ပှၤဖးလံာ်ဖိတဖၣ် အတၢ်သံကွၢ်
ပှၤဖးလံာ်ဖိတဖၣ် အတၢ်သံကွၢ်
ဖဲ ၂ ကရံၣ်သူး ၆:၁၄ စီၤပီလူးတဲဝဲ တၢ်ကတိၤလၢအမ့ၢ် “ပှၤလၢ အတစူၢ်တနာ်တၢ်ဘၣ်တဖၣ်” န့ၣ်အအဲၣ်ဒိး တဲဝဲဘၣ်ဃးဒီးမတၤသ့ၣ်တဖၣ်လဲၣ်
ဖဲ ၂ ကရံၣ်သူး ၆:၁၄ န့ၣ်တဲဝဲလၢ “သုတဘၣ်ယိး နီၣ်ယိးဘိဖုၣ်ထံၣ်ဖုၣ်ထီဒီး ပှၤလၢ အတစူၢ်တနာ်တၢ်ဘၣ် တဖၣ်န့ၣ်တဂ့ၤ.” ဖဲအံၤစီၤပီလူး သူဝဲတၢ်ကတိၤတဖျၢၣ်လၢအမ့ၢ် ပှၤလၢအတစူၢ်တနာ်တၢ်ဘၣ်. ဒီးပမ့ၢ်ကွၢ် တၢ်ကတိၤတဖျၢၣ်အံၤ အလီၢ်ခံဒီးအမဲာ်ညါန့ၣ် ဖျါၡဲၡဲလၢ စီၤပီလူး အဲၣ်ဒိးတဲဝဲပှၤသ့ၣ်တဖၣ်လၢ အတအိၣ်လၢ ခရံာ်ဖိအတၢ်အိၣ်ဖှိၣ်အပူၤဘၣ်. ဘၣ်မနုၤအဃိ ပနၢ်ပၢၢ်ဒ်အံၤလဲၣ်. ပကထိၣ်သတြီၤကွၢ် လံာ်စီဆှံအဆၢ လၢအဂၤတဖၣ်လၢ စီၤပီလူး သူဝဲတၢ်ကတိၤ လၢအမ့ၢ် “ပှၤလၢ အတစူၢ်တနာ်တၢ်ဘၣ်တဖၣ်” လီၤ.
အဒိ ဖဲ ၁ ကရံၣ်သူး ၆:၆ န့ၣ် “ပှၤလၢ အတစူၢ်တနာ်တၢ်တဖၣ်” ကဲဝဲစံၣ်ညီၣ်ကွီၢ်လၢ ဝ့ၢ်ကရံၣ်သူးအပူၤ ဒီးစီၤပီလူးသိၣ်ဝဲ ခရံာ်ဖိတဖၣ်ဆူၣ်ဆူၣ်ခီဖျိလၢ အဝဲသ့ၣ်လဲၤကိးထီၣ်လိာ်သးလၢ စံၣ်ညီၣ်ကွီၢ်အရူလၢ ပှၤလၢ အတစူၢ်တနာ်တၢ်ဘၣ်တဖၣ် ကစံၣ်ညီၣ်န့ၢ်တၢ်လၢ အဝဲသ့ၣ်အဂီၢ်. (၁ ကရံၣ်သူး ၆:၆) ဒီးဖဲစီၤပီလူး ကွဲးန့ၢ်ဝဲ ခရံာ်ဖိလၢ ဝ့ၢ်ကရံၣ်သူး လံာ်ခံဘ့ၣ်တဘ့ၣ်အခါ စီၤပီလူးတဲဝဲလၢ မုၣ်ကီၤလံၢ်န့ၣ် အမၤခံးဝဲ “ပှၤလၢ အတစူၢ်တနာ်တၢ်ဘၣ်တဖၣ် . . . အသး” လီၤ. ဒီးမ့ၢ်လၢ ပှၤသ့ၣ်တဖၣ်အံၤန့ၣ် အမဲာ် “ကျၢၢ်ဘၢ” ဒံးသးအဃိ အဝဲသ့ၣ် တတူၢ်လိာ် တၢ်သးခုကစီၣ်ဘၣ် ဒီးတသးအိၣ် ဘူၣ်ထီၣ်ဘါထီၣ် ယဟိဝၤယွၤဒံးဘၣ်. ဘၣ်ဆၣ် စီၤပီလူး ပာ်ဖျါထီၣ်ဝဲလၢ “ဖဲပှၤတဂၤဂၤ ဃၣ်ဃီၤအသးလၢ ယဟိဝၤယွၤ အအိၣ်အခါ နီၣ်ကျၢၢ်ဘၢတၢ်န့ၣ် ဘၣ်တၢ်ထုးကွံာ်အီၤလီၤ.”—၂ ကရံၣ်သူး ၃:၁၆; ၄:၄.
