ဖဲ​ယ့ၣ်ၡူး​တချုး​သံ​ဒံး​​ဘၣ်​အခါ ​ဘၣ်​မနုၤ​အဃိ အ​ယၢၤထီၣ်​ဝဲ စီၤ​ဒၤဝံး​အ​တၢ်​ကတိၤ​ဖဲ စံးထီၣ်​ပတြၢၤ ၂၂:၁ န့ၣ်​လဲၣ်

တချုး​ဖဲ ယ့ၣ်ၡူး​သံ​ဒံး​​ဘၣ်​န့ၣ်​ အ​တဲ​ဝဲ​တၢ်​ကတိၤ​လၢ မးသဲ ၂၇:၄၆ အ​ပူၤ “ယ​ကစၢ်​ယွၤ​ဧၢ, ယ​ကစၢ်​ယွၤ​ဧၢ, ​ဘၣ်​မနုၤ​အဃိ န​ပာ်တ့ၢ်​ကွံာ်​ယၤ​လဲၣ်.” ဖဲ​ယ့ၣ်ၡူး​တဲ​ဝဲ​ဒ်​န့ၣ်​အခါ အ​ဝဲ​မၤ​လၢပှဲၤ​ထီၣ်ဝဲ စီၤ​ဒၤဝံး​အ​တၢ်​ကတိၤ​လၢ စံးထီၣ်​ပတြၢၤ ၂၂:၁ အ​ပူၤ​လီၤ. (မၢ်ကူး ၁၅:၃၄) ပ​မ့ၢ်​တဲ​လၢ ယ့ၣ်ၡူး​ယၢၤထီၣ်​ဝဲ တၢ်​ကတိၤ​အံၤ ခီဖျိ​လၢ​အသး​ဟးဂီၤ မ့တမ့ၢ် အ​တၢ်နာ်​ကစၢ်​ယွၤ​​လီၤ​စှၤ​​ဝဲ​န့ၣ်​ ကမၣ်​​ဝဲ​လီၤ. (မးသဲ ၁၆:၂၁; ၂၀:၂၈) တကးဒံးဘၣ်​ ယ့ၣ်ၡူး​သ့ၣ်ညါ​စ့ၢ်ကီး​​ဝဲ​လၢ ဖဲ​အ​က​သံ​အခါ​န့ၣ်​ ယဟိဝၤ​ယွၤ​တ “မၤ​ကရၢ​ဝး​တရံး” အီၤ​လၢ က​ဒီသဒၢ​အီၤ​အဂီၢ်​ဘၣ်. (ယိၤဘး ၁:၁၀) ယ့ၣ်ၡူး မ့ၢ်​ထံၣ်​ဘၣ်​ဒီး​တၢ်ကီ​တၢ်ခဲ ဒ်လဲၣ်​ဂ့ၤ​ဒ်လဲၣ်​ဂ့ၤ ယဟိဝၤ​ယွၤ​ပျဲ​ဝဲ​လၢ ယ့ၣ်ၡူး​က​ပာ်ဖျါ​ထီၣ်​ အ​တၢ်​သးတီ​တုၤလၢ အ​သံ​တစု​လီၤ.—မၢ်ကူး ၁၄:၃၅, ၃၆.

ဘၣ်​မနုၤ​အဃိ ယ့ၣ်ၡူး​ဘၣ်ယၢၤ​ထီၣ်ဝဲ တၢ်​ကတိၤ​ဖဲ စံးထီၣ်​ပတြၢၤ​အ​ပူၤ​န့ၣ်​လဲၣ်. ပ​တ​သ့ၣ်ညါ တၢ်ဂ့ၢ်​လီၤတံၢ်​လီၤဆဲး​ဘၣ်​ သနာ်က့ ပ​က​တဲသကိး​တၢ်ဂ့ၢ်​လၢ အ​ကဲထီၣ်​သး​သ့​တဖၣ်​အံၤ​လီၤ. *

