ကတိၤဒိ ၂၈:၁-၂၈
-
ပှၤလၢအတအဲၣ်ဒိး ဒိကနၣ်တၢ်ဘၣ် အတၢ်ထုကဖၣ်န့ၣ် လီၤသးဘၣ်အၢ (၉)
-
ပှၤလၢအအၢၣ်လီၤ အတၢ်ကမၣ်န့ၣ် ကဒိးန့ၢ်ဘၣ် တၢ်သးကညီၤ (၁၃)
-
ပှၤလၢအအဲၣ်ဒိး ထူးထီၣ်တီၤထီၣ် ချ့ချ့န့ၣ် တပူၤဒီးတၢ်ကမၣ်ဘၣ် (၂၀)
-
တၢ်သိၣ်က့ၤသီက့ၤန့ၣ် ဂ့ၤဒိၣ်န့ၢ်ဒံး တၢ်တဲမုာ်ပှၤနၢ် (၂၃)
-
ပှၤလၢအဟ့ၣ်တၢ်ညီန့ၣ် ဒိးန့ၢ်ဘၣ်ဝဲ တၢ်လၢအလိၣ်ဘၣ်ခဲလၢာ် (၂၇)
၂၈ ပှၤအၢပှၤသီန့ၣ် ပှၤတလူၤအီၤနီတဂၤဘၣ် သနာ်က့ အဃ့ၢ်ဝဲ,မ့မ့ၢ် ပှၤတီပှၤလိၤန့ၣ် အသးဒူဝဲ ဒ်သိးဒီးခ့ယုၢ်လီၤ.+
၂ ဖဲတၢ်ကမၣ်အိၣ်ဝဲလၢ ကီၢ်ပူၤအခါ ပဒိၣ်ကထီၣ်ဝဲ တဂၤဝံၤ တဂၤလီၤ.+
ဘၣ်ဆၣ် ပဒိၣ်တဂၤမ့ၢ်အိၣ်ဒီး ပှၤဟ့ၣ်ကူၣ်တၢ်လၢ အအိၣ်ဒီးတၢ်ကူၣ်သ့ ဒီးတၢ်သ့ၣ်ညါနၢ်ပၢၢ် လၢအမၤစၢၤအီၤန့ၣ် အဝဲကပၢတၢ် ဖးယံာ်လီၤ.+
၃ ပှၤဖှီၣ်ဖိယာ်ဖိလၢ အလံၣ်အီၣ်လီအီၣ် ပှၤလၢအပတီၢ်ဖုၣ်န့ၣ်+လီၤဂာ်ဒ်သိးဒီး မူခိၣ်စူၤထံလၢ အမၤပျီကွံာ် တၢ်အီၣ်ခဲလၢာ်လီၤ.
၄ ပှၤလၢအပာ်တ့ၢ်ကွံာ် တၢ်သိၣ်တၢ်သီန့ၣ် စံးပတြၢၤဝဲ ပှၤအၢပှၤသီ,မ့မ့ၢ် ပှၤလၢအမၤထွဲ တၢ်သိၣ်တၢ်သီန့ၣ် သးထီၣ်ဝဲ ပှၤလၢအပာ်တ့ၢ်ကွံာ် တၢ်သိၣ်တၢ်သီလီၤ.+
၅ ပှၤအၢပှၤသီ နၢ်ပၢၢ် တၢ်စံၣ်ညီၣ်တီ တသ့ဘၣ်,မ့မ့ၢ် ပှၤလၢအဃု ယဟိဝၤယွၤန့ၣ် နၢ်ပၢၢ်တၢ်သ့ခဲလၢာ်လီၤ.+
၆ ပှၤဖှီၣ်ဖိယာ်ဖိတဂၤလၢ အလဲၤတၢ်လၢ တၢ်သးတီအပူၤန့ၣ်ဂ့ၤဒိၣ်န့ၢ်ဒံး ပှၤထူးပှၤတီၤတဂၤလၢ အမၤတၢ်တတီတလိၤလီၤ.+
၇ ဖိခွါတဂၤလၢ အနၢ်ပၢၢ်တၢ်န့ၣ် မၤထွဲတၢ်သိၣ်တၢ်သီလီၤ.
