ်ညါဘၣ် ကစၢ်ယွၤအကလုၢ်ကထါ အဒိၣ်အယိာ် ဒီးပကနၢ်ပၢၢ်အခီပညီ လီၤတံၢ်လီၤဆဲးအဂီၢ် ပကဘၣ်ဃုသ့ၣ်ညါအီၤဒ်လဲၣ်.

၄. ပကသုးဘူးပသးဆူ ယဟိဝၤယွၤအအိၣ်အဂီၢ် ပကဘၣ်မၤ မနုၤလဲၣ်. ဟ့ၣ်တၢ်အဒိ.

^၄ ပဝဲခရံာ်ဖိတဖၣ် ပမ့ၢ်သ့ၣ်ညါလံာ်စီဆှံအဂ့ၢ်ထဲတစဲးဖိန့ၣ် ပတကြၢးသးမံဒံးဘၣ်. ခီဖျိလၢ သးစီဆှံ အတၢ်မၤစၢၤအဃိ ပအဲၣ်ဒိးမၤလိအါထီၣ် “တၢ်ဂ့ၢ်အဒိၣ်အယိာ် လၢအဘၣ်ဃးဒီး ကစၢ်ယွၤအဂ့ၢ် စ့ၢ်ကီး.” (၁ ကရံၣ် ၂:၉, ၁၀) ဒ်သိးပတၢ်ရ့လိာ်သးဒီး ယဟိဝၤယွၤ ကဂ့ၤဒိၣ်ထီၣ်အဂီၢ် ပကဘၣ်မၤ နီၢ်ကစၢ် တၢ်မၤလိလံာ်စီဆှံ လီၤတံၢ်လီၤဆဲး. အဒိ ဃုသ့ၣ်ညါအါထီၣ် တၢ်ဂ့ၢ်ဘၣ်ဃးဒီး ယဟိဝၤယွၤ ပာ်ဖျါထီၣ် အတၢ်အဲၣ်လၢ အခ့အပှၤလၢပျၢၤတဖၣ် အဖီခိၣ် ဒီးလၢပဖီခိၣ်ဒ်လဲၣ်. ဃုသ့ၣ်ညါ ဘၣ်ဃးဒီး ယဟိဝၤယွၤ ရဲၣ်ကျဲၤဝဲ တၢ်ဘူၣ်တၢ်ဘါ အမ့ၢ်အတီလၢပျၢၤ ဒီးလၢဆၢကတီၢ်ခဲအံၤန့ၣ် လီၤဆီလိာ်သးဒ်လဲၣ်. မ့တမ့ၢ် ဃုသ့ၣ်ညါအါထီၣ် ဝံအတၢ်စံးပာ် ဘၣ်ဃးဒီး ယ့ၣ်ၡူးအတၢ်အိၣ်မူ လၢဟီၣ်ခိၣ်ချၢ ဒီးအတၢ်စံၣ်တဲၤတဲလီၤအဂ့ၢ် လၢအဟဲလၢထီၣ်ပှဲၤထီၣ်တဖၣ်.

၅. ဖဲနမၤ နီၢ်ကစၢ် တၢ်မၤလိလံာ်စီဆှံအခါ တၢ်ဂ့ၢ်လၢ နအဲၣ်ဒိးဃုသ့ၣ်ညါန့ၣ် အိၣ်ဧါ.

^၅ ပှၤလၢအဃုသ့ၣ်ညါ တၢ်ဂ့ၢ်ဒိၣ်ဒိၣ်ယိာ်ယိာ် လၢလံာ်စီဆှံပူၤတဖၣ် တဲဝဲလၢ အဝဲသ့ၣ် အဲၣ်ဒိးဃုသ့ၣ်ညါအါထီၣ် တၢ်ဂ့ၢ်တနီၤ. တၢ်ဂ့ၢ်တနီၤ လၢအဝဲသ့ၣ် အဲၣ်ဒိးဃုသ့ၣ်ညါဝဲန့ၣ် အအိၣ်လၢ တၢ်လွံၢ်နၢၣ် လၢအခိၣ်တီမ့ၢ်ဝဲ “ တၢ်ဂ့ၢ်တနီၤလၢ နီၢ်ကစၢ် တၢ်မၤလိလံာ်စီဆှံအဂီၢ်.” ဘၣ်ဃးဒီး တၢ်ဂ့ၢ်တဖၣ်အံၤ နဃုမၤလိအီၤလၢ လံာ်နဲၣ်ကျဲလၢ ကဃုသ့ၣ်ညါတၢ်အဂီၢ် သ့ဒီးပနာ်သပှၢ်တၢၢ်လၢ နမၤလိအီၤကမုာ်. နမ့ၢ်ဃုသ့ၣ်ညါအါထီၣ် တၢ်ဂ့ၢ်ဒိၣ်ဒိၣ်ယိာ်ယိာ် လၢလံာ်စီဆှံအပူၤ ဒီးမၤနနီၢ်ကစၢ် တၢ်မၤလိလံာ်စီဆှံ လီၤတံၢ်လီၤဆဲးန့ၣ် နတၢ်နာ် ကဂၢၢ်ကျၢၤဒိၣ်ထီၣ်ဒီး “နကထံၣ်န့ၢ် တၢ်သ့ၣ်ညါ ဘၣ်ဃးဒီး ကစၢ်ယွၤ.” (ကတိၤ ၂:၄, ၅) ခဲအံၤ ပကမၤလိသကိး တၢ်မ့ၢ်တၢ်တီ ဒိၣ်ဒိၣ်ယိာ်ယိာ်တနီၤ လၢလံာ်စီဆှံအပူၤ.

