ခီၣ်ခါလၢ ကမၤဘၣ်ထီၣ်က့ၤ တၢ်ဂ့ၢ်ကီ
မၤလိန့ၢ် လုၢ်လၢ်သကဲာ်ပဝး လၢအဂ့ၤ
ဖဲပှၤကၠိဖိတဖု လဲၤလၢ ကၠိဖိအတၢ်လဲၤဟး ဃုသ့ၣ်ညါမၤလိတၢ်အခါ ပှၤကၠိဖိ ပိာ်ခွါသးစၢ်တနီၤန့ၣ် ပှၤပာ်ဒ့ၣ်ပာ်ကမၣ် အဝဲသ့ၣ်လၢ အဝဲသ့ၣ် မၤတရီတပါဝဲ ပှၤကၠိဖိ ပိာ်ခွါသးစၢ် လၢအဂၤတဂၤ. ပှၤကၠိဖိတဖၣ်အံၤ အဝဲသ့ၣ် ထီၣ်ကၠိလၢအမံၤဒိၣ် လၢကီၢ်ခဲနဒၣ်အပူၤ ဒီးကၠိန့ၣ် တမ့ၢ်ပဒိၣ်အကၠိဘၣ်. တၢ်ကဲထီၣ်သးဒ်န့ၣ် ဝံၤအလီၢ်ခံ ပှၤကွဲးတၢ်ကစီၣ်ဖိ လံၤဧိၤနၣ် စတၢ ကွဲးဝဲတၢ်ဂ့ၢ်လၢ Ottawa Citizen လံာ်တၢ်ကစီၣ်အပူၤဒ်အံၤ. “ပှၤသးစၢ်တဂၤ မ့ၢ်ကဲပှၤလၢအဖၠဲး, မ့ၢ်ထီၣ်ဘၣ်ကၠိလၢ အဂ့ၤကတၢၢ် ဒီးမ့ၢ်ကဲပှၤလၢ အတၢ်အိၣ်တၢ်ယၢၤ သနာ်က့ အမၤကမၣ်တၢ်သ့.”
စတၢ ကွဲးစ့ၢ်ကီးဝဲလၢ “ညီနုၢ်န့ၣ် ပဆိကမိၣ်လၢ မိပါတဖၣ် ကထံၣ်ဝဲလၢ တၢ်သိၣ်ဖိသိၣ်လံၤန့ၣ် မ့ၢ်တၢ်လၢအရ့ဒိၣ် ဒီးအဝဲသ့ၣ် ကအဲၣ်ဒိးလၢ အဖိကအိၣ်ဒီး သကဲာ်ပဝးလၢအဂ့ၤ. သနာ်က့ မိပါအါဂၤန့ၣ် ဖျါလီၤဂာ်လၢ အဝဲသ့ၣ်အဲၣ်ဒိးလၢ အဖိတဖၣ် မၤလံာ်ကဖၠဲး, ကန့ၢ်ဘၣ် တၢ်မၤလၢအဂ့ၤ ဒ်သိး အဝဲသ့ၣ် ကန့ၢ်ဘၣ်စ့အါအါဟီ.”
နီၢ်ကီၢ်ဒု ကၠိအတၢ်ကူၣ်ဘၣ်ကူၣ်သ့န့ၣ် အရ့ဒိၣ်. ဘၣ်ဆၣ် ကၠိအတၢ်ကူၣ်ဘၣ်ကူၣ်သ့ မ့ၢ်ဂ့ၤထဲလဲၣ်သနာ်က့ အမၤစၢၤပှၤတဂၤဒ်သိး အကမၤလီၤမၢ်ကွံာ် အလုၢ်လၢ်သကဲာ်ပဝး ဒီးအတၢ်မိၣ်န့ၢ်သးလီ လၢအတဂ့ၤဘၣ် တသ့ဘၣ်. အဃိ ပဃုထံၣ်န့ၢ် တၢ်သိၣ်လိ ဘၣ်ဃးဒီး လုၢ်လၢ်သကဲာ်ပဝး လၢအဂ့ၤ ကသ့ဖဲလဲၣ်.
