ကတိၤဒိ ၂၃:၁-၃၅
၂၃ ဖဲနဆ့ၣ်နီၤ အီၣ်တၢ်ဒီး စီၤပၤအခါပလီၢ်နသးတက့ၢ်.
၂ ဒီးနမ့မ့ၢ်ပှၤလၢ အကိာ်ပူၤဝံၣ်န့ၣ်ပၢၤနသးတက့ၢ်.*
၃ ဒ်သိး အတၢ်အီၣ် သုတကဲထီၣ် တၢ်ကွဲန့ၢ်လွဲန့ၢ်နၤ တဂ့ၤအဂီၢ်တဘၣ် လီကီအီၣ် အတၢ်အီၣ်လၢ အဝံၣ်အဘဲတဖၣ်တဂ့ၤ.
၄ မၤလီၤဘှံးနသးလၢ နကန့ၢ်ဘၣ် တၢ်ထူးတၢ်တီၤတဂ့ၤ.+
မၤဒ်န့ၣ်လၢၤတဂ့ၤ. အိၣ်ဒီး တၢ်သ့ၣ်ညါနၢ်ပၢၢ်တက့ၢ်.
၅ ဖဲနကွၢ်အီၤအခါ အတအိၣ်လၢၤဘၣ်.+
အကသလၣ်ထီၣ် အဒံး ဒ်လံာ်ကြီကြာ်အသိး ဒီးယူၤထီၣ်ကွံာ်လၢ မူခိၣ် သပှၢ်တၢၢ်လီၤ.+
၆ တဘၣ်အီၣ် ပှၤပံဒံ အတၢ်အီၣ်တဂ့ၤ.
ဒီးတဘၣ် လီကီအီၣ် အတၢ်အီၣ်လၢ အဝံၣ်အဘဲတဖၣ်တဂ့ၤ.
၇ အဝဲကတဲနၤလၢ “ဟဲအီၣ်တၢ်အီတၢ်သၢၤ.” ဘၣ်ဆၣ် လၢအသးပူၤန့ၣ် တမ့ၢ်ဒ်န့ၣ်ဘၣ်.
ဒီးအကလီၤဂာ်ဒ်သိးဒီး အကွဲးနီၣ်ကွဲးဃါ တၢ်လၢနအီၣ်တဖၣ် ခဲလၢာ်လီၤ.
၈ နကဘှိးထီၣ် တၢ်လၢနအီၣ်တ့ၢ်အီၤဒီးနပတြၢၤ ပှၤတဂၤန့ၣ် သနာ်က့ အကကဲထီၣ် တၢ်ခီလီလီလီၤ.
၉ တဲဃုာ်တၢ်ဒီး ပှၤဟးဂီၤဖိတဂ့ၤ.+
အကပာ်ဆံး နတၢ်ကတိၤတဖၣ်လၢ အအိၣ်ဒီး တၢ်ကူၣ်သ့လီၤ.+
၁၀ တဘၣ် သုးကွံာ် ဟီၣ်ခိၣ်လီၢ်အဆၢ+မ့တမ့ၢ် ဂုာ်န့ၢ်ဆူၣ် ပှၤဖိၣ်ဃဲဖိ အစံာ်လီၢ်တဂ့ၤ.
၁၁ ပှၤလၢအဒီသဒၢ* အဝဲသ့ၣ်န့ၣ် အဂံၢ်ဆူၣ်ဒိၣ်မးဒီးအကဒီသဒၢ အဝဲသ့ၣ်ဒီး ထီဒါနၤလီၤ.+
၁၂ တူၢ်လိာ် တၢ်သိၣ်က့ၤသီက့ၤ လၢနသးဒီဖျၢၣ်ဒီးဒိကနၣ် တၢ်ကတိၤလၢ အအိၣ်ဒီး တၢ်ကူၣ်သ့တက့ၢ်.
၁၃ တဘၣ် မၤယံာ်မၤနီၢ်သးလၢ နကသိၣ်က့ၤသီက့ၤ ပိာ်ခွါဖိ* တဂ့ၤ.+
နမ့ၢ်တီၢ်အီၤဒီး နီၣ်တီၢ်သနာ်က့ အတသံဘၣ်.