၆. (က) တၢ်ရဲၣ်တၢ်ကျဲၤ ဒီးတၢ်တိာ်ပာ်န့ၣ် လီၤဆီလိာ်သးဒ်လဲၣ်. (ခ) ဘၣ်မနုၤအဃိ ပတဲသ့လၢ ယဟိဝၤယွၤ အတၢ်တိာ်ပာ်လၢ ဟီၣ်ခိၣ်ဒီးပှၤဟီၣ်ခိၣ်ဖိအဂီၢ်န့ၣ် အကဲဝဲ “တၢ်တိာ်ပာ်အထူအယိာ်” လဲၣ်. (အ့းဖ့းစူး ၃:၁၁)

^၆ ပကဆိကမိၣ်ကွၢ် တၢ်အဒိတခါလၢ လံာ်စီဆှံတဲဝဲ ဘၣ်ဃးဒီး ကစၢ်ယွၤ အတၢ်တိာ်ပာ်. အဒိ တၢ်ရဲၣ်တၢ်ကျဲၤ ဒီးတၢ်တိာ်ပာ်န့ၣ်  လီၤဆီလိာ်သးဖးဒိၣ်ညါ. တၢ်ရဲၣ်တၢ်ကျဲၤန့ၣ် အလီၤဂာ်ဒ်သိးဒီး နရဲၣ်ကျဲၤပာ်စၢၤ ကျဲတဘိဘိ လီၤတံၢ်လီၤဆဲး ဒ်သိးနကလဲၤတုၤလၢ တၢ်လီၢ်တတီၤလၢ နအဲၣ်ဒိးလဲၤ. ဘၣ်ဆၣ် ကျဲလၢ နရဲၣ်ကျဲၤပာ်စၢၤ လီၤတံၢ်လီၤဆဲး လၢနကလဲၤတဘိန့ၣ် မ့ၢ်ဟးဂီၤ မ့တမ့ၢ် နလဲၤမ့ၢ်တန့ၢ်လၢၤဘၣ်န့ၣ် နလဲၤလၢတၢ်လီၢ်လၢ နအဲၣ်ဒိးလဲၤ တတုၤလၢၤဘၣ်. မ့မ့ၢ်လၢ တၢ်တိာ်ပာ်န့ၣ် တမ့ၢ်ဒ်န့ၣ်ဘၣ်. အဒိ ဖဲနတိာ်ပာ်လၢ နကလဲၤ တၢ်လီၢ်တတီၤအခါ နကဃုထၢ ကျဲတဘိဘိ ဒ်သိးနကလဲၤတုၤလၢ တၢ်လီၢ်လၢနတိာ်ပာ်အဂီၢ်. ဘၣ်ဆၣ် ကျဲတဘိလၢနဃုထၢန့ၣ် အမ့ၢ်ပံးအသး ဒီးနလဲၤမ့ၢ်တန့ၢ်လၢၤဘၣ်န့ၣ် နကဃုကျဲ လၢအသီတဘိ. ယဟိဝၤယွၤ အတၢ်တိာ်ပာ်စ့ၢ်ကီး လီၤဂာ်ဒ်န့ၣ်. ဒ်သိး ကစၢ်ယွၤတၢ်တိာ်ပာ် တလၢပှဲၤထီၣ်တဂ့ၤအဂီၢ် တၢ်တြီအီၤ တန့ၢ်နီတမံၤဘၣ်. ဒီးပထံၣ်ဘၣ်လၢ ယဟိဝၤယွၤ ပာ်ဖျါထီၣ်န့ၢ်ပှၤအ “တၢ်တိာ်ပာ်အထူအယိာ်” လၢလံာ်စီဆှံအပူၤ တဆီဘၣ်တဆီ. (အ့း ၃:၁၁) ဒ်လဲၣ်ဂ့ၤဒ်လဲၣ်ဂ့ၤ ကစၢ်ယွၤ အတၢ်တိာ်ပာ်န့ၣ် ကလၢပှဲၤထီၣ်ဝဲ မ့ၢ်လၢ အဝဲကမၤ “တၢ်ခဲလၢာ်” ဒ်သိးအ “ကမၤလၢထီၣ်ပှဲၤထီၣ် အတၢ်တိာ်ပာ်အဂီၢ်.” (ကတိၤ ၁၆:၄) ဒီးတၢ်လၢ ယဟိဝၤယွၤမၤဝဲန့ၣ် ကအိၣ်ဝဲ လီၤထူလီၤယိာ်. မ့မ့ၢ်ဒ်န့ၣ် ယဟိဝၤယွၤ အတၢ်တိာ်ပာ်န့ၣ် မ့ၢ်မနုၤလဲၣ် ဒီးဒ်သိးအတၢ်တိာ်ပာ် ကလၢပှဲၤထီၣ်အဂီၢ် အမၤဝဲဒ်လဲၣ်.

