ကတိၤဒိ ၈:၁-၃၆
၈ တၢ်ကူၣ်သ့ ကိးပသူထီၣ်ဒီးတၢ်သ့ပဲာ်ထံနီၤဖးတၢ် မၤဒိၣ်ထီၣ် အကလုၢ် တမ့ၢ်ဧီၤ.+
၂ တၢ်ကူၣ်သ့ ဆၢထၢၣ်ဝဲလၢ တၢ်လူၢ်ခိၣ်တဖၣ်+ လၢအအိၣ်လၢ ကျဲကပၤဒီးဖဲကျဲလၢ အခီတဲာ်လိာ်အသးတဖၣ် အဃၢၤလီၤ.
၃ ဒီးဖဲဝ့ၢ်တြဲၤတဖၣ် အကပၤဒီးဖဲပဲတြီတဖၣ် အခီၣ်ထံးန့ၣ်အကိးထီၣ်ဝဲလၢ အကလုၢ်ဖးဒိၣ်လၢ+
၄ “အိ ပှၤဂီၢ်မုၢ်သ့ၣ်ဧၢ, ယကိးပသူထီၣ်ဒီးယတဲတၢ်ဒီး သုခဲလၢာ်လီၤ.
၅ ပှၤလၢ အတၢ်လဲၤခီဖျိစှၤသ့ၣ်ဧၢ, မၤလိန့ၢ် တၢ်သူၣ်ဆးသးဆးတက့ၢ်.+
ပှၤဟးဂီၤဖိသ့ၣ်ဧၢ, မၤန့ၢ်သးလၢ အသ့ၣ်ညါနၢ်ပၢၢ်တၢ်တက့ၢ်.
၆ တၢ်လၢယတဲန့ၣ် မ့ၢ်တၢ်လၢအရ့ဒိၣ်အဃိ ဒိကနၣ်တက့ၢ်.
ယပျုၤ တဲတၢ်လၢ အဘၣ်လီၤ.
၇ ယထးခိၣ်န့ၣ် တဲတၢ်မ့ၢ်တၢ်တီဒီးယပျုၤန့ၣ် သးဟ့ တၢ်လံၣ်တၢ်လီလီၤ.
၈ တၢ်လၢယတဲတဖၣ်န့ၣ် တီဝဲလိၤဝဲ ခဲလၢာ်လီၤ.
တၢ်လၢယတဲတဖၣ်န့ၣ် တမ့ၢ်တၢ်လၢအကမၣ် နီတခါဘၣ်.
၉ တၢ်လၢယတဲတဖၣ်န့ၣ် ဖျါဝဲၡဲၡဲလၢ ပှၤလၢအသ့ပဲာ်ထံနီၤဖးတၢ် အမဲာ်ညါဒီးပှၤလၢအအိၣ်ဒီး တၢ်သ့ၣ်ညါန့ၣ် သ့ၣ်ညါဝဲလၢ တၢ်လၢယတဲတဖၣ်န့ၣ် မ့ၢ်တၢ်လၢ အဘၣ်လီၤ.
၁၀ လၢသုကဃုထၢ စ့ညၣ်အလီၢ်န့ၣ် ဃုထၢ ယတၢ်သိၣ်က့ၤသီက့ၤဒီးလၢသုကဃုထၢ ထူစီလၢအဂ့ၤကတၢၢ် အလီၢ်န့ၣ် ဃုထၢ တၢ်သ့ၣ်ညါတက့ၢ်.+
၁၁ တၢ်ကူၣ်သ့န့ၣ် ဂ့ၤဒိၣ်န့ၢ်ဒံး လၢၢ်ဖီတဖၣ်လီၤ.*
ပှၤထိၣ်သတြီၤအီၤဒီး တၢ်လၢပှၤလီကီဝဲတဖၣ် တသ့နီတမံၤဘၣ်.
