ပိာ်မုၣ်​ဖိသၣ်​တဂၤ​လၢ အသး​နံၣ်​အိၣ်ဝဲ​လွံၢ်​နံၣ်​ဃၣ်ဃၣ်​န့ၣ် ထံၣ်ဘၣ်​ဝဲ​စဲးယိၢ်​တဖျၢၣ် အ​မ့ၣ်အူ​ပျီ​ဟဲ​ခုၣ်ထီၣ် တ​လိၣ်ဘၣ်​တ​လိၣ်​လီၤဂာ်​ဒ်​တၢ်အၢၣ်​အသိး​လီၤ. အဃိ ပိာ်မုၣ်​ဖိ​တဂၤ​အံၤ တဲဝဲ​လၢ​စဲးယိၢ်​တဖျၢၣ်​အံၤ ဒုးအိၣ်​ထီၣ်ဝဲ​တၢ်​အၢၣ်လီၤ. ဖိသၣ်​အ​တၢ်​ဆိကမိၣ် မ့ၢ်​ကမၣ်​န့ၣ် တမ့ၢ်​တၢ်​လၢ​အ​လီၤဘၣ်ယိၣ်​ဖးဒိၣ်​ဘၣ်. ဒီး​ကဲထီၣ်​တၢ်လီၤနံၤ​လၢ​ပှၤဂၤ​အဂီၢ်​လီၤ. ဘၣ်ဆၣ် ပ​မ့ၢ်​နၢ်ပၢၢ်​ကမၣ်​တၢ်​လၢ အရ့ဒိၣ်​တမံၤမံၤ​န့ၣ် မၤဘၣ်ဒိ​ပ​တၢ်အိၣ်မူ​သ့ဝဲ​လီၤ. အဒိ တၢ်​နၢ်ပၢၢ်​ကမၣ်​တၢ်ဂ့ၢ်​တၢ်ကျိၤ​လၢ ကသံၣ်​ဒၢ​အလိၤ​န့ၣ် ကဲထီၣ်​တၢ်​လီၤဘၣ်ယိၣ်​ဖးဒိၣ်​လၢ နဂီၢ်​သ့ဝဲ​လီၤ.

တၢ်​နၢ်ပၢၢ်​ကမၣ်​ဘၣ်ဃး​ဒီး လံာ်စီဆှံ​အ​တၢ်​သိၣ်လိ​န့ၣ် မ့ၢ်​တၢ်​လီၤဘၣ်ယိၣ်​ဖးဒိၣ်​စ့ၢ်ကီး​လီၤ. အဒိ လၢညါ​ပှၤ​တနီၤ​နၢ်ပၢၢ်​ကမၣ်​ဝဲ ယ့ၣ်ၡူး​အ​တၢ်သိၣ်လိ​လီၤ. (ယိၤဟၣ် ၆:၄၈-၆၈) အဝဲသ့ၣ်​တ​ဃု​သ့ၣ်ညါ​အါထီၣ်​ဝဲ​ဘၣ်. လၢတၢ်န့ၣ်​အလီၢ် အဝဲသ့ၣ်​တ​တူၢ်လိာ် ယ့ၣ်ၡူး​အ​တၢ်​သိၣ်လိ​နီ​တခါ​အဃိ မ့ၢ်​တၢ်​လၢ​အ​လီၤသးအုး​ဒိၣ်မး​လီၤ.

မ့ၢ်​န​ဖး​လံာ်စီဆှံ​လၢ န​က​ဒိးန့ၢ်​ဘၣ် တၢ်ဟ့ၣ်ကူၣ်​အဂီၢ်​ဧါ. န​မ့ၢ်​ဖး​လံာ်စီဆှံ​လၢ တၢ်​ဟံးစု​နဲၣ်ကျဲ​အဂီၢ်​န့ၣ် မ့ၢ်​တၢ်​လၢ​အ​လီၤ​စံးပတြၢၤ​ဒိၣ်မး​လီၤ. ဘၣ်ဆၣ် ဖဲ​န​ဖး​လံာ်စီဆှံ​အခါ တၢ်​ဘၣ်ယိၣ်​အိၣ်ဝဲ​လၢ န​က​နၢ်ပၢၢ်​ကမၣ် တၢ်ဂ့ၢ်​တမံၤမံၤ​လီၤ. ပှၤ​အါဂၤ​နၢ်ပၢၢ်​ကမၣ်​တၢ်ဂ့ၢ်​တနီၤ​အဃိ ပ​ကကွၢ်​သကိး​တၢ်​နၢ်ပၢၢ်​ကမၣ် အဂ့ၢ်​သၢ​ခါလီၤ.