၇. ဖဲပှၤဟီၣ်ခိၣ်ဖိ အဆိကတၢၢ်ခံဂၤ ထီဒါယဟိဝၤယွၤ ဝံၤအလီၢ်ခံ ယဟိဝၤယွၤ ဃုကျဲအဂၤလၢ ကမၤလၢပှဲၤထီၣ် အတၢ်တိာ်ပာ်ဒ်လဲၣ်. (မးသဲ ၂၅:၃၄)

^၇ ကစၢ်ယွၤတဲဘၣ် ပှၤဟီၣ်ခိၣ်ဖိအဆိကတၢၢ်ခံဂၤလၢ အတၢ်တိာ်ပာ် လၢအဝဲသ့ၣ်အဂီၢ်. ဒီးအတဲဘၣ် အဝဲသ့ၣ်လၢ “မ်သုသၣ်ထီၣ် ဒီးအါထီၣ်ဂီၢ်ထီၣ် ဒီးမၤပှဲၤထီၣ်ဟီၣ်ခိၣ် ဒီးမၤနၢၤအီၤ, ဒီးပၢ . . . ကယဲၢ်တၢ်သးသမူ” လၢဟီၣ်ခိၣ်ချၢ. (၁ မိၤ ၁:၂၈) စီၤအၤဒၣ် ဒီးနီၢ်အံၣ်အု မၤတၢ်ဒဲးဘး ဒီးအဖိအလံၤတဖၣ် ကဲထီၣ်ပှၤတၢ်ဒဲးဘးဖိ သနာ်က့ ကစၢ်ယွၤ အတၢ်တိာ်ပာ် တဟးဂီၤဝဲဘၣ်. ပထံၣ်ဘၣ်လၢ ဒ်သိး ကစၢ်ယွၤ ကမၤလၢပှဲၤထီၣ် အတၢ်တိာ်ပာ်အဂီၢ် အဃုဝဲကျဲအဂၤ. တဘျီဃီန့ၣ် အဝဲဒုးအိၣ်ထီၣ် တၢ်ပၢတၢ်ပြးလၢမူခိၣ် ဒ်သိးအကမၤလၢပှဲၤထီၣ် အတၢ်တိာ်ပာ် အခီၣ်ထံးတခါလၢ ပှၤဟီၣ်ခိၣ်ဖိအဂီၢ်. (ဖး မးသဲ ၂၅:၃၄.) ဒီးဖဲတၢ်ဆၢကတီၢ် ဘၣ်ဝဲအခါ အဝဲဆှၢလီၤ အဖိခွါလၢဟီၣ်ခိၣ်ချၢ ဒ်သိး ကသိၣ်လိနဲၣ်လိ ပှၤဂၤလၢ ကစၢ်ယွၤအဘီအမုၢ်အဂ့ၢ်. တကးဒံးဘၣ် ယ့ၣ်ၡူး ဟ့ၣ်လုၢ်ထီၣ်အသး လၢပှၤဟီၣ်ခိၣ်ဖိအဂီၢ် ဒ်သိးအဝဲသ့ၣ် ကထူၣ်ဖျဲးထီၣ်လၢ တၢ်ဒဲးဘးဒီးတၢ်သံ. လၢခံ ယ့ၣ်ၡူး ဂဲၤဆၢထၢၣ်သမူထီၣ်က့ၤ ဒီးက့ၤထီၣ်လၢမူခိၣ် ဒ်သိး အကပၢတၢ်ဒ်စီၤပၤတဂၤ လၢကစၢ်ယွၤ အဘီအမုၢ်အပူၤ. ပကဆဲး မၤလိအါထီၣ် ကစၢ်ယွၤ အတၢ်တိာ်ပာ်အဂ့ၢ်တနီၤ.

၈. (က) တၢ်ဂ့ၢ်ခိၣ်သ့ၣ်လၢ လံာ်စီဆှံပူၤန့ၣ် မ့ၢ်မနုၤလဲၣ်. (ခ) ဒ် အ့းဖ့းစူး ၁:၈-၁၁ ပာ်ဖျါထီၣ်အသိး ယဟိဝၤယွၤ အိၣ်ဒီးတၢ်တိာ်ပာ်အဂၤ မနုၤဒံးလဲၣ်. (ကွၢ်တၢ်ဂီၤလၢ လံာ်ကုခိၣ်.)

