တၢ်မၤလိ ၁၉
ပကဘၣ် မၤဂၢၢ်ကျၢၤဒိၣ်ထီၣ် ပတၢ်နာ်လၢ ယဟိဝၤယွၤ အတၢ်အၢၣ်လီၤ ဘၣ်ဃးဒီး ဟီၣ်ခိၣ်သီ
“အဝဲ [ယဟိဝၤယွၤ] မ့ၢ်တဲတၢ်တမံၤမံၤန့ၣ် အဝဲကမၤဝဲ တမ့ၢ်ဧီၤ.”—၄ မိၤၡ့ ၂၃:၁၉.
တၢ်သးဝံၣ် ၁၄၂ တၢ်မုၢ်လၢ်လၢ အမၤဂၢၢ်မၤကျၢၤပှၤ
တၢ်မၤလိအံၤ အတၢ်တိာ်ပာ် a
၁-၂. ဖဲပအိၣ်ခီးလၢ ဟီၣ်ခိၣ်သီ ကဟဲတုၤအခါ ပကဘၣ်မၤ မနုၤလဲၣ်.
ပပာ်လုၢ်ပာ်ပှ့ၤ ယဟိဝၤယွၤ အတၢ်အၢၣ်လီၤလၢ အကမၤဂ့ၤထီၣ်က့ၤ ဟီၣ်ခိၣ်တဘ့ၣ်အံၤ လၢအသီ. (၂ ပ့းတရူး ၃:၁၃) ဟီၣ်ခိၣ်တဘ့ၣ်အံၤ ကဂ့ၤထီၣ်က့ၤလၢ အခါဖဲလဲၣ်န့ၣ် ပတသ့ၣ်ညါလီၤတံၢ်ဘၣ်. ဘၣ်ဆၣ် တၢ်မၤအသးလၢ ဟီၣ်ခိၣ်ချၢန့ၣ် ပာ်ဖျါထီၣ်န့ၢ်ပှၤလၢ ဟီၣ်ခိၣ်သီကဟဲတုၤ ဘူးထီၣ်လံ.—မးသဲ ၂၄:၃၂-၃၄, ၃၆; မၤတၢ် ၁:၇.
၂ ပအိၣ်လၢ တၢ်မ့ၢ်တၢ်တီအပူၤ မ့ၢ်ယံာ်ထဲလဲၣ်ထဲလဲၣ်နာ်က့ ပဝဲခဲလၢာ်န့ၣ် ပကဘၣ် ဆဲးမၤဂၢၢ်ကျၢၤဒိၣ်ထီၣ် ပတၢ်နာ်ဘၣ်ဃးဒီး ယဟိဝၤယွၤ အတၢ်အၢၣ်လီၤအံၤဒံး. ဘၣ်မနုၤအဃိ ပကဘၣ် ဆဲးမၤဂၢၢ်ကျၢၤဒိၣ်ထီၣ် ပတၢ်နာ်လဲၣ်. ပတၢ်နာ်မ့ၢ်ဆူၣ် ထဲလဲၣ်ထဲလဲၣ်နာ်က့ အလီၤစၢ်သ့ဒံး. အဃိ တၢ်မၢဖိပီလူး ကီးဝဲတၢ်နာ်လီၤစၢ် တခါအံၤလၢ “တၢ်ဒဲးဘးလၢ မၤနိးမၤဘျးပှၤ ညီညီတခါ.” (ဧ့ၤဘြံၤ ၁၂:၁) ဒ်သိးပတၢ်နာ် တလီၤစၢ်တဂ့ၤအဂီၢ် ပကဘၣ်ဆိမိၣ်ထံ တၢ်အုၣ်သးလၢ အပာ်ဖျါထီၣ်ဝဲလၢ တယံာ်လၢၤဘၣ်န့ၣ် ဟီၣ်ခိၣ်သီ ကဟဲတုၤနီၢ်ကီၢ်.—ဧ့ၤဘြံၤ ၁၁:၁.
၃. လၢတၢ်မၤလိအံၤန့ၣ် ပကတဲသကီး တၢ်ဂ့ၢ်မနုၤလဲၣ်.
၃ လၢတၢ်မၤလိတခါအံၤ ပကတဲသကီး တၢ်ဂ့ၢ်သၢခါလၢ ကမၤအါထီၣ် ပတၢ်နာ်လၢ ယဟိဝၤယွၤ အတၢ်အၢၣ်လီၤ ဘၣ်ဃးဒီးဟီၣ်ခိၣ်သီ. (၁) ဆိမိၣ်ထံ တၢ်ပှ့ၤက့ၤအဂ့ၢ် လီၤတံၢ်လီၤဆဲး, (၂) ဆိမိၣ်ထံ ယဟိဝၤယွၤ အတၢ်စိတၢ်ကမီၤအဂ့ၢ် (၃) မၤတၢ်လၢ ကမၤစၢၤနၤဒ်သိး နတၢ်ရ့လိာ်သးဒီး ယဟိဝၤယွၤ ကဂ့ၤဒိၣ်ထီၣ်. တကးဒံးဘၣ် ပကတဲသကီး တၢ်ကစီၣ်လၢ ယဟိဝၤယွၤတဲဘၣ် ဝံဃဘးကူာ်န့ၣ် မၤအါထီၣ်ပတၢ်နာ်လၢ ဆၢကတီၢ်ခဲအံၤသ့စ့ၢ်ကီး. ဘၣ်ဆၣ် တၢ်အိၣ်သးတနီၤန့ၣ် မၤလီၤစၢ်ပတၢ်နာ်သ့ အဃိ ပကဘၣ်မၤဆူၣ်ထီၣ် ပတၢ်နာ်လၢ တယံာ်လၢၤဘၣ် ဟီၣ်ခိၣ်သီ ကဟဲတုၤနီၢ်ကီၢ်. ပမၤကသ့ဒ်လဲၣ်န့ၣ် ခဲအံၤပကတဲသကီးအီၤ.
တၢ်အိၣ်သးတနီၤလၢ ပလိၣ်ဘၣ်အါထီၣ်တၢ်နာ်
၄. တၢ်ဆၢတဲာ်လၢ ပလိၣ်ဘၣ်အါထီၣ်တၢ်နာ်န့ၣ် မ့ၢ်မနုၤလဲၣ်.