ခီဖျိ​လၢ ယ့ၣ်ၡူး​ယၢၤထီၣ်​ဝဲ တၢ်​ကတိၤ​ဖဲ စံးထီၣ်​ပတြၢၤ​အ​ပူၤ​အဃိ မ့ၢ်​အ​ဝဲ​အဲၣ်ဒိး​တဲဝဲ ယဟိဝၤ​ယွၤ​တ​ဒီသဒၢ​အီၤ လၢ​တၢ်သံ​​ဘၣ်​န့ၣ်​ဧါ. ယ့ၣ်ၡူး​က​​ဘၣ်​ဟ့ၣ်​ဝဲ တၢ်ပှ့ၤက့ၤ​အပှ့ၤ​န့ၣ်​ ယဟိဝၤ​ယွၤ​မၤစၢၤ​အီၤ တ​န့ၢ်ဘၣ်. ယ့ၣ်ၡူး​မ့ၢ်ဝဲ ပှၤ​ဟီၣ်ခိၣ်​ဖိ​အဃိ အ​က​​ဘၣ်​သံဝဲ ဒ်သိး​ဒီး​က “လ့ၣ်ကွၢ်​တၢ်သံ​လၢ ပှၤ​ကိးဂၤ​ဒဲး​အဂီၢ်” လီၤ.—ဧ့ၤဘြံၤ ၂:၉.

ယ့ၣ်ၡူး​ယၢၤထီၣ်​ဝဲ တၢ်​ကတိၤ​တနီၤ​ဖဲ စံးထီၣ်​ပတြၢၤ​အပူၤ​အဃိ မ့ၢ်​အ​အဲၣ်ဒိး​တဲဝဲ စံးထီၣ်​ပတြၢၤ​ဒီ​တ​ယုၢ်​လၢာ်​ဧါ. ဖဲန့ၣ်​အ​စိၤ ပှၤ​ယူဒၤ​ဖိ​တဖၣ်​ တိၢ်နီၣ်​သံဝဲ စံးထီၣ်​ပတြၢၤ​အဆၢ​ တဖၣ်​လီၤ. ဖဲ​အဝဲသ့ၣ်​နၢ်ဟူ​​ဘၣ်​ဝဲ တၢ်​ကတိၤ​လၢ​စံးထီၣ်​ပတြၢၤ​အ​ပူၤ ထဲ​တ​ဆၢ​ဖိ​အခါ အဝဲသ့ၣ်​ဆိကမိၣ်​ဃုာ်ဝဲ စံးထီၣ်​ပတြၢၤ​ဒီ​တ​ယုၢ်​ညါ​လီၤ. ​ဘၣ်​သ့ၣ်​သ့ၣ်​ ယ့ၣ်ၡူး​က​အဲၣ်ဒိး​မၤစၢၤ ပှၤ​ယူဒၤ​ဖိ​လၢ​အ​ပိာ်​အခံ​တဖၣ်​ လၢ​အဝဲသ့ၣ်​က​နီၣ်ဘၣ်က့ၤ​ဝဲ ဝံ​အ​တၢ်စံးပာ်​တဖၣ်​ ဖဲ​စံးထီၣ်​ပတြၢၤ​အ​ပူၤ လၢ​အ​ဘၣ်ဃး​ဒီး တၢ်မၤ​အသး​တဖၣ်​ ဖဲ​ယ့ၣ်ၡူး​က​​ဘၣ်​သံ​အခါ​န့ၣ်​လီၤ. (စံးထီၣ်​ပတြၢၤ ၂၂:၇, ၈, ၁၅, ၁၆, ၁၈, ၂၄) တကးဒံးဘၣ်​ ဖဲ​စံးထီၣ်​ပတြၢၤ ၂၂:၂၇-၃၁ အ​ပူၤ​န့ၣ်​ ပှၤ​ကွဲး​ထါ​စံးထီၣ်​ပတြၢၤ​တဂၤ စံးပတြၢၤ​ယဟိဝၤ​ယွၤ ဒီး​အ​ဝဲ​ပာ်ဖျါ​ထီၣ်​ဝဲ​လၢ ယဟိဝၤ​ယွၤ​မ့ၢ် စီၤပၤ​လၢ​အ​ပၢတၢ်​လၢ ဟီၣ်ခိၣ်​ဒီဘ့ၣ်​ညါ​အ​ဖီခိၣ်​န့ၣ်​လီၤ.

