“ဆၢထၢၣ်ကျၢၤကျၢၤလၢ တၢ်နာ်အပူၤတက့ၢ်”
“ဆၢထၢၣ်ကျၢၤကျၢၤ လၢတၢ်စူၢ်တၢ်နာ်အပူၤတက့ၢ်. . . . အိၣ်ဒီးတၢ်ဂံၢ်တၢ်ဘါတက့ၢ်.”—၁ ကရံၣ်သူး ၁၆:၁၃, ခ့ခါစှီၤကျိာ်.
တၢ်သးဝံၣ်- ၆၀, ၆၄
၁. (က) ကလံၤမုၢ်လီၤဖဲ ပီၣ်လဲၣ်ကၤလံၤလါအခါ တၢ်မၤအသးဒီး စီၤပ့းတရူးဒ်လဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.) (ခ) ဘၣ်မနုၤအဃိ စီၤပ့းတရူး စးထီၣ်လီၤဘျၢဝဲလဲၣ်.
ဘၣ်တနၤ ဖဲကလံၤမုၢ်လီၤအခါ တၢ်မၢဖိစီၤပ့းတရူး ဒီးယ့ၣ်ၡူးအပျဲၢ်အဘီၣ်တနီၤ ဘၣ်ခီဂာ်ဝဲ ပီၣ်လဲၣ်ကၤလံၤလါ ကီကီခဲခဲန့ၣ်လီၤ. လၢတၢ်တဆိကမိၣ်အပူၤ အဝဲသ့ၣ်ထံၣ် ယ့ၣ်ၡူးဟးလၢ ထံဖံးခိၣ်န့ၣ်လီၤ. စီၤပ့းတရူးကိးစိဃီၤ ယ့ၣ်ၡူး ဒီးသံကွၢ်ဝဲလၢ ယလဲၤဃီၤဆူနအိၣ်ကသ့ဧါ. ဖဲယ့ၣ်ၡူးစံးဘၣ်အီၤလၢ ဟဲသ့အခါန့ၣ် အဝဲဟးထီၣ်လၢကဘီပူၤဒီး စးထီၣ်လဲၤဝဲဆူ ယ့ၣ်ၡူးအအိၣ်လီၤ. ဘၣ်ဆၣ် တယံာ်တမီၢ် စီၤပ့းတရူး စးထီၣ်လီၤဘျၢဝဲလီၤ. ဘၣ်မနုၤအဃိလဲၣ်. ခီဖျိလၢအကွၢ်ဝဲ ကလံၤမုၢ်, လပီ ဒီးပျံၤတၢ်အဃိန့ၣ်လီၤ. စီၤပ့းတရူး ဃ့တၢ်မၤစၢၤလၢ ယ့ၣ်ၡူးအအိၣ် ဒီးကစၢ်ဟံးဃာ်အစုဒီး စံးဝဲဒၣ်– “ပှၤနာ်တၢ်စှၤဧၢ, ဘၣ်မနုၤလၢနသးဒ့ဒီလဲၣ်.” —မးသဲ ၁၄:၂၄-၃၂.
၂. ခဲအံၤ ပကတဲသကိး တၢ်ဂ့ၢ်မနုၤလဲၣ်.
၂ ပကကွၢ်သကိး တၢ်ဂ့ၢ်သၢမံၤ ဘၣ်ဃးဒီးတၢ်နာ်အဂ့ၢ်လၢ ပမၤလိန့ၢ်လၢ စီၤပ့းတရူးအတၢ်လဲၤခီဖျိသ့န့ၣ်လီၤ– (၁) အဆိကတၢၢ်န့ၣ် စီၤပ့းတရူး နာ်ဝဲလၢ ယဟိဝၤယွၤ မၤစၢၤအီၤသ့အဂ့ၢ်, (၂) ဘၣ်မနုၤအဃိ စီၤပ့းတရူး အတၢ်နာ်လီၤစှၤဝဲလဲၣ်, ဒီး (၃) စီၤပ့းတရူး အတၢ်နာ် ကဆူၣ်ထီၣ်က့ၤအဂီၢ် တၢ်မနုၤမၤစၢၤအီၤလဲၣ်. ပမ့ၢ်သမံသမိးကွၢ် တၢ်ဂ့ၢ်တဖၣ်အံၤန့ၣ် ကမၤစၢၤပှၤ ဒ်သိးပကသ့ၣ်ညါထီၣ်လၢပ “ဆၢထၢၣ်ကျၢၤကျၢၤ လၢတၢ်စူၢ်တၢ်နာ်အပူၤ” ကသ့ဒ်လဲၣ်အဂ့ၢ်န့ၣ်လီၤ.—၁ ကရံၣ်သူး ၁၆:၁၃, ခ့ခါစှီၤကျိာ်.
တၢ်နာ်လၢ ကစၢ်ယွၤ မၤစၢၤပှၤ
၃. ဘၣ်မနုၤအဃိ စီၤပ့းတရူး ဟးထီၣ်လၢကဘီအပူၤလဲၣ်, ဒီးပဝဲသ့ၣ်တဖၣ်စ့ၢ်ကီး ပမၤတ့ၢ်တၢ်မနုၤလဲၣ်.
၃ စီၤပ့းတရူး အိၣ်ဒီးတၢ်နာ်လၢ အဂၢၢ်အကျၢၤလီၤ. ဘၣ်မနုၤအဃိ ပတဲဒ်န့ၣ်သ့ဝဲလဲၣ်. ဖဲယ့ၣ်ၡူး ကိးအီၤအခါ အဝဲဟးထီၣ်လၢ ကဘီပူၤဒီး ဟးဝဲလၢ ထံဖံးခိၣ်န့ၣ်လီၤ. စီၤပ့းတရူး နာ်ဝဲလၢ ကစၢ်ယွၤ အစိအကမီၤ ကဟ့ၣ်အီၤ တၢ်သ့တၢ်ဘၣ် ဒ်သိးဒီးယ့ၣ်ၡူးန့ၣ်လီၤ. ဒ်န့ၣ်အသိး, ဖဲယ့ၣ်ၡူး ကွဲမုာ်ပှၤလၢ ပကပိာ်ထီၣ်အခံအခါ, ပလုၢ်ထီၣ်ပသးဆူ ယဟိဝၤယွၤအအိၣ်ဒီး ဒိးဘျၢပသးလၢထံန့ၣ်လီၤ. ဘၣ်မနုၤအဃိလဲၣ်. မ့ၢ်လၢပအိၣ်ဒီး တၢ်နာ်ယဟိဝၤယွၤ ဒီးယ့ၣ်ၡူး ဒီးပသ့ၣ်ညါလၢအဝဲသ့ၣ် ကမၤစၢၤပှၤအဃိန့ၣ်လီၤ.—ယိၤဟၣ် ၁၄:၁; ဖး ၁ ပ့းတရူး ၂:၂၁ တက့ၢ်.