၄ ပဘၣ်ဆၢတဲာ်တၢ် ကီးနံၤဒဲးအဃိ ပလိၣ်ဘၣ်အါထီၣ်တၢ်နာ်. အဒိ ပကဘၣ် ဆၢတဲာ်တၢ် ဘၣ်ဃးဒီး တၢ်ရ့တံၤရ့သကီး, တၢ်မၤမုာ်မၤဖှံသး, တၢ်ဃုတၢ်ကူၣ်ဘၣ်ကူၣ်သ့, တၢ်ဆီဟံၣ်ဆီဃီ ဒီးဆၢတဲာ်တၢ်လၢ ပဖိပလံၤ ဒီးတၢ်ဖံးအီၣ်မၤအီၣ်အဂီၢ်. ဖဲပဆၢတဲာ်တၢ်အခါ ပဘၣ်သံကွၢ်လီၤသးလၢ ‘ယတၢ်ဆၢတဲာ်န့ၣ် ပာ်ဖျါထီၣ်လၢ ယနာ်လၢ ဟီၣ်ခိၣ်လၢမုၣ်ကီၤလံၢ်ပၢဝဲအံၤ ဘူးကကတၢၢ်လံဧါ ဒီးယနာ်လၢ တယံာ်လၢၤဘၣ် ကစၢ်ယွၤ ကမၤကဲထီၣ်က့ၤ ဟီၣ်ခိၣ်တဘ့ၣ်အံၤလၢ ဟီၣ်ခိၣ်သီဧါ. မ့တမ့ၢ် ယတၢ်ဃုထၢန့ၣ် အလီၤဂာ်ဒ်သိး ပှၤလၢအတနာ်ဝဲလၢ အကအိၣ်မူဘၣ် လီၤထူလီၤယိာ်ဘၣ်ဧါ.’ (မးသဲ ၆:၁၉, ၂၀; လူၤကၣ် ၁၂:၁၆-၂၁) ပမ့ၢ်နာ်သပှၢ်တၢၢ်လၢ တယံာ်လၢၤဘၣ် ဟီၣ်ခိၣ်သီ ကဟဲတုၤနီၢ်ကီၢ်န့ၣ် ပဆၢတဲာ် တၢ်လၢအဘၣ်ကသ့.
၅-၆. ဖဲပထံၣ်ဘၣ် တၢ်ကီတၢ်ခဲအခါ ဘၣ်မနုၤအဃိ ပလိၣ်ဘၣ်အါထီၣ် တၢ်နာ်လဲၣ်. ဟ့ၣ်တၢ်အဒိ.
၅ ပထံၣ်ဘၣ်စ့ၢ်ကီး တၢ်ကီတၢ်ခဲတဖၣ်အဃိ ပလိၣ်ဘၣ်အါထီၣ်တၢ်နာ်. ဘၣ်သ့ၣ်သ့ၣ် ပကထံၣ်ဘၣ် တၢ်မၤအၢမၤနး, တူၢ်ဘၣ် တၢ်ဆူးတၢ်ဆါနးနး မ့တမ့ၢ် တၢ်ကီတၢ်ခဲအဂၤလၢ ကမၤလီၤစၢ် ပသးဂံၢ်ဘါ. အခီၣ်ထံးခါဒု ပကဆိမိၣ်လၢ ပလဲၤခီဖျိပတၢ်ကီတၢ်ခဲန့ၢ်. ဘၣ်ဆၣ် တၢ်ကီတၢ်ခဲတဖၣ်အံၤ ဘၣ်ပှၤယံာ်မးအဃိ ပလိၣ်ဘၣ်အါထီၣ်တၢ်နာ် ဒ်သိး ပလဲၤခီဖျိအီၤကန့ၢ် ဒီးပကဆဲးမၤ ယဟိဝၤယွၤ အတၢ်မၤလၢတၢ်သးခု.—ရိမ့ၤ ၁၂:၁၂; ၁ ပ့းတရူး ၁:၆, ၇.
၆ ဖဲပလဲၤခီဖျိ တၢ်ကီတၢ်ခဲအခါ ဘၣ်သ့ၣ်သ့ၣ် ပကဆိမိၣ်လၢ ဟီၣ်ခိၣ်သီ တဟဲလၢၤဘၣ်. ပမ့ၢ်ဆိမိၣ်ဒ်န့ၣ်န့ၣ် မ့ၢ်လၢပတၢ်နာ်လီၤစၢ်အဃိဧါ. တမ့ၢ်ကၠဲန့ၣ်ဘၣ်. ဆိကမိၣ်ကွၢ် ဖဲတၢ်စူၤခါအဆၢကတီၢ်န့ၣ် တၢ်စူၤဒီယုၢ် ဒီးတပတုာ်နီတဘျီလၢၤဘၣ် အဃိ ဘၣ်သ့ၣ်သ့ၣ် ပကဆိမိၣ်လၢ တၢ်ယီၤထီၣ် တန့ၢ်လၢၤဘၣ်. သနာ်က့ အခါဘၣ်ဘျီ တၢ်ယီၤထီၣ်က့ၤ. ဒ်န့ၣ်အသိး ဖဲပသးဂံၢ်ဘါလီၤစၢ်နးမးအခါ ဘၣ်သ့ၣ်သ့ၣ် ပကဆိမိၣ်လၢ ဟီၣ်ခိၣ်သီအံၤ ဟဲတုၤတန့ၢ်လၢၤဘၣ်. သနာ်က့ ပတၢ်နာ် မ့ၢ်ဂၢၢ်ကျၢၤန့ၣ် ပသ့ၣ်ညါလၢ ကစၢ်ယွၤအတၢ်အၢၣ်လီၤ ကဟဲလၢပှဲၤထီၣ်နီၢ်ကီၢ်. (စံးထီၣ်ပတြၢၤ ၉၄:၃, ၁၄, ၁၅; ဧ့ၤဘြံၤ ၆:၁၇-၁၉) ပမ့ၢ်နာ်လၢ ယဟိဝၤယွၤ အတၢ်အၢၣ်လီၤ ကဟဲလၢပှဲၤထီၣ်နီၢ်ကီၢ်န့ၣ် ပကဆဲးပာ်ဆိ တၢ်ဘူၣ်ထီၣ်ဘါထီၣ် ယဟိဝၤယွၤလၢ နီၣ်ဂံၢ်တၢထီဘိ.
