နမ့ၢ်ဃုကွၢ် တၢ်ဟ့ၣ်ကူၣ်လၢ နကဘၣ်​ လဲၤခီဖျိ တၢ်သးအုးနးမး ဒ်လဲၣ်အဂီၢ်န့ၣ်​ ဘၣ်သ့ၣ်သ့ၣ်​ နကထံၣ်န့ၢ် တၢ်ဟ့ၣ်ကူၣ်​ ဒီဒူၣ်ညါ ဒီးတၢ်ဟ့ၣ်ကူၣ်တနီၤန့ၣ်​ ကဂ့ၤဒိၣ်န့ၢ် အဂၤတနီၤ. ဒ်ပသ့ၣ်ညါအသိး ပှၤလၢအတူၢ်ဘၣ်​ တၢ်သးအုးနးမးန့ၣ်​ အလဲၤခီဖျိ တၢ်သးအုး တဒ်သိးလိာ်သး ကိးဂၤဒဲးဘၣ်. တၢ်ဟ့ၣ်ကူၣ်လၢ အကဲထီၣ်​ တၢ်မၤစၢၤလၢ ပှၤတဂၤအဂီၢ်န့ၣ်​ ဘၣ်သ့ၣ်သ့ၣ်​ တကဲထီၣ်​ တၢ်မၤစၢၤလၢ ပှၤအဂၤတဂၤ အဂီၢ်ဘၣ်.

သနာ်က့ လၢလံာ်လၢပျၢၤ လၢအမ့ၢ် လံာ်စီဆှံအပူၤန့ၣ်​ အိၣ်ဒီး တၢ်ဟ့ၣ်ကူၣ်​ ယိယိဖိလၢ အကဲဘျုးတုၤလၢ ဆၢကတီၢ်ခဲအံၤ ဒီးအကဲဘျုးလၢ ပှၤအါဂၤအဂီၢ်. တကးဒံးဘၣ်​ ကသံၣ်သရၣ်လၢ အဟ့ၣ်ကူၣ်​ ပှၤလၢအတူၢ်ဘၣ်​ တၢ်သးအုးနးမးတဖၣ်န့ၣ်​ အဝဲသ့ၣ်​ တဲဖျါထီၣ်ဝဲ တၢ်ဟ့ၣ်ကူၣ်တဖၣ်အံၤထီဘိ.

• ပှၤကူၣ်ဘၣ်ကူၣ်သ့တနီၤ တဲဝဲလၢ ပှၤလၢအသးအုးနးမးတဂၤ မ့ၢ်တူၢ်လိာ် ပှၤဂၤအတၢ်မၤစၢၤန့ၣ်​ ကညီလၢ အကလဲၤခီဖျိ အတၢ်သးအုး. သနာ်က့ တဘျီတခီၣ်န့ၣ်​ နကဘၣ်သး အိၣ်ထဲတဂၤ. ဒီးဘၣ်သ့ၣ်သ့ၣ်​ နကသးအ့န့ဘၣ်​ ပှၤလၢအဂုာ်ကျဲးစၢး မၤစၢၤနၤ. တၢ်တူၢ်ဘၣ်တခါအံၤ အကဲထီၣ်သးသ့.

• တဘၣ်ဆိကမိၣ်လၢ နကဘၣ်အိၣ်လၢ ပှၤဂၤအကျါထီဘိတဂ့ၤ. နမ့ၢ်ဘၣ်သး အိၣ်ထဲတဂၤ သနာ်က့ တဘၣ်နီတမံၤဘၣ်. ဘၣ်ဆၣ်​ ပှၤဂၤမ့ၢ်ဘၣ်သး မၤစၢၤနၤန့ၣ်​ တဘၣ်ဂ့ၢ်လိာ် အဝဲသ့ၣ်တဂ့ၤ. လၢခံတဘျီန့ၣ်​ နကလိၣ်ဘၣ်​ အဝဲသ့ၣ်တၢ်မၤစၢၤ. ဒီးဖဲနသးအုးနးမးအခါ နလိၣ်ဘၣ်​ မနုၤလဲၣ်, နတလိၣ်ဘၣ် မနုၤလဲၣ်န့ၣ်​ တဲဘၣ်စ့ၢ်ကီးပှၤဂၤ.