၄, ၅. ဘၣ်မနုၤအဃိ တၢ်နာ်န့ၣ်မ့ၢ်တၢ်န့ၢ်သါလၢ အလုၢ်ဒိၣ်ပှ့ၤဒိၣ်တခါလဲၣ်.
၄ တၢ်နာ်န့ၣ် မ့ၢ်ဝဲတၢ်လုၢ်ဒိၣ်ပှ့ၤဒိၣ်တခါလီၤ. စီၤပ့းတရူး အတၢ်နာ်မၤစၢၤအီၤလၢ ကဟးလၢ ထံဖံးခိၣ်န့ၣ်လီၤ. မ့မ့ၢ်လၢ ပှၤဟီၣ်ခိၣ်ဖိအတၢ်ထံၣ်န့ၣ် တၢ်အံၤကဲထီၣ်အသးတသ့ လ့ၤတက့ၤဘၣ်. ဒ်န့ၣ်အသိး တၢ်နာ်အံၤ ကမၤစၢၤစ့ၢ်ကီးပှၤ ဒ်သိးပကမၤတၢ်လၢ ပဆိကမိၣ်လၢ ပမၤအီၤတသ့ဘၣ်တဖၣ်န့ၣ်လီၤ. (မးသဲ ၂၁:၂၁, ၂၂) ပဝဲသ့ၣ်အကျါတနီၤန့ၣ် ပဆီတလဲ ပတၢ်ပာ်သူၣ်ပာ်သး ဒီးလုၢ်လၢ်သကဲာ်ပဝး တုၤဒၣ်လဲာ် ပှၤလၢအသ့ၣ်ညါတ့ၢ်ပှၤ လၢညါတဖၣ် ကမၢကမၣ်ဝဲလၢ တၢ်အံၤအဃိလီၤ. ပဆီတလဲ ပတၢ်အိၣ်မူ ခီဖျိလၢပအဲၣ် ယဟိဝၤယွၤ ဒီးမ့ၢ်လၢ အဝဲမၤစၢၤပှၤဒ်သိး ပဆီတလဲပသးကန့ၢ်အဂီၢ်လီၤ. (ဖး ကလီးစဲ ၃:၅-၁၀ တက့ၢ်.) တၢ်နာ်အံၤ ထိၣ်ဟူးထိၣ်ဂဲၤထီၣ်ပှၤလၢ ပကလုၢ်ထီၣ်ပသးဆူ ယဟိဝၤယွၤအအိၣ် ဒီးပကဲထီၣ် အတံၤသကိး ခီဖျိလၢ အတၢ်မၤစၢၤအဃိန့ၣ်လီၤ.—အ့းဖ့းစူး ၂:၈.
၅ ပတၢ်နာ်န့ၣ် မၤဆူၣ်ထီၣ်ပဂံၢ်ပဘါလီၤ. အဒိ တၢ်နာ်မၤစၢၤပှၤလၢ ပကဒုးထီဒါ မုၣ်ကီၤလံၢ် လၢအမ့ၢ်ဒုၣ်ဒါလၢ အဂံၢ်ဆူၣ်တဂၤန့ၣ်လီၤ. (အ့းဖ့းစူး ၆:၁၆) မ့ၢ်လၢပနာ်န့ၢ် ယဟိဝၤယွၤအဃိ ပမ့ၢ်အိၣ်ဒီးတၢ်ကီတၢ်ခဲဒၣ်လဲာ် ပတဘၣ်ယိၣ်တၢ်ဒိၣ်ဒိၣ်ဘၣ်. ယဟိဝၤယွၤအၢၣ်လီၤအီလီၤပှၤလၢ ကဟ့ၣ်ပှၤ တၢ်လၢပလိၣ်ဘၣ်တဖၣ် ထဲဒၣ်ပမ့ၢ်နာ်အီၤဒီး ဃုဆိအဘီအမုၢ်န့ၣ်လီၤ. (မးသဲ ၆:၃၀-၃၄) ခီဖျိလၢ ပအိၣ်ဒီးတၢ်နာ်အဃိ ကစၢ်ယွၤကဟ့ၣ်ပှၤ တၢ်ဟ့ၣ်လၢ အလုၢ်ဒိၣ်ပှ့ၤဒိၣ် လၢအမ့ၢ်တၢ်မူအထူအယိာ်န့ၣ်လီၤ.—ယိၤဟၣ် ၃:၁၆.
ပတၢ်သးစၢၢ်ဆၢ မ့ၢ်လီၤမၢ်န့ၣ် ပတၢ်နာ်ကလီၤမၢ်
၆, ၇. (က) ကလံၤမုၢ်ဒီးလပီလၢ အမၤပျံၤမၤဖုး စီၤပ့းတရူးန့ၣ် ပထိၣ်သတြီၤအီၤ ဒီးတၢ်မနုၤကသ့လဲၣ်. (ခ) ဘၣ်မနုၤအဃိ ပကဘၣ်သ့ၣ်ညါလၢ ပတၢ်နာ်လီၤစှၤသ့ဝဲလဲၣ်.
