ဆိကမိၣ်ထံ ယဟိဝၤယွၤ အတၢ်အဲၣ်အထူအယိာ်
“ယကဆိကမိၣ်လၢ နတၢ်မၤခဲလၢာ်အဂ့ၢ်”—စံးထီၣ်ပတြၢၤ ၇၇:၁၂.
တၢ်သးဝံၣ်- ၁၈, ၆၁
၁, ၂. (က) ဘၣ်မနုၤအဃိ နနာ်လၢ ယဟိဝၤယွၤ အဲၣ်ဝဲအခ့အပှၤန့ၣ်လဲၣ်. (ခ) ပှၤဟီၣ်ခိၣ်ဖိတဖၣ် ဘၣ်တၢ်တ့လီၤအဝဲသ့ၣ်ဃုာ်ဒီး တၢ်လိၣ်ဘၣ်မနုၤတဖၣ်လဲၣ်.
ဘၣ်မနုၤအဃိ နနာ်လၢ ယဟိဝၤယွၤ အဲၣ်အခ့အပှၤလဲၣ်. တချုးလၢ နစံးဆၢတၢ်သံကွၢ်အံၤန့ၣ် ဆိကမိၣ်ကွၢ် တၢ်အဒိတဖၣ်အံၤတက့ၢ်– ဒီပုၢ်ဝဲၢ်မုၣ်ဒီပုၢ်ဝဲၢ်ခွါတဖၣ် ဟ့ၣ်သဆၣ်ထီၣ်ဝဲ ဒီပုၢ်ဝဲၢ်မုၣ် ထ့လနံၤ ကအိၣ်တဘျုးနံၣ်ညါန့ၣ်လီၤ. အဝဲသ့ၣ်ဟ့ၣ်ကူၣ်အီၤလၢ တၢ်လၢနမၤတန့ၢ်ဘၣ်န့ၣ် တဘၣ်မၤန့ၢ်ဆူၣ်အီၤတဂ့ၤ. ထ့လနံၤစံးဝဲ– “ယဟိဝၤယွၤ မ့ၢ်တအဲၣ်ယၤန့ၣ် တမ့ၢ်လၢအဝဲကဟ့ၣ်ကူၣ်ယၤ ထဲထဲအံၤဘၣ်.” ဘရံးကတံၣ် ဘၣ်ကွၢ်လုၢ်ဒိၣ်ထီၣ်ဝဲ အဖိခံဂၤဖဲ အဝၤသံဝံၤအလီၢ်ခံန့ၣ်လီၤ. အဝဲတဲဝဲဒ်အံၤ– “လီၤဆီဒၣ်တၢ် မိၢ်လၢ အဝၤတအိၣ်ဘၣ်တဂၤအဂီၢ် ဘၣ်ကွၢ်လုၢ်ဒိၣ်ထီၣ်ဖိလၢ ဟီၣ်ခိၣ်လၢ မုၣ်ကီၤလံၢ်ပၢအီၤအံၤအပူၤန့ၣ် မ့ၢ်တၢ်ကီတၢ်ခဲ အဒိၣ်ကတၢၢ်တမံၤလီၤ. ဖဲယကွၢ်ဆၢၣ်မဲာ်ဘၣ် တၢ်ကီတၢ်ခဲပှဲၤဒီး မဲာ်ထံမဲာ်နိ ဒီးတၢ်သူၣ်အုးသးအုးအခါ ကစၢ်ယွၤကဟုကယာ်ယၤဒီး တၢ်လၢယတူၢ်တန့ၢ် ခီၣ်တကဲဘၣ်န့ၣ် အဝဲတပျဲတူၢ်ယၤအဃိ ယနာ်လၢ ယဟိဝၤယွၤအဲၣ်ယၤလီၤ.” (၁ ကရံၣ်သူး ၁၀:၁၃) စဲဒရၣ် အိၣ်ဒီးတၢ်ဆါလၢ တၢ်ကူစါယါဘျါအီၤ တန့ၢ်ဘၣ်န့ၣ်လီၤ. ဖဲတၢ်အိၣ်ဖှိၣ်ဖးဒိၣ်အဆၢကတီၢ် ဒီပုၢ်ဝဲၢ်မုၣ်တဂၤ ပာ်ဖျါထီၣ် တၢ်သူၣ်အိၣ်သးအိၣ် စဲဒရၣ်လီၤ. စဲဒရၣ်အဝၤစံးဝဲလၢ “ပတသ့ၣ်ညါအီၤဂ့ၤဂ့ၤဘၣ်, ဘၣ်ဆၣ် အဝဲအတၢ်သူၣ်အိၣ်သးအိၣ်အဃိ မၤသးခုပှၤဒိၣ်မးလီၤ. ဒီပုၢ်ဝဲၢ်မုၣ် ဒီပုၢ်ဝဲၢ်ခွါတဖၣ် မ့ၢ်ပာ်ဖျါထီၣ်တၢ်အဲၣ်တၢ်ကွံ ထဲတစဲးဖိဒၣ်လဲာ် ဒုးနၢ်ပၢၢ်ယၤလၢ ယဟိဝၤယွၤ အဲၣ်ပှၤထဲလဲၣ်န့ၣ်လီၤ.”
