ဘၣ်ဃးဒီး ပတူၢ်ဘၣ်​ တၢ်သးအုးနးမးန့ၣ်​ ပှၤအါဂၤ ဃုသ့ၣ်ညါဝဲ တၢ်တူၢ်ဘၣ်တခါအံၤ အဂ့ၢ်အါမး. သနာ်က့ ဒ်ပထံၣ်ဘၣ်အသိး တၢ်ဟ့ၣ်ကူၣ်လၢ အဂ့ၤကတၢၢ်န့ၣ်​ ညီနုၢ်အဘၣ်လိာ်သးဒီး တၢ်ဟ့ၣ်ကူၣ်လၢ အအိၣ်လၢ လံာ်လၢပျၢၤ လၢအမ့ၢ် လံာ်စီဆှံအပူၤ. အဃိ ပသ့ၣ်ညါဘၣ်လၢ လံာ်စီဆှံ အတၢ်ဟ့ၣ်ကူၣ်န့ၣ်​ အကဲဘျုး တုၤလၢဆၢကတီၢ်ခဲအံၤဒံး. တကးဒံးဘၣ်​ လၢလံာ်စီဆှံပူၤန့ၣ်​ အိၣ်ဒီးတၢ်ဂ့ၢ်အဂၤ လၢအကဲဘျုးဒီဒူၣ်ဒံး. တၢ်ဂ့ၢ်အဂၤတဖၣ်အံၤ ပှၤဃုအီၤလၢ လံာ်လဲၢ်အဂၤ တဘၣ်ဘၣ်​ ဒီးအကကဲထီၣ်​ တၢ်မၤစၢၤလၢ ပှၤလၢအတူၢ်ဘၣ်​ တၢ်သးအုးနးမးအဂီၢ် သပှၢ်တၢၢ်.

• ပှၤလၢပအဲၣ်​ လၢအသံသဒၣ်ပှၤန့ၣ် တတူၢ်ဘၣ်တၢ်လၢၤဘၣ်

  လၢလံာ်စီဆှံအပူၤန့ၣ်​ စံၣ်တဲၤတဲလီၤတၢ် ၉:၅ တဲဝဲလၢ “ပှၤသံန့ၣ်​ တသ့ၣ်ညါ တၢ်နီတမံၤဘၣ်.” ပှၤသံန့ၣ်​ “အတၢ်ဆိကမိၣ်​ ဟးဂီၤကွံာ်ဝဲ.” (စံးထီၣ်ပတြၢၤ ၁၄၆:၄) အဃိ လံာ်စီဆှံ ထိၣ်သတြီၤဝဲ တၢ်သံ ဒ်သိးဒီး တၢ်မံမုာ်မုာ်ခုၣ်ခုၣ်.—ယိၤဟၣ်​ ၁၁:၁၁.

• ပမ့ၢ်နာ်န့ၢ် တၢ်အဲၣ်တၢ်ကွံကစၢ်န့ၣ်​ ပကဒိးန့ၢ်ဘၣ် တၢ်မၤမုာ်ထီၣ်က့ၤ

  လၢလံာ်စီဆှံအပူၤန့ၣ်​ စံးထီၣ်ပတြၢၤ ၃၄:၁၅ တဲဝဲလၢ “ယဟိဝၤယွၤ a အမဲာ်ကွၢ် ပှၤတီပှၤလိၤ ဒီးနၢ်ဟူအဝဲသ့ၣ်​ အတၢ်ကိးပသူထီၣ်လၢ တၢ်မၤစၢၤအဂီၢ်.” ပမ့ၢ်ဃ့ထုကဖၣ်​ လၢကစၢ်ယွၤအအိၣ်​ ဒီးတဲဘၣ်အီၤလၢ ပတၢ်တူၢ်ဘၣ်န့ၣ်​ ပကဒိးန့ၢ်ဘၣ်​ တၢ်မၤမုာ်ထီၣ်က့ၤ ဒီးအကဲဝဲ ကျဲတဘိလၢ ပကပၢၤဃာ် ပသးတၢ်တူၢ်ဘၣ်စ့ၢ်ကီး. တၢ်ဃ့ထုကဖၣ်န့ၣ်​ မၤစၢၤပှၤဒ်သိး ပကကဲထီၣ်​ ပတၢ်ဘၣ်တ့ကစၢ် အသကိး ဒီးအကသူ အတၢ်စိတၢ်ကမီၤ လၢကမၤမုာ်ထီၣ်က့ၤပသး.

• ခါဆူညါ တၢ်အိၣ်မူလၢအဂ့ၤ လၢပခိးကွၢ်လၢ်အီၤ

  ထံၣ်တမှံကွၢ်လၢ ခါဆူညါ ဖဲပှၤလၢအအိၣ်လၢ တၢ်သွၣ်ခိၣ်အပူၤတဖၣ်​ ကဂဲၤဆၢထၢၣ်​ သမူထီၣ်က့ၤ လၢဟီၣ်ခိၣ်ချၢ. ဘၣ်ဃးဒီး တၢ်ဆၢကတီၢ်လၢ ပှၤသံကဂဲၤဆၢထၢၣ်​ သမူထီၣ်က့ၤန့ၣ်​ လံာ်စီဆှံ ပာ်ဖျါထီၣ်ဝဲအဂ့ၢ် တဘျုးဘျီညါ. ဒီးခါဆူညါ လၢဟီၣ်ခိၣ်ချၢ တၢ်အိၣ်သး ကမၤသးဒ်လဲၣ်န့ၣ်​ လံာ်စီဆှံ ပာ်ဖျါထီၣ်ဝဲစ့ၢ်ကီး. လံာ်စီဆှံ တဲဝဲလၢ ကစၢ်ယွၤ “ကထွါကွံာ် [ပ] မဲာ်ထံခဲလၢာ် ဒီးတၢ်သံတအိၣ်လၢၤဘၣ်. ဒီးတၢ်သူၣ်အုးသးအုးမ့ၢ်ဂ့ၤ, တၢ်ဟီၣ်တၢ်ယၢၤမ့ၢ်ဂ့ၤ, တၢ်လၢအဆါမ့ၢ်ဂ့ၤ တအိၣ်လၢၤဘၣ်.”—လီၣ်ဖျါ ၂၁:၃, ၄.