• လံာ်စီဆှံ​တဲဝဲ ဘၣ်ဃး​ဒီး​တၢ် “ပျံၤ​ယွၤ” န့ၣ်​ပှၤ​တနီၤ​နၢ်ပၢၢ်​ကမၣ်​ဝဲ​လီၤ. အဝဲသ့ၣ် ဆိကမိၣ်​ဝဲ​လၢ တၢ်ပျံၤ​ယွၤ​န့ၣ် က​ဘၣ်​အိၣ်ဒီး​တၢ်​ကနိး​ကစုာ်​လီၤ. (စံၣ်တဲၤ​တဲလီၤ​တၢ် ၁၂:၁၃) ဘၣ်ဆၣ် ကစၢ်​ယွၤ​တ​အဲၣ်ဒိးဝဲ​လၢ ပှၤလၢ​အ​ဘူၣ်ထီၣ်​ဘါထီၣ်​အီၤ​တဖၣ် က​တူၢ်ဘၣ်​ဝဲ​ဒ်​န့ၣ်​ဘၣ်. ကစၢ်​ယွၤ​တဲဝဲ​လၢ– “ပျံၤတၢ်​တဂ့ၤ. အဂ့ၢ်ဒ်အံၤ, ယ​အိၣ်ဒီး​နၤ​လီၤ. ကွၢ်တရံး​တၢ်​တဂ့ၤ. အဂ့ၢ်ဒ်အံၤ, ယ​မ့ၢ်​န​ကစၢ်​လီၤ. ယ​ဒုး​ဆူၣ်​ထီၣ်​လံ​န​ဂံၢ်​န​ဘါလံ, မ့ၢ်မး​ယ​မၤစၢၤ​လံ​နၤ​လံ.” (ယၡါယၤ ၄၁:၁၀) တၢ်ပျံၤ​ယွၤ​န့ၣ် အဲၣ်ဒိးစံးဝဲ​လၢ ပ​က​ဘၣ်​ယူးယီၣ်​ပာ်ကဲ​အီၤ​လီၤ.

• ပှၤ​တနီၤနီၤ​နၢ်ပၢၢ်​ကမၣ် လံာ်စီဆှံ​တ​ဆၢ​လၢ စံး​ဝဲ– “တၢ်​အခ့အခါ​အိၣ်ဝဲ​လၢ ကယဲၢ်​တၢ်​တမံၤ​လၢ်လၢ်​အဂီၢ်, . . . အကတီၢ်​လၢ ပှၤ​က​အိၣ်ဖျဲၣ်​အဂီၢ်, အကတီၢ်​လၢ ပှၤ​က​သံ​အဂီၢ်” လီၤ. အဝဲသ့ၣ်​ဆိကမိၣ်​ကမၣ်​ဝဲ​လၢ ကစၢ်​ယွၤ​ဆၢတဲာ်​ပာ်စၢၤ​လၢ ပှၤ​ဟီၣ်ခိၣ်​ဖိ​တဂၤ​စုာ်စုာ် က​ဘၣ်​သံ​လၢ​ဆၢကတီၢ်​ဖဲလဲၣ်​န့ၣ်​လီၤ. (စံၣ်တဲၤ​တဲလီၤ​တၢ် ၃:၁, ၂) ဘၣ်ဆၣ် လံာ်စီဆှံ​တ​ဆၢ​အံၤ အဲၣ်ဒိးစံးဝဲ​လၢ ပှၤ​ဟီၣ်ခိၣ်​ဖိ​အိၣ်ဖျဲၣ်​ထီၣ် ဒီး​ဘၣ်​သံဝဲလီၤ. ကစၢ်​ယွၤ​အ​ကလုၢ်​ကထါ သိၣ်လိ​စ့ၢ်ကီး​ပှၤလၢ ပ​တၢ်​ဆၢတဲာ်​တဖၣ် မၤ​ထီထီၣ်​ပ​သးသမူ​ဒီး မၤ​ဖုၣ်လီၤ​ပ​သးသမူ​သ့ဝဲ​လီၤ. အဒိ ပ​ဖးဘၣ်​လၢ– “တၢ်ပျံၤ​ယွၤ​န့ၣ် မၤ​အါထီၣ်​မုၢ်နံၤမုၢ်နၤ​လီၤ.” (ကတိၤဒိ ၁၀:၂၇; စံးထီၣ်​ပတြၢၤ ၉၀:၁၀; ယၡါယၤ ၅၅:၃) လၢ​ကျဲ​ဒ်လဲၣ်. ပ​မ့ၢ်​ပာ်ကဲ​ကစၢ်​ယွၤ​အ​ကလုၢ်​ကထါ​န့ၣ် ပ​က​ဟးဆှဲး​လုၢ်လၢ်​သကဲာ်ပဝး​လၢ အ​မၤဘၣ်ဒိ​ပ​တၢ်​အိၣ်ဆူၣ်​အိၣ်ချ့ ဒ်သိး​ဒီး တၢ်အီ​မူၤ​သံး​ဒီး တၢ်မၤ​ကမၣ်မုၣ်​ကမၣ်ခွါ​န့ၣ်​လီၤ.—၁ ကရံၣ်သူး ၆:၉, ၁၀.

