ခါစတဲး တဲဝဲလၢ “ယမါ စိၤဖံၤယၤ a ဒီးယၤန့ၣ်​ ပဖျီသးန့ၢ် ၃၉ နံၣ်ဘျဲၣ်. လၢခံ အအိၣ်ဒီး တၢ်ဆါယံာ်ယံာ်ထၢထၢ တခါအဃိ အသံသဒၣ်ယၤ. ဘၣ်ဆၣ်​ ယသကိးတဖၣ်​ ဟ့ၣ်ဂံၢ်ဟ့ၣ်ဘါယၤ ဒီးမၤစၢၤယၤအါမး. ယကျဲးစၢး မၤတၢ်တမံၤမံၤ ဒ်သိးယတၢ်မၤကအါထီဘိ. သနာ်က့ လၢဒီတနံၣ်ကျၢၤန့ၣ်​ ယတၢ်သးအုး တလီၤမၢ်န့ၢ်ယၤဘၣ်. ယတၢ်တူၢ်ဘၣ်အံၤ ထီၣ်ထီၣ်လီၤလီၤ ထီဘိ. ဒီးခဲအံၤ ယမါသံသဒၣ်ယၤ ကအိၣ်သၢနံၣ်လံ ဘၣ်ဆၣ်​ ဘၣ်ဘျီဘျီန့ၣ်​ ယတၢ်သးအုး ဟဲအိၣ်ထီၣ်ကဒါဒံး.”

နၤမီၤ, ပှၤလၢနအဲၣ်​ လၢအသံသဒၣ်နၤ အိၣ်တဂၤဂၤဧါ. မ့ၢ်အိၣ်န့ၣ်​ ဘၣ်သ့ၣ်သ့ၣ်​ နတၢ်တူၢ်ဘၣ်​ ကလီၤဂာ်ဒီး ခါစတဲးအတၢ်တူၢ်ဘၣ်. အဒိ နမါမ့တမ့ၢ်နဝၤ, နဘူးနတံၢ် မ့တမ့ၢ် နသကိးလၢ နမုာ်ဒီးအီၤ မ့ၢ်သံသဒၣ်နၤန့ၣ်​ နသးကဘၣ်ဒိ ဒီးနသးကဟးဂီၤနးမး. ပှၤလၢအဃုသ့ၣ်ညါ တၢ်ဂ့ၢ်ဘၣ်ဃးဒီး ပှၤလၢအတူၢ်ဘၣ်​ တၢ်သးအုးနးမး ခီဖျိလၢတၢ်သံအဃိန့ၣ်​ အဝဲသ့ၣ်​ ဆိကမိၣ်ဝဲ ဒ်န့ၣ်စ့ၢ်ကီး. တၢ်ဂ့ၢ်တခါလၢ ပှၤကွဲးဝဲလၢ The American Journal of Psychiatry ပာ်ဖျါထီၣ်ဝဲလၢ “တၢ်သံန့ၣ်​ အမၤဟးဂီၤ ပှၤတဂၤအတၢ်မုၢ်လၢ် ဒီးအမၤသးအုးပှၤသးနးမး.” ပှၤလၢအတူၢ်ဘၣ်​ တၢ်သးအုးနးမးတဂၤ ကဆိကမိၣ်ဝဲလၢ ‘ယတူၢ်ဘၣ်တၢ်ဒ်အံၤ ကယံာ်ထဲလဲၣ်. ယတၢ်သးအုး လီၤမၢ်ကန့ၢ်ဒံးဧါ. ယကဘၣ်ဃုကွၢ် တၢ်မၤမုာ်ထီၣ်က့ၤသး ဖဲလဲၣ်.’

တၢ်သံကွၢ်တဖၣ်အံၤ အတၢ်စံးဆၢန့ၣ်​ ပကထံၣ်ဘၣ်လၢ ပၢၢ်ထီၣ်​ မဲးကစံ တဘ့ၣ်အံၤအပူၤ. ဒီးလၢတၢ်ဂ့ၢ်လၢခံတခါန့ၣ်​ ပကသ့ၣ်ညါဘၣ်လၢ ဖဲပှၤလၢပအဲၣ်တဂၤ သံသဒၣ်ပှၤအခါ ပကအိၣ်ဒီး တၢ်တူၢ်ဘၣ်​ မနုၤလဲၣ်. ဝံၤဒီး ပကသ့ၣ်ညါဘၣ်​ တၢ်ဟ့ၣ်ကူၣ်လၢ ကမၤစၢၤပှၤဒ်သိး ပတၢ်သးအုး ကစှၤလီၤအဂီၢ်.

ပမုၢ်လၢ်လၢ တၢ်ဂ့ၢ်လၢခံတဖၣ်​ ကမၤမုာ်ထီၣ်​ ဒီးကကဲထီၣ်​ တၢ်မၤစၢၤလၢ ပှၤလၢအတူၢ်ဘၣ်​ တၢ်သးအုးနးမးအဂီၢ်.