တၢ်ဂ့ၢ်ကီ ကလီၤမၢ်ကွံာ် ခဲလၢာ်စီပျီ
လၢကစၢ်ယွၤအဘီအမုၢ် တၢ်ပၢဖီလာ်န့ၣ် “တၢ်မုာ်တၢ်ခုၣ် ကအိၣ်ဝဲအါအါဂီၢ်ဂီၢ်”
တယံာ်လၢၤဘၣ်န့ၣ် ကစၢ်ယွၤအဘီအမုၢ် လၢပအိၣ်ခိးအီၤဖးယံာ် လၢကပၢက့ၤ ဟီၣ်ခိၣ်ဒီဘ့ၣ်န့ၣ် ကဒုးအိၣ်ထီၣ်က့ၤ တၢ်ဃူတၢ်ဖိး ဒီးတၢ်မုာ်တၢ်ခုၣ် လၢဟီၣ်ခိၣ်ဒီဘ့ၣ်ညါ. ဒီးဒ် စံးထီၣ်ပတြၢၤ ၇၂:၇ အၢၣ်လီၤဝဲအသိး “တၢ်မုာ်တၢ်ခုၣ် ကအိၣ်ဝဲအါအါဂီၢ်ဂီၢ်.” ဘၣ်ဆၣ် ကစၢ်ယွၤအဘီအမုၢ် ကပၢဟီၣ်ခိၣ် လၢအခါဖဲလဲၣ်. အကပၢတၢ်ဒ်လဲၣ်. ဒီးပကဒိးန့ၢ်ဘၣ် အဘျုးဒ်လဲၣ်.
ကစၢ်ယွၤအဘီအမုၢ် ကဟဲလၢအခါဖဲလဲၣ်
လံာ်စီဆှံ တဲဆိပာ်စၢၤဝဲလၢ တၢ်ကကဲထီၣ်အသး တခါဘၣ်တခါ ဒီးအပာ်ဖျါထီၣ်လၢ ကစၢ်ယွၤအဘီအမုၢ် ကဟဲန့ၣ် ဘူးထီၣ်ဝဲလံ. တၢ်ကဲထီၣ်သးတဖၣ်န့ၣ် အကဲဝဲ “တၢ်ပနီၣ်” လၢအပၣ်ဃုာ်ဒီး တၢ်ဒုးတၢ်ယၤလၢ ထံကီၢ်တဘ့ၣ်ဒီးတဘ့ၣ် အဘၢၣ်စၢၤ, တၢ်သၣ်ဝံၤလီၤဒိ, တၢ်ဆူးတၢ်ဆါ, ဟီၣ်ခိၣ်ဟူး ဒီးတၢ်အၢတၢ်သီ အိၣ်ဝဲအါထီၣ်.—မးသဲ ၂၄:၃, ၇, ၁၂; လူၤကၣ် ၂၁:၁၁; လီၣ်ဖျါ ၆:၂-၈.
ဝံအတၢ်စံးပာ် အဂၤတခါ တဲဆိပာ်စၢၤဝဲဒ်အံၤ– “လၢမုၢ်နံၤခံကတၢၢ်တဖၣ်အပူၤန့ၣ် တၢ်ဆၢကတီၢ်လီၤဆီလၢ အကီအခဲသပှၢ်တၢၢ်န့ၣ် ကဘၣ်ဝဲလီၤ. ပှၤဟီၣ်ခိၣ်ဖိ ကအဲၣ်လီၤထဲ အနီၢ်ကစၢ်အသး, ကအဲၣ်ကျိၣ်အဲၣ်စ့, . . . တဒိကနၣ်အမိၢ်အပၢ် အကလုၢ်ဘၣ်, တသ့ၣ်ညါ စံးဘျုးစံးဖှိၣ်တၢ်ဘၣ်, အသးတတီဘၣ်, တအဲၣ်ပှၤဂၤဘၣ်, ကမ့ၢ်ပှၤလၢအခိၣ်ကိၤ, ကတဲဟးဂီၤပှၤဂ့ၢ်, တအိၣ်ဒီး တၢ်ပၢၤသူၣ်ပၢၤသးဘၣ်, ကမ့ၢ်ပှၤလၢ အမၤဆူၣ်မၤစိးတၢ်, တအဲၣ်တၢ်လၢအဂ့ၤဘၣ်, . . . ပာ်ကဖၢလၢအသး ဒီးလၢကအဲၣ် ကစၢ်ယွၤအလီၢ် ကအဲၣ်ဝဲ တၢ်မုာ်တၢ်ပၠီၣ်.” (၂ တံၤမသ့း ၃:၁-၄) ပှၤတနီၤန့ၣ် အဝဲသ့ၣ် အိၣ်ဒီးတၢ်ပာ်သူၣ်ပာ်သးဒ်အံၤ ဖးယံာ်လံ. ဒီးခဲအံၤစ့ၢ်ကီး ပှၤလၢအအိၣ်ဒီး တၢ်ပာ်သူၣ်ပာ်သးဒ်အံၤန့ၣ် အိၣ်ဝဲ အါထီၣ်မၣ်အါထီၣ်.
