ခါဆူညါ ဒ်သိး ပကအိၣ်ဘၣ်​ ပူၤပူၤဖျဲးဖျဲး ဒီးဘံၣ်ဘံၣ်ဘၢဘၢအဂီၢ် နဆိကမိၣ်​ ပှၤဟီၣ်ခိၣ်ဖိ မၤဘၣ်ဂီၢ်က့ၤ တၢ်ဂ့ၢ်ကီ ကန့ၢ်ဧါ. ဒ်သိး ပှၤဟီၣ်ခိၣ်ဖိ မၤဘၣ်ဂီၢ်က့ၤ တၢ်ဂ့ၢ်ကီ ကန့ၢ်အဂီၢ် အဝဲသ့ၣ်​ ကဘၣ်သ့ၣ်ညါဆိ တၢ်ကီတၢ်ခဲ ဟဲကဲထီၣ်သး အခီၣ်ထံးခီၣ်ဘိ.

အဒိ ပှၤဆါတဂၤ လၢအမံၤမ့ၢ် ထီန့ၣ်​ အဆိးက့ ဒီးလၢခံအသံ. ဘၣ်မနုၤအဃိ အဘၣ်သံလဲၣ်. တချုးလၢ ထီ သံဒံးဘၣ်အခါ ကသံၣ်သရၣ်လၢ အမၤတၢ်လၢ တၢ်ဆါဟံၣ်ဖဲ ထီ လဲၤဝဲန့ၣ်​ အတဲဝဲလၢ “ဖဲထီ စးထီၣ်ဆိးက့ သီသီအခါန့ၣ်​ ပှၤတဃုသ့ၣ်ညါဆိ အတၢ်ဆူးတၢ်ဆါ ဟဲကဲထီၣ်သး အခီၣ်ထံးခီၣ်ဘိ တဘျီဃီဘၣ်.” ဖျါလီၤဂာ်လၢ ကသံၣ်သရၣ်​ အဆိကတၢၢ်တဂၤ လၢအကွၢ်ထွဲ ထီန့ၣ်​ အိၣ်ဒၣ်​ အဟ့ၣ်ဒုးအီအီၤ ကသံၣ်ဒ်သိး အအိၣ်ကမုာ်ထီၣ်​ တစဲးတမွဲးအဂီၢ်.

ဒ်သိးတၢ်အိၣ်သးလၢ ဟီၣ်ခိၣ်ဒီတဘ့ၣ်​ ကဂ့ၤထီၣ်အဂီၢ် ပှၤဟီၣ်ခိၣ်ဖိ ကျဲးစၢးမၤဝဲ မနုၤလဲၣ်. အဒိ ဒ်သိး ပှၤမၤကမၣ်​ တၢ်သိၣ်တၢ်သီ ကစှၤလီၤအဂီၢ် ပဒိၣ်တဖၣ်​ ဒုးအိၣ်ထီၣ်ဝဲ တၢ်သိၣ်တၢ်သီ, ဆီလီၤဝဲ ခဲမရၢ်ဒၢ ဒီးမၤအါထီၣ်ဝဲပလံး. တၢ်လၢအဝဲသ့ၣ်​ မၤဝဲန့ၣ်​ ကဲဘျုးဝဲတနီၤ ဘၣ်ဆၣ်​ အတမၤလီၤမၢ်ကွံာ် တၢ်ကီတၢ်ခဲတဖၣ်ဘၣ်. နီၢ်ကီၢ်န့ၣ်​ တၢ်ကီတၢ်ခဲ အခီၣ်ထံးခီၣ်ဘိ ဟဲကဲထီၣ်သး ခီဖျိလၢ ပှၤတဂၤ အတၢ်ဆိကမိၣ်, အတၢ်တူၢ်ဘၣ်​ ဒီးတၢ်လၢအဝဲသ့ၣ်​ လီကီဝဲအဃိဟီ.