၂ ယဟိဝၤယွၤ တ့လီၤပှၤဟီၣ်ခိၣ်ဖိ ဃုာ်ဒီးတၢ်လိၣ်ဘၣ်လၢ ပကပာ်ဖျါထီၣ်တၢ်အဲၣ်ဒီး တူၢ်ဘၣ်တၢ်အဲၣ်န့ၣ်လီၤ. ဘၣ်ဆၣ် လၢတၢ်တဆိကမိၣ်အပူၤ တၢ်မ့ၢ်ကဲထီၣ်အသးဒီးပှၤတခါခါ ဒ်သိးဒီးတၢ်ဆူးတၢ်ဆါ, ကျိၣ်စ့တၢ်ကီတၢ်ခဲ မ့တမ့ၢ် ပတထံၣ်ဘၣ် တၢ်ဒိၣ်ထီၣ်ထီထီၣ်လၢ ပတၢ်သးခုကစီၣ်တၢ်မၤပူၤန့ၣ် ပသးဘၣ်ဒိသ့ဝဲလီၤ. ပမ့ၢ်တူၢ်ဘၣ်လၢ ယဟိဝၤယွၤ တအဲၣ်ပှၤလၢၤဘၣ်န့ၣ် ပကဘၣ်သ့ၣ်နီၣ်ထီၣ်က့ၤလၢ ပမ့ၢ်တၢ်လုၢ်ဒိၣ်ပှ့ၤဒိၣ်လၢအဂီၢ် ဒီးအဝဲအိၣ်လၢပကပၤ, ဟံးဃာ်ပစုဒီးမၤစၢၤပှၤန့ၣ်လီၤ. ပမ့ၢ်တီဒီးအီၤန့ၣ် အဝဲတသးပ့ၤနီၣ်ပှၤ နီတဘျီဘၣ်.—ဝံယၡါယၤ ၄၁:၁၃; ၄၉:၁၅.
၃. ယဟိဝၤယွၤ အတၢ်အဲၣ်ပှၤမ့ၢ်ဝဲ တၢ်အဲၣ်အထူအယိာ်န့ၣ် တၢ်မနုၤဒုးဆူၣ်ထီၣ် ပတၢ်နာ်သ့လဲၣ်.
၃ ဒီပုၢ်ဝဲၢ်တဖၣ် အတၢ်လဲၤခီဖျိလၢ ဘၣ်တၢ်ပာ်ဖျါထီၣ်အီၤလၢ ထးတဖၣ်အံၤ ပာ်ဖျါထီၣ်ဝဲလၢ ကစၢ်ယွၤအိၣ်ဒီးအီၤ ဖဲအဝဲသ့ၣ်ကွၢ်ဆၢၣ်မဲာ်ဘၣ်ဝဲ တၢ်ကီတၢ်ခဲအခါန့ၣ်လီၤ. ပဝဲစ့ၢ်ကီး ပနာ်သ့လၢ ကစၢ်ယွၤအိၣ်ဒီးပှၤန့ၣ်လီၤ. (စံးထီၣ်ပတြၢၤ ၁၁၈:၆, ၇) လၢတၢ်မၤလိအံၤအပူၤ ပကတဲသကိး တၢ်ဟ့ၣ်လွံၢ်မံၤလၢ အပာ်ဖျါထီၣ်ဝဲ ယဟိဝၤယွၤ အတၢ်အဲၣ်ပှၤန့ၣ်လီၤ. တၢ်သ့ၣ်တဖၣ်န့ၣ်မ့ၢ်ဝဲ (၁) ကစၢ်ယွၤအတၢ်ဘၣ်တ့, (၂) လံာ်စီဆှံ, (၃) တၢ်ထုကဖၣ်ဒီး (၄) တၢ်ပှ့ၤက့ၤန့ၣ်လီၤ. ပမ့ၢ်ဆိကမိၣ်ထံ တၢ်လၢအဂ့ၤတဖၣ်လၢ ယဟိဝၤယွၤ မၤတ့ၢ်လၢပဂီၢ်န့ၣ် ကမၤစၢၤပှၤဒ်သိး ပကအိၣ်ဒီး တၢ်စံးဘျုးစံးဖှိၣ်လၢ အတၢ်အဲၣ်အထူအယိာ်အဃိန့ၣ်လီၤ.—ဖး စံးထီၣ်ပတြၢၤ ၇၇:၁၁, ၁၂ တက့ၢ်.
ဆိကမိၣ်ထံ ယဟိဝၤယွၤ အတၢ်ဘၣ်တ့
၄. ပမ့ၢ်ဆိကမိၣ်ထံ ယဟိဝၤယွၤ အတၢ်ဘၣ်တ့တဖၣ်န့ၣ် ပဒိးန့ၢ်ဘၣ်တၢ်မၤလိဒ်လဲၣ်.
၄ ဖဲပကွၢ်ယဟိဝၤယွၤ အတၢ်ဘၣ်တ့တဖၣ်အခါ ပသ့ၣ်ညါဘၣ်လၢ ယဟိဝၤယွၤ အဲၣ်ပှၤဒိၣ်မးန့ၣ်လီၤ. (ရိမ့ၤ ၁:၂၀) အဒိ ယဟိဝၤယွၤ တ့လီၤဝဲဟီၣ်ခိၣ် ထဲပကအိၣ်မူဘၣ်လၢအပူၤ တမ့ၢ်ဘၣ်. ကစၢ်ဟ့ၣ်ပှၤ တၢ်လၢပလိၣ်ဘၣ်လၢ ပသးသမူအဂီၢ် ကိးမံၤဒဲးန့ၣ်လီၤ. ယဟိဝၤယွၤ ဟ့ၣ်ပှၤတၢ်အီၣ်တၢ်အီ အကလုာ်ကလုာ် လၢပကသူၣ်ဖှံသးညီအဂီၢ်လီၤ. (စံၣ်တဲၤတဲလီၤတၢ် ၉:၇) ဒီပုၢ်ဝဲၢ်မုၣ် ခဲးသရ့ အိၣ်ဒီးတၢ်သူၣ်ဖှံသးညီ ခီဖျိလၢအထံၣ်ဘၣ် ယွၤအတၢ်ဘၣ်တ့ လီၤဆီဒၣ်တၢ်ဖဲ တၢ်ယီၤထီၣ်သီလၢ ကီၢ်ခဲနဒၣ်အပူၤန့ၣ်လီၤ. အဝဲစံးဝဲလၢ– “အဆၢကတီၢ်ဝဲန့ၣ် မ့ၢ်တၢ်ဆၢကတီၢ်လၢ အဃံလၤဒိၣ်မးလီၤ. မ့ၢ်လၢဖီဖိတဖၣ် ဘိၣ်ထီၣ်ဖးထီၣ် ဒီးထိၣ်ဖိလံၣ်ဖိ လၢသုးလီၢ်သုးကျဲတဖၣ် ဟဲက့ၤကဒါက့ၤ လၢအလီၢ်အဃိလီၤ. ဒီးယထံၣ်ဘၣ် ထိၣ်ကနဲဖိ ဟဲအီၣ်အဆၣ်လၢ ယဟံၣ်ကပၤစ့ၢ်ကီးလီၤ. ပဒိးန့ၢ်ဘၣ် တၢ်သူၣ်ဖှံသးညီ မ့ၢ်လၢယဟိဝၤယွၤ အဲၣ်ပှၤအဃိန့ၣ်လီၤ.” ပပၢ်သးဘိ အဲၣ်ဝဲအတၢ်ဘၣ်တ့ ဒီးအဲၣ်ဒိးဝဲလၢ ပကဒိးန့ၢ်ဘၣ် တၢ်သူၣ်ဖှံသးညီ လၢအတၢ်ဘၣ်တ့တဖၣ် အဃိန့ၣ်လီၤ.—မၤတၢ် ၁၄:၁၆, ၁၇.
