စကၤရယၤ ၁:၁-၂၁
-
တၢ်ကွဲမုာ်လၢ ပှၤကဟဲက့ၤကဒါက့ၤလၢ ယဟိဝၤယွၤအအိၣ် (၁-၆)
-
“ဟဲက့ၤကဒါက့ၤလၢ ယအိၣ် ဒီးယကဟဲက့ၤကဒါက့ၤလၢ သုအိၣ်” (၃)
-
-
တၢ်ထံၣ်လၢညါခီ ၁ - ပှၤဒိးကသ့ၣ်ဖိတဖၣ် အိၣ်ဝဲလၢ သ့ၣ်သမ့ၤဟဒးတဖၣ်အကျါ (၇-၁၇)
-
“ယဟိဝၤယွၤ ကမၤမုာ်ထီၣ်ကဒီး စံယိၣ်” (၁၇)
-
-
တၢ်ထံၣ်လၢညါခီ ၂ - တၢ်အနၢၤလွံၢ်ဘိ ဒီးပှၤစုသ့ဖိလွံၢ်ဂၤ (၁၈-၂၁)
၁ ဖဲစီၤဒၤရယါဝ့ၣ် ပၢတၢ်ခံနံၣ်တနံၣ်+ လါဃိးလါတလါန့ၣ် ယဟိဝၤယွၤ တဲတၢ်ဒီး စီၤဘရ့ကံယၤ အဖိခွါ ဝံစကၤရယၤလီၤ.*+ စီၤဘရ့ကံယၤ မ့ၢ်ဝဲ စီၤဧံးဒိၤအဖိခွါလီၤ. ကစၢ်ယွၤ တဲဝဲလၢ
၂ “ယၤ, ယဟိဝၤယွၤ သးပှံၢ်ထီၣ် သုပၢ်တဖၣ် ဒိၣ်မးလီၤ.+
၃ “တဲဘၣ်အဝဲသ့ၣ်လၢ ‘တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲဒ်အံၤ “တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ ‘ဟဲက့ၤကဒါက့ၤလၢ ယအိၣ် ဒီးယကဟဲက့ၤကဒါက့ၤလၢ သုအိၣ်လီၤ.’+ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲဒ်န့ၣ်လီၤ.”’
၄ “‘တဘၣ်မၤဒ်သိးဒီး သုပၢ်တဖၣ်တဂ့ၤ. ဝံလၢညါတဖၣ် တဲအဝဲသ့ၣ်လၢ “တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ ‘ဝံသးစူၤ ပာ်တ့ၢ်ကွံာ် သုကျဲအၢကျဲသီ ဒီးမၤတၢ်အၢလၢၤတဂ့ၤ.’”’+
“ယဟိဝၤယွၤ တဲဝဲလၢ ‘အဝဲသ့ၣ် တဒိကနၣ်တၢ်ဘၣ် ဒီးအဝဲသ့ၣ် တကနၣ်ဃုာ်ယၤ နီတစဲးဘၣ်.’+
၅ “‘သုပၢ်တဖၣ်န့ၣ် သံဝဲလံ. ဒီးဝံသ့ၣ်တဖၣ်န့ၣ် တအိၣ်မူလၢၤဘၣ်.
၆ ဘၣ်ဆၣ် ယမၤလိာ် ယခ့ယပှၤတဖၣ် ဒီးယဝံတဖၣ်လၢ ကတဲဘၣ် သုပၢ်တဖၣ် လၢယတၢ်ကတိၤ ဒီးယတၢ်ဘျၢတဖၣ် ဒီးသုပၢ်တဖၣ်န့ၣ် ထံၣ်ဝဲလၢ အဟဲလၢထီၣ်ပှဲၤထီၣ်လီၤ.’+ လၢတၢ်န့ၣ်အဃိ အဝဲသ့ၣ် ဟဲက့ၤလၢ ယအိၣ် ဒီးတဲဝဲလၢ ‘တၢ်သုးမုၢ်ဂီၢ်မုၢ်အကစၢ် ယဟိဝၤယွၤ မၤပှၤဒ် ပတၢ်သကဲာ်ပဝး ဒီးပတၢ်မၤ အိၣ်ဝဲအသိး ဒီးဒ်အတဲပာ်စၢၤဝဲ အသိးလီၤ.’”+
၇ ဖဲစီၤဒၤရယါဝ့ၣ် ပၢတၢ်ခံနံၣ်တနံၣ်,+ လါ ၁၁ လါ လၢအမ့ၢ် လါၡဘး* ထီၣ် ၂၄ သီတသီန့ၣ် ယဟိဝၤယွၤ ဒုးထံၣ် စီၤဘရ့ကံယၤ အဖိခွါ လၢအမ့ၢ် ယၤ, စီၤစကၤရယၤလၢ တၢ်ထံၣ်လၢညါခီလီၤ. စီၤဘရ့ကံယၤ မ့ၢ်ဝဲ စီၤဧံးဒိၤအဖိခွါလီၤ.