၆ စီၤပ့းတရူး ဟးလၢပီၣ်လဲၣ် ကၤလံၤလါ အထံဖံးခိၣ် ဒီးအဝဲပျံၤထီၣ်တၢ်လီၤ. ဘၣ်မနုၤအဃိလဲၣ်. မ့ၢ်လၢကလံၤမုၢ် ဒီးလပီအဃိန့ၣ်လီၤ. တၢ်အံၤ ပထိၣ်သတြီၤအီၤသ့လၢ တၢ်ကီတၢ်ခဲဒီး တၢ်မၤကွၢ်တဖၣ်လၢ ခရံာ်ဖိတဖၣ် ဘၣ်ကွၢ်ဆၢၣ်မဲာ်ဝဲန့ၣ်လီၤ. တၢ်မၤကွၢ်တဖၣ်အံၤ မ့ၢ်ကီခဲထဲလဲၣ်ဘၣ်ဆၣ် ပအိၣ်ဂၢၢ်အိၣ်ကျၢၤသ့ လၢယဟိဝၤယွၤ အတၢ်မၤစၢၤအဃိန့ၣ်လီၤ. ဘၣ်ဆၣ် သ့ၣ်နီၣ်ထီၣ်က့ၤ တၢ်မၤအသးဒီး စီၤပ့းတရူးန့ၣ်တက့ၢ်. အဝဲလီၤဘျၢဝဲ တမ့ၢ်လၢကလံၤဒီးလပီ ဘၣ်အီၤအဃိဘၣ်. လံာ်စီဆှံစံးဝဲ– “တုၤအထံၣ် ကလံၤဆူၣ်ဆူၣ်ကလဲာ်ဒီး သူၣ်ပျံၤသးဖုးဝဲ” လီၤ. (မးသဲ ၁၄:၃၀) ဖဲစီၤပ့းတရူး တကွၢ်ဃီၤလၢၤဝဲဆူယ့ၣ်ၡူးအအိၣ် ဒီးကွၢ်ဝဲကလံၤမုၢ်အခါ အတၢ်နာ်လီၤစှၤဝဲလီၤ. ဒ်န့ၣ်အသိး ပဝဲစ့ၢ်ကီး ပမ့ၢ်ဘၣ်ယိၣ်တၢ်ထဲ တၢ်ကီတၢ်ခဲလၢ ပကွၢ်ဆၢၣ်မဲာ်ဘၣ်အီၤတဖၣ်န့ၣ် ပတၢ်သးဒ့ဒီ ကအိၣ်ထီၣ်လၢ ကစၢ်ယွၤ အတၢ်မၤစၢၤပှၤန့ၣ်လီၤ.
၇ ပကဘၣ်သ့ၣ်ညါလၢ ပတၢ်နာ်အံၤ လီၤစှၤသ့ဝဲလီၤ. ဘၣ်မနုၤအဃိလဲၣ်. တၢ်နာ်လီၤစှၤန့ၣ် လံာ်စီဆှံစံးဝဲလၢအမ့ၢ် “တၢ်ဒဲးဘးလၢ ပမၤအီၤညီ” တခါန့ၣ်လီၤ. (ဧ့ၤဘြံၤ ၁၂:၁) ဒ်စီၤပ့းတရူးအသိး ပမ့ၢ်သးစၢၢ်ဆၢ တၢ်လၢ အတကြၢးဘၣ်တဖၣ်န့ၣ် ပတၢ်နာ် ကလီၤစှၤလၢ အဆိအချ့လီၤ. လၢတၢ်န့ၣ်အဃိ ပတၢ်နာ်လီၤစှၤဝဲန့ၣ် ပသ့ၣ်ညါအီၤကသ့ဒ်လဲၣ်. တၢ်သံကွၢ်လၢ လာ်အံၤ ကမၤစၢၤပှၤလၢ ပကသမံသမိးလီၤက့ၤပသးအဂီၢ်လီၤ.
၈. ပတၢ်နာ် ကစၢ်ယွၤ အတၢ်အၢၣ်လီၤတဖၣ်န့ၣ် လီၤစှၤသ့ဝဲဒ်လဲၣ်.
၈ ယွၤအတၢ်အၢၣ်လီၤတဖၣ်န့ၣ် မ့ၢ်ယနာ်အီၤ ဒ်လၢညါအသိးဧါ. အဒိကစၢ်ယွၤ အၢၣ်လီၤပှၤလၢ အဝဲကမၤဟးဂီၤကွံာ်ဝဲ ဟီၣ်ခိၣ်လၢ မုၣ်ကီၤလံၢ်ပၢအီၤန့ၣ်လီၤ. ဘၣ်ဆၣ် မ့ၢ်ပသးဒံဝ့ၤဒံဝီၤလၢ ဟီၣ်ခိၣ် အတၢ်မၤမုာ်မၤဖှံသးတဖၣ်အဃိဧါ. မ့မ့ၢ်ဘၣ်ဖုး ဒ်န့ၣ်န့ၣ် ပကသးဒ့ဒီ လၢတၢ်အကတၢၢ် ဘူးထီၣ်လံန့ၣ်လီၤ. (ဃးဘးကူာ် ၂:၃) ဆိကမိၣ်ကွၢ် တၢ်အဒိအတဲာ်လၢ အဂၤတခါတက့ၢ်. ယဟိဝၤယွၤ ရဲၣ်ကျဲၤတၢ်ပှ့ၤက့ၤဒီး အၢၣ်လီၤအီလီၤဝဲလၢ အကပျၢ်ကွံာ် ပတၢ်ကမၣ်တဖၣ်န့ၣ်လီၤ. ဘၣ်ဆၣ် ပမ့ၢ်ဆိကမိၣ်ထဲ ပတၢ်ကမၣ်လၢ အပူၤကွံာ်တဖၣ်အဂ့ၢ်န့ၣ် ပကသးဒ့ဒီလၢ မ့ၢ်ကစၢ်ယွၤ ပျၢ်ကွံာ်ပတၢ်ကမၣ် နီၢ်နီၢ်ဧါန့ၣ်လီၤ. (မၤတၢ် ၃:၁၉) ပမ့ၢ်ဆိကမိၣ်ဒ်န့ၣ်န့ၣ် ဘၣ်သ့ၣ်သ့ၣ် တမ့ၢ်လၢပကအိၣ်ဒီး တၢ်သူၣ်ခုသးခုလၢ ကစၢ်ယွၤ အတၢ်မၤအပူၤလၢၤဘၣ် ဒီးပတဟးစံၣ်တဲၤတဲလီၤတၢ်စ့ၢ်ကီးလၢၤဘၣ်.
၉. ပမ့ၢ်သးစၢၢ်ဆၢထဲ ပနီၢ်ကစၢ် အတၢ်လိၣ်ဘၣ်တဖၣ်န့ၣ် တၢ်ကမၤအသးဒ်လဲၣ်.
