လံာ်စီဆှံ ဆီတလဲ ပတၢ်အိၣ်မူ
လံာ်စီဆှံ ဆီတလဲ ပတၢ်အိၣ်မူ
ပိာ်မုၣ်ဖိတဂၤ အတၢ်အိၣ်မူလၢ အနီၢ်ဆံးခါန့ၣ် နးဒိၣ်မး ဘၣ်ဆၣ် လၢခံ အအိၣ်ဒီး တၢ်အိၣ်မူ လၢအပှဲၤဒီးတၢ်သးခု ကၠါလဲၣ်. ပှၤမၤထံဂ့ၢ်ကီၢ်ဂ့ၢ် လၢအအဲၣ်တၢ်မၤဆူၣ်မၤစိးတဂၤ ကဲထီၣ်ပှၤစံၣ်တဲၤတဲလီၤတၢ်ဖိ လၢအသးဂ့ၤတဂၤ ကၠါလဲၣ်. နမ့ၢ်ဖး တၢ်ဂ့ၢ်လၢလာ်အံၤန့ၣ် နကသ့ၣ်ညါဘၣ် အတၢ်စံးဆၢ.
“ယဂုာ်ကျဲးစၢး ဟးဃု တၢ်အဲၣ်တၢ်ကွံဒီးတၢ်ကဟုကယာ် သပှၢ်ပှၢ်”—အဲနၤ လံၤနံနၤ
အိၣ်ဖျဲၣ်ထီၣ်— ၁၉၈၁
အိၣ်ဖျဲၣ်တၢ်လီၢ်— ကီၢ်ရၢၡါ
တၢ်လဲၤခီဖျိ— တၢ်အိၣ်မူလၢ ယနီၢ်ဆံးခါန့ၣ် နးဒိၣ်မး
ယတၢ်အိၣ်မူလၢ အပူၤကွံာ်— စးထီၣ်လၢ ယအိၣ်ဖျဲၣ်ထီၣ်လံၤလံၤန့ၣ် ယတနၢ်ဟူတၢ်ဘၣ်. ယမိယပါစ့ၢ်ကီး အဝဲသ့ၣ် တနၢ်ဟူတၢ်ဘၣ်. စးထီၣ်လၢ ယအိၣ်ဖျဲၣ်ထီၣ် ဒီးတုၤလၢ ယအိၣ်ဃုနံၣ်န့ၣ် ယတၢ်အိၣ်မူ လဲၤအသးဂ့ၤဂ့ၤလီၤ. ဒီးဖဲန့ၣ်ဝံၤအလီၢ်ခံ ယမိယပါလီၤဖး. အခါဖဲန့ၣ်န့ၣ် ယကဲဖိသၣ်ဒံးလီၤ ဘၣ်ဆၣ် ဘၣ်ဃးဒီးတၢ်လီၤမုၢ်လီၤဖးအဂ့ၢ်န့ၣ် ယနၢ်ပၢၢ်အီၤလံ. အဃိ တၢ်ကဲထီၣ်သးဒ်အံၤန့ၣ် ယသးဘၣ်ဒိဖးဒိၣ်ညါ. ယမိယပါလီၤဖးဝံၤအလီၢ်ခံ ယပါဒီးယကၠီန့ၣ် ဆဲးအိၣ်ဝဲဖဲ ဝ့ၢ်ထြိၤအံၣ်. မ့မ့ၢ် ယမိန့ၣ် လဲၤအိၣ်လၢ ခၠံၤလံၤယါဘံၤ ဒီးအလဲၤကိးဃုာ်ဒီးယၤ. လၢခံယမိဟံအဝၤလၢအသီ ဒီးအဝၤအံၤန့ၣ် အီသံးဆူၣ်မး ဒီးအမၤဒၢၣ် အမိဒီးယၤ တလီၢ်လီၢ်လီၤ.