ပှၤလၢ အတစူၢ်တနာ်တၢ်ဘၣ်တနီၤန့ၣ် အဝဲသ့ၣ် မၤတၢ်တတီတလိၤ ဒီးဘူၣ်ထီၣ်ဘါထီၣ် တၢ်ဂီၤတၢ်ဖှီၣ်. (၂ ကရံၣ်သူး ၆:၁၅, ၁၆) ဘၣ်ဆၣ် ပှၤလၢ အတစူၢ်တနာ်တၢ်ဘၣ်တဖၣ်န့ၣ် အတမ့ၢ် ပှၤလၢအထီဒါ ယဟိဝၤယွၤ အခ့အပှၤ ကိးဂၤဒဲးဘၣ်. ပမ့ၢ်ကွၢ်န့ၣ် အဝဲသ့ၣ် တနီၤနီၤန့ၣ် အသးအိၣ် တၢ်မ့ၢ်တၢ်တီ. ဒီးပထံၣ်ဘၣ်စ့ၢ်ကီးလၢ အဝဲသ့ၣ်အါဂၤန့ၣ် အမါ မ့တမ့ၢ် အဝၤကဲထီၣ် ခရံာ်ဖိ သနာ်က့ အဝဲသ့ၣ် တပာ်တ့ၢ်ကွံာ်အီၤဘၣ်. (၁ ကရံၣ်သူး ၇:၁၂-၁၄; ၁၀:၂၇; ၁၄:၂၂-၂၅; ၁ ပ့းတရူး ၃:၁, ၂) အဃိ စီၤပီလူး သူဝဲတၢ်ကတိၤလၢအမ့ၢ် “ပှၤလၢ အတစူၢ်တနာ်တၢ်ဘၣ်” န့ၣ်အအဲၣ်ဒိးတဲဝဲ ပှၤသ့ၣ်တဖၣ်န့ၣ်လီၤ. ပှၤသ့ၣ်တဖၣ်န့ၣ် အတမ့ၢ်ပှၤလၢ “အစူၢ်က့ၤနာ်က့ၤ ကစၢ်” ဒီးအိၣ်လၢ တၢ်အိၣ်ဖှိၣ်အပူၤဒံးဘၣ်.—မၤတၢ် ၂:၄၁; ၅:၁၄; ၈:၁၂, ၁၃.
လံာ်စီဆှံ အတၢ်ဟံးစုနဲၣ်ကျဲဖဲ ၂ ကရံၣ်သူး ၆:၁၄ န့ၣ်ကဲဘျုးလၢ ခရံာ်ဖိအတၢ်အိၣ်မူ ကိးသနၢၣ်ဒဲး လီၤဆီဒၣ်တၢ် ခရံာ်ဖိလၢ အကဆီဟံၣ်ဆီဃီ သ့ၣ်တဖၣ်အဂီၢ်. (မးသဲ ၁၉:၄-၆) အဒိ ပသ့ၣ်ညါဘၣ်လၢ ပှၤလၢ အတစူၢ်တနာ်တၢ်ဘၣ်တဖၣ်န့ၣ် အလုၢ်လၢ်သကဲာ်ပဝး, အတၢ်တိာ်ပာ် ဒီးအတၢ်စူၢ်တၢ်နာ် လီၤဆီလိာ်သးဒီး ခရံာ်ဖိလၢ အမ့ၢ်အတီအဃိ ခရံာ်ဖိလၢ အဒိးဘျၢထံဝံၤတဂၤန့ၣ် အတကြၢးဖျီသးဒီးအီၤဘၣ်.