၉ မ့ၢ်ယဟ့ၣ် ယဟိဝၤယွၤ တၢ်လၢ အဂ့ၤကတၢၢ်လံဧါ. ဖဲပဂုာ်ကျဲးစၢးမၤတၢ်လၢ ယဟိဝၤယွၤအဂီၢ်အခါ တၢ်အံၤမၤစၢၤပှၤ ဒ်သိးပကသးစၢၢ်ဆၢ ပတၢ်မုၢ်လၢ်လၢ ခါဆူညါန့ၣ်လီၤ. ဘၣ်ဆၣ် ပမ့ၢ်သးစၢၢ်ဆၢထဲ ပနီၢ်ကစၢ်အတၢ်လိၣ်ဘၣ်တဖၣ်န့ၣ် တၢ်ကမၤအသးဒ်လဲၣ်. အဒိ ပကတူၢ်လိာ် တၢ်မၤလၢ ပကဒိးန့ၢ်ဘၣ်စ့အါအါ ဘၣ်ဆၣ် ပမၤယဟိဝၤယွၤ အတၢ်မၤ ကလီၤစှၤဝဲလီၤ. တၢ်အံၤကမၤလီၤစှၤ ပတၢ်နာ်, ပက “ကၢၣ်” ထီၣ်ဒီးပတမၤလၢၤ ယွၤအတၢ်မၤ အါထဲသိးလၢညါလၢၤဘၣ်.—ဧ့ၤဘြံၤ ၆:၁၀-၁၂.
၁၀. ဖဲပပျၢ်ပှၤဂၤ အတၢ်ကမၣ်အခါ ပပာ်ဖျါထီၣ် ပတၢ်နာ် ယဟိဝၤယွၤဒ်လဲၣ်.
၁၀ မ့ၢ်ကီဝဲလၢယကပျၢ်ပှၤအဂၤ အတၢ်ကမၣ်စ့ၢ်ကီးဧါ. ဖဲပှၤအဂၤတဖၣ် မၤဆါပှၤ မ့တမ့ၢ် မၤဘၣ်ဒိပသးအခါ မ့ၢ်ပသးထီၣ် အဝဲသ့ၣ် တုၤဒၣ်လဲာ် ပတကတိၤတၢ်ဒီး အဝဲသ့ၣ်လၢၤဘၣ်ဧါ. ပမ့ၢ်မၤဒ်န့ၣ်န့ၣ် ဘၣ်သ့ၣ်သ့ၣ် အခီပညီမ့ၢ်ဝဲဒၣ် ပသးစၢၢ်ဆၢထဲ ပနီၢ်ကစၢ်အတၢ်တူၢ်ဘၣ်တဖၣ်န့ၣ်လီၤ. ဖဲပပျၢ်ပှၤဂၤ အတၢ်ကမၣ်အခါ ပပာ်ဖျါထီၣ် ပတၢ်နာ်ယဟိဝၤယွၤန့ၣ်လီၤ. လၢကျဲဒ်လဲၣ်. ပှၤဂၤမၤကမၣ်ဘၣ်ပှၤအခါန့ၣ် အဝဲသ့ၣ်အကမၢ်ထီၣ်ဒီးပှၤလီၤ. ဒ်န့ၣ်အသိး ဖဲပမၤကမၣ်ယဟိဝၤယွၤအခါ ပကမၢ်ထီၣ်စ့ၢ်ကီးဒီးအီၤလီၤ. (လူၤကၣ် ၁၁:၄) ဖဲပပျၢ်ပှၤဂၤ အတၢ်ကမၣ်အခါန့ၣ် မ့ၢ်ပနာ်ယဟိဝၤယွၤနီၢ်နီၢ်လီၤ. ပနာ်လၢအဝဲကဆိၣ်ဂ့ၤပှၤဒီး အတၢ်ဆိၣ်ဂ့ၤန့ၣ် အလုၢ်အပှ့ၤဒိၣ်န့ၢ်ဒံး ပတၢ်မၤကၣ်ပှၤဂၤန့ၣ်လီၤ. ယ့ၣ်ၡူးအပျဲၢ်အဘီၣ်တဖၣ် သ့ၣ်ညါဝဲလၢ အဝဲသ့ၣ် ကဘၣ်အိၣ်ဒီးတၢ်နာ် ဒ်သိးကပျၢ်ပှၤဂၤ အတၢ်ကမၣ်အဂီၢ်လီၤ. ဖဲယ့ၣ်ၡူးတဲဘၣ် အပျဲၢ်အဘီၣ်လၢ အဝဲသ့ၣ်ကဘၣ်ပျၢ်ပှၤဂၤ အတၢ်ကမၣ်အါဘျီအခါ အဝဲသ့ၣ်တဖၣ်န့ၣ် ဃ့ကညးအီၤဒီး စံးဝဲဒၣ် “မၤအါထီၣ် ပတၢ်နာ်တက့ၢ်.”—လူၤကၣ် ၁၇:၁-၅.
၁၁. ဘၣ်မနုၤအဃိ ပတဒိးန့ၢ်ဘၣ် တၢ်ဟ့ၣ်ကူၣ်အဘျုးသ့ဝဲလဲၣ်.
၁၁ ဖဲနဘၣ်တၢ်သိၣ်က့ၤသီက့ၤအခါ မ့ၢ်နသးထီၣ်တၢ် စ့ၢ်ကီးဧါ. ဃုကျဲလၢ နကဒိးန့ၢ်ဘၣ် တၢ်အဘျုးလၢ တၢ်ဟ့ၣ်ကူၣ်အံၤတက့ၢ်. တဘၣ်ဃု ပှၤလၢ အသိၣ်က့ၤသီက့ၤနၤတဂၤ အတၢ်ကမၣ် မ့တမ့ၢ် အတၢ်ဂံၢ်စၢ်ဘါစၢ်န့ၣ်တဂ့ၤ. (ကတိၤဒိ ၁၉:၂၀) ပကြၢးဂုာ်ကျဲးစၢး ဆိကမိၣ်တၢ် ဒ်ယဟိဝၤယွၤ ဆိကမိၣ်ဝဲအသိးန့ၣ်လီၤ.
၁၂. ပှၤတဖၣ်လၢအကဒူးကဒ့ၣ် ပှၤတီခိၣ်ရိၣ်မဲတၢ် လၢယဟိဝၤယွၤ အတၢ်ကရၢကရိအပူၤန့ၣ် ဘၣ်မနုၤအဃိ တၢ်ဘၣ်ယိၣ်အိၣ်လၢအဂီၢ်လဲၣ်.