• နကအိၣ်လၢ ပှၤဂၤအကျါဧါ ဒီးနကအိၣ်ထဲတဂၤဧါန့ၣ်​ ပာ်ပနီၣ်ဃာ် တၢ်ဆၢကတီၢ်ဂ့ၤဂ့ၤ.

လံာ်စီဆှံ အတၢ်ဟ့ၣ်ကူၣ်– “ပှၤခံဂၤန့ၣ်​ ဂ့ၤဒိၣ်န့ၢ်ဒံး ပှၤတဂၤ . . . အဝဲသ့ၣ်​ မ့ၢ်လီၤဃံၢ်တဂၤဒီး အဝဲတဂၤ ကဝံၣ်ဆၢထၢၣ်အီၤ.”—စံၣ်တဲၤတဲလီၤတၢ် ၄:၉, ၁၀.

• နမ့ၢ်အီၣ်တၢ်အီၣ်လၢ အန့ၢ်ဂံၢ်န့ၢ်ဘါန့ၣ်​ ကမၤစၢၤနၤဒ်သိး နလဲၤခီဖျိ တၢ်အိၣ်သးကီခဲ လၢကဲထီၣ်သးခီဖျိလၢ နတူၢ်ဘၣ်​ တၢ်သးအုးနးမးအဃိကန့ၢ်. ဂုာ်ကျဲးစၢးအီၣ်​ တၤသူတၤသၣ်, တၢ်ဒိးတၢ်လၣ်​ အကလုာ်ကလုာ် ဒီးအီၣ်တၢ်ညၣ်လၢ အတပၣ်ဒီး အသိအါအါဘၣ်.

• အီထံအါအါ ဒီးအီတၢ်ထံတၢ်နိအဂၤလၢ အန့ၢ်ဂံၢ်န့ၢ်ဘါ.

• နမ့ၢ်တဘၣ်သး အီၣ်တၢ်ဘၣ်န့ၣ်​ ဂုာ်ကျဲးစၢး အီၣ်န့ၢ်တၢ်အီၣ်​ တဘျီတစဲး ခဲအံၤခဲအံၤ. ဒီးဃ့အီစ့ၢ်ကီး ကသံၣ်ဂံၢ်ဘါလၢ ကသံၣ်သရၣ်အအိၣ်. a

• နမ့ၢ်ဟးလၢတၢ်ချၢ ဒီးမၤနီၢ်ခိတၢ်ဟူးတၢ်ဂဲၤန့ၣ်​ ကမၤစၢၤနၤဒ်သိး နတၢ်တူၢ်ဘၣ်လၢ အတမုာ်တဖၣ်​ ကစှၤလီၤက့ၤ. ဒီးဖဲနမၤ နီၢ်ခိတၢ်ဟူးတၢ်ဂဲၤအခါ အကမၤစၢၤနၤဒ်သိး နကဆိကမိၣ်ထီၣ်က့ၤ ပှၤလၢနအဲၣ်​ လၢအသံသဒၣ်နၤ မ့တမ့ၢ် အကမၤစၢၤနၤဒ်သိး နတဆိကမိၣ်​ အဂ့ၢ်အါအါလၢၤတဂ့ၤ.

လံာ်စီဆှံ အတၢ်ဟ့ၣ်ကူၣ်– “ပှၤလၢအသးဟ့လီၤ အနီၢ်ခိဒၣ်ဝဲန့ၣ်​ တအိၣ်နီတဂၤဘၣ်.”—အ့းဖ့းစူး ၅:၂၉.

• တၢ်မံန့ၣ်​ အရ့ဒိၣ်ဒိၣ်မး. လီၤဆီဒၣ်တၢ် လၢပှၤလၢအတူၢ်ဘၣ်​ တၢ်သးအုးနးမး အဂီၢ်န့ၣ်​ ခီဖျိလၢ အလီၤဘှံးဒိၣ်န့ၢ်ဒံးညီနုၢ် အဃိ အကဘၣ်မံအါအါ.