• ဖဲ​လံာ်စီဆှံ​တဲဝဲ​လၢ မူခိၣ်​ဒီး​ဟီၣ်ခိၣ်​ဘၣ်​တၢ် “ပာ်​အီၤ​လၢ​မ့ၣ်အူ​အဂီၢ်” န့ၣ် ပှၤ​တနီၤနီၤ​ဆိကမိၣ်​ဝဲ​လၢ ဟီၣ်ခိၣ်​တဖျၢၣ်​အံၤ က​ဘၣ်​တၢ်မၤ​ဟးဂီၤ​အီၤ​လၢ မ့ၣ်အူ​လီၤ. (၂ ပ့းတရူး ၃:၇) ဘၣ်ဆၣ် ကစၢ်​ယွၤ​အၢၣ်လီၤ​ဝဲ​လၢ အဝဲ​တ​ဟ့ၣ်​အခွဲး​လၢ ဟီၣ်ခိၣ်​က​ဟးဂီၤ​ဝဲ​နီတဘျီ​ဘၣ်. ကစၢ်​ယွၤ “ပာ်​ဟီၣ်ခိၣ်​လၢ​အ​ခီၣ်ထံး​တဖၣ်, တဟူး​တ​ဝး​ဘၣ် အစိၤစိၤ​အ​ဃၣ်ဃၣ်​ဘၣ်​လီၤ.” (စံးထီၣ်​ပတြၢၤ ၁၀၄:၅; ယၡါယၤ ၄၅:၁၈) ဟီၣ်ခိၣ်​တဖျၢၣ်​အံၤ တဘၣ်​တၢ်မၤ​ဟးဂီၤ​အီၤ​နီတဘျီ​ဘၣ်. ဘၣ်ဆၣ် ဒ်​မ့ၣ်အူ​မၤ​ဟးဂီၤ​တၢ်​လီၤထူ​လီၤယိာ်​အသိး ဟီၣ်ခိၣ်​အ​တၢ်ရဲၣ်​တၢ်ကျဲၤ​လၢ အအၢ​အသီ​အံၤ က​ဘၣ်​တၢ်မၤ​ဟးဂီၤ​ကွံာ်​အီၤ​ဒ်​န့ၣ်​လီၤ. မ့မ့ၢ်​မူခိၣ်​န့ၣ် အဲၣ်ဒိး​တဲဝဲ​အခီပညီ​လၢ မူ​ဖးဖီ, မူပျီ မ့တမ့ၢ် ကစၢ်​ယွၤ​အိၣ်​တၢ်​အလီၢ် ဒီး​တၢ်​သ့ၣ်​တဖၣ်​အံၤန့ၣ် တဘၣ်​တၢ်မၤ​ဟးဂီၤ​အီၤ​ဘၣ်.