၈ “ဒီးယထံၣ်ဘၣ် တၢ်ထံၣ်လၢညါခီ ဖဲမုၢ်နၤခီ အဆၢကတီၢ်လီၤ. ပှၤတဂၤဒိးဝဲ ကသ့ၣ်လၢ အလွဲၢ်ဂီၤတဒု ဒီးအဝဲ ဆၢထၢၣ်ဝဲ ဂၢၢ်တပၢၢ် ဖဲတၢ်တြီၤပူၤလၢ သ့ၣ်သမ့ၤဟဒးတဖၣ် အကျါလီၤ. လၢပှၤတဂၤန့ၣ် အလီၢ်ခံန့ၣ် အိၣ်ဝဲဒီး ကသ့ၣ်အဂီၤ, ကသ့ၣ်အဃး ဒီးကသ့ၣ်အဝါတဖၣ်လီၤ.”
၉ အဃိ ယတဲလၢ “ယကစၢ်ဧၢ, အဝဲသ့ၣ် မ့ၢ်မတၤတဖၣ်လဲၣ်.”
ဒီးမူခိၣ်ကလူးလၢ အတဲတၢ်ဒီးယၤန့ၣ် တဲဆၢယၤလၢ “အဝဲသ့ၣ် မ့ၢ်မတၤတဖၣ်လဲၣ်န့ၣ် ယကဒုးနဲၣ်နၤ.”
၁၀ ပှၤပိာ်ခွါတဂၤလၢ အဆၢထၢၣ်ဝဲ ဂၢၢ်တပၢၢ် လၢသ့ၣ်သမ့ၤဟဒးတဖၣ် အကျါန့ၣ် တဲဝဲလၢ “ပှၤသ့ၣ်တဖၣ်အံၤန့ၣ် ယဟိဝၤယွၤ ဆှၢလီၤအီၤ ဒ်သိး အဝဲသ့ၣ် ကဟးဝ့ၤဝီၤဝဲလၢ ဟီၣ်ခိၣ်ချၢလီၤ.”
၁၁ ဒီးအဝဲသ့ၣ် တဲဘၣ် ယဟိဝၤယွၤ အမူခိၣ်ကလူး လၢအဆၢထၢၣ်ဝဲလၢ သ့ၣ်သမ့ၤဟဒး အကျါတဂၤန့ၣ်လၢ “ပဟးဝ့ၤဝီၤလၢ ဟီၣ်ခိၣ်ချၢလံ. ဟီၣ်ခိၣ်ဒီဘ့ၣ်န့ၣ် အိၣ်ဝဲဘှ့ၣ်ဘှ့ၣ်ဘှီၣ်ဘှီၣ် ဒီးမုာ်မုာ်ခုၣ်ခုၣ်လီၤ.”+
၁၂ ယဟိဝၤယွၤ အမူခိၣ်ကလူး တဲဝဲလၢ “အိ တၢ်သုးမုၢ်ဂီၢ်မုၢ်အကစၢ် ယဟိဝၤယွၤဧၢ, နသးထီၣ် ဝ့ၢ်ယရူၤၡလ့ၣ် ဒီးယူဒၤအဝ့ၢ်တဖၣ် အနံၣ် ၇၀ လံ.+ နတပာ်ဖျါထီၣ် နတၢ်သးကညီၤလၢ အဝဲသ့ၣ်အဖီခိၣ်ဘၣ်န့ၣ် ကယံာ်ဒံးထဲလဲၣ်.”+
၁၃ ဒီးမူခိၣ်ကလူးတဂၤလၢ အတဲတၢ်ဒီးယၤန့ၣ် ယဟိဝၤယွၤ တဲဆၢအီၤမုာ်မုာ် ဒီးကပုာ်လုးလီၤ.
၁၄ ဒီးမူခိၣ်ကလူး လၢအတဲတၢ်ဒီးယၤန့ၣ် တဲယၤလၢ “ကိးထီၣ်ဒ်အံၤ, ‘တၢ်သုးမုၢ်ဂီၢ်မုၢ် အကစၢ် ယဟိဝၤယွၤ တဲဝဲလၢ “ယသးဆူၣ်လၢ ဝ့ၢ်ယရူၤၡလ့ၣ်အဂီၢ် ဒီးယသးဆူၣ်လၢ စံယိၣ်အဂီၢ် ဒိၣ်မးလီၤ.+
၁၅ လၢအခီၣ်ထံးန့ၣ် ယပာ်လီၤယသးလၢ ယကစံၣ်ညီၣ် ယပှၤဂီၢ်မုၢ် ဖဲအကြၢး+ ဘၣ်ဆၣ် ပှၤကလုာ်တဖၣ် မၤအါထီၣ် အဝဲသ့ၣ် အတၢ်နးတၢ်ဖှီၣ်လီၤ.+ အဃိ ပှၤကလုာ်လၢ အဆိကမိၣ်လီၤအသးလၢ အအိၣ်ဘၣ် ဘံၣ်ဘံၣ်ဘၢဘၢတဖၣ်အံၤန့ၣ်+ ယသးဒိၣ်ထီၣ် အဝဲသ့ၣ် ဒိၣ်မးလီၤ.”’