ဖဲ ၁၉၉၃ န့ၣ်တၢ်ကဲထီၣ်သးလၢ အလီၤသးအုးတမံၤ. ယကၠီလီၤအုးသံ လၢထံကျါ. ဒီးဖဲန့ၣ်န့ၣ် ယမိစးထီၣ် အီသံး ဒီးအမၤအၢမၤနးယၤ ဒ်ယပါယၢ် အသိးလီၤ. ဒီးဒ်သိး ယတၢ်အိၣ်မူ ကပှဲၤဒီး တၢ်သးခု ဒီးယသးကမုာ်ထီၣ်က့ၤအဂီၢ် ယဂုာ်ကျဲးစၢး ဟးဃု တၢ်အဲၣ်တၢ်ကွံဒီးတၢ်ကဟုကယာ် သပှၢ်ပှၢ်. ယလဲၤထီၣ်ဘါတၢ်လၢ သရိာ်အဖျၢၣ်တဖၣ်အဖျၢၣ် ဘၣ်ဆၣ် ယတဒိးန့ၢ်အီၤဘၣ်.
လံာ်စီဆှံ ဆီတလဲ ယတၢ်အိၣ်မူ ကၠါလဲၣ်— ဖဲယသးနံၣ်အိၣ် ၁၃ နံၣ်အခါ ယသကိးမုၣ်လၢကၠိ လၢအမ့ၢ် ယဟိဝၤပှၤအုၣ်အသးတဂၤန့ၣ် တဲပၠးဘၣ်ယၤ တၢ်ဂ့ၢ်လၢ အအိၣ်လၢ လံာ်စီဆှံအပူၤ. ယသ့ၣ်ညါထီၣ်ဘၣ် ပှၤလၢအအိၣ်လၢ လံာ်စီဆှံအပူၤတဖၣ်န့ၣ် ယဘၣ်သူၣ်ဘၣ်သးအီၤ ဒိၣ်မး. အဒိ ဒ်သိးဒီး စီၤနိအၤဒီးစီၤယိၤဘးန့ၣ် အဝဲသ့ၣ် အတၢ်အိၣ်သးကီခဲဘၣ်ဆၣ် အဝဲသ့ၣ် ဆဲးဘူၣ်ထီၣ်ဘါထီၣ် ကစၢ်ယွၤ. လၢခံတယံာ်ဘၣ်န့ၣ် ယစးထီၣ်မၤလိ လံာ်စီဆှံဒီး ယဟိဝၤပှၤအုၣ်အသး ဒီးလဲၤထီၣ်တၢ်အိၣ်ဖှိၣ်ရိဖှိၣ်.
ယမၤလိ လံာ်စီဆှံအဃိ ယသ့ၣ်ညါထီၣ်ဘၣ် တၢ်မ့ၢ်တၢ်တီ လၢအလီၤထုးန့ၢ်သူၣ်ထုးန့ၢ်သး. အဒိ ဖဲယသ့ၣ်ညါလၢ ကစၢ်ယွၤန့ၣ် အိၣ်ဒီးအမံၤအခါ အထိးဘၣ် ယသးဒိၣ်မး. (စံးထီၣ်ပတြၢၤ ၈၃:၁၈) ဖဲယထံၣ် တၢ်အိၣ်သးလၢ မုၢ်မဆါတနံၤအံၤန့ၣ် ဟဲလၢထီၣ်ပှဲၤထီၣ်ဒ် လံာ်စီဆှံ တဲဆိပာ်စၢၤဝဲလၢ တၢ်ကကဲထီၣ်သး “လၢမုၢ်နံၤခံကတၢၢ်တဖၣ်” အသိးလီၤအခါ ထုးန့ၢ်ယသးဒိၣ်မး. (၂ တံၤမသ့း ၃:၁-၅) ဒီးဖဲယသ့ၣ်ညါထီၣ်ဘၣ်လၢ ပှၤလၢအသံသ့ၣ်တဖၣ်န့ၣ် အိၣ်ဒီးတၢ်မုၢ်လၢ်လၢ ကဂဲၤဆၢထၢၣ်သမူထီၣ်ကဒါက့ၤအခါ ဘၣ်ယသူၣ်ယသး မုာ်ဒိၣ်မး. ဖဲန့ၣ်အခါဒု ယကက့ၤထံၣ်ဘၣ်ကဒါက့ၤ ယကၠီလၢအသီတဘျီ.—ယိၤဟၣ် ၅:၂၈, ၂၉.