မ့မ့ၢ် ပှၤတဂၤလၢ အဒီတံၤဒီသကိးဒီး ပှၤလၢအအီၣ်တၢ် အါတလၢန့ၣ် မၤမဲာ်ဆှးအပၢ်လီၤ.+
၈ ပှၤလၢအမၤအါထီၣ် အတၢ်ထူးတၢ်တီၤ ခီဖျိ အဃ့စ့အအ့ၣ် အါအါန့ၣ်+အတၢ်ထူးတၢ်တီၤတဖၣ် ကကဲထီၣ်က့ၤ ပှၤလၢအသးကညီၤ ပှၤဖှီၣ်ဖိယာ်ဖိတဖၣ် အတၢ်လီၤ.+
၉ ပှၤလၢ အတအဲၣ်ဒိး ဒိကနၣ် တၢ်သိၣ်တၢ်သီဘၣ်န့ၣ်အတၢ်ထုကဖၣ် လီၤသးဘၣ်အၢဝဲလီၤ.+
၁၀ ပှၤလၢအဆှၢကမၣ် ပှၤလၢအသူၣ်ဘျၢသးဘျၢလၢ တၢ်အၢတၢ်သီအကျဲန့ၣ် အကဟးဂီၤကဒါက့ၤလၢ အနီၢ်ကစၢ် အတၢ်အၢတၢ်သီ အဃိလီၤ.+
မ့မ့ၢ် ပှၤလၢ တၢ်ပာ်ဒ့ၣ်ပာ်ကမၣ်အီၤ အလီၢ်တအိၣ်ဘၣ်န့ၣ် ကန့ၢ်သါဘၣ် တၢ်ဂ့ၤလီၤ.+
၁၁ ပှၤထူးပှၤတီၤတဂၤ ဆိကမိၣ်လီၤအသးလၢ အကူၣ်တၢ်သ့+ဘၣ်ဆၣ် ပှၤဖှီၣ်ဖိယာ်ဖိတဂၤလၢ အအိၣ်ဒီး တၢ်သ့ပဲာ်ထံနီၤဖးတၢ်န့ၣ် ကွၢ်အတၢ်အိၣ်သး ဖျါခဲလၢာ်လီၤ.+
၁၂ ဖဲပှၤတီပှၤလိၤ မၤနၢၤတၢ်အခါ တၢ်သးခုဖးဒိၣ် အိၣ်ဝဲလီၤ.
ဘၣ်ဆၣ် ဖဲပှၤအၢပှၤသီတဖၣ် န့ၢ်တၢ်စိတၢ်ကမီၤအခါ ပှၤလဲၤအိၣ်ခူသူၣ်ဝဲလီၤ.+
၁၃ ပှၤလၢအပာ်ခူသူၣ် အတၢ်ကမၣ်တဖၣ်န့ၣ် တဘီၣ်ထီၣ်ညီထီၣ်ဘၣ်.+
မ့မ့ၢ် ပှၤလၢ အအၢၣ်လီၤအတၢ်ကမၣ် ဒီးတမၤဝဲလၢၤဘၣ်န့ၣ် ကဒိးန့ၢ်ဘၣ် တၢ်သးကညီၤလီၤ.+
၁၄ ပှၤလၢအပလီၢ်အသးထီဘိန့ၣ် ကသးခုဝဲလီၤ.
မ့မ့ၢ် ပှၤလၢအခိၣ်ကိၤန့ၣ်* ကဘၣ်နးဘၣ်ဖှီၣ်လီၤ.+
၁၅ ပှၤအၢပှၤသီ မ့ၢ်ပၢပှၤလၢ အမၤစၢၤလီၤအသး တသ့နီတမံၤဘၣ်န့ၣ်+အလီၤဂာ်ဒ် ခ့ယုၢ်တဒုလၢ အကညီၤတၢ် ဒီးဒ်တၤသူတဒုလၢ အသဖှိအ့ၣ်တၢ်အသိးလီၤ.
၁၆ ခိၣ်နၢ်တဂၤလၢ အတသ့ပဲာ်ထံနီၤဖးတၢ် ဂ့ၤဂ့ၤဘၣ်န့ၣ် သူကမၣ် အတၢ်စိတၢ်ကမီၤလီၤ.+
မ့မ့ၢ် ပှၤလၢအသးဟ့ တၢ်အီၣ်ကျိၣ်အီၣ်စ့န့ၣ် အသးသမူကထီဝဲလီၤ.+
၁၇ ပှၤတဂၤလၢ အမၤသံပှၤအဂၤတဂၤ ဒီးတၢ်သွံၣ်လီၤတီလၢ အခိၣ်လိၤန့ၣ် ကဃ့ၢ်တစိၤသးတုၤ အတုၤလၢ တၢ်သွၣ်ခိၣ်လီၤ.+
တဘၣ်မၤစၢၤအီၤ နီတဂၤတဂ့ၤ.
၁၈ ပှၤလၢအလဲၤတၢ် တီတီလိၤလိၤန့ၣ် ကပူၤဖျဲးဝဲလီၤ.+
မ့မ့ၢ် ပှၤလၢအတလဲၤတၢ် တီတီလိၤလိၤဘၣ်န့ၣ် ကဟးဂီၤဝဲ သတူၢ်ကလာ်လီၤ.+
၁၉ ပှၤလၢအသူၣ်အီၣ်ဖျးအီၣ်တၢ်လၢ အဟီၣ်ခိၣ်န့ၣ် ကအိၣ်ဒီးတၢ်အီၣ် ဒီဒူၣ်လီၤ.
