ယဟိဝၤယွၤ အဲၣ်ပှၤလၢ ကျဲဒ်လဲၣ်
“ကွၢ်တက့ၢ်, ပၢ်ဟ့ၣ်လံပှၤလၢ တၢ်အဲၣ်တၢ်ကွံ ဒ်လဲၣ်ဒ်လဲၣ်”—၁ ယိၤဟၣ် ၃:၁
တၢ်သးဝံၣ်– ၉၁, ၁၃
၁. တၢ်မၢဖိ စီၤယိၤဟၣ် ဟ့ၣ်ဂံၢ်ဟ့ၣ်ဘါပှၤလၢ ပကဘၣ်ဆိကမိၣ်ထံ တၢ်ဂ့ၢ်မနုၤလဲၣ်, ဒီးဘၣ်မနုၤအဃိလဲၣ်.
တၢ်မၢဖိယိၤဟၣ် ဟ့ၣ်ဂံၢ်ဟ့ၣ်ဘါပှၤလၢ ပကဆိကမိၣ် ဘၣ်ဃးဒီး ယဟိဝၤယွၤ အတၢ်အဲၣ်ပှၤ ဒိၣ်ထဲလဲၣ်အဂ့ၢ်န့ၣ်လီၤ. ဖဲ ၁ ယိၤဟၣ် ၃:၁ န့ၣ်ပဖးဘၣ်လၢ– “ကွၢ်တက့ၢ်, ပၢ်ဟ့ၣ်လံပှၤလၢတၢ်အဲၣ်တၢ်ကွံဒ်လဲၣ်ဒ်လဲၣ်” န့ၣ်လီၤ. ဖဲပဆိကမိၣ်ထံ ယဟိဝၤယွၤ အတၢ်အဲၣ်ပှၤထဲလဲၣ်အဂ့ၢ် ဒီးအဝဲပာ်ဖျါထီၣ် အတၢ်အဲၣ်ဒ်လဲၣ်အဂ့ၢ်န့ၣ် ပကသုးဘူးပသးဆူအအိၣ် ဒီးပကအဲၣ်အီၤအါန့ၢ်အလီၢ်လီၤ.
၂. ဘၣ်မနုၤအဃိ ကီဝဲလၢ ပှၤတနီၤနီၤ ကနာ်လၢ ကစၢ်ယွၤအဲၣ်အဝဲသ့ၣ်လဲၣ်.
၂ လီၤသးအုးဒိၣ်မးလၢ ပှၤတနီၤနီၤန့ၣ် တနာ်ဝဲလၢ ယဟိဝၤယွၤ အဲၣ်အဝဲသ့ၣ်ဘၣ်. ဒီးအဝဲသ့ၣ်ဆိကမိၣ်ဝဲလၢ ကစၢ်ယွၤန့ၣ် တသူၣ်အိၣ်သးအိၣ် ပှၤဟီၣ်ခိၣ်ဖိဘၣ်. ဒီးဘၣ်သ့ၣ်သ့ၣ် အဝဲသ့ၣ်နာ်ဝဲလၢ ကစၢ်ယွၤန့ၣ် အိၣ်ထဲဒၣ်အဝဲဒုးအိၣ်ထီၣ် တၢ်သိၣ်တၢ်သီဒီး စံၣ်ညီၣ်ဝဲပှၤလၢ အတဒိကနၣ်အကလုၢ်တဖၣ်န့ၣ်လီၤ. ခီဖျိလၢ ပှၤသိၣ်လိကမၣ်တၢ်အဃိ ပှၤတနီၤနီၤ ဆိကမိၣ်ဝဲလၢ ကစၢ်ယွၤမ့ၢ်ပှၤလၢ အအၢအသီတဂၤဒီး ပအဲၣ်အီၤတသ့လ့ၤတက့ၤဘၣ်. မ့မ့ၢ်ပှၤအဂၤတနီၤန့ၣ် နာ်ဝဲလၢ ပမ့ၢ်အိၣ်မူ ဒ်လဲၣ်ဂ့ၤ ဒ်လဲၣ်ဂ့ၤ ကစၢ်ယွၤ အဲၣ်ဒံးပှၤလီၤ. ဘၣ်ဆၣ် မ့မ့ၢ်နၤန့ၣ် မ့ၢ်လၢနမၤလိဘၣ် လံာ်စီဆှံအဃိ နသ့ၣ်ညါဘၣ် တၢ်မ့ၢ်တၢ်တီ ဘၣ်ဃးဒီး ယဟိဝၤယွၤလီၤ. နသ့ၣ်ညါ လၢတၢ်အဲၣ်တၢ်ကွံန့ၣ် မ့ၢ်ကစၢ်ယွၤ အတၢ်ဂ့ၤတၢ်ဝါ အဒိၣ်ကတၢၢ်တခါ ဒီးအဝဲဟ့ၣ်လီၤ အဖိခွါ ဒ်သိး ကဟဲတူၢ်သံအသးလၢနဂီၢ်န့ၣ်လီၤ. (ယိၤဟၣ် ၃:၁၆; ၁ ယိၤဟၣ် ၄:၈) ဘၣ်ဆၣ် မ့ၢ်လၢနလဲၤခီဖျိဘၣ် တၢ်ကီတၢ်ခဲလၢ နတၢ်အိၣ်မူပူၤအဃိ ဘၣ်သ့ၣ်သ့ၣ် ကကီဝဲလၢ နကနာ်လၢ ယဟိဝၤယွၤအဲၣ်နၤအနီၢ်ကီၢ်န့ၣ်လီၤ.
၃. ဒ်သိးပကနၢ်ပၢၢ် ယဟိဝၤယွၤအတၢ်အဲၣ်ပှၤအဂီၢ် တၢ်မနုၤကမၤစၢၤပှၤလဲၣ်.