၅. ယဟိဝၤယွၤ တ့လီၤပှၤဃုာ်ဒီး တၢ်မနုၤလဲၣ် ဒီးကစၢ်ယွၤ အတၢ်အဲၣ်အိၣ်ဖျါလၢ ပှၤဟီၣ်ခိၣ်ဖိအဖီခိၣ်ဒ်လဲၣ်.
၅ ယဟိဝၤယွၤ တ့လီၤပှၤဃုာ်ဒီး တၢ်သ့တၢ်ဘၣ်ဒ်သိး ပကမၤတၢ်လၢ အကဲဘျုးကဲဖှိၣ်ဒီး မၤသူၣ်ဖှံသးညီပှၤလီၤ. (စံၣ်တဲၤတဲလီၤ ၂:၂၄) ကစၢ်ဟ့ၣ်လီၤ ပှၤဟီၣ်ခိၣ်ဖိတၢ်မၤလၢ ကဘၣ်မၤပှဲၤထီၣ်ဟီၣ်ခိၣ်, ကသူၣ်အီၣ်ဖျးအီၣ်တၢ်, ဒီးအံးထွဲကွၢ်ထွဲ ထိၣ်ဖိလံၣ်ဖိ, ဒ့ၣ်ဖိညၣ်ဖိ ဒီးဆၣ်ဖိကီၢ်ဖိ အဂုၤအဂၤတဖၣ်လီၤ. (၁ မိၤၡ့ ၁:၂၆-၂၈) ဒီးအဝဲတ့လီၤစ့ၢ်ကီး ပှၤဟီၣ်ခိၣ်ဖိဃုာ်ဒီး တၢ်ဂ့ၤတၢ်ဝါတဖၣ်ဒ်သိး ပကွၢ်လိအီၤကသ့အဂီၢ်န့ၣ်လီၤ.—အ့းဖ့းစူး ၅:၁.
ယွၤအကလုၢ်ကထါန့ၣ် မ့ၢ်တၢ်လုၢ်ဒိၣ်ပှ့ၤဒိၣ်
၆. ဘၣ်မနုၤအဃိ ပကဘၣ်ပာ်လုၢ်ပာ်ပှ့ၤ ကစၢ်ယွၤအကလုၢ်ကထါလဲၣ်.
၆ ယဟိဝၤယွၤ ဟ့ၣ်လီၤပှၤလံာ်စီဆှံ မ့ၢ်လၢအဝဲအဲၣ်ပှၤဒိၣ်မး အဃိန့ၣ်လီၤ. လံာ်စီဆှံပာ်ဖျါထီၣ်န့ၢ်ပှၤ ကစၢ်ယွၤအဂ့ၢ် ဒီးအတၢ်ပာ်သူၣ်ပာ်သး လၢပှၤဟီၣ်ခိၣ်ဖိအဖီခိၣ်န့ၣ်လီၤ. အဒိ လံာ်စီဆှံဒုးသ့ၣ်ညါပှၤလၢ ကစၢ်ယွၤ အတၢ်ပာ်သူၣ်ပာ်သး ဘၣ်ဃးဒီး ပှၤအံၣ်စရ့လးဖိတဖၣ် လၢညီနုၢ်တဒိကနၣ်အကလုၢ်အဃိ အဝဲတူၢ်ဘၣ်ဝဲဒ်လဲၣ်န့ၣ်လီၤ. စံးထီၣ်ပတြၢၤ ၇၈:၃၈ စံးဝဲလၢ– “ယွၤသးအိၣ်အီၤဒီး ပျၢ်အတၢ်အၢ, ဒီးတမၤဟးဂီၤဘၣ်အီၤဘၣ်. ဒီးဘိးဃၣ်ကွံာ်အသးထီၣ်အါစု, ဒီးတထိၣ်ဂဲၤဘၣ်အသးကဲၤထီၣ် ခဲလၢာ်ဘၣ်.” နမ့ၢ်ဆိကမိၣ်ထံ လံာ်စီဆှံတဆၢအံၤန့ၣ် ကမၤစၢၤနၤဒ်သိး နကသ့ၣ်ညါထီၣ် ယဟိဝၤယွၤအတၢ်အဲၣ် ဒီးအတၢ်ကဟုကယာ်နၤန့ၣ်လီၤ. ယဟိဝၤယွၤသးအိၣ်ပှၤနီၢ်နီၢ်န့ၣ် ပနာ်သ့သပှၢ်ကတၢၢ်လီၤ.—ဖး ၁ ပ့းတရူး ၅:၆, ၇ တက့ၢ်.