ပိာ်ခွါတဂၤ လၢအမံၤမ့ၢ် ဒဲနံးယၢၤန့ၣ်​ အအိၣ်လၢ ကလံၤထံး အမဲရကၤ လၢအမ့ၢ် ထံကီၢ်လၢ အဖှီၣ်လီၤမၣ်ဖှီၣ်လီၤ ဒီးအတဲဝဲ “လၢညါန့ၣ်​ ပအိၣ်ဘၣ်မုာ်မုာ်. ပတလိၣ်ပျံၤလၢ ပှၤကမၤပျံၤမၤဖုးပှၤ ဒီးတမျာ်ပှၤဘၣ်. သနာ်က့ ခဲအံၤ လၢဝ့ၢ်ပူၤမ့ၢ်ဂ့ၤ လၢသဝီပူၤမ့ၢ်ဂ့ၤ တၢ်မုာ်တၢ်ခုၣ်​ ဒီးတၢ်ဘံၣ်တၢ်ဘၢ တအိၣ်လၢၤဘၣ်. ခီဖျိလၢ တၢ်အိၣ်သးကီခဲ အိၣ်ထီၣ်ဝဲလၢ ကီၢ်ပူၤအဃိ ခဲအံၤ ပထံၣ်ဘၣ်လၢ ပှၤအါဂၤန့ၣ်​ အသူၣ်လီသးကွံတၢ်, တပာ်ကဲ ပှၤဂၤအတၢ်ဖိတၢ်လံၤ ဒီးတပာ်လုၢ်ပာ်ပှ့ၤ ပှၤသးသမူလၢၤဘၣ်.”

ခီဖျိလၢ တၢ်ဒုးတၢ်ယၤ အိၣ်ထီၣ်လၢ မုၢ်ထီၣ်တၢ်ခၢၣ်သးလီၢ်ကဝီၤအဃိ ပိာ်ခွါတဂၤ လၢအမံၤမ့ၢ် အလဲယၢးန့ၣ်​ ဃ့ၢ်ထီၣ်ကွံာ်လၢ အအိၣ်တၢ်လီၢ် ဒီးလၢခံ အမၤလိဘၣ်လံာ်စီဆှံ. အတဲဝဲလၢ “ပှၤသးစၢ်အါဂၤ လၢအအိၣ်ဝ့ၢ် တဖျၢၣ်ဃီဒီးယၤန့ၣ်​ အဟံၣ်ဖိဃီဖိ, ထံကီၢ် ဒီးတၢ်ဘူၣ်တၢ်ဘါ အတၢ်ကရၢကရိ ဆီၣ်ထွဲအဝဲသ့ၣ်လၢ ကလဲၤဒုးတၢ် ဒီးကဲထီၣ်ပှၤဒူပှၤဃိၤ. အဒုၣ်အဒါလၢ အဒုးအဝဲသ့ၣ်န့ၣ်​ ပှၤဆီၣ်ထွဲ အဝဲသ့ၣ်ဒ်န့ၣ်စ့ၢ်ကီး. အဃိ ယသ့ၣ်ညါဘၣ်လၢ ပမ့ၢ်သန့ၤသးလၢ ပှၤဟီၣ်ခိၣ်ဖိ အတၢ်ပၢန့ၣ်​ အလီၤသးအုးဒိၣ်မး.”

လံာ်လၢပျၢၤ လၢအအိၣ်ဒီးတၢ်ကူၣ်သ့တဘ့ၣ်​ တဲဝဲလၢ–

• “တၢ်အိၣ်လၢ ပှၤဟီၣ်ခိၣ်ဖိ အသးပူၤန့ၣ်​ မ့ၢ်တၢ်လၢ အအၢအသီ စးထီၣ်လၢ အမ့ၢ်ဖိသၣ်​ လံၤလံၤ.”—၁ မိၤၡ့ ၈:၂၁.

• “ပှၤဟီၣ်ခိၣ်ဖိအသးန့ၣ်​ ကွဲန့ၢ်လွဲန့ၢ်တၢ် အါန့ၢ်ဒံး တၢ်အဂၤခဲလၢာ် ဒီးလီၤဘၣ်ယိၣ်​ ဒိၣ်မးလီၤ. မတဂၤ သ့ၣ်ညါအီၤ ကသ့လဲၣ်.”—ယံးရမံယၤ ၁၇:၉.

• “တၢ်လၢ အဟဲထီၣ်လၢ ပှၤသးပူၤန့ၣ်မ့ၢ်ဝဲ တၢ်ဆိကမိၣ်လၢ အအၢအသီ လၢအဒုးအိၣ်ထီၣ်ဝဲ တၢ်မၤသံပှၤဂၤ, . . . တၢ်မၤကမၣ်မုၣ်ကမၣ်ခွါ, တၢ်ဟုၣ်တၢ်, တၢ်အုၣ်အသးကဘျံးကဘျၣ်.” —မးသဲ ၁၅:၁၉.