၃ ဒ်သိးပကနၢ်ပၢၢ် လၢယဟိဝၤယွၤအဲၣ်ပှၤအဂီၢ် အဆိကတၢၢ်န့ၣ် ပကဘၣ်သ့ၣ်ညါလၢ အဝဲတ့လီၤပှၤလီၤ. ကစၢ်ယွၤဟ့ၣ်ပှၤ သးသမူန့ၣ်လီၤ. (ဖး စံးထီၣ်ပတြၢၤ ၁၀၀:၃-၅ တက့ၢ်.) လၢတၢ်န့ၣ်အဃိ လံာ်စီဆှံ ကိးဝဲပှၤကညီအဆိကတၢၢ်တဂၤလၢ “ယွၤအဖိခွါ” လီၤ. (လူၤကၣ် ၃:၃၈) ဒီးယ့ၣ်ၡူးစ့ၢ်ကီး သိၣ်လိပှၤလၢ ပကကိး ယဟိဝၤယွၤလၢ “အိၣ်လၢမူခိၣ်ပပၢ်” န့ၣ်လီၤ. (မးသဲ ၆:၉) လၢတၢ်န့ၣ်အဃိ ယဟိဝၤယွၤ မ့ၢ်ပပၢ်ဒီး အဝဲအဲၣ်ပှၤ ဒ်ပၢ်အဲၣ်အဖိတဖၣ်အသိးန့ၣ်လီၤ.
၄. (က) ယဟိဝၤယွၤ မ့ၢ်ပၢ်ဒ်လဲၣ်တဂၤလဲၣ်. (ခ) တၢ်မၤလိအံၤ ဒီးလၢခံတခါအပူၤန့ၣ် ပကတဲသကိး တၢ်မနုၤလဲၣ်.
၄ ပှၤတနီၤနီၤ ကထံၣ်ဝဲပၢ် ဒ်ပှၤလၢအပှဲၤဒီး တၢ်အဲၣ်တၢ်ကွံတဂၤအဂီၢ်န့ၣ် ကကီဝဲလီၤ. မ့ၢ်လၢဖဲအဝဲသ့ၣ် အနီၢ်ဆံးခါန့ၣ် အပၢ်မၤအၢမၤသီအဝဲသ့ၣ် အဃိလီၤ. မ့မ့ၢ် ယဟိဝၤယွၤန့ၣ် တမၤအဖိအလံၤဒ်န့ၣ်ဘၣ်. အဝဲမ့ၢ် ပၢ်လၢအဂ့ၤကတၢၢ်တဂၤလီၤ. (စံးထီၣ်ပတြၢၤ ၂၇:၁၀) ကစၢ်ယွၤအဲၣ်ပှၤဒိၣ်မး ဒီးမၤစၢၤပှၤလၢ ကျဲအါဘိန့ၣ်လီၤ. ဖဲပတူၢ်ဘၣ်လၢ ယဟိဝၤယွၤ အဲၣ်ပှၤအခါ ပတၢ်အဲၣ်အီၤစ့ၢ်ကီး ကအါထီၣ်ဝဲလီၤ. (ယၤကိာ် ၄:၈) လၢတၢ်မၤလိတခါအံၤအပူၤ ပကတဲသကိး ကျဲလွံၢ်ဘိလၢ ယဟိဝၤယွၤ ပာ်ဖျါထီၣ် အတၢ်အဲၣ်ပှၤန့ၣ်လီၤ. ဒီးတၢ်မၤလိ လၢခံတခါန့ၣ် ပကသ့ၣ်ညါဘၣ် ကျဲလွံၢ်ဘိလၢ ပပာ်ဖျါထီၣ် ပတၢ်အဲၣ်အီၤသ့အဂ့ၢ်န့ၣ်လီၤ.
ယဟိဝၤယွၤ အိၣ်ဒီးတၢ်အဲၣ် ဒီးသးအိၣ်ဟ့ၣ်တၢ်
၅. ကစၢ်ယွၤ ဟ့ၣ်ပှၤဟီၣ်ခိၣ်ဖိတဖၣ် တၢ်မနုၤလဲၣ်.
၅ ဖဲစီၤပီလူး အိၣ်ဝဲလၢ ကြံးအကီၢ်, ဝ့ၢ်အၤသ့ၣ်အခါ အဝဲထံၣ်ဘၣ်ဝဲ တၢ်ဂီၤတၢ်ဖီၣ်အါမးလီၤ. ဒီးပှၤအိၣ်ဖဲန့ၣ်တဖၣ်န့ၣ် နာ်ဝဲလၢ ယွၤတဖၣ်အံၤ ဟ့ၣ်အဝဲသ့ၣ်သးသမူန့ၣ်လီၤ. လၢတၢ်န့ၣ်အဃိ စီၤပီလူး စံးဘၣ်အဝဲသ့ၣ် ဘၣ်ဃးဒီး “ယွၤလၢအတ့လီၤ ဟီၣ်ခိၣ် ဒီးကယဲၢ်တၢ်အိၣ်လၢအပူၤ” အဂ့ၢ်န့ၣ်လီၤ. အဝဲစံးကဒီးဝဲလၢ ကစၢ်ယွၤန့ၣ် “ဟ့ၣ်ပှၤခဲလၢာ် အသးသမူ, ဒီးအသါ, ဒီးအတၢ်ခဲလၢာ်လီၤ.” လၢတၢ်န့ၣ်အဃိ “ပမူ, ဒီးပဂဲၤ, ဒီးပအိၣ်လၢအပူၤလီၤ.” (မၤတၢ် ၁၇:၂၄, ၂၅, ၂၈) ယဟိဝၤယွၤ ဟ့ၣ်ပှၤတၢ်ခဲလၢာ် လၢပလိၣ်ဘၣ်တဖၣ် ဒ်သိးပကသူၣ်ဖှံသးညီ လၢပတၢ်အိၣ်မူပူၤအဂီၢ်န့ၣ်လီၤ. ဆိကမိၣ်ကွၢ် တၢ်ဆိၣ်ဂ့ၤတနီၤလၢ ကစၢ်ယွၤဟ့ၣ်လီၤပှၤ ခီဖျိလၢ အဝဲအဲၣ်ပှၤအဃိန့ၣ်တက့ၢ်.