၇. ဘၣ်မနုၤအဃိ လံာ်စီဆှံ မ့ၢ်တၢ်လုၢ်ဒိၣ်ပှ့ၤဒိၣ်တခါ လၢပဂီၢ်န့ၣ်လဲၣ်.
၇ တၢ်လၢလံာ်စီဆှံန့ၣ် ကဘၣ်မ့ၢ်တၢ်လုၢ်ဒိၣ်ပှ့ၤဒိၣ် လၢပဂီၢ်လီၤ. ဘၣ်မနုၤအဃိလဲၣ်. မ့ၢ်လၢယဟိဝၤယွၤ ဆဲးကျိးလိာ်အသးဒီးပှၤ ခီဖျိလၢလံာ်စီဆှံအဃိန့ၣ်လီၤ. ဖဲမိၢ်ပၢ်ဒီးဖိလံၤတဖၣ် မ့ၢ်တဲသကိးတၢ်ဂ့ၢ် ပျီပျီဆှဲဆှဲအခါ အဝဲသ့ၣ် အတၢ်အဲၣ်လိာ်အသး ကဒဲကဒဲ ကဒိၣ်ထီၣ်ဝဲ ဒီးတၢ်နာ်န့ၢ်လိာ်သး ကအါထီၣ်ဝဲလီၤ. ယဟိဝၤယွၤ မ့ၢ်ပၢ်လၢအပှဲၤဒီး တၢ်အဲၣ်တၢ်ကွံတဂၤလီၤ. ပတထံၣ်ဘၣ် ဒီးတနၢ်ဟူဘၣ် ကစၢ်ယွၤအကလုၢ် နီတဘျီဘၣ်သနာ်က့ အဝဲဆဲးကျိးဒီးပှၤခီဖျိလၢ လံာ်စီဆှံန့ၣ်လီၤ. လၢတၢ်န့ၣ်အဃိ ပကဘၣ်ဒိကနၣ် အကလုၢ်ထီဘိန့ၣ်လီၤ. (ယၡါယၤ ၃၀:၂၀, ၂၁) ဖဲပဖးဘၣ် ကစၢ်ယွၤကလုၢ်ကထါအခါ ပသ့ၣ်ညါထီၣ်အီၤ ဒီးပနာ်အီၤလၢ အဝဲမ့ၢ်ကစၢ်လၢ အပၢဆှၢပှၤ ဒီးကဟုကယာ်ပှၤလီၤ.—ဖး စံးထီၣ်ပတြၢၤ ၁၉:၇–၁၁; ကတိၤဒိ ၁:၃၃ တက့ၢ်.
စီၤယ့ၤဟူ လဲၤသိၣ်က့ၤသီက့ၤ စီၤပၤယဟိၡၤဖး ဒီးတဲစ့ၢ်ကီးအီၤလၢ ယဟိဝၤယွၤထံၣ် “တၢ်အဂ့ၤတဖၣ်” လၢအပူၤလီၤ (ကွၢ်လံာ်အဆၢ ၈, ၉)
၈, ၉. ယဟိဝၤယွၤအဲၣ်ဒိးဝဲလၢ ပကသ့ၣ်ညါတၢ်မနုၤလဲၣ်. ဟ့ၣ်တၢ်အဒိလၢ လံာ်စီဆှံပူၤတက့ၢ်.
၈ ယဟိဝၤယွၤအဲၣ်ဒိးဝဲလၢ ပကသ့ၣ်ညါလၢ အဝဲအဲၣ်ပှၤဒီး ကွၢ်ကပာ်ကွံာ်ဝဲ ပတၢ်လီၤတူာ်လီၤကာ်တဖၣ်လီၤ. တကးဒံးဘၣ် အဝဲဃုထံၣ်န့ၢ် ပတၢ်ဂ့ၤတဖၣ်လီၤ. (၂ ကွဲးနီၣ်တၢ် ၁၆:၉) ခဲအံၤပကတဲသကိး ကစၢ်ယွၤဃုထံၣ်ဝဲ ယူဒၤစီၤပၤယဟိၡၤဖး အတၢ်ဂ့ၤတၢ်ဝါဒ်လဲၣ် အဂ့ၢ်န့ၣ်လီၤ. စီၤပၤယဟိၡၤဖး ဆၢတဲာ်တၢ်လၢအကမၣ် မ့ၢ်လၢအလဲၤအိၣ်ဃူအိၣ်ဖိးဒီး အံၣ်စရ့လးအစီၤပၤအၤဃာ် ဖဲအဝဲလဲၤဒုးဝဲ ပှၤစူၤရံဖိ လၢရၤမိးကံးလဧးအခါန့ၣ်လီၤ. ဝံအဘျၣ်အဂၤ ၄၀၀ စံးဘၣ်စီၤပၤအၤဃာ်လၢ ဖဲနလဲၤဒုးတၢ်အခါ နကမၤနၢၤတၢ်န့ၣ်လီၤ. ဘၣ်ဆၣ် ယဟိဝၤယွၤအဝံ စီၤမံၤကါယၤစံးဘၣ် စီၤပၤယဟိၡၤဖးဒီး စီၤအၤဃာ်လၢ အဝဲသ့ၣ်မ့ၢ်ဒုးဆၢ ပှၤစူၤရံဖိန့ၣ်ကၡူဝဲလီၤ. တၢ်အံၤကဲထီၣ်အသး ဒ်ဝံစီၤမံၤကါယၤ စံးဝဲအသိးန့ၣ်လီၤ. စီၤပၤအၤဃာ်သံဝဲလၢတၢ်ဒုးပျီပူၤ ဒီးမ့မ့ၢ် စီၤပၤယဟိၡၤဖးန့ၣ် ပူၤဖျဲးဝဲလီၤ. တၢ်ဒုးဝံၤအလီၢ်ခံ ယဟိဝၤယွၤသူဝဲ စီၤယ့ၤဟူလၢ ကလဲၤသိၣ်က့ၤသီက့ၤ စီၤပၤယဟိၡၤဖး လၢအတၢ်ဆၢတဲာ် ကမၣ်အဃိန့ၣ်လီၤ. ဘၣ်ဆၣ် စီၤယ့ၤဟူ တဲစ့ၢ်ကီးဝဲလၢ “တၢ်အဂ့ၤတဖၣ်န့ၣ် တၢ်ထံၣ်န့ၢ်ဝဲလၢနပူၤလီၤ.”—၂ ကွဲးနီၣ်တၢ် ၁၈:၄, ၅, ၁၈-၂၂, ၃၃, ၃၄; ၁၉:၁-၃.