^၈ တၢ်ဂ့ၢ်အရ့ဒိၣ်ကတၢၢ်လၢ လံာ်စီဆှံပူၤန့ၣ် အကဲဝဲ ယဟိဝၤယွၤအမံၤ ကဘၣ်တၢ်ပာ်စီဆှံအီၤ ဖဲအတၢ်တိာ်ပာ် လၢဟီၣ်ခိၣ်ချၢ ဟဲလၢပှဲၤထီၣ်ဝဲအခါ. ဒီးအတၢ်တိာ်ပာ်အံၤ ကဟဲလၢပှဲၤထီၣ်ဝဲ ခီဖျိ ကစၢ်ယွၤအဘီအမုၢ် လၢယ့ၣ်ၡူးပၢဝဲ. ယဟိဝၤယွၤ အတၢ်တိာ်ပာ်န့ၣ် တဆီတလဲနီတဘျီဘၣ်. အဝဲအၢၣ်လီၤဝဲလၢ အကမၤလၢပှဲၤထီၣ် အတၢ်တိာ်ပာ်. (ၡါ ၄၆:၁၀, ၁၁, ဧ့ၤ ၆:၁၇, ၁၈) ဒီးကယီကယီန့ၣ် ဟီၣ်ခိၣ်တဘ့ၣ်အံၤ ကကဲထီၣ်ကဒါက့ၤ ပၤရဒံစူး. နီၢ်အံၣ်အု ဒီးစီၤအၤဒၣ် အစၢၤအသွဲၣ်တဖၣ်န့ၣ် ကကဲထီၣ် ပှၤလၢပှၤပှဲၤ ဒီးပှၤတီပှၤလိၤ ဒီးအဝဲသ့ၣ်က “အိၣ်မူဘၣ် မုာ်မုာ်ခုၣ်ခုၣ် လီၤထူလီၤယိာ်.” (စံး ၂၂:၂၆) ထဲန့ၣ်တကးဒံးဘၣ် ယဟိဝၤယွၤ အတၢ်တိာ်ပာ် လၢအဂၤန့ၣ်အိၣ်ဒံး. ယဟိဝၤယွၤ အတၢ်တိာ်ပာ်လၢ အလီၢ်ခံကတၢၢ်န့ၣ် မ့ၢ်ဝဲ အတၢ်ဘၣ်တ့ လၢမူခိၣ်မ့ၢ်ဂ့ၤ လၢဟီၣ်ခိၣ်မ့ၢ်ဂ့ၤ ကအိၣ်ဃူအိၣ်ဖိးတပူၤဃီ. ဖဲန့ၣ်ဝံၤအလီၢ်ခံ အတၢ်ဘၣ်တ့ခဲလၢာ် ကဒိးပၢအသးလၢ အတၢ်ပၢဖီလာ်. (ဖး အ့းဖ့းစူး ၁:၈-၁၁.) ပသ့ၣ်ညါဘၣ်လၢ ယဟိဝၤယွၤ ကမၤလၢပှဲၤထီၣ် အတၢ်တိာ်ပာ် လၢကျဲဒ်န့ၣ်အဃိ လီၤသးခုဖးဒိၣ်ညါ.

၉. ဖဲပဖးလံာ်စီဆှံအခါ ပသ့ၣ်ညါဘၣ် တၢ်ကမၤသးလၢ ခါဆူညါအဂ့ၢ်ဒ်လဲၣ်.

^၉ ဝံအတၢ်စံးပာ်လၢ ယဟိဝၤယွၤ ပာ်ဖျါထီၣ်ဝဲလၢ ဧ့ၤဒ့ၣ်တၤသၣ်လီၢ်န့ၣ် ပထံၣ်ဘၣ်ဖဲ ၁ မိၤ ၃:၁၅. b ဖဲန့ၣ်တဲဖျါထီၣ်ဝဲလၢ ကစၢ်ယွၤ အတၢ်တိာ်ပာ်န့ၣ် ကလၢပှဲၤထီၣ်ဝဲ လၢကျဲဒ်လဲၣ်အဂ့ၢ်. ဘၣ်ဆၣ် ဒ်သိး တၢ်စံးပာ်တဖၣ်အံၤ ကလၢပှဲၤထီၣ်အဂီၢ် အယံာ်ဝဲလၢ အနံၣ်လၢ အကထိတဖၣ်ညါ. အဒိ စီၤအၤဘြၤဟၣ်န့ၣ် ကစၢ်ယွၤ တဲအီၤလၢ အချံအသၣ် အကျါတဂၤန့ၣ် ကကဲထီၣ်ဝဲခရံာ်. ဒီးတၢ်အစိၤတဖၣ် လဲၤပူၤကွံာ်ဝဲ တဘျုးစိၤ ဝံၤအလီၢ်ခံ ခရံာ်ဟဲအိၣ်ဖျဲၣ်ထီၣ်ဝဲ. (၁ မိၤ ၂၂:၁၅-၁၈) ဝံၤဒီး ဒ်လံာ်စီဆှံ တဲပာ်စၢၤဝဲအသိး ပိာ်မုၣ်အချံအသၣ် အခီၣ်နၢၣ်ခံန့ၣ် ဘၣ်ဒိဝဲဖဲ ခ.န ၃၃ ဖဲယ့ၣ်ၡူးသံဝဲအခါ. (မၤတၢ် ၃:၁၃-၁၅) ဝံအတၢ်စံးပာ် ပာ်ဖျါထီၣ်ဝဲလၢ ခါဆူညါ မုၣ်ကီၤလံၢ်အခိၣ်န့ၣ် ကဘၣ်တၢ်မၤသဘှံးအီၤ. ဒီးဝံအတၢ်စံးပာ်အံၤ ကလၢပှဲၤအဂီၢ် ပှၤကဘၣ်အိၣ်ခိးဒံး အနံၣ် ၁,၀၀၀ ဘျဲၣ်ညါ. (လီၣ် ၂၀:၇-၁၀) တကးဒံးဘၣ် လံာ်စီဆှံ ပာ်ဖျါအါထီၣ်န့ၢ်ပှၤလၢ မုၣ်ကီၤလံၢ်အချံအသၣ် ဒီးယဟိဝၤယွၤ အတၢ်ကရၢကရိန့ၣ် ကထီဒါလိာ်သး.

