ယဒိၣ်ထီၣ်လၢ သဝီဆံးဆံးဖိ ဝၤရံၤအဲဒၤ လၢအအိၣ်လၢ နူစီးဝ့(စ်). ဒီးပှၤသဝီဖိတဖၣ်န့ၣ် မ့ၢ်ပှၤမၤအီၣ်စံာ် ဒီးဘုၣ်အီၣ်ဆၣ်ဖိကီၢ်ဖိ ဒ်သိးဒီး ကျီၢ်ဒီးသိတဖၣ်. တကးဒံးဘၣ် သဝီအံၤ ဖျါကဆှဲကဆှီ ဒီးတၢ်မၤဆူၣ်မၤဆိး တအိၣ်အါအါဘၣ်.

ယဒီပုၢ်ဝဲၢ်အိၣ်အဂၤ ၁၀ ဒီးယမ့ၢ်ပှၤဝဲၢ်ကိ. ဖဲယသးအိၣ် ၁၃ နံၣ်အခါ ယစးထီၣ်မၤတၢ်မၤ ဒ်သိး ယကလုၢ်အီၣ်လုၢ်အီ ယဟံၣ်ဖိဃီဖိအဂီၢ်. ဘၣ်ဆၣ် မ့ၢ်လၢ ယတၢ်ကူၣ်ဘၣ်ကူၣ်သ့ တအိၣ်အါအါဘၣ်အဃိ အိၣ်ဒၣ်ယဘၣ်မၤအီၣ် စံာ်ဧိၤပှဲၤဧိၤ. ဒီးဖဲယပှဲၤထီၣ် ၁၅ နံၣ်အခါ ယကဲထီၣ်က့ၤလၢ ပှၤကွၢ်ကသ့ၣ်ဖိတဂၤ.

ယမၤတၢ်လၢစံာ်ပျီပူၤန့ၣ် မုာ်ဘၣ်ယၤတမံၤကၠ့ၤ. ဘၣ်မနုၤအဃိလဲၣ်န့ၣ် ယမၤအီၣ်စံာ်မုာ်မး ဒီးတၢ်လီၢ်သ့ၣ်တဖၣ်န့ၣ် ဃံလၤဝဲဒိၣ်မး. ဖဲမုၢ်နၤခီအဆၢကတီၢ်န့ၣ် ယဆ့ၣ်နီၤဆူးမ့ၣ်အူ ဒီးကွၢ်ထီၣ်တၢ်လၢ မူခိၣ်အခါ ယထံၣ်ဘၣ် လါဒီးဆၣ်တဖၣ် ဖျါဃံလၤဂ့ၤမး. ဖဲန့ၣ်အခါ ယဆိကမိၣ်ထီၣ်လၢ တၢ်လၢအလီၤလိၢ်လီၤလးတဖၣ်အံၤန့ၣ် ပှၤလၢအတ့လီၤအီၤဒု ကဘၣ်အိၣ်တဂၤဒၣ်ခီ. ဘၣ်ဆၣ် တၢ်လၢတမုာ်ဘၣ်ယၤဘၣ်ဒု အိၣ်တခါ. ယဘၣ်မၤသကိးတၢ်ဒီး ပှၤလၢအအီမိာ် ဒီးအဆိၣ်တၢ်ဆူၣ်. အဃိ လၢခံယစးထီၣ်အီမိာ်ဒီးဆိၣ်တၢ်.

ဘၣ်ဆၣ် ဖဲယသးအိၣ် ၁၈ နံၣ်အခါ ယလဲၤအိၣ်လၢ ဝ့ၢ်စံဒနံၤ. ဒီးဖဲန့ၣ် ယလဲၤဆဲးလီၤယမံၤ လၢယကကဲသုး ဘၣ်ဆၣ် မ့ၢ်လၢ ယတၢ်ကူၣ်ဘၣ်ကူၣ်သ့ တအိၣ်အါအါဘၣ်အဃိ ပှၤတတူၢ်လိာ်ယၤဘၣ်. လၢခံ ယန့ၢ်ဘၣ်တၢ်မၤ လၢအသီတခါ ဒီးယဆဲးအိၣ်ဖဲ ဝ့ၢ်စံဒနံၤန့ၣ်တနံၣ်. ဖဲယအိၣ်ဖဲန့ၣ်အခါ ယထံၣ်လိာ်သးဒီး ယဟိဝၤပှၤအုၣ်အသး အဆိကတၢၢ်တဘျီ. အဝဲသ့ၣ်ကွဲယၤလၢ ယကလဲၤထီၣ် တၢ်အိၣ်ဖှိၣ်ဒီးအဝဲသ့ၣ်. ဖဲယလဲၤထီၣ် တၢ်အိၣ်ဖှိၣ်အခါ ယသ့ၣ်ညါတဘျီဃီလၢ တၢ်လၢအဝဲသ့ၣ် သိၣ်လိဝဲတဖၣ်န့ၣ် မ့ၢ်ဝဲတၢ်မ့ၢ်တၢ်တီ.