၉ လၢအပူၤကွံာ်အနံၣ်တဖၣ်န့ၣ် စီၤပၤယဟိၡၤဖး စံးဘၣ်စီၤပၤအဖိခွါတဖၣ်, ပှၤလ့ၤဝံဖိတဖၣ်, ဒီးပှၤလုၢ်တၢ်အဒိၣ်တဖၣ် ဒ်သိးကလဲၤအိၣ်သကိး ယူဒၤအဝ့ၢ်ခဲလၢာ် လၢကသိၣ်လိ ပှၤဂီၢ်မုၢ်လၢ ယဟိဝၤယွၤ အတၢ်သိၣ်တၢ်သီအဂီၢ်န့ၣ်လီၤ. ခီဖျိလၢအဝဲသ့ၣ် မၤဝဲဒ်န့ၣ်အဃိ ပှၤလၢထံကီၢ်အဂၤတဖၣ်ဒၣ်လဲာ် သ့ၣ်ညါထီၣ်ယဟိဝၤယွၤလီၤ. (၂ ကွဲးနီၣ်တၢ် ၁၇:၃-၁၀) စီၤပၤယဟိၡၤဖး ဆၢတဲာ်တၢ်အကမၣ်သနာ်က့ ယဟိဝၤယွၤတသးပ့ၤနီၣ်ကွံာ်ဝဲ တၢ်ဂ့ၤလၢအမၤတ့ၢ်ဝဲ လၢညါတဖၣ်န့ၣ်ဘၣ်. တၢ်အဒိအတဲာ်အံၤ ကဲထီၣ်တၢ်သူၣ်မံသးမံ လၢပဂီၢ်ဒိၣ်မး မ့ၢ်လၢတဘျီတခီၣ် ပမၤကမၣ်ဘၣ်တၢ်သ့အဃိန့ၣ်လီၤ. ဘၣ်ဆၣ် ပမ့ၢ်ဂုာ်ကျဲးစၢးမၤ ယဟိဝၤယွၤအတၢ်မၤ လၢအဂ့ၤကတၢၢ်န့ၣ် အဝဲကအဲၣ်ပှၤ ဒီးအဝဲတသးပ့ၤနီၣ် တၢ်ဂ့ၤလၢပမၤတ့ၢ် နီတဘျီဘၣ်.
ပာ်လုၢ်ပာ်ပှ့ၤ တၢ်ခွဲးတၢ်ယာ် လၢအမ့ၢ်တၢ်ဘါထုကဖၣ်
၁၀, ၁၁. (က) ဘၣ်မနုၤအဃိ တၢ်ထုကဖၣ်န့ၣ်မ့ၢ် တၢ်ဟ့ၣ်လီၤဆီတခါလၢ ယဟိဝၤယွၤအအိၣ်လဲၣ်. (ခ) ကစၢ်ယွၤ ကစံးဆၢ ပတၢ်ထုကဖၣ်ဒ်လဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.
၁၀ ပၢ်လၢအိၣ်ဒီး တၢ်အဲၣ်တၢ်ကွံတဂၤန့ၣ် ဖဲအဖိတဖၣ်အဲၣ်ဒိး တဲတၢ်ဒီးအီၤအခါ အဝဲဟံးန့ၢ်တၢ်ဆၢကတီၢ်ဒီး ဒိကနၣ်ဝဲလီၤ. ပၢ်တဂၤအဲၣ်ဒိးသ့ၣ်ညါ ဖိတဖၣ် အတၢ်တူၢ်ဘၣ် မ့ၢ်လၢအဝဲသူၣ်အိၣ်သးအိၣ်အဖိအဃိန့ၣ်လီၤ. ပပၢ်သးဘိ ယဟိဝၤယွၤ မၤဝဲဒ်န့ၣ်စ့ၢ်ကီးလီၤ. ဖဲပဃ့ဘါထုကဖၣ် လၢအအိၣ်အခါ အဝဲဒိကနၣ်ဝဲလီၤ. ပတဲသကိးဘၣ်တၢ်ဒီး ပပၢ်န့ၣ် မ့ၢ်ဝဲတၢ်ခွဲးတၢ်ယာ် လီၤဆီတခါလီၤ.
