ကတိၤဒိ ၂၄:၁-၃၄
၂၄ သူၣ်က့ၣ်သးကါ ပှၤအၢပှၤသီတဖၣ်တဂ့ၤ.
ဒီးတဘၣ်လီကီ ရ့လိာ်သးဒီး အဝဲသ့ၣ်တဂ့ၤ.+
၂ အဝဲသ့ၣ် ဆိကမိၣ်ထံ ဘၣ်ဃးဒီး တၢ်မၤဆူၣ်မၤစိးဒီးအဝဲသ့ၣ် တဲတၢ်ဘၣ်ဃးဒီး တၢ်လၢအကဒုးအိၣ်ထီၣ် တၢ်ကီတၢ်ခဲ လၢပှၤဂၤအဂီၢ်လီၤ.
၃ ဟံၣ်တဖျၢၣ် ကဘၣ်တၢ်သူၣ်ထီၣ်အီၤ* ခီဖျိလၢတၢ်ကူၣ်သ့+ဒီးအကအိၣ်ဂၢၢ်ဆိးကျၢၤ ခီဖျိလၢ တၢ်သ့ၣ်ညါနၢ်ပၢၢ်လီၤ.
၄ ခီဖျိလၢ တၢ်သ့ၣ်ညါအဃိ အဒၢးဖိတဖၣ်န့ၣ် ကပှဲၤဝဲဒီးတၢ်ထူးတၢ်တီၤ လၢအဂ့ၤ ဒီးအလုၢ်ဒိၣ်ပှ့ၤဒိၣ် အကလုာ်ကလုာ်လီၤ.+
၅ ပှၤကူၣ်တၢ်သ့န့ၣ် အစိကမီၤဒိၣ်မး+ဒီးအဝဲမၤအါထီၣ် အတၢ်စိတၢ်ကမီၤ ခီဖျိလၢ တၢ်သ့ၣ်ညါလီၤ.
၆ ဖဲနလဲၤဒုးတၢ်အခါ နကဘၣ် မၤထွဲ တၢ်ဟံးစုနဲၣ်ကျဲလၢ အဂ့ၤလီၤ.+
ဒီးပှၤဟ့ၣ်ကူၣ်တၢ် မ့ၢ်အိၣ်အါဂၤန့ၣ် နဒုးတၢ်ကနၢၤလီၤ.+
၇ ပှၤဟးဂီၤဖိ မၤန့ၢ်ဝဲ တၢ်ကူၣ်သ့နီၢ်ကီၢ် တသ့ဘၣ်.+
ဒီးဖဲဝ့ၢ်အတြဲၤန့ၣ် အတဲတၢ် တဘၣ် နီတမံၤဘၣ်.
၈ ပှၤတဂၤဂ့ၤ တဂၤဂ့ၤ လၢအကူၣ်ထီၣ် တၢ်အၢန့ၣ်ပှၤကကိးအီၤလၢ ပှၤကူၣ်အၢတၢ် ကစၢ်လီၤ.+
၉ ပှၤဟးဂီၤဖိ အတၢ်ကူၣ်အၢန့ၣ် မ့ၢ်တၢ်ဒဲးဘးဒီးပှၤသးဟ့ ပှၤလၢအ ဒုၣ်ဒွဲၣ်တၢ်လီၤ.+
၁၀ ဖဲတၢ်ကိၢ်တၢ်ဂီၤ အဆၢကတီၢ် နသးဂံၢ်ဘါမ့ၢ်လီၤစၢ်န့ၣ်နဂံၢ်နဘါ တအိၣ်အါအါလၢၤဘၣ်.
၁၁ ပှၤတဂၤလၢ ပှၤလဲၤကိးအီၤလၢ ပှၤကမၤသံအီၤ အဂီၢ်န့ၣ် မၤပူၤဖျဲးအီၤတက့ၢ်.
ပှၤတဂၤလၢ ကဘၣ်လဲၤလၢ တၢ်ကမၤသံအီၤအလီၢ်န့ၣ် မၤစၢၤအီၤတက့ၢ်.+
၁၂ နမ့ၢ်တဲလၢ “ဘၣ်ဃးဒီး တၢ်ဂ့ၢ်အံၤန့ၣ် ယတသ့ၣ်ညါနီတမံၤဘၣ်” န့ၣ်ပှၤတဂၤလၢ အသမံသမိးပှၤသးန့ၣ် ပဲာ်ဖးနီၤဖးတၢ် တဘၣ်ဧီၤ.+
ပှၤလၢအကွၢ်နၤန့ၣ် ကသ့ၣ်ညါဝဲဒီးကဟ့ၣ်ဆၢက့ၤ ပှၤတဂၤစုာ်စုာ် ဒ်တၢ်လၢအမၤဝဲ အသိးလီၤ.+
၁၃ ဖိခွါဧၢ, ကနဲစီန့ၣ် ဂ့ၤလၢနဂီၢ်အဃိ အီၣ်အီၤတက့ၢ်.