၁၀. (က) တယံာ်လၢၤဘၣ်န့ၣ် တၢ်ကမၤအသးဒ်လဲၣ်. (ခ) ပအိၣ်ကတဲာ်ကတီၤပာ်စၢၤ ပသးကသ့ဒ်လဲၣ်. (ကွၢ်တၢ်ဂ့ၢ်အဘျဲၣ်.)

^၁၀ ပကဆိကမိၣ်ကွၢ် တၢ်မၤအသး လၢလံာ်စီဆှံပာ်ဖျါထီၣ်န့ၢ်ပှၤ လၢကကဲထီၣ်သး တဆီဘၣ်တဆီအဂ့ၢ်. လံာ်စီဆှံ တဲဝဲလၢ ပှၤကလုာ်တဖၣ် ကတဲဝဲလၢ “တၢ်မုာ်တၢ်ခုၣ် ဒီးတၢ်ဘံၣ်တၢ်ဘၢအိၣ်လံ.” (၁ သ့း ၅:၂, ၃) ဒီးဖဲပဒိၣ်ပပှၢ်တဖၣ် ကမၤဟးဂီၤကွံာ် တၢ်ဘူၣ်တၢ်ဘါ လၢအကမၣ်တဖၣ်အခါ တၢ်နးတၢ်ဖှီၣ်ဖးဒိၣ် ကစးထီၣ် “တဘျီဃီ.” (လီၣ် ၁၇:၁၆) ဖဲန့ၣ်ဝံၤအလီၢ်ခံ ခီဖျိ “ပှၤကညီဖိခွါ” က “ဟဲဝဲလၢမူခိၣ် အတၢ်အၢၣ်တဖၣ်အလိၤ ပှဲၤဒီးတၢ်စိတၢ်ကမီၤ ဒီးတၢ်လၤတၢ်ကပီၤ ဒိၣ်ဒိၣ်မုၢ်မုၢ်” အဃိ ဘၣ်သ့ၣ်သ့ၣ် ပကထံၣ်ဘၣ် တၢ်လီၤလိၢ်လီၤလး. (မး ၂၄:၃၀) ဒီးယ့ၣ်ၡူး ကနီၤဖးသိဒီးမဲာ်တဲးလဲး ဒ်သိးကစံၣ်ညီၣ်ပှၤဟီၣ်ခိၣ်ဖိအဂီၢ်. (မး ၂၅:၃၁-၃၃, ၄၆) ဖဲန့ၣ်အဆၢကတီၢ် မုၣ်ကီၤလံၢ်န့ၣ် တအိၣ်ဃိဒိဘၣ်. အကသးပှံၢ်ထီၣ်တၢ် ဒီးကထိၣ်ဟူးထိၣ်ဂဲၤထီၣ် ပှၤကလုာ်တဖၣ် ဒ်သိးကပာ်ဖှိၣ်ထီၣ်အသး. ပှၤတဖၣ်န့ၣ် လံာ်စီဆှံ ကိးအဝဲသ့ၣ်လၢ စီၤကိးလၢကီၢ်မါကူး ဒီးအဝဲသ့ၣ် ကဟဲထီဒါ ယဟိဝၤယွၤ အပှၤဂီၢ်မုၢ်. (ဃ့း ၃၈:၂, ၁၀, ၁၁) ဒီးဖဲတၢ်နးတၢ်ဖှီၣ်ဖးဒိၣ် အဆၢကတီၢ် တတီၤတီၤန့ၣ် ပှၤဘၣ်တၢ်ဒိးဖှူအီၤ လၢအအိၣ်တ့ၢ်ဒံးတဖၣ် ကက့ၤထီၣ်လၢမူခိၣ်. အဝဲသ့ၣ် ကပာ်ဖှိၣ်ထီၣ်သးဒီး ယ့ၣ်ၡူးဒီးမူခိၣ်အသုးမုၢ်သံၣ်ဘိတဖၣ် ဒ်သိးကဒုးတၢ်လၢ အၢ်မက့းဒိၣ်တၢ်ဒုး ဖဲတၢ်နးတၢ်ဖှီၣ်ဖးဒိၣ်အကတၢၢ် အဆၢကတီၢ်. c (မး ၂၄:၃၁; လီၣ် ၁၆:၁၄, ၁၆) ဖဲန့ၣ်ဝံၤအလီၢ်ခံ ယ့ၣ်ၡူးအတၢ်ပၢအနံၣ် တကထိ ကစးထီၣ်ဝဲ.—လီၣ် ၂၀:၆.

