ကတိၤဒိ ၁၂:၁-၂၈
-
ပှၤလၢ အသးဟ့ တၢ်သိၣ်ဃီၣ်န့ၣ် အတၢ်သ့ၣ်ညါ တအိၣ်ဘၣ် (၁)
-
“တၢ်ကတိၤလၢ ပှၤတဆိကမိၣ်ဆိအီၤဘၣ်ဒီး တဲအီၤန့ၣ် လီၤဂာ်ဒ်သိးဒီး နးလၢအဆဲးတၢ်” (၁၈)
-
တၢ်ဆီၣ်ထွဲ တၢ်ဃူတၢ်ဖိးန့ၣ် ဒုးအိၣ်ထီၣ် တၢ်သးခု (၂၀)
-
ပျုၤလၢအလီတၢ်န့ၣ် ယဟိဝၤယွၤ သးဘၣ်အၢ (၂၂)
-
တၢ်သူၣ်ကိၢ်သးဂီၤန့ၣ် မၤစၢ်လီၤပှၤသးဂံၢ်ဘါ (၂၅)
၁၂ ပှၤလၢအအဲၣ် တၢ်သိၣ်က့ၤ သီက့ၤန့ၣ် အဲၣ်တၢ်သ့ၣ်ညါ,+မ့မ့ၢ် ပှၤလၢအသးဟ့ တၢ်သိၣ်ဃီၣ်န့ၣ် အတၢ်သ့ၣ်ညါ တအိၣ်ဘၣ်.+
၂ ယဟိဝၤယွၤ ဘၣ်သူၣ်ဘၣ်သးဝဲ ပှၤလၢအမၤတၢ်ဂ့ၤ,မ့မ့ၢ် ပှၤလၢအကူၣ်ထီၣ် တၢ်အၢန့ၣ် ကစၢ်ယွၤ စံၣ်ညီၣ်ဝဲလီၤ.+
၃ ပှၤလၢအမၤတၢ်အၢတၢ်သီအဃိ အအိၣ်ဘၣ် ပူၤပူၤဖျဲးဖျဲးန့ၣ် တအိၣ်နီတဂၤဘၣ်,+မ့မ့ၢ် ပှၤတီပှၤလိၤန့ၣ် ကအိၣ်ဘၣ် ပူၤပူၤဖျဲးဖျဲး ထီဘိလီၤ.
၄ မါလၢအဂ့ၤတဂၤန့ၣ် မ့ၢ်အဝၤ အခိၣ်သလုး,+မ့မ့ၢ် မါလၢအမၤတၢ်လၢ အလီၤမဲာ်ဆှးန့ၣ် လီၤဂာ်ဒ်သိးဒီး တၢ်ဆါတခါလၢ အမၤအုၣ်မၤကျၣ် အဝၤအဃံတဖၣ်လီၤ.+
၅ ပှၤတီပှၤလိၤ အတၢ်ဆိကမိၣ်တဖၣ်န့ၣ် တီဝဲလိၤဝဲ,မ့မ့ၢ် ပှၤအၢပှၤသီ အတၢ်ဟံးစုနဲၣ်ကျဲန့ၣ် ဆှၢကမၣ် ပှၤဂၤ အတၢ်ဆိကမိၣ်လီၤ.
၆ ပှၤအၢပှၤသီ အတၢ်ကတိၤတဖၣ်န့ၣ် အိၣ်ခိးခူသူၣ်တၢ်လၢ ကမၤသံတၢ်အဂီၢ်,+မ့မ့ၢ် ပှၤတီပှၤလိၤ အထးခိၣ်န့ၣ် မၤပူၤဖျဲးတၢ်လီၤ.+
၇ ဖဲပှၤအၢပှၤသီ ဘၣ်တၢ်မၤ ဟးဂီၤအီၤအခါ တအိၣ်တ့ၢ် နီတဂၤလၢၤဘၣ်.