• ခီဖံၣ်​ ဒီးသံးန့ၣ်​ အမၤတံာ်တာ် နတၢ်မံသ့အဃိ နအီထဲလဲၣ်န့ၣ် နကဘၣ်ပလီၢ်နသး.

လံာ်စီဆှံ အတၢ်ဟ့ၣ်ကူၣ်– “တၢ်အိၣ်ဘှံးတစဲးန့ၣ် ဂ့ၤဒိၣ်န့ၢ်ဒံး ပှၤမၤတၢ်ဆူၣ်တလၢ ဒီးလူၤဖီၣ်ကလံၤ.”—စံၣ်တဲၤတဲလီၤတၢ် ၄:၆.

• ပှၤလၢအတူၢ်ဘၣ်​ တၢ်သးအုးနးမးန့ၣ်​ အတၢ်တူၢ်ဘၣ်​ တဒ်သိးလိာ်သးဘၣ်. အဃိ နကဘၣ်ဆၢတဲာ် တၢ်လၢအဂ့ၤကတၢၢ် လၢနနီၢ်ကစၢ်အဂီၢ်.

• ပှၤအါဂၤ တူၢ်ဘၣ်ဝဲလၢ အဝဲသ့ၣ်​ မ့ၢ်တဲဘၣ်ပှၤဂၤလၢ အတၢ်တူၢ်ဘၣ်န့ၣ်​ ကဲထီၣ်တၢ်မၤစၢၤ လၢအဝဲသ့ၣ်အဂီၢ်. မ့မ့ၢ် ပှၤအဂၤတနီၤန့ၣ်​ တဘၣ်သးတဲဘၣ်ပှၤဂၤလၢ အတၢ်တူၢ်ဘၣ်ဘၣ်. ပှၤတဂၤ မ့ၢ်တဲဘၣ်ပှၤဂၤလၢ အတၢ်တူၢ်ဘၣ်န့ၣ် ကကဲထီၣ်တၢ်မၤစၢၤ လၢအဝဲသ့ၣ်အဂီၢ်ဧါ တကဲထီၣ်ဘၣ်ဧါန့ၣ်​ ပှၤအါဂၤ တၢ်ထံၣ်အိၣ်အါမံၤ. အဃိ နမ့ၢ်ဘၣ်သး တဲဘၣ်ပှၤဂၤလၢ နတၢ်တူၢ်ဘၣ်, ဘၣ်ဆၣ်​ နတဲမ့ၢ်တဘူၣ်ဘၣ်န့ၣ်​ စးထီၣ်တဲကွၢ်ဆိ နသကိးလၢ နမုာ်ဒီးအီၤတဂၤ လၢနတၢ်တူၢ်ဘၣ်တစဲးဖိ.

• ပှၤတနီၤ တူၢ်ဘၣ်ဝဲလၢ အဝဲသ့ၣ်မ့ၢ်ဟီၣ်န့ၣ်​ ကမၤစၢၤအီၤဒ်သိး အလဲၤခီဖျိ အတၢ်တူၢ်ဘၣ်နးမးကန့ၢ်. မ့မ့ၢ် အဂၤတနီၤန့ၣ် တတူၢ်ဘၣ်ဝဲ ဒ်န့ၣ်ဘၣ်အဃိ အဝဲသ့ၣ်​ တဟီၣ်အါအါဘၣ်.

လံာ်စီဆှံ အတၢ်ဟ့ၣ်ကူၣ်– “ပှၤတဂၤ အတၢ်သူၣ်ဘၣ်ဒိ သးဘၣ်ထံးန့ၣ် ထဲဒၣ်​ အနီၢ်ကစၢ်တဂၤ နၢ်ပၢၢ်ဝဲ.”—ကတိၤဒိ ၁၄:၁၀.