၇. ပကဘၣ်ပလီၢ်သးလၢ တၢ်ဆိမိၣ်ဒ်လဲၣ် တကလုာ်လဲၣ်.
၇ ဆိမိၣ်ကွၢ် တၢ်ဂ့ၢ်အဂၤတခါ. ဖဲပစံၣ်တဲၤတဲလီၤတၢ်အခါ ပလိၣ်ဘၣ်အါထီၣ် တၢ်နာ်စ့ၢ်ကီး. ဖဲပလဲၤစံၣ်တဲၤတဲလီၤ “တၢ်သးခုကစီၣ်” ဘၣ်ဃးဒီး ဟီၣ်ခိၣ်သီအဂ့ၢ်ခါန့ၣ် ပှၤအါတက့ၢ် တဲဝဲလၢ ဟီၣ်ခိၣ်သီန့ၣ် ကဲထီၣ်သးတသ့ဘၣ်. (မးသဲ ၂၄:၁၄; ယဃ့းစက့လး ၃၃:၃၂) အဃိ ဒ်သိးပှၤတဖၣ်အံၤ မၤလီၤစၢ်ပတၢ်နာ် တန့ၢ်တဂ့ၤအဂီၢ် ပကဘၣ်ပလီၢ်သး ဒီးဆဲးမၤဂၢၢ်ကျၢၤဒိၣ်ထီၣ် ပတၢ်နာ်ထီဘိ. ခဲအံၤ ပကတဲသကီး တၢ်ဂ့ၢ်သၢခါလၢ ကမၤစၢၤပှၤဒ်သိး ပတၢ်နာ်ကဂၢၢ်ကျၢၤဒိၣ်ထီၣ်.
ဆိကမိၣ်ထံ တၢ်ပှ့ၤက့ၤအဂ့ၢ် လီၤတံၢ်လီၤဆဲး
၈-၉. ပမ့ၢ်ဆိမိၣ်ထံ တၢ်ပှ့ၤက့ၤအဂ့ၢ် လီၤတံၢ်လီၤဆဲးန့ၣ် ပတၢ်နာ် ကဂၢၢ်ကျၢၤဒိၣ်ထီၣ်ဒ်လဲၣ်.
၈ တၢ်ဂ့ၢ်တၢတခါ. ပမ့ၢ်ဆိမိၣ်ထံ တၢ်ပှ့ၤက့ၤအဂ့ၢ် လီၤတံၢ်လီၤဆဲးန့ၣ် ပတၢ်နာ်ကဂၢၢ်ကျၢၤဒိၣ်ထီၣ်. တၢ်ပှ့ၤက့ၤန့ၣ် အကဲဝဲ တၢ်အုၣ်သးဂၢၢ်ကျၢၤတခါလၢ ကစၢ်ယွၤ အတၢ်အၢၣ်လီၤန့ၣ် ကဟဲလၢပှဲၤထီၣ်နီၢ်ကီၢ်. ဖဲပဆိမိၣ်ထံလၢ ဘၣ်မနုၤအဃိ ကစၢ်ယွၤ ကတဲာ်ကတီၤန့ၢ်ပှၤ တၢ်ပှ့ၤက့ၤ ဒီးအသးအိၣ်တူၢ်ဆါသး လၢပဂီၢ်အခါ ပတၢ်နာ်ဘၣ်ဃးဒီး ကစၢ်ယွၤကမၤလၢပှဲၤထီၣ် အတၢ်အၢၣ်လီၤလၢ ခါဆူညါန့ၣ် ကဂၢၢ်ကျၢၤဒိၣ်ထီၣ်နီၢ်ကီၢ်. ဘၣ်မနုၤအဃိ ပတဲဒ်န့ၣ်လဲၣ်.
၉ ဆိကမိၣ်ကွၢ် ဘၣ်ဃးဒီးတၢ်ပှ့ၤက့ၤန့ၣ် ယဟိဝၤယွၤ ဘၣ်တူၢ်ဆါသးထဲလဲၣ်. ယဟိဝၤယွၤ ဘၣ်ဟ့ၣ်လီၤအဖိခွါလၢ အအဲၣ်ဝဲထဲတဂၤ ဒီးမၢအဟဲလီၤ အိၣ်ဖျဲၣ်ထီၣ်လၢဟီၣ်ခိၣ်ချၢ ဒ်ပှၤဟီၣ်ခိၣ်ဖိလၢ အလၢအပှဲၤတဂၤ. ဖဲယ့ၣ်ၡူးအိၣ်လၢ ဟီၣ်ခိၣ်ချၢအခါ အဘၣ်လဲၤခီဖျိ တၢ်ကီတၢ်ခဲကီးမံၤဒဲး ဒ်သိးဒီးပှၤဟီၣ်ခိၣ်ဖိ. တကးဒံးဘၣ် ပှၤမၤအၢမၤနးအီၤ ဒီးအဘၣ်တူၢ်ဆါသး တုၤလၢအသံ. ယဟိဝၤယွၤ ဘၣ်ပျဲဝဲလၢ အဖိခွါလၢအအဲၣ်ဝဲထဲတဂၤ ဘၣ်တူၢ်ဆါသး တုၤလၢအသံညါအဃိ အကဒုးအိၣ်မူပှၤ တစိၢ်တလီၢ်လီၤဒု တမ့ၢ်ဘၣ်. (ယိၤဟၣ် ၃:၁၆; ၁ ပ့းတရူး ၁:၁၈, ၁၉) ဘၣ်ဆၣ် ခီဖျိလၢ ယဟိဝၤယွၤ ဘၣ်သးလၢ ပကအိၣ်မူဘၣ် လီၤထူလီၤယိာ် လၢဟီၣ်ခိၣ်သီအပူၤအဃိ အဟ့ၣ်လီၤပှၤ အဖိခွါလၢ အလုၢ်ဒိၣ်ပှ့ၤဒိၣ်ကတၢၢ်.