၁၂ ယမ့ၢ် တၢ်ကူၣ်သ့ ဒီးယအိၣ်တပူၤဃီဒီး တၢ်သူၣ်ဆးသးဆးဒီးတၢ်သ့ၣ်ညါ ဒီးတၢ်သ့ဆိကမိၣ် ပဲာ်ထံနီၤဖးတၢ်န့ၣ် အိၣ်ဒီးယၤလီၤ.+
၁၃ တၢ်ပျံၤ ယဟိဝၤယွၤန့ၣ် မ့ၢ်ဝဲ တၢ်သးဟ့ တၢ်အၢလီၤ.+
တၢ်ပာ်ထီၣ်ထီသး, တၢ်ပာ်ဒိၣ်သး,+ တၢ်မၤလၢအအၢအသီ ဒီးတၢ်ကတိၤ တတီတလိၤဘၣ်တဖၣ်န့ၣ် ယသးဟ့အီၤလီၤ.+
၁၄ တၢ်ဟ့ၣ်ကူၣ် လၢအဂ့ၤ ဒီးတၢ်ကူၣ်သ့န့ၣ် အိၣ်ဒီးယၤလီၤ.+
တၢ်သ့ၣ်ညါနၢ်ပၢၢ်+ ဒီးတၢ်စိတၢ်ကမီၤန့ၣ်+ မ့ၢ်ယတၢ်လီၤ.
၁၅ ခီဖျိလၢ ယတၢ်မၤစၢၤအဃိ စီၤပၤတဖၣ် ဆဲးပၢတၢ်ဒီးပဒိၣ်လၢ အပတီၢ်ထီတဖၣ် ထုးထီၣ် တၢ်သိၣ်တၢ်သီတဖၣ်လၢ အတီအလိၤလီၤ.+
၁၆ ခီဖျိလၢ ယတၢ်မၤစၢၤအဃိ ပဒိၣ်ဖးဒိၣ်တဖၣ် ဆဲးပၢတၢ်ဒီးပှၤဒိၣ်ပှၤပှၢ်တဖၣ် စံၣ်ညီၣ်တၢ်လၢ တၢ်တီတၢ်လိၤ အပူၤလီၤ.
၁၇ ပှၤလၢအအဲၣ်ယၤန့ၣ် ယအဲၣ်အီၤဒီးပှၤလၢအဃုယၤန့ၣ် ကထံၣ်န့ၢ်ယၤလီၤ.+
၁၈ တၢ်ထူးတၢ်တီၤ, တၢ်လၤကပီၤ,တၢ်ထူးတၢ်တီၤလၢ အအိၣ်ဂၢၢ်အိၣ်ကျၢၤ ဒီးတၢ်တီတၢ်လိၤန့ၣ် အိၣ်ဒီးယၤလီၤ.
၁၉ တၢ်လၢ အဟဲအိၣ်ထီၣ် ခီဖျိလၢယၤန့ၣ် ဂ့ၤဒိၣ်န့ၢ်ဒံး ထူစီဒီးတၢ်လၢ ယဟ့ၣ်လီၤသုန့ၣ် ဂ့ၤဒိၣ်န့ၢ်ဒံး စ့ညၣ်လၢ အဂ့ၤ ကတၢၢ်လီၤ.+
၂၀ ယဟးလၢ တၢ်တီတၢ်လိၤ အကျဲပူၤဒီးလၢတၢ်စံၣ်ညီၣ်တီ အကျဲ ခၢၣ်သးလီၤ.
၂၁ ယဟ့ၣ်လီၤ တၢ်လုၢ်ဒိၣ်ပှ့ၤဒိၣ်တဖၣ်လၢ ပှၤလၢအအဲၣ်ယၤဒီးယမၤပှဲၤ အဝဲသ့ၣ် အတၢ်ပာ်ဖှိၣ်အလီၢ်တဖၣ်လီၤ.
၂၂ ယဟိဝၤယွၤ တ့လီၤယၤ အဆိကတၢၢ်+ဒီးလၢအတၢ်မၤလၢပျၢၤတဖၣ် အကျါန့ၣ် ယမ့ၢ် တၢ်အဆိကတၢၢ်လီၤ.+
၂၃ လၢပျၢၤလံၤလံၤ တချုးလၢ ဟီၣ်ခိၣ်ကဲထီၣ်ဒံးဘၣ်န့ၣ်+တၢ်ပာ်လီၤပာ်စၢၤယၤ အဆိကတၢၢ်လီၤ.+
၂၄ ဖဲထံယိာ်တဖၣ် တအိၣ်ဒံးဘၣ်+ ဒီးဖဲထံထီၣ်ပၢၢ် တအိၣ် နီတခါဒံးဘၣ်အခါယအိၣ်ဖျဲၣ်ထီၣ်လီၤ.
၂၅ တချုးလၢ ကစၢၢ်ကလိတဖၣ် ဒီးတၢ်လူၢ်တဖၣ်ဘၣ်တၢ်ဆီလီၤအီၤဒံးဘၣ်န့ၣ် ယအိၣ်ဖျဲၣ်ထီၣ်လီၤ.