• ပှၤလၢအတူၢ်ဘၣ်​ တၢ်သးအုးနးမး တနီၤန့ၣ်​ အဝဲသ့ၣ်​ ဂုာ်ကျဲးစၢး မၤလီၤမၢ် အတၢ်သးအုး ဒီးတၢ်တူၢ်ဘၣ်လၢ အတမုာ်ဘၣ်ခီဖျိ အအီသံး မ့တမ့ၢ် အီကသံၣ်မူၤဘှီး. အဝဲသ့ၣ်​ ဂုာ်ကျဲးစၢး “ဃ့ၢ်ပူၤဖျဲးသး” လၢအတၢ်တူၢ်ဘၣ်​ ဒ်အံၤသနာ်က့ အိၣ်ဒၣ်​ အမၤဘၣ်ဒိလီၤ အနီၢ်ကစၢ်သးလီၤ. ဒီးအဝဲသ့ၣ်​ မၤဝဲဒ်အံၤအဃိ အတူၢ်ဘၣ်​ မ့ၢ်မုာ်ထီၣ်သနာ်က့ ကမုာ်ထီၣ်ထဲ တစိၢ်ဖိ ဒီးလၢခံ အကတူၢ်ဘၣ်​ တၢ်ကီတၢ်ခဲလၢအဂၤ. အဃိ ဒ်သိး နတၢ်သးအုးနးမး ကစှၤလီၤအဂီၢ် ဂုာ်ကျဲးစၢး မၤကွၢ်တၢ်လၢ အတမၤဘၣ်ဒိနၤဘၣ်​ တခါခါ.

လံာ်စီဆှံ အတၢ်ဟ့ၣ်ကူၣ်– “မ်ပမၤကဆှီထီၣ်​ ပသးလၢ တၢ်ခဲလၢာ်လၢ အမၤဘၣ်အၢ ပဖံးပညၣ်.”—၂ ကရံၣ်သူး ၇:၁.

• ပှၤအါဂၤန့ၣ်​ အဝဲသ့ၣ်​ ဂုာ်ကျဲးစၢးမၤ တၢ်တမံၤမံၤလၢ ကမၤစၢၤ အဝဲသ့ၣ်ဒ်သိး အတတူၢ်ဘၣ် တၢ်သးအုးနးမး အါအါတဂ့ၤ ဒီးကသးပ့ၤနီၣ်ကွံာ် အတၢ်တူၢ်ဘၣ်လၢ အတမုာ်ဘၣ်.

• နမ့ၢ်ရ့အါထီၣ်ပှၤဂၤ မ့တမ့ၢ် မၤဂ့ၤထီၣ်​ နတၢ်ရ့လိာ်သးဒီးပှၤဂၤ, မၤလိန့ၢ် တၢ်သ့တၢ်ဘၣ်တခါခါ မ့တမ့ၢ် မၤတၢ်မၤမုာ်မၤဖှံသး တခါခါန့ၣ်​ ဘၣ်သ့ၣ်သ့ၣ်​ အကမၤစၢၤနၤဒ်သိး နကသးပ့ၤနီၣ်ကွံာ် နတၢ်တူၢ်ဘၣ်လၢ အတမုာ်ဘၣ်.

• လၢခံန့ၣ်​ နတၢ်တူၢ်ဘၣ်​ ကဆီတလဲထီၣ်​ ဒီးကဂ့ၤထီၣ်ကယီကယီ. ဒီးနကသးပ့ၤနီၣ်ကွံာ် နတၢ်တူၢ်ဘၣ်လၢ အတမုာ်ဘၣ်​ ဒီးလၢခံကယီကယီန့ၣ်​ နအိၣ်ကမုာ်ထီၣ်က့ၤ ဒ်သိးလၢညါ.