တၢ်ပာ်သူၣ်ပာ်သး လၢအထိၣ်ဟူးထိၣ်ဂဲၤထီၣ်​ ပှၤတဂၤလၢ အကမၤအၢမၤသီပှၤဂၤန့ၣ်​ ပှၤဟီၣ်ခိၣ်ဖိတဂၤမၣ်​ မၤလီၤမၢ်ဝဲတန့ၢ်ဘၣ်. ဒ်ပထံၣ်ဘၣ်လၢ တၢ်ဂ့ၢ်လၢအပူၤကွံာ်တခါအသိး တၢ်ကီတၢ်ခဲတဖၣ်န့ၣ်​ ကဲထီၣ်သးခီဖျိလၢ ပှၤတၢ်ပာ်သူၣ်ပာ်သး လၢအတဂ့ၤဘၣ်အဃိ ဒီးဖျါလၢ တၢ်ပာ်သူၣ်ပာ်သးတဖၣ်န့ၣ်​ အနးဒိၣ်ထီၣ်​ အါန့ၢ်ဒံးလၢညါ. (၂ တံၤမသ့း ၃:၁-၅) ပမ့ၢ်ဘၣ်ကွၢ်န့ၣ်​ ခဲအံၤ ပှၤဟီၣ်ခိၣ်ဖိ ဒိးန့ၢ်ဘၣ်​ တၢ်ကူၣ်ဘၣ်ကူၣ်သ့ အပတီၢ်ထီန့ၢ်ဒံးလၢညါ ဒီးအဝဲသ့ၣ်အိၣ်ဒီး ကျဲအမၠိမၠိလၢ ကဆဲးကျိးလိာ်သးအဂီၢ်. ဘၣ်ဆၣ်​ ဒ်သိး ပကအိၣ်ဘၣ်​ ပူၤပူၤဖျဲးဖျဲး ဒီးဘံၣ်ဘံၣ်ဘၢဘၢအဂီၢ် ဘၣ်မနုၤအဃိ ပမၤဘၣ်ဂီၢ်က့ၤ တၢ်ဂ့ၢ်ကီ တန့ၢ်ဘၣ်လဲၣ်. မ့ၢ်ပကျဲးစၢးမၤ တၢ်လၢပမၤတန့ၢ်ဘၣ်ဟီဧါ. ဒီးမ့ၢ်ပကျဲးစၢးမၤ တၢ်လၢအကဲထီၣ်သး တသ့နီတဘျီဘၣ်ဟီဧါ.

ကျဲလၢကမၤလီၤမၢ်ကွံာ် ပှၤဟီၣ်ခိၣ်ဖိ အတၢ်ပာ်သူၣ်ပာ်သး လၢအတဂ့ၤဘၣ်​ မ့ၢ်အိၣ်သနာ်က့ ဒ်သိး ပဝဲခဲလၢာ် ကအိၣ်ဘၣ်​ ပူၤပူၤဖျဲးဖျဲး ဒီးဘံၣ်ဘံၣ်ဘၢဘၢ အဂီၢ် ပမၤဘၣ်ဂီၢ်က့ၤ တၢ်ဂ့ၢ်ကီ တန့ၢ်ဘၣ်. ဘၣ်မနုၤအဃိ ပမၤတန့ၢ်ဘၣ်လဲၣ်. ခီဖျိလၢ ပကဲပှၤဟီၣ်ခိၣ်ဖိအဃိ.

တၢ်မ့ၢ်တၢ်တီ ယိယိဖိန့ၣ်မ့ၢ်ဝဲ “ပှၤဟီၣ်ခိၣ်ဖိ တဒိးန့ၢ်ဘၣ်​ တၢ်ခွဲးတၢ်ယာ်လၢ ကဟံးစုနဲၣ်ကျဲလီၤ အနီၢ်ကစၢ် အခီၣ်ခါဘၣ်.” (ယံးရမံယၤ ၁၀:၂၃) ကစၢ်ယွၤ တတ့လီၤပှၤလၢ ပကပၢလီၤ ပနီၢ်ကစၢ်သးအဂီၢ်ဘၣ်. နီၢ်ကီၢ်န့ၣ်​ ကစၢ်ယွၤ တတ့လီၤပှၤလၢ ပကအိၣ်လၢမူခိၣ်​ မ့တမ့ၢ် အိၣ်လၢထံဖီလာ်ဘၣ်. ဒီးအတတ့လီၤစ့ၢ်ကီးပှၤလၢ ပကပၢပှၤဂၤဘၣ်.