၆. ကစၢ်ယွၤ ဟ့ၣ်လီၤပှၤ တၢ်အိၣ်တၢ်ဆိးအလီၢ် ဒ်လဲၣ်တခါလဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
၆ အဒိ ယဟိဝၤယွၤ ကတဲာ်ကတီၤန့ၢ်ပှၤ ဟီၣ်ခိၣ်လၢအဃံအလၤတဖျၢၣ်န့ၣ်လီၤ. (စံးထီၣ်ပတြၢၤ ၁၁၅:၁၅, ၁၆) ကယဲၢ်မူဖျၢၣ်လၢ ကစၢ်ယွၤ တ့လီၤအီၤတဖၣ်အကျါန့ၣ် ဟီၣ်ခိၣ်အံၤ ဖျါလီၤဆီဒိၣ်မးန့ၣ်လီၤ. ပှၤစဲအ့ၣ်ဖိတဖၣ် ဃုထံၣ်န့ၢ်ဝဲ မူဖျၢၣ်အဂၤတဖၣ် အါအါဂီၢ်ဂီၢ်ဘၣ်ဆၣ် တၢ်လၢအလီၤဂာ်ဒီး ဟီၣ်ခိၣ်လၢ ပှၤကညီအိၣ်မူဝဲကသ့အဂီၢ်န့ၣ် တအိၣ်နီတဖျၢၣ်ဘၣ်. ဒ်သိးပကအိၣ်မူအဂီၢ် ယဟိဝၤယွၤ ဟ့ၣ်ပှၤတၢ်လၢပလိၣ်ဘၣ်အီၤ ကိးမံၤဒဲးလီၤ. တကးဒံးဘၣ် တ့လီၤဝဲဟီၣ်ခိၣ် ဃံဃံလၤလၤ, လၢလၢပှဲၤပှဲၤ ဒ်သိးပကအိၣ်ဘၣ် မုာ်မုာ်ခုၣ်ခုၣ်အဂီၢ်န့ၣ်လီၤ. (ယၡါယၤ ၄၅:၁၈) ဖဲပဆိကမိၣ်ကွၢ် တၢ်အိၣ်တၢ်ဆိးအလီၢ်လၢ ပပၢ်ယဟိဝၤယွၤ ဟ့ၣ်လီၤပှၤအံၤအခါ ပသ့ၣ်ညါဘၣ်လၢ အဝဲအဲၣ်ပှၤထဲလဲၣ်န့ၣ်လီၤ.—ဖး ယိၤဘး ၃၈:၄, ၇; စံးထီၣ်ပတြၢၤ ၈:၃-၅ တက့ၢ်.
၇. ကျဲလၢ ယဟိဝၤယွၤ တ့လီၤပှၤန့ၣ် ပာ်ဖျါထီၣ်ဝဲလၢ အအဲၣ်ပှၤနီၢ်နီၢ်ဒ်လဲၣ်.
၇ ကျဲအဂၤတဘိလၢ ယဟိဝၤယွၤ ပာ်ဖျါထီၣ် အတၢ်အဲၣ်ပှၤန့ၣ် မ့ၢ်ဝဲဒၣ် အဝဲတ့လီၤပှၤဃုာ်ဒီး တၢ်သ့တၢ်ဘၣ်လၢ ပကကွၢ်လိအီၤန့ၣ်လီၤ. (၁ မိၤၡ့ ၁:၂၇) လၢတၢ်န့ၣ်အဃိ ပတူၢ်ဘၣ် ကစၢ်ယွၤ အတၢ်အဲၣ်ပှၤ ဒီးပအဲၣ်ဆၢက့ၤအီၤ သ့စ့ၢ်ကီးလီၤ. ကစၢ်ယွၤ သ့ၣ်ညါဝဲလၢ တၢ်အံၤမ့ၢ်တၢ်လၢ အမၤသးခုပှၤနီၢ်နီၢ်လီၤ. ဒ်န့ၣ်အသိး ဖဲဖိသ့ၣ်တဖၣ် ဒိးန့ၢ်ဘၣ် အမိၢ်အပၢ် အတၢ်အဲၣ်အခါ အဝဲသ့ၣ်အိၣ်ဒီး တၢ်သူၣ်ဖှံသးညီန့ၣ်လီၤ. သ့ၣ်နီၣ်ထီၣ်က့ၤလၢ ယ့ၣ်ၡူးသိၣ်လိပှၤလၢ ပကအိၣ်ဒီးတၢ်သးခု ဖဲပသုးဘူးပသးဆူ ပပၢ်ယဟိဝၤယွၤအိၣ်အခါန့ၣ်လီၤ. (မးသဲ ၅:၃) ကစၢ်ယွၤ ဟ့ၣ်လီၤပှၤ “တၢ်ခဲလၢာ် ထူးထူးတီၤတီၤ လၢပကမုာ်လၤလၢအပူၤ” အဂီၢ်န့ၣ်လီၤ. ဖျါတြၢၢ်ကလာ်လၢ အဝဲမ့ၢ်ပှၤတဂၤလၢ အသးအိၣ်ဟ့ၣ်တၢ် ဒီးအဲၣ်ပှၤဒိၣ်မးလီၤ.—၁ တံၤမသ့း ၆:၁၇; စံးထီၣ်ပတြၢၤ ၁၄၅:၁၆.
ယဟိဝၤယွၤ သိၣ်လိပှၤ တၢ်မ့ၢ်တၢ်တီ
၈. ဘၣ်မနုၤအဃိ ပအဲၣ်ဒိးလၢ ယဟိဝၤယွၤ ကသိၣ်လိပှၤန့ၣ်လဲၣ်.
