ကလၤတံ ၂:၁-၂၁
၂ ဒီး ၁၄ နံၣ် ဝံၤအလီၢ်ခံ ယလဲၤထီၣ်ကဒီးလၢ ဝ့ၢ်ယရူၤၡလ့ၣ် ဃုာ်ဒီးစီၤဘၢ်နါဘၤ+ ဒီးယလဲၤကိးဃုာ်ဒီး စီၤတံတူးစ့ၢ်ကီးလီၤ.+
၂ ယလဲၤထီၣ်ဖဲန့ၣ် ခီဖျိလၢ ယဒိးန့ၢ်ဘၣ် တၢ်လီၣ်ဖျါတခါ အဃိလီၤ. ဒီးတၢ်သးခုကစီၣ်လၢ ယစံၣ်တဲၤတဲလီၤလၢ ပှၤကလုာ်တဖၣ်အကျါန့ၣ် ယတဲဖျါထီၣ်အီၤလၢ ဒီပုၢ်ဝဲၢ်လၢ ပှၤပာ်ဒိၣ်ပာ်ကဲအီၤတဖၣ် အမဲာ်ညါ ကစုဒုလီၤ. ယမၤဒ်န့ၣ် ဒ်သိး ယကသ့ၣ်ညါ လီၤတံၢ်လီၤဆဲးလၢ တၢ်စံၣ်တဲၤတဲလီၤလၢ ယမၤတ့ၢ်အီၤ လၢညါမ့ၢ်ဂ့ၤ, ခဲအံၤမ့ၢ်ဂ့ၤ မ့ၢ်အကဲတၢ်ကလီကလီဧါန့ၣ်လီၤ.
၃ ဒီးစီၤတံတူး+ လၢအမ့ၢ် ပှၤကြံးဖိ လၢအအိၣ်ဒီးယၤဖဲန့ၣ်ဒၣ်လဲာ် ပှၤတမၢဆူၣ်အီၤလၢ အကဒိးတၢ်ကူးတရံးဘၣ်.+
၄ ဘၣ်ဆၣ် တၢ်ဂ့ၢ်တခါန့ၣ် ဟဲအိၣ်ထီၣ်ခီဖျိလၢ ဒီပုၢ်ဝဲၢ်ခွါအဘျၣ်တဖၣ်လၢ အဟဲနုာ်လီၤကစုဒု အဃိလီၤ.+ အဝဲသ့ၣ် ဟဲနုာ်လီၤခူသူၣ် ဒ်တၢ်မဲာ်ချံတဖၣ်အသိး ဒ်သိးကထီဒါ တၢ်သဘျ့လၢ+ ပဒိးန့ၢ်ဘၣ်အီၤ လၢယ့ၣ်ၡူးခရံာ်အဃိလီၤ. ဒီးအဝဲသ့ၣ်အဲၣ်ဒိး ဒုးကဲထီၣ်ပှၤလၢကုၢ် သပှၢ်တၢၢ်လီၤ.+
၅ ဒ်သိးတၢ်သးခုကစီၣ် အတၢ်မ့ၢ်တၢ်တီ ကဆဲးအိၣ်ဒီးသုအဂီၢ် ပတဒိကနၣ် အဝဲသ့ၣ်အကလုၢ် နီတစဲးဘၣ်.+
၆ ဘၣ်ဆၣ် ဒီပုၢ်ဝဲၢ်လၢအဖျါလီၤဂာ်လၢ အမ့ၢ်ပှၤအရ့ဒိၣ်တဖၣ်န့ၣ်+ အဝဲသ့ၣ်မ့ၢ်တ့ၢ် ပှၤဒ်လဲၣ်သနာ်က့ မ့ၢ်လၢ ကစၢ်ယွၤ တကွၢ်တၢ်လၢ အအိၣ်ဖျါလၢခိဘၣ်အဃိ အတမ့ၢ် တၢ်လၢအရ့ဒိၣ်လၢယဂီၢ်ဘၣ်. ဒီပုၢ်ဝဲၢ်လၢ ပှၤပာ်ဒိၣ်ပာ်ကဲအီၤတဖၣ်အံၤ တဒုးနၢ်ပၢၢ်ယၤ တၢ်လၢအသီနီတမံၤဘၣ်.
၇ လၢတၢ်န့ၣ်အလီၢ် အဝဲသ့ၣ်ထံၣ်ဝဲလၢ တၢ်အးလီၤယၤလၢ တၢ်သးခုကစီၣ်လၢ ပှၤလၢအတဘၣ် တၢ်ကူးတရံးအီၤဘၣ်တဖၣ်အဂီၢ်+ ဒ်တၢ်အးလီၤ စီၤပ့းတရူး လၢတၢ်သးခုကစီၣ်လၢ ပှၤလၢ အဒိးတၢ်ကူးတရံးတဖၣ်အဂီၢ် အသိးလီၤ.
