ကတိၤဒိ ၅:၁-၂၃
၅ ဖိခွါဧၢ, ဒိကနၣ်ယတၢ်ကတိၤလၢ အအိၣ်ဒီး တၢ်ကူၣ်သ့တက့ၢ်.+
တၢ်လၢယသိၣ်လိ ဘၣ်ဃးဒီး တၢ်သ့ပဲာ်ထံနီၤဖးတၢ် အဂ့ၢ်န့ၣ် ဒိကနၣ်အီၤ လီၤတံၢ်လီၤဆဲးတက့ၢ်.
၂ နမ့ၢ်မၤဒ်န့ၣ်မး နဒီသဒၢ နတၢ်သ့ ဆိကမိၣ် ပဲာ်ထံနီၤဖးတၢ်ကသ့ဒီးနကတဲတၢ် ဒ်တၢ်မ့ၢ်တၢ်တီ အိၣ်ဝဲအသိး ထီဘိလီၤ.+
၃ ပိာ်မုၣ်ဟးဂီၤ အတၢ်ကတိၤန့ၣ်* ဆၢဝဲဒ်သိးဒီး ကနဲစီ+ဒီးဘျ့ဒိၣ်န့ၢ်ဒံး သိလီၤ.+
၄ ဘၣ်ဆၣ် လၢခံကတၢၢ်န့ၣ် ပိာ်မုၣ်တဂၤန့ၣ်ခၣ်ဝဲ ဒ်သိးဒီး တၢ်မုၢ်တၢ်ဘိလၢအခၣ်+ဒီးအကနၣ်အ့ၣ်ဝဲ ဒ်သိးဒီး နးလၢအကနၣ်အ့ၣ် ခံခီလၢာ်လီၤ.+
၅ အခီၣ်လဲၤလီၤလၢ တၢ်သံအကျဲဒီးအခီၣ်ခါတဖၣ် လဲၤလိၤလိၤဆူ တၢ်သွၣ်ခိၣ်လီၤ.*
၆ အတဆိကမိၣ် တၢ်မူအကျဲ နီတစဲးဘၣ်.အဟးဝ့ၤဝီၤ ဒီးအကတုၤဖဲလဲၣ်န့ၣ် အနီၢ်ကစၢ် တသ့ၣ်ညါဝဲဘၣ်.
၇ ဖိခွါသ့ၣ်ဧၢ, ဒိကနၣ်ယကလုၢ် တက့ၢ်.
ဒီးတဘၣ်ဃၣ်ကွံာ်သုသးလၢ တၢ်လၢယတဲတဖၣ်တဂ့ၤ.
၈ အိၣ်မ့ၢ်ယံၤဒီး ပိာ်မုၣ်တဂၤန့ၣ်ဒီးတဘၣ်လဲၤဘူးဒီး အဟံၣ်အကျဲနုာ်လီၤတဂ့ၤ.+
၉ နမ့ၢ်လဲၤန့ၣ် နမံၤဂ့ၤသၣ်ဂ့ၤ ကဟးဂီၤ+ဒီးနတၢ်အိၣ်မူလၢ အအိၣ်တ့ၢ်ဒံးန့ၣ် ကပှဲၤဒီး တၢ်ကီတၢ်ခဲလီၤ.+
၁၀ ပှၤဂၤတဖၣ် ကဟံးန့ၢ် နတၢ်ထူးတၢ်တီၤ+ဒီးတၢ်လၢ နထဲးဂံၢ်ထဲးဘါ ဒ်သိးနကမၤန့ၢ်အီၤ အဂီၢ်န့ၣ် ကကဲထီၣ် ပှၤထံဂၤကီၢ်ဂၤဖိ အတၢ်လီၤ.
၁၁ ဖဲနတၢ်အိၣ်မူ ဘူးထီၣ်ကကတၢၢ်အခါ နကကအုကစွါဒီးနညၣ် ဒီးနနီၢ်ခိဒီဂၤညါန့ၣ် ကဟးဂီၤဝဲလီၤ.+
၁၂ ဒီးနကတဲလၢ “ဘၣ်မနုၤအဃိ ယသးဟ့ တၢ်သိၣ်က့ၤသီက့ၤဒီးဘၣ်မနုၤအဃိ ယဂ့ၢ်လိာ်ကွံာ် တၢ်သိၣ်ဃီၣ်လဲၣ်.