၈ ပၢ်သ့ၣ်တဖၣ် အဲၣ်အဖိဒီး တအဲၣ်ဒိးဝဲလၢ အဖိတဖၣ် ကဘၣ်တၢ်ကွဲန့ၢ်လွဲန့ၢ် မ့တမ့ၢ်ကဘၣ်တၢ်လံၣ်တၢ်လီဘၣ်. ဘၣ်ဆၣ် မုၢ်မဆါတနံၤညါအံၤ မိၢ်ပၢ်တဖၣ် အါတက့ၢ်န့ၣ် တတူၢ်လိာ်ဝဲ လံာ်စီဆှံ အတၢ်သိၣ်တၢ်သီအဃိ အဝဲသ့ၣ် ဟံးစုနဲၣ်ကျဲ အဖိအလံၤတဖၣ် တသ့ဂ့ၤဂ့ၤဘၣ်. လၢတၢ်န့ၣ်အဃိ အဖိသ့ၣ်တဖၣ် တအိၣ်ဒီး တၢ်သူၣ်ခုသးခုဒီး တၢ်သူၣ်မံသးမုာ်ဘၣ်. (ကတိၤဒိ ၁၄:၁၂) မ့မ့ၢ် ယဟိဝၤယွၤန့ၣ် ဟံးစုနဲၣ်ကျဲ အဖိတဖၣ်လၢကျဲအဂ့ၤကတၢၢ် မ့ၢ်လၢအဝဲမ့ၢ် “တၢ်မ့ၢ်တၢ်တီ အကစၢ်” အဃိန့ၣ်လီၤ. (စံးထီၣ်ပတြၢၤ ၃၁:၅) အဝဲသးအိၣ်လၢ ကသိၣ်လိပှၤ တၢ်မ့ၢ်တၢ်တီ ဘၣ်ဃးဒီးအနီၢ်ကစၢ်အဂ့ၢ်လီၤ. ဒီးအဂၤတမံၤန့ၣ် ကစၢ်ယွၤ ဒုးသ့ၣ်ညါပှၤလၢ ပကဘၣ်ဘူၣ်ထီၣ်ဘါထီၣ်အီၤဒ်လဲၣ် ဒီးပအိၣ်မူလၢ အဂ့ၤကတၢၢ်ကသ့ဒ်လဲၣ်အဂ့ၢ်န့ၣ်လီၤ. (ဖး စံးထီၣ်ပတြၢၤ ၄၃:၃ တက့ၢ်.) မ့မ့ၢ်ဒ်န့ၣ်န့ၣ် တၢ်လၢယဟိဝၤယွၤ သိၣ်လိပှၤလၢအ ပာ်ဖျါထီၣ်ဝဲ အတၢ်အဲၣ်ပှၤန့ၣ် မ့ၢ်မနုၤတဖၣ်လဲၣ်.
ပၢ်လၢအမ့ၢ် ခရံာ်ဖိတဂၤ ကွၢ်လိယဟိဝၤယွၤ ခီဖျိ သိၣ်လိဝဲ အဖိတဖၣ်လၢ တၢ်မ့ၢ်တၢ်တီ ဒီးမၤစၢၤအဝဲသ့ၣ် ဒ်သိးကအိၣ်ဒီး တၢ်ရ့လိာ်သးဒီး ပၢ်အိၣ်လၢမူခိၣ်န့ၣ်လီၤ (ကွၢ်လံာ်အဆၢ ၈-၁၀)
၉, ၁၀. (က) ဘၣ်မနုၤအဃိ ယဟိဝၤယွၤ သိၣ်လိပှၤ ဘၣ်ဃးဒီးအဂ့ၢ်န့ၣ်လဲၣ်. (ခ) ဘၣ်ဃးဒီး အတၢ်တိာ်ပာ်လၢပဂီၢ်န့ၣ် ကစၢ်ယွၤသိၣ်လိပှၤတၢ်မနုၤလဲၣ်.
၉ အဆိကတၢၢ်န့ၣ် ယဟိဝၤယွၤ ဒုးသ့ၣ်ညါပှၤ ဘၣ်ဃးဒီး အနီၢ်ကစၢ်အဂ့ၢ်အကျိၤန့ၣ်လီၤ. အဝဲအဲၣ်ဒိးဝဲလၢ ပကသ့ၣ်ညါထီၣ်အီၤန့ၣ်လီၤ. (ယၤကိာ် ၄:၈) လၢတၢ်န့ၣ်အဃိ အဝဲတဲဘၣ် ပှၤလၢအမံၤန့ၣ်လီၤ. လၢလံာ်စီဆှံအပူၤန့ၣ် ကစၢ်ယွၤအမံၤ ဘၣ်တၢ်ပာ်ဖျါထီၣ်အီၤအါန့ၢ် ကယဲၢ်တၢ်အမံၤခဲလၢာ်လီၤ. တကးဒံးဘၣ် အဝဲဒုးသ့ၣ်ညါစ့ၢ်ကီးပှၤလၢ အဝဲမ့ၢ်ပှၤဒ်လဲၣ်တဂၤလဲၣ်န့ၣ်လီၤ. ဖဲပထံၣ်ဘၣ် တၢ်လၢကစၢ်ယွၤ တ့လီၤဝဲသ့ၣ်တဖၣ်အခါန့ၣ် ပသ့ၣ်ညါလၢ အဝဲမ့ၢ် ကစၢ်လၢ အိၣ်ဒီးအစိအကမီၤ ဒီးကူၣ်တၢ်သ့တဂၤလီၤ. (ရိမ့ၤ ၁:၂၀) ဖဲပဖး လံာ်စီဆှံအခါပမၤလိဘၣ်လၢ ကစၢ်တကွၢ်မဲာ်တၢ်ဘၣ် ဒီးအဲၣ်ပှၤဒိၣ်မးန့ၣ်လီၤ. ဒ်ပသ့ၣ်ညါအါထီၣ် အတၢ်ဂ့ၤတၢ်ဝါသ့ၣ်တဖၣ်အသိး ပဘူးထီၣ်ဒီးအီၤန့ၣ်လီၤ.