၈ ပှၤတဂၤဃီ လၢအဟ့ၣ်စိဟ့ၣ်ကမီၤ စီၤပ့းတရူး ဒ်သိးကကဲတၢ်မၢဖိ လၢပှၤလၢအဒိး တၢ်ကူးတရံးတဖၣ် အဂီၢ်န့ၣ် ဟ့ၣ်စိဟ့ၣ်ကမီၤစ့ၢ်ကီးယၤ ဒ်သိးယကကဲတၢ်မၢဖိ လၢပှၤကလုာ်တဖၣ် အဂီၢ်လီၤ.+
၉ ဖဲစီၤယၤကိာ်,+ စီၤက့ၤဖး* ဒီးစီၤယိၤဟၣ် လၢအလီၤဂာ်ဒီး တၢ်အိၣ်ဖှိၣ်အထူၣ်တဖၣ် နၢ်ပၢၢ်ဝဲလၢ ကစၢ်ယွၤ ပာ်ဖျါထီၣ် တၢ်သးကညီၤ ဒိၣ်ဒိၣ်မုၢ်မုၢ် လၢယဖီခိၣ်အခါ+ အဝဲသ့ၣ် ဖီၣ်လိာ်သးစုဒီး ယၤဒီးစီၤဘၢ်နါဘၤ+ လၢအစုထွဲလီၤ. ဒီးအဝဲသ့ၣ် မၤဝဲဒ်န့ၣ် ဒ်သိးကပာ်ဖျါထီၣ်လၢ အဝဲသ့ၣ် အသးလီၤပလိာ်လၢ ပဝဲန့ၣ် ပကြၢးလဲၤလၢ ပှၤကလုာ်တဖၣ်အအိၣ် ဒီးမ့မ့ၢ်အဝဲသ့ၣ်န့ၣ် ကြၢးလဲၤလၢ ပှၤဒိးတၢ်ကူးတရံးတဖၣ် အအိၣ်လီၤ.
၁၀ အဝဲသ့ၣ် မၢပှၤထဲတမံၤလၢ ပကသ့ၣ်နီၣ်ထီၣ် ပှၤဖှီၣ်ဖိယာ်ဖိတဖၣ်လီၤ. အဃိ ယဂုာ်ကျဲးစၢး မၤဒ်န့ၣ် သပှၢ်တၢၢ်လီၤ.+
၁၁ ဘၣ်ဆၣ် ဖဲစီၤက့ၤဖး*+ လဲၤလၢ ဝ့ၢ်အၣ်တံၤအီာ်အခါန့ၣ်+ ယလဲၤသဂၢၢ်အီၤ ဒီးယထီဒါအီၤ မဲာ်သကိးမဲာ် မ့ၢ်လၢ အမၤတၢ်န့ၣ် ကမၣ်ဝဲအဃိလီၤ.
၁၂ တချုးလၢ ပှၤတနီၤနီၤလၢ အဘၣ်ထွဲဒီး စီၤယၤကိာ်+ ဟဲတုၤဒံးဘၣ်န့ၣ် အဝဲအီၣ်ဃုာ်တၢ်ဒီး ပှၤကလုာ်တဖၣ်လီၤ.+ ဘၣ်ဆၣ် ဖဲပှၤသ့ၣ်တဖၣ်န့ၣ် ဟဲတုၤဝဲအခါ အဝဲပတုာ်ဝဲဒီး ထုးဖးအသး မ့ၢ်လၢ အဝဲပျံၤပှၤလၢ အဆီၣ်ထွဲ တၢ်ဒိးတၢ်ကူးတရံးတဖၣ် အဃိလီၤ.+
၁၃ ဒီးပှၤယူဒၤဖိအဂၤတဖၣ် ပာ်မၤအသးစ့ၢ်ကီး ဒီးမၤဝဲဒ်အီၤအသိး တုၤဒၣ်လဲာ် စီၤဘၢ်နါဘၤစ့ၢ်ကီး ပာ်မၤအသးဃုာ်ဒီးအဝဲသ့ၣ်လီၤ.