ဝံအတၢ်စံးပာ်တဖၣ်န့ၣ် စးထီၣ်ဟဲလၢပှဲၤထီၣ်ဖဲ ၁၉၁၄ နံၣ်. တကးဒံးဘၣ် ဖဲတၢ်တနံၣ်န့ၣ် ဝံၤအလီၢ်ခံ ဟီၣ်ခိၣ်တၢ်အိၣ်သး ဆီတလဲထီၣ်သးဒ်လဲၣ်န့ၣ် ပှၤလၢအမၤလိ တၢ်စံၣ်စိၤတဲစိၤ, ပှၤလၢအမၤတၢ်လၢ ထံဂ့ၢ်ကီၢ်ဂ့ၢ်တကပၤ ဒီးပှၤကွဲးလံာ်တဖၣ် တဲဖျါထီၣ်စ့ၢ်ကီး အတၢ်ထံၣ်အါမး. အဒိ ဖံထၢၤမီၣ် လၢအမ့ၢ် ပှၤဒ့နဲးဖိ အပှၤမၤလိတၢ်စံၣ်စိၤတဲစိၤန့ၣ် အတဲဝဲဒ်အံၤ– “တၢ်ဒုးလၢ အကဲထီၣ်သးဖဲ ၁၉၁၄ နံၣ်န့ၣ် ဆီတလဲဝဲ ပှၤဟီၣ်ခိၣ်ဖိ အတၢ်စံၣ်စိၤတဲစိၤ ဖးဒိၣ်ညါ. တချုးဖဲ ၁၉၁၄ နံၣ်ဘၣ်ဒံးဘၣ်န့ၣ် ပှၤအါဂၤ ဆိကမိၣ်ဝဲလၢ ဟီၣ်ခိၣ်တၢ်အိၣ်သး ဂ့ၤဒိၣ်ထီၣ်မၣ်ဒိၣ်ထီၣ်, . . . ဘၣ်ဆၣ် လၢတၢ်လီၢ် ကိးပူၤဒဲးန့ၣ် တၢ်ဟးဂူာ်ဟးဂီၤ, တၢ်လီၤပျံၤလီၤဖုး ဒီးတၢ်သူၣ်ဟ့သးဟ့ ဟဲကဲထီၣ်အသး ဒီးတၢ်ဘံၣ်တၢ်ဘၢ တအိၣ်လၢၤဘၣ်.”
ပမ့ၢ်ဆိကမိၣ်က့ၤလၢ အဂ့ၤတကပၤန့ၣ် ဒ်ကလံၤမုၢ်ဟဲဝံၤအလီၢ်ခံ ကလံၤဟဲက့ၤဝဲ ကဖီကဖီအသိး တၢ်အိၣ်သးကီခဲတဖၣ်အံၤ ကဲထီၣ်သးဝံၤအလီၢ်ခံ တၢ်အိၣ်သးလၢအဂ့ၤတဖၣ် ကကဲထီၣ်ဝဲ. တၢ်အိၣ်သးကီခဲတဖၣ်အံၤ ပာ်ဖျါထီၣ်ဝဲလၢ တယံာ်လၢၤဘၣ်န့ၣ် ကစၢ်ယွၤအဘီအမုၢ် ကပၢဝဲ ဟီၣ်ခိၣ်ဒီဘ့ၣ်ညါ. တကးဒံးဘၣ် မုၢ်နံၤခံကတၢၢ် အတၢ်ပနီၣ်လၢ ယ့ၣ်ၡူးတဲဖျါထီၣ်ဝဲ အကျါန့ၣ် အပၣ်ဃုာ်ဒီး တၢ်ပနီၣ်လၢအဂ့ၤတခါ. အတဲဝဲလၢ “ဘီမုၢ်တၢ်သးခုကစီၣ်န့ၣ် ကဘၣ် တၢ်စံၣ်တဲၤတဲလီၤအီၤလၢ ဟီၣ်ခိၣ်ဒီဘ့ၣ်ညါ ဒ်သိး ကကဲထီၣ် တၢ်အုၣ်အသးလၢ ပှၤကလုာ်ခဲလၢာ် အဂီၢ်လီၤ. ဝံၤဒီး တၢ်အကတၢၢ်န့ၣ် ကတုၤဝဲ.”—မးသဲ ၂၄:၁၄.