၁၄ ဒ်သိး နကမၤပူၤဖျဲးအီၤလၢ တၢ်သံအဂီၢ်နကြၢး တီၢ်အီၤဒီး နီၣ်တီၢ်လီၤ.
၁၅ ဖိခွါဧၢ, နမ့ၢ်ကဲထီၣ် ပှၤကူၣ်တၢ်သ့န့ၣ်ယကသးခုလီၤ.+
၁၆ နထးခိၣ် မ့ၢ်တဲတၢ်လၢအဘၣ်န့ၣ်ယကသးခုလၢ ယသးဒီဖျၢၣ်ညါလီၤ.
၁၇ တဘၣ်သးက့ၣ် ပှၤတၢ်ဒဲးဘးဖိတဖၣ်တဂ့ၤ.+
ပျံၤယဟိဝၤယွၤ ထီဘိတက့ၢ်.+
၁၈ အန့ၣ်မး နတၢ်အိၣ်မူလၢ ခါဆူညါ ကဂ့ၤဝဲ+ဒီးနတၢ်မုၢ်လၢ် တဟးဂီၤကွံာ်ဘၣ်.
၁၉ ဖိခွါဧၢ, ဒိကနၣ် ဒီးကဲထီၣ် ပှၤကူၣ်တၢ်သ့ဒီးနဲၣ်လိနသး ဒ်သိး နကလဲၤကျဲလၢ အဘၣ်အဂီၢ်တက့ၢ်.
၂၀ တဘၣ်အိၣ်လၢ ပှၤလၢအအီ စပံးထံအါတလၢအကျါ+ဒီးပှၤလၢအအီၣ်တၢ်ညၣ် အါတလၢအကျါတဂ့ၤ.+
၂၁ ပှၤအီမူၤသံးတဖၣ် ဒီးပှၤလၢအအီၣ်တၢ် အါတလၢန့ၣ် ကဖှီၣ်လီၤယာ်လီၤဝဲလီၤ.+
ဒီးအဝဲသ့ၣ် မံဆူၣ်အဃိ ခဲကၢာ် အကဘၣ်ကူကၤဝဲ တၢ်ကံးညာ် ညာ်ပြဲးတဖၣ်လီၤ.
၂၂ နပၢ်လၢ နအိၣ်မူဘၣ်လၢ အဃိန့ၣ် ဒိကနၣ် အကလုၢ်တက့ၢ်.
ဒီးတဘၣ် ဆိကမိၣ်ဆံးနမိၢ် ခီဖျိလၢ အသးပှၢ်ထီၣ်အဃိန့ၣ်တဂ့ၤ.+
၂၃ ပှ့ၤ* တၢ်မ့ၢ်တၢ်တီ, တၢ်ကူၣ်သ့, တၢ်သိၣ်က့ၤသီက့ၤ ဒီးတၢ်သ့ၣ်ညါနၢ်ပၢၢ်တက့ၢ်.+
ဒီးတဘၣ်ဆါကွံာ်အီၤ နီတဘျီတဂ့ၤ.+
၂၄ ပှၤတီပှၤလိၤတဂၤ အပၢ်န့ၣ် ကသးခု သပှၢ်တၢၢ်လီၤ.
ပၢ်တဂၤလၢ အဖိခွါ ကူၣ်တၢ်သ့န့ၣ် အကသးခုလၢ အဖိခွါအဃိလီၤ.
၂၅ နမိၢ်ဒီးနပၢ်န့ၣ် ကသးခု,နမိၢ်လၢ အအိၣ်ဖျဲၣ်လီၤနၤတဂၤန့ၣ် ကပှဲၤဒီးတၢ်သးခုလီၤ.
၂၆ ဖိခွါဧၢ, ဒိကနၣ်ယၤ ထံထံဆးဆးတက့ၢ်.