ဘၣ်ဆၣ် ယမိဒီးယပါယၢ်န့ၣ် တဘၣ်သူဘၣ်သး ယဟိဝၤပှၤအုၣ်အသးဘၣ် ဒီးယမၤလိလံာ်စီဆှံဒီး ယဟိဝၤပှၤအုၣ်အသးန့ၣ် အဝဲသ့ၣ် တဘၣ်သူၣ်ဘၣ်သးဝဲ စ့ၢ်ကီးဘၣ်. အဃိ အဝဲသ့ၣ် ဂုာ်ကျဲးစၢး မၤကီမၤခဲယၤ ဒ်သိးယကပတုာ်မၤလိ လံာ်စီဆှံ. ဘၣ်ဆၣ် တၢ်လၢယမၤလိဘၣ်သ့ၣ်တဖၣ်န့ၣ် ထုးန့ၢ်ယသးဒိၣ်မး အဃိ ယပာ်လီၤယသးလၢ ယတပတုာ်မၤလိ လံာ်စီဆှံဘၣ်.
ယဘၣ်လဲၤခီဖျိ ယဟံၣ်ဖိဃီဖိ တၢ်ထီဒုၣ်ထီဒါန့ၣ် တညီလၢယဂီၢ်ဘၣ်. တကးဒံးဘၣ် တၢ်လီၤသးအုး ကဲထီၣ်ကဒီးအသး လၢအသီတခါ. ယပုၢ်လၢ အလဲၤပိာ်ယခံလၢ တၢ်အိၣ်ဖှိၣ်ရိဖှိၣ်တဂၤန့ၣ် အလီၤအုးသံစ့ၢ်ကီးလီၤ. ဘၣ်ဆၣ် ယဟိဝၤပှၤအုၣ်အသးတဖၣ်န့ၣ် ဆီၣ်ထွဲမၤစၢၤယၤ ထီဘိ. ယအိၣ်ဘၣ်လၢ အဝဲသ့ၣ်အကျါန့ၣ် ယဒိးန့ၢ်ဘၣ် တၢ်အဲၣ်ဒီးတၢ်ကဟုကယာ် လၢယဆၢန့ၢ်ဘၣ်တ့ၢ်အီၤ လၢညါလံၤလံၤလံ. အဃိ ယသ့ၣ်ညါလၢ တၢ်ဘူၣ်တၢ်ဘါတဖုအံၤန့ၣ် ကဘၣ်မ့ၢ် တၢ်ဘူၣ်တၢ်ဘါလၢ အမ့ၢ်အတီ. ဒီးဖဲ ၁၉၉၆ န့ၣ်ယဒိးဘျၢထံ ဒ်ယဟိဝၤပှၤအုၣ်အသးတဂၤ အသိးလီၤ.
ယဒိးန့ၢ်ဘၣ် အဘျုးဒ်လဲၣ်— အပူၤကွံာ် ဃုနံၣ်န့ၣ် ယဖျီသးဒီးဒီပုၢ်ဝဲၢ်ခွါဒမ့ထြံၤ. ဒီးပမၤသကိးဘၣ်တၢ်လၢ စ့ၣ် ဖံထၢၤဘၢၤ အဝဲၤတြၢ်ဒ်သိးသိး. လၢခံ ယမိယပါ အတၢ်ပာ်သူၣ်ပာ်သး လၢယတၢ်စူၢ်တၢ်နာ် အဖီခိၣ်န့ၣ် လီၤကပုာ်ဝဲ ကယီကယီလီၤ.