၁၃ ယတဒိကနၣ် ပှၤလၢအသိၣ်လိယၤတဖၣ် အကလုၢ်ဘၣ်ဒီးယတကနၣ်ဃုာ် ယသရၣ် တဖၣ်ဘၣ်.
၁၄ ဘူးထီၣ်လၢ ယကဟးဂီၤကွံာ် လၢာ်လၢာ်ဆ့ဆ့လံဒီးယဒိးန့ၢ်ဘၣ် တၢ်မဲာ်ဆှးလၢ တၢ်အိၣ်ဖှိၣ် ဒီတဖုအမဲာ်ညါလီၤ.”+
၁၅ အီထံလၢ အအိၣ်လၢ နနီၢ်ကစၢ် အကမါပူၤဒီးထံလၢအဟဲထီၣ်လၢ နနီၢ်ကစၢ် အထံကမျၢပူၤ* တက့ၢ်.+
၁၆ မ့ၢ်နကြၢး ဒုးယွၤလီၤ နထံထီၣ်ပၢၢ်တဖၣ် လၢတၢ်ချၢဧါ.
မ့ၢ်နထံကျိတဖၣ် ကြၢးယွၤလီၤလၢ တၢ်ဆါတၢ်ပှ့ၤအလီၢ်ဧါ.+
၁၇ မ်တၢ်သ့ၣ်တဖၣ်န့ၣ် ကမ့ၢ်ထဲဒၣ်လၢ နနီၢ်ကစၢ် အဂီၢ်တက့ၢ်.
ဒီးအတကြၢးမ့ၢ်လၢ ပှၤဂၤတဖၣ် အဂီၢ်ဘၣ်.+
၁၈ မ်နထံထီၣ်ပၢၢ် ဘၣ်ဆိၣ်ဂ့ၤဒီးမ်နသူၣ်ဖှံသးညီ ဃုာ်ဒီး နမါလၢ အအိၣ်ဒီးနၤလၢ နသးစၢ်ခါ လံၤလံၤတက့ၢ်.+
၁၉ အဝဲလီၤဂာ် ဒ်တၤဟိမိၢ်လၢအဘှါ ဒီးဒ်မဲာ်တဲးလဲးမံၤလၢ အလီၤအဲၣ် လီၤကွံအသိးလီၤ.+
မ်အနုၢ် မၤမုာ်နသး* ထီဘိဒီးမ်အတၢ်အဲၣ်န့ၣ် ကမ့ၢ်တၢ်လၢ အထုးန့ၢ်နသး ထီဘိတက့ၢ်.+
၂၀ ဖိခွါဧၢ, ပိာ်မုၣ်ဟးဂီၤတဂၤန့ၣ် မ့ၢ်အကြၢးထုးန့ၢ်နသးဧါ.
မ့ၢ်နကြၢးဖိးဟု ပိာ်မုၣ်လၢ အသကဲာ်ပဝးတဂ့ၤဘၣ်တဂၤ အသးနါပှၢ်ဧါ.+
၂၁ ပှၤဟီၣ်ခိၣ်ဖိ အကျဲတဖၣ်န့ၣ် အိၣ်ဝဲလၢ ယဟိဝၤယွၤ အမဲာ်ညါလီၤ.
ကစၢ်ယွၤ သမံသမိးဝဲ ပှၤဟီၣ်ခိၣ်ဖိ အကျဲခဲလၢာ်လီၤ.+
၂၂ ပှၤအၢပှၤသီန့ၣ် ဘၣ်ဘျးကဒါက့ၤလၢ အနီၢ်ကစၢ် တၢ်ကမၣ်လီၤ.
ဒီးအတၢ်ဒဲးဘးန့ၣ် လီၤဂာ်ဒ်သိးဒီး ပျံၤတဖၣ်လၢ အဘံဃာ်အီၤလီၤ.+
၂၃ မ့ၢ်လၢ အသးတဆး နီတစဲးဘၣ်အဃိ အကဟးဖျိးကျဲဒီးခီဖျိလၢ အတတူၢ်လိာ် တၢ်သိၣ်က့ၤသီက့ၤဘၣ်အဃိ အကသံဝဲလီၤ.
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “ထးခိၣ်.”
^ လၢဧ့ၤဘြံၤကျိာ် မ့ၢ်ဝဲ “ၡံအိ(လ်).” ကွၢ် တၢ်ကတိၤအခီပညီ.
^ မ့ၢ်စ့ၢ်ကီး “ထံပူၤ.”
^ မ့ၢ်စ့ၢ်ကီး “မၤမူၤနသး.”