မ့မ့ၢ် ပှၤတီပှၤလိၤ အဟံၣ်န့ၣ် ကဆၢထၢၣ် ဂၢၢ်ဂၢၢ်ကျၢၤကျၢၤလီၤ.+
၈ ပှၤလၢ အထးခိၣ် ပာ်ဖျါထီၣ် တၢ်ကူၣ်တၢ်ဆးန့ၣ် ပှၤကပတြၢၤအီၤ,+မ့မ့ၢ် ပှၤလၢ အသးက့ၣ်န့ၣ် ပှၤကဆိကမိၣ်ဆံးအီၤလီၤ.+
၉ ပှၤတဂၤလၢ ပှၤတပာ်ကဲအီၤ အါအါဘၣ် ဘၣ်ဆၣ် အအိၣ်ဒီး အခ့အပှၤတဂၤန့ၣ်ဂ့ၤဒိၣ်န့ၢ်ဒံး ပှၤတဂၤလၢ အမၤလၤကပီၤလီၤအသး ဘၣ်ဆၣ် အတၢ်အီၣ်တအိၣ် နီတမံၤဘၣ်လီၤ.+
၁၀ ပှၤတီပှၤလိၤန့ၣ် ကွၢ်ထွဲဝဲ အဆၣ်ဖိကီၢ်ဖိတဖၣ်,+မ့မ့ၢ် ပှၤအၢပှၤသီန့ၣ် ဆိကမိၣ်ဝဲလၢ အအိၣ်ဒီး တၢ်သးကညီၤ ဘၣ်ဆၣ် နီၢ်ကီၢ်န့ၣ် အသးအၢသံလီၤ.
၁၁ ပှၤလၢအသူၣ်အီၣ်ဖျးအီၣ်တၢ်န့ၣ် ကအီၣ်ဘၣ်တၢ်ဘျဲဘျဲ,+မ့မ့ၢ် ပှၤလၢအလူၤ တၢ်လၢအဘျုးတအိၣ်ဘၣ်န့ၣ် အသးတဆးဘၣ်.
၁၂ ပှၤအၢပှၤသီသးကွံဝဲ တၢ်လၢ ပှၤသးအၢအဂၤတဖၣ် မၤန့ၢ်ဘၣ်ဝဲ,
မ့မ့ၢ် ပှၤတီပှၤလိၤန့ၣ် လီၤဂာ်ဒ်သိးဒီး သ့ၣ်တထူၣ်လၢ အဂံၢ်စဲၤလီၤသး ယိာ်ယိာ် ဒီးသၣ်ထီၣ် တၤသၣ်တဖၣ်လီၤ.
၁၃ ပှၤလၢအသးအၢတဂၤန့ၣ် ဘၣ်ကီဘၣ်ခဲခီဖျိလၢ အနီၢ်ကစၢ် အတၢ်ကတိၤလၢ အအၢအသီတဖၣ်အဃိ,+မ့မ့ၢ် ပှၤတီပှၤလိၤတဂၤန့ၣ် ပူၤဖျဲးဒီး တၢ်ကိၢ်တၢ်ဂီၤလီၤ.
၁၄ ပှၤတဂၤ ကဒိးန့ၢ်ဘၣ်က့ၤ တၢ်လၢအဂ့ၤ ခီဖျိအတၢ်ကတိၤတဖၣ်အဃိ+ဒီးတၢ်လၢအမၤဝဲတဖၣ်န့ၣ် ကကဲထီၣ် ခိၣ်ဖးလၢအဂီၢ်လီၤ.
၁၅ ပှၤဟးဂီၤဖိ ဆိကမိၣ်လီၤအသးလၢ အဘၣ်ထီဘိ,+မ့မ့ၢ် ပှၤကူၣ်တၢ်သ့န့ၣ် တူၢ်လိာ် တၢ်ဟ့ၣ်ကူၣ်ဟ့ၣ်ဖးလီၤ.+
၁၆ ပှၤဟးဂီၤဖိ ပာ်ဖျါထီၣ် အတၢ်သးအ့န့ တဘျီဃီ,*+မ့မ့ၢ် ပှၤလၢအအိၣ်ဒီး တၢ်ကူၣ်သ့န့ၣ် ကွၢ်ကပာ်ကွံာ်ဝဲ တၢ်တဲဆါလီၤ.
၁၇ ပှၤအုၣ်အသးလၢ အတီန့ၣ် တဲတၢ်မ့ၢ်တၢ်တီ,မ့မ့ၢ် ပှၤအုၣ်အသးလၢ အတတီဘၣ်န့ၣ် တဲလံၣ်တဲလီတၢ်လီၤ.