ဘၣ်ဆၣ် မ့မ့ၢ်ပှၤစံၣ်တဲၤတဲလီၤတၢ်ဖိလၢ အတဒိးဘျၢဘၣ်ထံဒံးဘၣ် ဒီးပှၤလၢ အမၤလိလံာ်စီဆှံ ဒီးထီၣ်တၢ်အိၣ်ဖှိၣ် သ့ၣ်တဖၣ်န့ၣ် အဝဲသ့ၣ်ကဲ ပှၤလၢ အတစူၢ်တနာ်တၢ်ဘၣ်တဖၣ်ဧါ. တမ့ၢ်ဘၣ်. အဝဲသ့ၣ်န့ၣ် တူၢ်လိာ်တၢ်သးခုကစီၣ် ဒီးဂုာ်ကျဲးစၢး ဒ်သိးကတုၤထီၣ်ထီၣ်ဘး လၢကဒိးဘျၢထံအဂီၢ် အဃိ ပတကြၢးကိးအဝဲသ့ၣ်လၢ ပှၤလၢ အတစူၢ်တနာ်တၢ်တဖၣ်ဘၣ်. (ရိမ့ၤ ၁၀:၁၀; ၂ ကရံၣ်သူး ၄:၁၃) အဒိ တချုးလၢ စီၤကန့လံး ဒိးဘျၢဘၣ်ထံဒံးဘၣ်န့ၣ် လံာ်စီဆှံပာ်ဖျါထီၣ်ဝဲလၢ “အဝဲမ့ၢ်ပှၤတဂၤလၢ အယူးယီၣ် ကစၢ်ယွၤ” ဒီး “ပျံၤကစၢ်ယွၤလီၤ.”—မၤတၢ် ၁၀:၂.
ဖဲ ၂ ကရံၣ်သူး ၆:၁၄ စီၤပီလူး တဲဝဲတၢ်ကတိၤလၢအမ့ၢ် ပှၤလၢ အတစူၢ်တနာ်တၢ်ဘၣ်တဖၣ်န့ၣ် အဝဲတအဲၣ်ဒိးတဲဝဲ ပှၤစံၣ်တဲၤတဲလီၤတၢ်ဖိ လၢအတဒိးဘျၢဘၣ်ထံတဖၣ်န့ၣ်ဘၣ်. ဘၣ်ဆၣ် ခရံာ်ဖိလၢ အဒိးဘျၢထံဝံၤတဂၤ မ့ၢ်ပာ်တၢ်အဲၣ်တီ မ့တမ့ၢ် ဖျီသးဒီး ပှၤစံၣ်တဲၤတဲလီၤတၢ်ဖိ လၢအတဒိးဘျၢဘၣ်ထံဒံးဘၣ်တဂၤန့ၣ် မ့ၢ်အကြၢးစ့ၢ်ကီးဧါ. တကြၢးဘၣ်. ဘၣ်မနုၤအဃိ ပတဲဒ်အံၤလဲၣ်န့ၣ် မ့ၢ်လၢ စီၤပီလူး ဟ့ၣ်ကူၣ်ဝဲ ခရံာ်ဖိမုၣ်ကမဲလၢ “အဝဲအိၣ်ဒီးတၢ်သဘျ့လၢ အကဖျီအသးဒီး ပိာ်ခွါတဂၤဂ့ၤ တဂၤဂ့ၤလၢ အဘၣ်သူၣ်ဘၣ်သးဝဲလီၤ. ဘၣ်ဆၣ် ကဘၣ်မ့ၢ်ပှၤတဂၤလၢ ကစၢ်အပူၤလီၤ.” (၁ ကရံၣ်သူး ၇:၃၉) ဒ်စီၤပီလူး ဟ့ၣ်ကူၣ်ဝဲအသိး ခရံာ်ဖိလၢ အဒိးဘျၢထံဝံၤတဂၤ မ့ၢ်အဲၣ်ဒိးဆီဟံၣ်ဆီဃီန့ၣ် အကဘၣ်ဆီဟံၣ်ဆီဃီဒီးပှၤလၢ အအိၣ်လၢ “ကစၢ်အပူၤလီၤ.”