လံာ်စီဆှံ အတၢ်ဟ့ၣ်ကူၣ်– “တၢ်ဆၢကတီၢ် အိၣ်ဝဲလၢ တၢ်ခဲလၢာ်အဂီၢ်, . . . တၢ်ဆၢကတီၢ်လၢ ပှၤကဟီၣ်အဂီၢ် ဒီးတၢ်ဆၢကတီၢ်လၢ ပှၤကနံၤအဂီၢ်, တၢ်ဆၢကတီၢ်လၢ ပှၤကသးအုးအဂီၢ် ဒီးတၢ်ဆၢကတီၢ်လၢ ပှၤကဂဲၤကလံၣ်အဂီၢ်.”—စံၣ်တဲၤတဲလီၤတၢ် ၃:၁, ၄.

• တၢ်လၢနဘၣ်မၤအီၤ ကိးနံၤဒဲးန့ၣ်​ ဂုာ်ကျဲးစၢး စးထီၣ်မၤက့ၤအီၤ တဘျီဃီ.

• နမ့ၢ်မံဖဲ နဘၣ်မံအဆၢကတီၢ်, မၤတၢ်ဖဲ နဘၣ်မၤအဆၢကတီၢ် ဒီးမၤတၢ်အဂၤ လၢအဆၢကတီၢ် ဒၣ်ဝဲန့ၣ်​ နတၢ်အိၣ်သး ကက့ၤအိၣ်​ ဒ်သိးလၢညါ.

• နမ့ၢ်မၤတၢ်လၢ အကဲဘျုးလၢနဂီၢ်န့ၣ်​ ကမၤစၢၤနၤဒ်သိး နတၢ်တူၢ်ဘၣ်လၢ အတမုာ်ဘၣ်တဖၣ်​ ကစှၤလီၤ.

လံာ်စီဆှံ အတၢ်ဟ့ၣ်ကူၣ်– “ယွၤလၢအမ့ၢ်အတီတဂၤ ဟ့ၣ်အီၤ တၢ်သးခုအါမးအဃိ အတၢ်အိၣ်မူ တနံၤဘၣ်တနံၤ လဲၤအသးချ့မးန့ၣ်​ အနီၢ်ကစၢ်မး တပာ်သူၣ်ပာ်သးဘၣ်ဝဲဘၣ်.”—စံၣ်တဲၤတဲလီၤတၢ် ၅:၂၀.

• ပှၤတနီၤန့ၣ်​ ပှၤလၢအအဲၣ်ဝဲတဂၤ သံသဒၣ်အီၤ တယံာ်ဘၣ်​ ဝံၤအလီၢ်ခံ အဝဲသ့ၣ်​ ဆၢတဲာ် တၢ်လၢအရ့ဒိၣ် တဘျီဃီအဃိ လၢခံအဝဲသ့ၣ်​ သးတမုာ်က့ၤလၢ အတၢ်ဆၢတဲာ် အဃိဘၣ်.

• တချုးလၢ နပၠီတၢ်လီၢ်, နဆီတလဲတၢ်မၤ မ့တမ့ၢ် နတၢၤကွံာ် ပှၤလၢနအဲၣ်​ လၢအသံသဒၣ်နၤတဂၤ အတၢ်ဖိတၢ်လံၤ ဒံးဘၣ်အခါ မ့ၢ်သ့န့ၣ်​ အိၣ်ခိးတၢ်ဆၢကတီၢ် တတီၤဖိ.

လံာ်စီဆှံ အတၢ်ဟ့ၣ်ကူၣ်– “တၢ်လၢပှၤခုတဖၣ်​ ရဲၣ်လီၤကျဲၤလီၤဝဲန့ၣ်​ ကကဲထီၣ်လိၣ်ထီၣ်ဝဲ သပှၢ်တၢၢ်, မ့မ့ၢ် ပှၤလၢအမၤကရီတၢ်န့ၣ်​ ကဖှီၣ်လီၤယာ်လီၤဝဲ သပှၢ်တၢၢ်.”—ကတိၤဒိ ၂၁:၅.

• ပှၤအါဂၤ တူၢ်ဘၣ်ဝဲလၢ အဝဲသ့ၣ်​ မ့ၢ်မၤတၢ်တမံၤမံၤ လၢကမၤစၢၤအီၤ ဒ်သိး အကသ့ၣ်နီၣ်ထီၣ်က့ၤ ပှၤလၢအအဲၣ်​ လၢအသံသဒၣ်အီၤန့ၣ်​ ကဲဘျုး လၢအဝဲသ့ၣ်အဂီၢ်.