ဆိကမိၣ်ထံ ယဟိဝၤယွၤ အတၢ်စိတၢ်ကမီၤ
၁၀. ဒ်အ့းဖ့းစူး ၃:၂၀ ပာ်ဖျါထီၣ်ဝဲအသိး ယဟိဝၤယွၤ မၤတၢ်မနုၤသ့လဲၣ်.
၁၀ တၢ်ဂ့ၢ်ခံခါတခါ. ပမ့ၢ်ဆိမိၣ်ထံ ယဟိဝၤယွၤ အတၢ်စိတၢ်ကမီၤန့ၣ် ပတၢ်နာ် ကဂၢၢ်ကျၢၤဒိၣ်ထီၣ်. ယဟိဝၤယွၤန့ၣ် အိၣ်ဒီးတၢ်စိတၢ်ကမီၤလၢ ကမၤလၢပှဲၤ အတၢ်အၢၣ်လီၤခဲလၢာ်. ဆၢကတီၢ်ခဲအံၤ ပှၤအါဂၤဆိမိၣ်ဝဲလၢ တၢ်အိၣ်မူလီၤထူလီၤယိာ်လၢ ဟီၣ်ခိၣ်သီန့ၣ် ဟဲကဲထီၣ်သး တသ့ဘၣ်. ဒီးယဟိဝၤယွၤ အတၢ်အၢၣ်လီၤန့ၣ် ပှၤဟီၣ်ခိၣ်ဖိ မၤလၢပှဲၤဝဲ တသ့နီတဂၤဘၣ်. သနာ်က့ ယဟိဝၤယွၤန့ၣ် အကဲသ့တၢ်လၢာ်ကစၢ်အဃိ အမၤလၢပှဲၤအတၢ်အၢၣ်လီၤ သ့ခဲလၢာ်. (ယိၤဘး ၄၂:၂; မၢ်ကူး ၁၀:၂၇) အဃိ ယဟိဝၤယွၤ အတၢ်အၢၣ်လီၤ ဘၣ်ဃးဒီး တၢ်အိၣ်မူလီၤထူလီၤယိာ်လၢ ဟီၣ်ခိၣ်သီန့ၣ် ကဟဲကဲထီၣ်နီၢ်ကီၢ်.—ဖး အ့းဖ့းစူး ၃:၂၀.
၁၁. ဟ့ၣ်တၢ်အဒိ ဘၣ်ဃးဒီး ကစၢ်ယွၤ အတၢ်အၢၣ်လီၤ လၢအလီၤဂာ်လၢ အကဲထီၣ်သးတသ့ဘၣ်. (ကွၢ်တၢ်လွံၢ်နၢၣ် လၢအမ့ၢ် “ တၢ်အၢၣ်လီၤတနီၤလၢ အလီၤဂာ်လၢ အကဲထီၣ်သးတသ့ဘၣ်န့ၣ် ဟဲလၢပှဲၤထီၣ်ဝဲ.”)
၁၁ ခဲအံၤ ပကကွၢ်သကီး တၢ်လၢယဟိဝၤယွၤ အၢၣ်လီၤအပှၤဂီၢ်မုၢ်လၢညါ လၢအလီၤဂာ်ဒ်သိးဒီး အကဲထီၣ်သးတသ့ဘၣ်. ယဟိဝၤယွၤ တဲဘၣ် စီၤအၤဘြၤဟၣ် ဒီးနီၢ်စၤရါလၢ အဝဲသ့ၣ် မ့ၢ်သးပှၢ်နာ်က့ အဖိကအိၣ်တဂၤ. (၁ မိၤၡ့ ၁၇:၁၅-၁၇) အအၢၣ်လီၤစ့ၢ်ကီး စီၤအၤဘြၤဟၣ်လၢ အစၢၤအသွဲၣ် ကန့ၢ်ဘၣ် ကီၢ်ကနၤဧၣ်. ဘၣ်ဆၣ် ဖဲစီၤအၤဘြၤဟၣ် အစၢၤအသွဲၣ် လၢအမ့ၢ် ပှၤအံၣ်စရ့လးဖိတဖၣ် ဘၣ်ကဲကုၢ်လၢ ကီၢ်အဲၤကူပတူးအခါ လီၤဂာ်လၢ တၢ်လၢယဟိဝၤယွၤ အၢၣ်လီၤ စီၤအၤဘြၤဟၣ်န့ၣ် ကဲထီၣ်သးတသ့ဘၣ်. သနာ်က့လၢခံ အဟဲလၢပှဲၤထီၣ်နီၢ်ကီၢ်. အဒိ ယဟိဝၤယွၤ တဲပာ်စၢၤဝဲလၢ နီၢ်အ့းလံၤစါဘ့း မ့ၢ်သးပှၢ်နာ်က့ အဖိကအိၣ်တဂၤ. တကးဒံးဘၣ် ယဟိဝၤယွၤ တဲဘၣ်စ့ၢ်ကီး မုၣ်ကနီၤတဂၤလၢ အမံၤမ့ၢ် နီၢ်မၤရံလၢ အကအိၣ်ဖျဲၣ်ထီၣ်ဝဲ ကစၢ်ယွၤအဖိခွါ. တၢ်လၢယဟိဝၤယွၤ တဲဆိပာ်စၢၤဝဲတဖၣ်အံၤ ကမၤလၢပှဲၤထီၣ် အတၢ်အၢၣ်လီၤလၢအတဲဆိပာ်စၢၤဝဲ ပူၤကွံာ်အနံၣ်လၢအကထိတဖၣ် ဖဲဧ့ၤဒ့ၣ်တၤသၣ်လီၢ်.—၁ မိၤၡ့ ၃:၁၅.
၁၂. ဘၣ်ဃးဒီး ယဟိဝၤယွၤ အစိကမီၤန့ၣ် ယိၤၡူ ၂၃:၁၄ ဒီး ယၡါယၤ ၅၅:၁၀, ၁၁ တဲဝဲဒ်လဲၣ်.