ဒ်​တၢ်အဒိ​လၢ​ထး​တဖၣ်​အံၤ ပာ်ဖျါ​ထီၣ်ဝဲ​အသိး အါဒၣ်​တၢ်​တက့ၢ် ပှၤ​နၢ်ပၢၢ်​ကမၣ်​ဝဲ လံာ်စီဆှံ​အဆၢ​တဖၣ်​လီၤ. ဘၣ်​မနုၤ​အဃိ ကစၢ်​ယွၤ​ဟ့ၣ်​ဝဲ​အခွဲး​လၢ ပှၤ​က​နၢ်ပၢၢ်​ကမၣ် အ​ကလုၢ်​ကထါ​လဲၣ်. ပှၤ​တနီၤ​ဆိကမိၣ်​ဝဲ​လၢ– ‘ကစၢ်​ယွၤ​မ့မ့ၢ်​ပှၤလၢ အပှဲၤ​ဒီး​တၢ်ကူၣ်သ့ ဒီး​တၢ်​သ့ၣ်ညါ​န့ၣ် အဝဲ​က​ဟ့ၣ်လီၤ​ပှၤ လံာ်​ယိယိ​ဖိ​တဘ့ၣ်​ဒ်သိး ပှၤ​ခဲလၢာ်​နၢ်ပၢၢ်​ဝဲ​ကညီ​အဂီၢ်​လီၤ. ဘၣ်​မနုၤ​အဃိ ကစၢ်​ယွၤ​တ​မၤဝဲ ဒ်​န့ၣ်​လဲၣ်.’ ပ​ကကွၢ်​သကိး​တၢ်ဂ့ၢ်​သၢ​မံၤ​လၢ ဘၣ်​မနုၤ​အဃိ ပှၤ​အါဂၤ​နၢ်ပၢၢ်​ကမၣ်​လံာ်စီဆှံ​လဲၣ်န့ၣ်​လီၤ.

1. ၁. ထဲ​ပှၤလၢ အ​ဆီၣ်လီၤ​သး​ဒီး သးအိၣ်​မၤလိ​တၢ်​န့ၣ် နၢ်ပၢၢ်​ဝဲ လံာ်စီဆှံ​အခီပညီ သ့ဝဲ​လီၤ. ယ့ၣ်ၡူး​တဲဘၣ်​အ​ပၢ်​လၢ– “မူခိၣ်​ဒီး ဟီၣ်ခိၣ်​အ​ကစၢ်, ပၢ်ဧၢ, ယ​စံးထီၣ်​ပတြၢၤ​နၤ​လီၤ. အဂ့ၢ်ဒ်အံၤ,  တၢ်​တဖၣ်​အံၤ, န​ပာ်ခူသူၣ်​လၢ ပှၤ​ကူၣ်တၢ်သ့, ဒီး​ပှၤ​အ​သူၣ်​ဆး​သးဆး​တဖၣ်​အမဲာ်​ညါ, ဒီး​န​မၤ​ဖျါထီၣ်​အီၤ​လၢ ဖိသၣ်​အမဲာ်​ညါ​လီၤ.” (လူၤကၣ် ၁၀:၂၁) လံာ်စီဆှံ ဘၣ်​တၢ်ကွဲး​အီၤ​ဒ်သိး ထဲ​ပှၤလၢ​အိၣ်ဒီး​တၢ်​ပာ်သူၣ်​ပာ်သး​လၢ အဂ့ၤ​တဖၣ်​က​နၢ်ပၢၢ်​ဝဲ​အဂီၢ်​လီၤ. အါဒၣ်​တၢ်​တက့ၢ် “ပှၤ​ကူၣ်တၢ်သ့, ဒီး​ပှၤ​အ​သူၣ်​ဆး​သးဆး” န့ၣ် အိၣ်ဒီး​တၢ်​ပာ်​ထီထီၣ်​အသး​အဃိ နၢ်ပၢၢ်​ကမၣ်​လံာ်စီဆှံ​အခီပညီ​လီၤ. ဘၣ်ဆၣ် ပှၤ​တနီၤ​အိၣ်ဒီး​တၢ်​ပာ်သူၣ်​ပာ်သး​ဒ် “ဖိသၣ်” အဃိ ဖဲ​အဝဲသ့ၣ်​ဖး​လံာ်စီဆှံ​အခါ အဝဲသ့ၣ်​ဆီၣ်လီၤ​အသး ဒီး​သးအိၣ်​မၤလိ​န့ၢ်​တၢ်​လီၤ. လၢတၢ်န့ၣ်​အဃိ အဝဲသ့ၣ်​နၢ်ပၢၢ်​အါထီၣ် ကစၢ်​ယွၤ​အ​တၢ်ကစီၣ်​လီၤ. ကစၢ်​ယွၤ​ကတဲာ်​ကတီၤ​လံာ်စီဆှံ​ဒ်အံၤ​န့ၣ် မ့ၢ်​တၢ်​လၢ အ​လီၤ​ကမၢ​ကမၣ်​ဒိၣ်မး​လီၤ.

