ကလၤတံ ၁:၁-၂၄
၁ ယၤ, စီၤပီလူးန့ၣ် တမ့ၢ်လၢ ပှၤဟီၣ်ခိၣ်ဖိ ဒုးကဲထီၣ်ယၤလၢ တၢ်မၢဖိဘၣ် ဒီးတမ့ၢ် တၢ်ပာ်ထီၣ်ယၤ ခီဖျိလၢ ပှၤတဂၤဂၤအစုပူၤဘၣ်. ယမ့ၢ်တၢ်မၢဖိ ခီဖျိလၢ ယ့ၣ်ၡူးခရံာ်+ ဒီးပၢ်ကစၢ်ယွၤလၢ+ အဒုးဂဲၤဆၢထၢၣ်က့ၤ ခရံာ်လၢတၢ်သံန့ၣ် အဃိလီၤ.
၂ ယၤဒီးဒီပုၢ်ဝဲၢ်ခွါ လၢအအိၣ်ဒီးယၤခဲလၢာ် ကွဲးန့ၢ်လံာ်အံၤလၢ တၢ်အိၣ်ဖှိၣ်တဖၣ်လၢ အအိၣ်လၢ ကလၤတံ အပူၤလီၤ.
၃ မ်သုဒိးန့ၢ်ဘၣ် တၢ်သးကညီၤ ဒိၣ်ဒိၣ်မုၢ်မုၢ် ဒီးတၢ်ဃူတၢ်ဖိးလၢ အဟဲလၢ ပပၢ်ကစၢ်ယွၤ ဒီးကစၢ်ယ့ၣ်ၡူးခရံာ် အအိၣ်န့ၣ်တက့ၢ်.
၄ ဒ်ပပၢ်ကစၢ်ယွၤ+ အတၢ်ဘၣ်သးအသိး ခရံာ်ဟ့ၣ်လီၤ အသးသမူ လၢပတၢ်ဒဲးဘးအဂီၢ်+ ဒ်သိးအဝဲ ကမၤပူၤဖျဲးထီၣ်ကွံာ်ပှၤလၢ ဟီၣ်ခိၣ်အအၢအသီလၢ+ အအိၣ်လၢ ဆၢကတီၢ်ခဲအံၤအဂီၢ်လီၤ.
၅ မ်တၢ်လၤကပီၤအိၣ်ဒီး ကစၢ်ယွၤ လီၤထူလီၤယိာ်တက့ၢ်. အၤမ့ၣ်.
၆ ကစၢ်ယွၤလၢအကိးန့ၢ်သု ခီဖျိ ခရံာ်အတၢ်သးကညီၤ ဒိၣ်ဒိၣ်မုၢ်မုၢ်န့ၣ် သုဃၣ်ကွံာ်သုသးလၢ အအိၣ်ချ့မး ဒီးသုစးထီၣ်တူၢ်လိာ် တၢ်သးခုကစီၣ် လၢအဂၤတခါ အဃိ ယကမၢကမၣ် ဒိၣ်မးလီၤ.+
၇ နီၢ်ကီၢ်န့ၣ် တၢ်သးခုကစီၣ်လၢအဂၤန့ၣ် တအိၣ်နီတခါဘၣ်. ဘၣ်ဆၣ် ပှၤအိၣ်ဝဲတနီၤလၢ အမၤကီမၤခဲသု+ ဒီးအဲၣ်ဒိးမၤဘံဘူထီၣ်ဝဲ တၢ်သးခုကစီၣ်လၢ အဘၣ်ဃးဒီးခရံာ်လီၤ.
၈ ဘၣ်ဆၣ်ပဝဲမ့ၢ်ဂ့ၤ, မူခိၣ်ကလူး မ့ၢ်ဂ့ၤ မ့ၢ်စံၣ်တဲၤတဲလီၤသု တၢ်သးခုကစီၣ်တခါလၢ အလီၤဆီဒီး တၢ်သးခုကစီၣ်လၢ ပစံၣ်တဲၤတဲလီၤတ့ၢ်သုန့ၣ် မ်အဘၣ် ဆိၣ်အၢတက့ၢ်.
၉ ဒ်ပတဲတ့ၢ်လၢညါအသိး ခဲအံၤ ယကတဲကဒီး အသီတဘျီလၢ ပှၤလၢအစံၣ်တဲၤတဲလီၤ တၢ်သးခုကစီၣ်လၢ အလီၤဆီဒီးတၢ်လၢ သုတူၢ်လိာ်တ့ၢ်အီၤန့ၣ် မ်အဘၣ် တၢ်ဆိၣ်အၢတက့ၢ်.
၁၀ မ့ၢ်ယဂုာ်ကျဲးစၢးမၤတၢ်ဘၣ် ပှၤဟီၣ်ခိၣ်ဖိ အသးဧါ မ့တမ့ၢ် တၢ်ဘၣ်ကစၢ်ယွၤ အသးဧါ. ယမ့ၢ်လူၤဘၣ်ဒံး ပှၤဟီၣ်ခိၣ်ဖိအသးန့ၣ် ယတမ့ၢ်ခရံာ်အကုၢ်ဘၣ်.
၁၁ ဒီပုၢ်ဝဲၢ်သ့ၣ်ဧၢ, ယအဲၣ်ဒိးလၢ သုကသ့ၣ်ညါလၢ တၢ်သးခုကစီၣ်လၢ ယစံၣ်တဲၤတဲလီၤသုန့ၣ် တဟဲလၢ ပှၤဟီၣ်ခိၣ်ဖိ အအိၣ်ဘၣ်.+
၁၂ ယတဒိးန့ၢ်ဘၣ်အီၤလၢ ပှၤဂၤအအိၣ်ဘၣ် ဒီးပှၤဂၤတသိၣ်လိစ့ၢ်ကီးယၤ နီတဂၤဘၣ်. ဘၣ်ဆၣ် ယဒိးန့ၢ်ဘၣ်အီၤခီဖျိ တၢ်လီၣ်ဖျါလၢ ယ့ၣ်ၡူးခရံာ် အအိၣ်လီၤ.