ကနဲစီစဲၤစဲၤန့ၣ် ဆၢဒိၣ်မးလီၤ.
၁၄ ဒ်န့ၣ်အသိး သ့ၣ်ညါလၢ တၢ်ကူၣ်သ့န့ၣ် ဂ့ၤလၢနဂီၢ်တက့ၢ်.+
နမ့ၢ်မၤန့ၢ်အီၤန့ၣ် နတၢ်အိၣ်မူလၢ ခါဆူညါ ကဂ့ၤဝဲဒီးနတၢ်မုၢ်လၢ် တဟးဂီၤကွံာ်ဘၣ်.+
၁၅ အိၣ်ခိးခူသူၣ်တၢ်ဘူးဒီး ပှၤတီပှၤလိၤအဟံၣ် ဒ်သိးနကမၤ တၢ်အၢတၢ်သီအဂီၢ် န့ၣ်တဂ့ၤ.
မၤဟးဂီၤ အတၢ်အိၣ်တၢ်ဆိးအလီၢ်တဂ့ၤ,
၁၆ မ့ၢ်လၢ ပှၤတီပှၤလိၤ မ့ၢ်ဘၣ်ကီ ဘၣ်ခဲ နွံဘျီဘၣ်ဆၣ် အဂံၢ်ကဆူၣ်ထီၣ်ကဒါက့ၤ ထီဘိလီၤ.+
မ့မ့ၢ် ပှၤအၢပှၤသီန့ၣ် အဝဲသ့ၣ် ကထံၣ်ဘၣ် တၢ်ကီတၢ်ခဲဒီး ကလီၤဃံၢ်ဝဲ သပှၢ်တၢၢ်လီၤ.+
၁၇ ဖဲနဒုၣ်နဒါ လီၤဃံၢ်အခါ တဘၣ်သူၣ်ဖှံသးညီတဂ့ၤဒီးဖဲအခီၣ်ဘၣ်တိၢ်အခါ တဘၣ်သးခုတဂ့ၤ.+
၁၈ နမ့ၢ်သးခုန့ၣ် ယဟိဝၤယွၤ ကထံၣ်ဝဲ ဒီးအတဘၣ်သးဝဲဘၣ်.
ဒီးကစၢ်ယွၤ တသးထီၣ် နဒုၣ်နဒါလၢၤဘၣ်.+
၁၉ တဘၣ် သးတံာ်တာ်လၢ ပှၤအၢ ပှၤသီတဖၣ် အဃိတဂ့ၤ.
ဒီးတဘၣ် သးက့ၣ် ပှၤအၢပှၤသီတဂ့ၤ,
၂၀ မ့ၢ်လၢ ပှၤအၢပှၤသီန့ၣ် အတၢ်မုၢ်လၢ်လၢ ခါဆူညါတအိၣ်ဘၣ်.+
ဒီးပှၤအၢပှၤသီန့ၣ် လီၤဂာ်ဒ်သိးဒီး မ့ၣ်အူဒၢတဖျၢၣ်လၢ အက လီၤပံာ်ကွံာ်လီၤ.+
၂၁ ဖိခွါဧၢ, ပျံၤယဟိဝၤယွၤ ဒီးစီၤပၤတက့ၢ်.+
ပှၤလၢ အထီဒါက့ၤတၢ်န့ၣ်* တဘၣ်ရ့ဒီးအီၤတဂ့ၤ,+
၂၂ မ့ၢ်လၢ တၢ်နးတၢ်ဖှီၣ် ကဟဲဘၣ် အဝဲသ့ၣ် သတူၢ်ကလာ်အဃိလီၤ.+
ဒီးပှၤခံဂၤန့ၣ်* ကသိၣ်ဃီၣ်အဝဲသ့ၣ်ထဲလဲၣ်န့ၣ် မတဂၤ ကသ့ၣ်ညါဝဲလဲၣ်.+
၂၃ တၢ်ကတိၤ လၢလာ်တဖၣ်အံၤ မ့ၢ်ဝဲ ပှၤကူၣ်တၢ်သ့တဖၣ် အတၢ်ကတိၤလီၤ.