၁၂ ပမ့ၢ်ဆိမိၣ်ဘၣ်ဃးဒီး တၢ်လၢယဟိဝၤယွၤ အၢၣ်လီၤဝဲခဲလၢာ် ဒီးအမၤလၢပှဲၤဝဲဒ်လဲၣ်န့ၣ် ပသ့ၣ်ညါဘၣ်လၢ ယဟိဝၤယွၤန့ၣ် အစိကမီၤဒိၣ်မး. ဒီးပတၢ်နာ် ဘၣ်ဃးဒီး ဟီၣ်ခိၣ်သီစ့ၢ်ကီး ကဂၢၢ်ကျၢၤဒိၣ်ထီၣ်. (ဖး ယိၤၡူ ၂၃:၁၄; ယၡါယၤ ၅၅:၁၀, ၁၁.) အဃိ ပကအိၣ်ကတီၤသးထီဘိလၢ ပကမၤစၢၤပှၤဂၤ ဒ်သိးအဝဲသ့ၣ် ကသ့ၣ်ညါထီၣ်လၢ တၢ်အၢၣ်လီၤဘၣ်ဃးဒီး ဟီၣ်ခိၣ်သီန့ၣ် ကကဲထီၣ်သးနီၢ်ကီၢ် ဒီးအတကဲဝဲ တၢ်မံမီၢ်ဘၣ်. တကးဒံးဘၣ် ဘၣ်ဃးဒီး မူခိၣ်သီ ဒီးဟီၣ်ခိၣ်သီ အဂ့ၢ်န့ၣ် ယဟိဝၤယွၤ တဲဝဲလၢ “တၢ်ကတိၤတဖၣ်အံၤ ပှၤနာ်န့ၢ်အီၤသ့ ဒီးမ့ၢ်ဝဲတီဝဲ.”—လီၣ်ဖျါ ၂၁:၁, ၅.
မၤတၢ်လၢ ကမၤစၢၤနၤဒ်သိး နတၢ်ရ့လိာ်သးဒီး ယဟိဝၤယွၤ ကဂ့ၤဒိၣ်ထီၣ်
ထီၣ်တၢ်အိၣ်ဖှိၣ်
ပမ့ၢ်ထီၣ်တၢ်အိၣ်ဖှိၣ်န့ၣ် ကမၤဂၢၢ်ကျၢၤဒိၣ်ထီၣ် ပတၢ်နာ်ဒ်လဲၣ် (ကွၢ်လံာ်အဆၢ ၁၃)
၁၃. တၢ်ထီၣ်တၢ်အိၣ်ဖှိၣ်န့ၣ် ကဲဘျုးလၢပဂီၢ်ဒ်လဲၣ်.
၁၃ တၢ်ဂ့ၢ်သၢခါတခါလၢ ကမၤဂၢၢ်ကျၢၤဒိၣ်ထီၣ် ပတၢ်နာ်န့ၣ်မ့ၢ်ဝဲ ပကဘၣ် မၤတၢ်လၢ ကမၤစၢၤပှၤဒ်သိး ပတၢ်ရ့လိာ်သးဒီး ယဟိဝၤယွၤ ကဂ့ၤဒိၣ်ထီၣ်. ပသ့ၣ်ညါလၢ တၢ်ထီၣ်တၢ်အိၣ်ဖှိၣ် န့ၣ်ကဲဘျုးလၢပဂီၢ်ဒိၣ်မး. အဒိ ဒီပုၢ်ဝဲၢ်မုၣ်အဲနၤန့ၣ် အမၤဘၣ်ကစၢ်ယွၤအတၢ်မၤ အကလုာ်ကလုာ် လၢအနံၣ်လၢအဆံညါ. ဘၣ်ဃးဒီး တၢ်ထီၣ်တၢ်အိၣ်ဖှိၣ်န့ၣ် အတဲဝဲလၢ “တၢ်ထီၣ်တၢ်အိၣ်ဖှိၣ်န့ၣ် မၤဂၢၢ်ကျၢၤဒိၣ်ထီၣ် ယတၢ်နာ်. ပှၤဟ့ၣ်တၢ်စံၣ်တဲၤတဲလီၤတဂၤ သိၣ်လိတၢ် မ့ၢ်တသ့အါအါဘၣ် ဒီးအမ့ၢ်တတဲ တၢ်ဂ့ၢ်လၢအသီနီတမံၤဘၣ်နာ်က့ ဖဲယလဲၤထီၣ်တၢ်အိၣ်ဖှိၣ်အခါ ယနၢ်ဟူဘၣ်တၢ်ဂ့ၢ်လၢ အမၤစၢၤယၤဒ်သိး ယကနၢ်ပၢၢ်အါထီၣ် လံာ်စီဆှံအခီပညီအဃိ ယတၢ်နာ် ဂၢၢ်ကျၢၤဒိၣ်ထီၣ်.” b အဃိ ပမ့ၢ်နၢ်ဟူဘၣ် ပဒီပုၢ်ဝဲၢ်မုၣ်ခွါတဖၣ် ဟ့ၣ်ထီၣ်တၢ်စံးဆၢ လၢတၢ်အိၣ်ဖှိၣ်န့ၣ် ကမၤဂၢၢ်ကျၢၤဒိၣ်ထီၣ် ပတၢ်နာ်စ့ၢ်ကီး.—ရိမ့ၤ ၁:၁၁, ၁၂; ၁၀:၁၇.
စံၣ်တဲၤတဲလီၤတၢ်
ပမ့ၢ်ထီၣ်တၢ်အိၣ်ဖှိၣ်, စံၣ်တဲၤတဲလီၤတၢ်န့ၣ် ကမၤဂၢၢ်ကျၢၤဒိၣ်ထီၣ် ပတၢ်နာ်ဒ်လဲၣ် (ကွၢ်လံာ်အဆၢ ၁၄)
၁၄. တၢ်စံၣ်တဲၤတဲလီၤတၢ်မၤန့ၣ် ကဲဘျုးလၢပဂီၢ်ဒ်လဲၣ်.