ဆိကမိၣ်ကွၢ် တၢ်ဂ့ၢ်အံၤ. ပှၤဟီၣ်ခိၣ်ဖိ မ့ၢ်တဲလိာ်သးလၢ ကဘၣ်အိၣ်မူဒ်လဲၣ်​ ဒီးကဘၣ်​ မၤထွဲလုၢ်လၢ်သကဲာ်ပဝး မနုၤလဲၣ်န့ၣ်​ မ့ၢ်အဝဲသ့ၣ်​ ကဘၣ်သးဝဲဧါ. ပှၤတဂၤမ့ၢ်မၢ ပှၤအဂၤတဂၤလၢ ကဘၣ်ထံၣ်ဝဲ တၢ်မၤလီၤတဲာ်ဖိဒ်လဲၣ်, ကဘၣ်ထံၣ်ဝဲ တၢ်စံၣ်ညီၣ်သံပှၤတဂၤဒ်လဲၣ်​ ဒီးကဘၣ်​ သိၣ်ဃီၣ်အဖိဒ်လဲၣ်န့ၣ်​ ပှၤအဂၤတဂၤန့ၣ်​ ကဘၣ်သးဝဲဧါ. တၢ်ဂ့ၢ်တဖၣ်အံၤန့ၣ်​ အကဲဝဲ တၢ်ကီတၢ်ခဲတနီၤလၢ အမၤလီၤဖး ပှၤဟီၣ်ခိၣ်ဖိ အတၢ်ထံၣ်. အဃိ ပှၤဟီၣ်ခိၣ်ဖိ မ့ၢ်တအဲၣ်ဒိး တူၢ်လိာ်ဝဲ တၢ်လၢလံာ်စီဆှံ တဲဝဲဘၣ်သနာ်က့ တၢ်လၢလံာ်စီဆှံတဲဝဲန့ၣ်​ အဘၣ်နီၢ်ကီၢ်. ပတအိၣ်ဒီး တၢ်သ့တၢ်ဘၣ်​ ဒီးတၢ်ခွဲးတၢ်ယာ်လၢ ပကပၢပှၤဂၤအဂီၢ်ဘၣ်. မ့မ့ၢ်ဒ်န့ၣ်န့ၣ်​ ပဃုထံၣ်န့ၢ် တၢ်မၤစၢၤ ကသ့ဖဲလဲၣ်.

နီၢ်ကီၢ်န့ၣ်​ ကစၢ်ယွၤ တ့လီၤပှၤအဃိ ပကဘၣ်ဃုထံၣ်န့ၢ် တၢ်မၤစၢၤလၢ ပတၢ်ဘၣ်တ့ကစၢ် အအိၣ်. သနာ်က့ ပှၤတနီၤ ဆိကမိၣ်ဝဲလၢ ကစၢ်ယွၤ တကနၣ်ဃုာ်ပှၤဘၣ်. ဘၣ်ဆၣ်​ တမ့ၢ်ဒ်န့ၣ်ဘၣ်. လံာ်စီဆှံ ပာ်ဖျါထီၣ်န့ၢ်ပှၤလၢ ကစၢ်ယွၤ သူၣ်အိၣ်သးအိၣ်ပှၤ. ပမ့ၢ်နၢ်ပၢၢ် တၢ်လၢလံာ်စီဆှံတဲဝဲန့ၣ်​ ပကသ့ၣ်ညါလီၤက့ၤပသး ဂ့ၤဒိၣ်ထီၣ်​ ဒီးဘၣ်မနုၤအဃိ ပှၤဟီၣ်ခိၣ်ဖိ အတၢ်ပၢ တစိၤဘၣ်တစိၤ အိၣ်ထဲ တၢ်ကီတၢ်ခဲလဲၣ်န့ၣ်​ ပကသ့ၣ်ညါဘၣ်စ့ၢ်ကီး. ကၠၢမနံၣ်​ အပှၤကူၣ်ဘၣ်ကူၣ်သ့တဂၤ တဲဝဲလၢ “ထံဖိကီၢ်ဖိ ဒီးပဒိၣ်ပပှၢ်တဖၣ်​ တဟံန့ၢ်တၢ်မၤလိလၢ တၢ်စံၣ်စိၤတဲစိၤ နီတမံၤဘၣ်အဃိ အဝဲသ့ၣ်​ တဆီတလဲ အတၢ်ပာ်သူၣ်ပာ်သး နီတဘျီဘၣ်.”

