ပှၤရၤလီၤဘီမုၢ်တၢ်သးခုကစီၣ်ဖိ အတၢ်မၤနီၣ်မၤဃါ
ပှၤရၤလီၤဘီမုၢ်တၢ်သးခုကစီၣ်ဖိ အတၢ်မၤနီၣ်မၤဃါ
အဝဲထံၣ်န့ၢ် တၢ်အိၣ်မူအိၣ်ဒီးအခီပညီ
ယ့ၣ်ၡူးတဲဝဲလၢ အဝဲသ့ၣ်ညါဝဲ အသိတဖၣ်အဂ့ၢ်ဂ့ၤဂ့ၤ. (ယိၤဟၣ် ၁၀:၁၄) ပှၤလၢ အသူၣ်ဂ့ၤသးဝါ ဒီးအဲၣ်တၢ်မုာ်တၢ်ခုၣ်ဒီးတၢ်တီတၢ်လိၤန့ၣ် ဖဲအထံၣ်ဝဲ ယ့ၣ်ၡူးအပျဲၢ်အဘီၣ်တဖၣ်အခါ အဘၣ်သူၣ်ဘၣ်သးဒိၣ်မး. ပှၤဒ်န့ၣ်သ့ၣ်တဖၣ်န့ၣ် ထံၣ်န့ၢ်က့ၤတၢ်အိၣ်မူလၢ အိၣ်ဒီးအခီပညီ. ပိာ်မုၣ်တဂၤလၢ အအိၣ်လၢ ကီၢ်ဘဲ(လ်)လကၠံၤယၢၤန့ၣ် လဲၤခီဖျိဘၣ်ဝဲဒ်န့ၣ်. အအံၤမ့ၢ်အတၢ်လဲၤခီဖျိ-
“ဖဲယသးဟးဂီၤအဆၢကတီၢ် ဒီးယပာ်လီၤယသးလၢ ယကမၤသံလီၤယသးအခါ ယဟိဝၤပှၤအုၣ်အသး ဟဲဒိတကျိာ်ဝဲယတြဲၤ. ဒီးယဟိဝၤပှၤအုၣ်အသးတဖၣ်န့ၣ် တဲပၠးယၤလၢ မုၢ်ကအိၣ်တနံၤန့ၣ် ဟီၣ်ခိၣ်လၢအပှဲၤဒီး တၢ်ကီတၢ်ခဲတဘ့ၣ်အံၤ အတၢ်အိၣ်သးကဂ့ၤထီၣ်ဝဲ. ဖဲအဝဲသ့ၣ် တဲပၠးယၤကၠါန့ၣ်အခါ ယကနၣ်ဘၣ်ယသးမုာ်မး. သနာ်က့ အဝဲသ့ၣ်တဲလၢ ဟီၣ်ခိၣ်တၢ်အိၣ်သးအံၤကဂ့ၤထီၣ် မ့ၢ်လၢ ကစၢ်ယွၤကမၤဘၣ်ဂီၢ်ထီၣ်က့ၤဝဲ. ဖဲအဝဲသ့ၣ်တဲလၢ ကစၢ်ယွၤကမၤဝဲအခါ ယကနၣ်တမုာ်နီတစဲးဘၣ်. ဘၣ်မနုၤအဃိလဲၣ်န့ၣ် ယၤန့ၣ် ယတလဲၤထီၣ်သရိာ်ဘၣ် အိၣ်ဝဲဃိးနံၣ်လံ မ့ၢ်လၢ ယထံၣ်ဘၣ် ပှၤဖဲန့ၣ်တဖၣ် တမၤထွဲဝဲဒ် အဝဲသ့ၣ်တဲဝဲအသိးဘၣ်. မ့မ့ၢ် ယဟိဝၤပှၤအုၣ်အသးတဖၣ်န့ၣ် တမ့ၢ်ကၠါန့ၣ်ဘၣ်. ဖဲယတဲသကိးတၢ်ဒီး အဝဲသ့ၣ်အခါ ယသ့ၣ်ညါလၢ အဝဲသ့ၣ်န့ၣ် အိၣ်ဒီးတၢ်မ့ၢ်တၢ်တီ. ဖဲန့ၣ်န့ၣ် ယသ့ၣ်ညါလီၤက့ၤယသးလၢ ယမ့ၢ်တနာ်ကစၢ်ယွၤဒု တကဲထီၣ်ဘၣ်.