နကွၢ်လိမၤဒိးယၤအဃိ မ်အကမ့ၢ်တၢ်လၢ အမၤမုာ်နသးတက့ၢ်.+
၂၇ ပိာ်မုၣ်ဆါလီၤအီၣ်သး တဂၤန့ၣ် လီၤဂာ်ဒ်သိးဒီး တၢ်ပူၤယိာ်ဒီးပိာ်မုၣ်လၢ အသကဲာ်ပဝးတဂ့ၤဘၣ် တဂၤန့ၣ် လီၤဂာ်ဒ်သိးဒီး ထံကမျၢ* လၢအပူၤအံၣ်လီၤ.+
၂၈ အဝဲအိၣ်ခိးခူသူၣ်တၢ် ဒ်သိးဒီးတမျာ်+ဒီးအဝဲမၤဝဲဒ်သိး ပှၤပိာ်ခွါအါဂၤ ကကဲထီၣ် ပှၤလၢအသး တတီဘၣ်လီၤ.
၂၉ မတဂၤဘၣ်ကီဘၣ်ခဲလဲၣ်. မတဂၤ ဘၣ်ကိၢ်ဘၣ်ဂီၤလဲၣ်.
မတဂၤအိၣ်ဒီး တၢ်အ့ၣ်လိာ်ဆိးက့ ဒီးပှၤဂၤလဲၣ်. မတဂၤ ကဒူး ကဒ့ၣ်တၢ်လဲၣ်.
မတဂၤ အိၣ်ဒီး တၢ်ပူၤလီၢ်တဖၣ် ဘၣ်ဆၣ် တသ့ၣ်ညါထွဲဝဲလၢ အဟဲကဲထီၣ်အသးဒ်လဲၣ်ဘၣ်န့ၣ်လဲၣ်. မတဂၤ အမဲာ်ဘံၣ်ခ့လဲၣ်.
၃၀ မ့ၢ်ဝဲ ပှၤလၢအသူလၢာ်ဂီၤ တၢ်ဆၢကတီၢ်လၢ ကအီစပံးထံအါအါ+ဒီးမ့ၢ်ဝဲပှၤလၢ အဃုအီဝဲ စပံးထံလၢ အသဟီၣ်ဆူၣ်လီၤ.
၃၁ စပံးထံလၢ အလွဲၢ်ဂီၤလၢ အဖျါကပြုၢ်ကပြီၤလၢ ထံခွးပူၤန့ၣ်ပှၤအီအီၤ မ့ၢ်ဝံၣ်ဒိၣ်မးသနာ်က့ တဘၣ်ပျဲ အထုးန့ၢ်နသးတဂ့ၤ.
၃၂ လၢခံကတၢၢ်န့ၣ် ကအ့ၣ်နၤ ဒ်ဂုၢ်အသိးဒီးကပျၢ်လီၤတၢ်စုၣ် ဒ်ဂုၢ်ဘၣ်အၢအသိးလီၤ.
၃၃ နကဟးထံၣ်တမှံကြီတၢ်ဒီးနကဟးတဲကြီတၢ်လီၤ.+
၃၄ နကလီၤဂာ်ဒ် ပှၤတဂၤလၢ အမံနီၤလၢ ပီၣ်လဲၣ်ခၢၣ်သးဒီးလီၤဂာ်ဒ် ပှၤတဂၤလၢ အမံနီၤလၢ ကဘီအခိၣ်လီၤ.
၃၅ နကတဲလၢ “ပှၤတီၢ်ယၤ ဘၣ်ဆၣ် ယတတူၢ်ဘၣ်နီတမံၤဘၣ်.
ပှၤထိယၤ ဘၣ်ဆၣ် ယတသ့ၣ်ညါဘၣ်.
ယကပၢၢ်ထီၣ် ဆံးယံာ်လဲၣ်.+
ယကဃုအီကဒီး အသီတခွးလီၤ.”
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “ပာ်ဒီလၢ နကိာ်ယုၢ်ဘိလိၤ.”
^ အခီပညီလိၤလိၤ “ပှၤပှ့ၤက့ၤတၢ်.”
^ မ့ၢ်စ့ၢ်ကီး “ဖိသၣ်, သးစၢ်.”
^ မ့ၢ်စ့ၢ်ကီး “မၤန့ၢ်.”
^ မ့ၢ်စ့ၢ်ကီး “ထံပူၤ.”