ယ့ၣ်ၡူး​ယၢၤထီၣ်​ဝဲ စီၤ​ဒၤဝံး​အ​တၢ်​ကတိၤ​တဖၣ်​အံၤန့ၣ်​ မ့ၢ်​အ​အဲၣ်ဒိး​တဲဝဲ လၢ​အ​တၢ်​ကမၣ်​ တအိၣ်​​ဘၣ်​န့ၣ်​ဧါ. တချုး​လၢ ယ့ၣ်ၡူး​သံ​ဒံး​​ဘၣ်​န့ၣ်​ ပှၤ​ယူဒၤ​ဖိ​အ​ကွီၢ်ဘျီၣ်​လၢ​အဒိၣ်​ကတၢၢ် စံၣ်ညီၣ်​​ဝဲ​လၢ ယ့ၣ်ၡူး​ကတိၤ​ထီဒါ​ဝဲ ကစၢ်​ယွၤ​လီၤ. (မးသဲ ၂၆:၆၅, ၆၆) အဝဲသ့ၣ်​ပာ်ဖှိၣ်​ထီၣ်​အသး လၢ​မုၢ်နၤခီ ဒီး​ကရီ​စံၣ်ညီၣ်​ဝဲ တၢ်ဂ့ၢ်​အံၤ​ချ့​မး ဒီး​တ​မၤထွဲ​ဝဲ တၢ်သီၣ်​တၢ်သီ​တဖၣ်​ဘၣ်. (မးသဲ ၂၆:၅၉; မၢ်ကူး ၁၄:၅၆-၅၉) ဖဲ​ယ့ၣ်ၡူး​သံကွၢ်​ဝဲ​လၢ “ယ​ကစၢ်​ယွၤ​ဧၢ, ယ​ကစၢ်​ယွၤ​ဧၢ, ​ဘၣ်​မနုၤ​အဃိ န​ပာ်တ့ၢ်​ကွံာ်​ယၤ​လဲၣ်” အခါ ယ့ၣ်ၡူး​အဲၣ်ဒိး​ပာ်ဖျါ​ထီၣ်​ဝဲ​လၢ အ​တၢ်​ကမၣ်​တအိၣ်​ဘၣ်​ ဒီး​အ​ဝဲ​တ​ကြၢး​ဒီး တၢ်​စံၣ်ညီၣ်​သံ​အီၤ​ဒ်အံၤ​ဘၣ်.

ယ့ၣ်ၡူး​အဲၣ်ဒိး ဒုး​သ့ၣ်နီၣ်​ထီၣ်​ပှၤဂၤ​လၢ စီၤ​ဒၤဝံး​လၢ​အ​ကွဲး​ထါ စံးထီၣ်​ပတြၢၤ​အံၤ အ​ထံၣ်​ဘၣ်​တၢ်​မၤအၢ​မၤနး​အဃိ မ့ၢ်​ယဟိဝၤ​ယွၤ တ​ဘၣ်​သး​အီၤ​လၢၤ​ဘၣ်​န့ၣ်​ဧါ. စီၤ​ဒၤဝံး​သံကွၢ်​တၢ်​ဒ်အံၤ​န့ၣ်​ တမ့ၢ်​လၢ​အ​တၢ်နာ်​​လီၤ​စှၤ​အဃိ​ဘၣ်. ဖဲ​စီၤ​ဒၤဝံး​သံကွၢ်​တၢ် ဝံၤ​အလီၢ်​ခံ အ​ဝဲ​နာ်န့ၢ်​ယဟိဝၤ​ယွၤ​လၢ က​မၤ​ပူၤဖျဲး​အပှၤ​ဂီၢ်မုၢ် ဒီး​က​ဆဲး​ဆိၣ်ဂ့ၤ​အီၤ​လီၤ. (စံးထီၣ်​ပတြၢၤ ၂၂:၂၃, ၂၄, ၂၇) ဒ်​န့ၣ်​အသိး ယ့ၣ်ၡူး​လၢ​အမ့ၢ် “စီၤ​ဒၤဝံး​အ​ဖိခွါ” စ့ၢ်ကီး က​ထံၣ်​ဘၣ်​တၢ်​မၤအၢ​မၤနး လၢ​သ့ၣ်တၢၣ်​လိၤ​လီၤ. ဘၣ်ဆၣ်​ ယဟိဝၤ​ယွၤ​ဘၣ်သူၣ်​ဘၣ်သး​အီၤ​ဒံး​လီၤ.—မးသဲ ၂၁:၉.