၁၀ ယဟိဝၤယွၤ သိၣ်လိစ့ၢ်ကီးပှၤလၢ အတၢ်တိာ်ပာ်န့ၣ်လီၤ. အဝဲဒုးသ့ၣ်ညါပှၤလၢ ပပၣ်ဃုာ်လၢ အဒူၣ်ဖိထၢဖိအကျါန့ၣ်လီၤ. လၢတၢ်န့ၣ်အဃိ အဝဲအဲၣ်ဒိးဝဲလၢ ပဝဲဒၣ်သ့ၣ်တဖၣ် ပကမၤသကိးတၢ် ဃူဃူဖိးဖိး ဃုာ်ဒီးပှၤဂၤတဖၣ်လၢ အပၣ်ဃုာ်လၢ အဒူၣ်ဖိထၢဖိအကျါလီၤ. လံာ်စီဆှံပာ်ဖျါထီၣ်ဝဲလၢ ကစၢ်ယွၤန့ၣ် တတ့လီၤပှၤဃုာ်ဒီးတၢ်ခွဲးတၢ်ယာ်လၢ ပကစံၣ်ညီၣ်တဲာ် တၢ်အဘၣ်ဒီးတၢ်အကမၣ် လၢပနီၢ်ကစၢ်ဒၣ်ဝဲဘၣ်. (ယံးရမံယၤ ၁၀:၂၃) ယဟိဝၤယွၤ သ့ၣ်ညါတၢ်အဂ့ၤကတၢၢ်လၢပဂီၢ်လီၤ. ပမ့ၢ်ဒိးပၢပသးလၢအဖီလာ် ဒီးဒိကနၣ်အကလုၢ်န့ၣ် ပကဒိးန့ၢ်ဘၣ် တၢ်ဃူတၢ်ဖိးဒီး တၢ်သူၣ်ဖှံသးညီလီၤ. မ့ၢ်လၢ ယဟိဝၤယွၤ အဲၣ်ပှၤအဃိ အဝဲသိၣ်လိပှၤ တၢ်မ့ၢ်တၢ်တီလၢ အရ့ဒိၣ်တခါအံၤန့ၣ်လီၤ.
၁၁. ဘၣ်ဃးဒီး ခါဆူညါအဂ့ၢ်န့ၣ် ပပၢ်ယဟိဝၤယွၤ ဒုးသ့ၣ်ညါပှၤ တၢ်မနုၤလဲၣ်.
၁၁ ပၢ်လၢအိၣ်ဒီး တၢ်အဲၣ်တၢ်ကွံတဂၤန့ၣ် ဆိကမိၣ်တၢ် ဘၣ်ဃးဒီး အဖိတဖၣ် အတၢ်အိၣ်မူလၢ ခါဆူညါအဂီၢ် လီၤတံၢ်လီၤဆဲးန့ၣ်လီၤ. အဝဲအဲၣ်ဒိးလၢ အဖိတဖၣ် ကအိၣ်ဒီး တၢ်သူၣ်ဖှံသးညီ လၢအတၢ်အိၣ်မူပူၤလီၤ. ဘၣ်ဆၣ် မုၢ်မဆါတနံၤအံၤ ပှၤအါဂၤန့ၣ် သူၣ်ကိၢ်သးဂီၤဝဲလၢ အတၢ်အိၣ်မူခါဆူညါ ဒီးမၤလၢာ်ကွံာ် တၢ်ဆၢကတီၢ် လၢတၢ်လၢအဘျုးတအိၣ်ဘၣ်တဖၣ်အဂီၢ်န့ၣ်လီၤ. (စံးထီၣ်ပတြၢၤ ၉၀:၁၀) ပသးခုဒိၣ်မးလၢ ပပၢ်ယဟိဝၤယွၤ သိၣ်လိပှၤလၢပကအိၣ်ဒီး တၢ်သူၣ်မံသးမံလၢ ဆၢကတီၢ်ခဲအံၤ ကသ့ဒ်လဲၣ်အဂ့ၢ်လီၤ. တကးဘၣ်အမဲာ်ညါ ကစၢ်အၢၣ်လီၤပှၤလၢ ခါဆူညါ ပကဒိးန့ၢ်ဘၣ်စ့ၢ်ကီး တၢ်ဆိၣ်ဂ့ၤတဖၣ်န့ၣ်လီၤ.
ယဟိဝၤယွၤ ဟံးစုနဲၣ်ကျဲ ဒီးသိၣ်က့ၤသီက့ၤ အဖိအလံၤတဖၣ်
၁၂. ယဟိဝၤယွၤ ဂုာ်ကျဲးစၢးမၤစၢၤ စီၤကၤယံၣ် ဒီးစီၤဘၤရူးဒ်လဲၣ်.
၁၂ ဖဲယဟိဝၤယွၤ ထံၣ်ဝဲလၢ စီၤကၤယံၣ် ကမၤတၢ်အၢတၢ်သီအခါ အဝဲဂုာ်ကျဲးစၢး မၤစၢၤအီၤ ဒီးသံကွၢ်အီၤဒ်အံၤ– “ဘၣ်မနုၤ နသးထီၣ်လဲၣ်, ဒီးဘၣ်မနုၤ နမဲာ်လီၤသပှၢ်လဲၣ်. နမၤမ့ၢ်ဂ့ၤဒီး, တၢ်ပာ်ထီၣ်ထီနၤ တအိၣ်ဘၣ်ဧါ.” (၁ မိၤၡ့ ၄:၆, ၇) စီၤကၤယံၣ် ဂ့ၢ်လိာ်ဝဲ ကစၢ်ယွၤ အတၢ်မၤစၢၤအဃိ အဝဲကွၢ်ဆၢၣ်မဲာ်ဘၣ်ဝဲ တၢ်ကီတၢ်ခဲလီၤ. (၁ မိၤၡ့ ၄:၁၁-၁၃) ဘၣ်တဘျီ ကစၢ်ယွၤ ထံၣ်ဘၣ်ဝဲလၢ စီၤဘၤရူးန့ၣ် လီၤဘှံးလီၤတီၤဝဲ ဒီးအဂံၢ်လီၤစၢ် ခီဖျိလၢ အဝဲအိၣ်ဒီး တၢ်ပာ်သူၣ်ပာ်သးလၢ အကမၣ်အဃိန့ၣ်လီၤ. လၢတၢ်န့ၣ်အဃိ ယဟိဝၤယွၤ တဲဘၣ်စီၤဘၤရူး လၢအဝဲအတၢ်ဆိကမိၣ်န့ၣ် ကမၣ်ဝဲအဃိ အဝဲကဘၣ် ဆီတလဲအသးလီၤ. ခီဖျိလၢ စီၤဘၤရူးဒိကနၣ် ယဟိဝၤယွၤ အတၢ်ဟ့ၣ်ကူၣ်အဃိ အသးသမူပူၤဖျဲးဝဲလီၤ.—ယံးရမံယၤ ၄၅:၂-၅.