၁၂ မ့ၢ်ယကဒူးကဒ့ၣ် ပှၤတီခိၣ်ရိၣ်မဲတၢ်လၢ တၢ်အိၣ်ဖှိၣ်အပူၤတဖၣ်စ့ၢ်ကီးဧါ. ဖဲပှၤအံၣ်စရ့လးဖိ နၢ်ဟူဘၣ် တၢ်ကစီၣ်လီၤပျံၤလီၤဖုးလၢ ပှၤလဲၤကွၢ်ဟုၣ်တၢ် အဂၤတဆံအအိၣ်အဆၢကတီၢ်န့ၣ် အဝဲသ့ၣ်တဖၣ် ကဒူးကဒ့ၣ် စီၤမိၤၡ့ဒီး စီၤအၤဟရိၣ်န့ၣ်လီၤ. တၢ်န့ၣ်အလီၢ်ခံ ယဟိဝၤယွၤ သံကွၢ်စီၤမိၤၡ့လၢ အဝဲသ့ၣ်– “တနာ်ယၤဘၣ်ဒီး ကအိၣ်ဆံးယံာ်လဲၣ်.” (၄ မိၤၡ့ ၁၄:၂-၄, ၁၁) ယဟိဝၤယွၤ သ့ၣ်ညါဝဲလၢ အဝဲသ့ၣ်တနာ်အီၤဘၣ် ခီဖျိလၢ အဝဲသ့ၣ် ကဒူးကဒ့ၣ် ပှၤလၢအဘၣ်တၢ်ဃုထၢအီၤလၢ အမ့ၢ်စီၤမိၤၡ့ဒီး စီၤအၤဟရိၣ်အဃိန့ၣ်လီၤ. ဒ်န့ၣ်အသိး ထီဘိန့ၣ် ပမ့ၢ်ကဒူးကဒ့ၣ် ပှၤလၢယဟိဝၤယွၤသူအီၤလၢ ကတီခိၣ်ရိၣ်မဲ အတၢ်ကရၢကရိ လၢမုၢ်မဆါတနံၤအံၤန့ၣ် တၢ်အံၤဒုးသ့ၣ်ညါပှၤလၢ ပတၢ်နာ်ယွၤလီၤစှၤဝဲလံ.
၁၃. ပမ့ၢ်ထံၣ်လၢ ပတၢ်နာ်လီၤစှၤဝဲန့ၣ် ဘၣ်မနုၤအဃိ ပတဘၣ်သးဟးဂီၤလဲၣ်.
၁၃ ဖဲပတဲသကိး တၢ်သံကွၢ်တဖၣ်အံၤ ဝံၤအလီၢ်ခံ နမ့ၢ်ထံၣ်ဘၣ်လၢ နတၢ်နာ်လီၤစှၤဝဲန့ၣ် တဘၣ်သူၣ်အုးသးအုးတဂ့ၤ. သ့ၣ်နီၣ်ထီၣ်က့ၤလၢ တၢ်မၢဖိစီၤပ့းတရူးဒၣ်လဲာ် ပျံၤတၢ်ဒီး အသးဒ့ဒီဝဲန့ၣ်တက့ၢ်. တဘျီတခီၣ် ယ့ၣ်ၡူးသိၣ်က့ၤသီက့ၤ အတၢ်မၢဖိကိးဂၤဒဲး ခီဖျိလၢ အဝဲသ့ၣ် “နာ်တၢ်စှၤ” အဃိန့ၣ်လီၤ. (မးသဲ ၁၆:၈) ဘၣ်ဆၣ်ဒီး လၢစီၤပ့းတရူး အတၢ်လဲၤခီဖျိန့ၣ် ပဒိးန့ၢ်ဘၣ် တၢ်မၤလိလၢ အရ့ဒိၣ်တခါလီၤ. ပာ်သူၣ်ပာ်သးလၢ စီၤပ့းတရူး အသးဒ့ဒီဒီး လီၤဘျၢဝဲဝံၤအလီၢ်ခံန့ၣ် အဝဲမၤတၢ်မနုၤလဲၣ်.
သးစၢၢ်ဆၢ ယ့ၣ်ၡူး ဒ်သိးပတၢ်နာ် ကဆူၣ်ထီၣ်အဂီၢ်တက့ၢ်
၁၄, ၁၅. (က) ဖဲစီၤပ့းတရူး လီၤဘျၢဝဲအခါ အဝဲမၤတၢ်မနုၤလဲၣ်. (ခ) ပ “ကွၢ်ဃီၤတၢ်” ဆူယ့ၣ်ၡူးအအိၣ်ကသ့ဒ်လဲၣ်.
၁၄ ဖဲစီၤပ့းတရူး လီၤဘျၢဝဲအခါ အဝဲမၤတၢ်မနုၤလဲၣ်. စီၤပ့းတရူး မ့ၢ်ပှၤလၢ အပီၢ်ထံသ့ဂ့ၤဂ့ၤတဂၤလီၤ. အဝဲမ့ၢ်အဲၣ်ဒိး က့ၤပီၢ်ကဒါက့ၤဝဲဆူ အကဘီအအိၣ်န့ၣ်သ့ဝဲလီၤ. (ယိၤဟၣ် ၂၁:၇) ဘၣ်ဆၣ် ဘၣ်မနုၤအဃိ အဝဲတမၤဝဲ ဒ်န့ၣ်လဲၣ်. မ့ၢ်လၢအဝဲတမ့ၢ် ပှၤတဂၤလၢ အနာ်အီၣ်လီၤအနီၢ်ကစၢ်အသးအဃိဘၣ်. အဝဲသးစၢၢ်ဆၢကဒီး ယ့ၣ်ၡူး ဒီးတူၢ်လိာ်အတၢ်မၤစၢၤန့ၣ်လီၤ. ပမ့ၢ်သ့ၣ်ညါလီၤပသးလၢ ပတၢ်နာ်စှၤလီၤဝဲလံန့ၣ် ပကဘၣ်ကွၢ်လိ စီၤပ့းတရူးန့ၣ်လီၤ. ပမၤအီၤကသ့ဒ်လဲၣ်.