ယ့ၣ်ၡူး လၢအမ့ၢ် ကစၢ်ယွၤအဖိခွါန့ၣ်​ ဘၣ်တဘျီ အတဲဝဲလၢ “ပှၤတဂၤမ့ၢ်အိၣ်ဒီး တၢ်ကူၣ်သ့န့ၣ်​ အအိၣ်ဖျါထီၣ်​ ခီဖျိလၢ တၢ်လၢအမၤဝဲတဖၣ်အဃိ.” (လူၤကၣ်​ ၇:၃၅) တၢ်ကတိၤ လၢအအိၣ်ဒီး တၢ်ကူၣ်သ့အံၤ ပထံၣ်ဘၣ်စ့ၢ်ကီးလၢ စံးထီၣ်ပတြၢၤ ၁၄၆:၃. ဖဲန့ၣ်​ အတဲဝဲလၢ “တဘၣ်နာ်န့ၢ် ပဒိၣ်ဖးဒိၣ်တဖၣ်​ ဒီးပှၤဟီၣ်ခိၣ်ဖိ လၢအအုၣ်က့ၤခီၣ်က့ၤတၢ် တသ့ဘၣ်န့ၣ်တဂ့ၤ.” တၢ်ဟ့ၣ်ကူၣ်​ လၢအဂ့ၤတခါအံၤ ကမၤစၢၤပှၤ ဒ်သိးပတမုၢ်လၢ် တၢ်လၢအကဲထီၣ်သးတသ့ဘၣ်​ ဒီးတနာ်န့ၢ် တၢ်လံၣ်တၢ်လီတဂ့ၤအဂီၢ်. ပိာ်ခွါတဂၤ လၢအမံၤမ့ၢ် ခဲနဲး ဒီးအအိၣ်လၢ ကလံၤစိး အမဲရကၤ အဝ့ၢ်တဖျၢၣ်လၢ အအိၣ်ထဲ တၢ်မၤဆူၣ်မၤစိးန့ၣ်​ အတဲဝဲဒ်အံၤ. “ပဒိၣ်​ တဂၤဘၣ်တဂၤ အၢၣ်လီၤဝဲလၢ အကမၤဂ့ၤထီၣ်​ တၢ်အိၣ်သး ဘၣ်ဆၣ်​ အဝဲသ့ၣ်​ တဂၤမၣ်​ မၤဝဲတသ့ဘၣ်. အဝဲသ့ၣ်မၤဟးဂီၤ အတၢ်အၢၣ်လီၤ ခဲအံၤခဲအံၤ အဃိ တၢ်လၢ လံာ်စီဆှံတဲဝဲန့ၣ်​ အဘၣ်နီၢ်ကီၢ် ဒီးလံာ်စီဆှံ အတၢ်ကူၣ်သ့န့ၣ်​ ဒီသဒၢပှၤနီၢ်ကီၢ်.”

ဒဲနံးယၢၤ လၢပဖးဘၣ်အဂ့ၢ် လၢအခီၣ်ထံးန့ၣ်​ အတဲဝဲလၢ “ပှၤဟီၣ်ခိၣ်ဖိ ပၢလီၤအသး တသ့ဘၣ်န့ၣ်​ ယထံၣ်ဘၣ်လၢ အဖျါၡဲထီၣ်ဘၣ်ယၤ ကိးနံၤဒဲး. . . . လၢစ့တၢးပူၤ နစ့မ့ၢ်အိၣ်​ ဒီးနမ့ၢ်စူးပာ်စ့ သနာ်က့ နစ့မၤစၢၤနၤလၢ နကအိၣ်ဘၣ်​ ပူၤပူၤဖျဲးဖျဲး ဒီးဘံၣ်ဘံၣ်ဘၢဘၢ လၢခါဆူညါအဂီၢ် တသ့ဘၣ်. ယထံၣ်ဘၣ်လၢ ပှၤတနီၤန့ၣ်​ အသန့ၤအသးလၢ အစ့အဃိ လၢခံန့ၣ်​ အဝဲသ့ၣ်ထံၣ်ဘၣ်​ တၢ်ကီတၢ်ခဲနးမး.”

ဒ်သိး ပတသန့ၤပသးလၢ တၢ်လၢအအိၣ်ထဲ တစိၢ်တလီၢ်တဂ့ၤအဂီၢ် ပထံၣ်ဘၣ်လၢ လံာ်စီဆှံ မၤစၢၤပှၤ ဒီးကဟ့ၣ်စ့ၢ်ကီးပှၤတၢ်မုၢ်လၢ်.