• နမ့ၢ်ပာ်ဃာ်တၢ်ဂီၤ, တၢ်ဖိတၢ်လံၤတမံၤမံၤ မ့တမ့ၢ် ကွဲးနီၣ်ဃာ်တၢ်ဂ့ၢ် ဒီးတၢ်ကဲထီၣ်သး လၢနဘၣ်သး သ့ၣ်နီၣ်ထီၣ်က့ၤထီဘိန့ၣ်​ ဘၣ်သ့ၣ်သ့ၣ်​ ကကဲထီၣ်​ တၢ်မၤစၢၤ လၢနဂီၢ်စ့ၢ်ကီး.

• ပာ်ဃာ် တၢ်သ့ၣ်နီၣ်တခါခါလၢ အကဒုးသ့ၣ်နီၣ်ထီၣ်က့ၤနၤ ပှၤလၢနအဲၣ်​ လၢအသံသဒၣ်နၤ ဒီးလၢခံန့ၣ်​ က့ၤကွၢ်ကဒါ တၢ်ဖိတၢ်လံၤလၢ နပာ်ဃာ်အီၤ.

လံာ်စီဆှံ အတၢ်ဟ့ၣ်ကူၣ်– “သ့ၣ်နီၣ်ထီၣ်က့ၤ မုၢ်နံၤလၢ အပူၤကွံာ်တဖၣ်.”—၅ မိၤၡ့ ၃၂:၇.

• နဟးကသုၣ်ကသီ ဒီးအိၣ်ဘှံးအိၣ်သါသ့.

• နဟးကသုၣ်ကသီ ယံာ်ယံာ် မ့ၢ်တသ့ဘၣ်န့ၣ်​ လဲၤဟးတသီခံသီ. အဒိ လဲၤဟးထီၣ်ကစၢၢ်, လဲၤဟးလၢ ပှၤပာ်ကွၢ်ကီ ဆၣ်ဖိကီၢ်ဖိအလီၢ် မ့တမ့ၢ် လဲၤဟးဒိးလိာ်ကွဲကါ.

• နမ့ၢ်ဟးကသုၣ်ကသီ ဒီးအိၣ်ဘှံးအိၣ်သါ တတီၤဖိန့ၣ်​ ကမၤစၢၤနၤဒ်သိး နလဲၤခီဖျိ နတၢ်သးအုးကန့ၢ်.

လံာ်စီဆှံ အတၢ်ဟ့ၣ်ကူၣ်– “ပကလဲၤလၢ တၢ်လီၢ်လၢ ပှၤတအိၣ်နီတဂၤဘၣ်အလီၢ် ဒ်သိး သုကအိၣ်ဘှံးအိၣ်သါ တစဲးဖိနီၤ.” —မၢ်ကူး ၆:၃၁.

• နမ့ၢ်မၤစၢၤပှၤဂၤန့ၣ်​ နကန့ၢ်ဘၣ်အဘျုး ဒီးနသးကမုာ်ထီၣ်စ့ၢ်ကီး.

• နသကိး မ့တမ့ၢ် နဘူးနတံၢ်လၢ အတူၢ်ဘၣ် တၢ်သးအုး ခီဖျိလၢ ပှၤလၢအအဲၣ်ဝဲတဂၤဂၤ သံသဒၣ်အီၤအဃိန့ၣ်​ အဝဲသ့ၣ်​ ကဘၣ်သး တဲဖျါထီၣ်​ အတၢ်တူၢ်ဘၣ်​ မ့တမ့ၢ် ကလိၣ်ဘၣ် ပှၤလၢကနၢ်ပၢၢ်စၢၤ အတၢ်တူၢ်ဘၣ် အဃိ နမၤစၢၤအီၤသ့.