၁၄ ပမ့ၢ်လဲၤ စံၣ်တဲၤတဲလီၤတၢ်န့ၣ် ကမၤဂၢၢ်ကျၢၤဒိၣ်ထီၣ်စ့ၢ်ကီး ပတၢ်နာ်. (ဧ့ၤဘြံၤ ၁၀:၂၃) ဘၣ်ဃးဒီး တၢ်စံၣ်တဲၤတဲလီၤတၢ်မၤန့ၣ် ဒီပုၢ်ဝဲၢ်မုၣ်ဘါဘရၤ လၢအမၤကစၢ်ယွၤအတၢ်မၤ န့ၢ်အနံၣ် ၇၀ န့ၣ်တဲဝဲလၢ “တၢ်စံၣ်တဲၤတဲလီၤတၢ်မၤတခါအံၤ အမၤဂၢၢ်ကျၢၤဒိၣ်ထီၣ် ယတၢ်နာ်ထီဘိ. ယမ့ၢ်တဲပၠးပှၤဂၤလၢ ယဟိဝၤယွၤ အတၢ်အၢၣ်လီၤန့ၣ် ယတၢ်နာ်စ့ၢ်ကီး ဂၢၢ်ကျၢၤဒိၣ်ထီၣ်.”
မၤနီၢ်ကစၢ် တၢ်မၤလိလံာ်စီဆှံ
ပမ့ၢ်ထီၣ်တၢ်အိၣ်ဖှိၣ်, စံၣ်တဲၤတဲလီၤတၢ် ဒီးမၤနီၢ်ကစၢ် တၢ်မၤလိလံာ်စီဆှံန့ၣ် ကမၤဂၢၢ်ကျၢၤဒိၣ်ထီၣ် ပတၢ်နာ်ဒ်လဲၣ် (ကွၢ်လံာ်အဆၢ ၁၅)
၁၅. နီၢ်ကစၢ် တၢ်မၤလိလံာ်စီဆှံန့ၣ် ကဲဘျုးလၢပဂီၢ်ဒ်လဲၣ်. (ကွၢ်စ့ၢ်ကီးတၢ်ဂီၤ.)
၁၅ တၢ်ဂ့ၢ်အဂၤတခါလၢ ကမၤဂၢၢ်ကျၢၤဒိၣ်ထီၣ် ပတၢ်နာ်န့ၣ် မ့ၢ်ဝဲ နီၢ်ကစၢ် တၢ်မၤလိလံာ်စီဆှံ. ဒီပုၢ်ဝဲၢ်မုၣ်စူးစဲ တဲဝဲလၢ အမ့ၢ်ရဲၣ်ကျဲၤလီၤပာ်စၢၤ တၢ်ဆၢကတီၢ်လၢ အကမၤ နီၢ်ကစၢ် တၢ်မၤလိလံာ်စီဆှံန့ၣ် ကဲဘျုးလၢအဂီၢ်ဒိၣ်မး. အတဲဝဲ “လၢအိၣ်ဘှံးနံၤန့ၣ် ယမၤလိပာ်စၢၤ တၢးထီခိးတၢ် တၢ်မၤလိ လၢခံတနွံအဂီၢ်. လၢမုၢ်တနံၤ ဒီးမုၢ်ခံနံၤန့ၣ် ယမၤလိပာ်စၢၤ တၢ်ဂ့ၢ်လၢ နွံဖးဖီတၢ်အိၣ်ဖှိၣ်အဂီၢ်. ဒီးလၢမုၢ်နံၤအဂၤတဖၣ်န့ၣ် ယဃုကွၢ် တၢ်ဂ့ၢ်အဂၤလၢ နီၢ်ကစၢ် တၢ်မၤလိလံာ်စီဆှံအဂီၢ်.” ဒီပုၢ်ဝဲၢ်မုၣ်စူးစဲ မၤဝဲ နီၢ်ကစၢ် တၢ်မၤလိလံာ်စီဆှံ ဒ်သိးအရဲၣ်ကျဲၤလီၤပာ်စၢၤဝဲ မၢ်မၢ်အဃိ အတၢ်နာ် ဂၢၢ်ကျၢၤဒိၣ်ထီၣ်. ဒီပုၢ်ဝဲၢ်မုၣ်အၤရံ လၢအမၤတၢ်လၢ ဝဲၤလီၢ်ခိၣ်သ့ၣ် လၢအနံၣ်အါမးန့ၣ် တဲဝဲလၢ အမၤလိ ဝံအတၢ်စံးပာ်အဃိ အတၢ်နာ် ဂၢၢ်ကျၢၤဒိၣ်ထီၣ်. ဒီးအတဲဝဲလၢ “ယထံၣ်ဘၣ်လၢ ဝံအတၢ်စံးပာ်တဖၣ် ဟဲလၢပှဲၤထီၣ်ဝဲ ကီးကၠဲးဒဲး.” c
“ကဟဲလၢထီၣ်ပှဲၤထီၣ်ဝဲ သပှၢ်ကတၢၢ်”
၁၆. တၢ်လၢယဟိဝၤယွၤ တဲဘၣ်ဝံဃဘးကူာ်န့ၣ် ကဲဘျုးလၢပဂီၢ်စ့ၢ်ကီးဧါ. (ဧ့ၤဘြံၤ ၁၀:၃၆, ၃၇)