တၢ်သးခုကစီၣ်တခါန့ၣ် အကဲဝဲ တၢ်ကစီၣ် အရ့ဒိၣ်ဒိၣ်မးတခါလၢ ယဟိဝၤပှၤအုၣ်အသးတဖၣ် စံၣ်တဲၤတဲလီၤဝဲ. အဝဲသ့ၣ် အလံာ်လဲၢ် လၢအသူဝဲအါကတၢၢ်န့ၣ် မ့ၢ်ဝဲ မဲးကစံ လၢအခိၣ်တီမ့ၢ်ဝဲ တၢးထီခိးတၢ် ဘိးဘၣ်သ့ၣ်ညါယဟိဝၤယွၤအဘီမုၢ်. မဲးကစံတဘ့ၣ်အံၤ အပာ်ဖျါထီၣ်ဝဲ တၢ်လၢကစၢ်ယွၤအဘီအမုၢ် ကမၤန့ၢ်ဝဲလၢ ပှၤဟီၣ်ခိၣ်ဖိ ဒီးဟီၣ်ခိၣ် အဂီၢ်.
ကစၢ်ယွၤအဘီအမုၢ် ကပၢတၢ်ဒ်လဲၣ်
တၢ်သံကွၢ်အံၤ အတၢ်စံးဆၢ ကပာ်ဖျါထီၣ် တၢ်ဂ့ၢ်အရ့ဒိၣ်လွံၢ်ထံၣ်–
-
၁. ကစၢ်ယွၤအဘီအမုၢ် တသူဝဲ ပှၤဟီၣ်ခိၣ်ဖိလၢ အပၢတၢ်လၢ ဆၢကတီၢ်ခဲအံၤ နီတဂၤဘၣ်.
-
၂. ပှၤဟီၣ်ခိၣ်ဖိလၢ အပၢတၢ်လၢ ဆၢကတီၢ်ခဲအံၤန့ၣ် အဝဲသ့ၣ် တအဲၣ်ဒိးတူၢ်ၡူကွံာ် အတၢ်ခွဲးတၢ်ယာ်လၢ ကပၢတၢ်ဘၣ် ဒီးအဝဲသ့ၣ် ကထီဒါ ကစၢ်ယွၤအတၢ်ပၢ.—စံးထီၣ်ပတြၢၤ ၂:၂-၉.
-
၃. ကစၢ်ယွၤအဘီအမုၢ် ကဘၣ်မၤဟးဂီၤကွံာ် ပှၤဟီၣ်ခိၣ်ဖိ အတၢ်ပၢ လၢအအဲၣ်ဒိးဒိၣ်စိလၢ ပှၤဂၤအဖီခိၣ်. (ဒၤနံးယ့လး ၂:၄၄; လီၣ်ဖျါ ၁၉:၁၇-၂၁) ဒီးတၢ်ဒုးလၢခံကတၢၢ်တခါန့ၣ် လံာ်စီဆှံ ကိးဝဲလၢ အၢ်မက့းဒိၣ်.—လီၣ်ဖျါ ၁၆:၁၄, ၁၆.
-
၄. ပှၤလၢအသးအိၣ် ဒိးပၢအသးလၢ ကစၢ်ယွၤအဘီအမုၢ် အတၢ်ပၢဖီလာ်န့ၣ် ကဒိးန့ၢ်ဘၣ် တၢ်ပူၤဖျဲး ဒီးကအိၣ်ဘၣ်လၢ ဟီၣ်ခိၣ်သီအပူၤ မုာ်မုာ်ခုၣ်ခုၣ်. ပှၤလၢအပူၤဖျဲးတဖၣ်န့ၣ် လံာ်စီဆှံ ကိးအဝဲသ့ၣ်လၢ “ပှၤဂီၢ်မုၢ်ဖးဒိၣ်” ဒီးဘၣ်သ့ၣ်သ့ၣ် အနီၣ်ဂံၢ်ကအိၣ်လၢ အကကွဲၢ်တဖၣ်ညါ.—လီၣ်ဖျါ ၇:၉, ၁၀, ၁၃, ၁၄.
လၢကစၢ်ယွၤအဘီအမုၢ် တၢ်ပၢဖီလာ်န့ၣ် ပကဒိးန့ၢ်ဘၣ်အဘျုးဒ်လဲၣ်
ဒ်သိးပကကဲထီၣ်ဘၣ် ကစၢ်ယွၤအဘီအမုၢ် အထံဖိကီၢ်ဖိအဂီၢ် အဆိကတၢၢ်န့ၣ် ပကဘၣ် ဃုသ့ၣ်ညါမၤလိ တၢ်ဂ့ၢ်လၢအရ့ဒိၣ်. ယ့ၣ်ၡူး ဃ့ထုကဖၣ်လၢ ကစၢ်ယွၤအအိၣ် ဒီးတဲဝဲလၢ “ဒ်သိး ပှၤကန့ၢ်ဘၣ် တၢ်မူအထူအယိာ်အဂီၢ် အဝဲသ့ၣ် ကဘၣ်သ့ၣ်ညါထီၣ်နၤ လၢအမ့ၢ် ကစၢ်ယွၤ အမ့ၢ်အတီထဲ တဂၤဧိၤ ဒီးယ့ၣ်ၡူးခရံာ်လၢ နဆှၢလီၤအီၤ တဂၤန့ၣ်လီၤ.”—ယိၤဟၣ် ၁၇:၃.