• နမ့ၢ်မၤစၢၤပှၤဂၤ ဒီးမၤမုာ်ထီၣ်ပှၤသးန့ၣ် နကဒိးန့ၢ်ဘၣ်က့ၤ တၢ်သးခုလၢ နလိၣ်ဘၣ်စ့ၢ်ကီး.

လံာ်စီဆှံ အတၢ်ဟ့ၣ်ကူၣ်– “ဟ့ၣ်တၢ်န့ၣ်​ ဒုးအိၣ်ထီၣ်​ တၢ်သးခုအါန့ၢ်ဒံး ဒိးန့ၢ်ဘၣ်တၢ်ဒံး.”—မၤတၢ် ၂၀:၃၅.

• ဖဲနလဲၤခီဖျိ တၢ်သးအုးနးမးအခါ အမၤစၢၤနၤဒ်သိး နကဆိကမိၣ်ထံက့ၤ တၢ်လၢအရ့ဒိၣ်​ လၢနဂီၢ်.

• သူတၢ်ဆၢကတီၢ်အံၤလၢ နကဆိကမိၣ်ထံက့ၤ ဘၣ်ဃးဒီး နအိၣ်မူ တၢ်အိၣ်မူဒ်လဲၣ်.

• တၢ်လၢအရ့ဒိၣ်​ လၢနဂီၢ် လၢနကဘၣ်​ ဆီတလဲအီၤ မ့ၢ်အိၣ်တမံၤမံၤန့ၣ်​ ဂုာ်ကျဲးစၢး ဆီတလဲ.

လံာ်စီဆှံ အတၢ်ဟ့ၣ်ကူၣ်– “ပှၤလဲၤလၢ ဟံၣ်တဖျၢၣ်လၢ ပှၤဟီၣ်လၢပှၤသံအဃိန့ၣ်​ ဂ့ၤဒိၣ်န့ၢ်ဒံး ပှၤလဲၤလၢ ဟံၣ်လၢ ပှၤအီၣ်သကိး အီသကိးတၢ်, မ့ၢ်လၢ ပှၤကိးဂၤဒဲး အကျဲကတၢၢ်လၢ တၢ်သံ ဒီးပှၤလၢ အမူတဖၣ်​ ကြၢးသ့ၣ်နီၣ်ထီၣ်​ တၢ်ဂ့ၢ်အဝဲန့ၣ်လီၤ.”—စံၣ်တဲၤတဲလီၤတၢ် ၇:၂.

နီၢ်ကီၢ်ဒု တၢ်လၢ ကမၤလီၤမၢ်ကွံာ် တၢ်သးအုးနးမး ခဲလၢာ်စီပျီန့ၣ်​ တအိၣ်ဘၣ်. သနာ်က့ ပှၤအါဂၤ လၢအလဲၤခီဖျိဘၣ် တၢ်သးအုးနးမးန့ၣ်​ အတၢ်လဲၤခီဖျိ ပာ်ဖျါထီၣ်ဝဲလၢ အဝဲသ့ၣ်​ မၤထွဲတၢ်ဟ့ၣ်ကူၣ်​ ဒ်သိးဒီး မဲးကစံတဘ့ၣ်အံၤ ပာ်ဖျါထီၣ်ဝဲအဃိ အဝဲသ့ၣ်​ ဒိးန့ၢ်ဘၣ်​ တၢ်မၤမုာ်ထီၣ်က့ၤ နီၢ်ကီၢ်. ဒီးမဲးကစံတဘ့ၣ်အံၤ တပာ်ဖျါထီၣ်ဝဲ တၢ်ဟ့ၣ်ကူၣ်လၢ ကမၤစၢၤ ပှၤလၢ အတူၢ်ဘၣ်​ တၢ်သးအုးနးမး ကိးခါဒဲးဘၣ်. ဘၣ်ဆၣ်​ နမ့ၢ်မၤကွၢ် တၢ်ဟ့ၣ်ကူၣ်တဖၣ်အံၤန့ၣ်​ ဘၣ်သ့ၣ်သ့ၣ်​ ကကဲထီၣ် တၢ်မၤစၢၤလၢနဂီၢ်တနီၤ.