၁၄ ဖဲယထံၣ်ဘၣ်လၢ အဝဲသ့ၣ်တမၤထွဲ ဒ်တၢ်သးခုကစီၣ် အတၢ်မ့ၢ်တၢ်တီ အိၣ်ဝဲအသိးဘၣ်အခါ+ ယတဲ စီၤက့ၤဖးလၢ အဝဲသ့ၣ်ခဲလၢာ် အမဲာ်ညါလၢ “နမ့ၢ် ပှၤယူဒၤဖိတဂၤ ဘၣ်ဆၣ် နအိၣ်မူဒ် ပှၤကလုာ်တဖၣ်အသိး ဒီးတမ့ၢ်ဒ်ပှၤယူဒၤဖိ တဂၤအသိးဘၣ်. အဃိ နမၢဆူၣ် ပှၤကလုာ်တဖၣ်လၢ ကအိၣ်မူဒ် ပှၤယူဒၤဖိတဖၣ် အလုၢ်အလၢ်အသိး ကသ့ဒ်လဲၣ်.”+
၁၅ ပတလီၤဂာ်ဒ်သိးဒီး ပှၤကလုာ်တဖၣ် လၢအမ့ၢ် ပှၤတၢ်ဒဲးဘးဖိဘၣ်. ပဝဲလၢ အအိၣ်ဖျဲၣ်ထီၣ် ဒ်ပှၤယူဒၤဖိတဖၣ်န့ၣ်
၁၆ ပနၢ်ပၢၢ်လၢ ပှၤတဂၤဂၤ ဘၣ်တၢ်ပာ်တီပာ်လိၤအီၤထဲလၢ အတၢ်နာ်+ ယ့ၣ်ၡူးခရံာ်အဃိ+ ဒီးတမ့ၢ်လၢ တၢ်မၤလၢအဘၣ်ထွဲဒီး တၢ်သိၣ်တၢ်သီအဃိဘၣ်. ပနာ်ယ့ၣ်ၡူးခရံာ် ဒ်သိး ကစၢ်ယွၤကပာ်တီပာ်လိာ်ပှၤ လၢတၢ်နာ်ခရံာ်အဃိ ဒီးတမ့ၢ်လၢ တၢ်မၤလၢအဘၣ်ထွဲဒီး တၢ်သိၣ်တၢ်သီ အဃိဘၣ်. ပှၤလၢ ကစၢ်ယွၤ ပာ်တီပာ်လိၤအီၤလၢ တၢ်မၤလၢအဘၣ်ထွဲဒီး တၢ်သိၣ်တၢ်သီအဃိန့ၣ် တအိၣ်နီတဂၤဘၣ်.+
၁၇ ပမ့ၢ်ဂုာ်ကျဲးစၢး ဒ်သိး ကစၢ်ယွၤ ကပာ်တီပာ်လိၤပှၤလၢ ခရံာ်အဃိ သနာ်က့ ပှၤမ့ၢ်ထံၣ်ပှၤဒ် ပှၤတၢ်ဒဲးဘးဖိတဖၣ်အသိးန့ၣ် အခီပညီမ့ၢ်ဝဲလၢ ခရံာ်ကဲ တၢ်ဒဲးဘး အခ့အပှၤန့ၣ်ဧါ. လ့ၤတက့ၤ တမ့ၢ်ဘၣ်.
၁၈ ယမ့ၢ်က့ၤသူၣ်ထီၣ်ကဒါက့ၤ တၢ်လၢ ယမၤလီၤပှီၢ်တ့ၢ်တဖၣ်န့ၣ် မ့ၢ်ဒၣ် ယပာ်ဖျါထီၣ်လၢ ယမ့ၢ်ပှၤလၢအမၤကမၣ် တၢ်သိၣ်တၢ်သီလီၤ.
၁၉ ခီဖျိလၢ ယတူၢ်လိာ်ပာ်စၢၤ တၢ်သိၣ်တၢ်သီအဃိ ယသံသဒၣ်ကွံာ် တၢ်သိၣ်တၢ်သီ*+ ဒ်သိးယကမူလၢ ကစၢ်ယွၤအဂီၢ်လီၤ.
၂၀ ယဘၣ်တၢ်ပျၤထီယၤ ဃုာ်ဒီးခရံာ်လၢ သ့ၣ်တၢၣ်အလိၤလီၤ.+ အဃိ ပှၤလၢအမူန့ၣ် တမ့ၢ်ယၤလၢၤဘၣ်,+ မ့ၢ်ဝဲခရံာ်မူလၢယပူၤလီၤ. ဒီးယတၢ်အိၣ်မူခဲအံၤန့ၣ် ယအိၣ်မူဒ် ယတၢ်နာ်ကစၢ်ယွၤအဖိခွါ အိၣ်ဝဲအသိးလီၤ.+ အဝဲအဲၣ်ယၤဒီး ဟ့ၣ်လီၤကွံာ် အသးသမူလၢ ယဂီၢ်လီၤ.+
၂၁ ယတတၢၤကွံာ် ကစၢ်ယွၤ အတၢ်သးကညီၤ ဒိၣ်ဒိၣ်မုၢ်မုၢ်ဘၣ်.+ တၢ်တီတၢ်လိၤ မ့ၢ်ဟဲခီဖျိလၢ တၢ်သိၣ်တၢ်သီန့ၣ် အခီပညီမ့ၢ်ဝဲ ခရံာ်တူၢ်သံအသး ကလီကလီလီၤ.+
တၢ်ဂ့ၢ်အဘျဲၣ်တဖၣ်
^ ဘၣ်တၢ်ကိးစ့ၢ်ကီးအီၤလၢ စီၤပ့းတရူး.
^ ဘၣ်တၢ်ကိးစ့ၢ်ကီးအီၤလၢ စီၤပ့းတရူး.
^ မ့ၢ်စ့ၢ်ကီး “ယထူၣ်ဖျဲးထီၣ်ကွံာ်လၢ တၢ်သိၣ်တၢ်သီ.”