မ့မ့ၢ် ပှၤလၢ အလူၤတၢ်ကလီကလီန့ၣ် ကဖှီၣ်လီၤယာ်လီၤ သပှၢ်တၢၢ်လီၤ.+
၂၀ ပှၤလၢအသးတီန့ၣ် ကဒိးန့ၢ်ဘၣ် တၢ်ဆိၣ်ဂ့ၤဒီဒူၣ်,+မ့မ့ၢ် ပှၤလၢအအဲၣ်ဒိး ထူးထီၣ်တီၤထီၣ် ချ့ချ့န့ၣ် အတပူၤဒီး တၢ်ကမၣ်ဘၣ်.+
၂၁ တၢ်ကွၢ်မဲာ် ပှၤကညီန့ၣ် တဂ့ၤဘၣ်.+
ဘၣ်ဆၣ် ဘၣ်သ့ၣ်သ့ၣ် ပှၤတဂၤကမၤကမၣ်တၢ်ဒ်န့ၣ် လၢကန့ၢ်ဘၣ် တၢ်အီၣ်တစဲးတမွဲး အဂီၢ်လီၤ.
၂၂ ပှၤလၢအသးကွံတၢ် အါတလၢန့ၣ် အသးဆူၣ်လၢ ကထူးထီၣ်တီၤထီၣ်,ဘၣ်ဆၣ် အဝဲကဖှီၣ်လီၤယာ်လီၤန့ၣ် အတသ့ၣ်ညါဝဲဘၣ်.
၂၃ နမ့ၢ်သိၣ်က့ၤသီက့ၤ ပှၤတဂၤန့ၣ်+ လၢခံအဝဲ ကဘၣ်သူၣ်ဘၣ်သးနၤ+ဒိၣ်န့ၢ်ဒံး ပှၤတဂၤလၢ အတဲမုာ်အနၢ်လီၤ.
၂၄ ပှၤတဂၤဂ့ၤ တဂၤဂ့ၤ လၢအဟုၣ် အမိၢ်ဒီးအပၢ်အတၢ် ဒီးတဲဝဲလၢ “အတကမၣ်ဘၣ်”+ န့ၣ်လီၤဂာ်ဒ် အဒီသကိးဒီး ပှၤလၢအ ဒုးအိၣ်ထီၣ် တၢ်ဟးဂီၤလီၤ.+
၂၅ ပှၤလၢအသးကွံတၢ် အါတလၢန့ၣ်* အဒုးအိၣ်ထီၣ် တၢ်အ့ၣ်လိာ်ဆိးက့,မ့မ့ၢ် ပှၤလၢအသန့ၤအသးလၢ ယဟိဝၤယွၤန့ၣ် ကဘီၣ်ထီၣ်ညီထီၣ်လီၤ.+
၂၆ ပှၤတဂၤဂ့ၤ တဂၤဂ့ၤလၢ အနာ်န့ၢ်လီၤအသးန့ၣ် မ့ၢ်ပှၤဟးဂီၤဖိ,+မ့မ့ၢ် ပှၤလၢ အမၤတၢ်လၢ တၢ်ကူၣ်သ့အပူၤန့ၣ် ကပူၤဖျဲးဝဲလီၤ.+
၂၇ ပှၤလၢအဟ့ၣ်မၤစၢၤ ပှၤဖှီၣ်ဖိယာ်ဖိတဖၣ်န့ၣ် ကဒိးန့ၢ်ဘၣ်ဝဲ တၢ်လၢအလိၣ်ဘၣ် ခဲလၢာ်လီၤ.+
မ့မ့ၢ် ပှၤလၢ အတကနၣ်ဃုာ် ပှၤဖှီၣ်ဖိယာ်ဖိတဖၣ်ဘၣ်န့ၣ် ကဘၣ်ဆိၣ်အၢအါမံၤလီၤ.
၂၈ ဖဲပှၤအၢပှၤသီတဖၣ် န့ၢ်တၢ်စိတၢ်ကမီၤအခါ ပှၤအိၣ်ခူသူၣ်ဝဲလီၤ.
ဘၣ်ဆၣ် ဖဲပှၤအၢပှၤသီတဖၣ် ဟးဂီၤအခါ ပှၤတီပှၤလိၤ အါထီၣ်ဝဲလီၤ.+
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “မၤကိၤထီၣ်အသး.”
^ ဘၣ်သ့ၣ်သ့ၣ် ကမ့ၢ် “ပှၤလၢအပာ်ထီၣ်ထီသး.”