ဖဲပှၤတဂၤ စံၣ်ညီၣ်တၢ်အခါ အမ့ၢ်ကွၢ်မဲာ်တၢ်န့ၣ် တဂ့ၤဘၣ်.+
၂၄ ပှၤတဂၤဂ့ၤ တဂၤဂ့ၤလၢအတဲ ပှၤအၢပှၤသီတဂၤလၢ “နကဲပှၤတီပှၤလိၤ”+ န့ၣ်
ပှၤဂီၢ်မုၢ် ကဆိၣ်အၢအီၤ ဒီးပှၤကလုာ်တဖၣ် ကဒုၣ်ဒွဲၣ် စံးအၢအီၤလီၤ.
၂၅ မ့မ့ၢ် ပှၤလၢ အသိၣ်ဃီၣ် ပှၤအၢပှၤသီတဂၤန့ၣ် တၢ်ကလဲၤအသးဒီး အဝဲသ့ၣ် ဂ့ၤဂ့ၤဘၣ်ဘၣ်+ဒီးအဝဲသ့ၣ် ကဒိးန့ၢ်ဘၣ် တၢ်ဆိၣ်ဂ့ၤတဖၣ်လီၤ.+
၂၆ ပှၤလၢ အတဲဆၢတၢ် တီတီလိၤလိၤန့ၣ် ပှၤကနၢမူအီၤလီၤ.*+
၂၇ ကတဲာ်ကတီၤ နတၢ်မၤလၢ တၢ်ချၢ ဒီးရဲၣ်လီၤကျဲၤလီၤ တၢ်ကိးမံၤဒဲး လၢပျီပူၤဝံၤမးသူၣ်ထီၣ် နဟံၣ်တက့ၢ်.*
၂၈ တၢ်ဂ့ၢ်မ့ၢ်တအိၣ်နီၢ်ကီၢ်ဘၣ်န့ၣ် တဘၣ် အုၣ်နသးထီဒါ ပှၤလၢနဃၢၤတဂ့ၤ.+
တဘၣ်လံၣ်န့ၢ်လီန့ၢ် ပှၤဂၤတဂ့ၤ.+
၂၉ တဘၣ်တဲလၢ “ယကမၤအီၤဒ် အမၤယၤအသိး,ယကမၤကၣ်က့ၤအီၤ ဒ်အမၤယၤ အသိး” န့ၣ်တဂ့ၤ.+
၃၀ ယလဲၤဘၣ်ကျဲလၢ ပှၤကၢၣ်တဂၤ အပျီပူၤ+ဒီးပှၤလၢ အသးတဆးဘၣ်တဂၤ အစပံးကျီး ကပၤလီၤ.
၃၁ ယထံၣ်ဘၣ်ထဲ နီၣ်လဲလဲ,ဟီၣ်ခိၣ်လိၤန့ၣ် အိၣ်ပှဲၤဝဲဒီး လးဆါအထူၣ်တဖၣ်ဒီးအတၢ်ဒူၣ်လၢ အတ့ဝဲလၢလၢၢ်န့ၣ် လီၤပှီၢ်ကွံာ်ဝဲလီၤ.+
၃၂ ယကွၢ်တၢ်အိၣ်သး တခါအံၤ ဒီးယဆိကမိၣ်ထံလၢ ယသးပူၤလီၤ.
ယကွၢ်ထံ ဒီးယန့ၢ်ဘၣ်တၢ်မၤလိ ဒ်လၢလာ်အံၤအသိးလီၤ.
၃၃ နမံတစဲးစဲး, မံခ့တစဲးစဲး,သံၣ်ထီၣ်စုဒီး အိၣ်ဘှံးတစဲးစဲးဒု
၃၄ တၢ်ဖှီၣ်တၢ်ယာ် ကချုးန့ၢ်နၤဒ်တမျိၤတမျာ် လၢအအိၣ်ဒီး စုကဝဲၤအသိးလီၤ.+
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “ဟံၣ်ဖိဃီဖိတဒူၣ် ကဆူၣ်ထီၣ်.”
^ မ့ၢ်စ့ၢ်ကီး “ပှၤလၢအလီကီ တၢ်ဆီတလဲ.”
^ မ့ၢ်ဝဲ ယဟိဝၤယွၤ ဒီးစီၤပၤ.
^ ဘၣ်သ့ၣ်သ့ၣ် ကမ့ၢ် “ပှၤမ့ၢ်တဲဆၢတၢ် လိၤလိၤန့ၣ် လီၤဂာ်ဒ်သိးဒီး တၢ်နၢမူတထံၣ်.”
^ မ့ၢ်စ့ၢ်ကီး “ဟံၣ်ဖိဃီဖိ.”