၁၁ ပဃ့ဘါထုကဖၣ်ဆူ ယဟိဝၤယွၤအအိၣ်သ့ဝဲ ကိးဆၢကိးကတီၢ်ဒဲးလီၤ. အဝဲမ့ၢ် ပတံၤသကိးဒီး ထီဘိန့ၣ် အဝဲအိၣ်ကတဲာ်ကတီၤအသး လၢအကဒိကနၣ် ပတၢ်ထုကဖၣ်န့ၣ်လီၤ. ဒ်ထ့လနံၤတဲဝဲအသိး “ဖဲနအဲၣ်ဒိးတဲဘၣ်အီၤ တၢ်တမံၤမံၤန့ၣ် နတဲအီၤသ့လီၤ.” ဖဲပတဲဘၣ် ယဟိဝၤယွၤ တၢ်အိၣ်လၢပသးကံၢ်ပူၤတဖၣ်အခါ အဝဲကစံးဆၢပှၤ ခီဖျိလၢ လံာ်စီဆှံ, တၢ်မၤလိလၢ ပလံာ်ပလဲၢ်အပူၤ မ့တမ့ၢ် တၢ်ဟ့ၣ်ဂံၢ်ဟ့ၣ်ဘါခီဖျိလၢ ပဒီပုၢ်ဝဲၢ်တဖၣ်အအိၣ်လီၤ. ဖဲပဃ့တၢ်လၢ ပသးဒီဖျၢၣ်အခါ ယဟိဝၤယွၤနၢ်ဟူဝဲ ဒီးပှၤအဂၤ မ့ၢ်တနၢ်ပၢၢ်ပှၤသနာ်က့ အဝဲနၢ်ပၢၢ်ပှၤလီၤ. ခီဖျိလၢအဝဲစံးဆၢ ပတၢ်ထုကဖၣ်အဃိ ပသ့ၣ်ညါဘၣ်လၢ အတၢ်အဲၣ်ပှၤန့ၣ် မ့ၢ်တၢ်အဲၣ်လၢ အထူအယိာ်လီၤ.
၁၂. ဘၣ်မနုၤအဃိ ပကြၢးဖး တၢ်ထုကဖၣ်လၢ အိၣ်လၢလံာ်စီဆှံအပူၤန့ၣ်လဲၣ်. ဟ့ၣ်အဒိတက့ၢ်.
၁၂ တၢ်ထုကဖၣ်လၢ ပထံၣ်ဘၣ်အီၤလၢ လံာ်စီဆှံပူၤန့ၣ်ပမၤလိန့ၢ် တၢ်မၤလိအရ့ဒိၣ်သ့ဝဲလီၤ. တဘျီတခီၣ် ပမ့ၢ်မၤလိ ယွၤအခ့အပှၤ လၢပျၢၤတဖၣ် အတၢ်ထုကဖၣ်တနီၤ လၢပဟံၣ်ဖိဃီဖိ တၢ်မၤလိလံာ်စီဆှံအခါန့ၣ် ကကဲဘျုးလၢပဂီၢ်လီၤ. ပမ့ၢ်ဆိကမိၣ်ထံ အဝဲသ့ၣ် အတၢ်ထုကဖၣ်န့ၣ် ကမၤဂ့ၤထီၣ် ပတၢ်ထုကဖၣ်စ့ၢ်ကီးလီၤ. အဒိဖးကွၢ် စီၤယိၤနါ အတၢ်ထုကဖၣ်လၢ အပှဲၤဒီးတၢ်ဆီၣ်လီၤသး ဖဲအဝဲအိၣ်လၢညၣ်ဖးဒိၣ် အဟၢဖၢပူၤအခါန့ၣ်တက့ၢ်. (ယိၤနါ ၁:၁၇–၂:၁၀) ကွၢ်ကဒါက့ၤ စီၤၡလိၤမိၤ အတၢ်ဃ့ထုကဖၣ် ဖဲတၢ်လုၢ်ဟံၣ် ဘၣ်တၢ်ပာ်စီဆှံအီၤအခါန့ၣ်တက့ၢ်. (၁ စီၤပၤ ၈:၂၂-၅၃) ဒီးဆိကမိၣ်ထံစ့ၢ်ကီး ယ့ၣ်ၡူးအတၢ်ထုကဖၣ်န့ၣ်တက့ၢ်. (မးသဲ ၆:၉-၁၃) တၢ်လၢအရ့ဒိၣ်ကတၢၢ်န့ၣ် မ့ၢ်ဝဲပကဘၣ် ‘ဘိးဘၣ်သ့ၣ်ညါ ယွၤလၢပတၢ်အဲၣ်ဒိးတဖၣ်န့ၣ်တက့ၢ်.’ ပမ့ၢ်မၤဒ်န့ၣ်ဒီး “ယွၤအတၢ်ဃူတၢ်ဖိး လၢအဒိၣ်န့ၢ်ယိာ်န့ၢ် ကယဲၢ်ပသ့ၣ်ညါနၢ်ပၢၢ်တၢ်န့ၣ် ကပၢၤပသူၣ်ပသး ဒီးပဆိကမိၣ်တၢ်” န့ၣ်လီၤ. ပတၢ်စံးဘျုးစံးဖှိၣ် ယဟိဝၤယွၤ အတၢ်အဲၣ်အထူအယိာ်န့ၣ် ကဒိၣ်ထီၣ်ဝဲကွ့ၢ်ကွ့ၢ်လီၤ.—ဖံလံးပံၤ ၄:၆, ၇.
ပာ်ဖျါထီၣ်လၢ နပာ်လုၢ်ပာ်ပှ့ၤ တၢ်ပှ့ၤက့ၤန့ၣ်တက့ၢ်
၁၃. လၢတၢ်ပှ့ၤက့ၤအဃိ ပအိၣ်ဒီး တၢ်ခွဲးတၢ်ယာ်မနုၤလဲၣ်.