2. ၂. လံာ်စီဆှံ ဘၣ်​တၢ်ကွဲး​အီၤ​လၢ ပှၤလၢ အ​သူၣ်ဘျၢ​သးဘျၢ​လၢ အဲၣ်ဒိး​ဒိးန့ၢ်​ဘၣ် ယွၤ​အ​တၢ်မၤစၢၤ ဒ်သိး​က​နၢ်ပၢၢ်ထီၣ် ယွၤ​အ​ကလုၢ်​ကထါ​အဂီၢ်​လီၤ. ယ့ၣ်ၡူး​ပာ်ဖျါ​ထီၣ်ဝဲ​လၢ ပ​မ့ၢ်​အဲၣ်ဒိး​သ့ၣ်ညါ​နၢ်ပၢၢ် အ​တၢ်​သိၣ်လိ လီၤတံၢ်​လီၤဆဲး​န့ၣ် ပ​က​လိၣ်ဘၣ်​တၢ်မၤစၢၤ​လီၤ. ပ​က​ဒိးန့ၢ်​ဘၣ်​ဒ်လဲၣ်. ယ့ၣ်ၡူး​တဲဖျါထီၣ်​ဝဲ​လၢ– “ပှၤ​မၤစၢၤ​တၢ်, သးစီဆှံ​လၢ ပၢ်​မၢလီၤ​အီၤ​လၢ​ယ​မံၤ, အဝဲဒၣ်​က​သိၣ်လိ​သု​လၢ​တၢ်​ခဲလၢာ်” လီၤ. (ယိၤဟၣ် ၁၄:၂၆) အဃိ ကစၢ်​ယွၤ​ဟ့ၣ်လီၤ​ပှၤ သးစီဆှံ​လၢ​အမ့ၢ် အစိကမီၤ​လၢ​အ​သူဝဲ​ဒ်သိး က​မၤ​လၢပှဲၤ​အ​တၢ်​ဘၣ်သး​အဂီၢ်​လီၤ. သးစီဆှံ​မၤစၢၤဝဲ​ဒ်သိး ပ​က​နၢ်ပၢၢ် လံာ်စီဆှံ​အဂီၢ်​လီၤ. ဘၣ်ဆၣ် ပှၤ​တနီၤ​တ​သန့ၤ​အသး​လၢ ကစၢ်​ယွၤ​အ​တၢ်မၤစၢၤ​ဘၣ်. အဃိ ကစၢ်​ယွၤ​တ​ဟ့ၣ်လီၤ​အဝဲသ့ၣ် သးစီဆှံ​ဘၣ် ဒီး​အဝဲသ့ၣ် တ​နၢ်ပၢၢ်​ဝဲ​လံာ်စီဆှံ​လီၤတံၢ်​လီၤဆဲး​ဘၣ်. တကးဒံးဘၣ် သးစီဆှံ​ထိၣ်ဟူး​ထိၣ်ဂဲၤ​ထီၣ် ခရံာ်ဖိ​လၢ​အ​အိၣ်ဒီး တၢ်​သ့ၣ်ညါ​နၢ်ပၢၢ်​တဖၣ် ဒ်သိး​က​လဲၤ​မၤစၢၤ ပှၤလၢ​အသး​အိၣ်​သ့ၣ်ညါ တၢ်မ့ၢ်​တၢ်တီ​န့ၣ်​လီၤ.—မၤတၢ် ၈:၂၆-၃၅.