ပှၤလၢ အအိၣ်လၢ “ကစၢ်အပူၤ” န့ၣ်အဲၣ်ဒိးတဲဝဲ အခီပညီဒ်လဲၣ်. ပှၤတဖၣ်အံၤ မ့ၢ်ပှၤဒ်လဲၣ်န့ၣ် ပထံၣ်ဘၣ်လၢ ရိမ့ၤ ၁၆:၈-၁၀ ဒီး ကလီးစဲ ၄:၇ လီၤ.
ဘၣ်ဆၣ် ပှၤတဂၤကဲထီၣ် “ကစၢ်အကုၢ်” လၢအခါဖဲလဲၣ်. ပှၤတဂၤကဲထီၣ် “ကစၢ်အကုၢ်” ဖဲအသးအိၣ်မၤတၢ် ဒ်ကုၢ်တဂၤအသိး ဒီးတအိၣ်မူဒ် အနီၢ်ကစၢ် တၢ်ဘၣ်သးလၢၤဘၣ် အခါလီၤ. အဃိ ယ့ၣ်ၡူး တဲဝဲလၢ “ပှၤလၢ အအဲၣ်ဒိးပိာ်ယခံ တဂၤဂၤန့ၣ် အတဘၣ်အိၣ်မူလၢ အနီၢ်ကစၢ်အဂီၢ်လၢၤဘၣ်. ဒီးအဘၣ်ယိးထီၣ် အတၢ်မၤအၢမၤနး အသ့ၣ်တၢၣ် ဒီးပိာ်ယခံ ထီဘိလီၤ.” (မးသဲ ၁၆:၂၄) ဖဲအံၤပာ်ဖျါထီၣ်ဝဲလၢ ပှၤလၢအပိာ် ယ့ၣ်ၡူးခရံာ်အခံ ဒီးအိၣ်မူဒ်ကစၢ်ယွၤ အတၢ်ဘၣ်သး အိၣ်ဝဲအသိးန့ၣ် အမ့ၢ်ပှၤလၢအဟ့ၣ်လုၢ်ထီၣ်အသးလၢ ကစၢ်ယွၤအအိၣ်လီၤ. ဒီးဖဲန့ၣ်ဝံၤအလီၢ်ခံ အကဒိးဘျၢထံ ဒီးကကဲထီၣ် ပှၤစံၣ်တဲၤတဲလီၤတၢ်ဖိတဂၤလၢ ကစၢ်ယွၤဘၣ်သူၣ်ဘၣ်သးဝဲလီၤ. * အဃိ တၢ်ကတိၤလၢအမ့ၢ် ‘ဖျီသးလၢ ကစၢ်အပူၤ’ န့ၣ်အဲၣ်ဒိးတဲဝဲ ပှၤတဂၤဖျီသးဒီးပှၤလၢ အစူၢ်က့ၤနာ်က့ၤတၢ်နီၢ်နီၢ်တဂၤ လၢအဟ့ၣ်လုၢ်ထီၣ်အသးဒ် “ကစၢ်ယွၤ ဒီးယ့ၣ်ၡူးခရံာ်အကုၢ်” အသိးလီၤ.—ယၤကိာ် ၁:၁.