၁၈ တၢ်ကတိၤလၢ ပှၤတဆိကမိၣ်ဆိအီၤဘၣ်ဒီး တဲအီၤန့ၣ် လီၤဂာ်ဒ်သိးဒီး နးလၢအဆဲးတၢ်တဘ့ၣ်,မ့မ့ၢ် ပှၤကူၣ်တၢ်သ့ အပျ့ၤန့ၣ် မၤဘျါက့ၤတၢ်လီၤ.+
၁၉ တၢ်ကတိၤလၢ အမ့ၢ်အတီန့ၣ် ကအိၣ်ကဆိး လီၤထူလီၤယိာ်,+မ့မ့ၢ် ပျ့ၤလၢ အလံၣ်တၢ်လီတၢ်န့ၣ် ကအိၣ်ထဲတစိၢ်ဖိလီၤ.+
၂၀ တၢ်လီတၢ်ဝ့ၤ အိၣ်ဝဲလၢ ပှၤလၢအကူၣ်အၢတၢ်တဖၣ် အသးပူၤ,မ့မ့ၢ် ပှၤလၢအဆီၣ်ထွဲ တၢ်ဃူတၢ်ဖိးန့ၣ် အိၣ်ဒီးတၢ်သးခုလီၤ.+
၂၁ တၢ်ဘၣ်ဒိဘၣ်ထံး တလီၤဘၣ် ပှၤတီပှၤလိၤ နီတမံၤဘၣ်.+
မ့မ့ၢ် ပှၤအၢပှၤသီန့ၣ် အတၢ်အိၣ်မူ ပှဲၤဒီးတၢ်နးတၢ်ဖှီၣ်လီၤ.+
၂၂ ပျုၤလၢအလီတၢ်န့ၣ် မ့ၢ်ဝဲ တၢ်လၢ ယဟိဝၤယွၤသးဘၣ်အၢ,+မ့မ့ၢ် ပှၤလၢ အမၤတၢ်လၢ တၢ်သးတီအပူၤန့ၣ် ကစၢ်ယွၤ ဘၣ်သူၣ်ဘၣ်သးဝဲလီၤ.
၂၃ ပှၤလၢအအိၣ်ဒီး တၢ်ကူၣ်သ့န့ၣ် ပာ်ခူသူၣ်ဝဲ တၢ်လၢအသ့ၣ်ညါဝဲတဖၣ်,မ့မ့ၢ် ပှၤဟးဂီၤဖိန့ၣ် တဲဖျိးထီၣ်ဝဲ တၢ်လၢအတကဲဘျုးဘၣ် တဖၣ်န့ၣ်လီၤ.+
၂၄ ပှၤခုန့ၣ်ကပၢတၢ်,+မ့မ့ၢ် ပှၤကၢၣ်န့ၣ် ကဘၣ်မၤကုၢ် အတၢ်မၤလီၤ.+
၂၅ တၢ်သူၣ်ကိၢ်သးဂီၤလၢ ပှၤတဂၤအသးပူၤန့ၣ် မၤစၢ်လီၤအသးဂံၢ်ဘါ,+မ့မ့ၢ် တၢ်ကတိၤလၢ အမုာ်န့ၣ် မၤဖှံထီၣ်အသးလီၤ.+
၂၆ ပှၤတီပှၤလိၤ ဃုကွၢ်ဝဲ တၢ်အီၣ်ဆၣ်လီၢ်လၢ အဂ့ၤကတၢၢ်,မ့မ့ၢ် ပှၤအၢပှၤသီန့ၣ် လဲၤဝဲလၢ အနီၢ်ကစၢ်အကျဲ ဒီးဟးဖျိးဝဲလီၤ.
၂၇ ပှၤကၢၣ်န့ၣ် တလူၤခးအီၣ်တၢ်ဘၣ်,+မ့မ့ၢ် ပှၤလၢအခုန့ၣ် မ့ၢ်တၢ်ထူးတၢ်တီၤလၢ အလုၢ်ဒိၣ်ပှ့ၤဒိၣ်လီၤ.
၂၈ တၢ်တီတၢ်လိၤအကျဲန့ၣ် ဆှၢပှၤဆူတၢ်မူ+ဒီးလၢကျဲအံၤအပူၤန့ၣ် တၢ်သံ တအိၣ်ဘၣ်.
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “တသီဃီ.”