ယသ့ၣ်ညါထီၣ်ဘၣ် ယဟိဝၤယွၤ အဃိ ယသးခုဒိၣ်မး. ဒီးမ့ၢ်လၢ ယဘူၣ်ထီၣ်ဘါထီၣ်အီၤ အဃိ ယတၢ်အိၣ်မူ ပှဲၤဒီးတၢ်သးခု.
“ယအိၣ်ဒီးတၢ်သံကွၢ်တဖၣ် လၢအမၤတံာ်တာ်ယသး အါမး.”—ရီဒၢၤ ရီၣ်ဒြံကၢၤ ရီၣ်ဒြံကၢၤ
အိၣ်ဖျဲၣ်ထီၣ်— ၁၉၅၉
အိၣ်ဖျဲၣ်တၢ်လီၢ်— ကီၢ်ခယူဘး
တၢ်လဲၤခီဖျိ— ပှၤထီဒါ ပဒိၣ်ပပှၢ်
ယတၢ်အိၣ်မူလၢ အပူၤကွံာ်— ယအိၣ်ဖျဲၣ်ထီၣ်လၢ ဝ့ၢ်ဟၤဘါနၤ လၢကီၢ်ခယူဘး. ယဒိၣ်ထီၣ်ဘၣ်လၢ တၢ်လီၢ်လၢအဖှီၣ် ဒီးဖဲယအိၣ်တၢ်လီၢ်န့ၣ် ပှၤဟးထိဟးတီၢ်လိာ်သး လၢကျဲပူၤဆူၣ်မး. ဖဲယဒိၣ်ထီၣ်အခါ ယသးအိၣ် ကၠူဒိၢ်အတၢ်ထိ ဒီးတၢ်ထိလၢ အဂၤတဖၣ်လီၤ.
ဖဲယထီၣ်ကၠိအခါ ယကဲပှၤကၠိဖိ လၢအဂ့ၤတဂၤ. အဃိ ယမိယပါ ဟ့ၣ်ဂံၢ်ဟ့ၣ်ဘါယၤလၢ ယကလဲၤထီၣ် ဖၠၣ်စိမိၤ. ဖဲယထီၣ် ဖၠၣ်စိမိၤအခါ ယတူၢ်ဘၣ်လၢ ယထံကီၢ်တၢ်ပၢတၢ်ပြး အကျိၤအကျဲန့ၣ် ပှၤကြၢးမၤဂ့ၤထီၣ်အီၤ အဃိ ယစးထီၣ်ထီဒါ ပဒိၣ်. ဘၣ်တနံၤ ယၤဒီးယသကိး လၢကၠိတဂၤ ပလဲၤမၤဒၢၣ် ပၢၤကီၢ်တဂၤ ဒ်သိးပကဂုာ်န့ၢ် အကျိအဂီၢ် အဃိ ပကနိလိာ်သးဒီးအီၤလီၤ. ဒီးပၢၤကီၢ်တဂၤန့ၣ် အခိၣ်သၣ်ဃံ ဘၣ်ဒိဖးနးညါ အဃိ ပှၤပၢနုာ်လီၤပှၤလၢ ဃိာ်ပူၤ ဒီးပဒိးန့ၢ်ဘၣ် တၢ်စံၣ်ညီၣ်လၢ ပှၤကခးသံပှၤ. ဖဲန့ၣ်အခါန့ၣ် ယအိၣ်ထဲအနံၣ် ၂၀ ဒံးလီၤ ဘၣ်ဆၣ် ပှၤကမၤသံယၤလီၤ.