၁၃. ယဟိဝၤယွၤ အခ့အပှၤလၢ အတီအလိၤသ့ၣ်တဖၣ်န့ၣ် ဒိးန့ၢ်ဘၣ်တၢ်မၤလိ ဖဲအလဲၤခီဖျိဘၣ် တၢ်ကီတၢ်ခဲအခါန့ၣ်ဒ်လဲၣ်.
၁၃ ယဟိဝၤယွၤ ဟံးစုနဲၣ်ကျဲ ဒီးသိၣ်က့ၤသီက့ၤပှၤ မ့ၢ်လၢအဝဲအဲၣ်ပှၤအဃိန့ၣ်လီၤ. တမ့ၢ်ထဲလၢအဝဲ ဘှီဂ့ၤထီၣ်က့ၤပှၤဘၣ်. အဝဲသိၣ်လိနဲၣ်လိစ့ၢ်ကီးပှၤလီၤ. (ဧ့ၤဘြံၤ ၁၂:၆) လၢလံာ်စီဆှံအပူၤန့ၣ် ပဖးဘၣ်ပှၤတီပှၤလိၤအဂ့ၢ် ဒီးခီဖျိလၢ ယဟိဝၤယွၤ သိၣ်လိနဲၣ်လိအဝဲသ့ၣ်အဃိ အဝဲသ့ၣ်အတၢ်ဂ့ၤတၢ်ဝါတဖၣ် အါထီၣ်ဝဲလီၤ. အဒိ စီၤယိၤသး, စီၤမိၤၡ့ဒီးစီၤဒၤဝံး လဲၤခီဖျိဘၣ် တၢ်ကီတၢ်ခဲ ဒိၣ်ဒိၣ်မုၢ်မုၢ်န့ၣ်လီၤ. ဆၢကတီၢ်ဖဲ အဝဲသ့ၣ် ကွၢ်ဆၢၣ်မဲာ်ဘၣ် တၢ်ကီတၢ်ခဲတဖၣ်အခါန့ၣ် ယဟိဝၤယွၤ အိၣ်ဒီးအဝဲသ့ၣ်လီၤ. ဒီးဖဲန့ၣ်အဆၢကတီၢ် တၢ်လၢအဝဲသ့ၣ် မၤလိဘၣ်ဝဲန့ၣ် မၤစၢၤအဝဲသ့ၣ်ဒ်သိး ကဟံးန့ၢ်အါထီၣ်မူဒါ လၢယဟိဝၤယွၤ ဟ့ၣ်လီၤအဝဲသ့ၣ်လၢ ခါဆူညါန့ၣ်လီၤ. ဒ်ပဖးဘၣ်လၢ လံာ်စီဆှံပူၤအသိး ယဟိဝၤယွၤ ဆီၣ်ထွဲမၤစၢၤ ဒီးသိၣ်လိ အပှၤဂီၢ်မုၢ်အဃိ ပသ့ၣ်ညါဘၣ်လၢ ယဟိဝၤယွၤ အဲၣ်ပှၤနီၢ်နီၢ်လီၤ. —ဖး ကတိၤဒိ ၃:၁၁, ၁၂ တက့ၢ်.
၁၄. ဖဲပမၤဘၣ်တၢ်ကမၣ် တမံၤမံၤအခါန့ၣ် ယဟိဝၤယွၤ ပာ်ဖျါထီၣ် အတၢ်အဲၣ်လၢ ပဖီခိၣ်ဒ်လဲၣ်.
၁၄ ဖဲပမၤကမၣ်ဘၣ်တၢ်အခါဒၣ်လဲာ် ယဟိဝၤယွၤ ပာ်ဖျါဒံး အတၢ်အဲၣ်လၢ ပဖီခိၣ်လီၤ. ပမ့ၢ်ဒိကနၣ် အတၢ်သိၣ်က့ၤသီက့ၤ ဒီးပီၢ်ယၢ်လီၤက့ၤပသးန့ၣ် အဝဲကပျၢ်ပတၢ်ကမၣ် “အါအါကလဲာ်” လီၤ. (ယၡါယၤ ၅၅:၇) တၢ်အံၤအခီပညီမ့ၢ်ဒ်လဲၣ်. စီၤဒၤဝံး အတၢ်ကတိၤ ဘၣ်ဃးဒီး ယဟိဝၤယွၤ အတၢ်ပျၢ် ပတၢ်ကမၣ်န့ၣ် ပာ်ဖျါထီၣ်န့ၢ်ပှၤလၢ အမ့ၢ်ပၢ်လၢ အိၣ်ဒီးတၢ်သးကညီၤဒီး “မ့ၢ်ပှၤလၢ အပျၢ် နတၢ်သရူးနတၢ်ကမၣ်ခဲလၢာ်, ဒီးမၤဘျါက့ၤ နတၢ်ဆူးတၢ်ဆါ ကိးအမံၤဒဲး, ဒီးပှ့ၤက့ၤနသးသမူလၢ တၢ်ဟးဂီၤ, ဒီးဒုးကုာ်ထီၣ်နၤ လၢတၢ်ဘျုးတၢ်ဖှိၣ်, ဒီးတၢ်သူၣ်အိၣ်သးအိၣ် အခိၣ်သလုး, ဒီးဒုးမံသူၣ်မံသး နထးခိၣ်လၢတၢ်ဂ့ၤ, ဒ်မုၢ်ထီၣ်တခီ ယံၤဝဲဒီး မုၢ်နုာ်တခီအသိးန့ၣ် နဒုးယံၤထီၣ် ပတၢ်သရူးကမၣ်ဒီး ပှၤလီၤ.” (စံးထီၣ်ပတြၢၤ ၁၀၃:၃, ၄, ၁၂) ယဟိဝၤယွၤ သိၣ်က့ၤသီက့ၤ ဒီးဟံးစုနဲၣ်ကျဲပှၤလၢ ကျဲအါဘိန့ၣ်လီၤ. မ့ၢ်နဆီတလဲနသးလၢ အဆိအချ့ စ့ၢ်ကီးဧါ. ထီဘိန့ၣ် ပဘၣ်သ့ၣ်နီၣ်ထီၣ်က့ၤ လၢယဟိဝၤယွၤ သိၣ်က့ၤသီက့ၤပှၤန့ၣ် မ့ၢ်လၢ အဝဲအဲၣ်ပှၤအဃိန့ၣ်လီၤ.—စံးထီၣ်ပတြၢၤ ၃၀:၅.