ဖဲပထံၣ်ဘၣ် ပှၤတဂၤ မၤလိလံာ်စီဆှံဒီးယဟိဝၤပှၤအုၣ်အသး ဒီးလဲၤထီၣ်လဲၤထီ လၢနီၢ်သးတခီအခါ ဘၣ်ပသးမုာ်ဒိၣ်မး. ဘၣ်ဆၣ်န့ၣ် အဝဲတဟ့ၣ်လုၢ်ထီၣ်သးလၢ ယဟိဝၤယွၤအအိၣ် ဒီးမၤကစၢ်ယွၤ အတၢ်မၤဒံးဘၣ်. အဝဲကဘၣ်ဆဲးမၤဒံး တၢ်ဆီတလဲတနီၤဒံး. ဒ်သိး အဝဲကဆီတလဲအသး လၢာ်လၢာ်ဆ့ဆ့ ဒီးကကဲထီၣ်ခရံာ်ဖိလၢ အဟ့ၣ်လုၢ်ထီၣ်သးဒီး ကဒိးဘျၢထံအဂီၢ် အကဘၣ်မၤတၢ်ဆီတလဲဒီဒူၣ်. အဃိ ပှၤတဂၤ တချုးလၢအဆီဟံၣ်ဆီဃီဒံးဘၣ်န့ၣ် အဆိကတၢၢ် အကဘၣ်ဟ့ၣ်လုၢ်ထီၣ်အသးလၢ ကစၢ်ယွၤအအိၣ် ဒ်ခရံာ်ဖိတဂၤအသိး ဒီးဆီတလဲအတၢ်အိၣ်မူ မ့ၢ်ဝံၤမၣ် ကြၢးဆိမိၣ် တၢ်ဆီဟံၣ်ဆီဃီအဂ့ၢ်.
ခရံာ်ဖိလၢ အဒိးဘျၢထံဝံၤတဂၤ မ့ၢ်ပာ်တၢ်အဲၣ်တီဒီး ပှၤမၤလိလံာ်စီဆှံဖိတဂၤလၢ အလဲၤထီၣ်လဲၤထီလၢ နီၢ်သးတခီမီၤ, မ့ၢ်အကြၢးဧါ. အဒိ အဝဲကတဲလၢ ပှၤတဂၤအံၤဒိးဘျၢထံမ့ၢ်ဝံၤမၣ် ယကဖျီသးဒီးအီၤ. အဝဲမ့ၢ်တဲဝဲဒ်န့ၣ်န့ၣ် ကကြၢးဧါ. တကြၢးဘၣ်. ဘၣ်မနုၤအဃိလဲၣ်န့ၣ် ပှၤမၤလိလံာ်စီဆှံဖိတဂၤ မ့ၢ်သ့ၣ်ညါဝဲလၢ ခရံာ်ဖိလၢ အဒိးဘျၢထံဝံၤတဂၤ ကဖျီသးဒီးအီၤထဲဒၣ်လၢ အဒိးဘျၢထံဝံၤမၣ်ဒု ဘၣ်သ့ၣ်သ့ၣ် အကဂုာ်ကျဲးစၢး ဒိးဘျၢထံလၢ အကဖျီသးအဂီၢ် ဒီးတမ့ၢ်လၢ အအဲၣ်ကစၢ်ယွၤနီၢ်ကီၢ် အဃိဘၣ်.
ပှၤလၢ အကဲထီၣ် ပှၤစံၣ်တဲၤတဲလီၤတၢ်ဖိ လၢတဒိးဘျၢဘၣ်ထံတဂၤ ကတုၤထီၣ်ထီၣ်ဘးလၢ ကဒိးဘျၢထံအဂီၢ်န့ၣ် ညီနုၢ် တၢ်ဆၢကတီၢ်တယံာ် အါအါဘၣ်. အဃိ တၢ်ဟ့ၣ်ကူၣ်လၢအမ့ၢ် ပကဘၣ်ဆီဟံၣ်ဆီဃီ လၢကစၢ်အပူၤန့ၣ် တမ့ၢ်တၢ်လၢ အကီတလၢဘၣ်. အဒိ ပှၤလၢ အဒိၣ်ထီၣ်ဘၣ်လၢ တၢ်မ့ၢ်တၢ်တီပူၤတဂၤန့ၣ် အခါဘၣ်လၢ ကဖျီသးလံ. ဒီးအထီၣ်တၢ်အိၣ်ဖှိၣ်ဒီး ဟးစံၣ်တဲၤတဲလီၤတၢ် ဘၣ်ဆၣ် အမ့မ့ၢ်ဒံး ပှၤစံၣ်တဲၤတဲလီၤတၢ်ဖိ လၢအတဒိးဘျၢဘၣ်ထံဒံးဘၣ် တခီမီၤ. ဖဲန့ၣ်န့ၣ် တၢ်သံကွၢ် ကအိၣ်ထီၣ်လၢ တၢ်မနုၤထုးဃၢအီၤလၢ အကဟ့ၣ်လုၢ်ထီၣ်သးလၢ ယဟိဝၤယွၤအအိၣ် ဒီးဒိးဘျၢထံလဲၣ်. ဘၣ်မနုၤအဃိ အထုးယံာ် တၢ်ဆၢကတီၢ်လဲၣ်. မ့ၢ်လၢအသးဒ့ဒီ အဃိဧါ. အဝဲတမ့ၢ် ပှၤလၢအတစူၢ်တနာ်တၢ်တဂၤဘၣ် သနာ်က့ ပမ့ၢ်ဖျီသးဒီးအီၤန့ၣ် ပတဲလၢ ပဖျီသးဒီးပှၤလၢ အအိၣ်လၢ “ကစၢ်အပူၤ” န့ၣ်တသ့ဘၣ်.