၁၆ ယဟိဝၤယွၤ အခ့အပှၤတနီၤန့ၣ် အိၣ်ခီးဝဲလၢ တၢ်အကတၢၢ် ကဟဲတုၤန့ၣ် ဖၣ်ယံာ်လံ. အဝဲသ့ၣ်တနီၤ ဆိမိၣ်ဝဲလၢ ကစၢ်ယွၤ အတၢ်အၢၣ်လီၤ ဘၣ်ဃးဒီး တၢ်အကတၢၢ်အံၤ ကြၢးဟဲတုၤလံ. အဝဲသ့ၣ် တၢ်ထံၣ်အိၣ်ဒ်န့ၣ်နာ်က့ ယဟိဝၤယွၤ နၢ်ပၢၢ်ဝဲ. အဃိ ဘၣ်ဃးဒီး တၢ်အကတၢၢ်န့ၣ် ယဟိဝၤယွၤ တဲဘၣ်ဝံဃဘးကူာ်လၢ “တၢ်ထံၣ်လၢညါခီအံၤ ကလၢထီၣ်ပှဲၤထီၣ်ဖဲ တၢ်ဆၢကတီၢ်လၢ ဘၣ်တၢ်ပာ်ပနီၣ်အီၤ ဘၣ်ဝဲအခါလီၤ. ဒီးတၢ်ဆၢကတီၢ်အံၤ ကဟဲဝဲချ့ချ့ ဒီးတၢ်ထံၣ်လၢညါခီအံၤ တမ့ၢ်တၢ်လံၣ်တၢ်လီဘၣ်. မ့ၢ်ဖျါလၢ အယံာ်ဝဲဘၣ်ဆၣ် ခိးကွၢ်လၢ်အီၤလၢ တၢ်သးဆူၣ် အပူၤတက့ၢ်. တၢ်ထံၣ်လၢညါခီအံၤ ကဟဲလၢထီၣ်ပှဲၤထီၣ်ဝဲ သပှၢ်ကတၢၢ် ဒီးတစဲၤခံဘၣ်.” (ဃဘးကူာ် ၂:၃) ယဟိဝၤယွၤ အတၢ်ကတိၤအံၤ အကဲဘျုးထဲ ဝံဃဘးကူာ်အဂီၢ်လီၤဧါ. မ့မ့ၢ်ပဂီၢ်ဟီမီၤ အကဲဘျုးစ့ၢ်ကီးဧါ. တၢ်မၢဖိပီလူး တဲဝဲလၢ ယဟိဝၤယွၤ အတၢ်ကတိၤအံၤ ဘၣ်ထွဲဒီး ခရံာ်ဖိလၢ အအိၣ်ခီးကွၢ်လၢ် ဟီၣ်ခိၣ်သီစ့ၢ်ကီး. (ဖး ဧ့ၤဘြံၤ ၁၀:၃၆, ၃၇.) အဃိ ပမ့ၢ်ဆိမိၣ်လၢ ပဘၣ်အိၣ်ခီး ယဟိဝၤယွၤ အတၢ်အၢၣ်လီၤအံၤ ဖၣ်ယံာ်ဒံးနာ်က့ ပနာ်သ့နီၢ်ကီၢ်လၢ အတၢ်အၢၣ်လီၤအံၤ “ကဟဲလၢထီၣ်ပှဲၤထီၣ်ဝဲ သပှၢ်ကတၢၢ် ဒီးတစဲၤခံဘၣ်.”
၁၇. တၢ်လၢယဟိဝၤယွၤ တဲဘၣ်ဝံဃဘးကူာ်န့ၣ် ဒီပုၢ်ဝဲၢ်မုၣ်တဂၤ မၤထွဲဝဲဒ်လဲၣ်.
၁၇ ယဟိဝၤယွၤ အခ့အပှၤအါဂၤန့ၣ် မၤထွဲဝဲ ယဟိဝၤယွၤ အတၢ်ဟ့ၣ်ကူၣ် ဒီးဆဲး “ခိးကွၢ်လၢ်” ယဟိဝၤယွၤ အတၢ်အၢၣ်လီၤ အိၣ်အနံၣ်အါမးလံ. အဒိ ဒီပုၢ်ဝဲၢ်မုၣ်လူဝံးန့ၣ် အစးထီၣ်မၤ ယဟိဝၤယွၤအတၢ်မၤဖဲ ၁၉၃၉ နံၣ်. ဒီပုၢ်ဝဲၢ်မုၣ် တဲဝဲလၢ “ဖဲယစးထီၣ်မၤ ယဟိဝၤယွၤအတၢ်မၤသီသီခါ ယဆိမိၣ်လၢ တချုးယဖျိထီၣ် တီၤထီကၠိဒံးဘၣ်ဒု အၢ်မက့းဒိၣ်ဟဲတုၤလီၤ. သနာ်က့ အတကဲထီၣ်ကၠဲန့ၣ်ဘၣ်. လၢခံ ယဖးဘၣ်စီၤနိအၤ, စီၤအၤဘြၤဟၣ်, စီၤယိၤသး ဒီးပှၤအဂၤတဖၣ်အဂ့ၢ် လၢလံာ်စီဆှံပူၤဒီး အဝဲသ့ၣ်န့ၣ် ဘၣ်အိၣ်ခီးဝဲ ယဟိဝၤယွၤ ကမၤလၢပှဲၤထီၣ်အတၢ်အၢၣ်လီၤ ယံာ်ဝဲတဘျုးနံၣ်ညါ. ယဖးအဝဲသ့ၣ်အဂ့ၢ်အဃိ မၤစၢၤယၤလၢ ယကအိၣ်ခီး ယဟိဝၤယွၤ ဒီးနာ်လၢ အကမၤလၢပှဲၤအတၢ်အၢၣ်လီၤနီၢ်ကီၢ်. ယသ့ၣ်ညါလၢ ယဟိဝၤယွၤ ကမၤလၢပှဲၤထီၣ် အတၢ်အၢၣ်လီၤထီဘိအဃိ မၤစၢၤယၤ ဒီးပှၤအဂၤတဖၣ် လၢပကနာ်သပှၢ်တၢၢ်လၢ ဟီၣ်ခိၣ်သီန့ၣ်ဘူးထီၣ်လံ.” ပှၤအဂၤလၢ အမၤယဟိဝၤယွၤအတၢ်မၤ လၢအနံၣ်အါမးန့ၣ် နာ်ဝဲဒ်န့ၣ်စ့ၢ်ကီး.
၁၈. ပမ့ၢ်ကွၢ်ဒီးဆိမိၣ်ထံ တၢ်ဘၣ်တ့န့ၣ် ကမၤဂၢၢ်ကျၢၤဒိၣ်ထီၣ် ပတၢ်နာ်ဘၣ်ဃး ဟီၣ်ခိၣ်သီဒ်လဲၣ်.