ပှၤလၢအနာ်န့ၢ် ယဟိဝၤယွၤ လၢအမ့ၢ် ကစၢ်ယွၤလၢ အဒုးအိၣ်ထီၣ်​ လံာ်စီဆှံန့ၣ်​ အဝဲသ့ၣ်အါဂၤ ဒိးန့ၢ်ဘၣ်​ တၢ်ဂံၢ်တၢ်ဘါလၢ ကလဲၤခီဖျိ တၢ်သးအုးနးမးအဂီၢ်. အဝဲသ့ၣ်​ အိၣ်ဒီး တၢ်မုၢ်လၢ်လၢ အကထံၣ်ဘၣ်က့ၤ ပှၤလၢအအဲၣ်​ လၢအသံသဒၣ်အီၤ လၢအသီတဘျီ. အဒိ ပိာ်မုၣ်တဂၤ လၢအမံၤမ့ၢ် အဲၤန့ၣ်​ အထီၣ်ပှၢ်ဒီးအဝၤန့ၢ် ၆၅ နံၣ်​ ဒီးလၢခံအဝၤသံသဒၣ်အီၤ. အတဲဝဲလၢ “လံာ်စီဆှံ ပာ်ဖျါထီၣ်ဝဲလၢ ပှၤလၢပအဲၣ်​ လၢအသံသဒၣ်ပှၤန့ၣ်​ အဝဲသ့ၣ်​ တတူၢ်ဘၣ်တၢ်လၢၤဘၣ်​ ဒီးကစၢ်ယွၤ ကမၤသမူထီၣ်က့ၤ ပှၤသံခဲလၢာ်. ယမ့ၢ်သ့ၣ်နီၣ်ဘၣ်ယဝၤ လၢအသံသဒၣ်ယၤ တဘျီဂ့ၤတဘျီဂ့ၤန့ၣ်​ လံာ်စီဆှံ အတၢ်အၢၣ်လီၤ မၤစၢၤယၤအဃိ ယမ့ၢ်တူၢ်ဘၣ်​ တၢ်သးအုးနးမး သနာ်က့ ယလဲၤခီဖျိအီၤန့ၢ်.”

ထံနၤ လၢပဖးဘၣ်အဂ့ၢ် လၢတၢ်ဂ့ၢ်လၢ အပူၤကွံာ်န့ၣ်​ အတဲဝဲလၢ “စးထီၣ်လၢ ယဝၤသံ တနံၤဃီဃီ ဒီးဖဲယထံၣ်ဘၣ်​ တၢ်ကီတၢ်ခဲ နးမးအခါ ယတူၢ်ဘၣ်လၢ ယဟိဝၤယွၤ မၤစၢၤယၤအါမး. လံာ်စီဆှံ အတၢ်အၢၣ်လီၤ ဘၣ်ဃးဒီး တၢ်ဂဲၤဆၢထၢၣ်​ သမူထီၣ်က့ၤန့ၣ်​ ယနာ်သပှၢ်တၢၢ်. တၢ်အၢၣ်လီၤအံၤ မၤစၢၤယၤဒ်သိး ယကဆဲးလဲၤဆူညါ ဒီးယနာ်သပှၢ်တၢၢ်လၢ မုၢ်ကအိၣ်ဝဲတနံၤ ယကထံၣ်ဘၣ်က့ၤထံမိၤ လၢအသီတဘျီ.”

ပှၤအကကွဲၢ် လၢအနာ်န့ၢ် လံာ်စီဆှံ အတၢ်အၢၣ်လီၤန့ၣ်​ အတူၢ်ဘၣ်ဝဲဒ် အဲၤ ဒီးထံနၤ တဲဝဲအသိး. ဘၣ်ဆၣ်​ နမ့ၢ်ဆိကမိၣ်လၢ တၢ်လၢလံာ်စီဆှံတဲဝဲန့ၣ်​ အဘျုးတအိၣ်ဘၣ်​ ဒီးအကဲ တၢ်ကလီကလီန့ၣ်​ ဃုသ့ၣ်ညါကွၢ်လၢ နကစၢ် ဒီးနကထံၣ်ဘၣ်လၢ လံာ်စီဆှံ အတၢ်အၢၣ်လီၤန့ၣ်​ အကဲဘျုးဒိၣ်မး. ဒီးဘၣ်သ့ၣ်သ့ၣ်​ နကထံၣ်လၢ လံာ်စီဆှံန့ၣ်​ အကဲဝဲ တၢ်မၤစၢၤ အဂ့ၤကတၢၢ်လၢ ပှၤလၢအတူၢ်ဘၣ်​ တၢ်သးအုးနးမးအဂီၢ်.

ကွၢ်တၢ်ဂီၤမူ လၢအအိၣ်လၢ ပဝဲးပဆဲး jw.org အပူၤ. ဆီၣ်လီၤ လံာ်လဲၢ်တဖၣ်​ >Videos

ဖဲပှၤသံအခါ တၢ်ကမၤအသးဒီး အဝဲသ့ၣ်ဒ်လဲၣ်

နအဲၣ်ဒိးသ့ၣ်ညါ တၢ်သးခုကစီၣ်ဧါ