ဘၣ်မနုၤအဃိ ပကဘၣ် ပာ်ကဲပှၤဂၤလဲၣ်

• လံာ်စီဆှံ တဲဝဲလၢ “ပှၤစံးဆၢတၢ် မုာ်မုာ်န့ၣ် မၤခုၣ်လီၤ တၢ်သးဒိၣ်လီၤ. မ့မ့ၢ် တၢ်ကတိၤလၢ အဆူၣ်အကိၤန့ၣ် ထိၣ်ဟူးထိၣ်ဂဲၤထီၣ် တၢ်သးထီၣ်.” (ကတိၤဒိ ၁၅:၁) တၢ်လၢနတဲ ဒီးတၢ်လၢနမၤတဖၣ် မ့ၢ်တဖျါလီၤပာ်ကဲဘၣ်န့ၣ် လီၤဂာ်ဒ်သိးဒီး နလူလီၤသိလၢ မ့ၣ်အူကကဲၤဒိၣ်ထီၣ်အဂီၢ်. အဃိ တၢ်အိၣ်သးန့ၣ် ကနးဒိၣ်ထီၣ်.

• ယ့ၣ်ၡူး တဲဝဲလၢ “ဒ်တၢ်အိၣ်လၢ ပသးပူၤအသိးန့ၣ် ပတဲထီၣ်အီၤ.” (မးသဲ ၁၂:၃၄) တၢ်လၢပတဲန့ၣ် အပာ်ဖျါထီၣ် ပတၢ်တူၢ်ဘၣ်နီၢ်ကီၢ်ကီၢ်. အဃိ ဖဲပတဲတၢ်ဒီး ပှၤလၢအကလုာ်ဒူၣ်, အတၢ်ဆဲးတၢ်လၤ ဒီးအဒိၣ်ထီၣ်တၢ်လီၢ် တဒ်သိးဒီးပှၤဘၣ်အခါ ပမ့ၢ်တတဲတၢ်ဒီး အဝဲသ့ၣ်လၢ တၢ်ပာ်ကဲဘၣ်န့ၣ် ပတအိၣ်ဒီး တၢ်ပာ်သူၣ်ပာ်သး လၢအဂ့ၤ လၢအဝဲသ့ၣ်ဖီခိၣ်ဘၣ်.

  ပူၤကွံာ်တယံာ်ဒံးဘၣ်န့ၣ် ပှၤဃုသ့ၣ်ညါတၢ်တဖု ပာ်ဖျါထီၣ်ဝဲ ပှၤအဂၤ ၃၂,၀၀၀ ဘျဲၣ် လၢအအိၣ်လၢ ထံကီၢ် ၂၈ ဘ့ၣ် အတၢ်ထံၣ် ဘၣ်ဃးဒီး တၢ်ပာ်ကဲ. ပှၤလၢ အဝဲသ့ၣ်အကျါ ၆၅ မျးကယၤန့ၣ် တဲဝဲလၢ ဆၢကတီၢ်ခဲအံၤ ပှၤတပာ်ကဲလိာ်သး အါအါလၢၤဘၣ်.

 နပာ်ဖျါထီၣ်လၢ နပာ်ကဲပှၤဂၤ ကသ့ဒ်လဲၣ်

နတၢ်ထံၣ် မ့ၢ်တဒ်သိးဒီးပှၤဂၤဘၣ် သနာ်က့ ပာ်ဖျါထီၣ် တၢ်ပာ်ကဲလၢ ပှၤခဲလၢာ်အဖီခိၣ်. ဆိကမိၣ်ထီၣ် တၢ်ဂ့ၢ်တမံၤမံၤလၢ နသးကလီၤပလိာ်ဒီး အဝဲသ့ၣ်. နမ့ၢ်မၤဒ်န့ၣ်န့ၣ် ကမၤစၢၤနၤဒ်သိး နကအိၣ်ဒီး တၢ်ထံၣ်အဂ့ၤ လၢပှၤဂၤအဖီခိၣ် ဒီးနတစံၣ်ညီၣ် ပှၤဂၤဘၣ်.

ရ့ဒီးပှၤဂၤ ဒ်သိးနအဲၣ်ဒိးလၢ ပှၤကရ့နၤ. နမ့ၢ်ပာ်ဖျါထီၣ် တၢ်ဒိသူၣ်ဒိသး ဒီးနၢ်ပၢၢ်စၢၤ ပှၤဂၤန့ၣ် အဝဲသ့ၣ် ကက့ၤရ့နၤ ဒ်န့ၣ်စ့ၢ်ကီး.

သးအိၣ်ပျၢ်ကွံာ် ပှၤတၢ်ကမၣ်. တၢ်လၢပှၤတဂၤတဲဝဲ ဒီးမၤဝဲတဖၣ် မ့ၢ်မၤဘၣ်ဒိနသးန့ၣ် ကွၢ်ကပာ်ကွံာ် အတၢ်ကမၣ် ဒီးဂုာ်ကျဲးစၢး နၢ်ပၢၢ်စၢၤအီၤလၢ အတအဲၣ်ဒိး မၤဝဲဒ်န့ၣ်ဘၣ်.