လံာ်စီဆှံတဲဝဲလၢ– “အဝဲ [ကစၢ်ယွၤ] မၤဂ့ၤတၢ်အဃိလီၤ. အဝဲဒုးစူၤလီၤတၢ်လၢ မူခိၣ်လၢသုဂီၢ် ဒီးဒုးသၣ်ထီၣ်​ တၤသူတၤသၣ်​ ဘၣ်ဆၢဘၣ်ကတီၢ်, အဝဲဟ့ၣ်သု တၢ်အီၣ်တၢ်အီ အါအါဂီၢ်ဂီၢ် ဒီးမၤပှဲၤသုသးလၢ တၢ်သူၣ်ဖှံသးညီလီၤ.”—မၤတၢ် ၁၄:၁၇.

အဲၣ်ဒိးတဲဝဲလၢ– ကယဲၢ်တၢ်လၢ ပဒိးန့ၢ်ဘၣ်လၢ န့ဆၢၣ်​ တၢ်ဘၣ်တ့န့ၣ်​ မ့ၢ်တၢ်ဟ့ၣ်လၢ အဟဲလၢ တၢ်ဘၣ်တ့ကစၢ်အအိၣ်. ဒီးဖဲနသ့ၣ်ညါထီၣ်လၢ တၢ်ဘၣ်တ့ကစၢ် လၢအသးအိၣ်ဟ့ၣ်တၢ် တဂၤ အဲၣ်နၤထဲလဲၣ်အခါ နကပာ်လုၢ်ပာ်ပှ့ၤ တၢ်ဟ့ၣ်တဖၣ်အံၤဒိၣ်မး.

လံာ်စီဆှံတဲဝဲလၢ– “နကနၢ်ပၢၢ် တၢ်လၢအတီအလိၤ, တၢ်စံၣ်ညီၣ်တီ ဒီးတၢ်လၢအကြၢးဝဲဘၣ်ဝဲ လၢအမ့ၢ် ကျဲလၢအဂ့ၤ.”—ကတိၤဒိ ၂:၉.

အဲၣ်ဒိးတဲဝဲလၢ– တၢ်လၢ အမၤသးခုနၤ မ့ၢ်မနုၤလဲၣ်န့ၣ်​ နတၢ်ဘၣ်တ့ကစၢ် သ့ၣ်ညါဝဲ အဂ့ၤကတၢၢ်. အဃိ နမ့ၢ်မၤလိလံာ်စီဆှံန့ၣ်​ နကသ့ၣ်ညါဘၣ်​ တၢ်ဂ့ၢ်ဒီဒူၣ်​ လၢအကမၤစၢၤနၤလၢ နတၢ်အိၣ်မူ ကိးနံၤဒဲး.

လံာ်စီဆှံတဲဝဲလၢ– “နကထံၣ်န့ၢ် တၢ်သ့ၣ်ညါ ဘၣ်ဃးဒီး ကစၢ်ယွၤ.”—ကတိၤဒိ ၂:၅.

အဲၣ်ဒိးတဲဝဲလၢ– ခီဖျိလၢ နသ့ၣ်ညါလၢ တၢ်ဘၣ်တ့ကစၢ် အိၣ်ဝဲအဃိ ကမၤစၢၤနၤလၢ နကသ့ၣ်ညါစ့ၢ်ကီး တၢ်သံကွၢ်အရ့ဒိၣ်တဖၣ်​ အတၢ်စံးဆၢ ဒ်သိးဒီး တၢ်အိၣ်မူ အတၢ်တိာ်ပာ်န့ၣ်​ မ့ၢ်မနုၤလဲၣ်. ဘၣ်မနုၤအဃိ တၢ်နးတၢ်ဖှီၣ်​ အိၣ်အါထဲအံၤညါလဲၣ်. ပမ့ၢ်သံန့ၣ်​ တၢ်ကကဲထီၣ်သးဒီးပှၤဒ်လဲၣ်. ဒီးနကထံၣ်န့ၢ် တၢ်စံးဆၢလၢ အလီၤသူၣ်မံသးမုာ်လၢ လံာ်စီဆှံပူၤ.

လံာ်စီဆှံတဲဝဲလၢ– “ယဟိဝၤယွၤ တဲဝဲလၢ ‘တၢ်လၢ ယကမၤန့ၢ်သုန့ၣ်​ ယသ့ၣ်ညါအီၤ လီၤတံၢ်လီၤဆဲးလီၤ. ယကဟ့ၣ်သု တၢ်မုာ်တၢ်ခုၣ်​ ဒီးတမ့ၢ် တၢ်ကီတၢ်ခဲဘၣ်. ဒီးယကဟ့ၣ်သု တၢ်မုၢ်လၢ် ဒီးတၢ်အိၣ်မူလၢ အဂ့ၤလၢ ခါဆူညါ.’”—ယံးရမံယၤ ၂၉:၁၁.

အဲၣ်ဒိးတဲဝဲလၢ– ကစၢ်ယွၤ အၢၣ်လီၤပာ်စၢၤပှၤလၢ ခါဆူညါန့ၣ်​ အကမၤလီၤမၢ်ကွံာ် တၢ်အၢတၢ်သီ, တၢ်နးတၢ်ဖှီၣ်​ ဒီးတၢ်သံ ခဲလၢာ်ခဲဆ့. အဃိ နမ့ၢ်နာ်န့ၢ် ကစၢ်ယွၤ အတၢ်အၢၣ်လီၤ လၢကဟဲလၢပှဲၤထီၣ်​ လၢခါဆူညါန့ၣ်​ ကမၤစၢၤနၤလၢ နလဲၤခီဖျိ တၢ်ကီတၢ်ခဲလၢ နထံၣ်ဘၣ်ခဲအံၤ လၢတၢ်သးဒူအပူၤ ကဘူၣ်.