တၢ်ကီတၢ်ခဲ ဒီးတၢ်နးတၢ်ဖှီၣ်​ မ့ၢ်ကဲထီၣ်သးန့ၣ်​ အမၤဘၣ်ဒိ ပတၢ်အိၣ်ဆူၣ်အိၣ်ချ့ သ့လၢကျဲအါဘိ.

• ခီဖျိလၢ တၢ်ကီတၢ်ခဲ ကဲထီၣ်သး အါမံၤအဃိ ပှၤအါဂၤ ဘၣ်ကိၢ်ဘၣ်ဂီၤတၢ်. ဒီးပှၤတဂၤ မ့ၢ်သူၣ်ကိၢ်သးဂီၤတၢ် ဖးယံာ်န့ၣ်​ အတၢ်အိၣ်ဆူၣ်အိၣ်ချ့ ဘၣ်ဒိသ့.

• ဖဲန့ဆၢၣ်တၢ်ဘၣ်ဒိဘၣ်ထံး ဒီးတၢ်ဆါသံသတြိာ် ကဲထီၣ်အခါ တဘျီတခီၣ်​ လၢတၢ်ဆါဟံၣ်န့ၣ်​ ကသံၣ်သရၣ်​ ကွၢ်ထွဲပှၤဆါ တဝးဘၣ်​ ဒီးတဘျီတခီၣ်​ ကသံၣ်ကသီ တယၢစ့ၢ်ကီးဘၣ်.

• ပှၤအါဂၤ ထံၣ်ဘၣ်​ ကျိၣ်စ့တၢ်ကီတၢ်ခဲ. ဒီးအဝဲသ့ၣ်​ ကပှ့ၤအီၣ်ပှ့ၤအီ တၢ်လၢအလိၣ်ဘၣ်ဝဲ နီၢ်ကီၢ် ဒ်သိးဒီး တၢ်အီၣ်တၢ်အီ ဒီးကသံၣ်ကသီမး ပှ့ၤဝဲတန့ၢ်လၢၤဘၣ်.

• နမ့ၢ်အိၣ်ဒီး တၢ်ဆူးတၢ်ဆါနးမး ဒီးနမ့ၢ်ဘၣ်ကိၢ်ဘၣ်ဂီၤတၢ်န့ၣ်​ နကဆၢတဲာ်ကမၣ်ဘၣ်တၢ် ဒီးနကမၤဘၣ်​ တၢ်လၢကမၤဘၣ်ဒိ နတၢ်အိၣ်ဆူၣ်အိၣ်ချ့. ဒီးလၢခံန့ၣ်​ နတၢ်ဆါ ကနးဒိၣ်ထီၣ်.

• နမ့ၢ်တကူစါယါဘျါနသး တဘျီဃီဘၣ်န့ၣ်​ နတၢ်ဆါကနးထီၣ်​ ဒီးတၢ်လီၤဘၣ်ယိၣ်​ ကအိၣ်ထီၣ်လၢ နသးသမူအဂီၢ်.

• တၢ်ကီတၢ်ခဲ မ့ၢ်ကဲထီၣ်သး အါမံၤသနာ်က့ နတၢ်အိၣ်ဆူၣ်အိၣ်ချ့ မ့ၢ်ဂ့ၤန့ၣ်​ နဆၢတဲာ်တၢ် လၢအဘၣ်ကသ့.

• နစ့အိၣ်အါမ့ၢ်ဂ့ၤ တအိၣ်အါအါဘၣ်မ့ၢ်ဂ့ၤ နကွၢ်ကတီၤ နတၢ်အိၣ်ဆူၣ်အိၣ်ချ့သ့.

ပှၤလၢအအိၣ်ဒီး တၢ်ကူၣ်သ့န့ၣ်​ အဆိကမိၣ်ထံဆိ တၢ်ကီတၢ်ခဲလၢ ကကဲထီၣ်သး ဒီးအကဘၣ်ဟးဆှဲး တၢ်ကီတၢ်ခဲဒ်လဲၣ်န့ၣ်​ အဆိကမိၣ်ပာ်စၢၤဝဲ. ဘၣ်ဃးဒီး တၢ်အိၣ်ဆူၣ်အိၣ်ချ့စ့ၢ်ကီး ပကဘၣ်မၤဒ်န့ၣ်. ညီနုၢ် ပမ့ၢ်အိၣ်ကဆှဲကဆှီ, ပာ်ပဟံၣ်​ ဒီးတၢ်ဖိတၢ်လံၤ ကဆှဲကဆှီန့ၣ်​ ပတန့ၢ်ဘၣ်တၢ်ဆါ ညီညီဘၣ်. အဃိ ပမ့ၢ်ဒီသဒၢဆိပသးန့ၣ်​ ဂ့ၤဒိၣ်န့ၢ်ဒံး ပဘၣ်ကူစါယါဘျါသးဒံး.

အၤဒြ့ယဲၤ a တဲဝဲလၢ “ပဂုာ်ကျဲးစၢး အိၣ်ကဆှဲကဆှီ ဒီးပာ်ပဟံၣ်​ ကဆှဲကဆှီအဃိ ပတလိၣ်​ လဲၤမၤကွၢ်သးလၢ တၢ်ဆါဟံၣ်​ အါအါဘၣ်. ဒီးပတၢ်လၢာ်ဘူၣ်လၢာ်စ့ၤ လၢကသံၣ်ကသီတပၤစ့ၢ်ကီး တလၢာ်အါအါဘၣ်.”