3. ၃. လံာ်စီဆှံ​အဆၢ​တနီၤ​န့ၣ် အဆၢ​ကတီၢ်​မ့ၢ်​တဘၣ်​ဒံး​ဘၣ်​န့ၣ် ပ​နၢ်ပၢၢ်​အီၤ​တ​သ့​ဘၣ်. အဒိ မူခိၣ်​ကလူး​တဲဘၣ် ဝံ​ဒၤနံးယ့လး လၢ​က​ကွဲးလီၤ​တၢ်ကစီၣ်​ဘၣ်ဃး​ဒီး ခါဆူညါ​အဂ့ၢ်​န့ၣ်​လီၤ. မူခိၣ်​ကလူး​အံၤ​တဲ​အီၤ​လၢ– “စီၤဒၤနံးယ့လး​ဧၢ, ကးတံာ်​ဃာ်​တၢ်ကတိၤ​တဖၣ်​န့ၣ်, ဒီး​စဲဃာ်​ပနီၣ်​လံာ်​တုၤ တၢ်​အ​ကတၢၢ်​န့ၣ်​တက့ၢ်.” တၢ်​ဆၢကတီၢ်​လဲၤ​ပူၤကွံာ်​အ​နံၣ်​လၢ အ​ကယၤ​တဖၣ် ဒီး​ပှၤ​အါဂၤ​ဖး​ဝဲ​လံာ်​အံၤ​သနာ်က့ တ​နၢ်ပၢၢ်​ဝဲ​အါအါ​ဘၣ်. ဝံ​ဒၤနံးယ့လး အ​နီၢ်ကစၢ်​ဒၣ်ဝဲ တ​နၢ်ပၢၢ်​ဝဲ​တၢ်​လၢ အ​ကွဲးဝဲ​တဖၣ်​ခဲလၢာ်​ဘၣ်. လၢ​တၢ်ဆီၣ်​လီၤသး​အ​ပူၤ အဝဲ​တဲဝဲ​လၢ– “ယ​နၢ်ဟူ​တၢ် ဘၣ်ဆၣ်​ဒီး, ယ​နၢ်​တ​ပၢၢ်​ဘၣ်.” လၢခံ​န့ၣ် ပှၤ​နၢ်ပၢၢ်ထီၣ် ယွၤ​အ​တၢ်စံးပာ်​လၢ​ဝံ​ဒၤနံးယ့လး ကွဲးဝဲ​တဖၣ် ဘၣ်ဆၣ် ဘၣ်​အိၣ်ခိး​တုၤလၢ တၢ်​ဆၢကတီၢ်​လၢ ကစၢ်​ယွၤ​ပာ်ပနီၣ်​ဝဲ​လီၤ. မူခိၣ်​ကလူး​တဂၤ​အံၤ တဲဖျါထီၣ်​ဝဲ​လၢ– “ဟးထီၣ်​တက့ၢ်, စီၤဒၤနံးယ့လး​ဧၢ. အဂ့ၢ်ဒ်အံၤ, တၢ်ကတိၤ​န့ၣ် ကးတံာ်​ဃာ်​လံ​အသး​ဒီး စဲဃာ်​ပနီၣ်​လံ​အသး တုၤ​တၢ်​အ​ကတၢၢ်​ဘၣ်​လီၤ.” မတၤ​တဖၣ်​က​နၢ်ပၢၢ်​တၢ်ကစီၣ်​လၢ​ယွၤ​အ​အိၣ်​လဲၣ်. “ပှၤအၢ​န့ၣ် အ​နၢ်​တ​ပၢၢ်​ဘၣ်​တၢ်​နီ​တဂၤ​ဘၣ်. မ့မ့ၢ်​ပှၤ​ကူၣ်တၢ်သ့​တဖၣ်​န့ၣ် အ​နၢ်​က​ပၢၢ်​တၢ်​လီၤ.” (ဒၤနံးယ့လး ၁၂:၄, ၈-၁၀) အဃိ ဘၣ်ဃး​ဒီး​လံာ်စီဆှံ​အဆၢ​တနီၤနီၤ​န့ၣ် တၢ်​ဆၢကတီၢ်​မ့ၢ်​တဘၣ်​ဒံး​ဘၣ်​န့ၣ် ကစၢ်​ယွၤ​တ​ပာ်ဖျါ​ထီၣ်ဝဲ​အခီပညီ​ဘၣ်.