“ယဟိဝၤပှၤအုၣ်အသးတဖၣ် ဟဲအိၣ်သကိးယၤ တဘျုးဘျီဝံၤအလီၢ်ခံ ယတၢ်ဆဲးကျိးဒီးအဝဲသ့ၣ် လီၤမၢ်ဝဲအဃိ ယသးတမုာ်ဘၣ်. ဒီးဖဲန့ၣ် ယသးဟးဂီၤဒိၣ်ထီၣ် အဃိတနံၤတနံၤန့ၣ် ယအီမိာ်လၢာ်ဝဲ ခံဘိၣ်ညါ ဒီးယစးထီၣ်သူစ့ၢ်ကီး တၢ်မူၤတၢ်ဘှီး. ဖဲန့ၣ်အဆၢကတီၢ် ယဖုန့ၣ်သံဝဲ ဒီးမ့ၢ်လၢ ယသးသယုၢ်ဘၣ်ယဖု ဒီးယအဲၣ်ဒိး တဲတၢ်ဒီးအီၤအဃိ ယစးထီၣ်ဆဲးကျိးဒီး တၢ်ဝံတၢ်နါ. မ့ၢ်လၢ ယမၤဒ်န့ၣ်အဃိ ဖဲမုၢ်နၤခီ ယအိၣ်ထဲတဂၤအခါ တၢ်ဝံတၢ်နါ မၤတံာ်တာ်ယၤနးမး. တၢ်မၤသးဒီးယၤဒ်န့ၣ် တဘျုးလါညါ. ယမ့ၢ်အိၣ်ထဲတဂၤန့ၣ် တနၤတနၤန့ၣ်ယပျံၤတၢ်ညါ.
“ဘၣ်တနံၤ ဖဲယလဲၤဟးအခါ ယတလဲၤလၢကျဲလၢ ယလဲၤညီနုၢ်အီၤတဘိဘၣ်. ယလဲၤက့ၤလၢ ကျဲအဂၤတဘိ ဒီးဖဲန့ၣ်ယထံၣ်ဘၣ် ပှၤသူၣ်ထီၣ်ဝဲ တၢ်သူၣ်ထီၣ်ဖးဒိၣ်တဖျၢၣ်. ယထံၣ်ဘၣ် ပှၤအိၣ်ဖဲန့ၣ်ဒီဒူၣ်အဃိ ယကမၢကမၣ်ဒိၣ်မး. ဖဲယဟဲဘူးထီၣ်အခါ ယထံၣ်ဘၣ်လၢ အဝဲသ့ၣ်မ့ၢ်ဝဲ ယဟိဝၤပှၤအုၣ်အသးတဖၣ်လၢ အတ့ထီၣ်သကိး ဘီမုၢ်ဘျီၣ်ဒိၣ်. ဖဲန့ၣ်န့ၣ် ယက့ၤနီၣ်ထီၣ်ဘၣ်က့ၤလၢ အပူၤကွံာ်န့ၣ် ယဟိဝၤပှၤအုၣ်အသးတဖၣ် ဟဲအိၣ်သကိးယၤ လၢယဟံၣ်. ဒီးယဆိကမိၣ်ထီၣ်ဘၣ်လၢ ဟီၣ်ခိၣ်ဒီဘ့ၣ်န့ၣ် ပှၤမ့ၢ်အိၣ်ဒ် ယဟိဝၤပှၤအုၣ်အသးအသိးဒု ကမုာ်ဖးဒိၣ်ညါ.
“ယဆၢမုၢ်လၢ်လၢ ယဟိဝၤပှၤအုၣ်အသးတဖၣ် မ့ၢ်ဟဲအိၣ်သကိးကဒါက့ၤယၤ လၢယဟံၣ် ဒ်လၢညါအသိးဒု ကမုာ်ဝဲသၢၤ. အဃိ ယလဲၤတဲတၢ်ဒီး ပှၤလၢအမၤတၢ်လၢ တၢ်အိၣ်ဖှိၣ်အလီၢ် ဖဲန့ၣ်တဖၣ်. လၢခံ ယဃ့ထုကဖၣ် လၢကစၢ်ယွၤအအိၣ် ဒီးအသီတဆံဝံၤအလီၢ်ခံ ပှၤတဂၤဃီလၢ အဟဲလၢယဟံၣ်လၢညါန့ၣ် ဟဲကဒါက့ၤလၢယဟံၣ်. အဝဲတဲယၤလၢ ပမ့ၢ်က့ၤဆဲးမၤလိကဒါက့ၤ လံာ်စီဆှံဒုကဂ့ၤ. အဃိ ယတူၢ်လိာ် အတၢ်ဟ့ၣ်ကူၣ် လၢတၢ်သးခုအပူၤလီၤ. ဖဲန့ၣ်တဘျီဃီ အဝဲကွဲယၤလၢ ယကလဲၤထီၣ် တၢ်အိၣ်ဖှိၣ် လၢဘီမုၢ်ဘျီၣ်ဒိၣ်. ယအၢၣ်လီၤအီၤလၢ ယကလဲၤထီၣ်. ဖဲယလဲၤတုၤလၢ ဘီမုၢ်ဘျီၣ်ဒိၣ်အခါ ယကမၢကမၣ်ညါ မ့ၢ်လၢ ပှၤဖဲန့ၣ်တဖၣ် အဲၣ်လိာ်အသး တဂၤဒီးတဂၤ ဒီးသူၣ်ဖှံသးညီဂ့ၤမး. ယဟးဃု ပှၤဒ်န့ၣ်တဖၣ် ဖးယံာ်လံ ဒီးခဲအံၤန့ၣ် ယထံၣ်န့ၢ်အဝဲသ့ၣ်လံ.