၁၆ “ယဟိဝၤယွၤ တဲဝဲလၢ “‘ယကဟဲက့ၤကဒါက့ၤလၢ ဝ့ၢ်ယရူၤၡလ့ၣ်အအိၣ် လၢတၢ်သးကညီၤအပူၤ+ ဒီးယဟံၣ်ကဘၣ်တၢ်တ့ထီၣ်အီၤ လၢအပူၤလီၤ.+ ဒီးတၢ်ကထုးထီၣ် တၢ်ထိၣ်ပျံၤတဘိလၢ ဝ့ၢ်ယရူၤၡလ့ၣ် အဖီခိၣ်လီၤ.”+ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲဒ်န့ၣ်လီၤ.’
၁၇ “ကိးထီၣ်ကဒီးလၢ ‘တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ “တၢ်ဂ့ၤတၢ်ဝါလၢ အဟဲလၢယအိၣ်န့ၣ် ကအိၣ်ပှဲၤလီၤလာ်လၢ ယဝ့ၢ်တဖၣ်အပူၤ ဒီးယၤ, ယဟိဝၤယွၤ ကမၤမုာ်ထီၣ်ကဒီး စံယိၣ်+ ဒီးဃုထၢထီၣ်ကဒါက့ၤ ဝ့ၢ်ယရူၤၡလ့ၣ်လီၤ.”’”+
၁၈ ဒီးယကွၢ်ထီၣ်တၢ် ဒီးယထံၣ် တၢ်အနၢၤ လွံၢ်ဘိလီၤ.+
၁၉ အဃိ ယသံကွၢ် မူခိၣ်ကလူးလၢ အတဲတၢ်ဒီးယၤတဂၤန့ၣ်လၢ “တၢ်တဖၣ်န့ၣ် အကဲမနုၤလဲၣ်.” အဝဲတဲဆၢယၤလၢ “တၢ်အနၢၤတဖၣ်န့ၣ် မၤလီၤပြံလီၤပြါ ယူဒၤအပှၤဂီၢ်မုၢ်,+ အံၣ်စရ့လးအပှၤဂီၢ်မုၢ်+ ဒီးဝ့ၢ်ယရူၤၡလ့ၣ် အပှၤဂီၢ်မုၢ်လီၤ.”+
၂၀ ဒီးယဟိဝၤယွၤ ဒုးနဲၣ်ယၤ ပှၤစုသ့ဖိ လွံၢ်ဂၤလီၤ.
၂၁ ဒီးယသံကွၢ်လၢ “ပှၤစုသ့ဖိတဖၣ်အံၤ ကမၤမနုၤလဲၣ်.”
ဒီးအဝဲတဲလၢ “တၢ်အနၢၤတဖၣ်န့ၣ် မၤလီၤပြံလီၤပြါဝဲ ယူဒၤအပှၤဂီၢ်မုၢ် တုၤလၢ ပှၤမိာ်ထီၣ်ပှၤခိၣ်မး တဘူၣ်နီတဂၤဘၣ်. အဃိ ပှၤစုသ့ဖိတဖၣ်အံၤ ကလဲၤမၤပျံၤမၤဖုး ဒီးကွံာ်လီၤကွံာ် ပှၤကလုာ်အနၢၤတဖၣ်လၢ အသူဝဲ အစိကမီၤ* လၢကထီဒါ ယူဒၤအဟီၣ်ကဝီၤ ဒီးမၤလီၤပြံလီၤပြါ ယူဒၤ အပှၤဂီၢ်မုၢ် အဂီၢ်လီၤ.”
တၢ်ဂ့ၢ်အဘျဲၣ်တဖၣ်
^ အခီပညီမ့ၢ်ဝဲ “ယဟိဝၤ သ့ၣ်နီၣ်ထီၣ်က့ၤ.”
^ ကွၢ် တၢ်ဂ့ၢ်ဘၣ်ထွဲလိာ်သး ခ၁၅.
^ အခီပညီလိၤလိၤ “ယူာ်ထီၣ်အနၢၤ.”