၁၁. ပတၢ်အိၣ်မူ လီၤထူလီၤယိာ်လၢ ဟီၣ်ခိၣ်သီပူၤန့ၣ် ကမၤသးဒ်လဲၣ်. (ကွၢ်စ့ၢ်ကီးတၢ်ဂီၤ.)

^၁၁ လံာ်စီဆှံ တဲဝဲလၢ ကစၢ်ယွၤ “တ့လီၤ ပှၤဟီၣ်ခိၣ်ဖိ ဒ်သိး အဝဲသ့ၣ် ကအဲၣ်ဒိးအိၣ်မူ လီၤထူလီၤယိာ် အဂီၢ်.” (စံၣ် ၃:၁၁) အဃိ ထံၣ်တမှံကွၢ်လၢ အနံၣ်တကထိ ဝံၤအလီၢ်ခံန့ၣ် တၢ်အိၣ်သး ကမၤသးဒ်လဲၣ်. ပဝဲပှၤဟီၣ်ခိၣ်ဖိတဖၣ် ပတၢ်ရ့လိာ်သးဒီး ယဟိဝၤယွၤ ကဂ့ၤဒိၣ်ထီၣ်မၣ်ဒိၣ်ထီၣ်. လံာ်တဘ့ၣ် လၢအမ့ၢ် သုးဘူးသုသးဆူ  ယဟိဝၤယွၤအအိၣ် (Draw Close to Jehovah), ကဘျံးပၤ ၃၁၉ ပာ်ဖျါထီၣ်ဝဲလၢ “ဖဲပအိၣ်မူဘၣ်အနံၣ်လၢ အကယၤ, အကထိ, အကလး, အကလီၢ်, အကကွဲၢ်လၢအကထိတဖၣ် ဝံၤအလီၢ်ခံ ပမ့ၢ်ထိၣ်သတြီၤက့ၤ ပတၢ်အိၣ်မူလၢ ဆၢကတီၢ်ခဲအံၤ ဒီးပတၢ်အိၣ်မူဖဲ အဆၢကတီၢ်ဝဲန့ၣ်န့ၣ် ပတၢ်သ့ၣ်ညါ ယဟိဝၤယွၤအဂ့ၢ် ကဂ့ၤဒိၣ်န့ၢ် ဆၢကတီၢ်ခဲအံၤ စၢၢ်တလၢၢ်ဒံး. ဘၣ်ဆၣ် ဖဲန့ၣ်အခါ ပကတူၢ်ဘၣ်လၢ ပကဘၣ်မၤလိတၢ် အိၣ်ဒံးအါမး. . . . ထံၣ်တမှံကွၢ်လၢ ပတၢ်အိၣ်မူလီၤထူလီၤယိာ် လၢပၤရဒံစူးအပူၤန့ၣ် ကထုးန့ၢ်ပသး ဒီးကမုာ်ထဲလဲၣ်. ဒီးတၢ်လၢအမၤမုာ်ပသး အဒိၣ်ကတၢန့ၣ် မ့ၢ်ဝဲ ပတၢ်ရ့လိာ်သးဒီး ယဟိဝၤယွၤ ဂ့ၤဒိၣ်ထီၣ်ဝဲ.” ပမ့ၢ်ဆဲးမၤလိ ကစၢ်ယွၤအကလုၢ်ကထါန့ၣ် ပကဆဲး သ့ၣ်ညါအါထီၣ်ဘၣ် တၢ်ဂ့ၢ်မနုၤတဖၣ်ဒံးလဲၣ်.

၁၂. လံာ်စီဆှံပာ်ဖျါ တၢ်အိၣ်လၢမူခိၣ်အဂ့ၢ်ဒ်လဲၣ်. ဟ့ၣ်တၢ်အဒိ.