တၢ်ကူၣ်ဘၣ်ကူၣ်သ့လၢ အသိၣ်လိ ဘၣ်ဃးဒီး လုၢ်လၢ်သကဲာ်ပဝး လၢအဂ့ၤ
လံာ်စီဆှံန့ၣ် အလီၤဂာ်ဒ်သိးဒီး မဲာ်ထံကလၤတဘ့ၣ်. ဒီးဖဲပဖးလံာ်စီဆှံအခါ လံာ်စီဆှံ မၤစၢၤပှၤဒ်သိး ပထံၣ်လီၤက့ၤ ပနီၢ်ကစၢ် တၢ်လီၤတူာ်လီၤကာ် ဒီးတၢ်ဂံၢ်စၢ်ဘါစၢ်သ့. (ယၤကိာ် ၁:၂၃-၂၅) တကးဒံးဘၣ် လံာ်စီဆှံ မၤစၢၤပှၤလၢ တၢ်ဂ့ၢ်အဂၤအိၣ်ဒံး. အကမၤစၢၤပှၤဒ်သိး ပကဆီတလဲပသး ဒီးမၤအိၣ်ထီၣ် တၢ်ဂ့ၤတၢ်ဝါလၢ အဒုးအိၣ်ထီၣ် တၢ်မုာ်တၢ်ခုၣ် ဒီးတၢ်ဃူတၢ်ဖိး နီၢ်ကီၢ်. တၢ်ဂ့ၤတၢ်ဝါတဖၣ်အံၤ အပၣ်ဃုာ်ဒီး တၢ်သူၣ်ဂ့ၤသးဝါ, တၢ်မၤဂ့ၤတၢ်, တၢ်ဝံသးစူၤ, တၢ်ပၢၤသူၣ်ပၢၤသး ဒီးတၢ်အဲၣ်တၢ်ကွံ. တကးဒံးဘၣ် တၢ်အဲၣ်တၢ်ကွံန့ၣ် လံာ်စီဆှံတဲဝဲလၢ အမ့ၢ် “တၢ်စၢဃာ်လၢ အဒုးအိၣ်ဃူအိၣ်ဖိးတၢ် လၢလၢပှဲၤပှဲၤ.” (ကလီးစဲ ၃:၁၄) ဘၣ်မနုၤအဃိ တၢ်အဲၣ်တၢ်ကွံန့ၣ် အကဲဝဲ တၢ်ဂ့ၤတၢ်ဝါလၢ အလီၤဆီဒိၣ်မးလဲၣ်. ဘၣ်ဃးဒီး တၢ်ဂ့ၤတၢ်ဝါတခါအံၤ လံာ်စီဆှံ တဲဝဲဒ်လဲၣ်န့ၣ် ပကကွၢ်သကိး တၢ်ဂ့ၢ်တနီၤ.
-
“တၢ်အဲၣ်တၢ်ကွံန့ၣ် ဝံသးစူၤတၢ် ဒီးအသူၣ်ဂ့ၤသးဝါလီၤ. ဒီးတၢ်အဲၣ်တၢ်ကွံန့ၣ် တသူၣ်က့ၣ်သးကါတၢ်ဘၣ်, တပတြၢၤလီၤအသးဘၣ်, တပာ်ထီၣ်ထီအသးဘၣ်, တအိၣ်ဒီးလုၢ်လၢ်လၢ အလီၤရၢၢ်လီၤစၢၢ်ဘၣ်, တဃုအနီၢ်ကစၢ်အဘျုးဘၣ်, တသးဒိၣ်ထီၣ်တၢ်ညီညီဘၣ်, တစၢဃာ်တၢ်ကမၣ်ဘၣ်. တၢ်အဲၣ်တၢ်ကွံန့ၣ် တသးခုလၢ တၢ်တတီတလိၤ [တၢ်လၢအတဂ့ၤဘၣ်] အပူၤဘၣ်. အသးခုလၢ တၢ်မ့ၢ်တၢ်တီအပူၤလီၤ. တၢ်အဲၣ်တၢ်ကွံန့ၣ် လဲၤခီဖျိတၢ်ခဲလၢာ်, . . . ဒီးတူၢ်တၢ်ခဲလၢာ်လီၤ. တၢ်အဲၣ်တၢ်ကွံန့ၣ် တလီၤတူာ်လီၤကာ် နီတဘျီဘၣ်.”—၁ ကရံၣ်သူး ၁၃:၄-၈.
-
“တၢ်အဲၣ်တၢ်ကွံန့ၣ် တမၤအၢဝဲ ပှၤလၢအခိၣ်အဃၢၤဘၣ်.” —ရိမ့ၤ ၁၃:၁၀.
-
“ဒီးလၢတၢ်ခဲလၢာ် အဖီခိၣ်န့ၣ် သုကဘၣ် အဲၣ်လိာ်ကွံလိာ်သုသးဒိၣ်မး မ့ၢ်လၢ တၢ်အဲၣ်တၢ်ကွံန့ၣ် ကျၢၢ်ဘၢတၢ်ဒဲးဘး အါမးအဃိလီၤ.”—၁ ပ့းတရူး ၄:၈.
ဖဲနအိၣ်ဒီး ပှၤလၢအအဲၣ်နၤတဖၣ်အခါ နတူၢ်ဘၣ်ဒ်လဲၣ်. နတူၢ်ဘၣ်လၢ နအိၣ်ဘၣ် မုာ်မုာ်ခုၣ်ခုၣ်, ပူၤပူၤဖျဲးဖျဲး ဒီးအိၣ်ဘၣ် ဘံၣ်ဘံၣ်ဘၢဘၢဧါ. နသ့ၣ်ညါလၢ အဝဲသ့ၣ်အဲၣ်နၤအဃိ အဝဲသ့ၣ် တအဲၣ်ဒိးမၤဘၣ်ဒိနၤ နီတဘျီဘၣ်.