ဖဲပှၤကခးသံယၤအခါန့ၣ် ယအဲၣ်ဒိး ဖျါလၢ ယတပျံၤတၢ် နီတဆဲးဘၣ်. အဃိ ဖဲယဘၣ်အိၣ်လၢ ဃိာ်ပူၤထဲတဂၤအခါ ယကၠီးလိယသးလၢ ဖဲပှၤမ့ၢ်ခးသံယၤအခါန့ၣ် ယကအိၣ်ကၠါလဲၣ်. ဘၣ်ဆၣ် ဖဲန့ၣ်အဆၢကတီၢ် ယအိၣ်ဒီးတၢ်သံကွၢ်တဖၣ် လၢအမၤတံာ်တာ်ယသး အါမးစ့ၢ်ကီး. အဒိ တၢ်သံကွၢ်ဒ်သိးဒီး ဘၣ်မနုၤအဃိ လၢဟီၣ်ခိၣ်ချၢအံၤန့ၣ် တၢ်တတီတလိၤ ဘၣ်အါထဲအံၤညါလဲၣ်. ပတၢ်အိၣ်မူန့ၣ် မ့ၢ်ထဲပဟဲအိၣ်ဖျဲၣ်ထီၣ်, သးပှၢ်ထီၣ် ဒီးသံလီၤဧါ.
လံာ်စီဆှံ ဆီတလဲ ယတၢ်အိၣ်မူ ကၠါလဲၣ်— လၢခံ တၢ်စံၣ်ညီၣ်လၢ ပကဘၣ်သံန့ၣ် ပှၤက့ၤဆီတလဲက့ၤလၢ ပကဘၣ်အိၣ်လၢဃိာ်ပူၤ အနံၣ် ၃၀. ဖဲန့ၣ်အဆၢကတီၢ်န့ၣ် ယထံၣ်လိာ်ဘၣ်ယသးဒီး ယဟိဝၤပှၤအုၣ်အသးတဖၣ် လၢအဘၣ်လီၤလၢ ဃိာ်ပူၤခီဖျိလၢ အတၢ်စူၢ်တနာ်အဃိ. ယထံၣ်ဘၣ်လၢ ယဟိဝၤပှၤအုၣ်အသးတဖၣ် အိၣ်ဒီးတၢ်သးဒူ ဘၣ်ဆၣ် အဝဲသ့ၣ် မ့ၢ်ပှၤလၢ အတၢ်ပာ်သူၣ်ပာ်သးဂ့ၤမး အဃိ ထုးန့ၢ်ယသးဒိၣ်မး. အဝဲသ့ၣ်န့ၣ် ပှၤပၢနုာ်လီၤအီၤလၢ ဃိာ်ပူၤတတီတလိၤဘၣ် သနာ်က့ အဝဲသ့ၣ် တအိၣ်ဒီး တၢ်သူၣ်ဟ့သးဟ့ဘၣ်.
ယဟိဝၤပှၤအုၣ်အသးတဖၣ် သိၣ်လိယၤလၢ ကစၢ်ယွၤအိၣ်ဒီး တၢ်တိာ်ပာ်လၢ ပှၤဟီၣ်ခိၣ်ဖိအဂီၢ်. အဝဲသ့ၣ် ဒုးနဲၣ်ယၤလၢ လံာ်စီဆှံအပူၤလၢ ကစၢ်ယွၤ ကမၤကဲထီၣ် ဟီၣ်ခိၣ်လၢ ပၤရဒံစူး ဒီးလၢဟီၣ်ခိၣ်ချၢန့ၣ် တၢ်အၢတၢ်သီ ဒီးတၢ်တတီတလိၤ အအိၣ်လၢၤဘၣ်. ဖဲဟီၣ်ခိၣ်အံၤန့ၣ် ကအိၣ်က့ၤ ထဲပှၤဂ့ၤသ့ၣ်တဖၣ်လီၤ. ဒီးအဝဲသ့ၣ်န့ၣ် ကအိၣ်ဒီး တၢ်ခွဲးတၢ်ယာ်လၢ ကအိၣ်မူဘၣ် မုာ်မုာ်ခုၣ်ခုၣ် လီၤထူလီၤယိာ်လီၤ.—စံးထီၣ်ပတြၢၤ ၃၇:၂၉.