တယံာ်တမီၢ်ဘၣ်န့ၣ် ယက့ၤအိၣ်ကဒါက့ၤလၢ သဝီကူဒံၤဝံဒံၤ လၢခွံ(စ်)လဲ. ဒီးလၢခံ ယန့ၢ်ဘၣ်တၢ်မၤ ဒီးယဆီဟံၣ်ဆီဃီဖဲန့ၣ်. ဘၣ်ဆၣ် မ့ၢ်လၢ ယစးထီၣ်အီသံးအဃိ လီၤသးအုးဒိၣ်မး.

လၢခံ ပဖိအိၣ်ခံဂၤ. ဖဲယဖိခွါခံဂၤ အိၣ်ဖျဲၣ်ထီၣ်ဝံၤအလီၢ်ခံ ယစးထီၣ်ဆိကမိၣ်ထံက့ၤ ယတၢ်အိၣ်မူလၢ ခါဆူညါအဂီၢ်. ဖဲန့ၣ်န့ၣ် ယက့ၤသ့ၣ်နီၣ်ထီၣ်ဘၣ် တၢ်ဂ့ၢ်လၢ ယနၢ်ဟူတ့ၢ်ဖဲ ယလဲၤထီၣ်တၢ်အိၣ်ဖှိၣ်လၢ ဝ့ၢ်စံဒနံၤအခါ ဒီးယပာ်လီၤယသးလၢ ယကမၤတၢ်တမံၤမံၤ.

ယထံၣ်န့ၢ် တၢးထီခိးတၢ် အလီၢ်လံၤတဘ့ၣ် ဒီးလၢတၢးထီခိးတၢ် တဘ့ၣ်အံၤအပူၤန့ၣ်အိၣ်ဒီး အီးစတြ့လံယါ အဝဲၤတြၢ် အတၢ်လီၢ်တၢ်ကျဲအမံၤ. အဃိ ယကွဲးလံာ်ဒီးဃ့တၢ်မၤစၢၤလၢ အဝဲသ့ၣ်အိၣ်. ဘျီအဝဲသ့ၣ်ဆှၢလီၤ ဒီပုၢ်ဝဲၢ်လၢ အသးဂ့ၤတဂၤ လၢယအိၣ် ဒီးယစးထီၣ်မၤလိလံာ်စီဆှံ.

ဖဲယစးထီၣ်မၤလိ လံာ်စီဆှံအခါ ယသ့ၣ်ညါလီၤယသးလၢ ယကဘၣ်မၤ ဂ့ၤထီၣ်ယတၢ်အိၣ်မူအါမး. လံာ်စီဆှံတဆၢလၢအမ့ၢ် ၂ ကရံၣ်သူး ၇:၁ န့ၣ်မၤစၢၤယၤဒိၣ်မး. လံာ်စီဆှံတဆၢအံၤ မၤစၢၤယၤဒ်သိး ယက ‘မၤကဆှီထီၣ် ယသးလၢ တၢ်ခဲလၢာ်လၢ အမၤဘၣ်အၢ ယဖံးယညၣ်.’

ဒီးယပာ်လီၤယသးလၢ ယတအီသံးအီမိာ်လၢၤဘၣ်. ဘၣ်ဆၣ် မ့ၢ်လၢ ယစွဲသံးစွဲမိာ်အဃိ ယကဖၠးအီၤအဂီၢ် တညီဘၣ်. ဒ်လဲၣ်ဂ့ၤဒ်လဲၣ်ဂ့ၤ ယပာ်လီၤယသးလၢ ယကအိၣ်မူဒ် တၢ်ဘၣ်ကစၢ်ယွၤအသး. အဃိ ယမၤထွဲဒ် ရိမ့ၤ ၁၂:၂ လၢအတဲဝဲလၢ “တဘၣ်ကွၢ်လိမၤဒိး ပှၤတၢ်ချၢ လၢၤတဂ့ၤ. မ့မ့ၢ် လဲလိာ် သုတၢ်ဆိကမိၣ်တဖၣ် ဒ်သိး သုကဆီတလဲထီၣ် သုသးအဂီၢ်တက့ၢ်.” လံာ်စီဆှံတဆၢအံၤ မၤစၢၤယၤဒ်သိး ယကသ့ၣ်ညါလီၤက့ၤယသးလၢ ဒ်သိး ယဆီတလဲ ယလုၢ်လၢ်သကဲာ်ပဝး လၢအတဂ့ၤဘၣ်တဖၣ်ကန့ၢ်အဂီၢ် ယကဘၣ်ဆီတလဲ ယတၢ်ဆိကမိၣ် ဒီးယကဘၣ်ထံၣ်လုၢ်လၢ်လၢ အတဂ့ၤဘၣ်တဖၣ်အံၤ ဒ်ကစၢ်ယွၤ ထံၣ်ဝဲအသိး. မ့ၢ်လၢကစၢ်ယွၤ မၤစၢၤယၤအဃိ လၢခံန့ၣ် ယဖၠးသံးဖၠးမိာ်န့ၢ်ဝဲလီၤ.