၁၃ ယဟိဝၤယွၤ ဟ့ၣ်ပှၤတၢ်ဟ့ၣ်လၢအမ့ၢ် တၢ်ပှ့ၤက့ၤဒ်သိး “ပကမူ” အဂီၢ်လီၤ. (၁ ယိၤဟၣ် ၄:၉) ဘၣ်ဃးဒီး တၢ်ပှ့ၤက့ၤန့ၣ် စီၤပီလူးကွဲးဝဲဒ်အံၤ– “ခရံာ်ဒိးသံအသးလၢ ပှၤတယူးတယီၣ်ဘၣ်ယွၤ အဂီၢ်လီၤ. အဂ့ၢ်ဒ်အံၤ, ပှၤကဒိးသံအသးလၢ ပှၤတီအဂီၢ်ကီမးလီၤ. ဘၣ်ဆၣ်ဒီး လၢပှၤဂ့ၤအဂီၢ်န့ၣ်, ပှၤဒိးသံအသးဘူၣ်ကအိၣ်ဝဲ တဂၤဂၤသ့ၣ်သ့ၣ်လီၤ. မ့မ့ၢ်ဖဲ ပမ့ၢ်ပှၤတၢ်ဒဲးဘးဖိ အဖၢမုၢ်ဒီး, ခရံာ်ဒိးသံအသးလၢ ပဂီၢ်သတးဒီး, ယွၤပာ်ဖျါထီၣ် အတၢ်အဲၣ်တၢ်ကွံဒၣ်ဝဲ လၢပှၤလီၤ.” (ရိမ့ၤ ၅:၆-၈) တၢ်ပှ့ၤက့ၤန့ၣ်မ့ၢ်ဝဲ ယဟိဝၤယွၤ အတၢ်အဲၣ်အဒိအတဲာ်လၢ အဒိၣ်ကတၢၢ်ဒီး ဟ့ၣ်လီၤဝဲ ပှၤဟီၣ်ခိၣ်ဖိတဖၣ် တၢ်ခွဲးတၢ်ယာ်ဒ်သိး အဝဲသ့ၣ်ကအိၣ်ဒီး တၢ်ရ့လိာ်သးဒီးအီၤ ဘူးဘူးတံၢ်တံၢ်လီၤ.
၁၄, ၁၅. (က) တၢ်ပှ့ၤက့ၤအခီပညီအိၣ်လၢ ပှၤဘၣ်တၢ်ဒိးဖှူအီၤတဖၣ် အဂီၢ်ဒ်လဲၣ်. (ခ) တၢ်ပှ့ၤက့ၤအခီပညီအိၣ်လၢ ပှၤလၢကအိၣ်မူဘၣ်လၢ ဟီၣ်ခိၣ်ချၢတဖၣ်အဂီၢ်ဒ်လဲၣ်.
၁၄ ခရံာ်ဖိလၢ အနီၣ်ဂံၢ်စှၤတဖု ဒိးန့ၢ်ဘၣ် ယဟိဝၤယွၤ အတၢ်အဲၣ်အထူအယိာ်လၢ ကျဲလီၤဆီအဂၤတဘိန့ၣ်လီၤ. (ယိၤဟၣ် ၁:၁၂, ၁၃; ၃:၅-၇) ကစၢ်ယွၤဒိးဖှူအဝဲသ့ၣ် လၢသးစီဆှံအဃိ အဝဲသ့ၣ်ကဲထီၣ် ယွၤအဖိတဖၣ်န့ၣ်လီၤ. (ရိမ့ၤ ၈:၁၅, ၁၆) ဖဲအဝဲသ့ၣ်တနီၤ အိၣ်တ့ၢ်ဒံးလၢ ဟီၣ်ခိၣ်ချၢအဆၢကတီၢ် ဘၣ်မနုၤအဃိ စီၤပီလူးစံးဝဲလၢ အဝဲသ့ၣ်ဆ့ၣ်နီၤ “လၢမူခိၣ်အလီၢ်တဖၣ်အပူၤလၢ ယ့ၣ်ၡူးခရံာ်အပူၤ” န့ၣ်လဲၣ်. (အ့းဖ့းစူး ၂:၆) မ့ၢ်လၢယဟိဝၤယွၤ ဟ့ၣ်လီၤအဝဲသ့ၣ် တၢ်မုၢ်လၢ်လၢ တၢ်မူအထူအယိာ် လၢမူခိၣ်အဃိန့ၣ်လီၤ.—အ့းဖ့းစူး ၁:၁၃, ၁၄; ကလီးစဲ ၁:၅.
၁၅ ပှၤလၢအတဘၣ် တၢ်ဒိးဖှူအီၤတဖၣ်ဒၣ်လဲာ် မ့ၢ်ပာ်ဖျါထီၣ် တၢ်နာ်လၢ တၢ်ပှ့ၤက့ၤန့ၣ် အဝဲသ့ၣ် ကဲထီၣ် ယွၤအတံၤသကိးသ့ဝဲလီၤ. အဝဲသ့ၣ်စ့ၢ်ကီး အိၣ်ဒီးတၢ်ခွဲးတၢ်ယာ်လၢ ကကဲထီၣ်ယွၤအဖိဒီး အိၣ်မူဘၣ်လၢ ဟီၣ်ခိၣ်ပၤရဒံစူးအပူၤ လီၤထူလီၤယိာ်န့ၣ်လီၤ. တၢ်ပှ့ၤက့ၤအံၤ ပာ်ဖျါထီၣ်ဝဲလၢ ယဟိဝၤယွၤ အဲၣ်ပှၤဟီၣ်ခိၣ်ဖိခဲလၢာ်န့ၣ်လီၤ. (ယိၤဟၣ် ၃:၁၆) ပမ့ၢ်မၤကစၢ်ယွၤ အတၢ်မၤလၢ တၢ်သးတီအပူၤန့ၣ် အဝဲကဟ့ၣ်ပှၤ တၢ်အိၣ်မူအဂ့ၤကတၢၢ်လၢ အတၢ်ရဲၣ်တၢ်ကျဲၤအသီပူၤအဃိ မ့ၢ်တၢ်လၢအလီၤသူၣ်ပိၢ်သးဝးဒိၣ်မးလီၤ. လၢတၢ်န့ၣ်အဃိ မ်ပပာ်လုၢ်ပာ်ပှ့ၤ တၢ်ပှ့ၤက့ၤန့ၣ်တက့ၢ်. တၢ်အံၤပာ်ဖျါထီၣ် ယွၤအတၢ်အဲၣ်ပှၤ လီၤထူလီၤယိာ်န့ၣ်လီၤ.