ပမ့ၢ်မၤထွဲ စီၤပီလူး အတၢ်ဟ့ၣ်ကူၣ်လၢ ဘၣ်ဃးဒီး တၢ်ဆီဟံၣ်ဆီဃီန့ၣ် ပကန့ၢ်ဘၣ်အဘျုး. (ယၡါယၤ ၄၈:၁၇) အဒိ ပှၤခံဂၤလၢအကဖျီသးန့ၣ် မ့မ့ၢ်ပှၤလၢ အဟ့ၣ်လုၢ်ထီၣ်သးလၢ ယဟိဝၤယွၤအအိၣ် ဒီးအဒိးဘျၢထံဝံၤန့ၣ် အဝဲသ့ၣ်အနီၢ်သးကဆူၣ်အဃိ အတၢ်ဆီဟံၣ်ဆီဃီန့ၣ် ကဂၢၢ်ကျၢၤဝဲ. အဝဲသ့ၣ် အတၢ်နာ် ဒီးတၢ်တိာ်ပာ် လီၤဂာ်လိာ်သးအဃိ အဝဲသ့ၣ် ကအိၣ်ဒီးတၢ်သးခု. တကးဒံးဘၣ် ပှၤမ့ၢ် ဆီဟံၣ်ဆီဃီလၢ “ကစၢ်အပူၤ” န့ၣ်အပာ်ဖျါထီၣ်ဝဲလၢ အတီဒီးယဟိဝၤယွၤလီၤ. ဒီးလံာ်စီဆှံ ပာ်ဖျါထီၣ်ဝဲလၢ “ပှၤလၢအတီဒီး” ယဟိဝၤယွၤန့ၣ် ယဟိဝၤယွၤက “တီဒီးအီၤ”အဃိ အဝဲသ့ၣ်ကဒိးန့ၢ်ဘၣ် တၢ်ဆိၣ်ဂ့ၤလီၤထူလီၤယိာ်လီၤ.—စံးထီၣ်ပတြၢၤ ၁၈:၂၅.
[တၢ်ဂ့ၢ်အဘျဲၣ်]
^ လၢအခီၣ်ထံးန့ၣ် စီၤပီလူး ကွဲးဝဲလံာ်အံၤဆူ ပှၤလၢအဒိးဖှူသးသ့ၣ်တဖၣ်အအိၣ်. ဒီးအဝဲသ့ၣ်န့ၣ် ကဲဝဲ “ကစၢ်အကုၢ်” အဃိ အဝဲသ့ၣ်ကဲစ့ၢ်ကီးဝဲ ယွၤအဖိခွါတဖၣ် ဒီးယ့ၣ်ၡူးခရံာ် အဒီပုၢ်ဝဲၢ်ခွါတဖၣ်.
[တၢ်ဂ့ၢ်လၢ တၢ်ဂီၤအဖီလာ်]
“ပှၤလၢအတီဒီး” ယဟိဝၤယွၤန့ၣ် ယဟိဝၤယွၤက “တီဒီးအီၤ”