ဘၣ်ဆၣ် တၢ်လၢယကဘၣ်ပတုာ်အီၤ ကီကတၢၢ်န့ၣ် မ့ၢ်တၢ်ဆိၣ်တၢ်ထုတၢ်. အ့းဖ့းစူး ၄:၂၉ တဲဝဲလၢ “တဘၣ်ဒုးဟဲထီၣ် တၢ်ကတိၤ အအၢအသီ လၢသုကိာ်ပူၤတဂ့ၤ.” တၢ်ဂ့ၢ်တခါအံၤန့ၣ် ယသ့ၣ်ညါအီၤဂ့ၤဂ့ၤ ဘၣ်ဆၣ် ယပတုာ်အီၤတန့ၢ် တဘျီဃီဘၣ်. ဖဲယဆိကမိၣ်ထံ ယၡါယၤ ၄၀:၂၆ အခါ အမၤစၢၤယၤဒိၣ်မး. ဖဲန့ၣ်တဲဝဲလၢ “ကျ့ၣ်ထီၣ်သုမဲာ်လၢ မူခိၣ် ဒီးကွၢ်တက့ၢ်. မတဂၤတ့လီၤ ဆၣ်တဖၣ်အံၤလဲၣ်. မ့ၢ်ဝဲ ပှၤတဂၤလၢ အဆှၢထီၣ် ဆၣ်တဖၣ်အံၤ ဒ်သုးမုၢ်တဖုအသိး ဒီးအဝဲဂံၢ်ဝဲ ဆၣ်တဖၣ် ဒီးကိးဝဲလၢအမံၤ ကိးဖျၢၣ်ဒဲးလီၤ. မ့ၢ်လၢ အဝဲအိၣ်ဒီး တၢ်ဂံၢ်တၢ်ဘါ အါအါဂီၢ်ဂီၢ် ဒီးတၢ်စိတၢ်ကမီၤ ဒိၣ်ဒိၣ်မုၢ်မုၢ်အဃိ ဆၣ်တဖၣ် တလီၤမၢ်နီတဖျၢၣ်ဘၣ်.” ဖဲန့ၣ်အခါ ယဆိကမိၣ်ထီၣ်လၢ ကစၢ်ယွၤန့ၣ် အိၣ်ဒီးတၢ်စိတၢ်ကမီၤလၢ ကတ့လီၤဝဲ မုၢ်လါဆၣ် ဒီးဟီၣ်ခိၣ်ဖျၢၣ်အဃိ ဒ်သိး ယကအိၣ်မူဒ် အတၢ်ဘၣ်သးအဂီၢ် အဝဲမၤစၢၤယၤသ့. ဒီးယဃ့ဘါထုကဖၣ် ဒီးယထဲးဂံၢ်ထဲးဘါ ဆူၣ်ဆူၣ်အဃိ လၢခံ ယတဆိၣ်တၢ်လၢၤဘၣ်.

ယကဲပှၤလၢ အဘုၣ်ဆၣ်ဖိကီၢ်ဖိတဂၤအဃိ လၢယတၢ်မၤအလီၢ်န့ၣ် ပှၤတအိၣ်အါအါဘၣ်. အဃိ ယတတဲဘၣ်တၢ်ဒီး ပှၤဂၤအါအါဘၣ်. ဘၣ်ဆၣ် တၢ်လၢယမၤလိဘၣ်လၢ တၢ်အိၣ်ဖှိၣ်အပူၤန့ၣ် မၤစၢၤယၤဒ်သိး ယတဲတၢ်ဒီးပှၤဂၤ ကသ့ဒိၣ်ထီၣ် ဒီးမၤစၢၤစ့ၢ်ကီးယၤလၢ ယတဲဘၣ်ပှၤဂၤလၢ တၢ်သးခုကစီၣ်ကဘၣ်အဂီၢ်.—မးသဲ ၆:၉, ၁၀; ၂၄:၁၄.

အခဲအံၤ ယကဲတၢ်အိၣ်ဖှိၣ်သးပှၢ် န့ၢ်တဘျုးနံၣ်လံ. ယမၤစၢၤဘၣ် ဒီပုၢ်ဝဲၢ်မုၣ်ခွါတဖၣ်န့ၣ် ယထံၣ်အီၤဒ်အမ့ၢ် တၢ်ခွဲးတၢ်ယာ်ဖးဒိၣ်တခါ.

ယတၢ်ကူၣ်ဘၣ်ကူၣ်သ့ တအိၣ်အါအါဘၣ်သနာ်က့ ယဟိဝၤယွၤ သိၣ်လိယၤအဃိ ယစံးဘျုးဘၣ် အီၤဒိၣ်မး. (ယၡါယၤ ၅၄:၁၃) ဖဲ ကတိၤဒိ ၁၀:၂၂ န့ၣ်တဲဝဲလၢ “ယဟိဝၤယွၤ အတၢ်ဆိၣ်ဂ့ၤန့ၣ် မ့ၢ်တၢ်လၢ အဒုးဘီၣ်ထီၣ်ညီထီၣ်ပှၤတၢ်အိၣ်မူ.” လံာ်စီဆှံတဆၢအံၤ ဖးဘၣ်ညါ.