“ဖဲန့ၣ်ဝံၤအလီၢ်ခံ ယလဲၤထီၣ်တၢ်အိၣ်ဖှိၣ် ကိးနွံဒဲး ဒီးသၢနွံဝံၤအလီၢ်ခံ ယတအီမိာ်လၢၤဘၣ်. တကးဒံးဘၣ် ယတၢၤကွံာ် တၢ်ဝံတၢ်နါအလံာ်အလဲၢ် ဒီးတၢ်ဝံတၢ်နါ အတၢ်သးဝံၣ်ခဲလၢာ်. လၢခံ တၢ်ဝံတၢ်နါ မၤတံာ်တာ်ယၤ တန့ၢ်လၢၤဘၣ်. ဒီးယဆဲးဘှီဂ့ၤထီၣ်က့ၤ ယတၢ်အိၣ်မူ ဒီးယအိၣ်မူမၤထွဲဒ် လံာ်စီဆှံ အတၢ်သိၣ်တၢ်သီအဃိ သၢလါဝံၤအလီၢ်ခံ ယစးထီၣ်စံၣ်တဲၤတဲလီၤ ဘီမုၢ်တၢ်သးခုအကစီၣ်. ဒီးဃုလါဝံၤအလီၢ်ခံ ယဒိးဘျၢထံ. ဖဲယဒိးဘျၢထံ ခံသီဝံၤအလီၢ်ခံ ယစးထီၣ်မၤ ပှၤလဲၤလၢညါမၤစၢၤတၢ်.
“ယဟိဝၤယွၤ မၤန့ၢ်တၢ်လၢယဂီၢ် အါမးအဃိ ယစံးဘျုးအီၤဒိၣ်မး. အခဲအံၤ ယတၢ်အိၣ်မူ ပှဲၤဒီးအခီပညီလံ. တကးဒံးဘၣ် ယဟိဝၤယွၤအမံၤန့ၣ် မ့ၢ်ဝဲ တၢးထီလၢအကျၢၤတဖျၢၣ် အဃိ ယဒိးန့ၢ်ဘၣ် တၢ်ဘံၣ်တၢ်ဘၢ ဒီးတၢ်ဒီသဒၢလံ. (ကတိၤဒိ ၁၈:၁၀) ယတူၢ်ဘၣ်ဒ် ပှၤကွဲးစံးထီၣ်ပတြၢၤတဂၤ တဲဝဲလၢ စံးထီၣ်ပတြၢၤ ၈၄:၁၀ လၢ ‘ပအိၣ်ပဆိးလၢ နဂၢၤတဖၣ်အပူၤမုၢ်တနံၤ, ဂ့ၤန့ၢ်ပအိၣ်လၢအဂၤတပူၤ အနံၤတကထိန့ၣ်တက့ၢ်လီၤ. ယဃုထၢ တၢ်ပၢၤကျဲစၢၤအလီၢ်လၢ ယကစၢ်အဟံၣ်ပူၤန့ၣ် ဒိၣ်န့ၢ်ယအိၣ်ယဆိးလၢ ပှၤတတီတလိၤ အဒဲတဖၣ်အပူၤန့ၣ်တက့ၢ်လီၤ.’”
ပိာ်မုၣ်လၢ အိၣ်ဒီးတၢ်သးစူၤတဂၤ ထံၣ်န့ၢ်ဝဲတၢ်အိၣ်မူ လၢအိၣ်ဒီးအခီပညီ. အဃိ ပှၤတဂၤဂ့ၤတဂၤဂ့ၤ အတၢ်ပာ်သူၣ်ပာ်သး မ့ၢ်ဂ့ၤန့ၣ် အဃုထံၣ်န့ၢ် ယဟိဝၤယွၤသ့.