၁၃ ဖဲယအိၣ်လၢ ယူဒၤတၢ်ဘူၣ်တၢ်ဘါအပူၤအခါ တၢ်လၢ ယမၤတ့ၢ်အီၤတဖၣ်န့ၣ် သုနၢ်ဟူဘၣ်လံ.+ ယမၤအၢမၤသီ ကစၢ်ယွၤအတၢ်အိၣ်ဖှိၣ် သပှၢ်တၢၢ် ဒီးယမၤအီၤ နးမးလီၤ.+
၁၄ ဒီးလၢယူဒၤ အတၢ်ဘူၣ်တၢ်ဘါအပူၤန့ၣ် ယလဲၤထီၣ်လဲၤထီ အါန့ၢ်ဒံး ယပှၤကလုာ်အါဂၤလၢ အတဖးဃီဒီးယၤလီၤ. ဒီးဘၣ်ဃးဒီး မိၢ်ပၢ်ဖံဖု လၢပျၢၤတဖၣ် အလုၢ်လၢ်န့ၣ် ယသးဆူၣ်န့ၢ်ဒံးအဝဲသ့ၣ် စၢၢ်တလၢၢ်လီၤ.+
၁၅ ဘၣ်ဆၣ် ကစၢ်ယွၤလၢ ယဟဲအိၣ်ဖျဲၣ်ထီၣ် လၢအဃိ ခီဖျိလၢ ယမိၢ်အဒၢလီၢ်အပူၤန့ၣ် အဝဲကိးန့ၢ်ယၤလၢ အတၢ်သးကညီၤ ဒိၣ်ဒိၣ်မုၢ်မုၢ်အဃိလီၤ.+ ကစၢ်ယွၤအဲၣ်ဒိး
၁၆ သူယၤလၢ ယကစံၣ်တဲၤတဲလီၤ တၢ်သးခုကစီၣ်ဆူ ပှၤကလုာ်တဖၣ် အအိၣ် ဒ်သိးအဝဲသ့ၣ်ကသ့ၣ်ညါ အဖိခွါအဂီၢ်လီၤ.+ ဖဲန့ၣ်အခါ ယတဃ့တၢ်ဟ့ၣ်ကူၣ်လၢ ပှၤဟီၣ်ခိၣ်ဖိအအိၣ် နီတဂၤဘၣ်.
၁၇ ဒီးယတလဲၤထီၣ်လၢ ဝ့ၢ်ယရူၤၡလ့ၣ်ဆူ ပှၤလၢအကဲဆိပာ်စၢၤ တၢ်မၢဖိလၢ ယမဲာ်ညါတဖၣ် အအိၣ်ဘၣ်. ဘၣ်ဆၣ် ယလဲၤလၢ ကီၢ်ဧ့ရ့း ဝံၤဒီးယဟဲက့ၤကဒီးလၢ ဝ့ၢ်ဒၤမ့ၤစ့းလီၤ.+
၁၈ သၢနံၣ်ဝံၤအလီၢ်ခံ ယလဲၤထီၣ်လၢ ဝ့ၢ်ယရူၤၡလ့ၣ်+ ဒ်သိးယကလဲၤအိၣ်သကိး စီၤက့ၤဖး*+ ဒီးယအိၣ်ဒီးအီၤဖဲန့ၣ် ၁၅ သီလီၤ.
၁၉ ဘၣ်ဆၣ် ယတထံၣ် တၢ်မၢဖိအဂၤတဖၣ် နီတဂၤဘၣ်. ယထံၣ်ထဲ ကစၢ်အဒီပုၢ်ဝဲၢ်ခွါ စီၤယၤကိာ်လီၤ.+
၂၀ ဘၣ်ဃးဒီးတၢ်ဂ့ၢ်လၢ ယကွဲးန့ၢ်သုတဖၣ်န့ၣ် လၢကစၢ်ယွၤအမဲာ်ညါ ယတဲသုတီတီလၢ ယတလံၣ်တၢ်လီတၢ်ဘၣ်.
၂၁ ဝံၤဒီး ယလဲၤလၢ ကီၢ်စူၤရံ ဒီးကံၤလံၤကံကီၢ်ရ့ၣ် အဟီၣ်ကဝီၤတဖၣ်လီၤ.+
၂၂ ဘၣ်ဆၣ် ခရံာ်အပျဲၢ်အဘီၣ်လၢ အအိၣ်လၢ တၢ်အိၣ်ဖှိၣ်တဖၣ်လၢ ယူဒၤအဟီၣ်ကဝီၤအပူၤန့ၣ် တထံၣ်ဘၣ်ယၤ နီတဘျီဒံးဘၣ်.
၂၃ အိၣ်ဒၣ် အဝဲသ့ၣ်နၢ်ဟူဘၣ် ပှၤတဲလၢ “လၢညါ ပှၤတဂၤလၢ အမၤအၢမၤနးပှၤ+ ဒီးမၤအၢမၤနး တၢ်အိၣ်ဖှိၣ်တဖၣ်န့ၣ်* ခဲအံၤ အဝဲစံၣ်တဲၤတဲလီၤ တၢ်သးခုကစီၣ်လံ.”+
၂၄ လၢတၢ်န့ၣ်အဃိ အဝဲသ့ၣ် မၤလၤကပီၤ ကစၢ်ယွၤ ခီဖျိလၢယၤ အဃိလီၤ.