၁၅ ဒ်စီၤပ့းတရူး သးစၢၢ်ဆၢဝဲလၢ ကဒိးန့ၢ်ဘၣ် တၢ်မၤစၢၤလၢ ယ့ၣ်ၡူးအအိၣ်အသိး ပဝဲသ့ၣ်စ့ၢ်ကီး ပကဘၣ် “ကွၢ်ဃီၤတၢ်” ဆူယ့ၣ်ၡူးအအိၣ်လီၤ. (ဖး ဧ့ၤဘြံၤ ၁၂:၂, ၃ တက့ၢ်.) ဘၣ်ဆၣ် ပတထံၣ်ဘၣ်ယ့ၣ်ၡူး ဒ်စီၤပ့းတရူးထံၣ်ဝဲအသိးဘၣ်. လၢတၢ်န့ၣ်အဃိပ “ကွၢ်ဃီၤတၢ်” ဆူယ့ၣ်ၡူးအအိၣ် ကသ့ဒ်လဲၣ်. ပမၤအီၤသ့ ခီဖျိလၢ ပဃုသ့ၣ်ညါ တၢ်လၢယ့ၣ်ၡူးသိၣ်လိဝဲ ဒီးမၤဝဲတဖၣ်န့ၣ်လီၤ. တကးဒံးဘၣ် ပကဘၣ် ကွၢ်လိအီၤဂ့ၤဂ့ၤဘၣ်ဘၣ်န့ၣ်လီၤ. ဖဲပမၤဒ်န့ၣ်အခါ ပကဒိးန့ၢ်ဘၣ် တၢ်မၤစၢၤလၢ အကဒုးဆူၣ်ထီၣ်ပတၢ်နာ်န့ၣ်လီၤ. ခဲအံၤပကကွၢ် ဆိကမိၣ် ကျဲတနီၤလၢ ပကွၢ်လိယ့ၣ်ၡူး ကသ့အဂီၢ်န့ၣ်လီၤ.
ဖဲပသးစၢၢ်ဆၢလၢ ယ့ၣ်ၡူး အတၢ်ဒိတၢ်တဲာ် ဒီးမၤဒိးအီၤ အဂ့ၤကတၢၢ်အခါ ပအိၣ်ဒီး တၢ်နာ်လၢအဂၢၢ်အကျၢၤန့ၣ်လီၤ (ကွၢ်လံာ်အဆၢ ၁၅)
၁၆. ပတၢ်နာ်ကဆူၣ်ထီၣ်အဂီၢ် လံာ်စီဆှံ မၤစၢၤပှၤကသ့ဒ်လဲၣ်.
၁၆ ဒုးဆူၣ်ထီၣ် နတၢ်နာ်လံာ်စီဆှံတက့ၢ်. ယ့ၣ်ၡူးနာ်ဝဲလၢ လံာ်စီဆှံန့ၣ် မ့ၢ်ကစၢ်ယွၤအကလုၢ်ကထါ ဒီးဟ့ၣ်ပှၤတၢ်ဟ့ၣ်ကူၣ်ဟ့ၣ်ဖး လၢအဂ့ၤကတၢၢ်န့ၣ်လီၤ. (ယိၤဟၣ် ၁၇:၁၇) ဒ်သိးပကွၢ်လိ ယ့ၣ်ၡူးကသ့အဂီၢ် ပကဘၣ်ဖး လံာ်စီဆှံကိးနံၤဒဲး, ဃုသ့ၣ်ညါအီၤ ဒီးဆိကမိၣ်ထံ တၢ်ဂ့ၢ်လၢပမၤလိဘၣ်တဖၣ်န့ၣ်လီၤ. ဖဲပအိၣ်ဒီး တၢ်သံကွၢ်အခါန့ၣ် ပကဘၣ်ဃုသ့ၣ်ညါ အတၢ်စံးဆၢစ့ၢ်ကီးန့ၣ်လီၤ. အဒိ မ့ၢ်နနာ်သပှၢ်ကတၢၢ်လၢ ပအိၣ်မူဘၣ်လၢ မုၢ်နံၤခံကတၢၢ်လံဧါ. မၤဆူၣ်ထီၣ် နတၢ်နာ် လၢတၢ်အကတၢၢ်ဘူးထီၣ် ခီဖျိမၤလိ ဝံအတၢ်စံးပာ်တဖၣ် လၢအပာ်ဖျါထီၣ်ဝဲလၢ ပအိၣ်မူဘၣ်လၢ မုၢ်နံၤခံကတၢၢ်အတီၢ်ပူၤန့ၣ်တက့ၢ်. မ့ၢ်နအဲၣ်ဒိး မၤဆူၣ်ထီၣ် နတၢ်နာ်လၢ ကစၢ်ယွၤ အတၢ်စံးပာ်ဘၣ်ဃးဒီး ခါဆူညါန့ၣ်ဧါ. နမ့ၢ်အဲၣ်ဒိးမၤဒ်န့ၣ်န့ၣ် ဃုသ့ၣ်ညါ ဝံအတၢ်စံးပာ်လၢ အဟဲလၢပှဲၤထီၣ်တ့ၢ်လံ တဖၣ်န့ၣ်တက့ၢ်. မ့ၢ်နနာ်နီၢ်ကီၢ်လၢ လံာ်စီဆှံန့ၣ် အဘျုးအိၣ်လၢ မုၢ်မဆါတနံၤအံၤဧါ. ဘၣ်ဃးဒီး ပဒီပုၢ်ဝဲၢ်တနီၤ အတၢ်အိၣ်မူ ဂ့ၤထီၣ်က့ၤဝဲအဂ့ၢ် ခီဖျိလၢ လံာ်စီဆှံ အတၢ်မၤစၢၤအဃိန့ၣ် နဖးကွၢ်သ့ဝဲလီၤ. * (ကွၢ်တၢ်ဂ့ၢ်အဘျဲၣ်တက့ၢ်.)—၁ သ့းစၤသနံ ၂:၁၃.
၁၇. ဘၣ်မနုၤအဃိ ယ့ၣ်ၡူးမၤနၢၤ တၢ်မၤကွၢ်လၢအဆူၣ်တဖၣ်န့ၣ်သ့လဲၣ်, ဒီးနကွၢ်လိအီၤ ကသ့ဒ်လဲၣ်.