၁၈ ခဲအံၤဒု ဟီၣ်ခိၣ်သီ တတုၤဒံးဘၣ်. သနာ်က့ ဆိမိၣ်ကွၢ် တၢ်လၢအအိၣ်ခဲအံၤ ဒ်သိးဒီး ဆၣ်, သ့ၣ်ထူၣ်, ဆၣ်ဖိကီၢ်ဖိ ဒီးပှၤဟီၣ်ခိၣ်ဖိတဖၣ်. တၢ်ဘၣ်တ့တဖၣ်အံၤ ခီၣ်ထံးခါ အတအိၣ်ဘၣ်န့ၣ် ပှၤသ့ၣ်ညါဝဲကီးဂၤဒဲးလီၤ. ဘၣ်ဆၣ်ခီဖျိလၢ ယဟိဝၤယွၤ တ့လီၤတၢ်အဃိ တၢ်ဘၣ်တ့တဖၣ်အံၤ ဟဲအိၣ်ထီၣ်ဝဲ. (၁ မိၤၡ့ ၁:၁, ၂၆, ၂၇) ပတၢ်ဘၣ်တ့ကစၢ် အၢၣ်လီၤဝဲလၢ အကမၤဂ့ၤထီၣ်က့ၤ ဟီၣ်ခိၣ်တဘ့ၣ်အံၤ လၢအသီ. လၢဟီၣ်ခိၣ်သီန့ၣ် ပှၤဟီၣ်ခိၣ်ဖိခဲလၢာ် ကအိၣ်ဆူၣ်အိၣ်ချ့ ဒီးကအိၣ်မူဘၣ် လီၤထူလီၤယိာ်. အဃိ ယဟိဝၤယွၤ အၢၣ်လီၤလၢ အကမၤကဲထီၣ် ဟီၣ်ခိၣ်သီန့ၣ် ပနာ်န့ၢ်အီၤသ့နီၢ်ကီၢ်.—ယၡါယၤ ၆၅:၁၇; လီၣ်ဖျါ ၂၁:၃, ၄.
၁၉. နမၤဂၢၢ်ကျၢၤဒိၣ်ထီၣ် နတၢ်နာ် ကသ့ဒ်လဲၣ်.
၁၉ ခဲအံၤ ပကဘၣ် ဟံန့ၢ်တၢ်ခွဲးတၢ်ယာ် လၢလၢပှဲၤပှဲၤလၢ ပကမၤဂၢၢ်ကျၢၤအါထီၣ် ပတၢ်နာ်. ပကဘၣ် ပာ်လုၢ်ပာ်ပှ့ၤအါထီၣ် တၢ်ပှ့ၤက့ၤ, ဆိမိၣ်ထံ ယဟိဝၤယွၤ အတၢ်စိတၢ်ကမီၤအဂ့ၢ် ဒီးမၤတၢ်လၢ ကမၤစၢၤပှၤဒ်သိး ပတၢ်ရ့လိာ်သးဒီး ယဟိဝၤယွၤ ကဂ့ၤဒိၣ်ထီၣ်. ပမ့ၢ်မၤဒ်န့ၣ်န့ၣ် ပကပၣ်ဃုာ်လၢ “ပှၤလၢအနာ်တၢ် ဒီးဝံသးစူၤတၢ် အဃိန့ၢ်သါဘၣ် တၢ်စံးပာ်တဖၣ်” အကျါ.—ဧ့ၤဘြံၤ ၆:၁၁, ၁၂; ရိမ့ၤ ၅:၅.
တၢ်သးဝံၣ် ၁၃၉ ထံၣ်တမှံကွၢ် ဖဲတၢ်ခဲလၢာ်မ့ၢ်တၢ်အသီ
a ဆၢကတီၢ်ခဲအံၤ ပှၤအါတက့ၢ် တနာ်လံာ်စီဆှံ အတၢ်အၢၣ်လီၤ ဘၣ်ဃးဒီး ဟီၣ်ခိၣ်သီဘၣ်. ဒီးအဝဲသ့ၣ် ဆိမိၣ်ဝဲလၢ တၢ်အၢၣ်လီၤတခါအံၤ အကဲထီၣ်သးတသ့ဘၣ် ဒီးအကဲတၢ်တဲမုာ်နၢ်ဒီး တၢ်မံမီၢ်တခါလီၤ. သနာ်က့ မ့မ့ၢ်ပှၤန့ၣ် ပနာ်လၢ ယဟိဝၤယွၤ အတၢ်အၢၣ်လီၤခဲလၢာ် ကဟဲလၢပှဲၤထီၣ်နီၢ်ကီၢ်. ပမ့ၢ်နာ်ဒ်န့ၣ်နာ်က့ ပကဘၣ် ဆဲးမၤဂၢၢ်ကျၢၤဒိၣ်ထီၣ် ပတၢ်နာ်တခါအံၤဒံး. ပမၤကသ့ဒ်လဲၣ်န့ၣ် တၢ်မၤလိတခါအံၤ ကပာ်ဖျါထီၣ်န့ၢ်ပှၤ.
b ပှၤမံၤတနီၤန့ၣ် ပှၤဆီတလဲဝဲ.
c တၢ်ဂ့ၢ်ဒီးတၢ်မၤလိ ဘၣ်ဃးဒီး ဝံအတၢ်စံးပာ်န့ၣ် နဃုကွၢ်အီၤလၢ တၢးထီခိးတၢ် လံာ်ရဲၣ်လီၤလၢ လံာ်လဲၢ်တဖၣ်အဂီၢ် (Watch Tower Publications Index) အပူၤသ့. ဖဲန့ၣ်နကဘၣ်ဃုကွၢ် တၢ်ဂ့ၢ်မိၢ်ပှၢ် လၢအမ့ၢ် “ဝံအတၢ်စံးပာ်.” အဒိ ကွၢ်တၢ်ဂ့ၢ်လၢအမ့ၢ် “ဝံအတၢ်စံးပာ်တခါလၢ အကမၤဂၢၢ်ကျၢၤထီၣ် ပတၢ်နာ်” လၢလါယူၤလံ ၁၅, ၂၀၂၂, တၢးထီခိးတၢ် လံာ်လၢတၢ်မၤလိအဂီၢ်.