ခီဖျိ​လၢ တၢ်​ဆၢကတီၢ်​တဘၣ်​ဒံး​ဘၣ်​အဃိ ယဟိဝၤ​ပှၤအုၣ်​အသး​တဖၣ် နၢ်ပၢၢ်​ကမၣ်​လံာ်စီဆှံ အိၣ်ဝဲ​တဘျီဘျီ​ဧါ. အိၣ်ဝဲ​လီၤ. ဘၣ်ဆၣ် ဖဲ​တၢ်​ဆၢကတီၢ်​ဘၣ်​ဝဲ​လၢ ကစၢ်​ယွၤ​က​ပာ်ဖျါ​ထီၣ် တၢ်မ့ၢ်​တၢ်တီ​န့ၣ် ယဟိဝၤ​ပှၤအုၣ်​အသး​တဖၣ် ဆီတလဲ​အ​တၢ်ထံၣ်​လီၤ. လၢတၢ်န့ၣ်​အဃိ ယဟိဝၤ​ပှၤအုၣ်​အသး​တဖၣ် နာ်ဝဲ​လၢ အဝဲသ့ၣ်​ကွၢ်လိမၤဒိး​ဝဲ ခရံာ်​အ​တၢ်မၢဖိ​တဖၣ်​လီၤ. ဖဲ​ယ့ၣ်ၡူး​ဘှီ​ဘၣ်​ထီၣ်​တၢ်မၢဖိ​တဖၣ် အ​တၢ်​ဆိကမိၣ်​အခါ အဝဲသ့ၣ်​ဆီတလဲ အ​တၢ်ထံၣ်​လၢ တၢ်ဆီၣ်​လီၤသး​အ​ပူၤ​လီၤ.—မၤတၢ် ၁:၆, ၇.

ဖိသၣ်​ပိာ်မုၣ်​ဖိ​လၢ ဆိကမိၣ်​ကမၣ်​ဝဲ​လၢ စဲ​ယိၢ်​တဖျၢၣ်​ထုးထီၣ်​ဝဲ​တၢ်အၢၣ်​န့ၣ် တမ့ၢ်​တၢ်ဂ့ၢ်ကီ​နီတမံၤ​ဘၣ်. ဘၣ်ဆၣ် လံာ်စီဆှံ​အ​တၢ်​သိၣ်လိ​န့ၣ် မ့ၢ်​တၢ်​အရ့ဒိၣ်​မး​လၢ​နဂီၢ်​လီၤ. လံာ်စီဆှံ အ​တၢ်ကစီၣ်​န့ၣ် မ့ၢ်​တၢ်​လၢ အရ့ဒိၣ်​မး​အဃိ ပ​တ​ကြၢး​ဆိကမိၣ်​လၢ ပ​က​ဖး​အီၤ​ထဲ​တဂၤဧိၤ​ဒီး​နၢ်ပၢၢ်​အခီပညီ​ဘၣ်. ဃ့​တၢ်မၤစၢၤ​လၢ န​က​နၢ်ပၢၢ် တၢ်​လၢ​န​ဖး​အီၤ​တဖၣ်​တက့ၢ်. ဃုထံၣ်န့ၢ် ပှၤလၢ​အ​မၤလိ လံာ်စီဆှံ​လၢ တၢ်ဆီၣ်လီၤ​အသး​အ​ပူၤ, ပှၤလၢ​သန့ၤ​အသး​လၢ ယွၤ​အသး​စီဆှံ​ဒ်သိး က​နၢ်ပၢၢ်​လံာ်စီဆှံ​အဂီၢ် ဒီး​နာ်ဝဲ​လၢ တၢ်​ဆၢကတီၢ်​ဘၣ်​လံ​လၢ ကစၢ်​ယွၤ​အဲၣ်ဒိး​လၢ ပ​က​နၢ်ပၢၢ် လံာ်စီဆှံ​အခီပညီ​လီၤ. ဟံးန့ၢ်​တၢ်​ဆၢကတီၢ်​လၢ န​က​တဲသကိး​တၢ်​ဒီး​ယဟိဝၤ​ပှၤအုၣ်​အသး​တဖၣ် မ့တမ့ၢ် ဖး​အဝဲသ့ၣ်​အ​လံာ်လဲၢ်​လၢ jw.org ပှာ်ယဲၤသန့​အ​ပူၤ​တက့ၢ်. လံာ်စီဆှံ​အၢၣ်လီၤ​အီလီၤ​ဝဲ​လၢ– “မ့ၢ်မး​န​မ့ၢ်​ကိး​တၢ်​ဆူ တၢ်ကူၣ်​တၢ်ဆး, . . . န​က​ထံၣ်န့ၢ်​တၢ်​သ့ၣ်ညါ​ယွၤ​လီၤ.”—ကတိၤဒိ ၂:၃-၅.