၂၆ တချုးဖဲ ကစၢ်ယွၤ တ့လီၤဟီၣ်ခိၣ်, တၢ်ပျီတဖၣ်ဒီးဟီၣ်ခိၣ်ကိၢ်လိၣ် အဆိကတၢၢ်တလိၣ် ဒံးဘၣ်န့ၣ် ယအိၣ်ဖျဲၣ်ထီၣ်လီၤ.
၂၇ ဖဲအကတဲာ်ကတီၤ မူခိၣ်+ဒီးဖဲအပာ်လီၤဝဲ တၢ်အဆၢ* လၢမူခိၣ်ဒီး ပီၣ်လဲၣ်အဘၢၣ်စၢၤအခါ ယအိၣ်ဖဲန့ၣ်လီၤ.+
၂၈ ဖဲအပာ်လီၤ တၢ်အၢၣ်တဖၣ် လၢထးခီဒီးဖဲအတ့လီၤ ထံယိာ်အထံထီၣ်ပၢၢ်တဖၣ်အခါ ယအိၣ်ဖဲန့ၣ်လီၤ.
၂၉ ဖဲအပာ်လီၤ တၢ်ဘျၢဒ်သိး ပီၣ်လဲၣ် အထံတဖၣ်သုတလဲၤယံၤန့ၢ်ဒံး အတဲဝဲအသိးတဂ့ၤအဂီၢ်+ဒီးဖဲအဒုးအိၣ်ထီၣ် ဟီၣ်ခိၣ်အခါ* ယအိၣ်ဖဲန့ၣ်လီၤ.
၃၀ ယအိၣ်လၢအကပၤဒ် ပှၤမၤတၢ်သ့ဂ့ၤဂ့ၤတဂၤ အသိးလီၤ.+
ယကဲ အတၢ်သးခုလီၤလီၤဆီဆီ+ တနံၤဘၣ်တနံၤဒီးယသူၣ်ဖှံသးညီ လၢအမဲာ်ညါ ထီဘိလီၤ.+
၃၁ ဖဲယကွၢ်လီၤ ဟီၣ်ခိၣ်ချၢအခါ ယသးခုလီၤ.
ဒီးတၢ်လၢ ယဘၣ်သူၣ်ဘၣ်သး သပှၢ်တၢၢ်န့ၣ် မ့ၢ်ဝဲ ပှၤဟီၣ်ခိၣ်ဖိလီၤ.
၃၂ ဖိခွါဧၢ, ဒိကနၣ်ယကလုၢ်တက့ၢ်.
ပှၤလၢအအိၣ်မူ မၤထွဲဒ် ယတၢ်ကတိၤတဖၣ်န့ၣ် ကသးခုဝဲလီၤ.
၃၃ ဒိကနၣ် တၢ်သိၣ်က့ၤသီက့ၤ+ ဒီးကဲထီၣ် ပှၤကူၣ်တၢ်သ့တက့ၢ်.
ဒီးတဘၣ်ကွၢ်ကပာ်အီၤ နီတဘျီတဂ့ၤ.
၃၄ ပှၤလၢ အဒိကနၣ် ယကလုၢ်န့ၣ် ကသးခုဝဲလီၤ.
တနံၤဘၣ်တနံၤန့ၣ် အဝဲဟဲလၢ ယပဲတြီတဖၣ် ဂီၤဂီၤဒီးခိးတၢ်လၢ ယပဲတြီတဖၣ် အခီၣ်ထံးလီၤ.
၃၅ ပှၤလၢ အထံၣ်န့ၢ်ယၤန့ၣ် ကထံၣ်န့ၢ်တၢ်မူ+ဒီးယဟိဝၤယွၤ ကဘၣ်သူၣ်ဘၣ်သးအီၤလီၤ.
၃၆ မ့မ့ၢ် ပှၤလၢ အတထံၣ်န့ၢ်ယၤဘၣ်န့ၣ် မၤဆါလီၤ အနီၢ်ကစၢ်အသးဒီးပှၤလၢ အသးဟ့ယၤန့ၣ် အဲၣ်တၢ်သံလီၤ.”+
တၢ်ဂ့ၢ်အဘျဲၣ်တဖၣ်
^ ကွၢ် တၢ်ကတိၤအခီပညီ.
^ အခီပညီလိၤလိၤ “တၢ်ကဝီၤ.”
^ မ့ၢ်စ့ၢ်ကီး “ပာ်လီၤ တၢ်အခီၣ်ထံးတဖၣ်လၢ ဟီၣ်ခိၣ်အဂီၢ်.”