တၢ်အဲၣ်န့ၣ် အထိၣ်ဟူးထိၣ်ဂဲၤထီၣ် ပှၤတဂၤလၢ အကတူၢ်ဆါအသး ဒီးကဆီတလဲ အတၢ်အိၣ်မူ ဒ်သိး အကကဲဘျုးလၢပှၤဂၤအဂီၢ် သ့စ့ၢ်ကီး. အဒိ ဖဲကၠီၣ် အလံၤခွါ အိၣ်ဖျဲၣ်ထီၣ် ဝံၤအလီၢ်ခံ အအဲၣ်ဒိးအိၣ်ဘူးဒီး အလံၤခွါထီဘိ. သနာ်က့ ကၠီၣ်န့ၣ် အစွဲတၢ်အီမိာ်ထူ ဒီးအမာ် တဘၣ်သးလၢ အကအီမိာ်ထူလၢ အလံၤခွါကပၤဘၣ်. အဃိ ကၠီၣ်မၤဝဲဒ်လဲၣ်. ကၠီၣ်အီမိာ်ထူ အိၣ်အနံၣ် ၅၀ လံ သနာ်က့ အပတုာ်ကွံာ်ဝဲ ခီဖျိလၢ အလံၤခွါအဃိ. ဖဲအံၤ ပထံၣ်ဘၣ်လၢ တၢ်အဲၣ်န့ၣ် အသဟီၣ်ဆူၣ်မး.
လံာ်စီဆှံ မၤစၢၤပှၤဒ်သိး ပကမၤအိၣ်ထီၣ် တၢ်ဂ့ၤတၢ်ဝါအါမံၤ ဒ်သိးဒီး တၢ်သူၣ်ဂ့ၤသးဝါ, တၢ်မၤဂ့ၤတၢ် ဒီးလီၤဆီဒၣ်တၢ် တၢ်အဲၣ်တၢ်ကွံ
တၢ်အဲၣ်တၢ်ကွံန့ၣ် အမ့ၢ်ဝဲ တၢ်ဂ့ၤတၢ်ဝါတခါလၢ ပပာ်ဖျါထီၣ်အီၤသ့. မိပါတဖၣ်န့ၣ် အိၣ်ဒီးမူဒါလၢ ကသိၣ်လိအဖိလၢ အဖိကဘၣ် ပာ်ဖျါထီၣ်တၢ်အဲၣ်တၢ်ကွံ. အဝဲသ့ၣ် လုၢ်အီၣ်လုၢ်အီအဖိ, ဒီသဒၢအဖိ ဒီးဖဲအဖိဘၣ်ဒိ မ့တမ့ၢ် ဆိးက့အခါ အဝဲသ့ၣ် မၤစၢၤအဖိ. ဒီးမိပါလၢအဂ့ၤန့ၣ် တဲသကိးတၢ်ဒီးအဖိ ဒီးသိၣ်လိအဖိ. အဝဲသ့ၣ် သိၣ်ဃီၣ်စ့ၢ်ကီးအဖိ ဒီးဟံးစုနဲၣ်ကျဲ အဝဲသ့ၣ် ဘၣ်ဃးဒီး တၢ်လၢအဘၣ် ဒီးအကမၣ်. တကးဒံးဘၣ် မိပါလၢအဂ့ၤန့ၣ် အဝဲသ့ၣ် ပာ်ဖျါထီၣ် တၢ်ဒိတၢ်တဲာ် လၢအဂ့ၤ လၢအဖိတဖၣ်အဂီၢ်.
သနာ်က့ မိပါတနီၤန့ၣ် တမၤလၢပှဲၤ အမူဒါဘၣ်အဃိ လီၤသးအုးဒိၣ်မး. အဃိ မ့ၢ်အဖိတဖၣ် ကဲထီၣ်ပှၤလၢအဂ့ၤ တသ့လၢၤဘၣ်ဧါ. တမ့ၢ်ဒ်န့ၣ်ဘၣ်. ပှၤလၢအသးပှၢ်ထီၣ်တဖၣ် ပၣ်ဃုာ်ဒီး ပှၤလၢအဒိၣ်ထီၣ်ဘၣ်လၢ ဟံၣ်ဖိဃီဖိလၢ အအိၣ်ဒီးတၢ်ကီတၢ်ခဲ အကျါစ့ၢ်ကီး အဝဲသ့ၣ် ဆီတလဲထီၣ်အသး ဒိၣ်ဒိၣ်မုၢ်မုၢ် ဒီးကဲထီၣ်ပှၤလၢ အသူၣ်အိၣ်သးအိၣ်ပှၤဂၤ ဒီးကဲထီၣ်ထံဖိကီၢ်ဖိ လၢအဂ့ၤန့ၣ် အိၣ်ဝဲတဘျုးဂၤညါ. လၢတၢ်ဂ့ၢ်လၢခံတခါန့ၣ် ပကသ့ၣ်ညါဘၣ် ဘၣ်ဃးဒီး ပှၤတနီၤလၢ ပှၤဆိကမိၣ်လၢ အဆီတလဲထီၣ်အသး တန့ၢ်လၢၤဘၣ်န့ၣ် အဝဲသ့ၣ်ဆီတလဲအသးန့ၢ်.