တၢ်လၢယမၤလိဘၣ်လၢ ယဟိဝၤပှၤအုၣ်အသးတဖၣ် အအိၣ်န့ၣ် ဘၣ်ယသူၣ်ယသးဒိၣ်မး သနာ်က့ ယတၢ်ပာ်သူၣ်ပာ်သးဒု လီၤဆီဒီးအဝဲသ့ၣ် ဖးဒိၣ်ညါ. ယဆိကမိၣ်ထီၣ်ဘၣ်လၢ ယကဘၣ်အိၣ်လၢ တၢ်အိၣ်ဘၢၣ်စၢၤ ဒီးတဘၣ်မၤဆၢက့ၤ တၢ်အၢလၢ တၢ်အၢဘၣ်ဒု တမ့ၢ်လၢ ယမၤအီၤကန့ၢ်ဘၣ်. အဃိ ယဖးက့ၤ လံာ်စီဆှံလၢ ယနီၢ်ကစၢ်လီၤ. ဖဲယဖးလံာ်စီဆှံ ဝးအခါ ယသ့ၣ်ညါထီၣ်ဘၣ်လၢ ပှၤလၢအအိၣ်မူ ဒ်သိးဒီး ခရံာ်ဖိလၢ တၢ်မၢဖိအစိၤန့ၣ် အိၣ်ထဲ ယဟိဝၤပှၤအုၣ်အသးတဖုလီၤ.
ယမၤလိ လံာ်စီဆှံအဃိ ယသ့ၣ်ညါထီၣ်ဘၣ်လၢ ယကဘၣ်မၤတၢ်ဆီတလဲဖးဒိၣ် အိၣ်ဝဲတနီၤ. အဒိ ယၤန့ၣ် ယဆိၣ်တၢ်ဆူၣ်မး အဃိ ယကဘၣ် ဆီတလဲက့ၤ ယလုၢ်လၢ်တခါအံၤ. ဒီးလၢအဂၤတခါန့ၣ် ယကဘၣ် ဖၠးကွံာ်မိာ်ထူ ဒီးယတဘၣ် ပၣ်ဃုာ်လၢ ထံဂ့ၢ်ကီၢ်ဂ့ၢ်လၢၤဘၣ်. ယကဘၣ် ဆီတလဲ ယလုၢ်လၢ်သကဲာ်ပဝးတဖၣ်အံၤဒု တညီလၢ ယဂီၢ်ဘၣ်. ဘၣ်ဆၣ် ခီဖျိလၢ ယဟိဝၤယွၤ အတၢ်မၤစၢၤအဃိ ယဆီတလဲထီၣ်ယသး န့ၢ်ဝဲ ကယီကယီလီၤ.
ဒီးယၤန့ၣ် ယကဲပှၤလၢ အသူၣ်ဒိၣ်သးဖျိး ဒီးယကဘၣ်အိၣ်ဒီး တၢ်ပၢၤသူၣ်ပၢၤသးဒု လၢယဂီၢ်န့ၣ် အကီကတၢၢ်လီၤ. ခဲအံၤဒၣ်လဲာ် ဘၣ်ဃးဒီးတၢ်ဂ့ၢ်အံၤန့ၣ် ယဃ့ထုကဖၣ်တၢ် ထီဘိလီၤ. ဒီးလံာ်စီဆှံလၢ အမၤစၢၤယၤ ဒိၣ်ကတၢၢ်တဆၢန့ၣ် မ့ၢ်ဝဲ ကတိၤဒိ ၁၆:၃၂. ဖဲန့ၣ်တဲဝဲလၢ “ပှၤလၢအတသးဒိၣ်ထီၣ်တၢ် ချ့ချ့ဘၣ်န့ၣ် ဂ့ၤဒိၣ်န့ၢ်ဒံး ပှၤလၢအဂံၢ်ဆူၣ်ဘါဆူၣ်တဂၤ ဒီးပှၤလၢအပၢၤဃာ် အတၢ်သးထီၣ်န့ၣ် ဂ့ၤဒိၣ်န့ၢ်ဒံး ပှၤတဂၤလၢ အမၤန့ၢ် ဝ့ၢ်တဖျၢၣ်လီၤ.”