ဖဲပှၤတဂၤ သ့ၣ်ညါထီၣ် ယဟိဝၤယွၤ အတၢ်ပာ်သူၣ်ပာ်သးအခါ အဝဲသ့ၣ် ဒိးန့ၢ်ဘၣ်အဘျုးအါမး. ဆိကမိၣ်ကွၢ် တၢ်အဘျုးခံခါအံၤ. တၢ, အဝဲသ့ၣ် ကနာ်န့ၢ်ယဟိဝၤယွၤ လၢလၢပှဲၤပှဲၤ. တၢ်နာ်တခါန့ၣ် ဒိးသန့ၤထီၣ်သးလၢ တၢ်အုၣ်သး ဒီးတၢ်အုၣ်သးအံၤ ဒုးနာ်န့ၢ်အဝဲသ့ၣ်လၢ ကစၢ်ယွၤအဘီအမုၢ်န့ၣ် မ့ၢ်ဝဲတၢ်နီၢ်ကီၢ် ဒီးအကပၢဟီၣ်ခိၣ် ဘူးထီၣ်လံ. (ဧ့ၤဘြံၤ ၁၁:၁) ခံ, အဝဲသ့ၣ် အတၢ်အဲၣ် လၢယဟိဝၤယွၤ ဒီးပှၤလၢအဃၢၤန့ၣ် ဟဲဒိၣ်ထီၣ်. ခီဖျိလၢ အဝဲသ့ၣ်အဲၣ် ယဟိဝၤယွၤအဃိ အဝဲသ့ၣ် သးအိၣ်ဒိကနၣ် အကလုၢ် လၢအသးဒီဖျၢၣ်. ဒီးခီဖျိလၢ အဝဲသ့ၣ်အဲၣ် ပှၤလၢအဃၢၤအဃိ အဝဲသ့ၣ် သးအိၣ်မၤထွဲ ယ့ၣ်ၡူး အတၢ်ကတိၤ လၢအတဲဝဲလၢ “ဒ်သုအဲၣ်ဒိးလၢ ပှၤဂၤကမၤသုအသိးန့ၣ် မၤအဝဲသ့ၣ် ဒ်န့ၣ်အသိးစ့ၢ်ကီးတက့ၢ်.”—လူၤကၣ် ၆:၃၁.
ဒ်ပါလၢအအိၣ်ဒီး တၢ်အဲၣ်တဂၤအသိး ပတၢ်ဘၣ်တ့ကစၢ်စ့ၢ်ကီး အဲၣ်ဒိးလၢ ပကအိၣ်ဒီး တၢ်အိၣ်မူလၢအဂ့ၤကတၢၢ်. အအဲၣ်ဒိးလၢ ပကအိၣ်ဒီး “တၢ်မူနီၢ်ကီၢ်.” (၁ တံၤမသ့း ၆:၁၉) ပတၢ်အိၣ်မူ လၢဆၢကတီၢ်ခဲအံၤန့ၣ် တမ့ၢ်ဝဲ တၢ်အိၣ်မူနီၢ်ကီၢ်ဘၣ်. ပှၤလၢအကကွဲၢ်တဖၣ်န့ၣ် အိၣ်မူဘၣ် ကီကီခဲခဲ ဒီးအဝဲသ့ၣ် ကအီၣ်ဘၣ်အီဘၣ်အဂီၢ် ဘၣ်ကျဲးစၢးဝဲဖးနးညါ. ဒ်သိး နကသ့ၣ်ညါဘၣ် တၢ်အိၣ်မူနီၢ်ကီၢ် ကမၤသးဒ်လဲၣ်အဂီၢ် ဃုသ့ၣ်ညါကွၢ် တၢ်ဆိၣ်ဂ့ၤတနီၤလၢ ကစၢ်ယွၤအဘီအမုၢ် ကဒုးအိၣ်ထီၣ်ဝဲလၢ အထံဖိကီၢ်ဖိအဂီၢ်.
လၢကစၢ်ယွၤအဘီအမုၢ် အတၢ်ပၢဖီလာ်န့ၣ် ပှၤခဲလၢာ် ကအိၣ်ဘၣ် ပူၤပူၤဖျဲးဖျဲး ဒီးဘံၣ်ဘံၣ်ဘၢဘၢ ဒီးအဝဲသ့ၣ် ကအိၣ်ဒီး တၢ်အီၣ်တၢ်အီဒီဒူၣ်