၁လၢညါ​န့ၣ် ကစၢ်​ယွၤ​ဆဲးကျိး​ဒီး ပှၤ​ဟီၣ်ခိၣ်​ဖိ​လီၤ. ကစၢ်​ယွၤ​သူဝဲ အသး​စီဆှံ ဒ်သိး​က​ထၢနုာ် အ​တၢ်​ဆိကမိၣ်​လၢ ပှၤ​ကွဲး​လံာ်စီဆှံ​တဖၣ်​အသး​ပူၤ​လီၤ. (၂ ပ့းတရူး ၁:၂၀, ၂၁) ပ​သ့ၣ်ညါ​ထီၣ် တၢ်မ့ၢ်​တၢ်တီ ဘၣ်ဃး​ဒီး​ကစၢ်​ယွၤ​သ့ ခီဖျိ​ပ​ဖး​လံာ်စီဆှံ​န့ၣ်​လီၤ.—ဖး ယိၤဟၣ် ၁၇:၁၇; ၂ တံၤမသ့း ၃:၁၆ တက့ၢ်.

၂လၢ​လံာ်စီဆှံ​အ​ပူၤ​န့ၣ် ကစၢ်​ယွၤ​ပာ်ဖျါ​ထီၣ် အ​နီၢ်ကစၢ်​အဂ့ၢ်​အကျိၤ​အါမံၤ​န့ၣ်​လီၤ. ကစၢ်​ဒုး​သ့ၣ်ညါ​ပှၤလၢ ဘၣ်​မနုၤ​အဃိ တ့လီၤဝဲ​ပှၤ​ဟီၣ်ခိၣ်​ဖိ​လဲၣ်, လၢ​ပှၤ​ဟီၣ်ခိၣ်​ဖိ​အဂီၢ် ကစၢ်​က​မၤ​တၢ်မနုၤ​လဲၣ် ဒီး​ကစၢ်​အဲၣ်ဒိးဝဲ​လၢ ပ​က​အိၣ်မူ​ဘၣ်​ဒ်လဲၣ်​အဂ့ၢ်​န့ၣ်​လီၤ. (မၤတၢ် ၁၇:၂၄-၂၇) ယဟိဝၤ​ယွၤ​အဲၣ်ဒိးဝဲ​လၢ ပ​က​သ့ၣ်ညါ​တၢ်မ့ၢ်​တၢ်တီ ဘၣ်ဃး​ဒီး​အီၤ​လီၤ.—ဖး ၁ တံၤမသ့း ၂:၃, ၄ တက့ၢ်.

၃ယဟိဝၤ​ယွၤ​မ့ၢ် တၢ်မ့ၢ်​တၢ်တီ​အ​ကစၢ်​ဒီး ဆှၢလီၤ​ဝဲ​အ​ဖိခွါ​ယ့ၣ်ၡူး​ဆူ ဟီၣ်ခိၣ်​ချၢ ဒ်သိး​က​သိၣ်လိ​ပှၤ တၢ်မ့ၢ်​တၢ်တီ​အဂီၢ်​လီၤ. လၢတၢ်န့ၣ်​အဃိ ပှၤလၢ​အ​အဲၣ်​တၢ်မ့ၢ်​တၢ်တီ​တဖၣ် ဘၣ်​တၢ်​ထုးန့ၢ်​အီၤ​ဆူ ယ့ၣ်ၡူး​အ​အိၣ်​လီၤ. (ယိၤဟၣ် ၁၈:၃၇) ကစၢ်​ယွၤ​အဲၣ်ဒိး​လၢ ပှၤ​ဒ်အံၤ​တဖၣ် က​ဘူၣ်ထီၣ်​ဘါထီၣ်​အီၤ​လီၤ.—ဖး ယိၤဟၣ် ၄:၂၃, ၂၄ တက့ၢ်.

၄မုၣ်ကီၤလံၢ် တြီဝဲ​ပှၤ​ဟီၣ်ခိၣ်​ဖိ​အါဂၤ ဒ်သိး​သု​တ​သ့ၣ်ညါ​ထီၣ် ကစၢ်​ယွၤ​အဂ့ၢ် ခီဖျိ​လၢ​အဝဲ ရၤလီၤ​ဝဲ တၢ်​သိၣ်လိ​လၢ အ​တမ့ၢ်​တတီ ဘၣ်ဃး​ဒီး​ကစၢ်​ယွၤ​န့ၣ်​လီၤ. (၂ ကရံၣ်သူး ၄:၃, ၄) ဘၣ်ဆၣ် ပှၤ​အ​ကကွဲၢ် လၢ​အ​သူၣ်တီ​သးလိၤ​တဖၣ် ဃုထံၣ်န့ၢ်​တၢ်မ့ၢ်​တၢ်တီ ဘၣ်ဃး​ဒီး​ယွၤ ခီဖျိ​လၢ အဝဲသ့ၣ်​မၤလိ​လံာ်စီဆှံ​န့ၣ်​လီၤ.—ဖး မၤတၢ် ၁၇:၁၁ တက့ၢ်.