ဖဲ ၁၉၉၁ နံၣ်န့ၣ် ယဒိးဘျၢထံ လၢဃိာ်ပူၤ ဒ်ယဟိဝၤပှၤအုၣ်အသးတဂၤ အသိးလီၤ. ဒီးလၢခံတနံၣ်န့ၣ် ပဝဲတနီၤ ပဟးထီၣ်ဘၣ်လၢ ဃိာ်ပူၤ ဒီးမ့ၢ်လၢ ပဘူးပတံၢ် အိၣ်လၢ စပ့ၣ် အဃိ ပှၤဆှၢပှၤဖဲန့ၣ်လီၤ. ဖဲယလဲၤတုၤလၢ စပ့ၣ် အခါ ယလဲၤထီၣ် တၢ်အိၣ်ဖှိၣ် တဘျီဃီလီၤ. ဖဲန့ၣ်အခါ ဒီပုၢ်ဝဲၢ်မုၣ်ခွါတဖၣ် တူၢ်လိာ်မုာ်ယၤဂ့ၤဂ့ၤ ဒ်ပသ့ၣ်ညါလိာ်သး န့ၢ်ဖးယံာ်လံအသိးလီၤ. ဒီးအဝဲသ့ၣ် မၤစၢၤယၤ ဒ်သိးယဆၢထၢၣ်လၢ ယနီၢ်ကစၢ်အခီၣ်ဖဲ စပ့ၣ်အံၤ ကန့ၢ်အဂီၢ်လီၤ.
ယဒိးန့ၢ်ဘၣ် အဘျုးဒ်လဲၣ်— ယဘူၣ်ထီၣ်ဘါထီၣ်ဘၣ် ကစၢ်ယွၤ ဃုာ်ဒီးယမါ ဒီးယဖိမုၣ်တဖၣ်အဃိ ယသးခုဒိၣ်မး. ဒီးယသူဘၣ် ယတၢ်ဆၢကတီၢ်အါတက့ၢ်လၢ ယမၤလိပှၤဂၤလၢ လံာ်စီဆှံအဃိ အကဲတၢ်ခွဲးတၢ်ယာ်ဖးဒိၣ်လီၤ. တဘျီတခီၣ် ယဆိမိၣ်ထီၣ်ကဒါက့ၤ ဖဲယသးစၢ်အခါ လၢယကဘၣ်သံဘူးထီၣ် အဆၢကတီၢ် ဒီးစးထီၣ်ဖဲန့ၣ် တုၤခဲအံၤ ယန့ၢ်ဘၣ်တၢ်ဒီဒူၣ်. ယဆဲးအိၣ်မူဘၣ် တကးဒံးဘၣ် ယအိၣ်စ့ၢ်ကီးဒီး တၢ်မုၢ်လၢ်. ဒီးယအိၣ်ခိးကွၢ်လၢ် တၢ်အၢၣ်လီၤလၢ ယကအိၣ်မူဘၣ်လၢ ပၤရဒံစူးအပူၤ ဖဲတၢ်တတီတလိၤ “ဒီးတၢ်သံတအိၣ်လၢၤဘၣ်.”—လီၣ်ဖျါ ၂၁:၃, ၄.
[တၢ်ဂ့ၢ်ဖုၣ်ကိာ်]
“ဖဲယသ့ၣ်ညါလၢ ကစၢ်ယွၤန့ၣ် အိၣ်ဒီးအမံၤအခါ အထိးဘၣ် ယသးဒိၣ်မး”
[တၢ်ဂ့ၢ်လၢ တၢ်ဂီၤအဖီလာ်]
ယၤဒီးယဝၤ ပဟ့ၣ်လီၤ ပှၤလၢတနၢ်ဟူတၢ်ဘၣ် လၢလံာ်စုပနီၣ်အကျိာ်