၁၇ သးစၢၢ်ဆၢ တၢ်ဆိၣ်ဂ့ၤတဖၣ်လၢ ယဟိဝၤယွၤ အၢၣ်လီၤအီလီၤဝဲန့ၣ်တက့ၢ်. ယ့ၣ်ၡူးသးစၢၢ်ဆၢဝဲ တၢ်ဆိၣ်ဂ့ၤလၢ အဝဲကဒိးန့ၢ်ဘၣ်ဝဲလၢ ခါဆူညါအဃိ ကဲထီၣ်တၢ်မၤစၢၤ ဒ်သိးအဝဲကမၤနၢၤတၢ်မၤကွၢ် လၢအဆူၣ်တဖၣ်အဂီၢ်န့ၣ်လီၤ. (ဧ့ၤဘြံၤ ၁၂:၂) ဒီးအဝဲအသး တဒံဝ့ၤဒံဝီၤ လၢဟီၣ်ခိၣ် အတၢ်ကွဲန့ၢ်လွဲန့ၢ် တဖၣ်အဃိနီတဘျီဘၣ်. (မးသဲ ၄:၈-၁၀) ပကွၢ်လိ ယ့ၣ်ၡူးအဒိအတဲာ် ကသ့ဒ်လဲၣ်. ဆိကမိၣ်ထံကွၢ် ယဟိဝၤယွၤ အတၢ်စံးပာ်တဖၣ်အဂ့ၢ်တက့ၢ်. ဒီးထံၣ်တမှံလီၤက့ၤနသးလၢ နအိၣ်လၢ ဟီၣ်ခိၣ်ပၤရဒံစူးအပူၤန့ၣ်တက့ၢ်. ကွဲးလီၤ မ့တမ့ၢ် တ့တၢ်ဂီၤ ဘၣ်ဃးဒီးတၢ်လၢ နအဲၣ်ဒိးမၤအီၤလၢ ပၤရဒံစူးအပူၤန့ၣ်တက့ၢ်. မ့တမ့ၢ် ကွဲးနီၣ်စရီတဘ့ၣ် လၢဘၣ်ဃးဒီး ပှၤကဂဲၤဆၢထၢၣ်သမူထီၣ်က့ၤ လၢနအဲၣ်ဒိးထံၣ်ဘၣ်အီၤတဖၣ်အမံၤ ဒီးတၢ်ဂ့ၢ်လၢ နအဲၣ်ဒိးတဲဒီးအီၤတဖၣ်န့ၣ်တက့ၢ်. နကဘၣ်ထံၣ် ယွၤအတၢ်စံးပာ်တဖၣ် ဒ်အမ့ၢ်တၢ်နီၢ်ကီၢ်လၢနဂီၢ်န့ၣ်လီၤ.
၁၈. နတၢ်နာ် ကဂၢၢ်ကျၢၤထီၣ်အဂီၢ် တၢ်ထုကဖၣ်မၤစၢၤနၤ ကသ့ဒ်လဲၣ်.
၁၈ ဃ့ဘါထုကဖၣ် ဒ်သိးနတၢ်နာ်ကအါထီၣ်အဂီၢ်တက့ၢ်. ယ့ၣ်ၡူးသိၣ်လိ အပျဲၢ်အဘီၣ်တဖၣ်လၢ ကဃ့သးစီဆှံလၢ ယဟိဝၤယွၤအအိၣ်န့ၣ်လီၤ. (လူၤကၣ် ၁၁:၉, ၁၃) ဒ်နဃ့သးစီဆှံအသိး နကဘၣ်ဃ့အါထီၣ်တၢ်နာ်စ့ၢ်ကီးလီၤ. တၢ်နာ်န့ၣ် မ့ၢ်ဝဲဒၣ် သးအတၤသၣ်အကျါ တခါန့ၣ်လီၤ. လၢနတၢ်ထုကဖၣ်အပူၤ နဃ့တၢ် တမံၤဂ့ၤ တမံၤဂ့ၤသ့ဝဲလီၤ. အဒိ နမ့ၢ်သ့ၣ်ညါလီၤနသးလၢ မ့ၢ်ကီလၢနကပျၢ်ပှၤဂၤ အတၢ်ကမၣ်န့ၣ် ဃ့တၢ်မၤစၢၤ လၢယဟိဝၤယွၤအအိၣ် ဒ်သိးကဟ့ၣ်နၤတၢ်နာ် လၢအဂၢၢ်ကျၢၤ ဒီးကမၤစၢၤနၤလၢနကပျၢ် ပှၤဂၤအတၢ်ကမၣ်အဂီၢ်န့ၣ်တက့ၢ်.
၁၉. ပဃုထၢ တံၤသကိးလၢအဂ့ၤ ကသ့ဒ်လဲၣ်.
၁၉ ဃုထၢနတံၤသကိးတဖၣ်လၢ အိၣ်ဒီးတၢ်စူၢ်တၢ်နာ်လၢအဂၢၢ်ကျၢၤတက့ၢ်. ယ့ၣ်ၡူးဃုထၢ အတံၤသကိး လၢအရ့ဝဲဘူးဘူးတံၢ်တံၢ်တဖၣ် လီၤတံၢ်လီၤဆဲးလီၤ. အတံၤသကိးလၢ အမ့ၢ်တၢ်မၢဖိသ့ၣ်တဖၣ်အံၤ မ့ၢ်ပှၤလၢအတီအလိၤ, အသးတီ ဒီးဒိကနၣ်အကလုၢ်လီၤ. (ဖး ယိၤဟၣ် ၁၅:၁၄, ၁၅ တက့ၢ်.) ကွၢ်လိယ့ၣ်ၡူးဒီး ဃုထၢနတံၤသကိး လီၤတံၢ်လီၤဆဲးတက့ၢ်. အဝဲသ့ၣ်ကြၢးမ့ၢ် ပှၤလၢအိၣ်ဒီးတၢ်နာ်အဂၢၢ်ကျၢၤ လၢဒိကနၣ်ယ့ၣ်ၡူး အကလုၢ်န့ၣ်လီၤ. တံၤသကိးတံၢ်နီၢ်တဖၣ်န့ၣ် ကဘၣ်တဲလိာ်အသး ပျီပျီဆှဲဆှဲတဂၤဒီးတဂၤ ဖဲအဝဲသ့ၣ် ကြၢးဘၣ်တၢ်သိၣ်က့ၤသီက့ၤအီၤ အဆၢကတီၢ် မ့တမ့ၢ် ကဘၣ်တူၢ်လိာ်ဝဲ တၢ်သိၣ်က့ၤသီက့ၤအခါန့ၣ်လီၤ.—ကတိၤဒိ ၂၇:၉.