ယဟိဝၤယွၤ ဒီသဒၢပှၤ
၁၅. ကျဲအဂၤတဘိလၢ ယဟိဝၤယွၤပာ်ဖျါ အတၢ်အဲၣ်ပှၤန့ၣ် မ့ၢ်မနုၤလဲၣ်.
၁၅ ပၢ်လၢအအိၣ် ဒီးတၢ်အဲၣ်တၢ်ကွံတဂၤန့ၣ် ကဒီသဒၢ အဟံၣ်ဖိဃီဖိ ဖဲအဝဲသ့ၣ် ဘၣ်ကွၢ်ဆၢၣ်မဲာ်ဒီး တၢ်ဘၣ်ယိၣ်အဆၢကတီၢ်လီၤ. ပပၢ်ယဟိဝၤယွၤစ့ၢ်ကီး မၤဝဲဒ်န့ၣ်လီၤ. ဘၣ်ဃးဒီး ယဟိဝၤယွၤန့ၣ် ပှၤကွဲးထါစံးထီၣ်ပတြၢၤ စံးဝဲဒ်အံၤ– “ပၢၤဝဲအပှၤစီဆှံအသးန့ၣ်, မၤပူၤမၤဖျဲးကွံာ်အီၤလၢ ပှၤတတီတလိၤ အစုပူၤန့ၣ်လီၤ.” (စံးထီၣ်ပတြၢၤ ၉၇:၁၀) ဆိကမိၣ်ကွၢ်တၢ်အံၤ– မ့ၢ်လၢနမဲာ်ချံန့ၣ် လုၢ်ဒိၣ်ပှ့ၤဒိၣ်လၢနဂီၢ်အဃိ နကဒီသဒၢအီၤလၢ အဆိအချ့လီၤ. ဒ်န့ၣ်အသိး ယဟိဝၤယွၤ အခ့အပှၤတဖၣ် မ့ၢ်တၢ်လၢအလုၢ်ဒိၣ်ပှ့ၤဒိၣ် လၢအဂီၢ်အဃိ ကစၢ်ယွၤ ကဒီသဒၢအဝဲသ့ၣ် ဂ့ၤဂ့ၤလီၤ.—ဖး စကၤရယၤ ၂:၈ တက့ၢ်.
၁၆, ၁၇. စိၤလၢညါ ဒီးစိၤခဲအံၤန့ၣ် ယဟိဝၤယွၤ ဒီသဒၢ အပှၤဂီၢ်မုၢ် ဒ်လဲၣ်.
၁၆ လၢညါ ဒီးစိၤခဲအံၤစ့ၢ်ကီး ယဟိဝၤယွၤသူဝဲ မူခိၣ်ကလူးတဖၣ် ဒ်သိးကဒီသဒၢ အပှၤဂီၢ်မုၢ်အဂီၢ်လီၤ. (စံးထီၣ်ပတြၢၤ ၉၁:၁၁) လၢတနၤအတီၢ်ပူၤ မူခိၣ်ကလူး ထဲတဂၤဧိၤ မၤသံဝဲ အၤၡူၢ်အသုးဖိအဂၤ ၁၈၅,၀၀၀ ဒ်သိး ကမၤပူၤဖျဲး ယွၤအပှၤဂီၢ်မုၢ်န့ၣ်လီၤ. (၂ စီၤပၤ ၁၉:၃၅) ဖဲတၢယၤဖှိၣ်အစိၤစ့ၢ်ကီး မူခိၣ်ကလူးတဖၣ် မၤပူၤဖျဲး စီၤပ့းတရူး, စီၤပီလူး ဒီးပှၤအဂၤတဖၣ်လၢ ဃိာ်ပူၤန့ၣ်လီၤ. (မၤတၢ် ၅:၁၈-၂၀; ၁၂:၆-၁၁) ဖဲပူၤကွံာ် တယံာ်ဒံးဘၣ်န့ၣ် တၢ်ဒုးတၢ်ယၤ ကဲထီၣ်အသးလၢ ကီၢ်အၤဖြံၤကၤန့ၣ်လီၤ. ထံကီၢ်အဝဲန့ၣ် တၢ်သဘံၣ်သဘုၣ် အိၣ်ထီၣ်ဝဲ ဒိၣ်ဒိၣ်မုၢ်မုၢ် ခီဖျိလၢတၢ်ဒုးတၢ်ယၤ, တၢ်ဟုၣ်တၢ်ဘျၣ်, တၢ်ဖီၣ်ဆူၣ်ပိာ်မုၣ်ပိာ်မၢၤ, ဒီးတၢ်မၤသံမၤဝီအဃိန့ၣ်လီၤ. ပဒီပုၢ်ဝဲၢ်တဖၣ် တသံနီတဂၤဘၣ်. ဘၣ်ဆၣ် အဝဲသ့ၣ်အကျါတနီၤ အတၢ်ဖိတၢ်လံၤ လီၤမၢ်ကွံာ်ဝဲ ခဲလၢာ်လီၤ. အဝဲသ့ၣ် ကိးဂၤဒဲးန့ၣ် တူၢ်ဘၣ်ဝဲ ယဟိဝၤယွၤ အတၢ်အဲၣ်ဒီး သ့ၣ်ညါဝဲလၢ ယဟိဝၤယွၤ ကဟုကယာ် အဝဲသ့ၣ်န့ၣ်လီၤ. လၢတၢ်ကီတၢ်ခဲ ဒီးတၢ်နးတၢ်ဖှီၣ် အပူၤဒၣ်လဲာ် အဝဲသ့ၣ်တဖၣ်န့ၣ် ပှဲၤဝဲဒီး တၢ်သူၣ်ဖှံသးညီလီၤ. ဖဲဝဲၤလီၢ်ခိၣ်သ့ၣ် အပှၤခၢၣ်စး လဲၤအိၣ်သကိး ဒီးသံကွၢ်သံဒိး အဝဲသ့ၣ် အတၢ်အိၣ်သးအခါ အဝဲသ့ၣ် စံးဆၢဝဲလၢ “တၢ်ခဲလၢာ် လဲၤအသး ဂ့ၤဂ့ၤဘၣ်ဘၣ်အဃိ ပစံးဘျုးစံးဖှိၣ် ယဟိဝၤယွၤဒိၣ်မးလီၤ.”