^၁၂ ကစၢ်ယွၤ အကလုၢ်ကထါ ပာ်ဖျါထီၣ်န့ၢ်ပှၤလၢ ယဟိဝၤယွၤန့ၣ်အ “အိၣ်လၢ တၢ်ထီၣ်ထီအလီၢ်” အဃိ ပသ့ၣ်ညါဘၣ် အတၢ်အိၣ်တၢ်ဆိးအဂ့ၢ်တစဲးဖိ. (ၡါ ၃၃:၅) တကးဒံးဘၣ် လံာ်စီဆှံ ပာ်ဖျါထီၣ်စ့ၢ်ကီးဝဲ ယဟိဝၤယွၤ ဒီးအတၢ်ကရၢကရိ လၢမူခိၣ်အဂ့ၢ်. (ၡါ ၆:၁-၄; ဒၤ ၇:၉, ၁၀; လီၣ် ၄:၁-၆) အဒိ ဝံယဃ့းစက့လး တဲဝဲလၢ “မူခိၣ်အိးထီၣ်အသး ဒီးယထံၣ်ဘၣ် တၢ်ထံၣ်လၢညါခီ လၢအဟဲလၢ ကစၢ်ယွၤအအိၣ်.” ပမ့ၢ်အဲၣ်ဒိး သ့ၣ်ညါအါထီၣ် တၢ်ဂ့ၢ်တဖၣ်အံၤန့ၣ် ပဖးကွၢ်အီၤသ့.—ဃ့း ၁:၁.

၁၃. နပာ်လုၢ်ပာ်ပှ့ၤ ယ့ၣ်ၡူးအမူဒါလၢ မူခိၣ်ကသ့ဒ်လဲၣ်. (ဧ့ၤဘြံၤ ၄:၁၄-၁၆)

^၁၃ ယ့ၣ်ၡူးအိၣ်လၢမူခိၣ် ဒီးအကဲစီၤပၤ ဒီးပှၤလုၢ်တၢ်ခိၣ်အဒိၣ်ကတၢၢ် လၢအသးကညီၤတၢ်သ့တဂၤ. အဝဲအိၣ်ဒီးမူဒါလၢ အရ့ဒိၣ်ဒိၣ်မး. ခီဖျိလၢ ယ့ၣ်ၡူးအဃိ ပသုးဘူးပသး ဆူကစၢ်ယွၤ လၢအအိၣ်ဒီး “တၢ်သးကညီၤ ဒိၣ်ဒိၣ်မုၢ်မုၢ်” တဂၤအအိၣ်သ့. အဃိ “ဖဲပလိၣ်ဘၣ် တၢ်မၤစၢၤ အဆၢကတီၢ်” ယဟိဝၤယွၤလၢ အအိၣ်ဒီး တၢ်ကသးကညီၤတဂၤအံၤ ကမၤစၢၤပှၤ. (ဖး ဧ့ၤဘြံၤ ၄:၁၄-၁၆.) အဃိ ယဟိဝၤယွၤ ဒီးယ့ၣ်ၡူး အိၣ်လၢမူခိၣ် ဒီးမၤန့ၢ်တၢ်လၢပဂီၢ်န့ၣ် ပတဘၣ် သးပ့ၤနီၣ် နီတဘျီဘၣ်. ခီဖျိလၢ ယဟိဝၤယွၤ ဒီးယ့ၣ်ၡူးအဲၣ်ပှၤဒိၣ်မးအဃိ ပကဘူၣ်ထီၣ်ဘါထီၣ် ယဟိဝၤယွၤ ဒီးမၤအတၢ်မၤလၢ တၢ်သးဆူၣ်အပူၤ.—၂ ကရံၣ် ၅:၁၄, ၁၅.

၁၄. ကျဲအဂ့ၤဒိၣ်မးတဘိလၢ ပပာ်ဖျါထီၣ် ပတၢ်စံးဘျုးစံးဖှိၣ် ကစၢ်ယွၤဒီးယ့ၣ်ၡူးသ့န့ၣ် မ့ၢ်မနုၤလဲၣ်. (ကွၢ်စ့ၢ်ကီးတၢ်ဂီၤ.)

 ^၁၄ ကျဲအဂ့ၤဒိၣ်မးတဘိလၢ ပပာ်ဖျါထီၣ် ပတၢ်စံးဘျုးစံးဖှိၣ် ကစၢ်ယွၤ ဒီးအဖိခွါသ့န့ၣ် မ့ၢ်ဝဲပမၤစၢၤပှၤဂၤ ဒ်သိးကကဲထီၣ် ယဟိဝၤပှၤအုၣ်အသး ဒီးယ့ၣ်ၡူးအပျဲၢ်အဘီၣ်. (မး ၂၈:၁၉, ၂၀) တၢ်မၢဖိပီလူးစ့ၢ်ကီး အပာ်ဖျါထီၣ် အတၢ်စံးဘျုးစံးဖှိၣ် ကစၢ်ယွၤ ဒီးယ့ၣ်ၡူးဒ်န့ၣ်. ဒီးအသ့ၣ်ညါဝဲလၢ ယဟိဝၤယွၤ အဲၣ်ဒိးဝဲလၢ “ပှၤကညီခဲလၢာ် ကတုၤလၢ တၢ်အုၣ်က့ၤခီၣ်က့ၤအီၤ, ဒီးကသ့ၣ်ညါထီၣ် တၢ်မ့ၢ်တၢ်တီ.” (၁ တံၤ ၂:၃, ၄) အဃိ စီၤပီလူးန့ၣ် အစံၣ်တဲၤတဲလီၤဝဲပှၤဂၤ ဆူၣ်ဆူၣ် ဒ်သိးအ “မၤပူၤဖျဲး အဝဲသ့ၣ်တနီၤ ကန့ၢ်အဂီၢ်.”—၁ ကရံၣ် ၉:၂၂, ၂၃.