၂၀. ဒ်သိးပှၤဂၤအတၢ်နာ် ကဆူၣ်ထီၣ်အဂီၢ် ပမၤစၢၤအီၤကသ့ဒ်လဲၣ်.
၂၀ မၤစၢၤပှၤဂၤလၢ ကအိၣ်ဒီးတၢ်နာ်အဂီၢ်တက့ၢ်. ယ့ၣ်ၡူး ဒုးဆူၣ်ထီၣ် အပျဲၢ်အဘီၣ်တဖၣ် အတၢ်နာ် ခီဖျိလၢ အတၢ်ကတိၤဒီး အတၢ်မၤန့ၣ်လီၤ. (မၢ်ကူး ၁၁:၂၀-၂၄) ပကြၢးကွၢ်လိ ယ့ၣ်ၡူး အဒိအတဲာ်န့ၣ်လီၤ. ပမ့ၢ်မၤဒ်န့ၣ်န့ၣ် ပတၢ်နာ် ကဆူၣ်ထီၣ်တကးဒံးဘၣ် တၢ်အံၤကဒုးဆူၣ်ထီၣ်စ့ၢ်ကီး ပှၤဂၤအဂံၢ်အဘါလီၤ. (ကတိၤဒိ ၁၁:၂၅) နမၤစၢၤ ပှၤလၢအိၣ်လၢ နလီၢ်ကဝီၤပူၤတဖၣ် ကသ့ဒ်လဲၣ်. ခီဖျိနသိၣ်လိ ပှၤဂၤလၢ လံာ်စီဆှံဒီး တဲနၢ်ပၢၢ်အဝဲသ့ၣ်လၢ ကစၢ်ယွၤအိၣ်ဝဲနီၢ်နီၢ် ဒီးအသးအိၣ်အဝဲသ့ၣ်အဂ့ၢ်န့ၣ်လီၤ. တကးဘၣ် အမဲာ်ညါ မၤစၢၤအဝဲသ့ၣ် ဒ်သိးကသ့ၣ်ညါဝဲလၢ လံာ်စီဆှံမ့ၢ် ယွၤအကလုၢ်ကထါနီၢ်နီၢ်န့ၣ်တက့ၢ်. ဒီပုၢ်ဝဲၢ်မုၣ် ဒီပုၢ်ဝဲၢ်ခွါတဖၣ် အတၢ်နာ်ကဆူၣ်ထီၣ်အဂီၢ် နမၤစၢၤအီၤကသ့ဒ်လဲၣ်. နမ့ၢ်ထံၣ်ဘၣ်လၢ ဒီပုၢ်ဝဲၢ်တဂၤဂၤ ကဒူးကဒ့ၣ် ဒီပုၢ်ဝဲၢ်လၢ အတီခိၣ်ရိၣ်မဲတၢ်လၢ တၢ်အိၣ်ဖှိၣ်ပူၤအခါန့ၣ် တဘၣ်ဟးဆှဲးအီၤတဘျီဃီတဂ့ၤ. သူနတၢ်ကူၣ်သ့ ဒီးမၤစၢၤအီၤ ဒ်သိးအတၢ်နာ် ကဂၢၢ်ကျၢၤထီၣ်အဂီၢ်န့ၣ်တက့ၢ်. (ယူဒၤ ၂၂, ၂၃) ဖဲနထီၣ်ကၠိအခါ နမ့ၢ်ထံၣ်ဘၣ် နသရၣ်တဖၣ် သိၣ်လိဝဲ သးသမူအတၢ်လဲလိာ်အသးတဆီဘၣ်တဆီ (evolution) အဂ့ၢ်န့ၣ် ပာ်ဖျါထီၣ် နတၢ်သူၣ်ဒူသးဒူဒီး တဲဖျါထီၣ်နတၢ်နာ်ဘၣ်ဃးဒီး တၢ်ဘၣ်တ့အဂ့ၢ်န့ၣ်တက့ၢ်. ဘၣ်သ့ၣ်သ့ၣ် နသရၣ် ဒီးနတံၤသကိးတဖၣ် အတၢ်ပာ်သူၣ်ပာ်သးန့ၣ် ကဒုးကမၢကမၣ်နၤလီၤ.
၂၁. ယဟိဝၤယွၤ အၢၣ်လီၤအီလီၤဝဲ ပဝဲတဂၤစုာ်စုာ်ဒ်လဲၣ်.
၂၁ ယဟိဝၤယွၤ ဒီးယ့ၣ်ၡူး မၤစၢၤစီၤပ့းတရူး ဒ်သိးကမၤနၢၤ အတၢ်သးဒ့ဒီဒီး တၢ်ပျံၤတၢ်ဖုးန့ၣ်လီၤ. လၢခံန့ၣ် ပထံၣ်ဘၣ်လၢ စီၤပ့းတရူး အိၣ်ဒီး တၢ်နာ်လၢ အဂၢၢ်အကျၢၤအဃိ ကဲထီၣ် ဒိဂ့ၤတဲာ်ဘၣ် လၢပှၤဂၤအဂီၢ်န့ၣ်လီၤ. ဒ်န့ၣ်အသိး ယဟိဝၤယွၤ မၤစၢၤပဝဲ တဂၤစုာ်စုာ် ဒ်သိးပကအိၣ်ဂၢၢ်အိၣ်ကျၢၤ လၢတၢ်နာ်အပူၤန့ၣ်လီၤ. (ဖး ၁ ပ့းတရူး ၅:၉, ၁၀ တက့ၢ်.) ဒ်သိးပတၢ်နာ် ကဂၢၢ်ကကျၢၤအဂီၢ် ပကဘၣ် ထဲးဂံၢ်ထဲးဘါန့ၣ်လီၤ. ဘၣ်ဆၣ် ပမ့ၢ်မၤဒ်န့ၣ်န့ၣ် ယဟိဝၤယွၤ ကဆိၣ်ဂ့ၤ ပတၢ်ဂုာ်ကျဲးစၢးန့ၣ်လီၤ.
^ လံာ်အဆၢ. 16 အဒိ ကွၢ်တၢ်ဂ့ၢ်တဖၣ်လၢ “The Bible Changes Lives” in the public edition of The Watchtower တက့ၢ်.