၁၇ ယဟိဝၤယွၤ အခ့အပှၤတနီၤ ဒ်သိးဒီး စီၤစတ့းဖၣ် ဒီးပှၤအဂၤတဖၣ်န့ၣ် ဘၣ်တၢ်မၤသံအီၤလၢ အတၢ်သးတီဒီး ယွၤအဃိန့ၣ်လီၤ. ယဟိဝၤယွၤ တဒီသဒၢပှၤလၢ တၢ်သံထီဘိဘၣ်. ဘၣ်ဆၣ် ကစၢ်ယွၤ ဒီသဒၢဝဲ အပှၤဂီၢ်မုၢ်ဒီတဖု ခီဖျိလၢ အဝဲသ့ၣ်ဟ့ၣ်ပလီၢ်ပှၤ ဘၣ်ဃးဒီး မုၣ်ကီၤလံၢ် အတၢ်လံၣ်တၢ်လီတဖၣ်န့ၣ်လီၤ. (အ့းဖ့းစူး ၆:၁၀-၁၂) တၢ်ဟ့ၣ်ပလီၢ်သ့ၣ်တဖၣ်အံၤ ပထံၣ်ဘၣ်အီၤလၢ လံာ်စီဆှံ ဒီးလံာ်လဲၢ်အဂၤတဖၣ်အပူၤလၢ ယဟိဝၤယွၤ အတၢ်ကရၢကရိ ထုးထီၣ်ဝဲန့ၣ်လီၤ. အဒိ ပသ့ၣ်ညါဘၣ် လၢပကဘၣ်ပလီၢ်ပသး ဘၣ်ဃးဒီး အ့ထၢၣ်နဲး, တၢ်အဲၣ်ကျိၣ်အဲၣ်စ့ ဒီးတၢ်ဂီၤမူ, လံာ်လဲၢ် မ့တမ့ၢ် တၢ်လိာ်ကွဲ (games) လၢအပာ်ဖျါထီၣ်ဝဲ တၢ်မၤဆူၣ်မၤစိး ဒီးတၢ်မၤကမၣ်မုၣ်ကမၣ်ခွါတဖၣ်န့ၣ်လီၤ. ပသ့ၣ်ညါဘၣ် လီၢ်တံၢ်လီၤဆဲးလၢ ယဟိဝၤယွၤ အဲၣ်ပှၤနီၢ်နီၢ်ဒီး အဲၣ်ဒိး ဒီသဒၢပှၤန့ၣ်လီၤ.
တၢ်ခွဲးတၢ်ယာ်ဖးဒိၣ်
၁၈. ယဟိဝၤယွၤ အဲၣ်နၤအဃိ မ့ၢ်နတူၢ်ဘၣ်ဒ်လဲၣ်.
၁၈ ဖဲစီၤမိၤၡ့ ဆိကမိၣ်က့ၤ တၢ်ဆၢကတီၢ်လၢ အသူဝဲလၢ ယွၤအတၢ်မၤအဂီၢ်အခါန့ၣ် အဝဲနာ်ဝဲလၢ ယဟိဝၤယွၤ အဲၣ်အီၤလီၤ. စီၤမိၤၡ့စံးဝဲလၢ– “ဒုးမံသူၣ်မံသးပှၤလၢ နဘျုးနဖှိၣ်လၢ အဆိအချ့ဒ်သိး ပကသူၣ်ဖှံသးညီ, သူၣ်ခုသးခု တစိၤဒၣ်ပှၤအံၤတက့ၢ်.” (စံးထီၣ်ပတြၢၤ ၉၀:၁၄) ပသးခုလၢ ပသ့ၣ်ညါနၢ်ပၢၢ် ဒီးတူၢ်ဘၣ် ယဟိဝၤယွၤ အတၢ်အဲၣ်အဃိန့ၣ်လီၤ. ပဒိးန့ၢ်ဘၣ် ယဟိဝၤယွၤ အတၢ်အဲၣ်န့ၣ် မ့ၢ်တၢ်ခွဲးတၢ်ယာ်ဖးဒိၣ် တခါန့ၣ်လီၤ. ပတူၢ်ဘၣ်ဒ် စီၤယိၤဟၣ်စံးဝဲအသိး- “ပၢ်ဟ့ၣ်လံပှၤလၢ တၢ်အဲၣ်တၢ်ကွံဒ်လဲၣ်ဒ်လဲၣ်” န့ၣ်လီၤ.—၁ ယိၤဟၣ် ၃:၁.