ဒ်သိး​ယ့ၣ်ၡူး​က​သးတီ လၢ​လၢပှဲၤ​ပှဲၤ​အဂီၢ် ယဟိဝၤ​ယွၤ​တ​ဒီသဒၢ​အီၤ​ဘၣ်​ အဃိ မ့ၢ်​ယ့ၣ်ၡူး သူၣ်အုး​သူ​အုး​ဝဲ​ဧါ. လၢ​အ​ခီၣ်ထံး​ခါ​န့ၣ်​ ယဟိဝၤ​ယွၤ​တ​တိာ်ပာ်​ဝဲ​လၢ အ​ဖိခွါ​က​ထံၣ်ဘၣ်​ တၢ်​မၤအၢ​မၤနး ဒီး​တၢ်သံ​ဘၣ်. ဘၣ်ဆၣ်​ ဖဲ​စီၤ​အၤဒၣ်​ဒီး​နီၢ်​အံၣ်အု ထီဒါ​ကစၢ်​ယွၤ​ဝံၤ​အလီၢ်​ခံ​န့ၣ်​ ယ့ၣ်ၡူး​အ​က​​ဘၣ်​ထံၣ်ဘၣ်​ တၢ်​မၤအၢ​မၤနး ဒီး​တၢ်သံ​လီၤ. ယ့ၣ်ၡူး​အ​တၢ်​ကမၣ်​ တအိၣ်​နီတမံၤ​ဘၣ်​ သနာ်က့ အ​ဝဲ​က​​ဘၣ်​ထံၣ်ဘၣ်​ တၢ်​မၤအၢ​မၤနး ဒီး​တၢ်သံ ဒ်သိး​က​စံးဆၢ​က့ၤဝဲ တၢ်​သံကွၢ်​လၢ မုၣ်ကီၤလံၢ်​ဒုးအိၣ်​ထီၣ်ဝဲ ဒီး​က​ဟ့ၣ်​တၢ်ပှ့ၤက့ၤ ဒ်သိး​က​ပှ့ၤက့ၤ​တၢ်​လၢ ပှၤ​ဟီၣ်ခိၣ်​ဖိ​ဒုး​လီၤမၢ်​ကွံာ်​ဝဲ​န့ၣ်​လီၤ. (မၢ်ကူး ၈:၃၁; ၁ ပ့းတရူး ၂:၂၁-၂၄) ခီဖျိ​လၢ ယဟိဝၤ​ယွၤ​တ​ဒီသဒၢ အ​ဖိခွါ​ယ့ၣ်ၡူး​​ဘၣ်​အဃိ တၢ်​သ့ၣ်​တၢ်​ဖၣ်​အံၤ ဟဲ​လၢထီၣ်​ပှဲၤထီၣ်​​ဝဲ​န့ၣ်​လီၤ.