ပာ်ဖျါထီၣ် နတၢ်အဲၣ် ယဟိဝၤယွၤ
၁၆. ဖဲပဆိကမိၣ်ထံ ကစၢ်ယွၤအတၢ်အဲၣ်အခါ ပကအဲၣ်ဒိးမၤတၢ်မနုၤလဲၣ်.
၁၆ ယဟိဝၤယွၤ အတၢ်အဲၣ်ပှၤဒိၣ်ထဲလဲၣ်န့ၣ် ပဂံၢ်ထီၣ်ဒွးထီၣ်အီၤတသ့ဘၣ်. စီၤပၤစီၤဒၤဝံး သးဝံၣ်ထီၣ်ဝဲဒ်အံၤ– “ဒီးကစၢ်ဧၢ, နတၢ်ဆိကမိၣ်န့ၣ် မ့ၢ်တၢ်လုၢ်ဒိၣ်ပှ့ၤဒိၣ် ဒီးယၤဆံးဒိၣ်လဲၣ်, အတၢ်ဂံၢ်မ့ၢ်ဆံးအါလဲၣ်. ယမ့ၢ်ဂံၢ်အီၤ, ဒီးအိၣ်ဝဲအါန့ၢ် မဲးအဖျၢၣ်တက့ၢ်လီၤ.” (စံးထီၣ်ပတြၢၤ ၁၃၉: ၁၇, ၁၈) ဖဲပဆိကမိၣ်ထံ ယဟိဝၤယွၤ ပာ်ဖျါထီၣ်အတၢ်အဲၣ်ပှၤဒ်လဲၣ်အဂ့ၢ်န့ၣ် ထိၣ်ဂဲၤထီၣ်ပှၤလၢ ပကအဲၣ်ဆၢက့ၤအီၤ ဒီးဟ့ၣ်အီၤတၢ်လၢ အဂ့ၤကတၢၢ်လီၤ.
၁၇, ၁၈. ပပာ်ဖျါထီၣ် ပတၢ်အဲၣ်ကစၢ်ယွၤ လၢကျဲအဂုၤအဂၤတဖၣ် ကသ့ဒ်လဲၣ်.
၁၇ ပပာ်ဖျါထီၣ် ပတၢ်အဲၣ်ယဟိယွၤ သ့လၢကျဲအါဘိန့ၣ်လီၤ. အဒိ ပပာ်ဖျါထီၣ် ပတၢ်အဲၣ်ယဟိဝၤယွၤ ခီဖျိပတဲဘၣ်ပှၤဂၤ လၢဘီမုၢ်တၢ်သးခုကစီၣ်အဂ့ၢ် လၢတၢ်သူၣ်ဆူၣ်သးဆူၣ်အပူၤလီၤ. (မးသဲ ၂၄:၁၄; ၂၈:၁၉, ၂၀) ပပာ်ဖျါထီၣ်စ့ၢ်ကီး ပတၢ်အဲၣ်ကစၢ်ယွၤ ခီဖျိပသးတီဒီးအီၤဖဲ ပတၢ်စူၢ်တၢ်နာ် ဘၣ်တၢ်မၤကွၢ်အီၤအခါန့ၣ်လီၤ. (ဖး စံးထီၣ်ပတြၢၤ ၈၄:၁၀; ယၤကိာ် ၁:၂–၅ တက့ၢ်.) ပမ့ၢ်ဘၣ်ကွၢ်ဆၢၣ်မဲာ် တၢ်လ့ပစီနးနးကလဲာ်ဒၣ်လဲာ် ပနာ်သ့သပှၢ်တၢၢ်လၢ ယဟိဝၤယွၤ နၢ်ပၢၢ်ဝဲပတၢ်တူၢ်ဘၣ်လီၤ. ဒီးအဝဲကမၤစၢၤပှၤ မ့ၢ်လၢပမ့ၢ် တၢ်လုၢ်ဒိၣ်ပှ့ၤဒိၣ်လၢ အဂီၢ်န့ၣ်လီၤ.—စံးထီၣ်ပတြၢၤ ၅၆:၈.
၁၈ ပတၢ်အဲၣ် ယဟိဝၤယွၤန့ၣ် ထိၣ်ဂဲၤထီၣ်ပှၤလၢ ပကဆိကမိၣ်ထံ အတၢ်ဘၣ်တ့လၢအ လီၤလိၢ်လီၤလးတဖၣ်န့ၣ်လီၤ. ပပာ်ဖျါထီၣ် ပတၢ်အဲၣ်ယဟိဝၤယွၤ ဒီးကစၢ်အကလုၢ်ကထါ ခီဖျိလၢပဖးဒီးဃုသ့ၣ်ညါ လံာ်စီဆှံန့ၣ်လီၤ. ပဃ့ဘါထုကဖၣ်တၢ်ဆူ ယဟိဝၤယွၤအအိၣ်ထီဘိ မ့ၢ်လၢပအဲၣ်အီၤဒီး ပအဲၣ်ဒိးမၤဂၢၢ်မၤကျၢၤထီၣ် ပတၢ်ရ့လိာ်သးဒီးအီၤအဃိလီၤ. ဖဲပဆိကမိၣ်ထံ အတၢ်ဟ့ၣ်လၢအမ့ၢ် တၢ်ပှ့ၤက့ၤအခါ ပတၢ်အဲၣ်အီၤန့ၣ် ဒိၣ်ထီၣ်အါထီၣ်ဝဲလီၤ. (၁ ယိၤဟၣ် ၂:၁, ၂) တၢ်သ့ၣ်တဖၣ်အံၤ မ့ၢ်ဝဲကျဲတနီၤလၢ ပပာ်လုၢ်ပာ်ပှ့ၤ ယဟိဝၤယွၤ အတၢ်အဲၣ် အထူအယိာ်လၢပဂီၢ်န့ၣ်လီၤ.