၁၅. ဒ် စံးထီၣ်ပတြၢၤ ၁:၂ ပာ်ဖျါထီၣ်ဝဲအသိး တၢ်မနုၤ ကမၤသးခုပှၤလဲၣ်.

^၁၅ ပှၤကွဲးထါစံးထီၣ်ပတြၢၤတဂၤ တဲဝဲလၢ ပှၤလၢအသးခု ဒီးအမၤတၢ် ကဲထီၣ်လိၣ်ထီၣ်တဂၤန့ၣ် မ့ၢ်ပှၤလၢအ “ဘၣ်သူၣ်ဘၣ်သး ယဟိဝၤယွၤ အတၢ်သိၣ်တၢ်သီ” ဒီးအ “ဆိကမိၣ်ထံဝဲ ကစၢ်ယွၤ အတၢ်သိၣ်တၢ်သီ လၢမုၢ်ဆါခီ ဒီးလၢမုၢ်နၤခီ.” (စံး ၁:၁-၃) ပှၤကွဲးကျိာ်ထံ လံာ်စီဆှံတဂၤ လၢအမ့ၢ် ကၠိစဲး ရိသဲဟၢၤန့ၣ် အတဲဝဲဘၣ်ဃးဒီး လံာ်စီဆှံအဆၢတဖၣ်အံၤ အဂ့ၢ်ဒ်အံၤ. အတဲဝဲလၢ ပှၤကြၢး “ဘၣ်သူၣ်ဘၣ်သး ကစၢ်ယွၤ အတၢ်ဟံးစုနဲၣ်ကျဲ, ဃုအတၢ်ဟံးစုနဲၣ်ကျဲ, မၤလိအီၤ ဒီးဆိကမိၣ်ထံအီၤ လီၤတံၢ်လီၤဆဲး.” ဒီးအဆဲးတဲဝဲလၢ ပှၤလၢအဖးကစၢ်ယွၤ ကလုၢ်ကထါတဂၤ “ကြၢးထံၣ်ဝဲလၢ အမ့ၢ်တဖးဘၣ် လံာ်စီဆှံကိးနံၤဒဲးဘၣ်န့ၣ် လီၤဂာ်ဒ်သိး အတၢ်ခွဲးတၢ်ယာ် ၡူကွံာ်ဝဲဖးဒိၣ်ညါ.” ဒ်သိး ပဖးဒီးမၤလိ လံာ်စီဆှံကမုာ် ဒီးပကန့ၢ်ဘၣ်အဘျုးအဂီၢ် တၢ်ဂ့ၢ်လၢ ပဖးတဖၣ် အဘျးစဲလိာ်သးဒ်လဲၣ်န့ၣ် ပကဘၣ်ဆိကမိၣ်ထံအီၤ. ပမ့ၢ်မၤဒ်န့ၣ်န့ၣ် ပဖးလံာ်စီဆှံကမုာ်ထီၣ် ဒီးပကနၢ်ပၢၢ်ထီၣ် ကစၢ်ယွၤအကလုၢ်ကထါ အခီပညီလၢ အဒိၣ်အယိာ်.

၁၆. လၢတၢ်မၤလိလၢခံတခါန့ၣ် ပကတဲသကိး တၢ်ဂ့ၢ်မနုၤလဲၣ်.

^၁၆ တၢ်မ့ၢ်တၢ်တီလၢ ယဟိဝၤယွၤသိၣ်လိပှၤလၢ လံာ်စီဆှံပူၤန့ၣ် တမ့ၢ်တၢ်လၢ အကီဒိၣ်တလၢ လၢပကနၢ်ပၢၢ်အီၤ အဂီၢ်ဘၣ်. တၢ်မၤလိ လၢခံတခါန့ၣ် ပကတဲသကိး တၢ်မ့ၢ်တၢ်တီ အဒိၣ်အယိာ်တခါ လၢအဘၣ်ဃးဒီး နီၢ်သးအတၢ်လုၢ်ဟံၣ် လၢစီၤပီလူးကွဲးန့ၢ်ဝဲ ပှၤဧ့ၤဘြံၤဖိ လၢအကဲထီၣ်ခရံာ်ဖိတဖၣ်အဂီၢ်. နမ့ၢ်ဃုသ့ၣ်ညါ တၢ်ဂ့ၢ်တဖၣ်အံၤန့ၣ် နကဒိးန့ၢ်ဘၣ် တၢ်သးခု.