မ့ၢ်​ယ့ၣ်ၡူး​ဂုာ်ကျဲးစၢး​မၤစၢၤ အပျဲၢ်​အဘီၣ်​တဖၣ်​လၢ ကဆိကမိၣ်​ဘၣ်ဃး​ဒီး ​ဘၣ်​မနုၤ​အဃိ ယဟိဝၤ​ယွၤ​ပျဲ​လၢ ယ့ၣ်ၡူး​က​တူၢ်သံ​အသး​လၢ တၢ်​မၤအၢ​မၤနး အ​သ့ၣ်တၢၣ်​လိၤ​လဲၣ်န့ၣ်​ဧါ. * ယ့ၣ်ၡူး​သ့ၣ်ညါ​​ဝဲ​လၢ အ​က​​ဘၣ်​သံ​ဒ်​ပှၤလၢ​အ​အိၣ်ဒီး တၢ်​ကမၣ်​သံ​ဝဲ​အသိး အဃိ က​ကဲထီၣ်​တၢ်​လီၤဃံၢ်​လၢ ပှၤ​အါဂၤ​အဂီၢ်​လီၤ. (၁ ကရံၣ်သူး ၁:၂၃) ပှၤလၢ​အ​ပိာ်​ယ့ၣ်ၡူး​အခံ​တဖၣ်​ မ့ၢ်​သးစၢၢ်ဆၢ​​ဝဲ​လၢ ​ဘၣ်​မနုၤ​အဃိ ယ့ၣ်ၡူး​​ဘၣ်​သံ​လဲၣ်န့ၣ်​ အဝဲသ့ၣ်​က​နၢ်ပၢၢ်ထီၣ်​ဝဲ တၢ်ဂ့ၢ်​အံၤ​လီၤတံၢ်​လီၤဆဲး​လီၤ. (ကလၤတံ ၃:၁၃, ၁၄) အဝဲသ့ၣ်​က​ထံၣ်​ဝဲ​ယ့ၣ်ၡူး ဒ်​ပှၤလၢ​အုၣ်က့ၤ​ခီၣ်က့ၤ အဝဲသ့ၣ်​န့ၣ်​လီၤ. ဒီး​အဝဲသ့ၣ်​တထံၣ်​ယ့ၣ်ၡူး ဒ်သိး​ဒီး ပှၤလၢ​အ​အိၣ်ဒီး​တၢ်​ကမၣ်​ဘၣ်.

ဘၣ်​မနုၤ​အဃိ ယ့ၣ်ၡူး​ဘၣ်ယၢၤ​ထီၣ်​ တၢ်​ကတိၤ​တဖၣ်​အံၤ​လဲၣ်န့ၣ်​ ယ့ၣ်ၡူး​သ့ၣ်ညါ​​ဝဲ​လၢ အမ့ၢ်​​ဘၣ်​သံ​လၢ တၢ်​မၤအၢ​မၤနး​အ​သ့ၣ်တၢၣ်​လိၤ​န့ၣ်​ မ့ၢ်ဒၣ်​အ​မၤ​လၢပှဲၤ​ထီၣ်ဝဲ ယဟိဝၤ​ယွၤ​အ​တၢ်ဘၣ်သး​လီၤ. ဖဲ​ယ့ၣ်ၡူး​ယၢၤထီၣ်​ဝဲ တၢ်​ကတိၤ​ဖဲ စံးထီၣ်​ပတြၢၤ​အ​ပူၤ​ဝံၤဒီး အ​ဝဲ​တဲ​ဝဲ​လၢ “တၢ်​လၢထီၣ်​ပှဲၤထီၣ်​လံ” န့ၣ်​လီၤ. (ယိၤဟၣ်​ ၁၉:၃၀; လူၤကၣ်​ ၂၂:၃၇) ခီဖျိ​လၢ ယဟိဝၤ​ယွၤ​တ​ဒီသဒၢ ယ့ၣ်ၡူး​​ဘၣ်​အဃိ ကယဲၢ်​တၢ်​လၢ​ယ့ၣ်ၡူး က​​ဘၣ်​မၤ​လၢထီၣ်​ပှဲၤထီၣ်​​ဝဲ​လၢ ဟီၣ်ခိၣ်​ချၢ​န့ၣ်​ ယ့ၣ်ၡူး​မၤ​လၢပှဲၤ​ထီၣ်​ဝဲ​ခဲလၢာ်​လီၤ. အဃိ ယ့ၣ်ၡူး​မၤ​လၢထီၣ်​ပှဲၤထီၣ်​ဝဲ ကယဲၢ်​တၢ်ကွဲး​အသး လၢ​အ​ဘၣ်ဃး​ဒီး​အီၤ “လၢ​စီၤ​မိၤၡ့ အ​တၢ်သိၣ်​တၢ်သီ ဒီး​ဝံ​အ​တၢ်ကွဲး ဒီး​လၢ​လံာ် စံးထီၣ်​ပတြၢၤ​အ​ပူၤ” ခဲလၢာ်​န့ၣ်​လီၤ.—လူၤကၣ်​ ၂၄:၄၄.